“To Fakalataha a Koe mo Au i Parataiso”

HE MAGAAHO ne tautau a ia i luga he akau fakahokoaga mate, kua hane mate ke he mamahi lahi mahaki, ne olelalo atu e tagata tane holifono he tapa hana: “Iesu na e, kia manatu mai au ka hoko atu a koe ke he hau a kautu.” Ko Iesu, pete ni kua hane mate foki a ia ti mamahi lahi mahaki, ne tali atu: “Kua moli lahi he tala atu e au ki a koe he aho nei, to fakalataha a Koe mo au i Parataiso.” (Luka 23:42, 43, NW) Ko e mafanatia ha a ia he amaamanakiaga ia ke tuku atu ke he tagata ia ne hane fae mate!

Kua kitia foki nakai e koe, ko e New World Translation (Liliuaga Lalolagi Fou)​—ko e liliuaga ne fatiaki mai he palatafa fakamua​—ne tuku e fakamailoga fakamaoki i tua he kupu “he aho nei” he magaaho ne tohia e tau kupu nei ha Iesu? Kua fakakite mai he manatu nei pete ni foki ko e aho mate hana a ia, kua maeke a Iesu ke mavehe atu e moui i Parataiso ke he tagata holifono ia. Ka e he taha fahi, kua fakamaoki he The New English Bible, e tau kupu ha Iesu ke he puhala nei: “Kua tala atu e au ki a koe e mena nei: he aho nei to fakalataha a koe mo au i Parataiso.” Laulahi e falu liliuaga ke tatai mo e The New English Bible, ne fakakite mai e manatu ko e to o atu a Iesu mo e tagata holifono ki Parataiso he aho ia ni. Ko e ha ne fekehekeheaki ai? Mo e ko e fakamailoga fakamaoki fe ne hako?

Kua moli ni, ne nakai fai fakamaokiaga i loto he tau mena tohia Heleni fakamua atu he Tohi Tapu. Ha kua pihia, he magaaho ne kamata ai e tau fakamaokiaga, kua taute ai e tau tagata lagaki Tohi Tapu mo e tau tagata fakaliliu ke taute ni hagaao ke he ha lautolu a maamaaga he kupu moli he Tohi Tapu. Kua hako kia, mogoia, e fakaaogaaga he mahani toka tuai? Kua o kia a Iesu mo e tagata taute mena kelea ki Parataiso he aho ne mamate a laua?

Nakai, hagaao ke he Tohi Tapu, ne o a laua ke he mena ne ui he vagahau Heleni ko Haʹdes mo e ke he vagahau Heperu ko Sheʹol, kua hagaao ua a laua ke he tukuaga famahani he tau tagata. (Luka 18:31-33; 24:46; Gahua 2:31) Ki a lautolu i loto he tau mena ia, kua pehe e Tohi Tapu: “Ka ko lautolu ne mamate nakai iloa e lautolu ha mena, . . . ha kua nakai fai gahua, po ke manamanatu, po ke mena kua iloa, po ke iloilo ke he tukuaga [Heleni, Haʹdes], kua fina atu ki ai a koe.” Nakai fakaai ko e parataiso!​—Fakamatalaaga 9:5, 10.

Ha kua nakai la hoko atu ke he aho ke tolu aki ne fakaliu tu mai a Iesu mai i Hate. He vaha he magaaho ia, ne teitei ke ono e tau fahi tapu ne feleveia atu a ia ke he tau tagata ne muitua ki a ia he motu Palesitaina. Taha mai he tau magaaho ia, ne tala age a Iesu ki a Maria: “Ha ko e mena nakala hake ni au ke he haku a Matua.” (Ioane 20:17) Ti, kua eke foki he magaaho ia ke nakai la hoko atu ke he taha nofoaga kua maeke ke ui ko e parataiso.​—Fakakiteaga 2:7.

He senetenari ke tolu aki V.N.​—he magaaho kua mafiti lahi e fakaakoaga Kerisiano ke fio mo e tau fakaakoaga fakataitai Heleni​—ne fatiaki mai e Origen a Iesu he pehe: “He aho nei to fakalataha a koe mo au i loto he Parataiso he Atua.” He senetenari ke fa aki V.N., ne fetoko e tau tagata tohia mena fakalotu ke tuku e fakamaokiaga i tua he “aho nei.” Kua fakakite mai he mena nei ko e puhala toka tuai ke totou e tau kupu a Iesu kua leva e fakamauaga tuai. Ka kua fakakite foki he senetenari ke fa aki V.N., kua totou he falu e tau kupu a Iesu hagaao ke he puhala ne fakaaoga e lautolu i loto he New World Translation.

He vaha nei foki, pete ni kua tokologa e tau tagata fakaliliu ne fakamaoki e Luka 23:43 ke tuga e mahani toka tuai he lotu, kua fakamaoki he falu ke tuga he New World Translation. Ke tuga a nei, ke he liliuaga Sihamani he Tagata ako Tokoluga atu ko Wilhelm Michaelis, kua totou pehe e tau kupu a Iesu: “Kua moli lahi ni, ke atu e au ki a koe e fakamoliaga nei he aho nai foki: To fakalataha a koe (he taha aho) mo au i Parataiso.”

Ko e heigoa mogoia, e kakano he tau kupu a Iesu ke he tagata taute mena kelea? Kua logona e ia e tau talahauaga ko e Patuiki he maveheaga a Iesu. Kua nakai fakauaua, ne iloa e ia mataulu higoa “ko e patuiki he tau Iutaia” ne taute e Pilato ke tohia mo e tau ki luga he tapa ulu a Iesu. (Luka 23:35-38, NW) Pete ni ne ulu uka e tau takitaki lotu ke nakai talia a Iesu, ne talahau he tagata holifono tokihala nei hana tua, ne pehe: “Iesu na e, kia manatu mai au ka hoko atu a koe ke he hau a kautu.” Ne nakai amaamanaki a ia ke pule fakalataha mo Iesu, ka e manako a ia ke moua lagomatai mai he pule a Iesu. Ha kua pihia, ko Iesu, pete ni kua mua atu e uka he aho ia, ne mavehe to fakalataha e tagata taute mena hehe mo ia i Parataiso.

Ke he parataiso fe? I loto he Tohi Tapu, ko e Parataiso he kamataaga kua tuga e male manaia akau he kaina ko Etena ne fakagalo he tau mamatua fakamua ha tautolu. Ne mavehe e Tohi Tapu to liuaki mai e Parataiso ke he lalolagi, mai i lalo he Kautu he Atua ka Patuiki a Iesu. (Salamo 37:9-11; Mika 4:3, 4) Ha kua pihia, to fakalataha ai a Iesu mo e tagata taute mena hehe ia mo e tokologa foki falu ne mamate he magaaho ka fakaliliu tu mai e ia a lautolu mai he tukuaga ke he moui he lalolagi parataiso mo e moua e magaaho ke fakaako ke taute e finagalo he Atua mo e moui tukulagi.​—Ioane 5:28, 29; Fakakiteaga 20:11-13; 21:3, 4.