Ko e Heigoa ka Fakaako e Tautolu Mai he Tagata Matahavala?

Ko e tagata matahavala ne maeke a tautolu ke fakaako mai i ai kua kitia e koe a Iesu hane vagahau ki a ia he fakatino. Ne tokihala e tagata ia ke he haana tau matahavala. Ne ole a ia ki a Iesu: “Kia manatu mai a a koe kia au ka haele mai a koe ke he hau a kautu.” Mogonei, he kitia e koe he fakatino, kua tutala a Iesu ke he tagata matahavala nei. Iloa nakai e koe e mena hane tala age e Iesu ki a ia?—a Ne mavehe a Iesu ki a ia: ‘Ko e moli, ke tala atu e au kia koe he aho nei, to fakalataha ai a taua mo koe i parataiso.’

To fēfē e Parataiso ia he manatu haau?— Ke moua e tali hako, kia tutala a tautolu ke he Parataiso ne eke he Atua ma e tagata taane mo e fifine fakamua ko Atamu mo Eva. I fe e Parataiso ia? Haia kia he lagi po ke lalolagi?—

Hako a koe ka pehē a koe haia he lalolagi. Ti ka manamanatu a tautolu ke he tagata matahavala “i parataiso,” kua lata ia tautolu ke manamanatu ki a ia ka moui he lalolagi ka eke mo parataiso. To fēfē e Parataiso ia?— O mai la ke kitia.

He mole e tufuga e Iehova ko e Atua e hoa mau fakamua, ko Atamu mo Eva, ne pehē e Tohi Tapu kua tuku e ia a laua ke he parataiso he lalolagi nei. Ne fakahigoa ai ko e “kaina i Etena.” Maeke nakai a koe ke manamanatu ke he fulufuluola he “kaina i Etena”?— Mooli, ko e matakavi ne mitaki lahi ti mua atu e fulufuluola ke nofo ai ha tagata he vahā nei!

Fēfē e manatu haau? To ha ha i ai kia a Iesu he lalolagi nei mo e tagata matahavala ne tokihala ha ko e haana a tau gahala?— Nakai, to ha ha a Iesu he lagi hane pule ko e Patuiki ke he lalolagi Parataiso. To fakalataha a Iesu mo e tagata matahavala kakano to fakaliu tu mai a ia mai he mate mo e kitia ko ia ha he Parataiso he lalolagi. Ka ko e fakaatā he ha e Iesu e tagata matahavala ke moui ke he Parataiso?— Kia fakatutala tautolu ke he mena nei.

Mooli na taute he tagata matahavala nei e tau mena kelea lahi. Ka e pihia foki e tau piliona tagata ne momoui ke he lalolagi. Ka e laulahi ia lautolu ne taute e tau mena kelea ha ko e nakaila fakaako ai ki a Iehova mo e mena ne manako a ia ke taute e lautolu.

Ti ko e tau tagata pihia, ne putoia e tagata matahavala ne tutala a Iesu ki ai he akau, to fakaliu tu mai ke he moui he Parataiso he lalolagi nei. To fakaako a lautolu ke he finagalo he Atua. Ti maeke a lautolu ke fakamooli kua fakaalofa a lautolu ki a Iehova.

Iloa nakai e koe e puhala ka fakamooli e lautolu e mena ia?— He taute e mena ne manako e Atua ki a lautolu ke taute. Ko e homo ha ia ka momoui he Parataiso mogoia mo e fakalataha tumau mo e tau tagata ne fakaalofa ki a Iehova ti pihia ke he taha mo e taha!