To Tali Nakai a Koe ke he Fakaalofa a Iesu?
“Ha kua omoomoi a mautolu he fakaalofa a Keriso.”—2 KORINITO 5:14.
1. Maeke fefe e fakaalofa a Iesu ke fakamaama?
KO E moli, ko e fulufuluola ha a ia he fakaalofa a Iesu! Kaeke ke manamanatu a tautolu ke he nakai fai gataaga he hana a mamahi he magaaho ne taute e ia e lukutoto, ko e mena ia hokoia ni ke maeke ai ia tautolu ke moua e moui tukulagi, ti omoi moli kia ha tautolu a tau loto ke fakaaue ki a ia! Ko e Atua ni ko Iehova mo ia ko Iesu ne taute fakamua. Ne fakaalofa fakamua mai a laua ki a tautolu, ka ko e tau tagata agahala agaia a tautolu. (Roma 5:6-8; 1 Ioane 4:9-11) Ha kua iloa e “fakaalofa a Keriso,” he tohia he aposetolo ko Paulo, ko e “kua mua ue atu mai he lotomatala.” (Efeso 3:19, NW) Moli, ko e fakaalofa a Iesu kua hake mamao ki luga mai he fakaakoaga lotomatala ulu. Kua molea ki mua mai he tau mena oti ne kitia po ke iloa he tau tagata.
2. Ko e heigoa ne nakai maeke ke taofi aki a Iesu mai he fakaalofa ki a tautolu?
2 He tohi ke he tau Kerisiano i Roma, ne huhu a Paulo: “Ko hai kia taha ke vevehe kehe a tautolu mai he fakaalofa a Keriso? Ko e matematekelea kia po ke fakaatukehe po ke favale po ke hoge po ke telefua po ke hagahaga kelea po ke pelu?” Nakai fai mai he tau mena pihia ke uta kehe aki a Iesu he fakaalofa mai ki a tautolu. “Kua iloa tonuhia e au,” he tutaki atu e Paulo, “kua nakai maeke he mate po ke moui po ke tau agelu po ke tau fakatufono po ke tau mena ha ha hinai mogonai po ke tau mena ka hohoko mai po ke tau pule malolo po ke tokoluga po ke hokulo po ke ha mena he tau mena ne tufugatia kua nakai maeke ke vevehe kehe a tautolu mai he fakaalofa he Atua kua ha i ai ia Keriso Iesu ko e ha tautolu a Iki.”—Roma 8:35-39, NW.
3. Ko e heigoa hokoia ni e mena ne maeke ia Iesu mo e hana a Matua ke tiaki a tautolu?
3 Ko e fakaalofa he Atua ko Iehova mo Iesu ki a koe kua malolo lahi pihia. Ko e taha maka ni e mena ne maeke ke taofi a laua mai he fakaalofa ki a koe, kaeke ko e hau a manako ni ke fakatikai ha laua a fakaalofa ke nakai talia ke taute e tau mena ne ole mai e laua. Na fai magaaho ne fakamaama he perofeta he Atua ke he patuiki Iutaia: “Ha ha ia mutolu a Iehova, ka ha ha ia ia a mutolu; kaeke foki ke kumi e mutolu a ia, to moua e mutolu a ia; ka ko e mena ka tiaki e mutolu a ia, to tiaki e ia a mutolu.” (2 Nofoaga he Tau Patuiki 15:2) Ko hai ia tautolu ne manako ke fuluhi kehe mai he tau kapitiga fulufuluola mo e fakaalofa hofihofi tuga e Atua ko Iehova mo e hana a Tama, ko Iesu Keriso?
Tali Fakamitaki ke he Fakaalofa a Iesu
4, 5. (a) Maeke fefe he fakaalofa a Iesu ma tautolu ke lauia e fakafetuiaga ha tautolu mo e tau tagata? (e) Ko hai foki falu ne omoi a tautolu ke fakaalofa ki ai ha kua fakaalofa a Iesu ki a tautolu?
4 Lauia fefe a koe fakatagata he fakaalofa nakai fai gataaga a Iesu ki a koe? Maeke fefe ia koe ke pihia? Hanai, ne fakakite e Iesu e puhala ne taute aki e ia hana fakaalofa ke lauia ai e fakafetuiaga ha tautolu mo e tau tagata. Mole atu e fekafekau fakatokolalo a ia ke he hana a tau aposetolo he holoholo ha lautolu a tau hui, ne pehe a Iesu: “Kua fakatoka e au e fakafifitakiaga ma mutolu, he pihia, tuga he taute e au ki a mutolu, kua lata a mutolu ke taute pihia foki.” Ne lafi atu e ia: “Kua tuku atu e au ki a mutolu e poakiaga fou, kia fakaalofa a mutolu ko e taha ke he taha; tuga he fakaalofa atu au ki a mutolu, kia fakaalofa foki a mutolu ko e taha ke he taha.” (Ioane 13:15, 34, NW) Ne iloa he hana a tau tutaki, mo e omoi a lautolu ke lali ke taute tuga ni he taute e ia. “Ko e mena foki hanai kua iloa ai e tautolu e fakaalofa,” he tohi he aposetolo ko Ioane, “ha kua tuku atu e ia hana a solu ma tautolu; kua lago ai ki a tautolu ke tuku atu ha tautolu a tau solu ma e ha tautolu a tau matakainaga.”—1 Ioane 3:16, NW.
5 Ka e tumau agaia ni, to fakato noa e tautolu e kakano he moui mo e fekafekauaga a Iesu kaeke ke omoi noa he hana fakafifitakiaga a tautolu ke fakaalofa mo e fekafekau ke he tau mena ke fakafiafiaaki e tau tagata. Nakai kia ko e fakaalofa a Iesu ki a tautolu kua fakatupu foki ki a tautolu ke fakaalofa ki a ia ke taui aki mo e pauaki ke fakaalofa ke he hana a Matua, ko ia ne fakaako atu ki a ia e tau mena oti kua iloa e ia? To tali atu nakai a koe ke he fakaalofa a Keriso mo e fekafekau ke he hana a Matua tuga he taute e ia?—Efeso 5:1, 2; 1 Peteru 1:8, 9.
6. Lauia fefe e aposetolo ko Paulo he fakaalofa a Iesu ki a ia?
6 Manamanatu la ke he mena ne tupu ki a Saulo, ko ia ne higoa ai fakamui ko Paulo. Ko e taha magaaho ne favale a ia ki a Iesu, ne “faguhe mai e fakamatakutaku mo e kelipopo ke he tau tutaki.” (Gahua 9:1-5; Mataio 25:37-40) He magaaho ne iloa moli e Paulo a Iesu, ne loto fakaaue lahi a ia ha kua moua e fakamagaloaga nakai ko e talia ni e ia hokoia ke mamahi ma Iesu ka kua amaamanaki foki a ia ke mate ma hana. “Ne fakatautau fakalataha au mo Keriso,” he tohi e ia. “Ti nakai tuai ko au kua moui . . . Moli lahi, ko e moui kua moui ai au nai ke he tino, kua moui ai au he tua ke he Tama he Atua, ko ia ne fakaalofa mai ki a au, mo e foaki atu e ia a ia ke hukui aki au.”—Kalatia 2:20, NW.
7. Ko e heigoa kua lata he fakaalofa a Iesu ke fakaohoohoaki a tautolu ke taute?
7 Ko e omoi malolo ha a ia he tau momoui ha tautolu ke lata mo e fakaalofa a Iesu ma tautolu! “Ha kua omoomoi a mautolu he fakaalofa a Keriso,” he tohi e Paulo ke he tau tagata i Korinito ‘ke ua momoui a tautolu ma tautolu ni, ka e momoui ma hana ne mate ma tautolu mo e liu foki tu mai.’ (2 Korinito 5:14, 15) Hanai, kia fakaaue atu ki a Iesu ha kua tuku mai hana moui ke hukui aki a tautolu mo e kua lata ke omoi aki a tautolu ke taute e tau mena oti ka ole mai e ia. Ko e puhala ni a nei ke fakamoli a tautolu kua fakaalofa moli a tautolu ki a ia. “Kaeke ke fakaalofa mai a mutolu kia au, kia omaoma mai a mutolu ke he haku a tau poaki,” he pehe mai a Iesu. “Ko ia ha i ai haku a tau poaki, mo e omaoma ki ai, ko ia haia ke fakaalofa kia au.”—Ioane 14:15, 21; fakatatai 1 Ioane 2:3-5.
8. Maeke fefe e fakaalofa a Iesu ke lauia e tau momoui he tokologa he tau tagata taute mena kelea?
8 Ha kua iloa e tau poakiaga a Iesu, ko e tau tagata feuaki, faivao, mohe e tane mo e tane, kaiha, konahia, mo lautolu ne fofo mena i Korinito i tuai ne tali atu a lautolu ke he fakaalofa a Iesu ha kua tiaki e lautolu e tau tauteaga mena pihia. Ne tohi e Paulo hagaao ki a lautolu: “Ka kua koukou tuai a mutolu, . . . ka kua talahaua tututonu a mutolu ke he higoa he Iki ko Iesu.” (1 Korinito 6:9-11) Kua tatai ni, ne omoi he fakaalofa ha Keriso e tokologa he vaha nei ke taute e tau hikihikiaga mitaki lahi he ha lautolu a tau momoui. “Ko e kautu moli he tau Kerisiano, ne kitia mai he taute e tau tagata mitaki mai ia lautolu ne talahau ko e talia hana a tau fakaakoaga,” he tohi he tagata fakamau tala tuai ko John Lord. “Ne fai fakamoliaga a mautolu ke he ha lautolu a tau momoui nakai tutuhia, ke he ha lautolu a tau mahani nakai tokutoku, ke he ha lautolu a tau gahua fua mitaki, mo e ha lautolu a tau mahani mea Kerisiano.” Ko e kehe ha a ia ne taute he tau fakaakoaga a Iesu!
9. Ko e heigoa ne putoia ai he fanogonogo ki a Iesu?
9 Ko e moli, kua nakai fai kumikumiaga ka taute he tagata he vaha nei ke mua hake e aoga ke he kumikumiaga ia ke he moui mo e fekafekauaga a Iesu Keriso. ‘Onoono fakalahi ki a Iesu,’ he fakailoa mai he aposetolo ko Paulo. “Moli lahi, kia manamanatu fakatata lahi atu ke he taha [na].” (Heperu 12:2, 3, NW) Ke he magaaho he hikiaga ha Iesu, ko e Atua ni ne poaki hagaao ke he hana a Tama: “Kia fanogonogo a mutolu kia ia.” (Mataio 17:5) Kua lata mogoia, ke liu pehi, ko e fanogonogo ki a Iesu kua lafi ki luga mai he logona ni e tau mena ne talahau e ia. Ko e kakano ke omaoma ke he hana tau fakaakoaga, e, ke fifitaki ki a ia ke taute e tau mena ne taute e ia ke he puhala ne taute aki e ia. Ko e tali atu ha tautolu ke he fakaalofa a Iesu ke hiki mai a ia ke eke mo fakafifitakiaga ha tautolu, ke mumui fakatata ke he hana a tau tuaga hui.
Ko e Heigoa ha Iesu ne Manako ki a Tautolu ke Taute
10. Ko hai ha Iesu ne fakaako mo e ko e heigoa e kakano?
10 Ko e gahua pauaki a Iesu mai he Atua ko e fakamatala hagaao ke he Kautu he hana Matua, mo e fakaako e ia hana a tau tutaki ke taute e gahua taha ia ni. “Kia o a tautolu ke he tau māga ne tata mai,” he tala age e ia ke he hana a tau tutaki fakamua, “ke fakamatala atu e au ki ai e vagahau mitaki, ha ko e mena ia ne hau ai au.” (Mareko 1:38; Luka 4:43) Ko e magaaho fakamui, he oti e fakaako fakamitaki e tau aposetolo toko 12, ne tala age e Iesu ki a lautolu: “Ka e o a a mutolu mo e fakamatala atu, kia pehe atu, Kua tata mai tuai e kautu he lagi.” (Mataio 10:7) Ko e falu mahina fakamui, he oti e fakaako e 70 foki he falu, ne fakafano atu e ia a lautolu mo e poaki: “Ti tala age kia lautolu, Kua tata kia mutolu e kautu he Atua.” (Luka 10:9) Kua maama mitaki, ne manako a Iesu ke he hana a tau tutaki ke eke mo tau tagata fakamatala mo e tau faiaoga.
11. (a) Ko e heigoa e puhala ne maeke he tau tutaki a Iesu ke taute e tau gahua lalahi mamahaki ke he tau gahua ne taute e ia? (e) Ko e heigoa e mena ne tupu ke he tau aposetolo he magaaho ne mole atu e kelipopo a Iesu?
11 Ne tutaki atu e Iesu e fakaako he hana a tau tutaki ma e gahua nei. Ko e afiafi fakahiku to hoko hana mate, ne fakamalolo e ia a lautolu ke he tau kupu nei: “Ko ia ne tua mai ki a au, to eke e ia ni e tau gahua ne eke e au; to eke foki e ia e tau mena ke mua ke he tau mena nai.” (Ioane 14:12) Ko e tau gahua he hana a tau tutaki to lahi mahaki atu ke he hana, kakano, ha ko e mena to hoko atu ha lautolu a fekafekauaga ke he tau tagata tokologa mo e tau matakavi lalahi mo e to loa lahi foki e magaaho. Ka e taha e mena, he mole atu e kelipopo a Iesu, ne ligoia hana a tau tutaki he matakutaku. Ne fakamumuli a lautolu mo e nakai tutaki atu e gahua ne fakaako e ia a lautolu ke taute. Ko e falu ne liliu ni ke he matagahua takafaga ika. Ka e pete ia, ke he puhala ne nakai maeke ke nimo, ne pehi e ia ki a lautolu tokofitu e tau mena ne manako a ia ki a lautolu, ti ke taute pihia foki he tau tutaki oti hana.
12. (a) Ko e heigoa e mana ne taute e Iesu he Tahi i Kalilaia? (e) Ko e heigoa, moli, e kakano a Iesu he magaaho ne huhu ai a ia ki a Peteru kua mua nakai “ke he tau mena nei” hana a fakaalofa ki a Ia?
12 Ne fakafaliu e Iesu a ia ke he tino tagata mo e fakakite mai he Tahi i Kalilaia. Ne o e tau aposetolo tokofitu he poti ka e nakai moua ha ika he po katoa. Ne hea a Iesu mai he uluulu: “Ati liti a e kupega ke he fahi katā he vaka, to moua ai e mutolu.” Ko e magaaho ne puke fakamana e kupega he tau ika ti teitei pa, ne mailoga e lautolu he poti, ko Iesu ni a ia he uluulu, mo e alumaki atu a lautolu ke he mena ne fakatali mai ai a ia. Oti he tufatufa atu e tau mena kai pogipogi ki a lautolu, ti liga onoono atu a Iesu ke he tau ika loga, mo e huhu atu ki a Peteru: “Simona na e, ko e tama a Iona, kua mua nakai hau a fakaalofa kia au kia lautolu nei?” (Ioane 21:1-15) Kua nakai fakauaua e kakano a Iesu, Kua mua kia e fakapiki hau ke he matagahua takafaga ika ke he gahua fakamatala ne tauteute e au a koe ke taute?
13. Pehi fakamalolo fefe a Iesu ke he hana a tau tutaki ke he puhala kua lata ke tali e lautolu ke he hana fakaalofa?
13 Ne tali a Peteru: “E, ma Iki na e, kua fioia e koe, kua fakaalofa au kia koe.” Ne tali a Iesu: “Kia fagai e koe haku a tau punua mamoe.” Ne huhu a Iesu ke lagaua aki: “Simona na e, ko e tama a Iona, kua fakaalofa mai nakai a koe kia au?” Kua liu foki tali atu a Peteru, fakamao mo e nakai fakauaua: “E, ma Iki na e, kua fioia e koe kua fakaalofa au kia koe.” Kua liu foki poaki a Iesu: “Kia leveki e koe haku a tau mamoe.” Ne huhu a Iesu ke lagatolu aki: “Simona na e, ko e tama a Iona, kua fakaalofa mai nakai a koe kia au?” Ko e mogonei kua momoko moli a Peteru. Ko e tau aho gahoa ni he mole, ne fakatikai lagatolu e ia ko e nakai iloa a Iesu, ti liga tuaha moli a ia po kua fakauaua kia a Iesu ke he hana a mahani fakamoli. Ko e mena ia, ko e magaaho ke tolu aki, ne liga tali a Peteru ke he leo momoko: “Ma Iki na e, kua fioia e koe e tau mena oti kana, kua fioia e koe kua fakaalofa ni au kia koe.” Ne tali ni a Iesu pehe: “Kia fagai e koe haku a tau mamoe.” (Ioane 21:15-17) Kua fai fakauaua nakai ke he mena ne manako a Iesu ki a Peteru mo e hana tau tagata ne fakalataha ke taute? Ko e malolo ha a ia he pehiaga hana ki luga ha lautolu—ti pihia ni ki luga he ha tagata kua eke mo tutaki hana he vaha nei—kaeke ke fakaalofa a lautolu ki a ia, to taute auloa e lautolu e gahua taute tutaki!
14. Ke he falu a tau magaaho, fakakite fefe e Iesu e puhala kua lata he hana a tau tutaki ke tali ke he hana fakaalofa?
14 Ko e tau aho gahoa he mole e fakatutalaaga ia he uluulu, ne liu fakakite mai a Iesu he mouga ko Kalilaia mo e fakaako age ke he toloaga ne fiafia liga ko e 500 he tau tutaki: “Hanei, kia o atu a a mutolu ke eke e tau motu oti kana mo tutaki, . . . Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20; 1 Korinito 15:6) Manamanatu la ke he mena ia! Ko e tau tagata tane, tau fifine, mo e tau fanau ne moua oti e gahua pauaki taha nei. Pihia foki he magaaho fakamui, he magaaho to hake ai ke he lagi, ne tala age a Iesu ke he hana a tau tutaki: “To eke ai foki a mutolu mo tau fakamoli ki a au . . . ke he tau fahi mamao oti he lalolagi.” (Gahua 1:8, NW) Mole atu e tau fakatonutonuaga oti nei, ti ko e mena ia ni kia ne pehe ai a Peteru he tau tau fakamui: “Ne poaki a [Iesu] ki a tautolu ke fakamatala ke he tau tagata mo e ke tuku atu e fakamoli katoatoa.”—Gahua 10:42, NW.
15. Hagaao ke he heigoa kua nakai lata ke fakauaua?
15 Kua nakai tuai fai fakauaua ko e fefe e puhala ke tali atu a tautolu ke he fakaalofa a Iesu. Ha kua tala age a ia ke he hana a tau aposetolo: “Kaeke ke omaoma e mutolu haku a tau poaki, ti tumau a mutolu ke he haku a fakaalofa; . . . Ko e haku a tau kapitiga a mutolu, kaeke ke eke e mutolu e tau mena oti kana kua tala atu ai au kia mutolu.” (Ioane 15:10-14) Ko e huhu hanai, To fakakite nakai e koe e fakaaue ma e fakaalofa a Iesu ke omaoma ke he hana a tau poaki ke taute auloa e gahua taute tutaki? Moli, kua nakai mukamuka e mena nei ki a koe ha ko e tau kakano kehekehe. Ka e nakai mukamuka foki ni ki a Iesu. Manamanatu la ke he tau hikihikiaga ne lauia ai a ia.
Mumui ke he Fakafifitakiaga a Iesu
16. Ko e heigoa e fakafifitakiaga fulufuluola ne moua mai ia Iesu?
16 Ko e Tama fuataha he Atua ne loto olioli ha ko e tuaga talahaua ko e lilifu tokoluga ke he tau agelu oti kana he lagi. Ne muhu mena moli a ia! Ka e talia fiafia e ia ke fakatakoko e ia a ia, ne fanau mai ko e tagata he magafaoa mativa, mo e tupu hake takai viko he tau tagata gagao, mo e tau tagata mamate. Ne taute e ia e mena nei ma e mitaki ma tautolu, tuga he fakamaama he aposetolo ko Paulo: “Nukua iloa e mutolu e fakaalofa noa he Iki ha tautolu ko Iesu Keriso, ne muhu mena a ia, ka kua fakanofogati a ia ha ko mutolu, kia fakamuhu mena a mutolu ke he hana nofogati.” (2 Korinito 8:9; Filipi 2:5-8) Pihia ai e fakafifitakiaga ia! Pihia ai e tauteaga he fakaalofa ia! Nakai fai taha ne foaki fakalahi po ke mamahi lahi ke hukui aki e falu. Mo e nakai fai taha ne taute fakahagahaga mitaki ma e falu ke olioli ha ko e muhu mena lahi mahaki, e, ko e moui tukulagi ke he mitaki katoatoa!
17. Ko e heigoa e fakaakoaga ne fakatoka mai i mua ia tautolu, mo e ko e heigoa e fakaotiaga ka mui mai he mena ia?
17 Kua maeke ia tautolu ke mumui ke he fakafifitakiaga a Iesu mo e ke aoga pihia foki ke he falu. Ne poaki tafeliuaki e Iesu ke he tau tagata ke eke mo tau tutaki hana. (Mareko 2:14; Luka 9:59; 18:22) Ka e tohia moli e Peteru: “Ha ko e mena ia ni kua ui ai a mutolu; ha ko e mena ne mamahi a Keriso ni ma mutolu, ti toka ai e ia e fakafifitaki ma mutolu, kia mumui atu a mutolu ke he hana tau tuagahui.” (1 Peteru 2:21) To tali atu nakai a koe ke he fakaalofa a Keriso pete ni he mamahi ke maeke ke fekafekau ke he hana Matua tuga he taute e ia? Ko e aoga ha a ia he puhala pihia ke lata mo e falu! Moli, ke mumui atu ke he fakafifitakiaga a Iesu, ke taute katoa e tau fakaakoaga ne moua e ia mai he hana a Matua, “ti fakamoui ai e koe a koe, katoa mo lautolu kua fanogonogo kia koe.”—1 Timoteo 4:16.
18. (a) Ko e heigoa e fakafifitakiaga ne fakatoka e Iesu he hana a mahani fakafetui atu ke he tau tagata? (e) Tali atu fefe e tau tagata ke he mahani fakatagata a Iesu?
18 Ke lagomatai fakalahiaki e tau tagata, kua lata foki a tautolu ke logona hifo ki a lautolu he puhala ne logona e Iesu. Ne pehe mai e perofetaaga hagaao ki a ia: “To fakaalofa a ia kia ia kua lolelole, mo ia kua nofogati.” (Salamo 72:13) Ne mailoga he hana tau tutaki a Iesu he “fakaalofa” ki a lautolu ne vagahau a ia ki ai mo e manako moli a ia ke lagomatai a lautolu. (Mareko 1:40-42; 10:21) “Kua fioia e ia e lanu tagata,” he talahau he Tohi Tapu, “ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:36) Ne logona foki he tau tagata hala lalahi e fakaalofa hana mo e o mai fakatata ki a ia. Ko e totonu he hana a leo, fakatokolalo, mo e puhala fakaako, ne fakahagahaga mitaki aki a lautolu. Ti ko e fua, ke hoko ke he tau tagata fakaputu tukuhau tutuhia mo e tau fifine fakataka ne kumi a lautolu ki a ia.—Mataio 9:9-13; Luka 7:36-38; 19:1-10.
19. Fifitaki fefe e Paulo a Iesu, mo e ko e heigoa e fua he ha tautolu a taute he gahua taha ia?
19 Ne fifitaki he tau tutaki a Iesu he senetenari fakamua hana a fakafifitakiaga fakaalofa. Ne tohi e Paulo ke he falu ne fekafekau a ia ki ai: “Ka kua mahani molu a mautolu he nofo ai a mautolu ia mutolu, tuga ne fifine fakahuhu tama kua leveki fakamitaki hana ni a fanau. . . . tuga ne matua tane ke he hana fanau, he tomatoma atu a mautolu kia mutolu, mo e fakamafana atu, mo e talahau atu kia mutolu.” (1 Tesalonia 2:7-11) Logona nakai e koe e tupetupe moli ma lautolu he matakavi ne nofo ai a koe tuga ne logona he tau mamatua fakaalofa ma e tau fanau fakahelehele ha lautolu? Kaeke ke fakakite e tupetupe pihia ke he totonu he leo, malimali he hau a fofoga, to taute he tau gahua hau e fekau he Kautu ke fulufuluola atu ki a lautolu ne tuga e tau mamoe.
20, 21. Ko e heigoa e falu a fakamaamaaga he vaha fou nei ke he tau tagata ne mumui ke he fakafifitakiaga he fakaalofa a Iesu?
20 Ko e taha aho makalili i Sepania, tokoua e Fakamoli fifine ne feleveia mo e fifine motua ne fano he tau tokotoko, ko e hana fale kua momoko vaivai he makalili ha kua oti e tau gafi. Ko e fakatali a ia he hana a tama tane ke liu mai he gahua ke tipi fakaloga e tau gafi. Ne tipi he Tau Fakamoli e tau gafi, mo e toka foki e laua e falu mekasini ke totou a ia. Ko e magaaho ne liu mai e tama tane, ne fiafia lahi a ia ha ko e fakaalofa moli he Tau Fakamoli ma e hana a matua fifine ti totou e ia e tau tohi, ti kamata fakaako e Tohi Tapu, ne papatiso, mo e nakai leva ti hu atu ke he fekafekauaga foafoa.
21 I Ausetalia ne fakamaama he tane mo e hana hoana ke he Tau Fakamoli ne ahi atu ha kua nakai fai tupe a laua ke fagai aki ha laua a magafaoa. Ne liliu e tane fakamoli mo e hoana mo e tamai falu mena kai, lafi ki ai mo e tau kai humelie ma e fanau. Ne mafatifati hifo e tau mamatua mo e tagi, mo e pehe kua fuafuakelea lahi a laua mo e manamanatu hifo a laua ke taupega. Ne kamata tokoua a laua ke fakaako e Tohi Tapu, ti nakai la leva ia he papatiso e hoana. Ne hokotaki he fifine he Tau Fahi Kau Fakalataha ne nakai fiafia ke he Tau Fakamoli a Iehova he oti e taha feleveiaaga: “Ne nakai manatu moli e au e mena ne tutala a maua ki ai, ka ko e mena ni haku ne manatu ko e totonu ha a ia he fifine ia ki a au, mo e ko e fakamokoi ha a ia mo e loto fakatokolalo he fifine ia. Ne mafanatia moli au ki a ia. Ko e tokiofa agaia e au hana a mahani kapitiga ke hoko mai ke he aho nei.”
22. Oti he kamatamata e moui a Iesu, ko e heigoa ha tautolu a fakahikuaga hagaao ki a ia?
22 Kaeke ke tali e tautolu e fakaalofa a Iesu ke taute e gahua ne taute e ia ke he puhala ne taute aki e ia, ko e fulufuluola ha a ia he tau monuina ka olioli a tautolu ki ai! Ko e lahi mahaki ue atu a Iesu kua kitia mali mo e tokoluga lahi. Kua omoi a tautolu ke fakataogo e tau kupu he kavana Roma ko Ponotio Pilato: “Kitiala e tagata!” E, moli, ‘Ko e tagata,’ ko e tagata lahi mua ue atu ne moui mai i tuai.—Ioane 19:5.
Tali Fefe e Koe?
◻ Lahi mahaki fefe e fakaalofa a Iesu?
◻ Ko hai ne fakaalofa a Iesu ki ai ke fakaohoohoaki a tautolu ke fakaalofa, mo e ko e heigoa kua lata he hana a fakaalofa ke omoi a tautolu ke taute?
◻ Ko e heigoa e gahua ne manako a Iesu ki a tautolu ke taute?
◻ Muhu mena fefe a Iesu, mo e hau fefe a ia ke nofogati?
◻ Fifitaki fefe e tautolu a Iesu ke he puhala ne fekafekau a ia ke he tau tagata?
[Fakatino he lau 15]
Ne fakatoka e Iesu e fakatokaaga he fakakiteaga he fakaalofa
[Fakatino he lau 17]
Ne fakamaama fakamalolo e Iesu kua lata ke fakakite fefe he hana a tau tutaki e fakaalofa ki a ia