Kia Mataala Mau ke he “Vaha ke Fakahiku Ai”
“A mutolu, kia mataala a a mutolu, mo e liogi, ha ko e mena nakai iloa e mutolu po ke hoko mai a fe e aho ia.”—MAREKO 13:33.
1. Fefe e onoonoaga ha tautolu ke he tau mena tupu fiafia nei kua fafatu mai he “vaha ke fakahiku ai”?
HA KUA fafatu mai e mena tupu fiafia nei he “vaha ke fakahiku ai,” fefe e onoonoaga he tau Kerisiano? (Tanielu 12:4) Ne nakai toka noa a lautolu ke fakauaua. Ne fakakite mai e Iesu e perofetaaga ne kua ha ha i ai e fakamailoga katoa ne kua fita he fakamoli fakahaga he senetenari ke 20 aki nei. Ne talahau tuai e ia e tau mena ka tutupu kua fita he fakamailoga aki e magahala nei kamata mai he tau 1914 ko e mua ue atu. Ke fakamahani mo e perofetaaga ha Tanielu hagaao ke he “vaha ke fakahiku ai,” ne liu ni a Iesu fakakia e hana perofetaaga lahi mahaki he uhu fakamalolo e hana a tau aposetolo ke “mataala.”—Luka 21:36.
2. Ko e ha kua ha i ai e manako lahi ke mataala mau fakaagaga?
2 Ko e ha kua mataala mau ai? Kakano ni ha kua tata mai e magaaho matematekelea mua ue atu he fakamauaga tala tuai. Ke he tau Kerisiano ke foaki atu ke he ahumate fakaagaga he magaaho nei kua matematekelea lahi. Kaeke ke fakafiafia e tautolu po ke fakaata ha tautolu a tau loto ke pehia he tau koloa he moui, to matematekelea a tautolu. Ia Luka 21:34, 35, ne hataki e Iesu Keriso a tautolu: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu . . . tuga e matahele, ke hoko mai ai kia lautolu oti kana kua nonofo ke he lalolagi oti.”
3, 4. (a) Ko e heigoa e kakano ha Iesu he talahau ko e aho he ita he Atua to hoko fakalutukia mai ke he tau tagata “tuga ne matahele”? (e) Ha kua nakai fakatoka he Atua e matahele, ko e ha e aho ia kua hau fakaofo mo e pule katoa ke he tau tagata?
3 Kua ha ha i ai mo e kakano mitaki ne talahau e Iesu ko e aho a Iehova ‘to fakaofo mai e aho ia kia tautolu tuga ne matahele.’ Ko e matahele ne fa mahani ke taha e pu ke fakaputo aki e tau manu lele mo e tau manu hui fa. Ne ha ha he matahele e afo. He magaaho ka makati hifo e matahele, ti moua ai mogoia e pakia. Kua mafiti lahi e tau mena nei ke tutupu. He mahani taha ia ni ne talahau e Iesu, ko lautolu ne lolelole fakaagaga to ofo lahi he ‘aho he ita’ he Atua.—Fakatai 11:4.
4 Ko Iehova kia ko e taha ne taute e matahele ke lata mo e tau tagata? Nakai, ai ni fakatali a ia ke moua mafiti e tau tagata mo e moumou ke he a lautolu. Ka ko e aho ia to maeke ke pule katoa ke he tau tagata kakano ha kua nakai foaki e lautolu e manamanatuaga mua ue atu ke he Kautu he Atua. Ne o ni a lautolu he tau puhala ha lautolu ke uku he tau koloa he tino, ka e fakavihia e kakano he tau puhala fakatolomaki ne takai ia lautolu. Pete ni e mena nei, ne nakai hiki e fakaholoaga he Atua. Ne ha ha ni ia ia hana magaaho fakahako ke fakakatoatoa ai e tau tali. Mo e fakaalofa hofihofi noa, ne nakai fakatoka noa e ia hana a tau tagata ke vihiatia e hana a fakafiliaga ka hau.—Mareko 13:10.
5, 6. (a) Kakano ha ko e fakafiliaga, ko e heigoa e tau fakamonuina kua taute he Tufugatia ma e tau mena momoui ko e tau tagata, ka ko e heigoa e fua katoa? (e) Ko e heigoa e mena ke manamanatu ki ai ke lagomatai aki a tautolu ke mataala mau?
5 Ko e hatakiaga fakamua nai ko e fakamonuinaaga he vala he Tufugatia mua ue atu, ne kua loto fiafia ke he tauaga he tau mena momoui ko e tau tagata he fakatuaga hui fakatai hana. (Isaia 66:1) Ne momokoina e ia e tau tagata he matakavi ne talahau ai e ia kua fakatu ai hana a tau hui. Ti ma e hana a tau hukui fakalalolagi mo e tau takitaki, ne hataki e ia a lautolu ke he tau mena ka tutupu mai i mua ha lautolu. (2 Korinito 5:20) Pete kua foaki e tau hatakiaga oti ia, to o mai fakaofo e tau mena tutupu ia ki luga he tau magafaoa he tau tagata ne kua tuga kua lalaka atu a lautolu ke he matahele. Ko e ha? Kakano ha kua tokologa kua momohe fakaagaga. (1 Tesalonia 5:6) Ko e toko gahoa ni ne kua fakataogo ke he hatakiaga mo e to hao ke he lalolagi fou he Atua.—Mataio 7:13, 14.
6 Fefe, mogoia, ha tautolu a mataala mau ke he magaaho nei he fakahikuaga ke maeke ke totou fakalataha mo lautolu ka fakahao? Ne foaki e Iehova e manako lagomatai. Onoono la a tautolu ke he fitu e mena ne kua lata ia tautolu ke taute.
Tau ke he Fakalavelaveaga
7. Ko e heigoa e hatakiaga hagaao ke he fakalavelaveaga ne taute e Iesu?
7 Fakamua, kua lata ia tautolu ke tau ke he fakalavelaveaga. Ia Mataio 24:42, 44, ne ui a Iesu: “Hanai, kia mataala a mutolu; ha kua nakai iloa e mutolu po ke magaaho fe ke hau ai e Iki ha mutolu. Ko e mena ia, kia nonofo tauteute ai a mutolu; ha ko e magaaho nakai manatu ai e mutolu, ke hau ai e Tama he Tagata.” Ko e vagahau ne fakaaoga e Iesu ke he mena nei kua fakakite aki ko e magaaho uka lahi nei, kua ha ha i ai e loga e fakalavelaveaga, mo e fakalavelaveaga ia kua takitaki atu ke he moumouaga. Ke he vaha ia Noa ne loga e tau mena ne fakalavelave aki e tau tagata. Ti ko e fua, kua lavelave lahi e tau tagata ti “nakai iloa” e mena ne tupu, mo e hau ai e Fakapuke ti tatafi ke he a lautolu. Hagaao foki ia, ne hataki e Iesu: “To eke pihia foki ka hau e Tama he tagata.”—Mataio 24:37-39.
8, 9. (a) Fakahagahaga kelea fefe he fakalavelave he tau koloa he moui a tautolu? (e) Ko e heigoa e hatakiaga ne foaki mai e Paulo mo Iesu ki a tautolu?
8 Ke toka mau foki ke he manamanatuaga ko e hana a hatakiaga ia Luka 21:34, 35, kua fakatutala a Iesu ke he tau mena kehekehe he moui, tuga e kai, inu, mo e tau koloa ke taute aki e mouiaga. Ko e tau mena kua fa mahani oti a ia ke he tau tagata, putoia ai mo e tau aposetolo he Iki ko Iesu. (Fakatatai Mareko 6:31.) Ne nakai fai fakamamahi e tau mena nei ki a lautolu, ka e ka fakaata, to fakalavelave a tautolu, fakaapiapi a tautolu, mo e kua fakaohooho aki e matematekelea ahumate fakaagaga i loto ia tautolu.
9 Ko e mena ia, kua nakai lata ia tautolu ke tiaki e tau mena aoga lahi mahaki foili—ko e mouaaga he taliaaga fakaatua. Neke matanumia he tau mena kehekehe he moui, kua lata ia tautolu ke fakaaoga ni ke he fakakaupaaga ne manako ke leveki a tautolu. (Filipi 3:8) Kua nakai lata a lautolu ke poka ke he e fiafia he Kautu. Ne pehe e Roma 14:17, “ha ko e kautu he Atua, nakai ko e mena kai ia, po ke mena ke inu; ka ko e tututonu, mo e mafola, mo e fiafia ke he Agaga Tapu.” Manatu e tau kupu ha Iesu he magaaho ne pehe a ia: “Ka kia kumikumi fakamua a mutolu ke he kautu he Atua mo e hana a tututonu, ati lafi atu ai e tau mena oti ia kia mutolu.” (Mataio 6:33) Fakalaulahi atu ki mua ia Luka 9:62, ne fakapuloa e Iesu: “Ko ia kua toto hana lima ke he arote mo e haga ki tua, nakai lata a ia mo e kautu he Atua.”
10. Ko e heigoa e hagahaga kelea ka tupu mai ka eke ke nakai taofi ha tautolu a tau mata fakahako ke he foliaga?
10 Lagataha ke kamata fofoa a tautolu, ko e vagahau fakataitai, kua lata a tautolu ke taofi mau ke he laini hako. Ko e tagata foa ka haga ki tua to keu ai e laini ne fofoa. Kua fakalavelave a ia mo e mukamuka lahi ke hehe po ke mataofi he falu a mahukihuki. Nakai lata a tautolu ke tuga e hoana a Lota, ne liu haga ki tua ti nakai hao. Kua lata a tautolu ke haga ki mua ke he foliaga. Ke taute e mena ia kua lata a tautolu ke tau ke he fakalavelaveaga.—Kenese 19:17, 26; Luka 17:32.
Liogi Nakai Noa
11. Ko e heigoa ne pehi e Iesu he mole atu e hataki ki a tautolu hagaao ke he hagahaga kelea he fakalavelaveaga?
11 Pete ia ne loga e mena ke taute ke tumau e mataala. Ko e mena aoga lahi ke ua aki ko e: Liogi nakai noa. He mole atu e hataki a tautolu ke he fakalavelave he tau koloa he mouiaga nei, ne foaki e Iesu e poakiaga nei: “Hanai, kia mataala a mutolu, mo e liogi nakai noa, kia talahaua a mutolu kua aoga ke hao mai ke he tau mena oti ia ka hohoko mai, ke tutu foki ki mua he Tama he tagata.”—Luka 21:36.
12. Ko e faga liogi fefe kua lata, mo e heigoa e fua?
12 Kua lata ni a tautolu ke taute e ole tumau hagaao ke he matematekelea he ha tautolu a tuaga mo e ha tautolu a manako ke mataala. Ti kua lata a tautolu ke o atu ki a Iehova ke he tau liogi nakai noa. Ne pehe a Paulo he Roma 12:12: “Kia fakamakamaka ke he liogi.” Mo e ia Efeso 6:18, ne totou e tautolu: “Kia olelalo atu . . . ke he Agaga nakai noa ke he tau ole mo e tau liogi oti, kia leoleo ki ai a mutolu mo e fakamakamaka ai ke he liogi.” Nakai ko e ha mena fakateaga noa ni a ia ke taute e ha liogi ke tuga ko e ha mena fakateaga. Ko e ha tautolu a mouiaga fakamua nei kua ha ha i ai e hagahaga kelea. Ti kua lata ia tautolu ke manatu nakai noa ma e lagomatai fakaatua. (Fakatatai Heperu 5:7.) Ke he puhala ia kua tumau a tautolu ke he fahi a Iehova. Nakai fai mena ke mahomo atu e aoga ke lagomatai a tautolu ke fakakatoatoa e mena nei ki a tautolu ke he tau mena oti ke ‘ole nakai noa.’ To taofi e Iehova a tautolu ke he tuaga ke he mataala. Kua aoga lahi ha mogoia ke fakatumau ke he liogi!
Fakapiki Tumau ke he Fakatokatokaaga he Atua mo e Hana a Gahua
13. Feoaki fakalataha fefe kua lata ke tumau e mataala?
13 Manako a tautolu ke uta kehe e tau mena ne kitia mai he lalolagi. Manako a tautolu ke tutu ki mua he Tama he tagata, ti moua ai hana a taliaaga. Ke he fakahikuaga kua ha ha i ai e mena ke tolu aki kua lata ia tautolu ke taute: Nakai fakamamutu ke he fakatokatokaaga pule fakaatua ha Iehova. Kua lata ia tautolu ke feoaki fakalataha tumau mo e fakatokatokaaga mo e felagomatai aki ke he hana a tau gahua. Ke he puhala nei to nakai hepe e kitiaaga ha tautolu ko e tau Kerisiano kua mataala.
14, 15. (a) Fakalataha ke he gahua fe kua lagomatai a tautolu ke mataala mau? (e) Ko hai e malolo ke talahau e magaaho ka fakaoti ai e gahua fakamatala, ti fefe ha tautolu a logona hifo hagaao ki ai? (i) Ka mole atu e matematekelea lahi, ko e heigoa ka kitia e tautolu he magaaho ka liu a tautolu ke haga atu ki tua ke he gahua fakamatala he Kautu kua fakakatoatoa ai?
14 Matutaki lahi ke he mena ke fa aki ne lagomatai a tautolu ke tumau e mataala. Kua lata ia tautolu ke ha ha i ai he loto uho he tau tagata ne fa e hataki e tau tagata ke he hokomaiaga he fakaotiaga ke he fakatokaaga he tau mena nei. Ko e fakaotiaga katoatoa ke he tau fakatokaaga nei to nakai taute ato hoko e “tala mitaki nai he kautu” ke fakamatala ke he tau kalakala oti tuga ne finagalo e Atua Malolo Lahi ue Atu ki ai. (Mataio 24:14) Nakai ko e Tau Fakamoli a Iehova ka fifili e magaaho he gahua fakamatala ke fakakatoatoa. Toka ni e Iehova e hako ia kia ia. (Mareko 13:32, 33) Ko tautolu foki kua fifili ke gahua mo e leva ke he gahua fakamatala hagaao ke he fakatufono mua atu kua lata he tau tagata ke moua, ko e Kautu he Atua. Ko e fakatoka mai he “matematekelea lahi” to hau ka e fakalataha agaia a tautolu ke he hana a gahua. (Mataio 24:21) Ke he tau magaaho mai mua, ko lautolu ne hao to liu ke onoono ki tua mo e tau loto fakamau ko Iesu Keriso ko e nakai ko e perofeta fakavai. (Fakakiteaga 19:11) Ko e gahua fakamatala to fakakatoatoa ke he fafati kua mua atu e lahi mai he mena kua amaamanaki ki a lautolu kua fakalataha ki ai.
15 Hagaao ke he magaaho matakutakuina ia ka fakakatoatoa e gahua nei ke he manatu he Atua, to tokologa ka fakalataha ki ai nakai tuga ke he magahala fakamua. Ko e fiafia ha ia ha tautolu ka moua e tau mena ke lata mo e tau gahua lahi ue atu ia! Ti talahau moli mai ni he aposetolo ko Peteru, ko Iehova ne “nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Moli ki ai, ko e malolo gahuahua he Atua Malolo Lahi ue Atu kua takitaki e ia he vaha nei, kua molea e malolo nakai tuga ke he vaha fakamua, mo e Tau Fakamoli a Iehova kua manako ke fakatumau ke he agaga gahuahua nei ke he gahua. Ti kua lata ke fakapiki tumau ke he fakatokatokaaga ha Iehova, mo e fakalavelave ke he gahua ke he fonua. Ko e lagomataiaga a nei ke tumau hau a mataala.
Taute e Kumikumiaga Fakatagata
16. Ko e ha kua lata ia tautolu ke taute e kumikumiaga fakatagata ke he tuaga fakaagaga ha tautolu he magaaho nei?
16 Ha ha i ai e mena ke lima aki ne kua lata ia tautolu ke taute ke maeke ke tumau e mataala. Ke he takitokotaha kua lata ia tautolu ke taute e kumikumiaga fakatagata he ha tautolu a tuaga mogonei. Kua mua atu ke he mogonei tali mai he vaha fakamua. Kua lata ia tautolu ke kitia ko e fahi fe ha tautolu ka tutu ai. Ia Kalatia 6:4, pehe a Paulo: “Ka kia igatia mo e fakamoli hana ni a gahua.” Ki a taute e kumikumiaga fakatagata lagotatai mo e tau kupu ha Paulo he 1 Tesalonia 5:6–8: “Ko e hanai, aua neke momohe a tautolu tuga ne falu, ka kia mataala a tautolu mo e nonofo fakalatalata. Ha ko lautolu kua momohe, kua momohe a lautolu ke he po; ko lautolu foki kua inu ke konahia, kua konahia a lautolu ke he po; Ka ko tautolu, ko e tau tagata he aho, kia nonofo fakalatalata a tautolu, kia tapulu ai a tautolu ke he ufikahokaho, ko e tua mo e fakaalofa haia, mo e potiki tau, ko e amaamanaki haia ke he fakamouiaga.”
17. Ka taute e kumikumiaga fakatagata, ko e heigoa e tau huhu kua lata ia tautolu ke huhu hifo ki a tautolu takitaha?
17 Kae kua a tautolu? He magaaho ne kumikumi e tautolu a tautolu ke he maama he tau Tohiaga Tapu, kua kitia nakai e tautolu a tautolu kua mataala mau, kua eke tuga e papatau ke he amaamanakiaga he fakamouiaga? Ko tautolu kia ko e tau tagata kua vevehe moli mai he fakatokaaga tuai mo e nakai liu fakafiafia ke he hana a tau manatu? Ha ha moli kia tautolu e agaga he lalolagi fou he Atua? Kua ala nakai a lautolu ke he haga ki fe e fakatokaaga nei? Ka pihia, to fano ki mua e aho ha Iehova ia tautolu ke tuga ko e tau tagata kaiha a tautolu.—1 Tesalonia 5:4.
18. Ko e heigoa e tau huhu fakalaulahi kua lata ia tautolu ke huhu hifo ki a tautolu takitaha, mo e ko e heigoa e fua?
18 Ko e heigoa mogoia kaeke ke fakakite mai e kumikumiaga fakatagata ha tautolu ne kua ukufakina a tautolu ke fakatu e puhala fulufuluola, mafana, okioki mitaki he moui? Ka e kua ka iloa e tautolu kua mamafa e tau mata fakaagaga ha tautolu ke he mateafu mo e mohe? Ko tautolu kia he tuaga tuga e miti, kumi atu ke he tau mena fulufuluola he lalolagi? Kaeke ke pihia, kua lata a tautolu ke mataala!—1 Korinito 15:34.
Fakafifitaki ke he Tau Perofetaaga kua Fakamoli
19. Ko e heigoa falu perofetaaga kua kitia e tautolu kua fita he fakamoli?
19 Hohoko mai a tautolu ke he mena ke ono aki kua lagomatai aki a tautolu ke mataala tumau: Fakafifitaki ke he tau perofetaaga kua fita he fakamoli he fakaotiaga he vaha nei. Kua fita a tautolu he mole he tau ke 77 aki kamata mai he vaha he tau motu kehe kua fakaoti ai he tau 1914. Ka liu a tautolu ke ono atu ki tua ke he tolu kuata he tau senetenari, kua kitia e tautolu e taha perofetaaga kua fakamoli he mole atu taha—ko e tanakiaga he tapuakiaga moli; ko e fakahaoaga ha lautolu ne fakauku ne toe, fakalataha mo e tau tagata ne gahua auloa, ke he parataiso fakaagaga; ko e fakamatalaaga he tala mitaki he Kautu ke he lalolagi katoatoa; ko e tuaga he moto tagata tokologa. (Isaia 2:2, 3; veveheaga 35; Sakaria 8:23; Mataio 24:14; Fakakiteaga 7:9) Ne ha ha i ai e fakatokolugaaga he higoa ha Iehova mo e pule okooko ke he lagi mo e lalolagi, ti pihia foki mo e holo ki mua e toko gahoa ke he toko afe mo e mena tote ke eke mo mena malolo, mo e fakamafiti ni e Iehova e mena ia ke he hana ni a magaaho. (Isaia 60:22; Esekielu 38:23) Ke he fakakiteaga he aposetolo ko Ioane he talahauaga he Fakakiteaga kua tata lahi mai ke he hana matematekelea.
20. Ko e heigoa e fakamoliaga kua felagomatai aki e Tau Fakamoli a Iehova, mo e ko e heigoa kua maeke ke fakakite aki?
20 Ko e mena ia, kua molea ki mua ke he tau mena oti, ko e Tau Fakamoli a Iehova kua mauokafua ke he hakotika he maamaaga ke he kakano he tau mena fakapolitika kamata mai he 1914. Ke moua e fakamoliaga ia, kua ha ha i ai e taliaaga ko lautolu ko e kanavaakau he tau lima he Atua Mua ue Atu. Ko lautolu ha ia ne leveki ke he ogo fakaatua he vaha matakutakuina lahi nei. (Roma 10:15, 18) E, ko e tau kupu ha Iehova ke he vaha he fakaotiaga kua fakamoli tuai. (Isaia 55:11) Kua fakamaliu mai e mena nei ke fakamanako aki a tautolu ke fakatumau ato hoko ke kitia e mailogaaga fakahiku he tau maveheaga oti ha Iehova mai ia Iesu Keriso.
Tata Lahi Mai e Fakamouiaga he Magaaho to Eke a Tautolu mo Tau Tagata Talia
21. Ko e heigoa e lagomatai ke fitu aki ma tautolu ke mataala mau fakaagaga?
21 Ke fakahiku aki ko e mena ke fitu aki ke lagomatai a tautolu ke tumau e mataala: Ke taofi mau ke he manamanatu ko e ha tautolu a fakamouiaga kua tata lahi mai he magaaho to eke a tautolu mo tau tagata talia. Mua atu e aoga ko e fakatokolugaaga he higoa a Iehova ko e pule okooko ke he lagi mo e lalolagi mo e fakamatalahiaga he hana a higoa kua tata lahi mahaki mai. Ti ko e manako ke mataala mau kua fakamafiti mai nakai tuga fakamua. Ne tohi e aposetolo ko Paulo: “Kia pihia foki, ha kua iloa e tautolu e vaha, kua hoko ke he magaaho ke ala mai ai he mohe; ha kua tata ainei kia tautolu e fakamouiaga ha tautolu, ka e mamao ke he vaha ne tua mua ai a tautolu. Kua leva tuai e po, kua tata tuai e aho.”—Roma 13:11, 12.
22. Fefe e tata lahi mai he fakamouiaga ha tautolu kua lauia a tautolu?
22 Ke he ha tautolu a fakamouiaga kua tata lahi mai, kua lata a tautolu ke mataala mau! Kua nakai lata a tautolu ke fakaata ha mena fakatino po ke tau fiafia fakalalolagi ke fakamamafa aki ha tautolu a fakaaue ke he mena ne taute e Iehova ma e hana a tau tagata he fakaotiaga he vaha nei. (Tanielu 12:3) Kua lata ia tautolu ke fakakite e lahi he mauokafua nakai la pihia ia fakamua ti nakai maeke ia tautolu ke fuluhi kehe mai he puhala ne fakakite mai he Kupu he Atua ne kua talahau fakalapalapa mai ma tautolu. (Mataio 13:22) Ko e fakamoliaga kua fakakite mai fakamaali ko e lalolagi nei kua ha ha i ai ke he hana a tau vaha he fakahikuaga. Nakai mule to tatafi kehe ai tukulagi ka e taute ai ke fakaata ma e lalolagi fou he tututonu.—2 Peteru 3:13.
23. Ke he puhala fe ka lagomatai e Iehova a tautolu, mo e ko e heigoa e fua he fakamonuina?
23 Kua lata ia tautolu mogoia ke mataala mau. Nakai la pihia ia fakamua, kia ala a tautolu ke he magaaho ku nei. Kia manatu, to nakai mohe a Iehova ke he mena nei. Ha kua pihia to lagomatai tumau e ia a tautolu ke tumau ke mataala he fakaotiaga he vaha nei. Kua tata mai e po. Ko e aho kua tata mai. Ti kua lata ke mataala mau! He magaaho ku mai i mua to kitia e tautolu e mena fulufuluola lahi la ia mai he tau aho loga, ha kua fakamoli he Kautu faka-Mesia e tau finagalo ha Iehova hagaao ke he lalolagi!—Fakakiteaga 21:4, 5.
Fefe Hau a Tau Tali?
◻ Ko e heigoa e kakano ha Iesu he magaaho ne pehe a ia ko e aho he ita he Atua to hoko mai ke he tau tagata “tuga ne matahele”?
◻ Ko e ha kua lata ia tautolu ke tau atu ke he fakalavelaveaga, mo e to taute fefe e tautolu?
◻ Ko e faga liogi fefe kua lata ke tumau ke mataala?
◻ Ko e faga feoaki fakalataha fefe kua lata?
◻ Ko e ha kua lata ai ke taute e kumikumiaga fakatagata ke he ha tautolu a tuaga fakaagaga?
◻ Ko e vala fe he perofetaaga kua fakagahua ke taofi a tautolu ke mataala mau?