“Kia Mataala”
1 He mole e fakamaama he tau mena tutupu aoga ka fakamailoga aki e tau aho fakahiku he fakatokaaga nei, ne fakamafana e Iesu hana tau tutaki “kia mataala.” (Mare. 13:33) Kua lata he ha e tau Kerisiano ke mataala? Ha kua nonofo a tautolu he magaaho hagahaga kelea lahi he fakamauaga tuai he tagata. Nakai fahia a tautolu ke fakaniniko fakaagaga. To fakahiku e mena ia ke he kaumahala ha tautolu he loto fakaaue ke he gahua kua foaki mai e Iehova ki a tautolu ke taute he magaaho nei he fakaotiaga. Ko e heigoa e gahua ia?
2 Kua fekau e Iehova hana tau tagata ke fakapuloa ke he lalolagi oti e tala mitaki he Kautu—ko e amaamanakiaga ni a ia ma e tau tagata oti. Ko e gahua fakalataha tumau mo e fakatokatokaaga he Atua kua fakakite ko tautolu ko e tau Kerisiano moli nukua tokaloto e vaha mo e lata ke lagomatai e falu ke logona e “tau kupu he moui tukulagi.” (Ioane 6:68) He putoia fakamakutu ke he gahua aoga lahi nei, kua foaki e tautolu e fakamoliaga he mataala fakaagaga.
3 Omoomoi ke Fakamatala: Ko e Tau Fakamoli a Iehova, kua lata ia tautolu ke mitaki e onoonoaga hagaao ke he fekafekauaga ha tautolu. Ko e fakaalofa ma e Atua mo e katofia kua omoomoi a tautolu fakatagata ke fai vala ke he gahua fakamatala. (1 Kori. 9:16, 17) Ko e taute pihia, to fakamoui e tautolu a tautolu ti pihia foki a lautolu kua fanogonogo ki a tautolu. (1 Timo. 4:16) Kia eke ai mo fifiliaga ha tautolu ke fakalataha tumau ke he mena kua maeke mo e fakamakau fakalahi ke he mena kua lata he fakamatala hagaao ke he fakatufono mitaki lahi ka moua he tau tagata—ko e Kautu he Atua!
4 Ko e mafiti he fekafekauaga ha tautolu kua fakalagalaga a tautolu ha ko e fakamoliaga aoga—ko e fakatoka mai he matematekelea lahi to hau mo e moua a tautolu hane fakalataha agaia ke he gahua nei. Ko e nakai iloa ha tautolu he aho mo e magaaho kua lata ia tautolu ke mataala tumau mo e mautali he tau magaaho oti, falanaki ai he liogi ki a Iehova. (Efe 6:18) Ko e foliaga he gahua fakamatala kua fakatumau ke holofa. Nakai leva he taha aho ni, to hokotia e gahua fakamatala mua ue atu he fakamauaga tuai he tagata ke he tapunu.
5 Kia muitua loto fakamoli e poakiaga ha Iesu ke “mataala.” Ko e mena nei kua aoga lahi mogonei nakai la pihia ia tali mai. Kia tali atu a tautolu mo e fakamafitiaga. He vaha nei mo e tau aho takitaha, kia fakatumau a tautolu ke nakai fakateaga mo e mataala fakaagaga, mo e fakamalolo ke he gahua a Iehova. E, “kia mataala a tautolu mo e nonofo fakalatalata.”—1 Tesa. 5:6.