“Ko Hai Kia ke Tuga a Iehova ha Tautolu a Atua?”

“Ko hai kia ke tuga a Iehova ha tautolu a Atua, ko ia kua fakatu ki luga hana haeleaga?”​—SALAMO 113:5.

1, 2. (a) Fefe e onoonoaga he Tau Fakamoli a Iehova ke he Atua mo e Tohi Tapu? (e) Ko e heigoa e tau huhu kua lata ke manamanatu ki ai?

KUA fakamonuina moli a lautolu ne fakaheke ki a Iehova. Ha ha i ai e monuina lahi ke putoia he fakapotopotoaga fiafia nei! Ha ko e hana a Tau Fakamoli, kua talia e tautolu e tau fakatonuaga, tau matafakatufono, tau fakaakoaga, tau maveheaga, mo e tau perofetaaga he Kupu he Atua, ko e Tohi Tapu. Kua fiafia lahi a tautolu ke fakaako mai he tau Tohiaga Tapu mo e “fakaako he Atua.”​—Ioane 6:45.

² Ha ko e ha lautolu a fakalilifu lahi ke he Atua, maeke he Tau Fakamoli a Iehova ke huhu: “Ko hai kia ke tuga a Iehova ha tautolu a Atua?” (Salamo 113:5) Kua fakakite mai e tua ke he tau kupu nei he salamo. Ka ko e ha ne tua pihia ai e Tau Fakamoli ke he Atua? Ko e heigoa e tau kakano ha lautolu ne fakaheke ai ki a Iehova?

Kua Lata Tonu ke Tua mo e Fakaheke

3. Ko e heigoa e Tau Fakahekeaga a Salamo, mo e ko e ha ne fakahigoa pihia ai a lautolu?

³ Ha ha i ai e malolo he tua ki a Iehova kakano ha ko ia ni ko e Atua tokotaha. Kua pehi mai e mena nei ke he tau Salamo 113, 114, mo e Salamo 115, ko e vala mai he Tau Fakahekeaga a Salamo ne ono. Ke he talahauaga he Aoga fakatufono he sunako Iutaia he Fakahekeaga, ne lologo e tau Salamo 113 mo e 114 ke he kaiaga Paseka Iutaia he mole atu e liligi he kapiniu ke ua aki mo e fakamaamaaga he alito he fakamanatuaga. Ko e tau Salamo 115 ke he 118 ne lologo ia he oti e kapiniu uaina ke fa aki. (Fakatatai Mataio 26:30.) Ne fakahigoa a lautolu ko e “Tau Fakahekeaga a Salamo” kakano ha kua fakaaoga tumau e talahauaga Haleluia!​—“Fakaheke ki a Ioha!”

4. Ko e heigoa e kakano he kupu “Haleluia,” mo e laga fiha ne kitia ai ke he Tohi Tapu?

⁴ “Haleluia!” ko e fakaliliuaga tonu mai he vagahau Heperu ne laga 24 ne kitia ke he tau Salamo. Ke he taha vala foki he Tohi Tapu, ko e taha vahega faka-Heleni he mena ia ne kitia ai laga fa ha ko e olioli ne kitia ai ke he moumouaga ha Papelonia Lahi, ko e Kautu he lotu pikopiko he lalolagi, mo e fiafia fakalataha foki ke he kamataaga he pule he Patuiki ko Iehova ko e Atua. (Fakakiteaga 19:1-6) Ke he ha tautolu a kumikumiaga ke he Tau Fakahekeaga a Salamo ne tolu mogonei, kua liga lata ni a tautolu ke manamanatu kua lologo e tautolu e tau lologo nei ke he fakahekeaga ki a Iehova.

Fakaheke ki a Ioha!

5. Ko e Salamo 113 ne tali e tau huhu fe mo e hagaao lahi ni ki a hai e poakiaga he Salamo 113:1, 2?

⁵ Kua tali he Salamo 113 e huhu, Ko e ha ne fakaheke ki a Iehova? Ne hafagi aki e poakiaga: “HALELUIA. Fakaheke atu a mutolu ko e tau fekafekau a Iehova; ati fakaheke atu a ke he higoa a Iehova. Kia fakamonu atu ke he higoa a Iehova ke kamata ainei, to hoko ni ke he tukulagi.” (Salamo 113:1, 2) “Haleluia!” E, “Fakaheke ki a Ioha!” Hagaao lahi ni e poakiaga ia ke he tau tagata he Atua ke he “vaha ke fakahiku ai.” (Tanielu 12:4) Kamata he vaha nei ke hoko ke he tukulagi, ko e higoa a Iehova ke fakatokoluga ke he lalolagi oti. Ko e hana a Tau Fakamoli a e he tau mogonei ne fakapuloa ko Iehova e Atua, ko Keriso ­e Patuiki, mo e Kautu kua fakatu he lagi. Ko Satani ko e Tiapolo mo e hana a fakatokatokaaga to nakai maeke ke fakaoti e fakahekeaga nei ki a Iehova.

6. Fakaheke fefe a Iehova mai he ‘hakeaga mo e toaga la’?

⁶ To fano ki mua e lologo he fakahekeaga ato fakapuke aki e Iehova e lalolagi. “Kia fakaheke atu ke he higoa a Iehova ke kamata ke he mena ne hake ai e la, ti hoko ni ke he mena ne to ai.” (Salamo 113:3) Ko e kakano ko e lahi atu e mena nei ke he tapuaki he tau aho, mai he falu a momoui he lalolagi. Ne hake mai e la he fahi uta mo e to ke he fahi lalo, ufia ai e lalolagi katoa. Ke he tau mena oti ne kikila e la ki ai, to nakai leva ko e higoa a Iehova to fakaheke he tau tagata oti ne tokanoa mai he tau liliaga he lotu pikopiko mo e fakatokatokaaga ha Satani. Ko e moli, ko e lologo nei ka nakai fai fakaotiaga kua lologo ainei he Tau Fakamoli fakauku ha Iehova mo lautolu ka eke mo tau fanau he lalolagi he hana a Patuiki, ko Iesu Keriso. Kua lahi e fakamonuinaaga ha lautolu ha ko e tau tagata lologo he tau fakahekeaga a Iehova!

Nakai Fai ke Fakatatai mo Iehova

7. Ko e heigoa e tau mena ua he tokoluga a Iehova ne mailoga he Salamo 113:4?

⁷ Ne talahau foki he Salamo: “Kua tokoluga ni a Iehova ki luga he tau motu kehe oti, kua tokoluga hana lilifu ki luga he lagi.” (Salamo 113:4) Ko e ua e kakano he tokoluga nei he Atua: (1) Ko Iehova, ko e Mua ue atu, “tokoluga . . . ki luga he tau motu kehe oti,” kua tatai e tau motu mo e maga vai tote kua hihina hifo he pakete mo e kua totou a lautolu tuga ne efuefu ke he fua tautau; (Isaia 40:15; Tanielu 7:18) (2) ko e hana lilifu kua mua ue atu e lahi mahaki mai he lagi, ha kua taute he tau agelu hana a finagalo mua ue atu.​—Salamo 19:1, 2; 103:20, 21.

8. Ko e ha mo e fakatokolalo fefe a Iehova ke mailoga e tau mena he lagi mo e lalolagi?

⁸ Omoi ha ko e hana a tokoluga lilifu ue atu, ne pehe e salamo: “Ko hai kia ke tuga a Iehova ha tautolu a Atua, ko ia kua fakatu ki luga hana haeleaga? Ko ia ni kua fakatokolalo e ia a ia ke kitekite ke he lagi katoa mo e lalolagi.” (Salamo 113:5, 6) Ne tokoluga lahi e Atua ti fakatokolalo a ia ke kitia e tau mena he lagi mo e lalolagi. Pete ne nakai tokolalo a Iehova ke he taha po ke pule falu ki a ia, ka e fakakite e ia e loto fakatokolalo ha kua fakagahuahua e ia e fakaalofa hofihofi noa mo e fakaalofa hohofi ke he tau tagata agahala tokolalo. Ne foaki mai e ia hana Tama, ko Iesu Keriso, ko e “lukutoto foki a ia mo e tau hala” ma e tau Kerisiano fakauku mo e lalolagi he tau tagata, ko e fakakiteaga he loto fakatokolalo ha Iehova.​—1 Ioane 2:1, 2.

Fakaalofa Hohofi a Iehova

9, 10. ‘Fakatokoluga’ fefe he Atua ‘e tau tagata nonofogati, ke maeke ia ia ke nofo mo e tau iki’?

⁹ Kua pehi mai e fakaalofa hohofi he Atua, ne lafi he salamo “kua fakatu hake mai he kelekele e lalo tagata, kua lagaki e ia e tagata nofogati mai he toloaga veve; Kia fakanofo ai a ia fakalataha mo e tau iki, ko e tau iki ni he hana motu; Kua eke e ia e fifine tufua he faoa ke nofo mai mo e fiafia ko e matua ni he tau fanau. Haleluia.” (Salamo 113:7-9) Ne ha ha he tau tagata a Iehova e tua kua maeke ia ia ke fakahao mai e tau tagata mahani hakohako ne nonofogati, hiki ha lautolu a tau tutuaga, mo e fakamamakona ha lautolu a tau mena kua lata tonu mo e tau manako. ‘Ko ia kua Tokoluga mo e Mua ue atu ke fakamafana a lautolu ne loto holoilalo mo e loto malipilipi.’​—Isaia 57:15.

¹⁰ Taute fefe e Iehova ke ‘fakatokoluga a lautolu ne nonofogati, ke fakanofo a ia mo e tau iki’? Ke he magaaho ne finagalo he Atua, to tuku fakatatai e ia hana a tau fekafekau he tau tutuaga kua tatai e tau lilifu mo lautolu ko e tau iki. Ne taute pihia e ia a Iosefa, ne eke ai mo pule ke he tau mena kai i Aikupito. (Kenese 41:37-49) I Isaraela, he nofo mo e tau iki, po ke tau pule ke he tau tagata ha Iehova, ko e fakamonuina ia ke taofi mau. Tuga e tau Kerisiano momotua he vaha nei, ne ha ha he tau tagata pihia e lagomatai mo e fakamonuina he Atua.

11. Ko e ha ne talahau ai pehe ko e Salamo 113:7-9 ko e hagaao pauaki ni ke he tau tagata ha Iehova he vaha nei?

¹¹ Ka e kua e ‘fifine tufua ka eke ia mo matua fifine olioli’? Ne foaki age he Atua ki a Hana ne tufua e tama tane​—ko Samuela, ne foaki e ia mo fekafekau ke he Hana a gahua. (1 Samuela 1:20-28) Ka e mua ue atu ke mailoga, ne kamata mai ia Iesu mo e magaaho ne liligi hifo e agaga tapu ke he hana a tau tutaki i Penetekoso 33 V.N., ko e fifine fakatai he Atua, ko Siona he lagi, ne kamata ke moua mai e tau fanau fakaagaga. (Isaia 54:1-10, 13; Gahua 2:1-4) Tuga ni he liuaki he Atua e tau Iutaia ke he ha lautolu a motu he mole e paeaaga mai i Papelonia, ke he 1919 ne fakahao mai e ia a lautolu ne fakauku ne toe ko e “Isaraela he Atua” mai he liliaga ha Papelonia mo e fakamonuina a lautolu fakaagaga, ti ko e hagaao ni e tau kupu he Salamo 113:7-9 ki a lautolu. (Kalatia 6:16) Ha ko e Tau Fakamoli tumau a Iehova, ko lautolu ia ne toe he Isaraela fakaagaga mo e ha lautolu a tau kapitiga mo e tau amaamanakiaga ke he lalolagi kua talia mo e loto fiafia ke he tau kupu fakahiku he Salamo 113: “Haleluia!”

Fakamoliaga he Kehe ue Atu ha Iehova

12. Fakakite fefe he Salamo 114 e kehe ue atu ha Iehova?

¹² Fakakite he Salamo 114 e kehe ue atu ha Iehova he talahau e tau mena ne tutupu ni ke he tau Isaraela. Ne lologo he salamo: “Ne fina atu a Isaraela mai Aikupito, ko e faoa a Iakopo mai he motu vagahau kehe; Ti eke ai a Iuta mo motu tapu hana, ko Isaraela, ko e motu ke pule a ia ki ai.” (Salamo 114:1, 2) Ne fakahao he Atua a Isaraela mai he tupa ke he tau Aikupito, ne kehe e vagahau ke he ha lautolu a tau teliga. Ko e fakahaoaga he tau tagata a Iehova, ne fakahigoa ko Iuta mo Isaraela ke he taha lologo, ko e fakakiteaga ko e maeke he Atua ke fakahao oti hana a tau fekafekau he vaha nei.

13. Fakakite fefe he Salamo 114:3-6 e mua ue atu a Iehova mo e hagaao ia ke he tau mena tutupu ki Isaraela i tuai?

¹³ Ko e pule katoatoa a Iehova ke he tau tufugatia oti kana kua kitia maali ke he tau kupu: “Kua kitia he tahi ti hola ni a ia; ne liu ki tua a Ioritana. Ne hopohopo e tau mouga tuga ne tau mamoe tane, mo e tau matiketike tuga ne tau punua mamoe. Ko e tahi na e, ko e heigoa kia e mena ne hola ai a koe? Ma Ioritana na e, ko e ha kia ne liu a koe ki tua? Ko e tau mouga na e, ko e ha kia ne hopohopo ai a mutolu tuga ne tau mamoe tane? mo mutolu e tau matiketike tuga ne tau punua mamoe?” (Salamo 114:3-6) Ko e Tahi Kula ne “hola ni a ia” ke he magaaho ne mahafagi e ia e puhala ke o ai hana a tau tagata. Ne kitia ai e Isaraela e lima malolo a Iehova ne totoko ke he tau Aikupito ne mamate he tanumia ke he tau vai. (Esoto 14:21-31) Ko e malolo tapu taha ia ne “liu ki tua” e vailele i Ioritana, ke maeke he tau Isaraela ke o atu ki Kanana. (Iosua 3:14-16) ‘Ne hopohopo e tau mouga tuga ne tau mamoe tane’ he magaaho ne ahua mo e lulululu e Mouga ko Sinai ke he fakaveaga he Fakatufono he maveheaga. (Esoto 19:7-18) Ha kua tata lahi mai e tapunu he hana lologo, ne puhala he salamo e tau mena ke he huhu, tuga ko e pehe ko e tau mena nakai momoui ko e tahi, vailele, tau mouga, mo e tau matiketike kua matakutakuina ke he tau fakakiteaga he malolo a Iehova.

14. Ko e heigoa ne taute he malolo ha Iehova i Meripa mo Katesa, mo e lauia fefe e tau fekafekau hana he vaha fou nei ke he mena nei?

¹⁴ Ko e talahau agaia ni ke he malolo a Iehova, ne lologo he salamo: “Ko e kelekele na e, kia vivivivi a koe ki mua he Iki, ki mua he Atua a Iakopo; Ko ia ne faliu e maka tumau ke eke mo loloto vai; ko e maka uli foki ke eke mo vai puna.” (Salamo 114:7, 8) Ke he puhala fakatai, ne fakakite mai he salamo kua lata he tau tagata oti ke tutu fakalilifu mo e ofoofogia ki mua a Iehova, ko e Iki mo e Pule he Lagi mo e Lalolagi Katoatoa. Ko ia ko e “Atua a Iakopo,” po ke ha Isaraela, pihia foki ki a Isaraela fakaagaga mo e ha lautolu a tau kapitiga he lalolagi. I Meripa mo Katesa he tutakale, ne fakakite e Iehova hana malolo he mana e ia e vai ma Isaraela, “faliu e maka tumau ke eke mo loloto vai; ko e maka uli foki ke eke mo vai puna.” (Esoto 17:1-7; Numera 20:1-11) Ko e tau fakamanatuaga nei ke he malolo matakutakuina a Iehova mo e levekiaga fakahele ne foaki ke he hana a Tau Fakamoli, ko e tau kakano mua ue atu ke tua mo e nakai fai huhu ki a ia.

Nakai Tuga e Tau Atua Tupua Ta

15. Liga lologo fefe e Salamo 115?

¹⁵ Fakamalolo mai he Salamo 115 a tautolu ke fakaheke mo e tua ki a Iehova. Ne tohi mai ai e fakahekeaga mo e lagomatai ki a ia mo e fakamoli mai e nakai fai aoga e tau tupua ta. Ko e salamo nei liga lologo fetaliaki. Ko e kakano, liga taha e leo ka lologo: “Ko mutolu na kua matakutaku kia Iehova, kia tua a mutolu kia Iehova.” Liga ko e fakapotopotoaga ka tali: “Ko ia ni ko e ha lautolu a lagomatai, mo e akau punuti ha lautolu.”​—Salamo 115:11.

16. Ko e heigoa e fekehekeheaki ha Iehova mo e tau tupua ta he tau motu kehe?

¹⁶ Kua nakai lata ke tuku e lilifu ki a tautolu ka e tuku ke he higoa a Iehova, ko e Atua fakaalofa​—totonu, fakaalofa tumau mo e fakamoli. (Salamo 115:1) Liga huhu fakafiufiu e tau fi: “Ko fe ha lautolu a Atua?” Ka e maeke he tau tagata a Iehova ke tali: “Ka ko e ha mautolu a Atua, ha he lagi ni a ia; kua eke e ia e tau mena oti kua finagalo a ia ki ai.” (Salamo 115 Tau kupu 2, 3) Ko e tau tupua ta he tau motu ne nakai maeke ke taute ha mena taha ha ko e tau tupua mena talaga ne taute he tau tagata mai he tau ario mo e tau auro. Pete ni he ha ha ia lautolu e tau gutu, tau mata, mo e tau teliga, ka e nakai maeke ia lautolu ke vagahau, matapouli, mo e teliga tuli. Ha ha ia lautolu e tau ihu ka e nakai maeke ke logona e hohogi, tau hui ka e nakai maeke ke o fano, tau kakia ka e nakai vagahau ha leo. Ko lautolu ne taute e tau tupua ta mo lautolu ne tua ki ai to nakai maeke ke fai moui gahuahua foki.​—Salamo 115 Tau kupu 4-8.

17. Ha kua nakai maeke ia lautolu ne mamate ke fakaheke a Iehova, ko e heigoa ha tautolu kua lata ke taute, mo e ko e heigoa e tau amaamanakiaga?

¹⁷ Ne tuku mai e tau tomatomaaga ke tua ki a Iehova ko e Lagomatai mo e Akau Punuti puipui ha Isaraela, mai he fale ekepoa he faoa a Arona, mo lautolu oti ne matakutaku ke he Atua. (Salamo 115:9-11) Ko lautolu ne matakutaku ki a Iehova, kua ha ha ia tautolu e fakalilifu lahi ue atu ke he Atua mo e matakutaku mitaki neke nakai fakafiafia a ia. Ne ha ha foki ia tautolu e tua ha “ko ia ne eke e lagi katoa mo e lalolagi” ke fakamonuina hana a tau tagata ne tapuaki fakamoli ki a ia. (Salamo 115 Tau kupu 12-15) Ko e lagi ko e kaina he hana nofoaiki, ka e taute he Atua e lalolagi ko e kaina tukulagi he tau tagata fakamoli tumau mo e omaoma. Ha kua nakai maeke ia lautolu ne mamate mo e fakanono ke fakaheke ki a Iehova, ti ko tautolu ne momoui kua lata ke taute fakamakau mo e fakamoli katoatoa. (Fakamatalaaga 9:5) Ko lautolu ni ne fakaheke ki a Iehova ka fiafia ke he moui tukulagi mo e maeke ke ‘fakamonu kia Ioha’ tukulagi, vagahau mitaki tumau hagaao ki a ia ke “hoko ke he tukulagi.” O mai a tautolu ke kau fakamoli fakalataha mo lautolu ne omaoma e tomatomaaga: “Haleluia.”​—Salamo 115:16-18.

Tau Fua Mitaki a Iehova

18, 19. Ko e heigoa e tau puhala ne fakakehe mai he tau mahani a Iehova a ia mai he tau atua pikopiko?

¹⁸ Nakai tuga e tau tupua ta ne nakai fai moui, ko Iehova ko e Atua moui, kua fakakite e tau mahani mitaki fulufuluola. Ko ia ko e fakatino mai he fakaalofa mo e “fakaalofa hofihofi noa, mo e fakaalofa noa; fakatuai ke ita mo e lahi e fakaalofa-totonu mo e kupu moli.” (Esoto 34:6, NW; 1 Ioane 4:8) Ne kehe lahi mai a ia he atua vale ha Kanana ko Moloka, ne poa e tau fanau ki ai! Ne talahau mai pehe, ko e fakatino he atua nei ne tuga e foliga he tino he tagata ka ko e ulu he povi tane. Ne tugi tumau e tupua ta nei ke vela kula, mo e liti e tau fanau ke he hana a tau lima ne apo mai tumau, mo e mokulu hifo ke he afi kaka he lalo kelekele. Ka ko Iehova ko e fakaalofa mo e hofihofi hana a fakaalofa “ti nakai manatu ai e [ia]” ke poa e tau tagata.​—Ieremia 7:31.

¹⁹ Ko e tau uho mahani foki a Iehova kua putoia foki ai e fakafiliaga katoa, pulotu tonu ne nakai fai gataaga, mo e pule malolo ue atu. (Teutaronome 32:4; Iopu 12:13; Isaia 40:26) Ka e kua e tau tupua ta fakalata he tau tala talaga tuai? Ne nakai fakagahuahua e tau fakafiliaga tonu, ko e taui atu ni e tau atua tane mo e tau atua fifine ha Papelonia. Ne nakai ko e tau fakatai mitaki ke he pulotu e tau tupua ta ha Aikupito ka kua fakakite mai ko e fai lolelole fakatagata a lautolu. Ne nakai ofo ke he mena nei ha ko e tau atua tane mo e tau atua fifine pikopiko ko e tau gahua he tau tagata “fakagoagoa” ne talahau ko e pulotu. (Roma 1:21-23) Ko e tau tupua ta ha Heleni ko e fetotokoaki ni a lautolu. Tuga a nei, ke he tau tala fakalata tuai, ne fakaaoga fakahehe e Tia hana a malolo he utakehe e ia hana a matua, ko Koronasi, he nofoaga iki. Ne utakehe foki ni e Koronasi hana a matua ko Uranusi mai he nofoaga iki. Ko e monuina ha a ia he fekafekau mo e fakaheke ki a Iehova, ko e Atua moui mo e moli, ne fakakite e fakaalofa mitaki katoatoa, fakafili tonu, pulotu mo e malolo!

Kua Lata a Iehova ke Fakaheke Tukulagi

20. Ko e heigoa e tau kakano ne talahau mai he Patuiki ko Tavita ke fakaheke e tautolu e higoa a Iehova?

²⁰ Tuga he fakakite mai he Tau Fakahekeaga a Salamo, kua lata tonu a Iehova ke fakaheke tukulagi. Tuga na ia ke he magaaho ia Tavita mo e tau Isaraela ne foaki ma e talagaaga he faituga, ne pehe a ia ki mua he fakapotopotoaga: “Kia fakamonuina atu a koe Iehova na e, ko e Atua a Isaraela, ha mautolu a matua, mai i tuai tigahau to hoko ke he tukulagi. Iehova na e, ko e hau ni e mua ue atu mo e malolo, mo e fulufuluola, mo e lilifu, mo e fakahekeaga; ha ko e mena ha ha ia koe e tau mena oti ke he lagi, mo e lalolagi; Iehova na e, hau ni e kautu, kua tokoluga ue atu a koe kua mua ue atu ni a koe he tau mena oti kana. Mai ia koe e koloa mo e lilifu, ko koe ni kua pule ke he tau mena oti; ha ha he lima hau foki e mana mo e malolo, ha ha ia koe foki ke fakalilifu mo e fakamalolo ai e tau tagata oti kana. Hanai, ha mautolu a Atua na e, kua fakaaue atu a mautolu kia koe, mo e fakaheke atu ke he hau a higoa lilifu.”​—1 Nofoaga he Tau Patuiki 29:10-13.

21. Fakakiteaga 19:1-6 ne foaki mai e tau fakamoliaga he fakahekeaga ha lautolu he lagi a Iehova?

²¹ To fakamonuina mo e fakaheke tukulagi a Iehova i luga he lagi. Ne logona he aposetolo ko Ioane e “moto tagata tokologa ha ha he lagi” ne pehe: “Haleluia; kia ha ha he Iki ha tautolu a Atua e fakamouiaga, mo e fakahekeaga mo e lilifu, mo e malolo; Ha kua fakamoli, to tonu hana tau fakafiliaga; ha kua fakafili e ia e fifine fakataka lahi [Papelonia Lahi], ko ia ne fakakelea e lalolagi ke he hana feuaki, ti kua taui tuai e ia kia ia ni e toto he hana tau fekafekau.” Ne pehe foki a lautolu: “Haleluia” Ti pihia foki ni e tau “patu tokouafulu ma fa, mo e tau mena momoui ne fa.” Ne pehe e leo mai he nofoaiki: “Kia fakaheke ke he Atua ha tautolu, ko mutolu hana a tau fekafekau oti, mo mutolu kua matakutaku kia ia, ko e tau lalo tagata katoa mo e tau iki.” Ne lafi atu foki e Ioane: “Kua logona foki e au tuga ne leo he moto tagata tokologa, tuga foki e go he tau vai loga, tuga foki e to­mumu he tau pakulagi lalahi, kua pehe atu, Haleluia; ha kua eke mo patuiki e iki ko e Atua hana e malolo oti kana.”​—Fakakiteaga 19:1-6.

22. To fakaheke fefe a Iehova ke he hana a lalolagi fou ne mavehe mai?

²² Kua tonu lahi ni ke fakaheke e lautolu he lagi a Iehova! Ke he hana a lalolagi fou ne kua tata lahi mai, ko lautolu ka liliu tutu mai ne fakamoli ka fakalataha mo lautolu ka hao mai he fakaotiaga he lalolagi nei ke fakaheke ki a Ioha. Ko e tau mouga tokoluga ka lagaki hake ha lautolu a tau ulu ke he tau lologo fakaheke ke he Atua. Ko e tau matiketike uhiuhi mo e tau akau fua ka lologo hana a tau fakahekeaga. Ko e tau mena momoui oti ne ha ha i ai e fafagu ka fakaheke e higoa a Iehova ke he lologo Haleluia lahi! (Salamo 148) To logona nakai hau a leo ke he fakapotopotoaga olioli lahi ia? To pihia ni kaeke ke fekafekau fakamoli a koe ki a Iehova mo e hana a tau tagata. Kua lata mo amaamanakiaga hau a nei he moui, ha ko hai ne tuga a Iehova ha tautolu a Atua?

To Tali Fefe e Koe?

◻ Ko e ha ne fakaheke ai ke he Atua ko Iehova?

◻ Ko e heigoa e tau puhala ne nakai maeke ke fakatatai a Iehova mo e taha mena?

◻ Ko e heigoa e tau fakamoliaga ko e fakaalofa hohofi a Iehova?

◻ Kehe fefe a Iehova mai he tau tupua ta nakai fai moui mo e tau atua pikopiko?

◻ Ko e ha ne pehe ai a tautolu to ha ha ia Iehova e fakahekeaga tukulagi ke he lagi mo e lalolagi?

[Fakatino he lau 5]

Ne lologo e Tau Fakahekeaga a Salamo ke he kaiaga he Paseka