‘Ta Mai e Tau Mena ke Hogofuluaki Oti Kana ke he Fale Tatanaki Mena’
“Mo e kamatamata mai ai e mutolu au ke he tau mena na, . . . po ke hafagi nakai e au e tau pa he lagi ma mutolu.”—MALAKI 3:10.
1. (a) He senetenari ke lima aki F.V.N., ko e heigoa e uiinaaga ne age e Iehova ke he tau tagata hana? (e) He senetenari fakamua V.N., ko e heigoa e fua he hauaga a Iehova ke he faituga ma e fakafiliaga?
HE SENETENARI ke lima aki F.V.N., ne mahani nakai fakamoli e tau Isaraela ki a Iehova. Ne taofi e lautolu e tau tukuhau mo e tamai e tau manu kua nakai lata ke he faituga mo tau poa. Ka e pete ni ia, ne mavehe mai a Iehova kaeke ke tamai e lautolu e tau tukuhau katoa ke he fale tatanaki mena, to liligi mai e ia e fakamonuinaaga ato nakai ha ha i ai ha manako mena. (Malaki 3:8-10) He 500 he tau tau fakamui, ko Iehova, ne hukui e Iesu ko e Hana tagata uta fekau he maveheaga, ne hau ke he faituga i Ierusalema ma e fakafiliaga. (Malaki 3:1) Ne moua ai a Isaraela ko e motu kelea, ka e monuina lahi a lautolu takitokotaha ne liliu atu ki a Iehova. (Malaki 3:7) Ne fakauku a lautolu ke eke mo tau tama tane fakaagaga a Iehova, ko e tufugatiaaga fou, ko e “Isaraela he Atua.”—Kalatia 6:16; Roma 3:25, 26.
2. To hoko he magaaho fe e fakamoliaga ke uaaki ha Malaki 3:1-10, mo e ko e heigoa kua uiina mai ke taute e tautolu ke matutaki atu ke he mena nei?
2 Kua teitei ke 1,900 e tau tau he mole atu e mena nei, he tau 1914, ne fakanofo ai a Iesu he nofoaiki ko e Patuiki he Kautu he Atua i luga he lagi, mo e kua hoko ai e tau kupu ne omoi fakaagaga mai he lagi ia Malaki 3:1-10 ke he fakamoliaga ke uaaki. Ke matutaki fakalataha mo e mena tupu fulufuluola nei, ne uiina atu ke he tau Kerisiano he vaha nei ke tamai e tau tukuhau katoa ke he fale tatanaki mena. Kaeke ke taute pihia e tautolu, to moua foki e tautolu e loto olioli ke he tau monuina ato nakai ha ha i ai ha manako.
3. Ko hai e tagata uta fekau kua tauteute tuai e puhala ato hau a Iehova (a) he senetenari fakamua? (e) fakamua ato hoko mai e tauaga fakamua he lalolagi?
3 Hagaao ke he hana hauaga ke he faituga, ne pehe a Iehova: “Kitiala, kua fakafano atu e au haku a fekau, ke tauteute e ia e puhala ki mua haku.” (Malaki 3:1) Ha ko e fakamoliaga he senetenari fakamua ke he mena nei, ne hau a Ioane Papatiso ki Isaraela kua fakamatala e fakatokihala ke he tau agahala. (Mareko 1:2, 3) Kua ha ha i ai nakai ha gahua tauteute tuai ne kua matutaki atu ke he hauaga ke uaaki a Iehova ke he hana faituga? E. He hogofulu e tau tau fakamua ato hoko e tauaga fakamua he lalolagi, ne tutu hake e tau Tagata Fakaako Tohi Tapu ke he lalolagi kua fakaako e tau fakaakoaga mea he Tohi Tapu mo e fakatapakupaku e tau pikopiko kua nakai fakalilifu e Atua, tuga e Tolu Taha mo e fakaakoaga ke he afi a helo. Ne hataki atu foki a lautolu ke he hauaga he fakaotiaga he tau Vaha he Tau Motu Kehe he tau 1914. Ne tokologa e tau tagata ne talia a lautolu nei ne fua e kupu moli.—Salamo 43:3; Mataio 5:14, 16.
4. Ko e heigoa e tau huhu kua lata ke fakamitaki he vaha he aho he Iki?
4 Ne kamata e tau 1914 ke he mena ne ui he Tohi Tapu ko e “aho he Iki.” (Fakakiteaga 1:10) To ha ha i ai e tau mena tutupu mahuiga ka hohoko he vaha he aho ia, kua fakalataha ki ai e fakakiteaga he “tupa fakamoli mo e lotomatala” mo e ke kotofa ai ke he “tau koloa oti kana [he Iki].” (Mataio 24:45-47, NW) I tuai he tau 1914, kua afe e tau lotu ne pehe ko e tau Kerisiano. Ti ko hai mogoia e matakau ka talia he Iki, ko Iesu Keriso, ke eke mo tupa fakamoli mo e lotomatala? To fakamitaki e huhu ia he magaaho ka hau a Iehova ke he faituga.
Hauaga ke he Faituga Fakaagaga
5, 6. (a) Ke he faituga fe ne hau a Iehova ke taute e fakafiliaga? (e) Ko e fakafiliaga ke he heigoa ne moua e Kerisitenitome mai ia Iehova?
5 Ke he faituga fe, mogoia, ne hau a ia ki ai? Kua kitia maaliali nakai ke he faituga he mouiaga nei i Ierusalema. Ko e fale fakahiku he tau faituga oti pihia ne fakaoti he tau 70 V.N. i tuai. Ka e pete ni ia, kua ha ha ia Iehova e faituga lahi mahaki ne ataata mai he mena ia i Ierusalema. Ne vagahau a Paulo ke he faituga lahi mahaki nei mo e fakakite ko e homo ue atu moli ha e mena ia, fakalataha mo e kaina tapu i luga he lagi mo e lotopa i hinai he lalolagi. (Heperu 9:11, 12, 24; 10:19, 20) Ko e mena haia ne hau ai a Iehova ke he faituga fakaagaga lahi mahaki nei ma e gahua fakafiliaga.—Fakatatai Fakakiteaga 11:1; 15:8.
6 Ne tupu he magaaho fe e mena nei? Hagaao ke he tau mena aoga lahi he fakakiteaga moli ne kua maeke ke moua he tau 1918.a Ti ko e heigoa e fua? Ka ko Kerisitenitome, ne kitia e Iehova e fakatokatokaaga kua hihina toto e tau lima, ko e fakatokaaga lotu kelea ne kua mahani fakataka a ia ke he lalolagi nei, kua fekauaki a ia mo e tau tagata muhukoloa mo e fakapehia a lautolu ne mativa, kua fakaako e tau fakaakoaga pouliuli ka e nakai taute mau e tapuaki mea. (Iakopo 1:27, 4:4) He puhala mai ia Malaki, ne hataki mai a Iehova: “To fakaave foki au ke eke mo talahau kia lautolu kua eke e tau lagatau he tau taulaatua, mo lautolu kua faivao, mo lautolu kua omonuo pikopiko, mo lautolu kua fofo e palepale, kua favale atu foki ke he fifine takape, mo e tama kua mamate hana tau matua.” (Malaki 3:5) Ne taute e Kerisitenitome e tau mena oti nei mo e mua atu foki he kelea. He tau 1919 kua kitia maaliali lahi kua fakahala e Iehova a ia ke he fakaotiaga, fakalataha mo lautolu ne toe ia Papelonia Lahi Mahaki, ko e fakatokatokaaga he lalolagi katoa he lotu fakavai. Ati taute mai he magaaho ia, ke fakafano atu e uiaga ki a lautolu ne loto hako: “Hakū motu na e, ati o kehe ā mutolu ia ia.”—Fakakiteaga 18:1, 4.
7. Ko hai ne talahau e Iesu ko e hana tupa fakamoli mo e lotomatala?
7 Ko hai mogoia e tupa fakamoli mo e lotomatala? He senetenari fakamua, ne kamata ai e matakau tote ne talia e gahua fakamoli a Ioane Papatiso mo e ha Iesu, ko e tagata uta fekau he maveheaga. He senetenari ha tautolu, kua gahoa e tau afe tagata ne talia e gahua tauteute tuai he tau Tagata Fakaako Tohi Tapu he vaha he tau tau ato hoko atu ke he tau 1914. Ne fakauka a lautolu nei ke he tau mena uka ne kelea lahi he vaha he tauaga fakamua he lalolagi, ka e fakakite mai e lautolu ko e fakalataha e tau loto ha lautolu mo Iehova.
Ko e Gahua Fakamea
8, 9. He tau 1918, ke he tau puhala fe kua lata ke fakamea e tupa fakamoli mo e lotomatala, mo e ko e heigoa e maveheaga ne taute e Iehova hagaao ke he mena nei?
8 Ka e pete ni ia, kua lata foki e matakau nei ke fakamea. Ko e falu ne tapiki atu ki a lautolu kua eke ke kitia ko e tau fi he tua mo e kua lata ni ke utakehe. (Filipi 3:18) Ne nakai manako e falu ke fua e tau matagahua ne kua putoia ai he fekafekauaga ki a Iehova mo e kua tafea kehe. (Heperu 2:1) Ka e kehe mai he mena ia foki, kua ha ha i ai e tau gahua mau a Papelonia ne toe agaia kua lata ke fakaoti. Ka e ke he tau mena fakatokatokaaga foki kua lata e tupa fakamoli mo e lotomatala ke fakamea. Kua lata ai ni ke ako e tuaga hako tonu ke he nakai kauauloa mo e fakaaoga ai. Mo e he unuunu atu e kelea he lalolagi ke mua atu, kua lata a lautolu ke tau fakalahi ke taofi mau e mahani mitaki mo e tuku ki tua he tau fakapotopotoaga e mahani nakai mea fakaagaga.—Fakatatai Iuta 3, 4.
9 E, kua lata ke fakamea, ka kua ofania lahi e maveheaga a Iehova hagaao ki a Iesu ne nofo he nofoaiki: “Kua nofo a ia po ke tagata kua tunu mo e fakamea e ario; to fakamea ai e ia e fanau a Levi, to vevehe kehe foki e ia e kelekele ia lautolu tuga he eke ke he auro mo e ario; ti ta atu ai e lautolu e tau poa kia Iehova kua eke mo e mahani tututonu.” (Malaki 3:3) Ne kamata mai he tau 1918, ne fakamoli e Iehova hana maveheaga mo e fakamea hana tau tagata he puhala mai e ia he tagata uta fekau nei he maveheaga.
10. Ko e heigoa e tau faga poa ne tamai he tau tagata a Iehova, mo e ko e heigoa e uiinaaga ne age e Iehova ki a lautolu?
10 Ko e tau matakainaga fakauku a Keriso mo e moto tagata tokologa ne matutaki atu ki a lautolu he magaaho fakamui ke he fekafekauaga a Iehova ti kua moua oti e lautolu e lagomataiaga he gahua hakahaka mo e fakamea ario a Iehova. (Fakakiteaga 7:9, 14, 15) Ne o mai a lautolu ko e fakatokatokaaga, mo e o mai agaia, kua foaki atu e mena fakaalofa tuku poa tututonu. Mo e tau poa ha lautolu kua “mitaki ai kia Iehova . . . tuga ne tau tau fakamua.” (Malaki 3:4) Ko e tau mena nei ne uiina fakaperofetaaga mai a Iehova: “Kia ta mai e mutolu e tau mena ke hogofulu aki ha mutolu a tau mena oti kana ke he fale kua tatanaki ai e tau mena; kia ha i ai e tau mena kai ke he haku a fale; mo e kamatamata mai ai e mutolu au ke he tau mena na, kua pihia mai a Iehova Sapaota; po ke hafagi nakai e au e tau pa he lagi ma mutolu, mo e liligi atu e au e monuina ma mutolu, ato lahi ue atu ni haia.”—Malaki 3:10.
Tau Poa mo e Tau Tukuhau
11. Ko e ha kua nakai lata agaia e tau poa he Matafakatufono a Mose?
11 He vaha a Malaki ne tamai he tau tagata he Atua e tau poa he mouiaga nei mo e tau tukuhau, tuga e tau saito, tau fua lakau, mo e tau manu. Kua pihia foki he vaha a Iesu, ne taute he tau Isaraela fakamoli e tau poa he mouiaga nei he faituga. Ka e taha e mena, kua hiki he mole atu e mate a Iesu e tau mena oti ia. Ti kua fakaoti ai e Matafakatufono, fakalataha mo e tau poakiaga ke foaki e tau poa pauaki he tau mena he tino mo e tau tukuhau. (Efeso 2:15) Ne fakamoli e Iesu e fakataiaga he perofetaaga he tau poa he Matafakatufono. (Efeso 5:2; Heperu 10:1, 2, 10) Ke he puhala fe mogoia, kua maeke ai e tau Kerisiano ke tamai e tau poa mo e tau tukuhau?
12. Ko e heigoa e tau faga mena tuku atu fakaagaga mo e tau poa ka taute he tau Kerisiano?
12 Ki a lautolu, ko e tau poa kua mua atu e mitaki ke he tau faga mena fakaagaga. (Fakatatai Filipi 2:17; 2 Timoteo 4:6.) Ke fakatai ki ai, ne vagahau a Paulo ke he gahua fakamatala tuga ko e poa he magaaho ne pehe a ia: “Hanai, kia uta mau e tautolu e poa fakaheke ke he Atua kia ia ni, ko e fua haia he tau laugutu ha lautolu, kua fakaaue atu ke he hana higoa.” Ne tuhi atu a ia ke he taha faga poa fakaagaga he magaaho ne ole fakamakamaka a ia: “Aua neke nimo ia mutolu ke mahani mitaki atu mo e fakaalofa atu; ha ko e tau poa pihia kua fiafia ai e Atua.” (Heperu 13:15, 16) Ka fakamalolo e tau mamatua ke he tau fanau ha lautolu ke huhu ki loto ke he fekafekauaga foafoa, kua eke ai ke pehe ko e taute poa a lautolu ki a Iehova, ke tuga e mena ne tuku atu e Iefeta hana tama fifine tuga ko e “eke foki . . . a ia mo poa huhunu” ke he Atua, he age ki a ia e kautuaga.—Fakafili 11:30, 31, 39.
13. Ko e ha kua nakai lata e tau Kerisiano ke foaki age e tau mena ke hogofuluaki he tau totogi ha lautolu?
13 Ka e kua e tau tukuhau, he mogoia? Kua omoomoi pauaki kia ke he tau Kerisiano ke tuku kehe e tau mena ke hogofuluaki he tau totogi ha lautolu mo e age ke he fakatokatokaaga a Iehova, ke tuga e mena ne taute he falu he tau lotu ha Kerisitenitome? Nakai, kua nakai manako ke he mena ia. Kua nakai ha ha i ai ha kupu tohiaga tapu ne talahau ha poakiaga pihia ke he tau Kerisiano. He magaaho ne oko e Paulo e tau mena foaki noa ma lautolu ne mativa i Iutaia, ne nakai talahau e ia ha pasene pauaki ne kua lata ke age. Ka e kehe, he pehe a ia: “Kia takitokotaha mo e foaki tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7) He vagahau hagaao ki a lautolu ne taute e tau fekafekauaga pauaki, ne fakakite e Paulo ke he falu magaaho kua hako ke lagomatai he tau mena foaki noa e falu, ne kua mautauteute a ia ke gahua mo e lagomatai ne ia a ia. (Gahua 18:3, 4; 1 Korinito 9:13-15) Kua nakai poaki ke fai kotofaaga tukuhau ma e mena nei.
14. (a) Ko e ha e tamaiaga he tukuhau kua nakai ko e hukuiaga he tau foakiaga katoatoa ha tautolu ki a Iehova? (e) Ka ko e heigoa ne hukui he tukuhau?
14 Kua maaliali, ke he tau Kerisiano kua fakatai e tukuhau, po ke mena hukui, ke he taha mena. Ha kua fa mahani e mena ke hogofuluaki mo e numela hogofulu i loto he Tohi Tapu ke fakatai ke he katoatoaaga fakalalolagi, ti kua fakatai kia e tukuhau ke he foaki age oti katoatoa a tautolu ki a Iehova? Nakai. He magaaho ne tukulele e tautolu a tautolu ki a Iehova mo e fakatai e mena nei ke he papatiso he vai, ko e magaaho haia ne tuku atu katoatoa a tautolu ki a ia. Mai he magaaho he ha tautolu a tukuleleaga, kua nakai fai mena a tautolu ne toe ka kua fita ko e tau mena a Iehova. Ka e taha e mena, ne fakaata e Iehova e tau tagata takitokotaha ke fakaaoga e tau mena ha lautolu ke he puhala kua loto a lautolu ki ai. Ti kua hukui he tukuhau e magavala mena ha tautolu ne age ki a Iehova, po ke fakaaoga ke he fekafekauaga a Iehova, ko e fakakiteaga he fakaalofa mo e mailogaaga ha tautolu ke he mena moli ko e pule a ia ki a tautolu. Ko e tukuhau he vaha fou nei kua nakai eke ni ko e tau mena ke hogofuluaki. Ke he falu mena to tote hifo. Ke he falu to eke ni ke lahi atu. Kua tamai he tau tagata takitokotaha e tau mena kua hake mai he loto hana mo e kua maeke he tutuaga hana ke fai.
15, 16. Ko e heigoa ne fakalataha i loto he tau tukuhau fakaagaga ha tautolu?
15 Ko e heigoa ne fakalataha i loto he tukuhau fakaagaga nei? Ko e taha mena, kua age e tautolu ki a Iehova e tau magaaho ha tautolu mo e tau malolo. Ko e tau magaaho ne foaki e tautolu ke he tau feleveiaaga, he fakalataha ke he tau toloaga mo e tau fonoaga, ke he fekafekauaga he fonua, ko e tau mena oti a nei kua age ki a Iehova—ko e vala he ha tautolu a tukuhau. Ko e tau magaaho mo e tau malolo ne fakamole e tautolu ke ahiahi a lautolu ne gagao mo e lagomatai e falu—kua agaia ni, ko e tau vala oti kana hanei he tukuhau ha tautolu. He lagomatai ke talaga e tau Fale he Kautu mo e gahua auloa ke he gahua levekiaga mo e fakamea he fale e taha vala he mena ia foki.
16 Kua fakalataha foki ke he tau tukuhau ha tautolu e tau tupe ne foaki noa e tautolu. Ha kua tupu lahi ue atu e fakatokatokaaga a Iehova he tau tau kuku kua mole, ne fakalataha mai ai e lagoaga ke he tau mena fakamole tupe ne tutupu mai foki. Ne manako ke moua e tau Fale he Kautu fou, fakalataha mo e tau fale fou he tau la mo e tau Fale Tolo fou, fakalataha foki mo e levekiaga he tau fale kua fita e talaga. Kua ufitia ai e tau mena fakamole ki a lautolu ne kua taute ne lautolu a lautolu ke gahua pauaki he fekafekauaga—kua fa mahani ke taute e tau poa fakatagata lahi mahaki—ti kua eke ai mo paleko lahi ue atu. He tau 1991 ko e fakamoleaga tupe ke leveki aki e tau misionare, tau leveki faifano, mo e tau tagata foafoa pauaki ni hokoia ne hoko hake ke molea e 40 e tau miliona tala, ko e tau mena ne moua mai he tau tupe foaki noa.
17. Ti ko e heigoa kua lata ke foaki age mo tau tukuhau fakaagaga ha tautolu?
17 Ti ko e heigoa mogoia kua lata a tautolu ke foaki age mo tukuhau fakaagaga ha tautolu? Kua nakai fakatoka e Iehova ha pasene. Ka e pete ni ia, ko e fioiaaga he tukuleleaga, ko e fakaalofa moli lahi ki a Iehova mo e ke he tau matakainaga, ti pihia foki he fioia e fakatepetepe he iloa kua loga e tau momoui ke fakahao mai, ne fakamalolo mai ki a tautolu ke tamai ha tautolu a tukuhau fakaagaga katoa. Ne omoomoi mai ki a tautolu ke fekafekau ki a Iehova ke he mena kua lahi ue atu mahaki ne maeke ki ai. Mo e kaeke ke lamakai po ke nakai fiafia ke foaki e tautolu a tautolu po ke ha tautolu a tau koloa, kua tatai e mena nei, ke kaiha e tautolu e tau mena he Atua.—Fakatatai Luka 21:1-4.
Ne Fakamonuina Ato Nakai Manako Mena
18, 19. Ne fakamonuina fefe e tau tagata a Iehova he tamai ha lautolu a tau tukuhau katoa ki loto?
18 Tali mai he tau 1919, ne taute fakalahi he tau tagata a Iehova ke he tau magaaho ha lautolu, tau malolo, mo e tau koloa tupe ke he tau manako he gahua fakamatala. Ne tamai moli e lautolu e tau tukuhau katoa ki loto he fale tatanaki mena. Ti ko e fua ne moua, ne fakamoli e Iehova hana maveheaga mo e liligi e tau fakamonuinaaga ato nakai ha ha i ai ha manako mena. Kua kitia maaliali e mena nei i loto he numela ha lautolu ne tupu lahi. Mai he tau afe gahoa ha lautolu ne fakauku, ne fekafekau ki a Iehova he magaaho ne hau a ia ke he hana faituga he tau 1918, ne tupu a lautolu he vaha nei ko lautolu ne fakauku fakalataha mo e ha lautolu a tau hoa, ko e falu mamoe, kua tokologa lahi e numela ti molea atu he fa e miliona mai he 211 he tau motu kehekehe. (Isaia 60:22) Ne kua fakamonuina foki a lautolu nei he tupu tumau e loto maama ke he kupu moli. Ti kua fakamoli ai e tau kupu perofetaaga ki a lautolu. Kua fakatu ti mau niniva ha lautolu a tau loto okafua ke he fakamoliaga he finagalo a Iehova. (2 Peteru 1:19) Ko lautolu moli e tau tagata ne “fakaako e Iehova.”—Isaia 54:13.
19 Kua puhala mai ia Malaki, ne talahau tuai e Iehova e taha fakamonuinaaga foki: “Ti fevagavagahau aki a lautolu ne matakutaku kia Iehova; kua hagao mai foki a Iehova mo e fanogonogo mai; ti tohi ai e tohi ke fakamanatu ai ki mua hana, ma lautolu ne matakutaku kia Iehova, mo e manamanatu ai ke he hana higoa.” (Malaki 3:16) Mai he tau fakatokatokaaga oti kana ne talahau ko e tau Kerisiano, ko e Tau Fakamoli a Iehova ni hokoia ne manamanatu ke he hana higoa mo e fakamatalahi atu ke he tau motu. (Salamo 34:3) Kua fiafia a lautolu he iloa moli ko e manatu e Iehova ha lautolu a fakamoliaga!
20, 21. (a) Ko e fakafetuiaga monuina fefe ne moua he tau Kerisiano moli e olioli? (e) Ko e kehekeheaga fefe he matakau faka-Kerisiano kua eke ke kitia maaliali fakahaga?
20 Ko lautolu ne toe ne fakauku ko e tau tagata ne fiafia pauaki a Iehova ki ai, mo e moto tagata tokologa, kua fuifui mai ke fakalataha mo lautolu, ti kua helehele fakalataha mo lautolu e tau fakamonuinaaga he tapuaki mea. (Sakaria 8:23) He puhala mai ia Malaki, ne mavehe mai a Iehova: “To eke foki a lautolu maku, ko e koloa uho ni, kua pihia mai a Iehova Sapaota, ke he aho kua kotofa ai e au; to fakaalofa foki au kia lautolu, tuga he fakaalofa e tagata ke he hana tama tane kua fekafekau kia ia.” (Malaki 3:17) Ko e monuinaaga lahi naia ha kua pihia e loto molu a Iehova ki a lautolu!
21 Kua moli, kua eke ke kitia lahi fakahaga foki e kehekeheaga he vahaloto he tau Kerisiano moli mo lautolu ne fakavai. He lali fakamalolo e tau tagata a Iehova ke taofi mau hana tau tutuaga, ka e hane tomo hifo fakahaga a Kerisitenitome ki loto he tau mahani kelea mo e nakai mea. Kua moli ni, ne fakamoli ai e tau kupu moli a Iehova: “Ti liliu kitia ai e mutolu kua kehe e tagata mahani tututonu, kehe e tagata mahani kelea; kua kehe a ia kua fekafekau ke he Atua, mo ia kua nakai fekafekau kia ia.”—Malaki 3:18.
22. Ko e heigoa e tau fakamonuinaaga kua maeke ke mauokafua ko e to olioli a tautolu kaeke kua fakatumau a tautolu ke tamai e tau tukuhau katoa?
22 Kua nakai leva, to hoko mai tuai e aho fakafili ke he tau Kerisiano fakavai. “Ha ko e mena, kitiala, ko e hoko mai ne fai e aho ke huhunu ai tuga ne gutuumu; ti eke ai mo gutugutu saito a lautolu oti kua fakatokoluga, katoa mo lautolu oti kua eke e mahani kelea; to huhunu ai foki a lautolu ke he aho ko e hoko mai ne fai, kua pihia mai a Iehova Sapaota.” (Malaki 4:1) Ne iloa he tau tagata a Iehova to puipui e ia a lautolu he magaaho ia, tuga ne puipui e ia hana motu fakaagaga i tuai he tau 70 V.N. (Malaki 4:2) Kua fiafia ha a lautolu he moua e fakamafanaaga ia! Ha kua pihia, ato hoko ke he magaaho ia kia fakakite a e tautolu takitokotaha ha tautolu a loto fakaaue mo e fakaalofa ki a Iehova he tamai e tau tukuhau katoa ki loto he fale tatanaki mena. He magaaho ia, kua maeke a tautolu ke mauokafua e tau loto ko e to fakatumau a ia ke fakamonuina a tautolu ato nakai ha ha i ai ha manako mena.
[Tau Matahui Tala]
a Ma e falu fakailoaaga, kikite ke he Kolo Toko a Iuni 15, 1987, tau lau tohi 14-20.
Maeke Nakai ia Koe ke Fakamaama:
◻ He vaha fou nei, ne hau he magaaho fe a Iehova ke he faituga fakalataha mo e tagata uta fekau hana ke he maveheaga?
◻ Ko hai e tupa fakamoli mo e lotomatala, mo e ko e fakameaaga fefe kua lata a lautolu ke moua he mole atu e tau 1918?
◻ Ko e tau faga poa fakaagaga fefe ne tamai he tau Kerisiano moli ki a Iehova?
◻ Ko e heigoa e tukuhau ne uiina atu ke he tau Kerisiano ke tamai ke he fale tatanaki mena?
◻ Ko e heigoa e tau fakamonuinaaga ne olioli e tau tagata he Atua ki ai he tuku atu e tau tukuhau fakaagaga?
[Fakatino he lau 29]
Kua fakalataha ke he tau tukuhau fakaagaga ha tautolu e poa he tau malolo ha tautolu mo e tau koloa ke talaga e tau Fale he Kautu
[Fakatino he lau 30]
Ha ko e fakamonuina a Iehova ke he hana tau tagata, kua lahi e gahua ta fale kua lata, fakalataha ai mo e tau Fale he Kautu mo e tau Fale Tolo