Fano mo e Loto kua Katoatoa

“Fakaako au, Ma Iehova, . . . Kia fakakatoatoa e koe haku a loto ke matakutaku ke he hau a higoa.”​—SALAMO 86:11, NW.

1. Palepale fefe e Iehova hana a tau tagata mahani fakamoli?

‘IEHOVA na e, ko koe ko e Atua, ko koe hokoia ni.’ (Salamo 86:8, 10, NW) Ne fakaheke e Tavita e Atua mai he loto kua puke namo ke he fakaaue. Pihia foki he magaaho to eke a Tavita mo patuiki ki Isaraela, ne fakahao e Iehova a ia mai ia Saulo mo e mai he tau tagata Filisitia. Ko e mena ia, ne lologo ai a ia: “Ko Iehova ko e haku a maka tumau mo e haku a taue mo e ko e Laveakiaga he fakahao ma haku. Ko e taha ka mahani fakamoli to taute e koe e mahani fakamoli.” (2 Samuela 22:2, 26, NW) Ne fakahao e Iehova hana a lagomatai mahani fakamoli mai he tau kamatamata loga. Na maeke ia Tavita ke tuku hana a falanaki mo e malolo ke he hana a Atua mahani fakamoli, ka kua manako a ia ke matutaki e takitakiaga. Ne olelalo a Tavita he mogonei ke he Atua: “Fakaako au, Ma Iehova, ke he puhala hau.”​—Salamo 86:11, “NW.”

2. Ne taute fefe e Iehova e fakatokaaga ma e ha tautolu a fakaako mai e ia?

² Ne nakai manako a Tavita ke fai fekau a ia ke he tau manatu po ke tau kumikumiaga fakalalolagi. Ne manako a ia ke “fakaako e Iehova,” tuga he talahau ai fakamua he perofeta he Atua. (Isaia 54:13) Na liga manamanatu ni a Tavita ke he hiva ni e tau tohi he Tohi Tapu ne maeke ke fakaaoga he vaha hana. Ka e pete ni he pihia, ko e fakaakoaga ia mai ia Iehova ne uho ki a ia! Ha kua fakaako, kua maeke ia tautolu he vaha nei ke kai galue ke he tau tohi 66 oti he Tohi Tapu, ti pihia ni foki ke he tau tohi loga he Kautu ne moua mai he tau “tupa fakamoli mo e lotomatala.” (Mataio 24:45, NW) Ke tuga a Tavita, o mai a tautolu ke ui ki a Iehova, ke maeke he hana agaga ke lagomatai a tautolu ke kumi atu ke he “tau mena kua taute he Atua ma lautolu kua fakaalofa ki a ia, . . . ko e tau mena hokulo ia he Atua.”​—1 Korinito 2:9, 10.

3. Ko e heigoa e tau puhala he fakaakoaga he Tohi Tapu kua aoga ki a tautolu?

³ Kua ha ha he Tohi Tapu e tali ke he tau huhu mo e tau mena vihi oti ka mafutafuta hake he tau momoui ha tautolu. “Ha ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohiaga Tapu.” (Roma 15:4, NW) Ke hufia ke he tau fakaakoaga mai ia Iehova to fakamaloloaki a tautolu ke fakauka ke he tau mena uka, mo e fakamafanatia a tautolu he tau magaaho fakaatukehe, mo e tugi fakakikila tumau e amaamanakiaga he Kautu ke he tau loto ha tautolu. Kia moua e tautolu e fiafia ha ko e totou ke he Kupu he Atua mo e manamanatu ki ai “ke he aho katoa mo e po,” ha kua eke e iloilo ne fakave ke he Tohi Tapu mo “akau he moui kia lautolu kua toto atu ki ai, mo lautolu ne taofi fakalahi tumau ki ai kua fakahigoa ai ko e fiafia.”​—Salamo 1:1-3; Fakatai 3:13-18, NW; kikite foki Ioane 17:3.

4. Ke he tau gahua ha tautolu, ko e heigoa e fakafifitakiaga ne fakatoka e Iesu ma tautolu?

⁴ Ko e Tama he Atua, ko Iesu, ne fakahigoa foki ko e “tama a Tavita,” ne kumi tumau a ia ki a Iehova ma e fakaakoaga. (Mataio 9:27)a Ne pehe a ia: “Nakai maeke ke he Tama ke eke taha mena, ko ia ni hokoia; ka ko e tau mena ne kikite atu ke he Matua ha ne eke; ko e tau mena foki ne eke e ia, ko e tau mena foki ia ha ne eke pihia he Tama.” “Nakai eke noa foki e au ha mena, ha ko e mena tuga ne fakaako mai he haku a Matua ki a au, ko e tau mena ia ne tala atu ai e au.” (Ioane 5:19; 8:28) Ne toka e Iesu e fakafifitakiaga ma tautolu “kia mumui atu a mutolu ke he hana tau tuagahui.” (1 Peteru 2:21) Kia manamanatu la! Kaeke ke kumikumi a tautolu tuga he taute pihia e Iesu, ko e ha mena ni to taute ni e tautolu tuga ni ne taute e Iehova ma tautolu. Ko e puhala a Iehova ko e puhala hako tumau.

5. Ko e heigoa e “kupu moli”?

⁵ Kua liu foki fakailoa e Tavita: “To fano au ke he kupu moli hau.” (Salamo 86:11, NW) Ko e tau afe tau fakamui, ko Pilato ne vagahau ke he Tama a Tavita, ko Iesu, ne huhu: “Ko e heigoa e kupu moli?” Ka ko e tali la ia e Iesu e huhu ia he tala age ki a Pilato: “Nakai ko e kautu he lalolagi nai haku a kautu,” lafi atu e ia: “Ko koe ni kua talahau ko e patuiki au. Ha ko e mena nei ati hau ai au ke he lalolagi, kia eke ai au mo talahau ke he kupu moli.” (Ioane 18:33-38, NW) Kua fakailoa moli e Iesu he mena nei ko e kupu moli kua hagaao atu ia ke he Kautu faka-Mesia. Moli, ko e matapatu katoa he Tohi Tapu ko e fakatokolugaaga he higoa a Iehova puhala mai he Kautu ia.​—Esekielu 38:23; Mataio 6:9, 10; Fakakiteaga 11:15.

6. Ke o fano he kupu moli, ko e heigoa kua lata a tautolu ke puipui mai ai?

⁶ Ko e heigoa e kakano ke fano he kupu moli? Ko e kakano ke taute e amaamanakiaga he Kautu ke eke mo matapatu hagaaoaga he tau momoui ha tautolu. Kua lata a tautolu ke momoui ke he kupu moli he Kautu he Atua. Kua lata ia tautolu ke nakai mavehevehe he tuku fakamua e tau mena he Kautu, fakamakamaka ke he tau magaaho ha tautolu ke fakamatala e kupu moli he Kautu, he mumui ke he fakafifitakiaga ha Iesu. (Mataio 6:33; Ioane 18:37) Kua nakai maeke ia tautolu ke o taha vala magaaho he kupu moli, mo e foaki fakateaga noa e fekafekauaga mo totou ka ko e magaaho taha kua fakafiafia na tautolu ni ke uta e tau puhala kehe ke fakaata fakalahi e magaaho fakafiafia po ke ke hu he tau gahua fakamole magaaho po ke ‘fekafekau ma Mamone.’ (Mataio 6:24) To galo ni a tautolu he taha he tau kala puhala ia, mo e nakai maeke ke liu moua e ‘gutuhala pukilu ke pu atu ke he moui.’ Ti aua neke hehe a tautolu mai he puhala ia! (Mataio 7:13, 14) Ko e ha tautolu a Takitaki Mitaki ue Atu, ko Iehova, puhala mai he hana a Kupu mo e fakatokatokaaga, kua fakamaama e ia e puhala, mo e pehe mai: “Ka afe age a mutolu ke he fahi matau po ke afe age a mutolu ke he fahi hema, kua pehe mai, Ko e puhala hanai ke o ai a mutolu.”​—Isaia 30:21.

Ko e Matakutaku Hako

7. “Fakakatoatoa” fefe e tautolu ha tautolu a tau loto?

⁷ Ko e liogi a Tavita kua matutaki atu he Salamo 86 kupu 11: “Kia fakakatoatoa e koe haku a loto ke matakutaku ke he hau a higoa.” Ke tuga a Tavita, kua lata a tautolu ke manako ke he ha tautolu a tau loto ke ua mavehevehe, kia katoatoa, ke taute e finagalo he Atua. Kua tatai e mena nei mo e fakatonuaga a Mose: “Hanai, Isaraela na e, ko e heigoa kia e mena kua finagalo ki ai a Iehova hau a Atua kia koe, ka ko e tau mena nai hokoia, kia matakutaku a koe ki a Iehova hau a Atua, kia fano ai ke he hana tau puhala oti ni, mo e fakaalofa atu a koe kia Iehova hau a Atua, mo e fekafekau a koe kia Iehova hau a Atua mo e hau a loto katoa mo e hau a agaga katoa. Kia omaoma a koe ke he tau poaki a Iehova mo e hana a tau fakatufono kua poaki atu ai e au kia koe ke he aho nai, kia monuina ai a koe.” (Teutaronome 10:12, 13) Ko e moli ni, ko e mitaki ni ma tautolu ke liligi ha tautolu a tau loto mo e tau solu ke fekafekau ki a Iehova. Ko e mena haia kua fakakite ai e tautolu e matakutaku hako ke he hana a higoa talahaua. Ko e kakano he higoa a Iehova ko e “Kua Fakatupu ke Eke,” hagaao pauaki ke tamai hana a finagalo mitaki ue atu ke he fakakatoatoaaga. Kua hagaao foki ke he hana pule tokoluga ke he tau mena oti kana. Ko e fekafekau mo e matakutakuina ke he lilifu he Atua, to nakai fakaafe he matakutaku a tautolu ke he tagata moui. To nakai mavehevehe e tau loto ha tautolu. Ka, to matakutaku a tautolu ke taute ha mena ne nakai fakafiafia ki a Iehova, ko e Fakafili Tokoluga mo e Iki Sapaota, ko ia ne toto ha tautolu a tau momoui he hana a tau lima.​—Isaia 12:2; 33:22.

8, 9. (a) Ko e heigoa e kakano he “nakai ko e taha vala he lalolagi”? (e) Ko e heigoa e tau lakaaga ha tautolu ka uta ha ko tautolu ko e “tau kitekiteaga”?

⁸ Pete ni he fehagaaoaki a tautolu mo e tokutoku mo e favale, to mumui a tautolu ke he fakafifitakiaga nakai matakutaku a Iesu ke nakai ko e taha vala he lalolagi mahani kelea ne takai ia tautolu. (Ioane 15:17-21) Nakai pehe e mena ia ke nonofo e tau tutaki a Iesu tuga e tau tagata ai kitia tagata po ke fufu ke he tau fale ne api ai e tau tagata fakalotu. Ne pehe a Iesu he liogi ke he hana Matua: “Nakai liogi au kia uta kehe e koe a lautolu he lalolagi, ka kia leveki atu e koe a lautolu mai ia ia ne mahani kelea. Nakai ko e tau tagata he lalolagi a lautolu, ke tuga foki au, nakai ko e tagata he lalolagi au. Kia fakatapu e koe a lautolu ke he hau a kupu moli; ko e hau a kupu ko e kupu moli haia. Tuga ne fakafano mai e koe au ke he lalolagi, kua pihia foki au, he fakafano atu e au a lautolu ke he lalolagi.” (Ioane 17:15-18) Tuga a Iesu, ne fakafano atu a tautolu ke fakailoa e kupu moli he Kautu. Ne mafanatia e tau puhala a Iesu. Ne hauhau e tau tagata he hana a puhala fakaako. (Fakatatai Mataio 7:28, 29; 11:28, 29; Ioane 7:46.) Kua lata ke tatai ni mo tautolu.

⁹ Ko e ha tautolu a talahaua atu he fekapitigaaki, mea mo e maopoopo mitaki e tau tauteuteaga, totonu mo e mea e tau fakatutalaaga, kua lata ke taute aki a tautolu mo e ha tautolu a fekau ke talia fiafia he tau tagata loto hako. Kia tiaki e tautolu e mahani fulu­fagu, tau tapulu nakai gali mo e tau fakalatahaaga ne liga ke takitaki ke he tau hufiaaga fakalalolagi, mo e puhala fakatokanoa mo e nakai fai hatakiaga he moui ne kitia e tautolu he lalolagi takai ia tautolu. Ha kua “eke a mutolu mo kitekiteaga ke he lalolagi, ko e tau agelu katoa mo e tau tagata,” kua gahua a tautolu ke 24 e tula he tau aho takitaha ke fekafekau mo e nonofo tuga e tau Kerisiano fakafifitaki. (1 Korinito 4:9; Efeso 5:1-4; Filipi 4:8, 9; Kolose 4:5, 6) Kua lata e tau loto ha tautolu ke katoatoa ke hoko ke he fakaotiaga nei.

10. Manatu fefe e Iehova a lautolu kua fakakatoatoa ha lautolu a tau loto ke he lagomataiaga tapu?

¹⁰ Ko tautolu ne katoatoa ha tautolu a tau loto ke matakutaku ke he higoa a Iehova, manamanatu ke he hana a finagalo mitaki ue atu mo e fakapukeaki e fekafekauaga tapu e tau momoui ha tautolu, to manatu e Iehova. “Ha ko e tau fofoga a Iehova kua o tafeliuaki ai ke he lalolagi oti, ke lagomatai ki a lautolu kua katoatoa ha lautolu a tau loto ki a ia.” (2 Nofoaga he Tau Patuiki 4:9) Kaeke ke hagaao fakaperofeta mai ke he vaha ha tautolu, kia totou ke he Malaki 3:16: “Ti fevagavagahau aki a lautolu ne matakutaku kia Iehova; kua hagao mai foki a Iehova mo e fanogonogo mai; ti tohi ai e tohi ke fakamanatu ai ki mua hana, ma lautolu ne matakutaku kia Iehova, mo e manamanatu ai ke he hana higoa.” Kia katoatoa ha tautolu a tau loto ke he matakutaku katoa ia ki a Iehova!

Fakaalofa-Totonu a Iehova

11. To fakakite atu fefe e Iehova hana a fakaalofa-totonu ke he tau tagata mahani fakamoli?

¹¹ Ko e mafanatia ha a ia he liogi a Tavita! Kua matutaki e ia: “Fakaheke atu au ki a koe, Iehova na e, ko e haku a Atua, fakalataha mo e haku a loto katoa, mo e to fakalilifu e au hau a higoa ke he vaha nakai fai fakaotiaga, ha ko e hau a fakaalofa totonu mai ki a au kua lahi mahaki, mo e kua laveaki e koe haku a solu mai i Seoli, ko e hana a tokaaga tokolalo lahi.” (Salamo 86:12, 13, “NW”) Ko e magaaho ke uaaki he salamo nei, kua fakaheke e Tavita a Iehova ma e Hana a fakaalofa-totonu​—Hana a fakaalofa mahani fakamoli. Ko e lahi mahaki he fakaalofa nei ha kua maeke ke fakahao e tau mena ne liga ke nakai mukamuka. Ko e magaaho ne tutuli ai e Saulo a ia he tutakale, na liga logona hifo e Tavita e fia totolo atu ke he taha matapoko ke mate ai. Kua tuga ni e feonoaki mo e tokolalo lahi a Seoli​—ko e tukuaga hokulo. Ka e laveaki e Iehova a ia! To pihia ni, kua tamai tumau e Iehova e okiokihaga ke he hana a tau lagomatai he vaha nei he tau puhala fulufuluola, mo e lagomatai foki e ia e tau tagata mahani hakohako ne fakauka e tua pete ke hoko ke he mate. Ko lautolu oti ne mahani fakamoli to moua ha lautolu a palepale, ke hoko foki ke he liu tu mai kaeke kua lata.​—Fakatatai Iopu 1:6-12; 2:1-6, 9, 10; 27:5; 42:10; Fakatai 27:11; Mataio 24:9, 13; Fakakiteaga 2:10.b

12. Mahani fakatokoluga mo e favale fefe e tau akoako, mo e ko e heigoa ha lautolu a palepale?

¹² Hagaao ke he tau tagata favale kua tagi mai a Tavita: “Ko e Atua na e, kua tutu mai kia au e tau tagata fakatokoluga, ko e fakapotopotoaga foki he tau tagata favale kua kumi au ke keli; nakai tuku atu e lautolu a koe ki mua ha lautolu.” (Salamo 86:14) He vaha nei, ko e tau tagata favale kua lafi atu ke he tau akoako he Kerisitenitome. Ko e tau tagata nei kua talahau ko e tapuaki ke he Atua ka e hukui aki e lautolu e “Iki” hana a higoa tapu mo e fakakite a ia ko e mena galo ko e Tolu Taha ne nakai totoku mai he ha mena he Tohi Tapu. Ko e fakatokoluga ha a ia! Lafi ke he mena nei, kua lahi a lautolu ke fakaohooho e tau malolo fakapolitika ke tuku ki tua mo e tuku fale puipui e Tau Fakamoli a Iehova, mo e hane taute agaia pihia ke he loga he tau motu ne takai he lalolagi. Ko e tau akoako tapulu loloa nei ko e tau tagata amuamu ke he higoa he Atua to helehele ha lautolu a taui, fakalataha mo lautolu oti ne tuga e tau fifine fakataka ha Papelonia Lahi.​—Fakakiteaga 17:1, 2, 15-18; 19:1-3.

13. Ko e heigoa e tau fua ne fakakite e Iehova ke fakailoaaki hana a mahani mitaki?

¹³ Ko e fiafia he keheaga kua tutaki atu e liogi ha Tavita: “Ka ko koe, Iehova na e, ko e Atua fakaalofa hofihofi mo e fakaalofa noa, kua fakatuai ke ita mo e lahi e fakaalofa totonu mo e fakamoli.” (Salamo 86:15, “NW”) Tokoluga lahi, moli, e tau fua pihia he Atua ha tautolu. Ko e tau kupu nei kua liuaki ki tua aki a tautolu ke he Mouga ko Sinai he magaaho ne ole ai a Mose ke kitia e lilifu a Iehova. Ne tali e Iehova: “To fakafano atu e au haku a mitaki oti kana ki mua hau; to tokutoku atu e au e higoa a Iehova ki mua hau.” Ka e fakatonu e ia a Mose: “Nakai maeke ia koe ke kitia hoku mata; ha kua nakai kitia he tagata au mo e moui.” Ko e magaaho fakamui ne hifo mai a Iehova he tau aolu, mo e pehe mai: “Ko Iehova, ko Iehova, ko e Atua fakaalofa hofihofi mo e fakaalofa noa, kua fakatuai ke ita mo e lahi e fakaalofa-totonu mo e fakamoli.” (Esoto 33:18-20, NW; Esoto 34:5, 6) Ne liu fatiaki e Tavita e tau kupu nei he hana a liogi. Ko e tau fua pihia ha Iehova kua lahi mahaki e aoga ia ki a tautolu mai he ha mena he tau mena ne kitia ai fakatino! Mai he tau mena ha tautolu ne mahani, nakai kia fakaaue e tautolu e mahani mitaki a Iehova tuga ne fakamatalalahi he tau matahigoa mitaki nei?

“Fakamailoga ko e Kakano he Mahani Mitaki”

14, 15. Taute fefe e Iehova ma e hana a tau lagomatai e “fakamailoga ko e kakano he mahani mitaki”?

¹⁴ Kua liu foki ole fakamakamaka e Tavita e fakamonuina a Iehova, mo e pehe: “Kia fuluhi mai ki a au mo e fakakite mai ki a au hau a loto fiafia. Kia mai hau a malolo ke he hau a lagomatai, mo e fakamoui e tama tane he hau a tama fifine fakatupa. Kia taute fakalataha mo au e fakamailoga ko e kakano he mahani mitaki, ke kitia e lautolu ne fakavihia au mo e ma ai, ha ko koe hoko koe ni, Iehova na e, ne lagomatai au mo e fakamafana au.” (Salamo 86:16, 17, “NW”) Kua mailoga e Tavita, ke eke ‘mo tama tane he tama fifine fakatupa a Iehova,’ ko ia foki ko e ha Iehova. Kua tatai ni mo tautolu oti he vaha nei ne tukulele ha tautolu a tau momoui ki a Iehova mo e fakatupa ke he hana a gahua. Kua manako a tautolu ke he fakamouiaga malolo a Iehova puhala mai he hana a agaga tapu. Ko e mena ia, kua ole a tautolu ke he Atua ha tautolu ke taute fakalataha mo tautolu e “fakamailoga ko e kakano he mahani mitaki.” Ko e mahani mitaki a Iehova kua kuku aki e tau fua mitaki ne fakatutala a tautolu ki ai. Ke he fakaveaga nei, ko e heigoa e fakamailoga, po ke fakakiteaga, ne amaamanaki a tautolu ke mai e Iehova ma tautolu?

¹⁵ Ko Iehova ko e Foakiaga he “tau mena fakaalofa oti kua katoatoa ai e mitaki” mo e fakamokoi, tuga he fakamoli mai e Iesu ki a tautolu, ke foaki mai e “Agaga Tapu ki a lautolu ka ole atu ai kia ia.” (Iakopo 1:17; Luka 11:13) Agaga tapu​—ko e mena fakaalofa nakai fai totogi ha a ia mai ia Iehova! Puhala mai he agaga tapu, kua moua mai ia Iehova e olioli he loto, pihia foki he magaaho he favaleaga. Ko e mena haia, he tau aposetolo a Iesu, he magaaho ka hoko e kamatamata ke he tau momoui ha lautolu, kua maeke ke fakailoa e lautolu e loto olioli lahi na age ni he Atua e agaga tapu ki a lautolu ne omaoma ki a ia kua eke a ia mo pule. (Gahua 5:27-32) Ko e olioli he agaga tapu kua fakatumau ke gahua mo lautolu e “fakamailoga ko e kakano he mahani mitaki.”​—Roma 14:17, 18.

16, 17. (a) Ko e heigoa e fakamailoga he hana a mahani mitaki ne age e Iehova ki a Paulo mo Panapa? (e) Ko e heigoa e fakamailoga ne age ke he tau tagata Tesalonia favale?

¹⁶ He magaaho he fakaakoaga he fenoga fakamisionare ha lautolu ki Asia Tote, ne feleveia a Paulo mo Panapa mo e tau mena uka, ke hoko foki ke he tau favaleaga mamahi. Ko e magaaho ne fakamatala ai a laua i Anetioka i Pisitia, ne nakai talia he tau Iutaia e fekau ha laua. Ko e mena ia, ne fuluhi atu a laua ke he tau tagata he tau motu kehe. Ko e heigoa e fua? “Kua logona he tau tagata kehe, ati olioli ai, mo e fakaheke atu a lautolu ke he kupu he Iki; kua tua foki a lautolu oti ne kotofa ke he moui tukulagi.” Ka kua fakatupu he tau Iutaia e vale lahi, ke vega kehe e tau misionare ia mai he motu. Ka e fakalolelole nakai a lautolu mo e tau tagata ne tali tonu fou ke he mena nei? Nakai lata! Ka kua, “puke foki e tau tutaki ke he olioli, mo e Agaga Tapu.” (Gahua 13:48, 52) Ne age e Iehova ki a lautolu e fakamailoga ia ke he hana a mahani mitaki.

¹⁷ Ko e magaaho fakamui, ne tuku e fakapotopotoaga i Tesalonia ke he favale. Ne takitaki he mena nei e aposetolo ko Paulo ke tohi e tohi fakamafana, mo e fakaaue ke he ha lautolu a fakauka ke he matematekelea. Ne “talia e mutolu e kupu mo e matematekelea lahi, mo e olioli mai he agaga tapu.” (1 Tesalonia 1:6, NW) Ko e “olioli mai he agaga tapu” ne fakamalolo tumau aki a lautolu ke eke mo fakamailoga moli mai he Atua ko ia ne fakaalofa hofihofi mo e fakaalofa noa, fakatuai ke ita, mo e lahi e fakaalofa-totonu mo e mahani fakamoli.

18. Fakakite fefe he tau matakainaga ha tautolu he Fahi Uta i Europa e fakaaueaga ma e mahani mitaki a Iehova?

¹⁸ He tau vaha nakai la leva, ne fakakite atu e Iehova hana a mahani mitaki ke he tau matakainaga tua he fahi Uta i Europa, mo e fakama a lautolu ia ne vihiatia a lautolu​—ko e ha lautolu a tau tagata ne favale fakamua. Pete ni he nakai la leva e fakaata mai, mai he tau hogofulu tau ne nonofo matematekelea ai, ka e tumau agaia e fakauka he tau matakainaga fakahelehele nei, ha kua tokologa ne feleveia mo e tau mena uka he mamahi he tau gahua moua tupe. Ka e taha e mena, ko e ha lautolu a “olioli mai he agaga tapu” kua fakamafanaaki a lautolu. Ko e heigoa foki e olioli lahi mahaki ka moua e lautolu ke he fiafia ke fakaaoga ha lautolu a ataina moua fou ke fakalaulahi e gahua talahau atu? Tokologa e tau tagata ne fanogonogo ki a lautolu, tuga e tau hokotaki ne fakakite mai he tau fonoaga mo e tau papatisoaga.​—Fakatatai Gahua 9:31.

19. Maeke fefe ia tautolu ke taute e tau kupu he Salamo 86:11 ma tautolu ni?

¹⁹ Ko e tau mena oti ne tutala ki ai he vala tala nei mo e vala tala kua mole kua fakataogo mai aki e liogi fakamafana ha Tavita ki a Iehova: “Fakaako au, Ma Iehova, . . . Kia fakakatoatoa e koe haku a loto ke matakutaku ke he hau a higoa.” (Salamo 86:11, NW) O mai a a tautolu ke eke e tau kupu ia ma ha tautolu a tohi he tau he tau 1993 ma tautolu ni, ka hane gahua a tautolu mo e tau loto katoa ke lagomatai e tau mena ne fiafia e Kautu ki ai mo e fakaaueaga ke he mahani mitaki nakai otioti he ha tautolu a Atua tokotaha, ko e Iki Sapaota ko Iehova.

[Tau Matahui Tala]

Tali Fefe e Koe?

◻ Ko e heigoa ha tautolu ne fakakite ka liogi, “Fakaako au, Iehova na e”?

◻ Ko e heigoa e kakano he tau loto ha tautolu ke fakakatoatoa e matakutaku ke he higoa a Iehova?

◻ To fakakite atu fefe e Iehova hana a fakaalofa-totonu ke he tau tagata oti kua mahani fakamoli?

◻ Taute fefe e Iehova mo tautolu e “fakamailoga ko e kakano he mahani mitaki”?

[Puha he lau 17]

Ko e tohi he tau ma e tau 1993:“Fakaako au, Ma Iehova . . . Kia fakakatoatoa e koe haku a loto ke matakutaku ke he hau a higoa.”—Salamo 86:11, NW.

[Fakatino he lau 16]

Ko Iehova ko e makatumau mo e ko e taue ki a lautolu kua o fakahako he kupu moli

[Fakatino he lau 19]

Ha ha ke he Fonoaga Atu Motu ko e “Tau Tagata Hahamo he Maama” he Tau Fakamoli a Iehova i St. Petersburg, i Rusia, he mahina a Iuni, ko e 46,214 ne o atu ki ai mo e 3,256 ne papatiso ai. Ko e homo ue atu ha a ia ia lautolu nei ha kua fakaaoga e lautolu a lautolu ke he mahani mitaki a Iehova, mo e “olioli he agaga tapu”!