“Kia Fakamau e Koe Hoku Loto ke Matakutaku ke he Hāu a Higoa”

1. Ko e heigoa e matakutaku mahani Atua, ti ko e ha kua lata ai ma lautolu ne fakaalofa ki a Iehova?

KUA fakaalofa e tau Kerisiano ke he Atua ti matakutaku foki a lautolu ki a ia. Ke he falu, tuga kua nakai tatai e mena nei. Ka e nakai hagaao a tautolu ke he matakutaku ne fakahopoate a koe. To fakatutala a tautolu ke he taha vahega matakutaku pauaki. Ko e tau tagata ne moua e matakutaku nei kua loto fakaaue ke he Atua mo e fakalilifu mooli ki a ia. Nakai manako a lautolu ke fakakelea e Matua ha lautolu he lagi ha kua nakai manako ke fakahagahaga kelea e tuaga kapitiga ha lautolu mo ia.​—Sala. 111:10; Fakatai 8:13.

2. Fakavē ke he tau kupu he Patuiki ko Tavita ne fakamau ia Salamo 86:11, ko e heigoa e tau mena ne ua ka fakatutala a tautolu ki ai?

² Totou Salamo 86:11. He manamanatu a koe ke he tau kupu ia, maeke a koe ke iloa kua maama he patuiki fakamooli ko Tavita e aoga he matakutaku mahani Atua. To fakatutala mogonei ke he puhala kua liga fakagahua e tautolu e tau kupu omoomoi ha Tavita. Fakamua, to kumikumi a tautolu ke he falu kakano kua lata ke hokulo e fakalilifu ke he higoa he Atua. Uaaki, to fakatutala a tautolu ke he puhala kua fakalilifu e tautolu e higoa he Atua ke he tau momoui ha tautolu he tau aho takitaha.

KO E HA NE OMOOMOI HE HIGOA HA IEHOVA E FAKALILIFU LAHI?

3. Ko e heigoa e mena ne tupu ne liga lagomatai a Mose ke tumau ke hokulo e fakalilifu ke he higoa he Atua?

³ Manamanatu ke he logonaaga ha Mose he fakapukupuku a ia he maihi he maka ti kitia e ia e fakakiteaga he lilifu ha Iehova ne mole ia ia. Liga ko e mena ofoofogia lahi anei ne tupu ke he ha tagata ato hau a Iesu ke he lalolagi. Logona e Mose e tau kupu nei ne talahau he agelu: “Ko Iehova, ko Iehova, ko e Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli; Kua tumau hana fakaalofa to hoko ke he afe he tau hau; kua fakamagalo foki e ia e mahani hepehepe, mo e holifono, mo e hala.” (Esoto 33:17-23; 34:5-7) Liga manatu e Mose e mena ia ne tupu he fakaaoga e ia e higoa ha Iehova. Ti nakai ofo he hataki e Mose he mogo fakamui e tau Isaraela ko e tau tagata he Atua ke “matakutaku ai . . . ke he higoa lilifu mo e matakutakuina nai.”​—Teu. 28:58.

4. Ko e tau aga fe ka manamanatu fakahokulo a tautolu ki a Iehova ti fakalilifu fakalahi a ia?

⁴ He manamanatu a tautolu ke he higoa Iehova, lata foki ke manamanatu fakahokulo ki a Ia he higoa ia. Lata a tautolu ke manatu haana a tau aga, tuga e malolō, pulotu, fakafili tonu, mo e fakaalofa. He manamanatu ke he tau aga ia mo e falu foki ka omoomoi a tautolu ke fakalilifu fakalahi a ia.​—Sala. 77:11-15.

5-6. (a) Ko e heigoa e kakano he higoa he Atua? (e) Ia Esoto 3:13, 14 mo e Isaia 64:8, he tau puhala fe ne omoomoi e Iehova e tau mena ke tutupu?

⁵ Ko e heigoa ne iloa e tautolu hagaao ke he kakano he higoa he Atua? Tokologa e pulotu ne talia ko e higoa Iehova ne liga kakano “To Fakamooli Ai a Ia ke he Mena Ia.” Fakamanatu mai he kakano ia ne nakai fai mena ke taofi a Iehova he taute e finagalo haana. He puhala fe?

⁶ Fakahoko e Iehova e tau mena he eke mo ha mena ke fakamooli e finagalo haana. (Totou Esoto 3:13, 14.) Fa fakamafana mai ke manamanatu ke he aga ofoofogia ia he Atua. Maeke foki a Iehova ke omoomoi e tau fekafekau nakai mitaki katoatoa haana ke eke mo mena kua lata ke fekafekau ki a ia mo e fakamooli e finagalo haana. (Totou Isaia 64:8.) He tau puhala nei, ne omoomoi e Iehova ke fakamooli e finagalo haana. Nakai fai mena ke taofi a ia he fakamooli e tau finagalo haana.​—Isaia 46:10, 11.

7. Atihake fēfē e tautolu e loto fakaaue ma e ha tautolu a Matua he lagi?

⁷ Maeke a tautolu ke atihake e loto fakaaue ma e ha tautolu a Matua he lagi he manamanatu fakahokulo ke he tau mena kua taute e ia mo e tau mena kua lagomatai e ia a tautolu ke taute. Ke fakatai, ka manamanatu fakahokulo a tautolu ke he tau tufugatia ofoofogia, kua hokulo e fakalilifu ha tautolu ke he tau mena kua taute e Iehova ko e tau tufugatia haana. (Sala. 8:3, 4) Ti ka manamanatu fakahokulo a tautolu ke he tau mena ne lagomatai e Iehova ke maeke ke taute e finagalo haana, feaki e tautolu e fakalilifu lahi ki a ia. Kua ofoofogia mooli e higoa Iehova! Putoia e tau mena oti he Matua ha tautolu, tau mena oti ne kua taute e ia, mo e tau mena oti ka taute e ia.​—Sala. 89:7, 8.

“KUA UI ATU AI AU KE HE HIGOA A IEHOVA”

8. Ia Teutaronome 32:2, 3, ko e heigoa ne manako a Iehova ma e tau fekafekau haana ke taute ke he higoa haana?

⁸ Ato huhū atu e tau Isaraela ke he Motu he Maveheaga, ne fakaako e Iehova ki a Mose e tau kupu he lologo. (Teu. 31:19) Ti fakaako ai e Mose e lologo ke he tau tagata. (Totou Teutaronome 32:2, 3.) He manamanatu fakahokulo a tautolu ke he kupu 2 mo e 3, maaliali ai kua nakai manako a Iehova ke fufū e higoa haana mo e taute ke tuga kua fakatapu lahi ke fakaleo. Manako a ia ke iloa he haana a tau tufugatia lotomatala oti e higoa haana! Ko e lilifu mooli ma e tau tagata ke logona a Mose ne fakaako a lautolu hagaao ki a Iehova mo e Haana higoa mitaki ue atu! Ko e tau mena ne fakaako age e Mose kua fakamalolō mo e atihake a lautolu, tuga e uha ne tō ganagana ne lagomatai e tau akau ke momoui. Maeke fēfē a tautolu ke fakaako atu pihia?

9. Lagomatai fēfē e tautolu ke fakatapu e higoa ha Iehova?

⁹ Ka haia a tautolu he gahua fakamatala he taha fale ke he taha fale po ke toloaga tagata, maeke a tautolu ke fakaaoga e Tohi Tapu ke fakakite ke he tau tagata e higoa he Atua, ko Iehova. Maeke a tautolu ke foaki e tau tohi fulufuluola, tau vitiō kua aoga lahi, mo e tau vala tala he faahi kupega hila ha tautolu kua fakaheke a Iehova. He gahuaaga, he aoga, po ke ō fenoga, liga moua e tautolu e tau magaaho ke tutala hagaao ke he ha tautolu a Atua fakaalofa mo e tau mahani haana. Ka tala age ai ki a lautolu ne feleveia mo tautolu hagaao ke he finagalo fakaalofa ha Iehova ma e tau tagata mo e lalolagi, kua fakakite age e tautolu e taha tuaga ha Iehova ne liga foou lahi ki a lautolu. He tala age e tautolu e tala mooli hagaao ke he ha tautolu a Matua fakaalofa, ne lagomatai e tautolu ke fakatapu e higoa he Atua. Hane utakehe e tautolu e falu pikopiko mo e ekefakakelea hagaao ki a Iehova ne fakaako age he falu ki a lautolu. Foaki e tautolu ke he tau tagata e tau fakaakoaga kua mua atu e aoga mo e atihake.​—Isaia 65:13, 14.

10. Ka taute e tautolu e tau fakaako Tohi Tapu, ko e ha kua lata ke lahi atu e mena ke taute ka e nakai fakaako ni ke he tau manako mo e tau tuaga he Atua?

¹⁰ Ka taute e tautolu e tau fakaako Tohi Tapu, manako a tautolu ke lagomatai e tau tagata fakaako ke iloa mo e fakaaoga e higoa ha Iehova. Lafi ki ai, manako a tautolu ke lagomatai a lautolu ke iloa mitaki a Iehova. To pihia nakai ka tala age ni e tautolu e tau fakatonuaga, tau tuaga he Atua, mo e tau matafakatufono he mahani? Ko e tagata fakaako mitaki to liga iloa e tau matafakatufono he Atua ti nava foki ki ai. Ka e to omaoma nakai e tagata fakaako ki a Iehova mai he fakaalofa haana ki a Ia? Manatu, na iloa e Eva e matafakatufono he Atua, ka e nakai fakaalofa mooli a ia ke he Atua ne foaki e matafakatufono; pihia foki a Atamu. (Kene. 3:1-6) Ti lata a tautolu ke lahi atu e mena ke taute ka e nakai he fakaako ni e falu hagaao ke he tau manako mo e tau tuaga he Atua.

11. Ka fakaako ke he tau matafakatufono mo e tau tuaga he Atua, lagomatai fēfē e tautolu e tau tagata fakaako ke fakaalofa ki a Ia ne foaki e tau matafakatufono?

¹¹ Ko e tau manako mo e tau tuaga ha Iehova kua mitaki tumau ma tautolu. (Sala. 119:97, 111, 112) Ka e liga nakai mailoga pihia he tau tagata fakaako ato kitia e lautolu kua taute e Iehova e tau matafakatufono ia he fakaalofa ki a tautolu. Ti liga hūhū a tautolu ke he tau tagata fakaako: “Ko e ha ne manatu a koe kua ole e Atua ke he tau fekafekau haana ke taute po ke nakai taute e mena nei? Ko e heigoa ne tala mai he mena ia ki a tautolu hagaao ke he Atua?” Ka lagomatai e tautolu e tau tagata fakaako ke manamanatu hagaao ki a Iehova mo e feaki e fakaalofa mooli ma e higoa lilifu haana, to liga hokotia a tautolu ke he tau loto ha lautolu. To fiafia e tau tagata fakaako ha tautolu ke he tau matafakatufono mo e ke he Atua ne foaki e tau matafakatufono ia. (Sala. 119:68) Ti tupu foki e tua ha lautolu mo e moua e lagomatai ke fakauka ke he tau kamatamata uka lahi mahaki ka hoko mai.​—1 Kori. 3:12-15.

“TO O A TAUTOLU KE HE HIGOA A IEHOVA”

12. Puhala fe ne kaumahala a Tavita ke fakamau katoatoa e loto haana, ti ko e heigoa e fua?

¹² Ko e talahauaga aoga ne moua ia Salamo 86:11 ko e “fakamau e koe hoku loto.” Omoomoi e Patuiki ko Tavita ke tohi e tau kupu ia. He moui haana, kitia e ia e mukamuka ke fakaatā e loto ke vevehe. He taha magaaho, he haia he tua fale haana ne kitia e ia e hoana he taha tagata ne koukou. He mogo tonu ia, kua fakamau katoatoa po ke vevehe kia e loto ha Tavita? Iloa e ia e tuaga ha Iehova: “Aua neke manako a koe ke he hoana he taha tagata.” (Esoto 20:17) Ka e maaliali ai ne fakatumau a ia ke onoono. Ne vevehe e loto haana he manako ke he fifine ko Patesepa mo e manako ke fakafiafia a Iehova. Pete kua leva e fakaalofa mo e matakutaku a Tavita ki a Iehova, ne mahala a ia ke he manako lotokai haana. He magaaho ia, ne kelea lahi e mena ne taute e Tavita. Fakakelea he mena nei e higoa ha Iehova. Ti fakamatematekelea foki e Tavita e tau tagata noa, putoia e magafaoa ni haana.​—2 Samu. 11:1-5, 14-17; 12:7-12.

13. Iloa fēfē e tautolu na liu e loto ha Tavita fakamau katoatoa?

¹³ Ne akonaki e Iehova a Tavita ti liu a ia mitaki e fakafetuiaga mo Iehova. (2 Samu. 12:13; Sala. 51:2-4, 17) Manatu e Tavita e tau lekua mo e mamahi ne fua mai he fakaatā e ia e loto haana ke vevehe. Ko e tau kupu haana ne fakamau ia Salamo 86:11 kua maeke foki ke talahau: “Foaki mai ki a au e loto katoatoa.” Lagomatai nakai e Iehova a Tavita ke moua e loto katoatoa? Ē, ne hagaao e Kupu ha Iehova he mogo fakamui ki a Tavita ko e tagata kua “katoatoa ai hana loto kia Iehova hana Atua.”​—1 Patu. 11:4; 15:3.

14. Ko e heigoa ha tautolu kua lata ke hūhū hifo, ti ko e ha?

¹⁴ Ko e fakafifitakiaga ha Tavita kua fakamalolō mo e hataki ki a tautolu. Ko e kaumahala haana ke he agahala kelea lahi kua eke mo hatakiaga ke he tau fekafekau he Atua mogonei. He kamata laia po kua leva lahi e fekafekau ha tautolu ki a Iehova, lata ke hūhū hifo, ‘Totoko nakai e au e tau laliaga ha Satani ke vevehe e loto haaku?’

15. Maeke fēfē e matakutaku ke he Atua ke puipui a tautolu ka kitia e tautolu e tau fakatino feuaki?

¹⁵ Ke fakatai, ka kitia e koe e fakatino he TV po ke Initanete ka fakalagalaga e tau manako feuaki, tali atu fēfē a koe? Liga mukamuka ke manatu ko e fakatino po ke kifaga kua nakai fakakite e tau mena telefua. Ka e liga kia ko e taha mena a ia ne fakaaoga e Satani ke vevehe e loto haau? (2 Kori. 2:11) Ko e fakatino ia kua tuga e toki ne fakaaoga he tagata ke tipi aki e patu akau lahi. Ne lau mua e patu akau he matapotu tote he toki ne matila. He hū hifo fakahaga e toki, ne maihi e patu akau. Maeke nakai e tau fakatino feuaki he TV po ke Initanete ke tuga e vala matila he toki? Liga kamata he mena tote mo e nakai hagahaga kelea lahi ka e mafiti ke takitaki atu e tagata ke agahala ti vevehe e loto haana mo e moumou e mahani fakamooli haana. Ti ua fakaatā ha mena kelea ke he loto haau! Kia fakamau e loto ke matakutaku ke he higoa ha Iehova!

16. Ka fehagai mo e kamatamata, ko e heigoa e tau hūhū kua lata a tautolu ke hūhū hifo?

¹⁶ Lafi ke he tau fakatino feuaki, loga foki e mena ne fakaaoga e Satani ke kamatamata a tautolu ke taute e mena hepe. Tali atu fēfē a tautolu? Mukamuka ke manatu kua nakai kelea lahi ai. Ma e fakatai, liga manatu a tautolu: ‘To nakai tuku au ki tua he taute e mena nei, ti liga nakai kelea lahi.’ Ko e manatu pihia kua hepe lahi. Lata a tautolu ke hūhū hifo e tau hūhū tuga anei: ‘Lali kia a Satani ke fakaaoga e kamatamata nei ke vevehe e loto haaku? Ka kaumahala au ke he tau manako hepe, to fakakelea kia e au e higoa ha Iehova? To fakatata lahi nakai he mena nei au ke he Atua haaku, po ke fakamamao au mai ia ia?’ Manamanatu fakahokulo ke he tau hūhū pihia. Liogi ma e iloilo ke tali fakamooli ai. (Iako. 1:5) He taute pihia ko e puipuiaga mooli. Maeke ke lagomatai a koe ke fakaheu fakamalolō e kamatamata, tuga ne taute e Iesu he pehē a ia: “Ati fano kehe a a koe ma Satani.”​—Mata. 4:10.

17. Ko e ha kua nakai mitaki ka vevehe e tau loto ha tautolu? Fakatai.

¹⁷ Nakai mitaki ka vevehe e tau loto ha tautolu. Manamanatu ke he matakau sipote ne nakai kauauloa. Falu ne manako ke talahaua ni a lautolu, falu ne nakai manako ke omaoma ke he tau puhala pelē, mo e falu ne nakai fakalilifu ke he tagata ne fakaako e kau. Ko e matakau pihia to nakai mua he pelē. Kehe ai, ko e matakau ne kauauloa to mua. Maeke e loto haau ke tuga e matakau ia ne mua ka gahua auloa e tau manatu, tau manako, mo e tau logonaaga haau ke fekafekau ki a Iehova. Manatu, manako lahi a Satani ke vevehe e loto haau. Manako a ia ke totoko he tau manatu, tau fatuakiloto, mo e tau logonaaga haau e tau tuaga ha Iehova. Ka kua lata a koe ke katoatoa e loto ke maeke ke fekafekau ki a Iehova. (Mata. 22:36-38) Ua fakaatā a Satani ke vevehe e loto haau!

18. Fakatatau ke he tau kupu ia Mika 4:5, ko e heigoa haau kua eketaha ke taute?

¹⁸ Liogi ki a Iehova ke tuga a Tavita: “Kia fakamau e koe hoku loto ke matakutaku ke he hāu a higoa.” Eke mo foliaga haau ke fakagahua e liogi ia. He tau aho takitaha, eketaha ke fakakite he tau fifiliaga oti haau kua hokulo e fakalilifu ke he higoa tapu ha Iehova. He taute pihia, to fakaata mitaki e koe e higoa ia ko e taha he Tau Fakamoli a Iehova. (Fakatai 27:11) Ti maeke a tautolu oti ke talahau fakalataha mo e perofeta ko Mika: “To o a tautolu ke he higoa a Iehova ha tautolu a Atua tukulagi tukumuitea.”​—Mika 4:5.