Nakai Vihiatia e Iehova e Loto Malipilipi

“Ko e tau poa ke he Atua ko e loto malipilipi ia; ko e Atua na e, nakai vihiatia e koe e loto malipilipi mo e pehia.”​—SALAMO 51:17.

1. Fefe e onoonoaga a Iehova ke he hana a tau tagata tapuaki ne lahi e tau hala ka e tokihala?

MAEKE ia Iehova ke ‘ufiufi a ia ke he aolagi ke nakai hoko ha liogi kia ia.’ (Ko e Tagi Aue 3:44) Ka e manako a ia ke o atu hana a tau tagata ki a ia. Pete ni kua kelea lahi e hala he taha he hana a tau tagata tapuaki ki a ia ka e tokihala, manatu he Matua ha tautolu he lagi e tau mitaki ne taute he tagata ia. Ko e mena ia, ne maeke he aposetolo ko Paulo ke tala age ke he tau matakainaga Kerisiano: “Ha ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.”​—Heperu 6:10.

2, 3. Ko e heigoa he tau matakainaga momotua ka manatu ke he tauteaga ke he tau tagata he tua ne kua mahani hepe?

² Kua lata ke manatu foki he tau matakainaga Kerisiano momotua e tau tau ne fekafekau fakamoli ke he Atua e tau matakainaga he tua. Putoia ke he mena nei e fekafekauaga tapu ha lautolu ne tokihala ka e fai lakaaga hehe po ke kua lahi e hala. Ko e tau leveki mamoe Kerisiano ka kumi e malolo fakaagaga ha lautolu oti i loto he fuifui he Atua.​—Kalatia 6:1, 2.

³ Kua lata ke moua he tagata taute mena hepehepe kua tokihala e fakaalofa hofihofi a Iehova. Ka e taha e mena, loga agaia e tau mena ke taute. Ne fakamaama fakamitaki e mena nei ke he tau kupu a Tavita he Salamo 51:10-19.

Kua Lata ke Loto Mea

4. Ko e ha ne liogi a Tavita ke loto mea mo e agaga fou?

⁴ Kaeke ke kelea e tuaga fakaagaga he Kerisiano kua tukulele ha ko e hala, ko e heigoa kua lata ke moua ke lafi atu ke he fakaalofa hofihofi mo e fakamagaloaga ha Iehova? Ne ole a Tavita: “Ko e Atua na e, kia eke e koe e loto meā maku; mo e fakafou e loto mau ki loto ia au.” (Salamo 51:10) Ne maama lahi, ne taute e Tavita e ole nai kakano he iloa e ia ko e agaga ke taute e hala lahi kua nofo agaia ni he loto hana. To liga nakai putoia a tautolu ke he tau vahega hala ne lauia ai a Tavita ne fakalataha mo Patesepa mo Uria, ka e lata ia tautolu ke moua e lagomatai mai ia Iehova ke kalo kehe mo e tau kamatamata ke taute e ha mahani kua kelea lahi e hala. Ko e taha mena foki, to liga manako a tautolu takitokotaha ke he lagomatai fakaatua ke uta kehe mai he ha tautolu a tau loto e tau agahala pihia tuga e manako lahi mo e vihiatia​—tau matahavala tuga e kaiha mo e kelipopo tagata.​—Kolose 3:5, 6; 1 Ioane 3:15.

5. (a) Ko e heigoa e kakano ke loto mea? (e) Ko e heigoa e manako ha Tavita ke he hana a ole ke moua e agaga fou?

⁵ Manako a Iehova ke he hana a tau fekafekau ke “loto meā,” ko e pehe a ia, ko e mea he tau fakaohoohoaga po ke amaamanakiaga. Ne mailoga ko e nakai fakakite e ia e mea pihia, ne liogi a Tavita ke fakamea he Atua hana loto mo e tamai ia ke felauaki mo e tau tutuaga fakaatua. Ne manako foki e salamo ke he agaga fou mo e hako, po ke hagaaoaga he tau manamanatuaga. Ne manako a ia ke he agaga ke lagomatai a ia ke totoko e tau kamatamata ka e tapiki mau ke he tau fakatufono a Iehova.

Aoga Lahi e Agaga Tapu

6. Ko e ha ne ole a Tavita ki a Iehova ke nakai uta kehe e agaga tapu mai ia ia?

⁶ Ke he tau magaaho fakaatukehe ha ko e ha tautolu a tau hepe po ke taute mena hepehepe, to logona hifo e tautolu e hagaaoaga he Atua ke tiaki a tautolu mo e liuaki kehe ia tautolu hana a agaga tapu, po ke gahuahua malolo. Ne pihia e logonaaga ha Tavita, ha ko e mena ole a ia ki a Iehova: “Aua neke tiaki e koe au i mua hāu; aua foki neke uta kehe hāu a Agaga Tapu ia au.” (Salamo 51:11) Tokihala mo e fakatokolalo e logonaaga ha Tavita ke he hana a tau hala ti taute a ia ke nakai aoga e fekafekauaga ki a Iehova. Ke uta kehe mai mua he Atua, ko e kakano kua galo hana a fiafia pauaki, hagahaga mitaki, mo e fakamonuinaaga. Ke liuaki mai a Tavita fakaagaga, kua lata ke ha ha ia ia e agaga tapu ha Iehova. Ha kua ha ha i luga ia ia e agaga tapu, ne maeke he patuiki ke kumi ke he tau liogi e takitakiaga fakaatua, ke fakafiafia aki a Iehova, kalo ke he mo e hala, mo e maeke ke pule mo e pulotu. Ha kua mailoga e ia hana a tau hala ki a ia ko e Foaki he agaga tapu, ne tonu e olelalo ha Tavita ki a Iehova ke nakai uta kehe e mena ia mai ia ia.

7. Ko e ha ne lata ia tautolu ke liogi ke moua e agaga tapu mo e puipui ke nakai fakamomoko a ia?

⁷ Ka e kua a tautolu? Kua lata foki a tautolu ke liogi ke he agaga tapu mo e lata lahi ke leveki neke fakamomoko a ia ha ko e kaumahala ke mumuitua ke he tau takitakiaga. (Luka 11:13; Efeso 4:30) Ha ko e mena to galo ia tautolu e agaga ti nakai maeke ke fakakite e tautolu e tau fua he agaga he foaki he Atua ko e fakaalofa, olioli, mafola, fakamanavalahi, mahani totonu, mahani mitaki, tua, mahani molu, manako fakalatalata. To maeke he Atua ke uta hana a agaga tapu mai ia tautolu kaeke ke hala tumau a tautolu ki a ia, mo e nakai tokihala.

Fiafia Ha ko e Fakamouiaga

8. Kaeke ke hala a tautolu ka e manako ke moua e fiafia he fakamouiaga, ko e heigoa ha tautolu kua lata ke taute?

⁸ Ko e tagata hala ne tokihala ti liuaki fakaagaga kua maeke ke loto olioli ke he fakamouiaga ne foaki mai e Iehova. Ko e manako lahi ke he mena nei, ati olelalo a Tavita ke he Atua: “Kia liuaki mai e koe kia au e fiafia ha he fakamouiaga mai ia koe; kia toto mau e koe au mo e loto fiafia.” (Salamo 51:12) To lahi e fulufuluola ke fiafia ke he amaamanakiaga moli he fakamouiaga he Atua ko Iehova! (Salamo 3:8) Mole atu e hala ke he Atua, ne kumi e Tavita ke liuaki mai e olioli he fakamouiaga mai ia Ia. Ke he magaaho fakamui, ne foaki mai e Iehova e fakamouiaga ha ko e poa lukutoto he hana a Tama, ko Iesu Keriso. Kaeke ke lahi e hala ha tautolu ko e tau fekafekau kua tukulele fakatapu he Atua ka e manako ke he olioli he fakamouiaga ke liuaki mai ki a tautolu, kua lata ia tautolu ke ha ha i ai e agaga tokihala mo e nakai lata ke matutaki ha tautolu a hala ke hokotia ke hala ke he agaga tapu.​—Mataio 12:31, 32; Heperu 6:4-6.

9. Ko e heigoa e manako ha Tavita ke he magaaho ne ole a ia ke he Atua ke lagomatai a ia “mo e loto fiafia”?

⁹ Ne ole e Tavita ki a Iehova ke lagomatai a ia “mo e loto fiafia.” Ko e maamaaga he mena nei, nakai ko e hagaao ke he fiafia he Atua ke lagomatai po ke hagaao ke he agaga tapu, ka ko e hagaao ni ke he manamanatuaga ha Tavita. Ne manako a Tavita ke lagomatai he Atua a ia ke foaki ki a ia e agaga fiafia ke taute e mena kua tonu ka e nakai liu foki ke he hala. Ne matutaki tumau e tau lagomatai he Atua ko Iehova ke he hana a tau fekafekau mo e lagaki hake a lautolu ne tukutuku hifo ha ko e tau kamatamata. (Salamo 145:14) Mafanatia he iloa e mena nei, mua atu ni ka pehe kua hala a tautolu ti tokihala mo e manako ke liu ke fekafekau fakamoli ki a Iehova!

Ko e Heigoa ke Fakaako ke he Tau Tagata Hala?

10, 11. (a) Ko e heigoa ha Tavita ne maeke ke fakaako ke he tau taga hala Isaraela? (e) Ne maeke ni a Tavita ke fakaako e tau tagata hala kaeke ke taute e ia e heigoa?

¹⁰ Kaeke ke fakaata he Atua, ne manako a Tavita mo e nakai fai lotokai ke taute taha mena ke fakakite aki hana a fakaaue ke he fakaalofa hofihofi a Iehova mo e maeke ke lagomatai foki falu. Ko e tau manamanatuaga hokulo ke he liogi ke he Atua, ne fakailoa he patuiki kua tokihala: “To fakaako e au e tau holifono ke he hāu a tau puhala; ti liliu atu ni kia koe e tau tagata hala.” (Salamo 51:13) Maeke fefe he tagata hala ko Tavita ke fakaako e Matafakatufono he Atua ke he tau tagata hala? Ko e heigoa la hana ka talahau ki a lautolu? Ko e heigoa e mitaki ka moua he mena nei?

¹¹ Ke he magaaho ne fakakite age ke he tau tagata hala Isaraela e tau puhala a Iehova mo e amaamanakiaga ke liuaki mai a lautolu mai he puhala kelea, maeke ia Tavita ke fakakite e kelea he hala, ko e kakano he tokihala, mo e puhala ke moua aki e fakaalofa hofihofi he Atua. Ha kua logona e mamahi he nakai fiafia pauaki a Iehova mo e manamanatuaga holifono, to nakai fakauaua a Tavita ko e faiaoga he fakaalofa hohofi ke he tau tagata hala kua tokihala mo e loto malipilipi. Ko e moli, to maeke ia ia ke fakaaoga hana a fakafifitakiaga ke fakaako aki e falu ke he magaaho fakamui ne talia e ia e tau tutuaga a Iehova mo e moua Hana a fakamagaloaga, ha ko lautolu ne nakai talia e tau mena kua lata mai fakaatua ne nakai ha ha i ai ha tonuhia ke ‘talahau mo e tokutoku e tau maveheaga he Atua.’​—Salamo 50:16, 17.

12. Aoga fefe ki a Tavita e lotomatala kua fakahao mai he Atua a ia he hala mai he limatoto?

¹² Ne liu a ia futiaki hana a tau manatu ke he taha puhala, ti pehe a Tavita: “Ko e Atua na e, ko e Atua he haku a fakamouiaga, kia laveaki e koe au mai he hala he toto; ti lologo fiafia ai haku alelo ha ko e tututonu mai ia koe.” (Salamo 51:14) Ko e hala he limatoto ke moua e fakahala he mate. (Kenese 9:5, 6) Ko e iloaaga ko e Atua he hana a fakamouiaga kua fakahao mai a ia he hala he limatoto ha ko Uria, ke maeke ia Tavita ke mafola hana a loto mo e loto manamanatu. Ti maeke he alelo hana ke lologo mo e fiafia ke he tututonu he Atua, ka e nakai ko e hana. (Fakamatalaaga 7:20; Roma 3:10) Ne nakai maeke ia Tavita ke tamate hana a mahani feuaki po ke liuaki mai a Uria he tukuaga, tuga ne tau tagata he vaha nei ne nakai maeke e mitaki he tagata ne fakahehe e ia ke liuaki mai po ke fakaliu tu mai e tagata ne kelipopo e ia. Kua lata nakai ke manamanatu a tautolu ke he mena ka kamatamata a tautolu? Ti kua lata ke fakaaue a tautolu ke he fakaalofa hofihofi a Iehova ne fakakite mai ki a tautolu mo e tututonu! Ko e moli, ko e fakaaue ke omoi aki a tautolu ke fakahagaao atu e falu ke he vaipuna he tututonu mo e fakamagaloaga.

13. Ko e heigoa ni ne maeke he tagata hala ke hafagi fakamitaki hana a tau laugutu ke fakaheke ki a Iehova?

¹³ Ne nakai fai tagata agahala ke tonu e hafagiaga he hana a tau laugutu ke fakaheke ki a Iehova, kaeke ke nakai hafagi he Atua a lautolu mo e fakaalofa hofihofi noa, ke maeke ke vagahau Hana kupu moli. Ko e mena haia ne lologo ai a Tavita: “Ko e Iki na e, kia vevete mai e koe haku a tau laugutu; ti tokutoku atu haku gutu hāu a fakahekeaga.” (Salamo 51:15) Ha kua mafola hana manamanatuaga mai he fakamagaloaga he Atua, ti omoi aki a Tavita ke fakaako e tau tagata hala ke he tau puhala a Iehova, ti ataina a ia ke fakaheke ki a Ia. Ko lautolu oti ne kua fakamagalo mai he tau hala ha lautolu ke tuga a Tavita, kua lata ke fakaaue ke he fakaalofa totonu a Iehova ki a lautolu, ti kua lata ia lautolu ke fakaaoga e tau magaaho oti ke fakapuloa e kupu moli he Atua mo e ‘fakapuloa atu hana a fakahekeaga.’​—Salamo 43:3.

Tau Poa Talia ke he Atua

14. (a) Ko e heigoa e tau poa kua lata hagaao ke he maveheaga he Matafakatufono? (e) Ko e ha ne hepe ai ke manatu to totogi he gahua ke he falu a mena mitaki ka taute mau e tau mahani hepehepe?

¹⁴ Ne moua e Tavita e lotomatala hokulo ati maeke ia ia ke vagahau: “Ha kua nakai finagalo a koe [Iehova] ke he poa; ane pihia po kua ta atu ni e au; kua nakai fiafia a koe ke he poa hu­hunu.” (Salamo 51:16) Ko e maveheaga he Matafakatufono kua lata ke poa e tau manu ke he Atua. Ka ko e tau hala ha Tavita he feuaki mo e kelipopo tagata, fakahala ke he mate, ne nakai maeke ke fakamagalo he tau poa. Ane mai ke pihia, a ko e nakai toka ha tupe ke foaki aki e tau poa manu ki a Iehova. Ka nakai tokihala mai he loto, nakai fai aoga e tau poa. Ti hepe lahi e manatu ke totogi he taute e tau mena mitaki ka matutaki e taute mena hepehepe ha tautolu.

15. Ko e heigoa e agaga he tagata tukulele kua malipilipi e loto?

¹⁵ Ne lafi mai e Tavita: “Ko e tau poa ke he Atua ko e loto malipilipi ia; ko e Atua na e, nakai vihiatia e koe e loto malipilipi mo e ­pehia.” (Salamo 51:17) Ko e tau vahega mena tuga e tagata hala ne tokihala, ko e talia he “tau poa ke he Atua ko e loto malipilipi ia.” Ko e vahega tagata pihia ne nakai ha ha i ai e agaga totoko. Ko e loto he tagata fakatapu malipilipi ne fakaatukehe lahi ke he hana a hala, ti fakatokolalo ha kua mailoga e nakai talia he Atua, mo e fiafia ke taute e ha mena he tau mena ke moua aki e fiafia fakaatua. Ne nakai maeke ia tautolu ke foaki ha mena uho ma e Atua ato tokihala a tautolu he tau hala mo e tuku age ha tautolu a tau loto ke he tapuakiaga katoatoa.​—Nahuma 1:2.

16. Fefe e onoonoaga he Atua ke he tagata ne malipilipi e loto ke he hana a tau hala?

¹⁶ Ne nakai tiaki he Atua e poa tuga e loto malipilipi mo e pehia. Ke he tau mena vihi ka feleveia mo tautolu ko e hana a tau tagata, kua lata ni ke nakai fakaatukehe. Kaeke ke tupetupe a tautolu ke he puhala he moui ke he tau vahega mena ke tagi e tau loto ha tautolu ke he fakaalofa hofihofi mai fakaatua, ti nakai pehe ko e ai fai amaamanakiaga. Pete ni he lahi e hala ha tautolu ka kua tokihala, to nakai vihiatia e Iehova e tau loto malipilipi ha tautolu. To fakamagalo e ia a tautolu ha ko e poa lukutoto ha Keriso mo e liuaki mai a tautolu ke he Hana a fiafia pauaki. (Isaia 57:15; Heperu 4:16, 1 Ioane 2:1) Ke tuga a Tavita, ka e taha e mena, ko e ha tautolu a tau liogi kua lata ke liuaki mai e fiafia pauaki fakaatua ka e nakai ke hola kehe mai he tau akonakiaga mo e fakatonuaga. Ne fakamagalo he Atua a Tavita, ka e akonaki foki e ia a ia.​—2 Samuela 12:11-14.

Manamanatu ke he Tapuakiaga Mea

17. Ke lafi atu ke he ole ke fakamagalo he Atua e tau hala, ko e heigoa kua lata he tau tagata hala ke taute?

¹⁷ Kaeke kua taute e tautolu e falu hala lalahi, to fakapehia he mena nei ha tautolu a tau loto manamanatu, mo e ko e loto fakatokolalo ke omoi aki a tautolu ke ole ke he fakamagaloaga he Atua. Ka e pete ni ia, o mai a tautolu ke liogi ma e falu. Pete ne amaamanaki lahi a Tavita ke liu foki taute e tapuakiaga ne talia he Atua, ne nakai lamakai he salamo hana ke tiaki e falu mai he tala. Ne fakalataha e ole nei ki a Iehova: “Kia fakamonuina e koe a Siona ke he hāu a finagalo fakaalofa; kia ati hake e koe e tau pa a Ierusalema.”​—Salamo 51:18.

18. Ko e ha ne liogi ai a Tavita ke he magaaho ne tokihala ai a ia ma Siona?

¹⁸ E, ne amaamanaki lahi a Tavita ke he hana liuaki mai ke he fiafia pauaki fakaatua. Ka e taha e mena, ko e liogi foki ha Tavita ne kua fakatokolalo ke he ‘finagalo fakaalofa he Atua ke fakamonuina a Siona,’ ko e maaga lahi ha Isaraela, ko Ierusalema, ko e matakavi ne amaamanaki a Tavita ke talaga e faituga he Atua. Ko e tau hala kelea lalahi ha Tavita ne fakahagahaga kelea ai e motu katoa, ha ko e to matematekelea oti e tau tagata ha ko e taute mena hepehepe he patuiki. (Fakatatai mo e 2 Samuela, veveheaga 24.) Ko e lauiaaga, ko e hana a tau hala ke fakalolelole aki e “tau pa a Ierusalema,” ti kua lata ia lautolu ke liu ati hake.

19. Kaeke kua hala a tautolu ka kua tokihala, ko e heigoa kua lata tonu ke liogi ki ai?

¹⁹ Kaeke kua lalahi e tau hala ha tautolu, ka kua moua e fakamagaloaga he Atua, kua lata tonu ni ke liogi ke ati hake e ha mena kua ma­lona he ha tautolu a tau mahani. Liga ne fakakelea e tautolu hana a higoa tapu, liga fakalolelole e fakapotopotoaga, mo e tamai foki e fakaatukehe ke he ha tautolu a tau magafaoa. Maeke he ha tautolu a Matua he lagi ke uta kehe ha tau kelea oti ne fakatakiva aki hana a higoa, maeke ke ati hake e fakapotopotoaga ha ko e hana a agaga tapu, mo e fakamafanatia e tau loto he ha tautolu a tau fakahelehele ne fakaalofa mo e fekafekau ki a ia. Ko e hala po ke nakai, ko e moli, ko e fakatapuaga he higoa a Iehova mo e malolo he hana tau tagata kua lata ni ke manamanatu tumau e tautolu.​—Mataio 6:9.

20. Ki lalo hifo he tau vahega mena fefe ka fiafia ai a Iehova ke he tau poa mo e tau poa foaki ha Isaraela?

²⁰ Kaeke ke liu ati hake e Iehova e pa i Siona, ko e heigoa foki e mena ke tupu? Ne lologo a Tavita: “Ti finagalo ai e koe [Iehova] ke he tau poa tonu, ko e poa huhunu, mo e poa huhunu oti; ti ta hake ai e lautolu e tau povi tane ke he hāu a fatapoa.” (Salamo 51:19) Ne manako lahi a Tavita ke loto olioli a ia mo e motu katoa ke he fiafia pauaki a Iehova ke maeke ke tapuaki ki a Ia mo e talia. Ti maeke ke fiafia e Atua mo e ha lautolu a tau poa huhunu mo e tau poa foaki. Maeke e mena nei ha ko e tau poa tututonu a nei ne foaki he tau tagata fakatapu, fakamoli, mo e tokihala ne loto olioli ke he fiafia pauaki he Atua. Ha ko e fakaaue ke he fakaalofa hofihofi he Atua, ke he hana a fatapoa to foaki e lautolu e tau povi tane​—ko e tau poa mitaki ue atu mo e tau uka. Ko e vaha nei, ne fakalilifu e tautolu a Iehova ke foaki ki a ia e tau mena mitaki ue atu ha tautolu. Putoia ke he tau poa ha tautolu e “tau poa he tau laugutu ha mautolu,” ko e tau poa fakaheke ke he ha tautolu a Atua fakaalofa hofihofi noa, ko Iehova.​—Hosea 14:2; Heperu 13:15.

Logona e Iehova ha Tautolu a Tau Tagi

21, 22. Ko e heigoa e tau fakaakoaga he Salamo 51 ma tautolu?

²¹ Ko e liogi ha Tavita mai he loto ne fakamau he Salamo 51 ne fakakite kua lata ia tautolu ke gahua ke he ha tautolu a hala mo e agaga tokihala fakamoli. Ha ha foki ke he Salamo nei e tau fakaakoaga ke aoga ia ma tautolu. Tuga a nei, kaeke ke hala a tautolu ka kua tokihala, to maeke a tautolu ke falanaki ke he fakaalofa hofihofi he Atua. Ka e taha e mena, o mai a tautolu ke manamanatu fakamua ke he tau kelea oti ka liga fakakelea aki e tautolu e higoa a Iehova. (Tau kupu 1-4) Ke tuga a Tavita, maeke ia tautolu ke ole ke he ha tautolu a Matua he lagi ke he fakaalofa hofihofi ke lata mo e ha tautolu a tau hala ne moua mai he tau matua. (Kupu 5) Kua lata ia tautolu ke fakamoli, mo e lata foki ke kumi ke he pulotu mai he Atua. (Kupu 6) Kaeke ke hala a tautolu, ti kua lata ia tautolu ke ole ki a Iehova ke fakamea, loto mea, mo e agaga fakamoli tumau.​—Tau kupu 7-10.

²² Mai he Salamo 51 maeke foki ia tautolu ke kitia e nakai lata ia tautolu ke fakaata a tautolu ke mao ke he hala. Kaeke kua pihia a tautolu, to uta kehe e Iehova mai ia tautolu e hana a agaga tapu, po ke gahuahua malolo. Ka ha ha ia tautolu e agaga he Atua, ti maeke ia tautolu ke kautu e tau fakaakoaga he hana a tau puhala ke he falu. (Tau kupu 11-13) Kaeke ke hepe a tautolu ka e tokihala, to fakaata e Iehova a tautolu ke matutaki e fakaheke ki a ia ha ko e mena nakai vihiatia e ia e loto malipilipi mo e pehia. (Tau kupu 14-17) Ne fakakite foki he salamo nei ko e tau liogi ha tautolu kua nakai lata ke hagaao ni ki a tautolu hokoia. Ka kua lata ia tautolu ke liogi ke he fakamonuinaaga mo e malolo fakaagaga ha lautolu oti ne gahua ke he tapuakiaga mea ha Iehova.​—Tau kupu 18, 19.

23. Ko e ha ne omoi he Salamo 51 a tautolu ke fakamalolo mo e mitaki e tau onoonoaga?

²³ Ko e Salamo hokulo nei ha Tavita ke omoi aki a tautolu ke fakamalolo mo e mitaki e tau onoonoaga. Fai lagomatai a tautolu he iloa ke nakai manatu a tautolu kua galo oti e tau mena oti kaeke ke hokotia a tautolu ke he hala. Ko e ha? Kakano, kaeke ke tokihala a tautolu, maeke he fakaalofa hofihofi a Iehova ke fakahao mai a tautolu he fakaatukehe. Kaeke ke fakatokolalo a tautolu mo e fakatapu katoatoa ke he ha tautolu a Matua fakaalofa ha ha he lagi, to logona e ia e tau tagi ha tautolu ke he fakaalofa hofihofi. Mo e mafanatia e loto he iloa ko e mena nakai vihiatia e Iehova e loto malipilipi!

To Tali Fefe e Koe?

◻ Ko e ha ne lata e tau Kerisiano ke loto mea mo e ha ha i ai e agaga tapu?

◻ Ko e heigoa he tagata tokihala ke maeke ke fakaako ke he tau tagata hala he matafakatufono a Iehova?

◻ Fefe e onoonoaga a Iehova ke he loto malipilipi mo e pehia?

◻ Ko e heigoa e tau fakaakoaga mafanatia ne moua he Salamo 51?

[Fakatino he lau 15]

Liogi nakai a koe ke he agaga tapu mo e puipui neke fakamomoko a ia?

[Fakatino he lau 17]

Fakakite e fakaaue ke he fakaalofa totonu ha Iehova ke fakapuloa hana a kupu moli