Fakalaulahi e Tau Gahua he Vaha Ha ha Hinei a Keriso

“Ati tala age ai e Patuiki kia lautolu ha he fahi matau hana, O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.”​—MATAIO 25:34.

1. Ko e heigoa e puhala ne kua eke ai e pa·rou·siʹa a Keriso ke tuga ne “vaha kia Noa”?

KO E ha ha hinei a Keriso​—ko e mena ne kua leva he fakatalitali ki ai! Ko e magaaho, kua eke ke “tuga e vaha kia Noa,” ne talahau e Iesu kua fematutaki atu mo e “fakaotiaga he lalolagi,” ne hoko he tau 1914. (Mataio 24:3, 37) Ka ko e heigoa e kakano he ha ha hinei a Keriso, po ke pa·rou·siʹa, ki a lautolu ne fakauku ne toe agaia he “tupa fakamoli mo e lotomatala”? (Mataio 24:45, NW) Hanai, kua lata na lautolu ke fakatupu lahi mahaki e fakagahuahuaaga he tau tagata ne fua e maama! Ha kua teitei tuai e tau mena homo ue atu ke tutupu! Ati kua teitei kamata hane fai e gahua fakapotopoto ne nakai fai tataiaga.

2. Ko e heigoa e fakameaaga ne kua hoko ti kua fakamoli ai a Malaki 3:1-5?

² Ka ke fakamua aki mogoia, kua lata e tau Kerisiano fakauku nei ke fakamea. Ke tuga ne talahau tuai mai ia Malaki 3:1-5, kua o mai e Atua ko Iehova mo e hana “Agelu he maveheaga,” ko Iesu Keriso, ke tivi e faituga fakaagaga he vaha tuputupu he tau 1918. Ti kua lata ni e fakafiliaga ke kamata mai he “fale he Atua.” (1 Peteru 4:17) Ne talahau tuai mai ia Malaki 3:3: “Kua nofo a ia [Iehova] po ke tagata kua tunu mo e fakamea e ario; to fakamea ai e ia e fanau a Levi, to vevehe kehe foki e ia e kelekele ia lautolu tuga he eke ke he auro mo e ario.” Ko e vaha hakahaka mo e fakameaaga.

3. Ko e ha kua aoga lahi ke hoko e fakameaaga fakaagaga?

³ Ha kua mole mai he fakafiliaga nei, ne kua hoko ke he tapunuaga he tau 1918, ne fakamea ai a lautolu ne toe agaia he vahega tupa mai he tau mena kiva fakalalolagi mo e tau lotu. Ka ko e ha ne fakamea ai e Iehova a lautolu? Kakano ha kua putoia ai hana faituga fakaagaga. Ko e fakatokatokaaga a nei ne tuga e faituga ke tapuaki ki a Iehova ne kua fakave ke he poa fakamafola ufiufi a Iesu Keriso. Ne manako a Iehova ke mea e tuaga he faituga hana, ke maeke ai he magaaho ka tamai e tau tagata tapuaki tokologa ne ha ha i ai e amaamanakiaga ke he lalolagi, ke kitia e lautolu e nofoaga kua fakalilifu ke he hana pule okooko ke he lagi mo e lalolagi katoatoa, kua fakatapu e higoa mai i luga he lagi hana, mo e omaoma ke he hana tau matafakatufono tututonu. Ti kua maeke ai tuai a lautolu ke loto fakaaue ki a Iehova mo e matutaki atu ke fakailoa hana finagalo homo ue atu.

Tau Monuina Lafi ki Luga

4, 5. (a) Ne paleko atu fefe e huhu a Iesu Keriso ki a lautolu takitokotaha he vahega tupa he vaha nei? (e) Ke he tau puhala fe kua lata ai ke maama e tau fakailoaaga ko e “tupa fakamoli mo e lotomatala” mo e “hana tau fekafekau he loto kaina”? (i) Ko e heigoa e poakiaga pauaki ne age e Iesu ke he tupa?

⁴ He tau 1919 kua maeke e vahega tupa ne fakamea ke amaamanaki ke fakalaulahi atu e tau gahua. Mai i tuai he tau 1914, ne moua e Iesu Keriso, ko e ha lautolu a Iki, e Kautu he lagi. He magaaho ne liu a ia ke he hana a tau tagata gahua he loto kaina ke tivi oti kana hana “tau fekafekau he loto kaina,” kua tapulu e ia e lilifu lahi he magafaoa he patuiki, ko e mena ne nakai ha ha ia ia he magaaho ne nofo a ia he lalolagi nei. Ti ko e heigoa e mena ne moua e ia? Kua lavelave kia e vahega tupa he leveki e tau mena he Iki? Tuga he fakamau ia Mataio 24:45-47 (NW), ne talahau e Iesu e huhu kua paleko atu ke lata e tau tutaki fakauku takitokotaha ke kumikumi hifo a ia ki a ia, ko e fefe hana mahani fakamoli ke he Mesia a Iehova: “Ko hai moli kia e tupa fakamoli mo e lotomatala kua kotofa he hana iki ke pule ke he hana tau fekafekau he loto kaina, ke age ki a lautolu ha lautolu a tau mena kai he tau magaaho tonu? Fiafia e tupa ia, kaeke kua hoko mai hana iki mo e moua a ia hane taute pihia. Ko e moli ke tala atu e au ki a mutolu, to kotofa e Ia a ia ke pule ke he hana tau koloa oti kana.”

⁵ Kua kitia maaliali, ko e fakamaamaaga a Iesu ke he tupa fakamoli nei ko e mena nakai hao tonu ke he taha tagata. Nakai, ka ko e fakamaama mai hagaao ke he fakapotopotoaga fakauku katoa kua mahani fakamoli ha Keriso, ne kua tuga e matakau. Ka kua hagaao e tau fekafekau he loto kaina, ke he tau tutaki fakauku takitokotaha a Keriso. Ne iloa e Iesu ko e toto hana ka fakafua aki e ia a lautolu ne fakauku, ti kua lata lahi hana talahauaga ki a lautolu ne potopoto auloa ko e tupa ni hana. Ne pehe mai ia Korinito fakamua he 1 Korinito 7:23, hagaao ki a lautolu: “Kua fakafua a mutolu [auloa] ke he totogi, aua neke eke a mutolu mo tau tupa ke he tau tagata.” Ne poaki pauaki e Iesu hana vahega tupa ke toka ha lautolu a maama ke kikila atu ke futiaki mai e falu tutaki mo e fagai fakahaga foki hana tau fekafekau he loto kaina he age ki a lautolu e tau mena kai fakaagaga he tau magaaho tonu.

6. Ne moua fefe he tupa e palepale ha ko e fua he tiviaga a Iesu?

⁶ Tali mai he magaaho ne kamata e ha ha hinei a Keriso mo e hoko atu ke he tau 1918, pete ni ai kua nakai talahaua, ne moua ai e favaleaga, ti kua eke foki ke ha ha i ai e falu mena fakaloto goagoa, ka e kumi agaia ni e vahega he tupa ke age e tau mena kai he magaaho tonu ke he tau fekafekau he loto kaina. Ti ko e mena na nei ne moua he Iki he magaaho ne kamata hana a tiviaga. Ne fiafia e Iki ko Iesu, mo e he tau 1919 ne fakailoa e ia kua fiafia e vahega tupa fakamoli ia ne kua talia pauaki. Ti ko e heigoa e palepale fulufuluola lahi ne moua he tupa he taute e mena ne kotofa he Iki hana ke taute? Kua holo hake e tuaga! E, kua age ki a ia e tau matagahua lalahi, ke fakatolomaki atu e tau mena he Iki. Ha ko e Patuiki i luga he lagi e Iki he magaaho nei, kua eke tuai mogoia hana tau mena he lalolagi ke mua atu foki e uho.

7, 8. (a) Ti ko e heigoa e ‘tau koloa oti kana’ he Iki? (e) Ko e heigoa kua pehi fakalahi ke moua mai he tupa he taute e tau levekiaga ke he tau koloa nai?

⁷ Ti ko e heigoa mogoia e “hana tau koloa oti kana”? Ko e tau mena fakaagaga oti kana a nai, he lalolagi kua eke tuai mo tau mena he Keriso ne matutaki atu fakalataha ke he hana a pule malolo faka-Patuiki i luga he lagi. Ne fakalataha atu foki e poakiaga pauaki ke taute tutaki ma Keriso, ne ha ha i ai e monuina homo ue atu ke eke mo hukui he Kautu ne fakatu he Atua, ke he tau motu oti kana he lalolagi.

⁸ Ha kua holo hake e gahua levekiaga ke he tau mena oti kana he Iki, ne pehi fakalahi ke he vahega tupa ke tuku fakalahi e tau magaaho mo e onoonoaga fakamitaki ke taute katoatoa e gahua he Kautu, e kua lata ke fakalaulahi atu e tau koloa tohia ma e gahua ia. Ha kua lahi mahaki e fonua kua lata ke gahua ki ai he magaaho nei​—ke he tau motu oti kana ne nonofo ai e tau tagata he lalolagi.

Fakapotopoto e Tau Mamoe

9. Kua fua mai e heigoa he fakalaulahi e tau gahua he tupa?

⁹ Ti omaoma ai mogoia e vahega he tupa fakamoli mo e lotomatala a Keriso ke fakalaulahi hana tau gahua. Ti ko e fua? Kua fakapotopoto mai ki loto a lautolu he matahiku he 144,000 ne fakauku. Ti kua hoko ai e mena he miti a Ioane ne fakamau ia Fakakiteaga 7:9-17, mo mena fakafiafia lahi mo e fakamafanatia lahi moli e loto. Kua mua atu tali mai he tau 1935, he olioli e vahega tupa he kitia e fakamoliaga he miti nei kua mafolafola fakaeneene mai. Kua tolo mai he tau fahi oti he lalolagi he magaaho nei, e tau miliona tagata he “moto tagata tokologa” ke he fahi he faituga fakaagaga a Iehova, ha ko e hana tau tagata tapuaki. Ne tala age he agelu ki a Ioane, kua nakai fai tagata kua maeke ke totou ti fakanumela e moto tagata tokologa nei. Ko e kakano he mena ia, kua nakai fai fakakaupaaga ko e toko fiha e numela he tau tagata ka ta mai he vahega tupa ke he faituga fakaagaga a Iehova. Kaeke kua toka ai e puhala ke mahafagi, to fakatumau ai foki e gahua ke fakapotopoto mai a lautolu.

10. Ko e heigoa e gahua fakaalofa ne kua putoia e tupa ki ai he vaha nei?

¹⁰ Kua fua he vahega tupa fakamoli e matagahua mamafa, ke leveki e tau “mamoe kehe” kua hane fa e tupu tumau e numela, ha kua iloa kua ofania lahi a lautolu nei ne tuga e tau mamoe ne o mai he tau motu oti kana, ke he Iki, ko Iesu. Ko e fuifui moli hana a lautolu. (Ioane 10:16; Gahua 20:28; 1 Peteru 5:2-4) He fakaalofa ke he Iki mo e ke he tau mamoe, kua fiafia lahi e vahega tupa ke leveki e tau mena kua lata fakaagaga mo e moto tagata tokologa.

11-13. Ko e heigoa e tau kupu kua lata tonu ne talahau he pelesiteni he Kaufakalatahaaga he Kolo Toko he magaaho ia kua hagaao ke he tau gahua he tupa?

¹¹ E, kua putoia ai e vala lahi mahaki he poakiaga pauaki ke he tupa ne fua e maama ke fakapotopoto mai a lautolu nei ka nonofo i lalo he Kautu he Atua. He fakatutala ke he tau gahua nei he tupa fakamoli ne fa e tupu lahi, ne pehe a F. W. Franz, ko e pelesiteni he Kaufakalatahaaga he Kolo Toko, he magaaho ato mate a ia ia Tesema he tau 1992:

¹² “Ne fakaaoga e Iesu Keriso e fakatokatokaaga ke he tau puhala kua lahi mo e lahi e ofoofogia he tau magaaho oti, ke he 99 e tau tau ne fa mahani ke iloa ai he moui haku. Nakai ko e tagata muikau ne takitaki e fakatokatokaaga, ka kua lata ai ni ko e Iki ko Iesu Keriso. Ha kua mavete mai ai ke eke mo mena homo ue atu mo e kua ofoofogia lahi mai he tau mena kua manamanatu a tautolu ki ai. Kua fai fakatokatokaaga he vaha ha tautolu kua tolomaki ke he lalolagi katoa. Kua gahua ke he Vikotakai Tokelau mo e ke he Vikotakai Toga, ke he Fahi Uta mo e ke he Fahi Lalo he fua lalolagi. Ti kua taha ni hokoia e tagata kua maeke ke fakalago e matagahua mitaki lahi ue atu nei ki ai​—ko e Tama he Atua, ko ia ni ne takitaki e vahega tupa fakamoli mo e lotomatala. Kua lagotatai a ia ke he hana tau matagahua, ati ko e mena haia ne kua pihia ai e tolomakiaga homo ue atu nei ne kitia moli e tautolu.

¹³ “Kua nakai taute oti he tagata tokotaha e tau mena ia. Kua ha ha ia tautolu e fakatokatokaaga kua pule mai luga ki ai, mo e kua fakagahua ke he puhala he pule ia mai luga, ko e puhala ne takitaki he Atua. Kua nakai fai tagata, ti kua nakai maeke foki e tagata ne fakatu e Kaufakalatahaaga Tohi Tapu mo e Pepa Lotu he Kolo Toko ke pehe a ia po ke tuku atu e nava ki a ia ha ko e matagahua kua fakakatoatoa ke he lalolagi katoa. Ko e mena homo lahi mahaki.” Kua nakai kia talia mai he tau loto fetataiaki katoatoa, a lautolu oti kana he moto tagata tokologa ke he tau kupu taha ia he matakainaga kua mole atu ko Franz? E, kua moli, kua loto fakaaue lahi mahaki a lautolu ke he tau gahua ne fakalaulahi atu he tupa fakamoli.

Tau Tagata i Lalo he Kautu

14, 15. (a) Kua fakatai ke he heigoa e tala fakatai a Iesu ke he tau taleni (Mataio 25:14-30)? (e) Ha kua lata tonu, ko e heigoa ne mui mai i loto he veveheaga 25 a Mataio?

¹⁴ He veveheaga 25 a Mataio, kua fakamaama mai he tala fakatai a Iesu ke he tau mamoe mo e tau koti e gahua fakapotopoto lahi mahaki nei he tau tagata ka nonofo i lalo he Kautu he Atua. I loto he tala fakatai fakamua ke he tau taleni, kua fakatai atu e Iesu ke he tau tutaki fakauku ne amaamanaki ke pule fakalataha mo ia he Kautu hana i luga he lagi, ne kua lata ke gahua ke fakatolomaki atu hana tau mena he lalolagi. Ti hako tonu ai mogoia e tala fakatai ne mui ki ai kua talahau e Iesu e mena kua lata ke taute e lautolu ne manako ke eke mo tau tagata ke nonofo i lalo he Kautu hana mai i luga he lagi.

¹⁵ Kia mailoga la hana tau kupu ia Mataio 25:31-33: “Ka hau e Tama he tagata mo e hana lilifu, ko e tau agelu tapu oti foki fakalataha mo ia, ti nofo ai a ia ke he hana nofoaiki lilifu; To fakapotopoto ki mua hana e tau motu oti kana; ati vevehe kehekehe ai e ia a lautolu, tuga e leveki mamoe kua vevehe e tau mamoe mo e tau koti; To tuku e ia e tau mamoe ke he hana fahi matau, ka ko e tau koti ke he fahi hema.”

16. Ne fakapotopoto mai fefe e tau motu mo e vehevehe ai e tau tagata?

¹⁶ Ne hoko mai a Iesu mo e hana lilifu ue atu he tau 1914. Ati kua kamata tuai a ia, fakalataha mo e tau agelu katoatoa hana, ke felakutaki atu mo e uta kehe e tau temoni ko e tau fi hana mai he lagi. Ti ko e mena ne mui mai i loto he tala fakatai hana ka lagomatai aki a tautolu ke loto fakaaue kua nofo a Iesu he nofoaiki lilifu ue atu ti kua tapulu ai e nofoaga ke taute e fakafiliaga he vaha he hana ha ha hinei. He fakapotopoto mai e tau motu oti kana ki mua hana, kua kakano tuai, ko e gahua a Iesu ke he tau motu tuga ko e fuifui kua amaamanaki a ia ke taute mana, ka vagahau ke he puhala fakatai. Ko e fuifui ne kua tanaki mai he tau mamoe mo e tau koti. Ko e mena kua liga fai vala magaaho he aho ka mole he vehevehe e tau mamoe mai he tau koti he fuifui manu moli, ka ko e veheveheaga ke he lalolagi katoa he tau tagata ne ha ha ia lautolu e ataina ke fifili, to eke ni ko e mena lahi mahaki e tau magaaho ka fakaaoga. Kua pihia e mena nei kakano ha kua fakave e veheveheaga ke he puhala he moui he tau tagata takitokotaha.

17. Ko e ha kua hagahaga kelea e tuaga he tau tagata oti kana he vaha nei?

¹⁷ I loto he tala fakatai, ne tuku he Patuiki Leveki Mamoe a lautolu ne tuga e tau mamoe he hana fahi matau mo lautolu ne tuga e tau koti he hana fahi hema. Ko e hana fahi matau kua kitia ai ko e fakafiliaga ne fakalataha ki ai e fakahikuaga fiafia pauaki​—ko e moui tukulagi. Kua hukui he hana fahi hema e fakafiliaga kua nakai moua e fiafia pauaki​—ko e fakaotiaga tukulagi. To fakahoko mai ai he fifiliaga he Patuiki e mena hagahaga kelea moli.

18. Ha kua nakai kitia mata moli e Patuiki, ko e ha kua nakai fakatokanoa aki he mena ia e ha tagata?

¹⁸ Ha ko e mena nakai kitia mata e pule he Tama he tagata he vaha ha ha hinei hana, po ke pa·rou·siʹa, kua nakai fakamagalo aki he mena ia e ha tagata. Kua loga mo e loga a lautolu ne tuga e tau mamoe he vaha nei kua matutaki atu ke he vahega tupa ke fakamatala e tala mitaki he Kautu he Atua ke he lalolagi katoa, he fakakikila atu ha lautolu a maama. E moli, kua hohoko e tau gahua fakamoliaga ha lautolu ke he fakatulakiaga he lalolagi.​—Mataio 24:14.

19. Ko e heigoa e tau mahani he vahega he tau mamoe ne kua fakatai atu ki ai e tala fakatai he tau mamoe mo e tau koti?

¹⁹ Ko e ha kua age he Patuiki Leveki Mamoe ki a lautolu he vahega he tau mamoe e monuina he vaha i mua? Kakano ha ko e ha lautolu a lagomataiaga loto katoatoa ke he gahua fakamatala he Kautu mo e tau mahani totonu ne fakakite e lautolu ke he tau matakainaga fakauku hana ko e mena kua pehe a Iesu kua taute ai ni ki a ia. Ha kua pihia, kua tala age he Tama he tagata mai he magafaoa patuiki ki a lautolu: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.”​—Mataio 25:34; 28:19, 20.

Lagomatai e Patuiki

20, 21. Ko e heigoa e tau fakamoliaga ne foaki mai he tau mamoe kua tutu a lautolu he fahi he Kautu?

²⁰ Kia mailoga la ko e magaaho ne uiina e Patuiki ke he tau mamoe nei ke moua e tufaaga ke he lalolagi ko e matakavi he Kautu he Atua, ne talahau e lautolu e manatu ofo. Ne huhu a lautolu ki a ia: ‘Ko e Iki na e, ne fe ne taute ai e mautolu e tau mena oti nei ki a koe?’ Ne tali e ia: “Ko e moli, ke tala atu e au kia mutolu, ha ko e tau mena ne eke e mutolu ke he taha ne muikau ia lautolu ko e haku a tau matakainaga nai, ko au haia ne eke e mutolu ki ai.” (Mataio 25:40) He magaaho ne tu ai a Iesu ki mua a Maria Makatala he aho ne liu mai a ia, ne vagahau a ia hagaao ke he tau matakainaga fakaagaga hana, he magaaho ne pehe a ia ki a ia: “Ka e fano a koe ke he haku a tau matakainaga.” (Ioane 20:17) He vaha he magaaho he hana ha ha hinei ne nakai kitia mata, kua gahoa ni ha Iesu a tau tutaki ne toe agaia mai he hana matakainaga fakaagaga ne 144,000 ne kua nonofo agaia he tino kakano ke he lalolagi.

²¹ Ha kua ha ha i luga he lagi a Iesu ti nakai kitia mata, ati taute ai ni he tau tagata kua tuga e tau mamoe ke he puhala nakai taute tonu ki a ia e tau mena fakaalofa nei. Ne kitia ni a ia ne nofo he nofoaiki hana, mai he ha lautolu a tau mata he tua. Ne loto fakaaue a Iesu ke he tau mena oti kana ne lali a lautolu ke taute ke lagomatai aki e tau matakainaga fakaagaga hana, ne kua eke mo tau hakeaga fakalataha mo ia ki luga he lagi. Ko e tau mena ne taute ke he tau matakainaga hana, ne pehe ai ko e taute ni ki a ia. Ne taute pauaki e lautolu ne tuga e tau mamoe e tau mena mitaki ke he tau matakainaga a Keriso kakano ha kua kitia e lautolu ko e tau tagata pihia a lautolu. Kua mailoga he tau loto fakaaue ha lautolu ko e tau hukui he Kautu he Atua e tau matakainaga fakaagaga ha Iesu, mo e manako ai a lautolu ke fakakite e tau fakamoliaga pauaki he taute fakalataha e lautolu e tau tutuaga mo lautolu ke he fahi he Kautu ia.

22. Ne age fefe e palepale ke he vahega he tau mamoe? (Fakatatai Fakakiteaga 7:14-17.)

²² Ne kitia tuai e Iehova e vahega kua tuga e tau mamoe nei ka o mai he vaha, he magaaho he ha ha hinei he hana Tama, mo e kua fai palepale ofoofogia ne toka e ia ma lautolu! To moua he moto tagata tokologa e tau monuina mafola i hinai ke he lalolagi, he vaha fiafia he Pule Afe Tau he Patuiki a Iehova, ko Iesu Keriso.

23. Ko e heigoa e tau puhala ne iloa pauaki he tau mamoe kua lagomatai atu ke he tau matakainaga he Patuiki?

²³ Ka manamanatu a tautolu ke he tau perofetaaga he Tohi Tapu kua hagaao ke he magaaho he ha ha hinei a Keriso, fakalataha mo e tala fakatai a Iesu ke he tau mamoe mo e tau koti, ko e heigoa ne kitia e tautolu? Ko e mena nei: Nakai ko e mena taute he nakai iloa mo e tokau­naka ke taute mena mitaki ke he taha he tau matakainaga fakaagaga he Patuiki, ha kua eke ai e tagata mo mamoe kua moua e tuaga tututonu ki mua he Atua mo e hana a Patuiki. Kua iloa e lautolu he vahega he tau mamoe e tau mena ne taute e lautolu, ti pihia foki pete ni ia kua nakai kitia mata moli e lautolu e Patuiki ne pule mai. Kua lali a lautolu ke lagomatai e tau matakainaga he Patuiki, nakai ni ke he tau koloa he tino ka kua eke foki ke he tau puhala fakaagaga. Fefe? He lagomatai a lautolu ke fakamatala e tala mitaki he Kautu he Atua mo e he taute e tau fakaakoaga Tohi Tapu ke maeke ai ke taute tutaki ma Keriso. Ti kua mole e fa e miliona he tau tagata ne fua e maama ne tukuogo e Kautu he Atua he vaha nei.

Tau Gahua Kua Fakalaulahi

24. Ko e heigoa e tau gahua fakaalofa kua taute ai e vahega tupa mo tau tagata fiafia lahi he lalolagi he vaha nei?

²⁴ Kia taute e tautolu e taha fakamauaga fakamatataha ke he falu he tau gahua mitaki ne loga he vahega he tupa fakamoli. Ke fakamua aki, kua kotofa e vahega tupa ke he tau mena oti kana he Iki​—ko e tau mena he lalolagi he Kautu hana​—mo e tupu tumau e tau mena nei. Ke ua aki, kua nakai ni fagai hokoia he vahega ia e tau fekafekau he loto kaina ne fakauku, ka ko e moto tagata tokologa he falu mamoe ne kua tolomaki atu foki, ne moua e tau mena kai fakaagaga. Ke tolu aki, kua taute he vahega he tupa e takitakiaga, ke folafola atu e maama he Kautu. Ke fa aki, ko e hana fakalaulahiaga lahi mahaki he tau gahua, ko e fakapotopoto maiaga he moto tagata tokologa he falu mamoe, he tamai a lautolu ke he faituga fakaagaga a Iehova. Ke lima aki, ko e vahega he tupa, fakalataha mo lautolu ne kua tuga e tau mamoe ne loto katoatoa, ke lagomatai ke fakalahi e tau fale he tau la he fakatokatokaaga, ne ha ha he lalolagi katoa, ti pihia foki ke he matapatu la ofisa he motu ko e Tau Fahi Kaufakalataha. Ko e tau gahua malolo fakaalofa pihia kua eke ai e vahega tupa he lalolagi he vaha nei, ko e tau tagata fiafia lahi mahaki, mo e kua taute ai e lautolu e tau miliona tagata ke fiafia foki. Kua tuku age e lautolu oti nei e tau fakaaueaga ke he Atua ko Iehova mo Iesu Keriso, ne takitaki e tau gahua fakalaulahi he tupa lotomatala!

25. To maeke fefe e tau mamoe ke lagomatai tumau e vahega he tupa, ti ko e heigoa e amaamanakiaga kua kitia mai?

²⁵ Kua gahua fakamalolo lahi e vahega tupa he magaaho nei ke taute hana matagahua ne kotofa he Atua. Kua teitei oti tuai e magaaho ne toe ato tupu e “matematekelea lahi.” (Mataio 24:21, NW) Kua aoga lahi tuai ai ki a lautolu nei ko e tau mamoe he Atua, ke nonofo he fahi ­matau he fiafia pauaki he Patuiki Leveki Mamoe! Ha kua pihia mogoia, kia fakatumau a tautolu oti kana ke fakamakutu lahi ke lagomatai e tupa fakamoli mo e lotomatala. He taute ni e mena nei, ato maeke ai he taha aho ne tata lahi mai, ke logona e lautolu oti kana ne tuga e tau mamoe, e tau kupu fiafia ia: “O mai a, ko mutolu kua fakamonuina he haku a Matua, kia eke ma mutolu, e kautu kua taute ma mutolu, ka e nakaila fakave e lalolagi.”

Maeke Nakai ia Koe ke Tali?

◻ Ko e heigoa e fakafiliaga ne kua kamata mai he mole atu he nofo e Patuiki he nofoaiki?

◻ Ne hoko fefe e fakamoliaga a Mataio 24:45-47 he vaha fou nei?

◻ Hagaao ke he tau gahua ne fakalaulahi, ko e heigoa ne kua loto fakaaue lahi e vahega he tupa mo e moto tagata tokologa ki ai?

◻ Ne fakamoli fefe a Mataio 25:34-40 he vaha he pa·rou·siʹa?

[Fakatino he lau 21]

Ne age he iki, hana tau mena oti kana ke leveki he tupa fakamoli

[Fakatino he lau 23]

Kua nofo a Iesu he hana nofoaiki lilifu ue atu ke fakafili e tau tagata