Kia Gahuahua ha Mutolu a Taofi-Ni mo e Pua
“Kua lafilafi ke he ha mutolu a tua e . . . taofi-ni.”—2 PETERU 1:5, 6, NW.
1. Ko e heigoa e tuaga nakai fa mahani ke liga fakamatala e Kerisiano ki ai?
NE PEHE a Iesu: “Ke takitaki atu foki a mutolu ki mua he tau iki mo e tau patuiki ha ko au ni, ke eke mo talahau kia lautolu.” (Mataio 10:18) Kaeke ke ui a mutolu ki mua he iki, he iki fakafili, po ke pelesiteni, ko e heigoa ha mutolu ka tutala ki ai? Liga fakamua hagaao ke he ko e ha ne tu ai a koe i mua ia, ko e hokotaki ne ta ki a koe. Kua lagomatai he agaga he Atua a koe ke taute pihia. (Luka 12:11, 12) Ka e, kua manamanatu nakai a koe ke tutala ke he taofi-ni? Kua manamanatu nakai a koe ke he mena ia ko e vala aoga lahi ke he ha tautolu a fekau Kerisiano?
2, 3. (a) Ko e hoko fefe a Paulo ke fakamatala ki a Feliki mo Tusila? (e) Ko e ha e taofi-ni ko e matakupu tala kua lata tonu ke tutala a Paulo hagaao ke he tuaga ia?
2 Manamanatu la ke he fakataiaga he moui moli. Ko e taha he tau fakamoli a Iehova kua tapaki mo e tamai ke he fakafiliaga. Ko e magaaho ne tuku age ai ke tutala, ne manako a ia ke fakamaama hana tua ko e Kerisiano, ko e fakamoli. Ka kumikumi e koe e fakamauaga mo e to kitia e koe kua tala age e ia e fakamoliaga omonuo “ke he tututonu, mo e [taofi-ni, NW] mo e fakafiliaga ne tatali.” Ko e hagaao a tautolu ke he mena ne tupu ke he aposetolo ko Paulo i Kaisaria. Ne ha ha i ai e huhu tala fakamua. “Kua mole foki falu a aho ati o mai ai a Feliki mo Tusila hana hoana, ko e fifine Iutaia, kua ahi atu kia Paulo, ti fanogonogo atu kia ia ke he tua kia Keriso.” (Gahua 24:24) Kua hokotaki he fakamauaga tala tuai ko Feliki “ne taute e ia e tau mahani vale oti mo e loto mao, mo e fakaaoga e malolo he patuiki ke he tau mena oti he tupa.” Ne faihoana lagaua a ia to hoko ke he magaaho ia ne fakaohooho ai e ia a Tusila ke vevehe hana tane (ko e eke fakakelea he matafakatufono he Atua) mo e eke mo hoana ke tolu aki hana. Na liga ko Tusila ne manako ke logona he lotu fou ia, Lotu Kerisiano.
3 Ne holo atu e tutala a Paulo “ke he tututonu, mo e [taofi-ni, NW] mo e fakafiliaga ne tatali.” (Gahua 24:25) Kua kitia maali he mena nei e kehekehe he tau tutuaga tonu he Atua mo e mahani vale mo e fakafiliaga hehe ne ha i ai a Feliki mo Tusila. Kua liga amaamanaki a Paulo ke omoi a Feliki ke fakakite e fakafiliaga tonu ke he mena nei kua hoko. Ka ko e ha ne ta hake mai ai e “[taofi-ni, NW] mo e fakafiliaga ne tatali”? Ko e faoa tokoua mahani kelea nei kua manako ke iloa ko e heigoa e “tua kia Keriso” ka moua. Ti kua manako a laua ke iloa ko e mumui atu ki a ia kua lata ke taofi e tau manatu, tau vagahau, mo e tau gahuahua, ko e kakano a ia he taofi-ni. Ne fai fakalagoaga e tau tagata oti kana ke he Atua ma e ha lautolu a tau manamanatuaga, tau kupu, mo e tau gahua. Ko e mena ia, ko e mena ne mua atu he aoga ke he ha fakafiliaga mai ia Feliki ke he mena ne tupu ki a Paulo ko e fakafiliaga ka hahaga atu ki ai e kovana mo e hana hoana ki mua he Atua. (Gahua 17:30, 31; Roma 14:10-12) Ha kua maama mitaki he logona e fekau a Paulo, ne “hopo ai e ate a Feliki.”
Kua Aoga Lahi ka e Nakai Mukamuka
4. Ko e ha e taofi-ni ko e vala aoga lahi ke he Lotu Kerisiano moli?
4 Ne mailoga mitaki he aposetolo ko Paulo e taofi-ni kua lata tonu mo e vala he Lotu Kerisiano. Ko e aposetolo ko Peteru, ko e taha ne fakalataha tata ki a Iesu, ne fakamau e mena nei. Ko e magaaho ne tohi ai ki a lautolu “ka eke mo tau tagata mahani faka-Atua” he lagi, kua omoi e Peteru e fakatata he tau fua pauaki ne kua lata, tuga e tua, fakaalofa, mo e taofi-ni. Ko e mena ia, ko e taofi-ni kua putoia ai ke he fakamoliaga nei: “Ha ko e mena ka ha ha ia mutolu e tau mena ia mo e pua, to puipui e lautolu ia mutolu mai ke ua eke mo tau tagata kua nakai gahuahua po ke nakai fua loga hagaao ke he iloilo tonuhia ke he Iki ha tautolu ko Iesu Keriso.”—2 Peteru 1:1, 4-8, NW.
5. Ko e ha kua lata ia tautolu ke mua atu e onoono fakalahi ke he taofi-ni?
5 Kua iloa e mutolu, ka e taha e mena, na mukamuka lahi ke talahau pehe kua lata a tautolu ke fakatata e taofi-ni ke he taute moli e mena ia ke he ha tautolu a moui he tau aho takitaha. Ko e taha kakano ko e taofi-ni ko e fua lavea. He 2 Timoteo 3:1-5 (NW) ne fakamaama e Paulo e tau mahani ne liga malolo he vaha ha tautolu, “he tau aho fakahikuhiku.” Ha ha i ai taha vahega mena ke fakataitai aki e vaha ha tautolu ko e mena to tokologa ke “nakai taofi-ni.” Kua kitia e tautolu e mena nei kua fakamoli ke he tau fahi takai oti ia tautolu, kitia moli nakai e tautolu?
6. Fakakite fefe e nakai taofi-ni he vaha nei?
6 Kua tokologa e tau tagata ne tali tonu ko e matapatuaga ni a ia ke moua e malolo ka “fakatoka e tau logonaaga” po ke “fakapua mai ki fafo e tau ita.” Ko e ha lautolu a kitekiteaga ne fakamalolo ai he tau tutuaga fakafifitaki he fofoga he tau toloaga, ko lautolu ne tuga kua tiaki noa e taofi-ni he ha faga he tau faga, ne fakakite fakatonu ha lautolu a tau manako ki ai. Ke fakatai: Tokologa ne manako ke he tau feua sipote kua tupu e fakamahani ke fakakite vale e loto logona hifo, pihia foki e fakakelea he vale lahi. Nakai kia manatu e koe, mai he tohi tala, e tau magaaho ne kua tutupu e tau latau po ke papa kelea e tau tagata kolokolovao he tau sipote? Ko e ha mautolu a kakanoaga mogoia, ko e nakai ke poaki ki a tautolu ke foaki fakalahi e tau magaaho ke liu fakamanatu e tau fakafifitakiaga he nakai taofi-ni. Maeke ia koe ke tohi e tau mena loga kua lata a tautolu ke fakakite e taofi-ni—tautolu a fakaaogaaga he tau mena kai mo e tau mena inu, ha tautolu a hatakiaga mo e tau tino kehekehe, mo e tau magaaho mo e tau tupe ne fakamole ke he tau feua mahuiga. Ka e, ke he nakai kikite fakamatafeiga ke he loga he tau mena pihia, kia o mai a tautolu ke kitekite ke he taha e vala pauaki ne kua lata ke fakakite e taofi-ni.
Taofi-ni Hagaao ke he Ha Tautolu a Tau Loto Logona Hifo
7. Ko e heigoa e vala he taofi-ni ne aoga pauaki ke onoono ki ai?
7 Kua tokologa ia tautolu ne kautu mitaki he tau hikihikiaga po ke tautaofi ha tautolu a tau gahua. Kua nakai kaiha a tautolu, kaumahala ke he mahani kelea, po ke kelipopo; kua iloa e tautolu e fakatufono he Atua ke he tau mena hehe pihia. Ko e kautu fefe ha tautolu he mogoia, ke taofi ha tautolu a tau loto logona hifo? Ko e falu a magaaho, ko lautolu ne kaumahala ke taute e loto logona hifo ke taofi-ni kua fa mahani ke galo tumau e taofi-ni ka hagaao ke he tau gahua ha lautolu. Ti o mai a tautolu ke kikite fakatonu ke he ha tautolu a tau loto logona hifo.
8. Ko e heigoa ne amaamanaki a Iehova mai ia tautolu hagaao ke he ha tautolu a tau loto logona hifo?
8 Kua nakai amaamanaki e Atua ko Iehova ki a tautolu ke eke mo tau tagata pule he loto, ke maeke ia tautolu ke fakakite po ke nakai fakakite e ha loto logona hifo. He tukuaga mau a Lasaro, ko Iesu kua “mamahi ai hana finagalo, mo e fakaatukehe.” Ka mole ia “kua tagi a Iesu.” (Ioane 11:32-38) Ne fakakite e ia e loto logona hifo kehe lahi he magaaho, ne fakalataha mo e mitaki katoatoa e taofi he hana tau gahua, ne vega e ia a lautolu ne fefakafuaaki tupe mai he faituga. (Mataio 21:12, 13; Ioane 2:14-17) Ko e hana tau tutaki tua fakamoli ne fakakite foki e hokulo he tau loto logona hifo. (Luka 10:17; 24:41; Ioane 16:20-22; Gahua 11:23; 12:12-14; 20:36-38; 3 Ioane 4) Ka e pete ni he pihia, ne mailoga e lautolu e lata ke taofi-ni ke maeke he ha lautolu a tau loto logona hifo ke ua takitaki atu ke hala. Kua fakamahino mai he Efeso 4:26 e mena nei: “Ka ita a mutolu, aua neke hala ai; aua foki neke to e la ka e ita agaia a mutolu.”
9. Ko e ha ne aoga lahi ai e taofiaga he tau loto logona hifo ha tautolu?
9 Kua ha ha i ai e hagahaga kelea kaeke ke fakakite he Kerisiano e taofi-ni ka e, ke he moli, ko e hana a loto logona hifo kua nakai fai taofi. Manamanatu la ke he magaaho ne talia ai he Atua e poa a Apelu: “Ti ita lahi ai a Kaino, kua fakatetefu hana mata. Ti pehe mai a Iehova kia Kaino, Kua ita he ha a koe? Ti fakatetefu mai he ha e mata hāu? Kaeke kua mahani mitaki a koe ti ha ia koe e fiafia, kaeke kua nakai mahani mitaki a koe, kua takoto tuai e hala ke he gutuhala. To hagao atu hana manako kia koe.” (Kenese 4:5-7) Ne kaumahala a Kaino ke taofi hana a loto logona hifo, ko e mena haia ne takitaki a ia ke kelipopo a Apelu. Ko e tau loto logona hifo ne nakai fai taofi kua takitaki atu ke he tau gahua ne nakai fai taofi.
10. Ko e heigoa hau ne fakaako mai he tau fakataiaga a Hamanu?
10 Manamanatu foki la, ke he fakataiaga mai he vaha ia Moretikai mo Eseta. Ko e takitaki lilifu ko Hamanu ne ita lahi ha kua nakai hufeilo a Moretikai ki a ia. Fakahiku kua manatu hehe lahi a Hamanu ko e to moua e ia e tuaga mitaki. “Ti fano ai a Hamanu he aho ia mo e olioli mo e loto fiafia; ka e kitia e Hamanu a Moretikai ke he gutuhala he patuiki, kua nakai tu ai a ia, kua nakai vivivivi foki a ia ha ko ia, ti ita lahi a Hamanu kia Moretikai. Ka e fakauka ai a Hamanu; ne fina age foki a ia ke he hana fale.” (Eseta 5:9, 10) Ne mafiti a ia ke logona e olioli he loto logona hifo. Ka e kua mafiti foki a ia ke logona e ita lahi he kitia atu e fakateaga he taha ne kona e loto hana ki ai. Kua manamanatu kia a koe he magaaho ne pehe ai e Tohi Tapu ko Hamanu ne ‘tumau e taofi e ia a ia’ ko e kakano ko e fakataiaga a ia he taofi-ni? Nakai pihia. Ma e magaaho tote nei, ne taofi e Hamanu hana tau gahua mo e ha fakakiteaga he loto logona hifo, ka e kaumahala a ia ke taofi hana a ita lahi mahekeheke. Ko e hana a loto logona hifo ne takitaki a ia ke haitia e kelipopo.
11. He fakapotopotoaga i Filipi, ko e heigoa e mena vihi ne taute mo e ko e heigoa ne liga takitaki atu ki ai?
11 Kua tatai ni, ko e nakai taofi e tau loto logona hifo he vaha nei kua maeke ke fakalekua fakalahi aki e tau Kerisiano. ‘Ae,’ ka logona ai he falu, ‘nakai ko e taha mena vihi a ia he fakapotopotoaga.’ Ka e kua fai mena pihia tuai ne tupu. Tokoua e Kerisiano fakauku i Filipi ne fai kehekeheaga ka e nakai fakamaama mai he Tohi Tapu. Manamanatu la ke he mena nei ne tupu: Ne uiina e Evotia falu he tau matakainaga tane mo e fifine ke kai po ke fakalataha fiafia auloa. Ne nakai uiina a Sunetuke, ti hukia ai hana loto. Na liga taui e ia ha kua nakai uiina a Evotia ke he fiafiaaga he magaaho fakamui. Ti kamata tokoua a laua ke fehuluaki e tau hepehepe he taha; ke he falu a magaaho, ne nakai fevagahauaki a laua. He tau fakatino pihia, ko e matapatu kia he mena vihi ko e nakai uiina ke he kai? Nakai. Ko e lupa noa ni a ia. Ko e magaaho ne kaumahala e tau matakainaga fifine fakauku tokoua nei ke taofi ha laua a tau loto logona hifo, kua eke ai e lupa ia mo afi he uhovao. Ti totolo fakahaga e mena ia mo e tupu ato fakalavelave atu e aposetolo.—Filipi 4:2, 3.
Hau a Loto Logona Hifo mo e Hau a Tau Matakainaga
12. Ko e ha ne mai ai he Atua ki a tautolu e hatakiaga ne moua he Fakamatalaaga 7:9?
12 Ke talahau fakamoli, kua nakai mukamuka ke taofi e loto logona hifo he taha he magaaho ka manatu mafenu ai ke he taha, fakahukia po ke taute mo e fili lanu tagata. Na iloa e Iehova e mena ia, ha ko e mena kitekite e ia e fakafetuiaga he tagata mai he kamataaga he tagata. Kua fakatonu he Atua a tautolu: “Aua neke fakatepetepe hāu a loto ke ita; ha kua toka mau ai e ita ke he tau loto he tau tagata goagoa.” (Fakamatalaaga 7:9) Kia mailoga na onoono fakamua e Atua ke he loto logona hifo nakai ke he tau gahua. (Fakatai 14:17; 16:32; Iakopo 1:19) Kia huhu hifo ki a koe, ‘Kua lata nakai au ke onoono fakalahi ke he taofiaga he haku a loto logona hifo?’
13, 14. (a) He lalolagi, ko e heigoa ne fa mahani ke tupu mai he kaumahala ke taofi e tau loto logona hifo? (e) Ko e heigoa e tau mena ne liga takitaki e tau Kerisiano ke taofi e tau faitaua?
13 Kua tokologa e tau tagata he lalolagi ne kaumahala ke taofi ha lautolu a tau loto logona hifo ti kamata agataha ke fetauiaki—loto kona, ke hoko foki ke he tau vale, felatauaki ha ko e tau mena moli po ke tau manatu tuaha ki a lautolu ni po ke ke he magafaoa. Ko e lagataha ka nakai fai taofi e tau loto logona hifo, to maeke ia lautolu ke omoi e hufiaaga fakahukia ke leva. (Fakatatai Kenese 34:1-7, 25-27; 49:5-7; 2 Samuela 2:17-23; 3:23-30; Fakatai 26:24-26.) Ma e tau Kerisiano mogoia, ko e motu po ke aga fakamotu fe ni ne tutupu hake ai, kua lata ke kitia e tau lagatau kona pihia mo e tau faitaua ko e tau mena hehe, kelea, kua lata ni ke tiaki. (Levitika 19:17) Kua kitia nakai e koe ko e tiaki he tau faitaua, ko e taha vala ia he hau a taofi-ni hagaao ke he tau loto logona hifo?
14 Ke tuga e mena ne tupu ki a Evotia mo Sunetuke, ko e kaumahala ke taofi e tau loto logona hifo kua maeke ke takitaki atu ke he tau mena vihi mogonei. Ko e matakainaga ne logona e manatu mafenu ha kua nakai uiina atu ke he galue fakamauhoana. Po ke liga ko e tama hana po ke kasini hana ne nakai fakalataha ki ai. Po ke liga fakatau he matakainaga tane e peleoafi kua fita e fakaaoga mai he matakainaga Kerisiano, mo e nakai leva ti malona. Ko e heigoa ni e kakano, kua fakatupu mai he mena nei e tau manamanatuaga hukia, ko e loto logona hifo kua nakai taofi, ti tupu e fakaatukehe ki a lautolu ne putoia ai. Ti ko e heigoa e mena ka tupu?
15. (a) Ko e heigoa e tau papaleaga momoko ne fua mai he tau faitaua he vahaloto he tau Kerisiano? (e) Ko e heigoa e fakatonuaga he Tohi Tapu ne toka ai e fakamahani ke taofi e tau faitaua?
15 Kaeke ke nakai gahua e tagata ne fakaatukehe ke he taofiaga he hana a loto logona hifo mo e taute e mafola mo e hana a matakainaga, ti maeke e faitaua ke tupu. Kua ha ha i ai e tau mena tutupu he magaaho ka ole e Fakamoli ke ua kotofa a ia ke fano ke he taha Fakaakoaga Tohi pauaki he Fakapotopotoaga ha kua “nakai loto a ia” ke he falu Kerisiano po ke magafaoa ne o ki ai. Ko e momoko ha a ia! Kua pehe mai e Tohi Tapu ko e mahala a ia ma e tau Kerisiano ke uta he taha e taha ke he tau fakafiliaga he lalolagi, ka e nakai kia tatai ni e mahala ia kaeke ke kalo kehe mai a tautolu he matakainaga ha ko e tau mafenu kua mole ki a tautolu po ke ke he falu a magafaoa? Fakakite mai nakai he tau loto logona hifo ha tautolu ko e tuku e tautolu e tau fakafetuiaga he toto magafaoa ki mua he mafola mo e tau matakainaga tane mo e fifine ha tautolu? Talahau nakai e tautolu kua talia a tautolu ke mamate ma e matakainaga fifine ha tautolu, ka e ko e tau loto logona hifo ha tautolu kua omoi a tautolu ti kua uka lahi a tautolu ke vagahau ki a ia mogonei? (Fakatatai Ioane 15:13.) Kua talahau fakahako mai he Atua ki a tautolu: “Aua neke taui atu e kelea ke he kelea he taha; . . . Kaeke kua maeke ia mutolu, kia nonofo fakamitaki mo e tau tagata oti kana. Ko e tau fakahelehele na e, aua neke taui atu e mutolu, ka kia fakatokatoka atu ke he ita.”—Roma 12:17-19; 1 Korinito 6:7.
16. Ko e heigoa e fakataiaga mitaki ne fakatoka e Aperahamo ke he fakafehagaiaga mo e tau loto logona hifo?
16 Ko e lakaaga ki mua ke liuaki mai e taofi he ha tautolu a tau loto logona hifo ko e taute e mafola po ke manamanatu ke he tupu maiaga he fegugu, ka e aua fakaata e vihiatia ke nofo tumau. Manatu la ke he magaaho ne nakai lahi e kelekele ke nonofo ai e tau fuifui manu loga a Aperahamo fakalataha mo e ha Lota, ti kamata ai ke taufetoko e tau tagata gahua ha laua. Kua toka nakai e Aperahamo hana a loto logona hifo ke fakakautu mitaki ki a ia? Po ke fakakite e ia e taofi-ni? Ko e mena mitaki lahi, ne pulega age e ia e tali mafola ke he mavehevehe he fakatu gahua; kia igatia a laua mo e vevehe e kelekele. Mo e age e ia ki a Lota e fifiliaga fakamua. Ke fakamoliaki kua nakai ha ha ia Aperahamo ha manatu kona mo e nakai taofi e ia ha faitaua, ne fano foki a ia ke tau he magaaho fakamui ke lalago ia Lota.—Kenese 13:5-12; 14:13-16.
17. Kaumahala fefe a Paulo mo Panapa he taha magaaho, ka ko e heigoa ne mui mai he magaaho fakamui?
17 Kua maeke foki ia tautolu ke fakaako e taofi-ni mai he mena ne tupu ne putoia ai a Paulo mo Panapa. Mole atu e tau tau loga he o tokoua ai a laua, ti nakai tatai e tau manatu ha laua ke he mena ko e uta nakai a Mareko he fenoga. “Ti kua hukia lahi ai e tau loto, kua mavehe kehekehe ai a laua; ati o ai a Panapa mo Mareko, kua o he foulua a laua ki Kuperu.” (Gahua 15:39) Ha kua kaumahala e tau tagata tane motua nei ke taofi ha laua a tau loto logona hifo ke he magaaho ia kua lata ke foaki mai e hatakiaga ma tautolu. Kaeke ke tupu e mena ia ki a laua, to maeke foki ke tupu ki a tautolu. Kua nakai maeke ia laua mogoia, ke fakaata leva e kaava ia ke laulahi po ke e fetauiaki ke tupu. Kua fakamoli he fakamauaga ko e tau matakainaga ne putoia ai ne liu moua e taofi he tau loto logona hifo ha laua mo e ko e magaaho fakamui ne gahua fakalataha a laua mo e mafola.—Kolose 4:10; 2 Timoteo 4:11.
18. Kaeke ke hukia e logonaaga, ko e heigoa kua lata he Kerisiano motua ke taute?
18 Kua amanaki a tautolu ke ha ha i ai foki e tau logonaaga hukia, pihia foki ke he tau faitaua, ke he tau tagata he Atua. Na hoko e tau mena ia he vaha he tau Heperu mo e magahala he tau aposetolo. Ti hoko mai foki a lautolu ke he tau fekafekau a Iehova he vaha ha tautolu, ha ko tautolu oti ko e tau tagata nakai mitaki katoatoa. (Iakopo 3:2) Ne poaki e Iesu ke he hana tau tutaki ke gahua fakamafiti ke taute e tau mena vihi pihia mo e tau matakainaga. (Mataio 5:23-25) Ka kua mitaki lahi foki ke puipui mai ia lautolu he magaaho fakamua he fakaune ki mua ha tautolu a taofi-ni. Kaeke ke logona e koe e mafenu po ke kelea e loto hau ha ko e mena tote he matakainaga tane po ke fifine ne talahau po ke taute ki a koe, ko e ha ne nakai taofi ai e loto logona hifo hau mo e fakanimo e mena ia? Kua lata nakai ke totokoatu ke he taha tagata, ke tuga e pehe kua nakai makona a koe ato talahau fakatonu he taha ke he hana hehe? Ti fefe la hau a taofi e koe hau a loto logona hifo?
Kua Maeke Nakai!
19. Ko e ha ne lata tonu ai ha ko e ha tautolu a fakatutalaaga kua hagaao ke he taofiaga he ha tautolu a tau loto logona hifo?
19 Kua tutala fakalahi a tautolu ke he taha vala he taofi-ni, ko e taofiaga he ha tautolu a tau loto logona hifo. Mo e ko e matapatu manatu haia ha ko e kaumahala ke taofi ha tautolu a tau loto logona hifo kua maeke ke takitaki a tautolu ke galo e taofi he tau alelo ha tautolu, ha tautolu a tau manako ke he mahani tane mo e fifine, ha tautolu a tau aga kai, mo e loga atu foki falu vala he moui ne kua lata ia tautolu ke fakakite e taofi-ni. (1 Korinito 7:8, 9; Iakopo 3:5-10) Kia fakamalolo mogoia, ha ko e mena maeke ia koe ke fakaholo ki mua e tumau ke taofi-ni.
20. Ko e maeke fefe ia tautolu ke fakamoli ko e tupu tolomaki ki mua ko e mena maeke?
20 Kua talia fiafia e Iehova ke lagomatai a tautolu. Ka e moli fefe ki a tautolu? Moli, ko e taofi-ni ko e taha mai he tau fua he hana agaga. (Kalatia 5:22, 23) Ko e mena ia, ke he katoatoaaga ne gahua ai a tautolu ke lata tonu ki ai mo e ke moua e agaga tapu mai ia Iehova mo e ke fakakite hana tau fua, ke hoko ke he katoatoaaga ia kua maeke ia tautolu ke amaamanaki ke mahomo atu e taofi-ni. Aua neke nimo e fakamoli mai a Iesu: “[Ko e] Matua . . . ha ha he lagi [to] foaki mai e Agaga Tapu kia lautolu ka ole atu ai kia ia!”—Luka 11:13; 1 Ioane 5:14, 15.
21. Ko e heigoa hau ne manatu ke taute he vaha i mua hagaao ke he taofi-ni mo e hau a loto logona hifo?
21 Aua neke manatu a tautolu to mukamuka. To liga uka lahi ma e falu ne tutupu hake mo e tau tagata ne fakaataina ha lautolu a tau loto logona hifo, ma e falu ne mukamuka lahi ke lagalaga e tau loto, po ke ma e falu ne nakai fia lali ke fakakite e taofi-ni. Ma e tau Kerisiano pihia, ko e fakaata he taofi-ni ke gahuahua mo e pua ko e paleko moli. Ka e taha e mena ko e mena maeke. (1 Korinito 9:24-27) Ha kua tata atu fakahaga a tautolu ke he fakaotiaga he fakatokaaga matahavala nei, ko e tau fakaatukehe mo e tau mena mamafa to holo ki mua. To nakai manako tote a tautolu ke he taofi-ni ka e manako lahi, mo e lahi mahaki! Kia kamatamata ni e koe a koe ke he hau a taofi-ni. Kaeke kua kitia e koe e tau vala ne kua lata ia koe ke fakamitaki, kia gahua ki ai. (Salamo 139:23, 24) Kia ole ke he Atua ke fakalahi mai hana agaga. To logona e ia a koe mo e to lagomatai a koe, ti ko e hau a taofi-ni to gahuahua mo e pua ai.—2 Peteru 1:5-8.
Tau Matakupu ma e Fakaataaga
◻ Ko e ha e taofi he loto logona hifo hau ne aoga lahi ai?
◻ Ko e heigoa hau ne fakaako mai he fakataiaga ha Hamanu mo e ha Evotia mo Sunetuke?
◻ Ko e heigoa hau ka taute fakamoli kaeke ke hoko mai e faitaua?
◻ Maeke fefe he taofi-ni ke lagomatai a koe ke tiaki e taofi ke he ha faitaua?
[Fakatino he lau 11]
He magaaho ne tu i mua ha Feliki mo Tusila ne vagahau a Paulo hagaao ke he tututonu mo e taofi-ni