Kua Tuku Fakamua he Magafaoa Kerisiano e Tau Mena Fakaagaga

“Kia loto fakalataha a mutolu oti, kia feofanaki, kia fakaalofa ke he tau matakainaga, kia hofihofi noa e fakaalofa, kia mahani totonu.”​—1 PETERU 3:8.

1. Ko e heigoa e fifiliaga kua ha ha ia tautolu oti mo e maeke fefe he ha tautolu a fifiliaga ke lauia ha tautolu a vaha mai i mua?

KO E mitaki ha a ia he tau kupu i luga kua fakahagaao ke he fakalatahaaga tuai he tagata​—ko e magafaoa! Mo e kua aoga ha a ia ke fakakite he tau mamatua e takitakiaga ke he tau mena nei! Ko e ha lautolu a tau fua mitaki mo e ha lautolu a tau fua kelea kua fa fakakite mai he tau fanau. Ka ko e fifiliaga kehekehe kua toka mau ni ki a ia takitokotaha he magafaoa. Ha ko e tau Kerisiano, kua maeke ia tautolu ke fifili ke eke mo tau tagata fakaagaga po ke tau tagata ke he tino. Kua maeke ia tautolu ke fifili ke fakafiafia e Atua po ke ke nakai fakafiafia a ia. Ko e fifiliaga ia kua maeke ke fua ai ke he fakamonuinaaga, ko e moui tukulagi mo e mafola​—po ke malaia, ko e mate tukulagi.​—Kenese 4:1, 2; Roma 8:5-8; Kalatia 5:19-23.

2. (a) Fakakite fefe e Peteru hana a manamanatu ma e hana a magafaoa? (e) Ko e heigoa e mahani fakaagaga? (Kikite matahui tala.)

² Ko e tau kupu he aposetolo ia 1 Peteru veveheaga 3, kupu 8, kua mui mai he mole atu e foaki e ia falu a fakatonuaga mitaki ke he tau hoana mo e tau tane. Kua fiafia moli a Peteru ke he tau mena he tau magafaoa Kerisiano. Ne iloa e ia ko e malolo he mahani fakaagaga ko e kei ke he fakatumauaga he magafaoa mo e fefakaalofaaki.a Ne fakahaha mai foki e ia ke he kupu 7, kaeke kua nakai fakateliga e tau tane, ko e fua to fai fakakaupaaga fakaagaga he vahaloto he tane mo Iehova. To lekua ai e tau liogi he tane kaeke ke tiaki e ia e tau manako he hana a hoana po ke ulu moumou a ia aki e nakai mahani totonu.

Keriso​—Ko e Fakataiaga Mitaki Katoatoa he Mahani Fakaagaga

3. Fakamanatu fefe e Paulo e fakataiaga ha Keriso ma e tau tane?

³ Kua falanaki ni e mahani fakaagaga he magafaoa ke he tau fakataiaga mitaki. He magaaho ka fakagahuahua Kerisiano e tane kua uta e ia e takitakiaga he fakakite e tau fua fakaagaga. Ka nakai tua e tane kua fa lali e matua fifine ke hahamo e matagahua ia. Ke he tau mena ua ia, kua foaki e Iesu Keriso e fakafifitakiaga mitaki katoatoa ke mumui ki ai. Ko e hana a tau mahani, hana a tau kupu, mo e hana a manamanatuaga kua ati hake tumau mo e fakahauhauaga. Ne fa liu ai e aposetolo ko Paulo takitaki e tau tagata totou ke he fakaalofa kua fakatoka e Keriso. Tuga e fakatai, kua talahau e ia: “Ha ko e tane, ko e ulu he hoana haia, tuga a Keriso, ko e ulu he ekalesia haia, ko ia foki ko e fakamoui he tino. Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna.”​—Efeso 5:23, 25, 29; Mataio 11:28-30; Kolose 3:19.

4. Ko e heigoa e fakataiaga he mahani fakaagaga ne fakatoka e Iesu?

⁴ Ko e fakataiaga maali lahi a Iesu he mahani fakaagaga mo e ulu pule kua fakakite aki e fakaalofa, totonu, mo e hohofi noa. Kua poa e ia a ia nakai taute e mena ne fiafia a ia ni. Kua fakatokoluga tumau e ia hana a Matua, mo e fakalilifu ke he hana ulu pule. Ne muitua a ia ke he takitakiaga he hana matua, ti kua maeke a ia ke pehe: “Nakai maeke ia au hoko au ke eke taha mena taha; ke fakalataha haku a fakafiliaga ke he fanogonogo haku; ti tonu ni haku a fakafiliaga, ha ko e mena nakai fifitaki au ke he haku a loto ni, ka ko e finagalo he Matua ne fakafano mai au.” “Nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.”​—Ioane 5:30; 8:28; 1 Korinito 11:3.

5. He foaki ma e hana a tau fekafekau ko e heigoa e fakataiaga kua fakatoka e Iesu ma e tau tane?

⁵ Ko e heigoa e kakano he mena nei ma e tau tane? Ko e kakano ko e fakafifitakiaga ke he tau mena oti ka mumui a lautolu ki ai ko Keriso, ne omaoma tumau a ia ke he hana a Matua. Tuga a nei, foaki e Iehova e tau mena kai ke he tau vahega moui oti he lalolagi, ti maeke ia Iesu ke foaki age e tau mena kai ke he hana a tau fekafekau kua manako. Ne nakai tiaki e ia ha lautolu a tau manako ke lata mo e tino. Ko e hana a tau mana he fagai e tau tagata tane 5,000 mo e toko 4,000 kua fakamoli ai hana a fakaalofa mo e hana a manamanatuaga ke he matagahua. (Mareko 6:35-44; 8:1-9) Tuga he vaha nei, ko e matagahua he ulu pule he magafaoa kua leveki ai ke he levekiaga fakatino he ha lautolu a tau magafaoa. Ka ko e oti ni kia he mena ia e ha lautolu a matagahua?​—1 Timoteo 5:8.

6. (a) Ko e heigoa e manako aoga lahi fakamagafaoa kua lata ke leveki ki ai? (e) Fakakite fefe he tau tane mo e tau mamatua tane e maamaaga?

⁶ Fai mena aoga atu foki e tau magafaoa, tuga ne fakakite mai e Iesu. Kua ha ha ia lautolu e tau manako fakaagaga mo e tau manako he logonaaga he loto. (Teutaronome 8:3; Mataio 4:4) Kua fetataaki a tautolu mo e falu, ke he magafaoa mo e i loto he fakapotopotoaga. Kua lata ia tautolu ke fai takitakiaga mitaki ke omoi a tautolu ke ati hake. Ke he mena nei, ko e tau tane mo e tau mamatua tane kua ha ha i ai e gahua lahi ke taute​—mua ue atu foki kaeke ko e tau motua po ke tau fekafekau lagomatai a lautolu. Ke he tau mamatua hoa taha kua lata ke fai fua pihia he magaaho ka lagomatai ha lautolu a tau fanau. Kua lata e tau mamatua ke maama nakai ni ke he tau mena kua fita he talahau mai he fahi he magafaoa ka e pihia foki ke he tau mena ne nakai la vagahau. Kua lata ke ha ha i ai e lotomatala, magaaho, mo e fakaeneene. Ne ha ha i ai taha kakano ne talahau e Peteru ko e tau tane kua lata ke fai manamanatu mo e nonofo fakalataha mo e ha lautolu a tau hoana hagaao ke he lotomatala.​—1 Timoteo 3:4, 5, 12; 1 Peteru 3:7.

Tau Hagahaga Kelea ke Kalo Kehe

7, 8. (a) Ko e heigoa e mena kua lata ke ha ha i ai kaeke ke hola kehe mai he pe fakaagaga? (e) Ko e heigoa kua lata ke ha ha i ai pete ni he kamata mitaki ke he tuaga faka-Kerisiano? (Mataio 24:13)

⁷ Ko e ha e kitekiteaga ke he mahani fakaagaga he magafaoa kua aoga lahi? Ke fakatai, kua liga ke huhu a tautolu, Ko e ha ne aoga lahi ai ke kitekite fakalahi ai e ikivaka he toga ke he mepe hana he magaaho ka fakahakohako e toga mai he tau mena hagahaga kelea ne potake? Ke he tau 1992 ia Aokuso ko e toga fenoga evaeva ko e Queen Elizabeth 2 (QE2) kua fano halaloto he mena ne ha ha i ai e putuputuaga oneone mo e tau maka ti kitia ai kua fa mahani ke hepe e fakahakohako. Taha e tagata he motu ne talahau: “Kua loga e tau gahua kua galo kakano ha kua loga e tau mena hehe he fahi ia.” Kua oka e QE2 he tau hoehoe he toka. Ko e fakahikuaga ko e hehe kua malona kelea lahi. Ko e vevehe tolu e tino kua malona ti nakai fakaaoga ai ke he tau fahi tapu gahoa he toka ke taute.

⁸ Tuga ni, kaeke ke nakai fakakia fakamitaki he “ikivaka” he magafaoa e mepe, ko e Kupu he Atua, to mukamuka lahi hana a magafaoa ke mamahi fakaagaga. Ma e motua po ke fekafekau lagomatai ko e fua to liga galo ai e tau kotofaaga he fakapotopotoaga mo e liga fai malona kelea lahi ke he falu he magafaoa. Ti ko e mena ia, kua lata e tau Kerisiano takitokotaha ke fakaeneene neke fai mena ke fakatolomuli aki e mahani fakaagaga, ka e falanaki ni ke he mahani kumikumi mitaki fakamua mo e fakamakai. Ke he tuaga faka-Kerisiano ha tautolu kua nakai mitaki noa ke kamata mitaki; ko e fenoga kua lata ke fakaoti mo e kautu.​—1 Korinito 9:24-27; 1 Timoteo 1:19.

9. (a) Aoga lahi fefe e kumikumiaga fakatagata? (e) Ko e heigoa e tau huhu malolo kua liga ke huhu hifo ni e tautolu ki a tautolu?

⁹ Ke kalo kehe mai he potake fakaagaga, tau maka, mo e tau putuputu oneone, kua lata ia tautolu ke fakamata tumau mo e ha tautolu a “tau mepe” he fakaako tumau ke he Kupu he Atua. Kua nakai maeke ia tautolu ke falanaki ni ke he kumikumi ke he mena mukamuka ne tamai a tautolu ke he kupu moli. Kua falanaki ni ha tautolu a malolo fakaagaga ke he fakatumau mo e fakaholoaga lagotatai he fakaakoaga mo e gahua. Tuga e fakatai, he o a tautolu ke he tau Fakaakoaga ke he Kolo Toko he fakapotopotoaga mo e fufuta tohi nei he lima, kua huhu a tautolu ki a tautolu, ‘Kua fakaako nakai e au po ke kua fakaako nakai fakamagafaoa e mautolu e vala tala nei, veu e tau kupu tohiaga tapu ke he ha lautolu a tau fakaaoga? Po ke kua hihika noa ni e mautolu e tau tali? Kua tiaki pihia foki kia e mautolu e totouaga he tala to o atu he feleveiaaga?’ Ko e tau tali moli ke he tau huhu nei kua maeke ke manamanatu fakalahi a tautolu ki ai mo e fakalaga aki e manako ke tolomaki ki mua​—kaeke kua lata.​—Heperu 5:12-14.

10. Ko e ha e kumikumiaga fakatagata kua aoga lahi?

¹⁰ Ko e ha, ha tautolu a kumikumiaga fakatagata kua aoga lahi? Kakano ha kua nonofo a tautolu ke he lalolagi ne pule ai e agaga ha Satani, ko e lalolagi kua ha ha ai e tau puhala fakagalogalo, kua lali ai ke moumou ha tautolu a tua ke he Atua mo e hana a tau maveheaga. Ko e lalolagi ne manako ke fakalavelave a tautolu ke nakai fai magaaho ke leveki ha tautolu a tau manako fakaagaga. Ko e mena ia kua liga huhu a tautolu ki a tautolu ni, ‘Kua malolo fakaagaga nakai haku a magafaoa? Ko au nakai ko e matua kua malolo tuga kua lata ki ai? Kua feaki nakai e mautolu ko e magafaoa e malolo fakaagaga he loto manamanatu ke lagomatai a mautolu ke taute e tau fifiliaga kua fakave ke he tututonu mo e fakamoli?’​—Efeso 4:23, 24.

11. Ko e ha e tau feleveiaaga fakaagaga Kerisiano kua aoga lahi? Foaki e fakataiaga.

¹¹ Kua lata ke malolo ha tautolu a mahani fakaagaga ha ko e tau feleveiaaga oti ne fakalataha a tautolu ki ai. Ko e tau tula uho ia he Fale he Kautu po ke Fakaako Tohi he Fakapotopotoaga kua lagomatai ke fakahauhau a tautolu he mole atu e tau tula loloa ne kua fakamole e tautolu he lali ke hao mai he lalolagi kelea ha Satani. Ko e fakahauhau ha ia, tuga e fakatai, kua hane fa e kumikumi ke he tohi The Greatest Man Who Ever Lived! Ko e mena nei kua lagomatai a tautolu ke moua e maama mitaki ia Iesu, hana moui, mo e hana a gahua fakamatala. Kua totou fakamatafeiga e tautolu e tau kupu tohiaga tapu ne fakamau hifo, taute e kumikumiaga fakatagata, mo e maeke ke ako loga mai he fakataiaga ne fakatoka e Iesu.​—Heperu 12:1-3; 1 Peteru 2:21.

12. Kamatamata fefe he gahua fakamatala ha tautolu a mahani fakaagaga?

¹² Ko e kamatamata mitaki ma e mahani fakaagaga ha tautolu ko e gahua fakamatala Kerisiano. Ke maeke ke fakauka ke he gahua fakamatala pauaki ha tautolu mo e nakai pauaki ki ai, kua fa mahani ke fakafehagai mo e fekehekeheaki po ke totokoaga he tau tagata, kua lata ke ha ha ia tautolu e manamanatuaga hako, ko e fakaalofa he Atua mo e fakaalofa ke he katofia. Moli, nakai fai taha ke olioli ka nakai talia mo e kua maeke e mena ia ke tupu ke he ha tautolu a gahua fakamatala. Ka kua lata ke manatu e tautolu ko e tala mitaki a ia kua nakai talia, nakai ko tautolu takitokotaha. Kua pehe a Iesu: “Kaeke ke fakavihia he lalolagi a mutolu, kua iloa e mutolu ne fakavihia fakamua mai kia au, ti fakavihia ai kia mutolu. Kane mai ko e tau tagata he lalolagi a mutolu po kua fakaalofa e lalolagi ke he hana tau tagata; ka e nakai ko e tau tagata he lalolagi a mutolu, ka kua fifili e au a mutolu mai he lalolagi, ko e mena ia kua fakavihia ai he lalolagi a mutolu. . . . Ka to eke e lautolu e tau mena oti ia kia mutolu, ha ko e haku a higoa, he nakai iloa e lautolu a ia ne fakafano mai au.”​—Ioane 15:18-21.

Malolo e Tau Gahua ke he Tau Kupu

13. Fakakelea fefe he taha e mahani fakaagaga he magafaoa?

¹³ Ko e heigoa e mena ka tupu ke he magafaoa ka taha mai ia lautolu ka nakai fakalilifu ke he mea mo e maopoopo he fale? Ke he aho to uha, ko ia tokotaha mai ia lautolu oti ne nimo ke fakaeneene ke aua neke taholi magake mai e tau pelapela ke he fale. Ko e tau tuagahui pelapela he tau mena oti kua fakamoli ko e mahani fakahanoa, fakalahi gahua ai ma e falu. Ko e mena taha ia ni ke he mahani fakaagaga. Ke he taha kua lotokai po ke fakahanoa kua maeke ke fakakelea e higoa mitaki he magafaoa. Ko lautolu oti he magafaoa, nakai ni ko e tau mamatua kua lata ke fakakikila e tuaga manamanatu mitaki ha Keriso. Kua fakahauhau ha a ia kaeke ke gahua e tau tagata oti mo e onoono atu ai ke he moui tukulagi! Kua toka mau fakaagaga e loto manamanatu he magafaoa ia (ka e nakai ko e fia tututonu lahi a ia). Ha ha i ai e fakakiteaga lavea fakaagaga pihia he tiaki he taha magafaoa e mahani fakaagaga.​—Fakamatalaaga 7:16; 1 Peteru 4:1, 2.

14. Ko e heigoa e kanavaakau kamatamata kua tuku e Satani ke he puhala ha tautolu?

¹⁴ Kua lata a tautolu oti ke moua e tau koloa ke leveki aki ne kua lata ke fakapuke aki ha tautolu a moui ke he tau aho takitaha. (Mataio 6:11, 30-32) Ka kua fa mahani ko e ha tautolu a tau fia moua mena kua ufitia mai he ha tautolu a tau manako. Ma e fakatai, ko e fakatokaaga ha Satani kua foaki mai ki a tautolu e tau faga fakaheheaga mo e tau kanavaakau kehekehe. Ka fakamakamaka tumau a tautolu ke moua e mena fou ke he tau mena oti, to nakai maeke ia tautolu ke mamakona, ha ko e mena to tuai vave e mena fou ia mo e faga fou ka hau. Kua fakatu he tau tagata fakafua koloa e fale fakafiafia fano viko ne nakai maeke ke fakatu. Kua fakapage a tautolu ke kumi tumau e tau tupe ke fakamakona aki e ha tautolu a tau mena ne loto ki ai. Kua maeke he mena nei ke takitaki ke he “tau manako lahi ne loga kua goagoa ai mo e kelea ai,” po ke “goagoa mo e tau foliaga hagahaga kelea.” Kua maeke ai ke fua ke he moui nakai lagotatai mo e tote mo e tote he magaaho ma e tau gahua fakaagaga.​—1 Timoteo 6:9, 10; The Jerusalem Bible.

15. Ke he fakataiaga he puhala fe kua aoga lahi e ulu he magafaoa?

¹⁵ Ke he mena nei agaia, ko e fakataiaga ne fakatoka he ulu pule he magafaoa Kerisiano kua aoga lahi. Ko e hana a mahani lagotatai ke he gahua tupe mo e tau matagahua fakaagaga kua lata ke omoi aki falu he magafaoa. Kua moumou moli kaeke ke foaki he matua tane e hatakiaga mitaki lahi he gutu ka e kaumahala ke moui fakatatai ke he hana a tau kupu. To mafiti e tau fanau ke kitia mai e taute e mena ne tala atu e au ka e nakai tuga he taute e au ke he moui. Ti tatai foki, ko e motua po ke fekafekau lagomatai ne fakamalolo e falu ke gahua fakamatala ke he taha fale ke he taha fale ka e fa lavea ke fakalataha mo e hana a magafaoa ke he gahua ia to nakai leva ti galo e fakamakai ki loto he magafaoa mo e ki loto he fakapotopotoaga.​—1 Korinito 15:58; fakatatai Mataio 23:3.

16. Ko e heigoa e tau huhu kua liga ke huhu e tautolu ki a tautolu ni?

¹⁶ Ti kua maeke ia tautolu ke onoono fakahokulo ke he ha tautolu a tau momoui. Kua lavelave lahi kia a tautolu he foli ke gahua ke fakakautu e tau gahua totogi mo e tiaki e fakatuputolomaki fakaagaga? Kua o hake kia a tautolu ke he lalolagi ka e to tua ke he fakapotopotoaga? Manatu e fakatonuaga a Paulo: “Ko e kupu moli hanai, kaeke kua foli e taha ke he feua he epikopo, kua manako a ia ke he gahua mitaki.” (1 Timoteo 3:1) Ko e aga ke he matagahua he fakapotopotoaga kua talahau lahi ke he ha tautolu a mahani fakaagaga ke he fakaholo hake he pu gahua. Ko e lagotataiaga mitaki kua leveki ke nakai maeke he ha tautolu a tau tagata gahua ke mua ki a tautolu ke tuga ko e mena tukulele a tautolu ki a lautolu mo e nakai ki a Iehova.​—Mataio 6:24.

Matutakiaga Kakano Lahi kua Fakaholo ki Mua e Mahani Fakaagaga

17. Ko e heigoa ke foaki ke he feakiaga he fakaalofa moli he magafaoa?

¹⁷ Miliona he tau kaina he vaha nei kua eke mo tau okiokiaga fakaku. Fefe? Ko e tau tagata he magafaoa kua o mai ni ke momohe mo e kai ti liu foki o. Lavea ke nonofo viko a lautolu he laulau ke olioli e kai auloa. Kua galo e mafanatia he magafaoa. Ko e fua? Kua nakai fai matutakiaga, nakai fai fakatutalaaga mitaki. Mo e ko e fua foki he mena ia ko e nakai fai fiafia ke he falu, ti liga ko e nakai fai manamanatuaga moli. He magaaho ka fakaalofa a tautolu e taha ke he taha, kua fakaata e tautolu e magaaho ke tutala mo e ke fanogonogo. Kua fakamalolo a tautolu mo e lagomatai a tautolu. Ko e lauiaaga nei he mahani fakaagaga kua putoia ai e matutakiaga mitaki ue atu he vahaloto he tau hoa mo e vahaloto he tau mamatua mo e tau fanau.b Kua lata ke fai magaaho mo e fakailoilo he toho mai e tautolu e taha mo e taha ke moua e fakalatahaaga he ha tautolu a olioli, mouiaga, mo e tau mena vihi.​—1 Korinito 13:4-8; Iakopo 1:19.

18. (a) Ko e heigoa e mena ne fa kaupa aki e matutakiaga? (e) Kua ati hake fefe e tau fakafetuiaga kua fai kakano?

¹⁸ Ko e matutakiaga mitaki kua lata ke ha ha i ai e magaaho mo e laliaga. Ko e kakano ke fakatoka e taha magaaho ke tutala mo e fanogonogo ke he taha mo e taha. Ko e taha malolo lahi mahaki ke he mena nei, ko e fakamole magaaho ne taofi e tuaga lilifu he loga he tau kaina​—ko e tivi. Ko e hauaga hanei he palekoaga​—pule kia e tivi ki a koe, po ke pule a koe ki ai? Ko e pule ke he tivi kua lata ke ha ha i ai e taofiaga malolo​—fakalataha mo e malolo he loto ke tamate ai. Ka taute pihia to hafagi e puhala ma tautolu ke feiloaaki e taha tuga ko e tau tagata he magafaoa mo e tuga e tau matakainaga tane mo e fifine fakaagaga. Ko e tau fakafetuiaga kakano lahi kua lata ke fai matutakiaga mitaki, taute ai ke maama e taha mo e taha, ko e ha tautolu a manako mo e olioli he tala age ke he taha mo e taha ko e lahi fefe e fakaaue ha tautolu ke he tau faga mena oti ne kua taute ma tautolu. Ke he falu kupu, ko e fakatutalaaga mua ue atu kua fakakite kua nakai ko e mena noa ni e falu ki a tautolu.​—Fakatai 31:28, 29.

19, 20. Ka fakaalofa a tautolu ke he magafaoa oti ha tautolu, ko e heigoa ha tautolu ka taute?

¹⁹ Ko e mena ia, kaeke ke fakaalofa a tautolu ke he taha mo e taha ke he fakatokaaga he magafaoa​—mo e putoia ai foki e fakaalofa ke he tau tagata he magafaoa nakai tua​—to taute e tautolu e lahi he ati hake mo e fakatumau e ha tautolu a mahani fakaagaga. Ke he fakatokaaga he magafaoa, to muitua a tautolu ke he fakatonuaga ha Peteru: “Ko e fakahikuaga hanai, kia loto fakalataha a mutolu oti, kia feofanaki, kia fakaalofa ke he tau matakainaga, kia hofihofi noa e fakaalofa, kia mahani totonu, Aua neke taui atu e kelea ke he kelea, po ke amuamu ke he amuamu; ka kia fakamonuina atu e mutolu, ha kua iloa ko e mena ia ne ui ai a mutolu, kia moua e mutolu e monuina.”​—1 Peteru 3:8, 9.

²⁰ Kua maeke ke moua e tautolu e tau monuina ha Iehova he magaaho nei kaeke ke fakamalolo a tautolu ke fakatumau ha tautolu a mahani fakaagaga, mo e maeke e mena nei ke gahua atu ke huhu atu a tautolu ke he hana a fakamonuinaaga he vaha i mua he magaaho ka moua e tautolu e mena fakaalofa ko e moui tukulagi ke he lalolagi parataiso. Ha ha i ai e falu mena kua maeke ia tautolu ke taute fakamagafaoa ke lagomatai e taha mo e taha fakaagaga. Ko e tala ka hau ka fakatutala a tautolu ke he tau fua he taute auloa e tau mena ko e magafaoa.​—Luka 23:43; Fakakiteaga 21:1-4.

[Tau Matahui Tala]

Manatu Nakai e Koe?

◻ Ko e heigoa e mahani fakaagaga?

◻ Fakafifitaki fefe he ulu pule e fakataiaga ha Keriso?

◻ Maeke fefe ia tautolu ke kalo kehe mai he tau fakamatakutaku ke he ha tautolu a mahani fakaagaga?

◻ Ko e heigoa e mena ke maeke ke uta kehe e mahani fakaagaga he magafaoa?

◻ Ko e ha e matutakiaga kua fai kakano lahi mahaki?

[Fakatino he lau 12]

O atu ke he Fakaako Tohi he Fakapotopotoaga kua fakalaulahi ki mua e mahani fakaagaga he magafaoa