Mouaaga he Kei ke he Fakaalofa Hohofi Fakamatakainaga
“Kia lafilafi atu ke he ha mutolu . . . a mahani-Atua fakamoli e fakaalofa hohofi fakamatakainaga.”—2 PETERU 1:5-7, NW.
1. Ko e heigoa e taha mai he tau matapatu kakano he tau fakapotopotoaga he tau tagata a Iehova ati fiafia lahi ai?
KE HE taha magahala ne fai ekekafo ne nakai ko e Fakamoli a Iehova ne fakalataha atu ke he tukuaoga he hana tama fifine mai he Aoga Tohi Tapu he Kolo Toko a Kiliata, ne fakaako a ia ke he gahua misionare. Ne mailoga lahi e ia e fiafia he fakapotopotoaga ti pehe e talahauaga hana ko e liga tote lahi e gagao ke he tau tagata ia. Ko e heigoa ati fiafia lahi ai e fakapotopotoaga ia? Ke he mena nei, ko e heigoa ati fiafia oti ai e tau lafiaga he tau tagata a Iehova, ke he tau fakapotopotoaga, tau toloaga he takaiaga mo e tau fonoaga fahi motu? Nakai kia ko e fakaalofa hohofi fakamatakainaga ne fefakakiteaki e lautolu? Ne nakai fai fakauaua, ko e fakaalofa hohofi fakamatakainaga e taha kakano ati pihia ai ko e nakai fai matakau lotu ne moua lahi e olioli, fiafia mo e mamakonaaga mai he lotu ke tuga e Tau Fakamoli a Iehova.
2, 3. Ko e heigoa e tau kupu Heleni ua ne fakakite mai kua lata ke fefe ha tautolu a tau logona ke he taha mo e taha mo e ko e heigoa e tau kehekeheaga ha laua?
2 Kua lata a tautolu ke amanaki ke kitia e fakaalofa hohofi fakamatakainaga pihia ke tuga e tau kupu ha Peteru ia 1 Peteru 1:22: “Kua fakamea tuai e mutolu ha mutolu a tau loto he omaoma a mutolu ke he kupu moli, . . . kua hoko ke he [“fakaalofa hohofi fakamatakainaga,” NW], fakamoli ko e e mena ia kia feofanaki fakalahi ai a mutolu mai he loto mea.” Taha mai he tau fakaveaga he kupu Heleni nei ne talahau pehe “fakaalofa hohofi fakamatakainaga” ko e phi·liʹa (fakaalofa hohofi). Ne tata lahi hana a kakano ke he kakano he a·gaʹpe, ko e kupu fa mahani ke fakaliliu ko e “fakaalofa.” (1 Ioane 4:8) Ko e mena fa mahani ke fakaaoga e fakaalofa hohofi fakamatakainaga mo e fakaalofa ke fehikiaki, ne ha ha ia laua e tau kakano kehekehe. Kua nakai lata a tautolu ke fehikitaki a laua nei, ke tuga ne taute he tokologa ia lautolu ne fakaliliu e Tohi Tapu. (I loto he tala nei mo e ke he taha ne mui mai, to taute takitokotaha e mautolu e tau kupu nei.)
3 Hagaao ke he fekehekeheaki he tau kupu Heleni ua nei, taha e tagata fakaako tokoluga ne mailoga ko e phi·liʹa ko e “kupu pauaki ne ha ha i ai e mafanatia mo e fetataaki mo e fakaalofa hohofi.” Ka ko e taha fahi, ko e a·gaʹpe ne mamafa ia ke he loto. Ko e mena haia ne talahau mai ki a tautolu ke fakaalofa (a·gaʹpe) ke he ha tautolu a tau fi, ka e nakai fakaalofa hohofi a tautolu ki a lautolu. Ko e ha ne nakai ai? Kakano ha “ko e feoaki mo lautolu kua mahani kelea kua kelea ai e tau mahani mitaki.” (1 Korinito 15:33) Ko e taha mailogaaga foki ko e fai kehekeheaga ke he tau kupu he aposetolo ko Peteru: “Kia lafilafi atu ke he ha mutolu a . . . fakaalofa hohofi fakamatakainaga e fakaalofa.”—2 Peteru 1:5-7, NW; fakatatai Ioane 21:15-17.a
Tau Fakataiaga he Fakaalofa Hohofi Fakamatakainaga Pauaki
4. Ko e ha a Iesu mo Ioane ne ha ha ia laua e fakaalofa hohofi pauaki he taha ke he taha?
4 Ne foaki mai he Kupu he Atua e loga he tau fakataiaga mitaki he fakaalofa hohofi fakamatakainaga pauaki. Ko e fakaalofa hohofi pauaki nei ne nakai moua mai ha ko e ha manatu moua ni mogoia ka ko e fakave ni ke he fakaaue ke he tau mahani mitaki muaatu. Ne nakai fai fakauaua ke he fakataiaga talahaua, ko e fakaalofa hohofi ha Iesu Keriso ma e aposetolo ko Ioane. Ne nakai fai huhu, ne ha ha ia Iesu e fakaalofa hohofi fakamatakainaga ma e hana a tau aposetolo fakamoli oti, mo e ha ha i ai e kakano mitaki. (Luka 22:28) Taha e puhala ne fakakite e ia e mena nei ko e holoholo he ha lautolu a tau hui, ti foaki age ki a lautolu e fakaakoaga he mahani fakatokolalo. (Ioane 13:3-16) Ka e ha ha ia Iesu e fakaalofa hohofi pauaki ma Ioane, ne fa talahau tumau e Ioane. (Ioane 13:23; 19:26; 20:2) Tuga ne ha ha ia Iesu e kakano ne fakakite e ia e fakaalofa hohofi ma e hana a tau tutaki mo e hana a tau aposetolo, ti liga foaki foki e Ioane ki a Iesu e kakano mitaki ke ha ha i ai e hohofi fakaalofa pauaki ki a ia kakano ni ha ko e hokulo e fakaaue hana ma Iesu. Kitia e tautolu e mena nei mai he tau tohi ha Ioane, moua mai ua he hana a Tohi Evagelia mo e hana a tau tohi mai he agaga. Ne fa talahau tumau e ia e fakaalofa he tau tohi ia! Ko e fakaaue lahi ha Ioane ke he tau mahani fakaagaga ha Iesu ne kitia ke he tau mena ne tohi e ia he Ioane veveheaga 1 mo e 13 ke he 17, ti pihia foki mo e tau mena ne tohi ti liu fatiaki e ia hagaao ke he moui fakaagaga fakamua ha Iesu.—Ioane 1:1-3; 3:13; 6:38, 42, 58; 17:5; 18:37.
5. Ko e heigoa e talahauaga hagaao ia ke he fakaalofa hohofi pauaki ne ha ha ia Paulo mo Timoteo ke he taha mo e taha?
5 Ko e mena taha nei ni ne kua nakai lata ia tautolu ke nakai mailoga e fakaalofa hohofi fakamatakainaga pauaki ne ha ha he aposetolo ko Paulo mo e hana a kapitiga Kerisiano ko Timoteo, ne kua fakave aki e fefakaaue aki ke he ha laua a tau mahani. Ne ha ha he tau tohi ha Paulo e tau talahauaga mitaki hagaao ki a Timoteo, tuga a nei: “Ha kua nakai fai tagata au kua loto fakalataha mo au, ke manamanatu fakamoli a ia ke he tau mena ha mutolu. . . . Ka kua iloa e mutolu hana fakamoli, ne fekafekau a ia fakalataha mo au ha ko e tala mitaki, tuga ne tama ke he matua tane hana.” (Filipi 2:20-22) Loga e tau tala he tau tohi hana hagaao ki a Timoteo ne fakakite aki e mafanatia he fakaalofa hohofi ha Paulo ma Timoteo. Tuga a nei, ne mailoga ke he 1 Timoteo 6:20: “Timoteo na e, kia taofi e koe ke he mena ne tuku atu kia koe.” (Kikite foki 1 Timoteo 4:12-16; 5:23; 2 Timoteo 1:5; 3:14, 15.) Ka e mua atu ka fakatatai e tau tohi ha Paulo ki a Timoteo mo e hana a tohi ki a Tito kua pehi mai e fakaalofa hohofi pauaki ha Paulo ma e fuata tane nei. Liga tatai ni e logonaaga ha Timoteo ke he ha laua a fekapitigaaga, tuga ne maeke ke mailoga ke he tau kupu ha Paulo he 2 Timoteo 1:3, 4: “Ti kua manatu e au a koe nakai noa ke he haku a tau liogi . . . Kua manako lahi au ke kitia a koe, ha kua manatu e au hau a tau hihina mata, kia puke ai au ke he fiafia.”
6, 7. Ko e heigoa e tau logonaaga ha Tavita mo Ionatana ke he taha mo e taha, mo e ko e ha?
6 Ne ha ha i ai foki e tau fakataiaga mitaki ke he tau Tohiaga Tapu Heperu, tuga ia ha Tavita mo Ionatana. Ne totou e tautolu e mena nei he mole atu e keli e Tavita a Koliata, “ti pipiki taha ai e loto a Ionatana ke he loto a Tavita, ti fakaalofa atu a Ionatana kia ia, tuga ne fakaalofa a ia kia ia ni.” (1 Samuela 18:1) Ko e fakaaueaga ke he fakataiaga he fakamakutu ha Tavita ma e higoa a Iehova mo e hana a nakai matakutaku he finatu ki mua ke feleveia mo e tupua ko Koliato ne kua nakai fai fakauaua kua fakatupu ai a Ionatana ke fakaalofa hohofi pauaki ki a Tavita.
7 Ne ha ha ai foki ia Ionatana e fakaalofa hohofi nei ma Tavita ti fakahagahaga kelea e ia hana a moui he lalago ki a Tavita mai he Patuiki ko Saulo. Ne nakai fai magaaho ne ita a Ionatana ha kua fifili e Iehova a Tavita ke patuiki ha Isaraela. (1 Samuela 23:17) Ne ha ha foki ia Tavita e fakaalofa hohofi hokulo pihia ki a Ionatana, ne kua fakamoli ai ke he hana vagahau he maanu ke he mateaga ha Ionatana: “Kua mamahi au ha ko koe haku matakainaga na e, ma Ionatana; ne fiafia lahi au kia koe, ko e fakaalofa hau kia au ko e mena ke ofo ai haia, ne mua ni ke he fakaalofa he tau fifine.” Ko e moli, ko e matila he fakaaueaga ne pite ke he ha laua a fakafehagaiaga.—2 Samuela 1:26.
8. Ko hai e tau fifine tokoua ne fakakite e fakaalofa hohofi pauaki ke he taha mo e taha, mo e ko e ha?
8 Ne ha ha i ai foki ia tautolu e fakataiaga mitaki ke he tau Tohiaga Tapu Heperu he fakaalofa hohofi pauaki he tau fifine tokoua, ko Naumi mo e hana tama fugavai, takape ko Ruta. Fakamanatu e tau kupu ha Ruta ki a Naumi: “Aua neke ole mai a koe kia au ke toka a koe, ke ua mui atu au kia koe; ha ko e mena ke fano a koe ki ai, to fano ai ni au, ko e mena ke nofo ai a koe to nofo ai au, to eke e motu hau mo motu haku, to eke e Atua hau mo Atua haku.” (Ruta 1:16) Ti nakai kia fakaoti e tautolu, ko e mahani ha Naumi mo e hana a vagahau ki a Iehova, ne lagomatai ke fakalagalaga hake e tali fakaaue nei ha Ruta?—Fakatatai Luka 6:40.
Ko e Fakataiaga he Aposetolo ko Paulo
9. Ko e heigoa e fakakiteaga ko Paulo e fakataiaga mitaki ke he fakaalofa hohofi fakamatakainaga?
9 Tuga ne kua kitia e tautolu, ne ha ha he aposetolo ko Paulo e fakaalofa hohofi fakamatakainaga pauaki ma Timoteo. Ka e foaki mai foki e ia e fakataiaga mua atu he mitaki he fakakite e ia e mafanatia he fakaalofa hohofi fakamatakainaga ma e hana a tau matakainaga oti. Ne tala age e ia ke he tau momotua i Efeso “ne tolu la e tau nakai okioki [a ia] ke he po mo e aho he tomatoma atu mo e tau hihina mata ke he tau tagata takitokotaha.” Ko e mafanatia he fakaalofa hohofi fakamatakainaga? Ne nakai fai fakauaua ke he mena nei! Ne tatai ne logonaaga ha lautolu ki a Paulo. Ke he magaaho ne logona e lautolu to nakai liu a lautolu ke kitia a ia, “ne tagi lahi a lautolu oti kana, mo e peka kia Paulo, mo e taufigita kia ia.” (Gahua 20:31, 37) Fakaalofa hohofi fakamatakainaga kua fakave aki kia e fakaaue? E! Ko e hana a fakaalofa hohofi fakamatakainaga ne kitia foki ke he hana a tau kupu he 2 Korinito 6:11-13: “Ko mutolu ko e tau tagata Korinito na e, kua fakamaga atu ha mautolu a tau gutu kia mutolu, kua fakalahi ha mautolu a tau loto kia mutolu. Nakai ko mautolu kua apitia ai a mutolu, ka ko e tau loto [“fakaalofa hohofi,” NW] ha mutolu kua apitia ai a mutolu. (Kua vagahau atu au kia mutolu tuga haku a fanau,) kia fakalahi mai ha mutolu a tau loto ke taui mai ai.”
10. Ko e heigoa e kaumahala he fakaalofa hohofi fakamatakainaga ne takitaki atu a Paulo ke talahau hana a tau mena uka ia 2 Korinito veveheaga 11?
10 Ne mahino mitaki, ne nakai ha ha he tau tagata tokologa i Korinito e fakaaue ke he fakaalofa hohofi fakamatakainaga ma e aposetolo ko Paulo. Ko e mena haia ne fegugu ai e falu: “Kua mamafa hana a tau tohi mo e malolo, ka ko e hana a tino kua ha i ai e lolelole, mo e hana kupu kua fakateaga ia.” (2 Korinito 10:10) Ko e mena haia ne tohi ai a Paulo ke he ha lautolu a tau “aposetolo mitaki lahi mahaki” mo e fakaholo atu a ia ke talahau hana a tau matematekelea ne fakauka ki ai, ne fakamau he 2 Korinito 11:5, 22-33 (NW).
11. Ko e heigoa e fakamoliaga hagaao ke he fakaalofa hohofi ha Paulo ke he tau Kerisiano i Tesalonia?
11 Ko e fakaalofa hohofi mafanatia ha Paulo ki a lautolu ne fekafekau a ia ki ai kua mahomo atu he fakamoli mai he hana a tau kupu he 1 Tesalonia 2:8: “Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu.” Ko e moli, ne ha ha ia ia e fakaalofa hohofi ke he tau matakainaga fou nei ti nakai maeke a ia ke fakatali ke iloa e malolo ha lautolu—ne manako lahi a ia ke iloa ko e fakauka fefe a lautolu ke he tau matematekelea—ti fakafano e ia a Timoteo, ne tamai e hokotakiaga mitaki ti lahi e fakamaloloaga ki a Paulo. (1 Tesalonia 3:1, 2, 6, 7) Mitaki e onoonoaga he Insight on the Scriptures: “Ne ha ha i ai e pipiaga fetataaki he fakaalofa hohofi fakamatakainaga ha Paulo mo lautolu ne fekafekau a ia ki ai.”
Fakaaueaga—Ko e Kei ke he Fakaalofa Hohofi Fakamatakainaga
12. Ko e heigoa e tau kakano ke fakakite e tautolu e fakaalofa hohofi mafanatia ke he ha tautolu a tau matakainaga?
12 Ne nakai fai fakauaua, ko e kei ke he fakaalofa hohofi fakamatakainaga ko e fakaaueaga. Nakai kia ha ha he tau fekafekau oti a Iehova ne tukulele a Iehova e tau mahani mitaki ne fakaaue a tautolu ki ai, mo e fakalagalaga mai ha tautolu a fakaalofa hohofi, ti maeke ia tautolu ke fiafia ki a lautolu? Kua kumi fakamua e tautolu oti e Kautu he Atua mo e hana tututonu. Totoko fakalahi oti a tautolu ke he tolu e fi ne fa mahani mau a tautolu ki ai: Satani mo e hana a tau temoni, ko e lalolagi matahavala ne pule ki ai a Satani, mo e tau mahani lotokai ne moua mai he agahala he tino. Nakai kia lata ia tautolu ke tu he tuaga ko e tau matakainaga ha tautolu hane fa e gahua a lautolu fakamakamaka pete ni he pihia e tau tutuaga? Ko e tau tagata oti he lalolagi, ko e tutu ke he fahi a Iehova po ke fahi ha Satani. Kua ha ha e ha tautolu a tau matakainaga tane mo e tau fifine tukulele he fahi a Iehova, e, fahi ha tautolu, ti kua lata ke moua ai ha tautolu a fakaalofa hohofi fakamatakainaga.
13. Ko e ha kua lata ia tautolu ke mafana e fakaalofa hohofi ke he tau momotua?
13 Ka e kua e fakaaueaga ke he ha tautolu a tau momotua? Nakai kia kua lata ke fai mafanatia mai he ha tautolu a tau loto ma lautolu ha ko e ha lautolu a tau gahua uka ke lata mo e fakapotopotoaga? Ke tuga a tautolu oti, kua lata na lautolu ke leveki ne lautolu a lautolu mo e ha lautolu a tau magafaoa. Ha ha i ai foki ia lautolu e tau matagahua tuga ne taute e tautolu oti ke taute e kumikumi fakatagata, o atu ke he tau feleveiaaga he fakapotopotoaga, mo e taute auloa e fakamatala ke he fonua. Ke lafi atu foki ki ai, ha ha ia lautolu e matagahua ke tauteute e tau vala he fakaholoaga he tau feleveiaaga, taute e tau lauga, mo e leveki atu ke he tau mena vihi ka tupu mai he fakapotopotoaga, ti he falu magaaho kua putoia e tau matahola ke he tau logonaaga fakafili. Ko e moli, kua manako a tautolu ke “fakahelehele foki e mutolu a lautolu kua pihia.”—Filipi 2:29.
Fakakite e Fakaalofa Hohofi Fakamatakainaga
14. Ko e tau tohiaga tapu fe ne poaki mai ki a tautolu ke fakakite e fakaalofa hohofi fakamatakainaga?
14 Ke fakafiafia a Iehova, kua lata ia tautolu ke fakakite e mafana he fakaalofa hohofi fakamatakainaga ma e tau matakainaga he tua, tuga ne fakakite e Iesu Keriso mo Paulo. Ne totou e tautolu: “Ke he [fakaalofa hohofi fakamatakainaga] kia mahofihofi e loto he taha ke he taha.” (Roma 12:10, Kingdom Interlinear) “Ka e nakai aoga ke tohi atu kia mutolu ha kupu ke he [fakaalofa hohofi fakamatakainaga]; ha kua ako tuai a mutolu he Atua he feofanaki.” (1 Tesalonia 4:9, fakatatai Int) “Kia tumau e [fakaalofa hohofi fakamatakainaga].” (Heperu 13:1, fakatatai Int) Ko e moli to fiafia e Matua ha tautolu he lagi ka fakakite e tautolu e fakaalofa hohofi fakamatakainaga ma e hana a tau fanau he lalolagi!
15. Ko e heigoa e falu puhala ke fakakite aki e fakaalofa hohofi fakamatakainaga?
15 Ke he vaha he tau aposetolo ne fa mahani e tau Kerisiano ke fakafeleveia aki e “figita tapu” po ke “figita fakaalofa.” (Roma 16:16; 1 Peteru 5:14) Ko e fakakiteaga moli he fakaalofa hohofi fakamatakainaga! Ke he vaha nei, ke he laulahi he lalolagi ko e fakakiteaga kua lata, ko e mamali kapitiga fakamoli mo e fakaalofa lulu he tau lima. Ke he tau motu Latini, tuga a Mesiko, ne fakafeleveia aki e kuku fakamalaga, ko e fakakiteaga he fakaalofa hohofi moli. Ko e mafana he fakaalofa hohofi nei he tau matakainaga ne liga lagomatai e tupu lahi kua ha he tau motu ha lautolu.
16. Ha e fe e tau magaaho ke fakakite e tautolu e fakaalofa hohofi fakamatakainaga ke he ha tautolu a Fale he Kautu?
16 Ke he magaaho ka huhu atu a tautolu ke he Fale he Kautu, fa lali fakalahi nakai a tautolu ke fakakite e fakaalofa hohofi fakamatakainaga? To maeke ke fakatupu he mena ia a tautolu ke talahau e tau kupu fefakamaloloaki, mua atu ki a lautolu ne tuga kua fakaatukehe. Ne talahau mai ki a tautolu ke “kia vagahau fakamafana ke he tau solu ne loto fakaagitau.” (1 Tesalonia 5:14, NW) Ko e taha na puhala moli a ia ne maeke ia tautolu ke fakakite e mafanatia he fakaalofa hohofi fakamatakainaga. Ko e taha puhala mitaki foki ke fakakite e fakaaue ke he lauga mitaki ma e tau tagata , ko e taha vala he fakaholoaga ne mitaki e fakatokatokaaga, ko e mitaki he laliaga he tagata fakaako ne lauga he Aoga Fekafekau Pule he Atua, mo e falu atu foki.
17. Moua fefe he taha motua e fakaalofa hohofi he fakapotopotoaga?
17 Ai kua e uiina e falu ke he ha tautolu a tau kaina ke kai auloa, po ke kai tote ka oti e feleveiaaga kaeke kua nakai puga? Nakai kia lata ia tautolu ke toka e tau fakatonuaga ha Iesu he Luka 14:12-14 ke pule? Ko e taha magahala ko e misionare fakamua ne kotofa mo leveki pule he fakapotopotoaga ne ha ha i ai e tau matakainaga lanu kehekehe. Ne logona e ia e nakai ha ha i ai e fakaalofa hohofi fakamatakainaga, ti taute e ia e taha fakatokatokaaga ke fakahako aki e mena ia. Puhala fefe? Ke he tau aho Tapu kehekehe oti ne uiina e ia e tau magafaoa kehekehe ke kai auloa. Ke he fakaotiaga he tau, kua fakakite oti e lautolu e fakaalofa hohofi fakamatakainaga ki a ia.
18. Maeke fefe a tautolu ke fakakite e fakaalofa hohofi fakamatakainaga ma e ha tautolu a tau matakainaga tane mo e fifine ne gagao?
18 Kaeke kua gagao e taha matakainaga tane po ke fifine, ke he loto kaina po ke fale gagao, to omoi he fakaalofa hohofi fakamatakainaga a tautolu ke fakakite ha tautolu a tau manatu fakaalofa ki ai. Po ke ai kua a lautolu ne nonofo ke he tau kaina leveki? Ko e ha ne nakai ahi atu ki ai, hea he telefoni ki ai, po ke fakafano e tohi ne fakakite ai e tau manatu fakamafana?
19, 20. Fakakite fefe e tautolu kua fakalaulahi atu ha tautolu a fakaalofa hohofi fakamatakainaga?
19 Ka foaki atu e tau fakakiteaga he fakaalofa hohofi fakamatakainaga, maeke ia tautolu ke huhu hifo, ‘Fakamailoga tagata nakai haku a fakaalofa hohofi fakamatakainaga? Maeke nakai he tau vahega mena tuga e tau lanu he tau kili, tau fakaakoaga, po ke tau mena moua he tino ke fai malolo ke he fakakiteaga he haku a fakaalofa hohofi fakamatakainaga? Kua lata nakai ia au ke fakalaulahi atu ke he haku a fakaalofa hohofi fakamatakainaga, tuga ne fakamalolo he aposetolo ko Paulo ke taute he tau Kerisiano i Korinito?’ Maeke he fakaalofa hohofi fakamatakainaga ke mitaki ha tautolu a tau onoonoaga ke he tau matakainaga, fakaaue ke he ha lautolu a tau puhala mitaki. Maeke foki he fakaalofa hohofi fakamatakainaga ke lagomatai a tautolu ke fiafia ke he holo ki mua he ha tautolu a tau matakainaga ka e nakai mahekeheke ki ai.
20 Ko e fakaalofa hohofi fakamatakainaga ke maeke foki ia tautolu ke mataala ke lagomatai ha tautolu a tau matakainaga ke he gahua fakamatala. Kua lata ke tuga he tuku mai he taha lologo ha tautolu (Numera 92):
“Foaki e lagomatai totonu ki a lautolu ne lolelole,
Ke ha ha ia lautolu e malolo ke maeke ke vagahau.
Kia nakai tiaki a lautolu ne ikiiki,
Lagomatai a lautolu ke tupu malolo mo e nakai ha ha ia lautolu e matakutaku.”
21. Ko e heigoa e tau mena kua amaamanaki a tatuolu ke fakataulata aki ha tautolu a fakaalofa hohofi fakamatakainaga?
21 Ti aua neke fakanimo ko e fakakiteaga he fakaalofa hohofi fakamatakainaga, ko e matapatu fakaokoaga ne talahau e Iesu he hana Lauga he Mouga ka fakagahua: “Kia foaki atu e mutolu, ti foaki mai ai kia mutolu; to foaki mai e lautolu ke he tapulu ha mutolu ko e fafatiaga mitaki, kua fofota mo e lulululu ai, ke puke mo e puā ki tua. Ha ko e fafati ke fafati atu ai e mutolu, to fafati mai ai kia mutolu.” (Luka 6:38) Ne lahi e aoga ki a tautolu ni kaeke ke fakakite e tautolu e fakaalofa hohofi fakamatakainaga, he fakakite e lilifu ki a lautolu ko e tau fekafekau a Iehova ke tuga na tautolu. Ko e fiafia fakamoli a lautolu ne fiafia ke fakakite e fakaalofa hohofi fakamatakainaga!
[Tau Matahui Tala]
a Kikite ke he vala tala ka mui mai: “Fakaalofa (Agape)—Ko e Heigoa Ne Nakai mo e ko e Heigoa e Kakano Hana.”
Maeke Fefe ia Koe ke Tali?
◻ Ko e heigoa e tau kupu Heleni ne hagaao ia ke he ha tautolu a tau logonaaga mo e kehekehe fefe a laua ia?
◻ Ko e heigoa e kei ke he fakaalofa hohofi fakamatakainaga?
◻ Ko e heigoa e tau fakataiaga he Tohiaga Tapu ne ha ha ia tautolu ne hagaao ke he fakaalofa hohofi fakamatakainaga pauaki?
◻ Ko e ha ne kua lata ia tautolu ke mafana e fakaalofa hohofi ke he ha tautolu a tau matakainaga mo e tau momotua?
[Fakatino he lau 8]
Ko e aposetolo ko Peteru ne fakamalolo hana a tau matakainaga ke lafi ke he ha lautolu a fakaalofa hohofi fakamatakainaga e ha lautolu a tua mo e falu a mahani Kerisiano