Kia Loto Malolo Mitaki!
“Ke loto malolo mitaki mo e pehe: ‘Ko Iehova ko e haku a lagomatai.’”—HEPERU 13:6, NW.
1. Ko e heigoa e loto toa ne fakatata e lautolu ne iloa e kupu moli he Atua he senetenari fakamua V.N.?
KO E senetenari fakamua he Vaha Nei ha tautolu. Ne hau ai e Mesia kua leva e fakatali ki ai. Ne fakaako fakamitaki e ia hana tau tutaki mo e kua kamata e gahua aoga lahi ko e fakamatala. Ko e magaaho kua hoko ma e tau tagata ke logona e tala mitaki ke he Kautu he Atua. Ko e mena ia, ko e tau tane mo e tau fifine ne iloa e kupu moli kua fakailoa mo e tau loto toa e fekau fulufuluola ia.—Mataio 28:19, 20.
2. Ko e ha e Tau Fakamoli a Iehova ne kua lata ai ke loto malolo he vaha nei?
2 Ne nakai fakatu e Kautu he magahala ia. Ka ko e Patuiki-Fifili, ko Iesu Keriso, ne perofeta e ia hagaao ke he hana ha ha hinai nakai kitia he vaha i mua ke he malolo he Kautu. To fakamailoga ai he tau mena tuga e tau felakutaki nakai fai fakatataiaga, hogeia e tau mena kai, tau tatalu, tau mafuike, mo e fakamatala he tala mitaki ke he lalolagi oti. (Mataio 24:3-14; Luka 21:10, 11) Ha ko e Tau Fakamoli a Iehova, kua lata ia tautolu ke moua e loto malolo ke fahia ke he tau tutuaga nei mo e tau favale ne logona e tautolu. Ko e mena ia to fai aoga ke manamanatu ke he tau talahauaga he Tohi Tapu hagaao ke he tau tagata loto malolo ne fakailoa e Kautu he senetenari fakamua he V.N.
Loto Malolo ke Fifitaki a Keriso
3. Ko hai ne moua mai ai e fakataiaga mua ue atu he loto malolo, mo e ko e heigoa ne talahau ki a ia he Heperu 12:1-3?
3 Kua moua mai ia Iesu Keriso e fakataiaga mua atu ke he loto malolo. Mole atu e talahauaga ke he ‘aolu lahi mahaki’ he tau fakamoli loto malolo a Iehova he vaha fakamua atu he vaha Kerisiano, ne haga atu e aposetolo ko Paulo ki a Iesu mo e pehe: “Ha kua lahi mahaki tuga e tau aolu e tau tagata fakamoli kua takai mai ki a tautolu, ki a lata foki a tautolu ke tuku kehe e tau mena mamafa oti mo e agahala kua mukamuka lahi ke fakavihi aki a tautolu, mo e ki a taute a tautolu ke tafepoi mo e fakauka, ke he poitufi kua fakatoka ki mua ha tautolu, he onoono fakalahi atu a tautolu ke he Hukui Iki mo e Fakamitaki Katoatoa he tua ha tautolu, ko Iesu. Ma e loto olioli ne fakatoka ki mua ia ia ne fakauka a ia ke he akau fakakikiveka, fakafiufiu fakama, mo e kua nofo hifo he fahi matau he nofoaiki he Atua. Moli lahi, ki a manamanatu fakatata lahi atu ke he taha ko ia ne fakauka atu ke he tala kehe he tau tagata agahala kua totoko atu ni ke he ha lautolu ni a tau mena, ke nakai liga ke mategugu a mutolu mo e nakai fahia ha mutolu a tau solu.”—Heperu 12:1-3, NW.
4. Fakatata fefe e Iesu e loto malolo he magaaho ne kamatamata ai e Satani?
4 Mole atu hana papatisoaga mo e 40 e aho he manamanatu, liogi, mo e fakakanopogi ai he tutakale, ne totoko fakaloto toa atu e Iesu a Satani. Ne kamatamata he Tiapolo ke fakafaliu e tau maka mo areto, ne fakatikai e Iesu ha kua hepe ke taute e mana ke fakamakona aki e manako fakatagata. “Kua tohi,” he talaage e Iesu, “Nakai ko e tau mena kai hokoia ke moui ai ha tagata, ka ko e tau kupu oti ne to mai he fofoga he Atua.” Ko e magaaho ne paleko ai e Satani a ia ke hopo hifo he tapitapi kaupa he faituga, ne fakatikai e Iesu ha ko e agahala a ia ke kamatamata e Atua ke fakahao a ia mai he taupega fakaohooho. “Kua tohi foki,” he tala age e Keriso, “Ua kamatamata a koe ke he Iki hau a Atua.” Ne foaki age oti e Satani ki a ia e tau kautu he lalolagi ma e taha maka e mena ‘ko e hufeilo,’ ka e nakai maeke ia Iesu ke eke mo tagata tiaki taofiaga mo e lagomatai e paleko he Tiapolo ne pehe ko e nakai fai tagata ke tumau e tua ke he Atua ka kamatamata. Ti fakailoa e Iesu: “Fano kehe, ma Satani! Ha kua tohia mai, ‘Ko Iehova ni ko e hau a Atua kua lata a koe ke tapuaki ki ai, mo e ki a ia ni hokoia kua lata a koe ke tuku atu e fekafekauaga tapu.’” Ke he mena ia, ko e tagata Kamatamata ne “fano kehe a ia ia ia, ato hoko ke he taha aho.”—Mataio 4:1-11, fakatatai NW; Luka 4:13.
5. Ko e heigoa ne maeke ke lagomatai aki a tautolu ke totoko e tau kamatamata?
5 Ko Iesu ne omaoma a ia ki a Iehova mo e totoko ki a Satani. Kaeke ke ‘omaoma pihia a tautolu ke he Atua mo e totoko e Tiapolo, to hola kehe a ia ia tautolu.’ (Iakopo 4:7) Ke tuga a Iesu, to maeke ia tautolu ke loto malolo ke totoko ke he tau kamatamata kaeke kua fakagahua e tau Tohiaga Tapu, mo e liga liu fatiaki mai foki e tau mena ia he magaaho ka kamatamata mai ki a tautolu ke taute taha mena agahala. To liga maeke moli kia a tautolu ke fakalolelole ke he kamatamata ke taute e mahani kaiha he falu a magaaho, kaeke kua liu fatikai hifo ni e tautolu ki a tautolu e fakatufono he Atua: “Aua neke kaiha a koe”? Kua liga kia e tau Kerisiano tokoua ke kaumahala ke he mahani feuaki, kaeke ke taha ia laua kua loto malolo ke fatiaki mai e tau kupu nei: “Aua neke faivao a koe”?—Roma 13:8-10; Esoto 20:14, 15.
6. Maeke fefe a Iesu ke eke mo tagata loto malolo ne kautu ke he lalolagi?
6 Ha kua vihiatia he lalolagi nei e tau Kerisiano, kia tiaki e tautolu hana agaga mo e tau puhala agahala. Ne tala age a Iesu ke he hana tau tutaki: “I loto he lalolagi kua ha ha ki a mutolu e matematekelea lahi, ka e kia loto malolo! Kua kautu a au ke he lalolagi.” (Ioane 16:33, NW) Ne kautu a ia ke he lalolagi ha kua nakai tuga a ia. Ko e hana tau fakataiaga ha ko e tagata kua kautu mo e ko e fua he hana puhala he taofi e mahani hakohako kua maeke ke fakapuke a tautolu ke he malolo ke fifitaki a ia ke vevehe kehe tumau mai he lalolagi mo e ua fakakelea mai i ai.—Ioane 17:16.
Loto Malolo ke Matutaki Atu e Fakamatala
7, 8. Ko e heigoa ka lagomatai aki a tautolu ke tumau ke he gahua fakamatala pete ni kua hohoko e tau favaleaga?
7 Ko Iesu mo e hana tau tutaki ne falanaki ni ke he Atua ma e loto malolo ke matutaki atu e fakamatala pete he feleveia mo e tau favaleaga. Ne fakamoli mo e fakamalolo e Keriso hana fekafekauaga pete he feleveia mo e tau favaleaga, ti mole atu e Penetekoso 33 V.N., ko e hana tau tutaki ne favale ki ai ne fakatumau ke fakapuloa e tala mitaki pete ni he lali e tau takitaki lotu Iutaia ke taofi a lautolu. (Gahua 4:18-20; 5:29) Ne liogi e tau tutaki: “[“Ma Iehova,” NW] na e, kia kitekite a koe ke he fakamatakutaku mai ha lautolu; mo e foaki mai e koe ke he hau a tau fekafekau, kia talahau atu e lautolu hau a kupu mo e fakamalolo ni.” Mo e ko e heigoa e mena ne tupu? “Kua mole atu ha lautolu a liogi, ati luelue ai e mena ne fakapotopoto ai a lautolu,” he talahau he tala, “kua puke foki a lautolu oti ke he Agaga Tapu, kua talahau atu e kupu he Atua mo e fakamalolo.”—Gahua 4:24-31.
8 Ha ko e laulahi he tau tagata he vaha nei kua nakai fanogonogo ke he tala mitaki, ko e fakamalolo kua lata tonu ke fakamatala tumau ki a lautolu. Mua atu he tau magaaho ka favale ki ai, kua lata e tau fekafekau a Iehova ke moua e loto malolo ne foaki mai he Atua ke maeke ke hahamo fakamitaki e gahua fakamatala. (Gahua 2:40; 20:24) Ti ko e tagata loto malolo he fakailoa he Kautu ko Paulo ne tala age ke he hana kaugahua fuata lahi, ne nakai la mahani lahi ki ai: “Ha ko e mena nakai foaki mai he Atua kia tautolu e Agaga ke matakutaku ai, ka kia fakamalolo ai, mo e fakaalofa ai, mo e akonaki atu ai. Hanai, aua neke mā a koe ke he talahauaga ke he Iki ha tautolu, po ko au kua lili ha ko ia; ka kia mamahi fakalataha a tautolu ha ko e vagahau mitaki, ke lata mo e malolo he Atua.” (2 Timoteo 1:7, 8) Kaeke ke liogi a tautolu ma e loto malolo, to maeke ia tautolu ke tumau ke he fakamatala, mo e pihia ni ke he tau favaleaga to nakai fofo mai ia tautolu ha tautolu a olioli ha kua eke mo tau tagata fakapuloa he Kautu.—Mataio 5:10-12.
Loto Malolo ke Uta e Fahi Mo Iehova
9, 10. (a) Ko e heigoa ne taute he tau Iutaia mo e tau tagata Motu Kehe he senetenari fakamua ke maeke ke eke mo tau tutaki papatiso a Keriso? (e) Ko e ha kua lata ke loto malolo ke eke mo Kerisiano?
9 Tokologa e tau Iutaia mo e tau tagata Motu Kehe he senetenari fakamua ne tiaki e tau aga fakamotu ne nakai ha ha he tau tohiaga tapu ke eke mo tau tutaki papatiso a Keriso. Ko e magaaho ku he mole atu e Penetekoso 33 V.N., “ti kua au atu ai he tokologa e tau tutaki i Ierusalema; kua omaoma foki e tokologa he tau ekepoa ke he tua.” (Gahua 6:7) Ko e tau Iutaia ia ne moua e malolo ke moumou e tau lili fakalotu mo e talia ko e Mesia a Iesu.
10 Kamata mai he tau 36 V.N., kua tokologa e tau tagata Motu Kehe ne eke mo tau tagata talitonu. Ko e magaaho ne logona ai e Konelio, tau tagata he hana magafaoa, mo e falu tagata Motu Kehe e tala mitaki, ne talia fakaave e lautolu, ti moua e agaga tapu, mo e ne “papatiso a lautolu ke he higoa he Iki.” (Gahua 10:1-48) I Filipi ko e leoleo Motu Kehe he fale puipui mo e hana magafaoa ne talia fiafia fakaave e moui faka-Kerisiano, mo e “papatiso ai agataha a ia mo e hana magafaoa oti.” (Gahua 16:25-34) Kua lata tonu ke moua e loto malolo ke uta aki e tau lakaaga pihia ha ko e tau Kerisiano ko e tau tagata favale ki ai, matakau tokogahoa mo e nakai talahaua. Ti pihia agaia a lautolu. Ka e kaeke ke nakai la taute e koe hau a tukuleleaga ke he Atua mo e papatiso ke eke mo taha he Tau Fakamoli a Iehova, nakai kia la hoko e magaaho ma hau ke uta e tau lakaaga fakamalolo nei?
Loto Malolo i Loto he Tau Magafaoa Mavehevehe
11. Ko e heigoa e tau fakataiaga mitaki lahi ne moua mai ia Eunike mo Timoteo ke he loto malolo?
11 Ko Eunike mo e hana tama tane ko Timoteo ne fakatoka e fakataiaga mitaki lahi he tua fakamalolo i loto he tau magafaoa mavehevehe fakalotu. Pete ni ko e tane pouliuli ha Eunike, ka e fakaako e ia hana tama tane ke he tau “tohiaga tapu” mai he hana vaha tama tote. (2 Timoteo 3:14-17) Ke hoko ke he magaaho ne Kerisiano ai, ne fakakite e ia e ‘tua ne nakai ha ha i ai ha fakatupua.’ (2 Timoteo 1:5) Ne moua foki e ia e loto malolo ke tuku age e tau fakaakoaga Kerisiano ki a Timoteo mo e he magaaho taha fakakite e fakalilifu ke he ulu pule he hana tane nakai talitonu. Moli ni, ko e hana tua mo e loto malolo ne palepale ai he magaaho ne fifili ai hana tama tane fakaako fakamitaki ke fakatauo mo Paulo he hana tau fenoga misionare. Kua maeke ha he mena nei ke fakamalolo aki e tau mamatua Kerisiano ne moua a lautolu he tau tutuaga pihia!
12. Ko e heigoa e vahega tagata ne tupu hake ki ai a Timoteo, mo e ko hai a e mogonei ne fakakite fakamoli ko e tuga a ia?
12 Pete ni he nofo a Timoteo he magafaoa mavehevehe fakalotu, ne talia fakamalolo e ia e moui faka-Kerisiano mo e eke a ia mo tagata fakaagaga ha kua hagaao ki a ia ne pehe a Paulo: “Ka e amaamanaki au ke he Iki ko Iesu, ke fakafano vave e au a Timoteo kia mutolu [tau tagata Filipi], kia fakamanavalahi au ka iloa e au e tala kia mutolu. Ha kua nakai fai tagata au kua loto fakalataha mo au, ke manamanatu fakamoli a ia ke he tau mena ha mutolu. . . . Ka kua iloa e mutolu hana fakamoli, ne fekafekau a ia fakalataha mo au ha ko e tala mitaki, tuga ne tama ke he matua tane hana.” (Filipi 2:19-22) He vaha nei, tokologa e tau tama tane mo e tau tama fifine he tau kaina mavehevehe fakalotu ne talia fiafia fakaloto toa e moui faka-Kerisiano moli. Tuga a Timoteo kua foaki fakamoli e lautolu a lautolu, mo e ko e loto olioli ha a ia ha tautolu ha ko lautolu ni ko e taha vala he fakapotopotoaga a Iehova!
Loto Malolo ke ‘Tuku Hifo ha Tautolu a Tau Ua’
13. Ko e heigoa e puhala ne fakatata aki e Akula mo Pisila e loto malolo?
13 Ko Akula mo e hana hoana, ko Pisila, ne fakatoka e fakataiaga ke he fakamaloloaga he ‘tuku hifo ha laua a tau ua’ ma e matakainaga talitonu. Ne tamai e laua a Paulo ke he kaina ha laua, mo e gahua fakalataha mo ia ke taute fale ie, mo e lagomatai a ia ke fakatu hake e fakapotopotoaga fou i Korinito. (Gahua 18:1-4) Ke he 15 e tau tau ne nonofo kapitiga ai a lautolu, ne hoko foki ha laua a tau momoui ke he tuaga matematekelea ha ko ia ke he puhala nakai talahau mai. Ko laua ha i Roma he magaaho ne tala age a ia ke he tau Kerisiano i ai: “Fakaalofa atu kia Pisila mo Akula, ko laua ne gahua fakalataha mo au ke he gahua a Keriso Iesu. Ko laua ne tuku hifo ha laua a na ua ke hukui aki au, kia moui ai au; nakai ko au hokoau kua fakaaue atu kia laua, ka e katoa foki mo e tau ekalesia oti kana ke he tau motu kehe.”—Roma 16:3, 4.
14. Ke tuku hifo ha laua tau ua ma Paulo, kua gahua fakatatau ni a Akula mo Pisila ke he poakiaga fe?
14 He tuku hifo ha laua a tau ua ma Paulo, ne gahua ni a Akula mo Pisila fakatatau atu mo e tau kupu a Iesu: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu.” (Ioane 13:34) Kua “fou” e poakiaga nei, ti kua fano molea atu he fakatonuaga ke he Fakatufono faka-Mose ke fakaalofa e tagata ke he hana a katofia ke tuga na ia ki a ia ni. (Levitika 19:18) Kua poaki mai ke he fakaalofa he poa ni e ia a ia ke fano ke hoko ke he foaki he taha hana moui ma e falu, tuga ne taute e Iesu. Ko e tagata tohi tala ko Tertullian he senetenari ke ua aki mo e tolu aki V.N. ne fatiaki e ia e tau kupu he tau tagata fakalalolagi hagaao ke he tau Kerisiano he magaaho ne tohia ai e ia: “‘Kitiala,’ kua pehe a lautolu [tau tagata he lalolagi], ‘kua fakaalofa a lautolu [tau Kerisiano] ko e taha ke he taha . . . mo e kua mautali foki a lautolu ke mate e taha ma e taha.’” (Apology, chapter XXXIX, 7) Mua atu ka ha he lotouho he tau favaleaga, ne poaki mai ki a tautolu ke fakakite e fakaalofa fakamatakainaga ke fakamalolo ke tuku hifo ha tautolu a tau momoui ke maeke ke tiaki ua tuku e tau matakainaga talitonu ke he mahani vale po ke mamate ke he tau lima he tau fi.—1 Ioane 3:16.
Tamai he Loto Malolo e Olioli
15, 16. Tuga ne fakakite mai he Gahua veveheaga 16, maeke fefe e loto malolo mo e olioli ke matutaki?
15 Ko Paulo mo Sila ne moua mai ai e fakamoliaga ko e fakatata he loto malolo he lotouho he tau kamatamata kua maeke ke tamai e olioli. Ha ko e poaki he ikifakafili lahi he maaga ko Filipi, kua fahi aki e tau akau a laua ki mua he tau tagata mo e tuku ke he tau lapa tamau he fale puipui. Pete ia, ne nakai liu tua a laua ke he matakutaku. Ha kua kitia ha laua tau tutuaga mamahi, ne ha ha i ai agaia ia laua e loto malolo ne foaki he Atua mo e olioli ne tamai ai ke he tau Kerisiano tua fakamoli.
16 Liga teitei tuloto e po, ko Paulo mo Sila hane liogi mo e fakaheke e Atua ke he lologo. Ko e magaaho ia ni ne lulululu ai he mafuike e fale puipui, ne mavetevete ha laua tau lili, mo e mahafagi e tau gutuhala. Ko e leoleo fale puipui ne matakutaku lahi mo e hana magafaoa, ne tuku age ki a lautolu e fakamatala malolo mo e ko e mena haia ne takitaki atu a lautolu ke he ha lautolu a papatisoaga ke eke mo tau fekafekau a Iehova. Ko ia ni ne “loto olioli lahi mahaki a ia mo e hana magafaoa oti he loto kaina he mogonei ha kua talitonu a ia ke he Atua.” (Gahua 16:16-34, NW) Ko e olioli ha anei ne moua e Paulo mo Sila! Ha kua manamanatu ke he mena nei mo e falu he tau fakataiaga Tohiaga Tapu ke he loto malolo, maeke fefe a tautolu ke tumau e fakamalolo ke eke mo tau fekafekau a Iehova?
Fakatumau ke Eke ke Loto Malolo Mitaki
17. Tuga ne fakakite mai he Salamo 27, matutaki fefe e tatali ki a Iehova ke he loto malolo?
17 Ko e amaamanakiaga ki a Iehova ka lagomatai a tautolu ke tumau e fakamalolo. Ne lologo a Tavita: “Kia tatali atu a kia Iehova, kia fakamalolo, to fakamalolo foki e ia hau a loto; kia tatali atu ni kia Iehova.” (Salamo 27:14) Ko e Salamo 27 kua fakakite ai ne falanaki a Tavita ki a Iehova ke eke mo “taue” he hana moui. (Kupu 1) Ha kua kitia e puhala ne fehagai ai e Atua mo e tau fi a Tavita he vaha kua mole ne au atu ai hana loto malolo. (Tau kupu 2, 3) Ko e fakaaueaga ma e fale tapuaki a Iehova ko e taha matapatu mena ia. (Kupu 4) Ko e falanakiaga ke he lagomatai a Iehova, puipuiaga, mo e laveakiaga ne ati hake aki foki e loto malolo a Tavita. (Tau kupu 5-10) Ko e lagomataiaga foki, e fakatumauaga ke fakaako e tau matapatu fakaakoaga he puhala tututonu a Iehova. (Kupu 11) Ko e liogi mafanatia ma e laveakiaga mai he hana tau fi, fakapiki ua aki e tua mo e amaamanaki, ne lagomatai aki a Tavita ke fakamalolo. (Tau kupu 12-14) Kua maeke ia tautolu ke ati hake ha tautolu a loto malolo he tau puhala taha ia ni, ko e fakakiteaga a ia ko e moli kua ‘tatali a tautolu ki a Iehova.’
18. (a) Ko e heigoa ne fakakite ko e fakalataha tumau mo e tau matakainaga tapuaki a Iehova kua maeke ke lagomatai aki a tautolu ke tumau e fakamalolo? (e) Ko e heigoa e matagahua ne taute he tau feleveiaaga Kerisiano ma e ati hakeaga he loto malolo?
18 Ko e fakalatahaaga tumau mo e tau matakainaga tapuaki a Iehova kua maeke ke lagomatai aki a tautolu ke tumau e fakamalolo. Ko e magaaho ne olelalo a Paulo ki a Kaisara mo e takitaki atu ai ki Roma, ne feleveia a ia mo e tau matakainaga talitonu he Makese a Apio Foro mo Tapereno e Tolu. “Kua kitia atu e Paulo a lautolu,” he talahau he tau talahauaga ia, “ati fakaaue ai ke he Atua, mo e [“loto malolo,” NW].” (Gahua 28:15) He o tumau a tautolu ke he tau feleveiaaga Kerisiano, kua fakanogonogo a tautolu ke he fakatonuaga a Paulo: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) Ko e heigoa e kakano he fakamafana e taha ke he taha? Ko e kakano he fakamafana, ko e “ke fakalagalaga aki e loto malolo, agaga, po ke amaamanaki.” (Webster’s Ninth New Collegiate Dictionary) Kua maeke ia tautolu ke taute fakalahi ke fakalagalaga e falu Kerisiano aki e loto malolo, mo e ko e ha lautolu a fefakamafanaaki kua maeke ke ati hake pihia e mahani nei ia tautolu.
19. Matutaki fefe e tau Tohiaga Tapu mo e tau tohi fakailoa faka-Kerisiano ke he ha tautolu a tumau ke he fakamalolo?
19 Ke tumau e fakamalolo, kua lata a tautolu ke kumikumi tumau e Kupu he Atua mo e fakaaoga hana tau fakatonuaga ke he ha tautolu a tau momoui. (Teutaronome 31:9-12; Iosua 1:8) Ko e ha tautolu a kumikumi tumau kua lata ke lafi ki ai e tau tohi fakailoa faka-Kerisiano ne fakamatapatu ke he tau Tohiaga Tapu, ha ko e mena haia ne moua mai ai e tau fakatonuaga fakalatalata ke lagomatai aki a tautolu ke feleveia e tau kamatamata he tua mo e loto malolo ne foaki he Atua. Mai he tau talahauaga he Tohi Tapu, ne kitia e tautolu e tau puhala ne fakamalolo aki e tau fekafekau a Iehova he tau tutuaga kehekehe. He magaaho tonu nei, kua nakai maeke ia tautolu ke iloa ko e maeke fefe he tau fakailoaaga pihia ke lagomatai a tautolu, ka ko e Kupu he Atua kua ha ha i ai e malolo, mo e ko e tau mena ne iloa e tautolu mai i ai kua maeke tumau ke aoga ki a tautolu. (Heperu 4:12) Tuga ka fakatai, kaeke ke kamata e matakutaku tagata ke lauia ai ha tautolu a gahua fekafekau, kia manatu e tautolu e puhala ne moua aki e Enoka e loto malolo ke uta e fekau he Atua ke he tau tagata nakai mahani atua.—Iuta 14, 15.
20. Ko e ha ne pehe ai kua aoga lahi e liogi kaeke ke manako a tautolu ke tumau ko e tau fekafekau loto malolo a Iehova?
20 Ke tumau e fakamalolo ke eke mo tau fekafekau a Iehova, kua lata ia tautolu ke fakamakamaka ke he liogi. (Roma 12:12) Ne loto malolo a Iesu ke fakauka ke he hana tau kamatamata ha kua “foaki hake e tau olelalo fakalahi mo e tau ole ke he Taha ni kua maeke ke fakamoui mai a ia he mate, fakalataha mo e tau tagi fakalahi mo e tau hihina mata, mo e kua logona mo e fiafia ki a ia ma e hana matakutaku mahani atua.” (Heperu 5:7, NW) Ke nonofo fakatata ke he Atua ke he liogi, to nakai tuga e tau tagata liliu tua fakalalolagi a tautolu ne fakatoka ke lata mo e ‘mate ke ua’ ko e mena ne nakai fai liu tutu mai. (Fakakiteaga 21:8) Ko e puipuiaga Fakaatua mo e moui ke he lalolagi fou he Atua ma e hana ni a tau fekafekau fakamalolo.
21. Ko e ha e Tau Fakamoli a Iehova kua lata ai ke fakamalolo?
21 Ha ko e Tau Fakamoli a Iehova, kua nakai lata a tautolu ke matakutaku ke he tau temoni mo e tau tagata fi, ha kua ha ha ia tautolu e lagomataiaga he Atua mo e fakataiaga he loto malolo a Iesu ha ko ia ne kautu ke he lalolagi. Ko e fakalatahaaga featihake fakaagaga mo e tau tagata a Iehova ka lagomatai pihia aki a tautolu ke fakamalolo. Ko e loto malolo ha tautolu kua ati hake foki he puhala mai he takitakiaga mo e fakatonuaga he tau Tohiaga Tapu mo e tau tohi fakailoa faka-Kerisiano. Mo e tau talahauaga he Tohi Tapu ke he tau fekafekau he Atua he vaha i tuai ka lagomatai aki a tautolu ke o fakamalolo he hana tau puhala. He tau aho fakahikuhiku kelea nei, ko e mena ia, o mai a tautolu ke o atu fakaloto toa fakatekiteki ki mua he ha tautolu a fekafekauaga tapu. E, kia o mai a e tau tagata oti a Iehova ke loto malolo mitaki!
To Tali Fefe e Koe?
◻ Maeke fefe he tau fakataiaga a Iesu ke fakapuke a tautolu ke he loto malolo?
◻ Ko e heigoa ne foaki atu ki a Iesu mo e hana tau tutaki e loto malolo ke tumau e fakamatala?
◻ Ko e ha kua lata ai e tau Iutaia mo e tau tagata Motu Kehe ke loto malolo ke uta e fahi mo Iehova?
◻ Ko e heigoa e fakataiaga ke he loto malolo ne moua mai ia Eunike mo Timoteo?
◻ Ko e heigoa e fakamoliaga ne ha ha i ai ko e tamai he loto malolo e olioli pete ni ko e ha ha he vahaloto he favaleaga?
[Fakatino he lau 16]
Ke tuga a Iesu, kua maeke ia tautolu ke totoko e tau kamatamata kaeke ke fakaaoga mo e liu fatiaki e tautolu e tau Tohiaga Tapu