Falanaki ki a Iehova!

“Kia tua a koe kia Iehova mo e hāu a loto katoa.”​—TAU FAKATAI 3:5.

1. Maeke fefe e Fakatai 3:5 ke tokaloto he taha fuata tane, mo e ko e heigoa e fua ka moua ke he loga he tau aho?

KO E misionare kua leva lahi e gahua ne tohi: “‘FALANAKI KE HE IKI MO E HAU A LOTO KATOA; KA E NAKAI FALANAKI KE HE HAU NI A ILOILO.’ Ko e tau kupu ia mai he Tohi Tapu, kua felemi (frame) mo e tautau he kaupa he kaina ne finatu a au ki ai, ne tokaloto ai e au. Ko e aho katoa ia ne manamanatu au ki ai. Maeke nakai ia au, he huhu ne au ki a au ni, ke falanaki ke he Atua mo e haku a loto katoa?” Ko e tagata nei ko e 21 e tau tau he mogoia. Ke he 90 e tau tau he moui ne fekafekau fakamoli agaia mo taha motua i Perth, Ausetalia, maeke ia ia ke liu ono ki tua ke he moui ne fakamaukoloa aki e fua ha ko e falanaki mo e loto katoa ki a Iehova, putoia ai e 26 e tau tau uka ne gahua fakamua e tau fonua misionare fou i Silona (mogonei ko Siri Lanaka), Puma (mogonei ko Maianama), Malaia, Tailani, Initia, mo Pakisitani.a

2. Ko e heigoa e malolo kua lata he Fakatai 3:5 ke ati hake ia tautolu?

² “Falanaki ki a Iehova mo e hau a loto katoa”​—ko e tau kupu nei he Fakatai 3:5, ne fakakite mai he New World Translation, kua lata ke fakaohooho aki a tautolu oti ke foaki tumau mo e loto katoa e tau momoui ha tautolu ki a Iehova, mauokafua ko e maeke ia ia ke fakamalolo ha tautolu a tua, ti maeke ke kautu mai he tau mena vihi tuga e tau mouga. (Mataio 17:20) O mai a tautolu ke kikite e Fakatai 3:5 ke he hana a veveheaga tala katoa ia.

Tomatomaaga Fakamatua

3. (a) Ko e heigoa e tau fakamaloloaga ka moua he tau veveheaga hiva fakamua he tau Fakatai? (e) Ko e ha kua lata ia tautolu ke onoono fakalahi ke he Fakatai 3:1, 2?

³ Ko e tau veveheaga hiva fakamua he tau Fakatai he Tohi Tapu ne puke ke he tau tomatomaaga fakamatua, ko e tau fakatonuaga iloilo mai ia Iehova ma lautolu oti ne amaamanaki ke fiafia ha ko e tau fanau he lagi po ke “tokanoaaga he monuina he fanau he Atua” ke he parataiso he lalolagi. (Roma 8:18-21, 23) Ko e fakatonuaga pulotu a nei ke fakaaoga he tau matua ke he feakiaga he tau fanau tane mo e fifine. Mua atu e fakatonuaga he Fakatai veveheaga 3, ne kamata aki e poakiaga: “Haku tama na e, aua neke nimo ia koe haku a tau fakatufono; ka kia omaoma e loto hāu ke he haku a tau fakatufono.” Ha ko e tau aho fakamui he lalolagi kelea ha Satani kua teitei fakaoti, kia fanogonogo fakalahi a tautolu ke he tau fakamanatuaga a Iehova. Kua tuga kua loa e hala ka ko e maveheaga ki a lautolu oti ne fakauka ke “lafilafi atu ia kia koe e tau aho loga, mo e tau tau ke moui ai, katoa mo e monuina”​—ko e moui tukulagi ke he fakatokaaga fou a Iehova.​—Fakatai 3:1, 2.

4, 5. (a) Ko e heigoa e fakafetuiaga fiafia ne fakamaama mai he Ioane 5:19, 20? (e) Fakagahua fefe e fakatonuaga he Teutaronome 11:18-21 kua hifo mai ke he vaha ha tautolu?

⁴ Ko e fakafetuiaga fiafia he matua tane mo e tama tane ko e mena uho. Ko e ha tautolu a Tufuga, ko Iehova ko e Atua, ne taute pihia e fakatokaaga ia. Ne pehe a Keriso Iesu ke he hana a fakafetuiaga tata lahi mo Iehova: “Nakai maeke ke he Tama ke eke taha mena, ko ia ni hokoia; ka ko e tau mena ne kikite atu ke he Matua ha ne eke; ko e tau mena foki ne eke e ia, ko e tau mena foki ia ha ne eke pihia he Tama. Ha ko e mena fakaalofa mai e Matua ke he Tama, kua fakakite mai foki kia ia e tau mena oti kana ne eke e ia.” (Ioane 5:19, 20) Ne amanaki a Iehova ke pihia foki e fakafetuiaga tata hana mo e hana a magafaoa he lalolagi, ti pihia foki e fakafetuiaga he tau mamatua mo e ha lautolu a tau fanau.

⁵ Ko e fakafetuiaga falanaki i loto he magafaoa ne fakamalolo fakalahi i Isaraela i tuai. Ne fakatonu e Iehova e tau mamatua tane i ai: “Kia tuku e mutolu e tau kupu nai ke he ha mutolu a tau loto mo e ha mutolu a tau manatu, ti pipi ai foki mo fakamailoga ke he ha mutolu a tau lima, ke eke foki mo foupapa ke he vaha he ha mutolu a tau mata. Kia fakaako atu ai ke he fanau ha mutolu mo e vagahau ai ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ni ka matike a koe. Kia tohi ai foki ke he tau pou he hau a fale, katoa mo e tau gutuhala; Kia fakaloga ai ha mutolu a tau aho mo e tau aho he fanau ha mutolu ke he motu ne omonuo ai e Iehova ke he ha mutolu a tau matua ke foaki atu ai kia lautolu, ke tuga ne tau aho ke ha i ai e lagi ki luga he lalolagi.” (Teutaronome 11:18-21) Ko e Kupu he ha tautolu a Faiaoga Mua ue atu, ko e Atua ko Iehova, ke maeke ke matutaki fakalahi a ia mo e tau mamatua mo e ha lautolu a tau fanau, ti pihia mo lautolu oti ne fekafekau ki a ia i loto he fakapotopotoaga Kerisiano.​—Isaia 30:20, 21.

6. Moua fefe e tautolu e fiafia he Atua mo e tagata?

⁶ Ko e fakatonuaga iloilo fakamatua ma e tau tagata he Atua, fuakau mo e fuata, ne matutaki ke he tau kupu 3 mo e 4 he Fakatai veveheaga 3: “Aua neke tiaki a koe he fakaalofa mo e fakamoli, kia pipi ai e koe mo kahoa ke he ua hāu, kia tohi ai e koe ke he lapatohi he loto hāu, Ti moua ai e koe e fakaalofa mo e monuina mitaki ki mua he Atua katoa mo e tau tagata.” Ko Iehova ko e Atua ne mua atu a ia he fakakite e fakaalofa-totonu mo e fakamoli. Tuga ne talahau he Salamo 25:10, “ko e tau puhala oti a Iehova, ko e fakaalofa ia mo e fakamoli.” Ha ko e fakafifitakiaga ki a Iehova, kua lata ia tautolu ke tokiofa e tau mahani nei mo e ha lautolu a malolo puipui, ko e tau koloa uho tuga e tau kahoa tau uka mo e tohi fakamatolu a lautolu ke he ha tautolu a tau loto. Fakamakamaka mogoia a tautolu ke liogi: “Iehova na e, . . . kia leveki mau ai au he hāu a fakaalofa mo e hāu a fakamoli.”​—Salamo 40:11.

Tumau e Falanaki

7. Ha e fe e tau puhala ne fakakite e Iehova hana a falanakiaga?

⁷ Ne fakakakano e falanaki he Webster’s Ninth New Collegiate Dictionary ko e “falanaki moli ke he mahani, pulotu, malolo, po ke moli he taha tagata po ke mena.” Ko e mahani ha Iehova ne taula mau nivaniva aki e fakaalofa-totonu. Maeke ia tautolu ke katoatoa e falanaki ke he hana a pulotu ke taute hana a maveheaga, ma e hana a higoa ni, Iehova, ke fakakite a ia ko e Amanakiaga lahi. (Esoto 3:14; 6:2-8) Ha ko e Tufuga, ko ia ko e Fakaveaga he malolo mo e mana lahi. (Isaia 40:26, 29) Ko ia ko e fakatai he mena moli, ha ko e mena “nakai maeke ke pikopiko ai e Atua.” (Heperu 6:18) Ti ko e mena ia, kua fakamalolo mai ki a tautolu ke falanaki mo e nakai fakauaua ki a Iehova, ko e ha tautolu a Atua, ko e Punaaga he mena moli, ne ha ha i ai e malolo lahi mua ue atu ke puipui hana a tau tagata ne falanaki mo e tamai oti hana a tau amaamanakiaga ke he kautu kua lilifu.​—Salamo 91:1, 2; Isaia 55:8-11.

8, 9. Ko e ha ne nakai ha ha i ai e falanaki ke he lalolagi, mo e maeke fefe he tau tagata a Iehova ke fakakite mai e kehe?

⁸ Ke he lalolagi matahavala ne agagai ia tautolu, ne nakai toka ai e falanaki. Ka ko e lotokai mo e tau mahani fakavai ke he tau mena oti. Ko e kili i mua he mekasini World Press Review ia Me 1993 ne tohi e fekau: “KO E TUPU LAHI HE FAKAVAI​—Ko e Tupe Kiva he Fakatokaaga he Lalolagi Fou. Ko e kautaha fakavai ne kamata mai i Pasili ki Sihamani, mai he Tau Fahi Kaufakalataha ki Atenetina, mai i Sepania ki Peru, mai i Italia ki Mesiko, mai he Vatikana ki Rusia.” Ne fakave aki e vihiatia, lotokai, mo e nakai fai falanaki, ko e fakatokaaga fou he tagata ne nakai fua mai ha mena taha, ka ko e tokoluga ni he tau matematekelea ma e tau tagata.

⁹ Ne kehe lahi mai he tau kautu mo e ha lautolu a tau fakatufono, ne fiafia e Tau Fakamoli a Iehova ke eke mo “motu kua Atua kia Iehova.” Ko lautolu ni hokoia ne maeke ke talahau fakamoli, “Kua falanaki au ke he Atua.” Maeke ia lautolu takitokotaha ke ui fakalahi mo e fiafia: “Kua fiafia au ke he Atua ha ko e hana kupu . . . Kua tua au ke he Atua; nakai matakutaku au.”​—Salamo 33:12; 56:4, 11.

10. Ko e heigoa kua fakamalolo aki e tokologa he tau fuata Kerisiano ke tumau e tua?

¹⁰ Ke he motu Asia ne loga e tau afe he Tau Fakamoli fuata ne mamahi ha ko e tau fahi kelea mo e tuku he tau fale puipui, ko e falanaki ki a Iehova ati maeke ai he tokologa ke fakauka. Taha e po he fale puipui, ko e fuata Fakamoli ne lahi e fakakikiveka ne logona e ia kua nakai maeke ke fakauka. Ka ko e taha fuata ne hau fakagalo ki a ia ke he po. Ne fanafana ki a ia: “Aua neke tiaki e fakauka; ko e mena talia e au ti tali mai, nakai maeke ia au ke moua e mafola he loto.” Ko e fuata fakamua ne fai malolo fou a ia ke tu ke mau nivaniva. Maeke ia tautolu ke katoatoa e falanaki ki a Iehova to maeke ia ia ke lagomatai a tautolu ke kautu mai he falu mo e tau laliaga oti ha Satani ke moumou ha tautolu a mahani hakohako.​—Ieremia 7:3-7; 17:1-8; 38:6-13, 15-17.

11. Kua fakalagalaga fefe a tautolu ke falanaki ki a Iehova?

¹¹ Ko e poakiaga fakamua ne totou pehe e taha vala: “Kia fakaalofa atu foki a koe ke he Iki hāu a Atua mo e hāu a loto katoa.” (Mareko 12:30) Ha kua manamanatu a tautolu ke he Kupu he Atua, ko e kupu moli ne fakaako e tautolu ne tomo hifo hokulo ke he ha tautolu a tau loto ti maeke ke fakalagalaga a tautolu ke fekafekau ke he ha tautolu a Atua mitaki lahi, ko e Iki Pule Katoatoa ko Iehova. Ne puke namo e tau loto he fakaaue ki a ia​—ke he tau mena oti ne fakaako e ia ki a tautolu, tau mena ne taute ma tautolu, mo e tau mena ne nakai la taute ma tautolu​—ti fakalagalaga a tautolu ke katoatoa e falanaki ke he hana a fakamouiaga.​—Isaia 12:2.

12. Ke he tau tau loga, lagomatai fefe he tau Kerisiano tokologa ke fakakite ha lautolu a falanaki ki a Iehova?

¹² Ko e maeke e falanaki nei ke feaki hake ke he tau tau loga. Ko e Fakamoli mahani fakatokolalo a Iehova ne fekafekau fakamoli ke he molea e 50 e tau tau ke he matapatu he Kaufakalatahaaga he Kolo Toko i Brooklyn, kamata mai ia Apelila 1927, ne tohi pehe: “Ke he fakahikuaga he mahina ia ne moua e au e tupe lagomatai ko e $5.00 ne tuku he faga tohi mo e kala lau pepa mao fulufuluola ne tohia ai e kupu Tohi Tapu he Fakatai 3:5, 6 . . . Ne ha ha i ai e tau kakano oti ke falanaki ki a Iehova, ha ko e ha ha he matapatu, ati moua ai e au e fakaaue kua fai ‘fekafekau fakamoli mo e loto matala’ a Iehova ne gahua mo e fakamoli ke he tau gahua he Kautu ne ha ha i ai ke he lalolagi.​—Mataio 24:45-47.”b Ne mau nivaniva e loto he Kerisiano nei, nakai ke he fakaalofa ke he tau tupe, ka ko e mouaaga he “koloa he lagi nakai tuai oti.” Ti pihia foki ke he vaha nei, ko e tau afe ne fekafekau ke he kaina Peteli he Kaufakalatahaaga he Kolo Toko ke he lalolagi oti ne gahua ki lalo hifo he omonuoaga fakatufono he mativa. Ne falanaki a lautolu ki a Iehova ke foaki mai ha lautolu a tau manako he tau aho oti.​—Luka 12:29-31, 33, 34.

Falanaki ki a Iehova

13, 14. (a) I fe ni ke moua mai e tau fakatonutonuaga mitaki? (e) Ko e heigoa kua lata ke tiaki ke maeke ke hao mai he favale?

¹³ Ne fakalaga mai he Matua ha tautolu mai he lagi: “Ka e aua neke falanaki a koe ke he hāu a pulotu.” (Fakatai 3:5) Ko e tau tagata fakatonutonu mo e tau tagata ne kumikumi ke he tau manamanatuaga ne nakai maeke ke amaamanaki ke hoko ke he iloilo mo e pulotu ne fakakite e Iehova. “Nakai maeke ke fakamatala hana iloilo.” (Salamo 147:5) Kua nakai lata ke falanaki ke he iloilo he tau tagata tokoluga he lalolagi po ke ha tautolu a tau logona hifo nakai fakaako, ka e onoono a tautolu ki a Iehova, hana Kupu, mo e tau motua he fakapotopotoaga Kerisiano ke moua e tau fakatonutonuaga motua.​—Salamo 55:22; 1 Korinito 2:5.

¹⁴ Ko e pulotu fakatagata po ke tokoluga he tuaga to nakai moua e tautolu ha mena ke he vaha nei ne holo mafiti atu ke he fakafiliaga lahi. (Isaia 29:14; 1 Korinito 2:14) I Sapani ke he Felakutaki II he Lalolagi, ko e leveki mamoe malolo ka e fakatokoluga he tau tagata he Atua ne fifili ke falanaki ni ke he hana iloilo. Ha kua lahi mahaki e pehia ti fuluhi a ia ke tiaki e taofiaga, mo e laulahi foki he fuifui ne fakaoti e gahua ha ko e favaleaga. Ko e matakainaga fifine Sapani ne mahani fakamoli, ne lahi e malolo ti hao mai he tau matematekelea lahi i loto he tau fale puipui kiva, ne talahau pehe: “Ko lautolu ne tumau e fakamoli ne nakai ha ha i ai ha malolo kehe pauaki mo e nakai kitia e taha. Ko e moli kua lata ia tautolu oti ke falanaki tumau ki a Iehova mo e ha tautolu a loto katoa.”c

15. Ko e heigoa e tau mahani atua kua aoga ke fakafiafia aki e tautolu a Iehova?

¹⁵ Ko e falanaki ki a Iehova, ka e nakai ke he ha tautolu a iloilo ni, kua lata ke ha ha i ai e fakatokolalo. Kua aoga lahi e mahani nei ma e tau tagata oti ne manako ke fakafiafia a Iehova! A ko e pihia foki ne Atua, pete ni ko e Iki Pule Katoatoa ke he lagi mo e lalolagi katoa, ka e fakakite e fakatokolalo ke he hana a tau tauteaga mena mo e hana a tau tufugatiaaga lotomatala. Maeke a tautolu ke fakaaue ke he mena nei. “Ko ia ni kua fakatokolalo e ia a ia ke kitekite ke he lagi katoa mo e lalolagi, Kua fakatu hake mai he kelekele e lalo tagata.” (Salamo 113:6, 7) Mai he hana a fakaalofa hofihofi, ne fakamagalo e ia ha tautolu a tau lolelole ha ko e fakaveaga he hana a fakaalofa mua ue atu ke he tau tagata, ko e poa lukutoto uho he hana a Tama fua taha, ko Keriso Iesu. Kua lahi e fakaaue ha tautolu ke he hana a fakaalofa noa!

16. Maeke fefe e tau matakainaga tane ke foli ke he tau fakamonuinaaga i loto he fakapotopotoaga?

¹⁶ Ne fakamanatu mai e Iesu ki a tautolu: “Ko ia ne fakatokoluga e ia a ia, to fakatokolalo a ia; ka ko ia ne fakatokolalo e ia a ia to fakamatalahi a ia.” (Mataio 23:12) Ko e tau matakainaga kua papatiso kua lata ke foli mo e mahani fakatokolalo ke he tau gahua kua fai fakalagoaga ke he fakapotopotoaga Kerisiano. Ka e taha e mena, ko e tau leveki mamoe kua lata ke onoono ke he ha lautolu a tau kotofaaga, nakai ko e tau tutuaga tokoluga, ka ko e puhala ke taute e gahua, mo e mahani fakatokolalo, fakaaue, fakamakai, tuga a Iesu, ne pehe: “Kua gahua haku a Matua kua hoko mai ni ke he aho nei, ha ne gahua foki au.”​—Ioane 5:17; 1 Peteru 5:2, 3.

17. Ko e heigoa ha tautolu oti kua lata ke fakaaue ki ai, ti takitaki atu ke he gahua fe?

¹⁷ Ka kia fakaaue tumau mo e fakatokolalo mo e liogi ha kua nakai ko e tau kelekele noa ni a tautolu ki mua a Iehova. Ti lahi e fiafia ha tautolu, “ha ko e fakaalofa a Iehova mai i tuai ia, to tukulagi foki ia kia lautolu kua matakutaku kia ia; to hoko atu foki hana a tututonu ke he fanau he ha lautolu a fanau”! (Salamo 103:14, 17) Ti ko e mena haia kua lata ia tautolu ke fakamakai oti ko e tau tagata fakaako ke he Kupu he Atua. Ko e tau magaaho ne fakaaoga ke he tau kumikumi fakatagata mo e tau aoga he magafaoa, mo e ki loto he tau feleveiaaga fakapotopotoaga, kua lata ke eke mo tau tula uho ki a tautolu ke he tau fahi tapu takitaha. Ko e puhala nei ne maeke ia tautolu ke ati hake “ke iloa foki a ia ne Tapu.” Ko e kakano haia he “pulotu.”​—Fakatai 9:10.

“Ke he Hāu a Tau Puhala Oti . . .”

18, 19. Maeke fefe ia tautolu ke fakagahua e Fakatai 3:6 ke he ha tautolu a tau momoui, mo e ko e heigoa e tau fua?

¹⁸ Ne takitaki atu a tautolu ki a Iehova, ko e Punaaga he iloilo fakaatua, ne talahau he Fakatai 3:6: “Kia manatu e koe a ia ke he hāu a tau puhala oti, ti fakahakohako ai e ia hāu a tau puhala.” Ko e manatu a Iehova kua putoia ai e fakatata ki a ia ke he tau liogi. Ke he tau mena ne ha ha i ai a tautolu mo e tau feleveiaaga kehekehe ne tutupu hake, ne ha ha ia tautolu e puhala ki a ia ke he tau liogi. Ke he ha tautolu a tau momoui ke he tau aho takitaha, ke he ha tautolu a teuteu ke o atu ke gahua ke he fonua, ke he ha tautolu a o atu ke he taha fale mo e taha fale ke fakamatala hana Kautu, ha tautolu a tau liogi tumau ke maeke ke fakamonuina e ia ha tautolu a tau gahua. Ti ko e mena haia, ne maeke ia tautolu ke ha ha ia tautolu e tau fakaaue mo e fiafia ne nakai fai fuafuaaga ke ‘o fano mo e Atua,’ mo e mauokafua to maeke ia ia ke ‘fakahakohako ha tautolu a tau puhala,’ tuga ne taute e ia ki a lautolu ne matakutaku ke he Atua, ko Enoka, Noa, mo e tau Isaraela ne fakamoli, tuga a Iosua mo Tanielu.​—Kenese 5:22; 6:9; Teutaronome 8:6; Iosua 22:5; Tanielu 6:23; kikite foki Iakopo 4:8, 10.

¹⁹ Ka fakailoa e tautolu ha tautolu a tau ole ki a Iehova, to maeke ia tautolu ke mauokafua ko e ‘mafola he Atua ne mua ue atu ke he tau mena oti kua manamanatu ki ai, ke leveki ai e tau loto katoa mo e tau manatu ha tautolu kia Keriso Iesu.’ (Filipi 4:7) Ko e mafola nei he Atua, ne fakakite mai he fofoga fiafia, ke maeke ke talahaua mitaki ha tautolu a fekau ke he tau tagata he tau kaina ne feleveia mo tautolu ke he ha tautolu a gahua fakamatala. (Kolose 4:5, 6) Maeke foki ke fakamalolo a lautolu ne liga mamahi ke he tau mena vihi po ke tau mena nakai tonu e fakafiliaga ne holofa ai ke he lalolagi he vaha nei, tuga e tala e ka mui mai.d

20, 21. (a) Ke he magahala matakutakuina ha Nasi, fefe e tumau he Tau Fakamoli a Iehova ke fakamalolo e falu? (e) Ko e heigoa e tali kua lata he leo a Iehova ke fakalagalaga aki a tautolu?

²⁰ Ko Max Liebster, ko e Iutaia moli, ne ko e tuga e mana ati hao mai he Moumouaga, ne fakamaama mai hana e fenoga ke he kemu moumouaga he tau Nasi ke he tau kupu nei: “Ne loka a mautolu i loto he tau tolole lelue ne kua taute tuga e tau fale puipui ikiiki ke lata mo e tokoua e tagata. Ne tele ki loto he taha mai ia lautolu, ti fakafehagaaoaki au mo e taha pagota ne ha ha he hana a tau mata e mafola. Ne ha ha i ai a ia he mena ia ha ko e hana a fakalilifu ke he fakatufono he Atua, kua fifili e ia e tuku ke he fale puipui mo e liga ke mate ka e nakai fakamaligi e toto he falu tagata. Ko ia mai taha he Tau Fakamoli a Iehova. Ne utakehe hana a tau fanau mai ia ia, ti kua fita hana hoana he tamate. Ko e fakatali a ia ke tamate foki. Ne 14 e aho he fenoga ti moua mai e tali ke he haku a tau liogi, ha ko e fenoga ia ke he mate ne moua e au e amaamanakiaga ke he moui tukulagi.”

²¹ Mole mai e moui i Auschwitz ko e “ana he tau leona,” tuga he fakahigoa e ia, mo e kua papatiso, ko e matakainaga nei ne mau mo e taha Fakamoli a Iehova, ne fakapagota foki a ia mo e fakakikiveka foki hana a matua tane ke he kemu pagota i Dachau. Ke he magaaho ne nofo e matua tane hana i ai, ne logona e ia ko e hoana hana mo e tama fifine fakamui kua fita foki he fakapagota. Ne fakamaama mai e ia hana logona hifo: “Ne tupetupe lahi au. Ti ko e taha aho ne tu au he laini ke koukou, ne logona e au e leo ne talahau manatu mai e Fakatai 3:5, 6 . . . Ne taogo mai tuga e leo hifo mai he lagi. Ko e mena tonu ne manako au ke moua aki e lagotatai.” Ko e moli, ko e leo he taha pagota ne talahau manatu e kupu nei, ka e pehi mai he mena tupu ia e malolo he Kupu he Atua ke fakalagalaga aki a tautolu. (Heperu 4:12) Kia vagahau malolo pihia e leo a Iehova ki a tautolu he vaha nei puhala mai he tau kupu he ha tautolu a lauga-he-tau 1994: “Kia tua a koe kia Iehova mo e hāu a loto katoa”!

[Tau Matahui Tala]

Liu Fatiaki

◻ Ko e vahega fakatonuaga fefe ne fakakite mai he Fakatai?

◻ Aoga fefe ki a tautolu e falanaki ki a Iehova?

◻ Ko e heigoa ne putoia he falanaki ki a Iehova?

◻ Ko e ha kua lata ia tautolu ke mailoga a Iehova ke he tau puhala oti ha tautolu?

◻ Maeke fefe ia Iehova ke fakahako ha tautolu a tau puhala?

[Tau Fakatino he lau 14]

Ko e fekau fiafia he Kautu ne fiafia e tau tagata loto fakamoli ki ai