Tau Hukui he Mahani Kelea

KO E fakamaamaaga he Tohi Tapu ke he matagahua fakalavelave he tau temoni ke he tau mena he tagata, ne kua tali e tau matapatu huhu ke he mahani kelea kua tuga kua nakai maeke ke moua ha tali hagaao ki ai. Kia manamanatu la ke he fakatai, ko e talahauaga nei mai he International Herald Tribune ne hagaao ke he felakutaki hane fa e taute i Palakana: “Ti kua pehe ai tuai e manatu fakahiku he matakau kumikumi he Kaufakalatahaaga Europa, kua hoko ke he 20,000 e tau fifine lalahi mo e tau tama fifine Musilimi ne fakapilo pulenoa he [tau kautau] . . . ha ko e taha vala he poakiaga he fakatokaaga pauaki ke fakamatakutaku aki, ke fakalolelole aki mo e ke popoka aki a lautolu ke tiaki e tau kaina ha lautolu.”

Ko e tala tohi fakaku i loto he mekasini Time ne kua tafeliuaki e laliaga ke fakamaama: “He falu a magaaho, liga taute he tau fuata tane he felakutaki e fakapilo pulenoa ke fakafiafia aki ha lautolu a tau patu motua, ha lautolu a tau iki ofisa, mo e moua e taliaaga tuga ne ha ha he matua tane mo e hana tama tane. Ti ko e fakamoliaga e fakapilo pulenoa ke he hana tapikiaga katoatoa ke he mahani malolo velagia he matakau. Kua manako lahi e fuata tane ke taute e tau mena teteki lahi ne kua pehi ki lalo e ia hana loto logona hifo ke maeke ai ke matutaki mo e manako nakai fakahui he matakau. Kua fakamau he tagata tane e hana kautaha he taute e tau mahani kelea muitui.”

Ka kua tomuatua he ha e muikau he “manako nakai fakahui he matakau” mai he loto logona hifo he tau tagata takitaha ha lautolu he matakau? Ke he tau tagata takitaha, kua teitei e tau tagata oti kana ke manako ke nonofo mafola mo e hana katofia. Ti ko e ha mogoia, he tau magaaho felakutaki, kua fakapilo pulenoa he tau tagata e falu, fakakikiveka, mo e kelipopo ne taha e taha? Kakano ha ko e matakau malolo he tau temoni ne fa e gahua.

Ko e maamaaga ke he matagahua he tau temoni kua foaki mai foki e tali ke he mena ne fakahigoa he falu ko e “mena vihi he tagata feua fakaakoaga ke he atua.” Ko e mena vihi hanai ke tututaki fefe e tau mena tolu nai: (1) Kua mua atu e malolo he Atua; (2) fakaalofa mo e mitaki e Atua; mo e (3) tau mena kelea ne tutupu. Kua tua e falu kua maeke ke ua e ha mena he tau mena nei ka tututaki fakalataha, ka e nakai maeke ke tututaki oti e tau mena tolu. Ka ko e Kupu ni he Atua ne tuku mai e tali, mo e putoia ai he tali ia e tau agaga ne nakai maeke ke kitia, ko e tau hukui he mahani kelea.

Ko e Patu Totoko Fakamua

Ne tala mai he Tohi Tapu ki a tautolu ko e agaga ni e Atua. (Ioane 4:24) Ko e mena hoko ke he taha magaaho i tuai ne eke ai a ia mo Tufuga he tau mena momoui agaga ne kua loga e tau miliona, ko e tau tama tane agelu. Kua kitia he fekafekau he Atua ko Tanielu mai he fakakiteaga e teau miliona he tau agelu. Ko e tau peresona agaga oti kana ne tufugatia e Iehova kua tututonu a lautolu mo e felauaki mo e hana finagalo.​—Tanielu 7:10; Heperu 1:7.

He mole ai, he magaaho ne ‘fakave he Atua e lalolagi,’ kua “lologo fakalataha” e tau tama tane agelu he Atua mo e “kalaga fiafia.” (Iopu 38:4-7) Ka kua eke e taha ia lautolu ke tupu e manako lahi ke fofo mana e tapuaki ko e mena kua lata tonu ni ke age ke he Tufuga. He totoko ke he Atua, ne taute ai he agelu nei a ia ni mo satani (kakano “ko e patu totoko”) mo e tiapolo (kakano “ko e fatipiko”).​—Fakatatai Esekielu 28:13-15.

He fakaaoga e gata i Etena ke vagahau ke he fifine fakamua, ko Eva, ne fakataki e Satani a ia ke nakai omaoma ke he poakiaga ne age fakahako he Atua ke nakai kai e fua lakau he taha akau pauaki he kaina. He mole ai, ne tututaki atu hana tane ki a ia. Ti kua, tututaki atu ai e tau tagata tokoua fakamua ke he agelu ke totoko ki a Iehova.​—Kenese 2:17; 3:1-6.

He magaaho kua tuga ko e fakaakoaga mahino lahi ke he omaoma e tau mena tutupu i Etena, ka e kua ua e tau matakupu aoga lahi ke he mahani mitaki ne malagaki mai ia Satani. Ke fakamua aki, ne totoko a Satani po kua fakagahuahua tututonu nakai e pule a Iehova ke he hana tau mena momoui mo e ko e tau mena mahomo atu foki nakai ma lautolu. Liga kua mua ne mena kua maeke e tau tagata ke taute, he pule na lautolu ki a lautolu. Ke ua aki, ne huhu a Satani po kua maeke nakai e ha mena momoui iloilo ke taofimau e mahani fakamoli mo e fakamoliaga ke he Atua he magaaho kua tuga kua nakai moua he mahani omaoma e tau mena aoga fakakoloa tino.a

Ko e maamaaga maaliali ke he tau matakupu ne malagaki mai i Etena, fakalataha mo e iloilo ke he tau mahani a Iehova, ka lagomatai aki a tautolu ke maama e tali ke he “mena vihi he tagata feua fakaakoaga ke he atua,” ke fakatututaki atu e tau mahani kelea mo e tau mahani he Atua ko e malolo mo e fakaalofa. Kua moli kua nakai fai kaupaaga e malolo ne ha ha ia Iehova mo e ha ha ni ia ia e fakakiteaga he fakaalofa, ne pulotu foki a ia mo e fakafili tonu. Ne mitaki katoatoa foki hana fakagahuahuaaga lagotatai he tau mahani fa nei. Ti kua, nakai fakaaoga e ia hana malolo ue atu ke fakaoti agataha ni e kau tokotolu ne totoko. Kaeke kua taute ko e fakafili tonu naia ka e nakai ko e mena pulotu lahi po ke loto fakaalofa. Ka e taha foki e mena, ne nakai fakamagalo noa mo e nimo ai e ia, e mena kua liga logona hifo he falu ko e taha mena ni he mahani fakaalofa ke taute. Ka e ke taute e mena ia kua eke ni ko e mena nakai pulotu po ke nakai ko e mena fakafili tonu.

Kua lata ni ke fai magaaho ke fakamitaki e tau matakupu ne malagaki mai e Satani. Kua lata ke fai magaaho ke fakakite moli po kua maeke nakai e tau tagata ke mitaki lahi e pule ha lautolu ki a lautolu ni kua tutokotaha mai he Atua. He fakaata e kau totoko tokotolu ke momoui, kua taute foki e Iehova ke maeke e tau mena momoui ke fai vala gahua ka taute ke fakakite moli ko e fakavai e talahauaga a Satani he fekafekau fakamoli ke he Atua mai he tau tutuaga uka lahi.b

Kua talahau fakamaaliali e Iehova ki a Atamu mo Eva kaeke kua kai e laua e fua lakau fakatapu, to mamate na laua. Mo e kua mamate a laua, pete ni ne fakamafana atu a Satani ki a Eva ko e to nakai pihia a ia. Kua ha ha foki a Satani i lalo he fakahala he mate; ka e he magaaho nai ne fakatumau agaia na ia ke fakahehe e tau tagata. Ko e moli hanai, kua pehe e Tohi Tapu: “Ka ko e lalolagi oti ha he pule hana kua mahani kelea.”​—1 Ioane 5:19; Kenese 2:16, 17; 3:4; 5:5.

Totoko e Falu Agelu

Ne nakai leva he mole e tau mena tutupu i Etena, ne tututaki atu foki e falu agelu ke totoko ke he pule katoatoa a Iehova. Kua talahau mai he Tohi Tapu: “Kua hoko ke he vaha ne kamata ai ke fakatokologa e tau tagata ke he fuga kelekele; ne fanau foki kia lautolu e tau tama fifine. Ti kitia ai he tau tama tane he Atua e tau tama fifine he tau tagata kua mitaki ni a lautolu; ti faihoana ai kia lautolu oti ne loto a lautolu ki ai.” Ke he falu kupu, ko e tau agelu nei kua “toka e lautolu e mena ne nonofo ai a lautolu [i luga he lagi]” mo e o mai ai ke he lalolagi, ne fakafaliu ke he tino tagata, mo e olioli ke he logonaaga fakafiafia tino mo e tau fifine.​—Kenese 6:1, 2; Iuta 6.

Ne fakaholo atu e fakamauaga tala ia Kenese 6:4 ke pehe: “Ha ha he lalolagi ke he vaha ia e tau tagata makimaki [“Nefalimi,” NW], ti pihia foki ke he vaha fakamui ne o age ai e tau tama tane he Atua ke he tau tama fifine he tau tagata, ne fanau foki e lautolu e fanau ma lautolu, ko e tau tagata malolo ia mo e talahaua i tuai.” Ko e tau tama tane hafakati ia ne fanau mai he tau fifine ke he tau mamatua tane agelu ne kua kehe muatua e malolo, “ko e tau tagata malolo.” Ko e tau tagata tane mahani vale lahi a lautolu, po ke Nephi·limʹ, ko e kupu Heperu ne kakano “ko lautolu ne fakaveveli e falu ki lalo.”

Kua aoga lahi ke mailoga e tau mena tutupu nei ha ko e mena kitia ai he magaaho fakamui ke he tau talahauaga tala fakalata he tau kaufakalatahaaga i tuai. Ke fakatai ki ai, ko e talahauaga Papelonia ne 4,000 e tau tau kua fakamaama e tau mena hehe he tagata mana ko Gilgamesh, ko e tagata malolo lahi, mahani vale lahi ne teitei ke tuga e atua, ne kua “loto pilo lahi ne nakai [toka] e ha fifine taopou ke he hana kapitiga leoko.” Ko e taha fakatai foki, mai he tala fakalata Heleni, ko e tagata mana ko Hercules (po ko Heracles). Ne fanau mai e Alcmene, ko e tagata, mo e matua tane he atua ko Tia, ne kamata a Hercules ke taute e tau fufuta tafaga mahani vale lahi he mole he kelipopo hana hoana mo e tau fanau he heketia lahi e ita. Pete ni ia ko e keukeu lahi e tau tala noa pihia he talahau mai he taha atuhau ke he taha atuhau, ka kua felauaki ni a lautolu mo e mena ne talahau he Tohi Tapu hagaao ke he tau Nefalimi mo e ha lautolu a tau mamatua tane agelu ne totoko lahi mahaki.

Kakano ha ko e malolo fakaheheina he tau agelu mahani kelea mo e ha lautolu a tau tama tane tagata mana, kua eke ne lalolagi ke pukenamo ke he mahani vale lahi kua fifili a Iehova ke fakaoti e lalolagi he fakapuke ai. Ne mamate fakalataha ai e tau Nefalimi mo e tau tagata nakai mahani atua oti kana; ti ko e tau tagata ni hokoia ne hao mai ko e tututonu ko Noa mo e hana magafaoa.​—Kenese 6:11; 7:23.

Ka e pete ni ia, ne nakai mamate e tau agelu mahani kelea. Ka kua kehe, ne tiaki e lautolu e tau gati tino tagata ha lautolu mo e liliu ke he kautu agaga. Kakano he nakai omaoma a lautolu, ne nakai fakaata ai a lautolu ke liliu ki loto he magafaoa he tau agelu tututonu he Atua; po kua fakaata foki a lautolu ke liliu ke tui e tau tino tagata tuga ne taute e lautolu he tau aho a Noa. Ka e eke agaia na lautolu ke fakagahuahua e malolo fakaheheina ke he tau gahua he tau tagata, i lalo he pule malolo he “temoni lahi,” ko Satani ko e Tiapolo.​—Mataio 9:34; 2 Peteru 2:4; Iuta 6.

Tau Fi he Tau Tagata

Mahani tumau na Satani mo e tau temoni ke kelipopo tagata mo e mahani vale lahi mahaki. Ne fakaaoga e Satani e tau puhala kehekehe ke uta kehe ai e tau fuifui manu a Iopu mo e teitei kelipopo oti hana tau fekafekau. Ne muimatua ki ai, ne kelipopo e ia e tau fanau hogofulu a Iopu he fakatupu e “matagi lahi” ke moumou e fale ne nonofo ai a lautolu. He mole e mena ia, ne fakatatalu e Satani a Iopu aki e “gagao fufula kelea, ne kamata he tau aloalohui hana, ti hoko atu ke he hana tumuaki ulu.”​—Iopu 1:7-19; 2:3, 7.

Kua fakakite foki he tau temoni e aga manamanatu kelea pihia. He tau aho a Iesu, ne uta kehe e lautolu mai he tau tagata ha lautolu a leo vagahau mo e mata maama. Ne taute e lautolu e taha tagata tane ke helehele ne ia a ia aki e tau patuo. Ne palu hifo e lautolu e tama tane ke he kelekele mo e “fakafitikeleu ai.”​—Luka 9:42; Mataio 9:32, 33; 12:22; Mareko 5:5.

Kua fakakite mai he tau hokotaki he lalolagi katoa ko e uli patokitoki agaia ne loto kelea ha Satani mo e tau temoni. Ne fakagagao e lautolu e falu tagata. Ko e falu ne kai e lautolu he fakaalagia a lautolu po ke age ki a lautolu e tau miti kelea lahi po ke ekefakakelea ke he aga fakapilo a lautolu. Ka ko e falu ne omoi e lautolu ke heketia, kelipopo tagata, po ke taupega.

To Fiha e Leva he Fakamanavalahi ki a Lautolu?

To nakai fakamanavalahi tukulagi ki a Satani mo e hana tau temoni. Kua mitaki e kakano ne fakaata ai e Iehova a lautolu ke momoui ati hoko mai ke he ha tautolu a aho, ka ko e magaaho nei kua ku lahi e tau magaaho ha lautolu. He vala fakamua he senetenari nei, kua taute e lakaaga lahi mahaki ke fakakaupa ha lautolu a tau gahua kua maeke ke taute. Ko e tohi a Fakakiteaga kua fakamaama mai: “Kua tau foki a lautolu he lagi; ko Mekaeli [ko e liu tu mai ko Iesu Keriso] mo e hana tau agelu kua tau ke he tarako [ko Satani], ko e tarako foki kua tau a ia mo e hana tau agelu; Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana a tau agelu fakalataha mo ia.”​—Fakakiteaga 12:7-9.

Ka ko e heigoa e fua? Kua fakaholo atu e fakamauaga tala: “Ko e mena ia kia fiafia ai a koe ko e lagi, mo mutolu kua nonofo ai.” Kua maeke e tau agelu tututonu ke olioli kakano ha kua nakai ha ha a Satani mo e hana tau temoni i luga he lagi. Ka e kua e tau tagata he lalolagi? Kua pehe e Tohi Tapu: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.”​—Fakakiteaga 12:12.

He ita a lautolu kua loto a Satani mo e hana tau punua ke fakatupu lahi e tau malaia loga kua maeke ke taute, ato hoko mai e fakaotiaga ha lautolu. He senetenari nei kua ua e felakutaki he lalolagi mo e kua molea e 150 he tau felakutaki ikiiki ne tutupu tali mai he fakaotiaga he felakutaki ke ua aki he lalolagi. Kua tutupu mai ai ke he tau vagahau ha tautolu e tau matakupu “felakutaki moko gagao,” “ko e Kelipopo mahaki toili,” “tau fonua kelipopo,” “tau kemuaga fakapilo pulenoa,” “tau tagata kelipopo tagata fakaholoholo,” mo e “ko e pomo.” Kua puke e tau matutakiaga tala mo e tau tala ke he tau vaikona, kelipopo tagata, fakapa pomo, kai kakano tagata he tau tagata ulu maliu, kelipopoaga lalahi, hogeia e tau mena kai, mo e fakakikiveka.

Ka ko e tala mitaki hanai ha ko e mena tutupu fakaku ne tau mena nei. He magaaho tata i mua, to gahua e Atua ke totoko atu ki a Satani mo e hana tau temoni. Kua fakamaama e fakakiteaga ne moua mai he Atua, ne pehe e aposetolo ko Ioane: “Ne kitia foki e au e agelu kua hifo mai he lagi, ha ia ia e kei he pahua nakai gata mai, ha he lima foki hana e toua lapatoa lahi. Ti tapaki e ia e tarako, ko e gata tuai, ko e tiapolo ia mo Satani, ti lili e ia a ia ke he tau tau ne taha e afe. Kua liti foki a ia ke he pahua kua nakai gata mai kua puipui foki a ia, ko e tuku atu e fakamau fakamailoga ki luga hana, kia nakai taui fakahehe e ia e tau motu, ato katoatoa ai e tau tau ne taha e afe.”​—Fakakiteaga 20:1-3.

He mole e mena ia, to eke ai e Tiapolo mo e hana tau temoni ke ‘vevete ni ke he tau aho gahoa’ mo e hoko ai mogoia e fakaotiaga tukulagi ha lautolu. (Fakakiteaga 20:3, 10) Ko e magaaho homo ue atu ha a ia! Ha kua tuku kehe tukumalagi a Satani mo e hana tau temoni, to eke ai tuai a Iehova ke ‘pule okooko ke he tau mena oti kana.’ Mo e to moua moli ai he tau tagata oti “fakafiafia foki e lautolu a lautolu ha ko e monuina kua lahi.”​—1 Korinito 15:28; Salamo 37:11.

[Tau Matahui Tala]

[Fakatino he lau 7]

Ko e tagata ni ka hokoia ka fakalago ki ai e tau mena pihia, po kua tuku aki foki ni e taha mena malolo kelea lahi ne nakai maeke ke kitia?

[Credit Line]

Ko e tau luo keli oela ne tugi i Kuaiti, 1991: Chamussy/​Sipa Press

[Fakatino he lau 7]

Ko e magaaho homo ue atu ha a ia ka nakai ha ha e tau temoni ke kai e tau tagata!