Fehagaaoaki e Fakaakoaga Faka-Atua mo e Tau Fakaakoaga he Tau Temoni
“To o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni.”—1 TIMOTEO 4:1.
1. Ko e heigoa e taulatau ne kua ha ha ai e tau Kerisiano he lotouho?
MANAMANATU la kua nofo a koe ke he moui katoa hau he matakavi felakutaki. To fefe la ka o ke momohe ka e hoha e tau patapataka pulufana mo e ala hake ke he go he tau fana fonua? Kua momoko lahi, ha kua pihia moli e tau momoui he tau tagata he falu matakavi he lalolagi. Ke he kakano fakaagaga, mogoia, kua nonofo ni pehenai e tau Kerisiano oti kana. Kua ha ha a lautolu he vahaloto he taulatau lahi mahaki ne fa e latau ti hagaao ai ke 6,000 e tau tau mo e kua holo hake lahi he vaha ha tautolu. Ko e heigoa e felakutaki nei kua leva lahi? Ko e taulatau he kupu moli mo e tau pikopiko, he fakaakoaga faka-Atua mo e tau fakaakoaga he tau temoni. Nakai ko e tala fakalaulahi noa kaeke ke talahau pihia—ka hagaao ke he vala he ulu takitaki he taha fahi—ko e feokaaga kua muitui he nakai fakaalofa noa ne kua mua atu e hagahaga kelea mai he ha fakamauaga tuai he tagata.
2. (a) Hagaao ki a Paulo, ko e heigoa e tau fahi ua ne fa e fetokoaki e taha ke he taha? (e) Ko e heigoa e kakano ha Paulo ke “he tua”?
2 Ne talahau e Paulo e tau fahi ua he feokaaga nei, he magaaho ne tohia a ia ki a Timoteo: “Kua talahau fakatonu mai he Agaga, to o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau kupu he tau temoni.” (1 Timoteo 4:1) Kia mailoga la ko e to eke ne tau fakaakoaga he tau temoni ke mua atu e fakaheheina he “tau aho fakamui.” He onoono pihia e vaha a Paulo ki ai, kua momoui ai a tautolu he magaaho pihia. Kia mailoga foki la, ko e heigoa ne totoko ke he tau fakaakoaga he tau temoni, ko e hanei ‘ko e tua.’ Hanai, ‘ko e tua’ ne hukui ai e fakaakoaga faka-Atua, ne fakave ke he tau talahauaga he agaga he Atua he Tohi Tapu. Ko e tua ia ka foaki mai e moui. Ha kua fakaako ai e Kerisiano ke taute e finagalo he Atua. Ko e kupu moli naia kua takitaki ke he moui tukumalagi.—Ioane 3:16; 6:40.
3. (a) Ko e heigoa ne tutupu ki a lautolu ne pakia ha ko e vahaloto taulatau he kupu moli mo e tau pikopiko? (e) Ko hai i tua he tau fakaakoaga he tau temoni?
3 To nakai moua he ha tagata ne veveli kehe he tua e moui tukulagi. Ko lautolu haia ne pakia he felakutaki. Ko e matematekelea ha e tauiaga he fakaata ni e koe a koe ke fakahehetakina he tau fakaakoaga he tau temoni! (Mataio 24:24) To maeke fefe a tautolu takitokotaha ke kalo kehe mai ke nakai eke mo taha tagata pakia? He nakai talia katoatoa e tau fakaakoaga pikopiko nei, ne kua aoga ni hokoia ke he finagalo he “iki he tau temoni,” ko Satani ko e Tiapolo. (Mataio 12:24) Kua kitia tuai, ko e tau pikopiko e tau fakaakoaga a Satani, ha ko Satani e “matua he pikopiko.” (Ioane 8:44) Kia manamanatu la ke he puhala iloilo lahi ne fakaaoga e ia e tau pikopiko ke fakahehe aki e tau mamatua fakamua ha tautolu.
Tau Fakaakoaga he Tau Temoni ne Fakakite Mai
4, 5. Ko e heigoa e pikopiko ne tala age e Satani ki a Eva, mo e ko e ha ko e mahani kelea lahi a ia?
4 Ne fakamau ai e tau mena tutupu he Tohi Tapu ia Kenese 3:1-5. He fakaaoga e gata, ne fakatata atu a Satani ke he fifine ko Eva mo e huhu ki a ia: “Ko e moli kia kua pehe mai e Atua, aua neke kai e mua ke he tau akau oti he kaina?” Kua tuga ko e nakai kelea e huhu, ka e kia liu la ke onoono foki ki ai. “Ko e moli kia?” Kua leo ofomate a Satani, tuga ko e pehe, ‘Ko e ha ne talahau ai he Atua e mena ia?’
5 Mai he hana nakai iloa, ne fakakite e Eva ko e pihia ni. Kua iloa e ia e fakaakoaga faka-Atua ke he mena nei, ha ko e mena tala age he Atua ki a Atamu ko e to mamate na laua kaeke ke kai e laua e fua he akau he iloilo ke he mitaki mo e kelea. (Kenese 2:16, 17) Kua kitia moli ko e fakalagalaga he huhu a Satani e loto fiafia hana, ti kua fanogonogo a ia he hoko atu a Satani ke he matapatu talahauaga: “Ti pehe mai e gata ke he fifine, Nakai ni mamate a mua.” Kua kelea lahi ha e mena ne talahau! Kua tukumale e Satani a Iehova, ko e Atua he kupu moli, ko e Atua he fakaalofa, ko e Tufuga, kua pikopiko a ia ke he tau tagata Hana fanau!—Salamo 31:5; 1 Ioane 4:16; Fakakiteaga 4:11.
6. Ne paleko fefe a Satani ke he mahani mitaki a Iehova mo e pule katoatoa?
6 Ka e kua lahi foki e mena ne talahau e Satani. He fakaholo atu a ia ke pehe: “Ha kua fioia he Atua ko e aho ka kai ai e mua, ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.” Hagaao ki a Satani, ko e Atua ko Iehova—ne foaki fakaloga ke he tau mamatua fakamua ha tautolu—kua manako ke nakai moua e laua e tau mena homo ue atu. Ne manako a ia ke taofi kehe mai ia laua ke nakai maeke ke tuga e tau atua. Kua paleko ai a Satani ke he mahani mitaki he Atua. Kua fakaohooho foki e ia e aga kua mua ni e fakafiafia manako mo e tiaki pauaki e tau matafakatufono he Atua, ti kua pehe ai ka taute e puhala nei to aoga lahi ni. Ka ko e moli hanai, ne paleko a Satani ke he pule katoatoa he Atua ke he Hana ni a tau mena tufugatia, kua tuku teao ai ko e nakai fai hako e Atua ke fakakaupa e tau mena ka taute he tagata.
7. He magaaho fe ne logona fakamua ai e tau fakaakoaga he tau temoni, mo e tatai pihia fefe a lautolu he vaha nei?
7 Fakalataha mo e tau kupu nei a Satani, kua kamata ai e tau fakaakoaga he tau temoni ke logona. Kua fakaohooho agaia he tau fakaakoaga kelea nei e tau matapatu fakaakoaga nakai mahani Atua pihia. Ke tuga he taute e ia he kaina ko Etena, kua eke a Satani he magaaho nei fakalataha mo e falu agaga mahani totoko, ke paleko atu agaia ke he hako he Atua ke fakatoka e tau puhala taute mena. Ne totoko agaia a ia ke he pule katoatoa a Iehova mo e lali ke fakaheheina e tau tagata ke nakai omaoma ke he ha lautolu a Matua i luga he lagi.—1 Ioane 3:8, 10.
8. Ko e heigoa ne fakagalo e Atamu mo Eva i Etena, ka e fakakite mai moli fefe ko Iehova ne moli?
8 Ke he feokaaga ia ko e latau fakamua he fakaakoaga faka-Atua mo e tau fakaakoaga he tau temoni, ne taute e Atamu mo Eva e fifiliaga kua hepe mo e fakagalo ai ha laua a amaamanakiaga ke he moui tukulagi. (Kenese 3:19) He mole atu e loga he tau tau mo e kamata ai ha laua a tau tino ke kelea, kua fakakite moli lahi ai ki a laua ko hai ne pikopiko mo e ko hai ne talahau e kupu moli i Etena. Ka e pete ni ia, kua teau e tau tau he molea ato mamate a laua ke he kakanoaga fakafahi tino, ha kua eke tuai a laua mo faoa fakamua kua pakia he vahaloto latau he kupu moli mo e tau pikopiko he magaaho ne fakafili ai he Tufuga a laua, ko e Punaaga he moui, kua nakai lata a laua mo e moui. Ti ko e magaaho haia ne mamate ai a laua fakaagaga.—Salamo 36:9; fakatatai Efeso 2:1.
Ko e Tau Fakaakoaga he Tau Temoni he Vaha Nei
9. Kua lauia mitaki fefe e tau fakaakoaga he tau temoni mai he tau senetenari?
9 Tuga ne fakamau i loto he tohi a Fakakiteaga, kua uta he agaga e aposetolo ko Ioane ke he “aho he Iki,” ko e mena kua kamata he tau 1914. (Fakakiteaga 1:10) Ko e magaaho haia ne liti hifo a Satani mo e hana tau temoni mai he lagi ke he matakavi he lalolagi—ko e liutua kelea lahi ma e totoko nai he ha tautolu a Tufuga Homo ue Atu. To nakai tuai liu foki hana leo ke logona i luga he lagi, he tukumale tumau e tau fekafekau a Iehova. (Fakakiteaga 12:10) Ka e fefe mogoia e holo ki mua he tau fakaakoaga he tau temoni ne kua taute ke he lalolagi tali mai i Etena? Kua pehe mai e fakamauaga: “Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti.” (Fakakiteaga 12:9) Kua veveli e lalolagi ke he tau pikopiko a Satani! Ti kua nakai ofo ai ha kua fakahigoa a Satani ko e “iki he lalolagi nai”!—Ioane 12:31; 16:11.
10, 11. Ko e heigoa e tau puhala ne gahuahua a Satani mo e hana tau temoni he vaha nei?
10 Kua talahau nakai e Satani ko e kaumahala he mole mai he liti hifo a ia mai he lagi? Kua nakai pihia! Kua ulu mao a ia ke taulatau tumau ke totoko ke he fakaakoaga faka-Atua mo lautolu ne tapiki mau ki ai. He mole mai he liti hifo a ia mai he lagi, ne fakatumau na Satani ke taute hana felakutakiaga: “Ti ita ni e tarako [ko Satani] ke he fifine, ti fina atu ai a ia ke tau ke he tau fanau hana kua toe, ko lautolu kua omaoma ke he tau poaki he Atua, mo e taofi e talahauaga ki a Iesu Keriso.”—Fakakiteaga 12:17.
11 Ke lafi ke he taulatau ke he tau fekafekau he Atua, kua fakapuke e Satani e lalolagi ke he hana tau fakaohoohoaga, he lali ke maunivaniva hana kuku ke he tau tagata. I loto he taha he hana tau fakakiteaga ia Fakakiteaga ke he aho he Iki, ne kitia he aposetolo ko Ioane e tau manu favale ne tolu ko e tau fakataiaga ne hukui a Satani, hana fakatokatokaaga fakapolitika he lalolagi, mo e pule ne malolo lahi ke he lalolagi he vaha ha tautolu. Ne o mai he tau gutu he kau tokotolu nei e tau lane. Kua fakatai ke he heigoa e tau mena nei? Kua tohi a Ioane: “Ha ko e tau agaga ia he tau temoni kua eke e tau fakamailoga, kua o atu a lautolu ke he tau patuiki he lalolagi, mo e lalolagi oti kana, kua fakapotopoto a lautolu ke tau ke he aho lahi he Atua mana.” (Fakakiteaga 16:14) Kua maaliali, kua gahuahua lahi e tau fakaakoaga he tau temoni ke he lalolagi. Kua latau agaia a Satani mo e hana tau temoni ke totoko ke he fakaako faka-Atua, mo e to fakatumau a lautolu ke taute pihia ato eke a lautolu ke fakaoti e Iesu Keriso, ko e Patuiki Mesia.—Fakakiteaga 20:2.
Fakakite Moli e Tau Fakaakoaga he Tau Temoni
12. (a) Ko e ha kua maeke ai ke totoko ke he tau fakaakoaga he tau temoni? (e) Lali fefe a Satani ke hokotia hana manako ke he tau fekafekau he Atua?
12 Kua maeke nakai e tau tagata ne matakutaku ke he Atua ke totoko ke he tau fakaakoaga he tau temoni? Kua maeke moli a lautolu, ha kua ua e tau kakano. Ke fakamua aki, kakano ha kua malolo lahi mahaki e fakaakoaga faka-Atua; mo e ke ua aki, kakano ha kua fakatapakupaku e Iehova e tau lagatau a Satani ke maeke ai a tautolu ke totoko ki a lautolu. Tuga kua talahau mai he aposetolo ko Paulo, “nukua nakai pouli a tautolu ke he hana tau lagatau.” (2 Korinito 2:11) Kua iloa e tautolu kua fakaaoga e Satani e favaleaga mo kanavaakau ke moua hana manako. (2 Timoteo 3:12) Ka kua mua atu mogoia e halahu, he lali a ia ke fakaheheina e tau manamanatuaga mo e tau loto ha lautolu ne fekafekau ke he Atua. Ne fakahehe e ia a Eva mo e tuku e ia e manako hepe ke he loto hana. Kua lali foki a ia ke taute e mena taha ia he vaha nei. Ne tohia a Paulo ke he tau Korinito: “Ka kua matakutaku au, neke tuga he fakavai he gata a Eva ke he hana lagatau, ti pihia foki he fakakelea e ia ha mutolu a tau manatu kia nakai fakamoli kia Keriso.” (2 Korinito 11:3) Kia manamanatu la ko e ekefakakelea fefe e ia e tau manamanatu he tau tagata oti.
13. Ko e heigoa e tau pikopiko ne tala age e Satani ke he tau tagata tali mai ia Eva?
13 Ki a Eva, ne tukumale e Satani a Iehova ko e pikopiko mo e pehe ko e maeke e tau tagata ke tuga e tau atua kaeke ka nakai omaoma a lautolu ke he ha lautolu a Tufuga. Ka kua fakakite mai moli he tutuaga agahala lahi he tau tagata he vaha nei ko Satani, nakai ko Iehova, e pikopiko. Nakai ko e tau atua e tau tagata he vaha nei! Pete ni ia, kua omoi hake e Satani e pikopiko fakamua ia aki e falu a tau pikopiko foki. Ne kamata e ia e manamanatu ko e moui tumau e solu he tagata, kua nakai maeke ke mate. Ti kua fakainaina e ia ke he tau tagata e manako ko e maeke ke tuga e tau atua ke he taha puhala foki. Ti fakave mogoia ke he fakaakoaga fakavai ia, ne fakaohooho e ia e tau fakaakoaga ke he afi a helo, pulekatolia, matutakiaga fakataulatua, mo e tapuakiaga ke he tau tupuna. Kua taofi mau agaia he tau pikopiko nai e tau teau he tau miliona tagata ne fakatupa ki ai.—Teutaronome 18:9-13.
14, 15. Ko e heigoa e kupu moli hagaao ke he mate mo e amaamanakiaga he tagata ke he vaha i mua?
14 Kua moli, ko e mena ne tala age e Iehova ki a Atamu ko e kupu moli ni. Mate a Atamu he magaaho ne agahala a ia ke he Atua. (Kenese 5:5) He magaaho ne mamate a Atamu mo e hana tau fanau, kua eke tuai a lautolu mo tau solu mamate, kua nakai logona ha mena mo e nakai gahuahua. (Kenese 2:7; Fakamatalaaga 9:5, 10; Esekielu 18:4) Kakano he moua e tufaaga agahala mai ia Atamu, kua mamate e tau solu tagata oti kana. (Roma 5:12) Pete ni ia, i Etena i tuai, ne mavehe mai a Iehova ke he hauaga he tega ke latau ke he tau gahua he Tiapolo. (Kenese 3:15) Ko Iesu Keriso, ko e Tama fuataha he Atua ni e Tega ia. Ne mate a Iesu ka e nakai agahala, mo e eke ai hana moui ne poa mo lukutoto ke fakatau mai e tau tagata he ha lautolu a tutuaga mate. Ko lautolu ne omaoma ke fakagahuahua e tua ki a Iesu ati ha ha ai e magaaho ke moua e moui tukulagi ne kua fakagalo e Atamu.—Ioane 3:36; Roma 6:23; 1 Timoteo 2:5, 6.
15 Ko e lukutoto e amaamanakiaga moli ma e tau tagata, nakai ko e ha manatu mahegihegi ko e hao mai e solu he mate. Ko e fakaakoaga faka-Atua a nei. Ko e kupu moli. Ko e fakatataaga homo ue atu foki ke he fakaalofa mo e pulotu a Iehova. (Ioane 3:16) Kua lata tuai a tautolu ke loto fakaaue lahi ha kua ako e kupu moli nei mo e fakatokanoa mai he tau fakaakoaga he tau temoni, ne hagaao ke he tau mena nei!—Ioane 8:32.
16. Ko e heigoa e tau fua ka moua he vahaloa he mumuitua e tau tagata ke he ha lautolu ni a pulotu?
16 Mai he hana tau pikopiko he kaina ko Etena, ne fakamalolo atu a Satani ki a Atamu mo Eva ke loto lahi ke tutokotaha mai he Atua mo e falanaki ke he ha laua ni a pulotu. He vaha nei, kua kitia e tautolu e tau fua ka moua leva ha ko e mahani holifono, he tau mena uka he fahi fakafua, ko e tau felakutaki, mo e muitui he nakai ha ha i ai e lagotatai ke he lalolagi he vaha nei. Kua nakai ofo mogoia ha kua pehe e Tohi Tapu: “Ko e iloilo he lalolagi nai, ko e goagoa haia ki mua he Atua”! (1 Korinito 3:19) Ka e pete ni ia, kua tokologa e tau tagata loto goagoa ne manako ke matematekelea he nakai fia mailoga e tau fakaakoaga a Iehova. (Salamo 14:1-3; 107:17) Ka ko e tau Kerisiano, ne talia e fakaakoaga faka-Atua, ati kua kalo kehe mai ai ke nakai veveli ke he matahele ia.
17. Ko e heigoa ne fakaohooho e Satani “kua fakahigoa pikopiko ai ko e iloilo,” mo e heigoa hana tau fua?
17 Ne tohia a Paulo ki a Timoteo: “Timoteo na e, kia taofi e koe ke he mena ne tuku atu kia koe, kia kalo kehe mo e tau kupu kua kelea mo e nakai aoga, mo e tau taufetoko ke he tau mena kua fakahigoa pikopiko ai ko e iloilo; Kua taofi ki ai e falu, ti hehe ai a lautolu ke he tua.” (1 Timoteo 6:20, 21) Ko e “iloilo” ia foki kua hukui e tau fakaakoaga he tau temoni. He vaha a Paulo, kua liga hagaao ke he tau manamanatu tiaki taofiaga ne kua fakaohooho he falu i loto he tau fakapotopotoaga. (2 Timoteo 2:16-18) He magaaho fakamui, ko e tau mena ne fakahigoa fakavai ko e iloilo, tuga e faka-Nosotiki mo e fakaakoaga fakataitai Heleni, ne fakakelea aki e fakapotopotoaga. Ha ha he lalolagi he vaha nei, e fakaakoaga nakai talitonu ko e fai Atua, ko e tau tagata ne tua kua nakai fakaai ke iloa ko e fai Atua, tau fakaakoaga fakataitai he tupumainoa, mo e talahauaga fakafili muatua ke he Tohi Tapu e falu fakataiaga ke he tau mena fakavai ne fakahigoa ko e iloilo, tuga e tau manamanatu nakai mai he tohiaga tapu ne fakaohooho he tau tagata ne kua tiaki e taofiaga he vaha fou nei. Ko e tau fua ne moua mai he tau mena fakavai oti nei ne fakahigoa ko e iloilo kua kitia ai ke he tau mahani muitui, ke he tokolomakiaga he mahani nakai fakalilifu ke he pule malolo, ke he mahani pikopiko, mo e mahani fulukovi ne kua kitia mau ko e aga he fakatokaaga mena a Satani.
Tapiki ke he Fakaakoaga Faka-Atua
18. Ko hai he vaha nei kua kumi e tau fakaakoaga faka-Atua?
18 Pete ni ia kua fakapuke e Satani e lalolagi ke he tau fakaakoaga he tau temoni tali mai he magaaho i Etena, kua ha ha agaia ne falu ne kumi ke he tau fakaakoaga faka-Atua. Kua numela a lautolu ia ke he tau miliona he vaha nei. Kua fakalataha ai ia lautolu nei e tau Kerisiano fakauku ne toe agaia ne kua ha ha ia lautolu e amaamanakiaga mauokafua ke pule fakalataha mo Iesu ke he Kautu hana i luga he lagi mo e moto tagata tokologa he tau “mamoe kehe” ne fa e tupu tolomaki kua amaamanaki ke nonofo he matakavi he Kautu ko e lalolagi. (Mataio 25:34; Ioane 10:16; Fakakiteaga 7:3, 9) He vaha nei, kua fakapotopoto fakalataha mai a lautolu nei ke he fakatokatokaaga he lalolagi katoa tahamaka, ne kua hagaao e tau kupu a Isaia ki ai: “To fakaako e Iehova hau a fanau oti, ti lahi e monuina he fanau hau.”—Isaia 54:13.
19. Ha kua fakaako e Iehova ko e heigoa kua fakalataha ki ai?
19 Ha kua fakaako e Iehova kua mua atu ne kakano mai he iloa ni hokoia e fakaakoaga moli—pete ni kua aoga lahi e mena ia. Kua fakatonutonu mai e Iehova a tautolu ke feutaaki fefe e tau momoui, ke fakaaoga fefe e fakaakoaga faka-Atua ke he tau momoui takitokotaha ha tautolu. Ke fakatai ki ai, kua totoko a tautolu ke he mahani fulukovi, mahani kelea, mo e agaga tutokotaha ne kua tupu tolomaki he lalolagi ne viko takai ia tautolu. Kua kitia moli e tautolu e kakano he tutuliaga aga vale ma e maukoloa i loto he lalolagi nei—ko e mena takitaki ni ke he mate. (Iakopo 5:1-3) Kua nakai nimo e tautolu e fakaakoaga faka-Atua ne fakailoa mai he tau kupu he aposetolo ko Ioane: “Aua neke fakaalofa a mutolu ke he lalolagi, po ke tau mena ha ha he lalolagi; kaeke kua fakaalofa taha ke he lalolagi, nakai nofo e fakaalofa ke he Matua ke he loto hana.”—1 Ioane 2:15.
20, 21. (a) Ko e heigoa ne fakaaoga e Satani mai he tau laliaga hana ke fakapouli e tau tagata? (e) Ko e heigoa e tau fakamonuinaaga ka moua e lautolu ne tapiki ke he fakaakoaga faka-Atua?
20 Ko e lauiaaga he tau fakaakoaga he tau temoni ki a lautolu ne pakia ai kua kitia mai ai he tau kupu a Paulo ke he tau Korinito: “Kua fakapouli [e Satani] e tau manatu ha lautolu kua nakai tua, neke kikila atu kia lautolu e maama he vagahau mitaki he lilifu a Keriso, ko ia kua fakatai ke he Atua.” (2 Korinito 4:4) Kua loto a Satani ke fakapouli e tau Kerisiano moli ke he puhala taha nei foki. I Etena i tuai, ne fakaaoga e ia e gata ke fakahehe aki e taha he tau fekafekau he Atua. He vaha nei, ne fakaakoga e ia e mahani vale po ke tau kifaga ke he mahani kelea mo e tau fakaholoaga televisoni. Ne fakaaoga hehe e ia e letio, tau tohi, mo e leo kofe. Kua ha ha ia ia e kanavaakau malolo lahi, ko e feoakiaga hepe. (Fakatai 4:14; 28:7; 29:3) Kia kitia tumau a e tau mena pihia ke he ha lautolu a kakano moli—ko e tau lagatau mo e tau fakaakoaga he tau temoni.
21 Kia manatu, ko e pikopiko e tau kupu a Satani i Etena; ne fakamoli e tau kupu a Iehova. Tali mai he tau vaha fakamua ia, kua pihia tumau ne tau mena tutupu. Ne fa fakakite moli tumau a Satani ko e pikopiko, mo e moli tumau e fakaakoaga faka-Atua kae nakai kaumahala. (Roma 3:4) Kaeke ke tapiki a tautolu ke he Kupu he Atua, to ha ha tumau a tautolu he fahi ne mua, he vahaloto latau he kupu moli mo e tau pikopiko. (2 Korinito 10:4, 5) Kia lata ia tautolu mogoia, ke loto mauokafua ke nakai talia e tau fakaakoaga oti kana he tau temoni. Ke he puhala ia to fakauka na tautolu ato hoko e magaaho ka oti ai e vahaloto felakutaki he kupu moli mo e mahani fakavai. To kautu ai e kupu moli. To mole kehe ai a Satani, mo e ko e fakaakoaga faka-Atua ni hokoia ka logona ai ke he lalolagi.—Isaia 11:9.
Maeke Nakai ia Koe ke Fakamaama?
◻ He magaaho fe ne logona fakamua e tau fakaakoaga he tau temoni?
◻ Ko e heigoa e falu pikopiko ne fakaohooho e Satani mo e hana tau temoni?
◻ Ko e heigoa e tau puhala ne kua gahuahua lahi mahaki a Satani he vaha nei?
◻ Ko e heigoa ne fakaaoga e Satani ke fakaohooho aki e tau fakaakoaga he tau temoni?
◻ Ko e heigoa e tau fakamonuinaaga ka moua e lautolu ne tapiki ke he fakaakoga faka-Atua?
[Fakatino he lau 20]
Logona fakamua e fakaakoaga fakatemoni i loto he kaina ko Etena
[Fakatino he lau 21]
Ko e fakaakoaga faka-Atua hagaao ke he lukutoto mo e Kautu kua foaki mai ni hokoia e amaamanakiaga ke he tau tagata