Tau Fuata—Ha Hai e Tau Fakaakoaga ne Fanogonogo ki ai a Mutolu?
‘To o kehe e falu mai he tua, to fanogonogo a lautolu ke he tau [“fakaakoaga,” NW] he tau temoni.’—1 TIMOTEO 4:1.
1. (a) Ko e heigoa e fifiliaga ne moua he tau fuata? (e) Fefe e fakaako a Iehova?
KO E huhu nei ne tutala ke he tau fuata pehe, Ha hai e tau fakaakoaga ne fanogonogo ki ai a mutolu? Ko e manatu nei ki a mutolu ko e tau fanau fuata ke fai fifiliaga ki ai. Ko e fifiliaga he vahaloto he fanogonogo ke he fakaakoaga faka-Atua mo e mumui ke he tau fakaakoaga he tau temoni. Ko e tau fakaakoaga a Iehova ne puhala mai he hana Kupu, ko e Tohi Tapu, ti puhala mai foki he gahua lagomatai ha lautolu kua fakaaoga e ia ke eke mo tau hukui hana he lalolagi. (Isaia 54:13; Gahua 8:26-39; Mataio 24:45-47) Ka e ofo nakai a mutolu na fakaako atu foki e tau temoni?
2. Ko e ha kua aoga ai ke puipui mai he tau fakaakoaga he tau temoni mua atu ke he magaaho nei?
2 Ne tohi he aposetolo ko Paulo: “To o kehe e falu mai he tua ke he tau aho fakamui, to fanogonogo a lautolu ke he tau agaga ke fakahehe ai, mo e tau [“fakaakoaga,” NW] he tau temoni.” (1 Timoteo 4:1) Ha kua nonofo a tautolu he “tau aho fakamui” ko e magaaho ne malolo pauaki ai a Satani mo e hana tau temoni, kua kitia nakai e mutolu ko e ha ne huhu ai e mautolu e huhu nei, Ha hai e tau fakaakoaga ne fanogonogo ki ai a mutolu? (2 Timoteo 3:1-5; Fakakiteaga 12:7-12) Ha kua lagatau momole lahi a Satani mo e hana tau temoni, ti fakahehe lahi he ha lautolu a tau puhala ne fakaaoga, kua lata tonu ni ki a mutolu ke manamanatu fakamitaki ke he huhu nei.—2 Korinito 11:14, 15.
Ko e Tau Temoni mo e ha Lautolu a Tau Fakaakoaga
3. Ko hai e tau temoni, ko e heigoa ha lautolu a finagalo, mo e kumi fefe a lautolu ke fakakatoatoa e mena ia?
3 Ko e tau temoni he taha magaaho ko e tau agelu a Iehova, ka e totoko atu a lautolu ke he ha lautolu a Tufuga mo e ko e mena ia ne eke ai a lautolu mo tau lagomatai a Satani. (Mataio 12:24) Ko e ha lautolu a finagalo ke fakakelea e tau tagata mo e fuluhi kehe a lautolu mai he fekafekau ke he Atua. Ke katoatoa e mena nei, kua fakaaoga he tau temoni e tau tagata fakaako ke fakalaulahi e mahani lotokai mo e puhala mahani kelea he moui ne vihiatia e Iehova. (Fakatatai 2 Peteru 2:1, 12-15.) Ko e liu kitekite ke he puhala ne eke ai e tau agelu tua fakamoli i tuai mo tau temoni ka lagomatai aki a mutolu ke kitia ha lautolu a tau fakaakoaga mo e puhala he moui ne fakalaulahi he tau fakaakoaga nei.
4. (a) Ko e ha e tau agelu nakai omaoma ne o hifo mai ai ke he lalolagi he vaha ia Noa? (e) Ko e heigoa e mena ne tupu ke he tau agelu kelea mo e ha lautolu a tau fanau he magaaho he Fakapuke?
4 He vaha ia Noa, ne ha ha i ai e falu he tau agelu ne futiaki mai ke he tau tama fifine fulufuluola he tau tagata ati kua tiaki he tau mena moui agaga nei ha lautolu a tau tutuaga he lagi ke o mai ke he lalolagi. Ko e ha lautolu a mahani feuaki fakalataha mo e tau fifine kua fua mai ai e tau fanau he tupuaga kehe ne fakahigoa ko e tau Nifalima. Ha kua nakai ko e fakatupuaga tonu a ia ma e tau mena moui agaga ke mahani fakalataha mo e tau tagata, ti ko e tau mena ne taute he tau agelu ne nakai omaoma mo e tau fifine ia kua hehe ni tuga e tau gahua fakasotoma he magaaho fakamui ne taute he tau tagata tane mo e tau tama tane i Sotoma. (Kenese 6:1-4; 19:4-11; Iuta 6, 7) Ti pete ni kua holoholo kehe he fakapuke e tau hoa he tau agelu ia fakalataha mo e ha lautolu a tau fanau he tupuaga kehe, kua fakafaliu he tau agelu kelea nei ha lautolu a tau tino tagata mo e liliu ke he lagi ko e mena haia ne eke ai a lautolu mo tau temoni ne kau auloa mo Satani ko e Tiapolo.—2 Peteru 2:4.
5. Ko e tau mena moui fefe e tau temoni, mo e lali fefe a lautolu ke moumou e tau fakatufono he Atua?
5 Ke he kitekiteaga he tau tala katoa he tau fakamauaga tuai, kua kitia nakai e koe ko e tau mena moui moli fefe e tau temoni? Ko lautolu ko e tau fakahehe he mahani fakatane mo e fifine ne ha ha i tua he ata nei ko lautolu ne fakalagalaga e lalolagi feuaki heketia nei. Pete ni he pa a lautolu mai he liu ke fakafaliu ha lautolu a tau tino ke he tau tagata, ka e moua e lautolu e fiafia mai he tau fakahehe he mahani fakatane mo e fifine ki a lautolu ne maeke ia lautolu ke fakakelea he lalolagi. (Efeso 6:11, 12) Kua lali e tau temoni ke liliu kehe e tau matafakatufono a Iehova hagaao ke he loto mea mo e mahani mitaki he taute e tau matafakatufono ke tuga kua nakai lata e fakakaupaaga. Ko e tau agelu kelea nei ne fakahoko atu e mahani kelea he mahani fakatane mo e fifine ke tuga e mahani pauaki ko e puhala fakafiafia he moui.
Fakalaulahi e Tau Fakaakoaga he Tau Temoni
6. Ko e ha kua nakai lata a tautolu ke ofo ha kua fakalaulahi he tau temoni ha lautolu a tau fakaakoaga ke he tau puhala fakagalogalo?
6 Ha kua fakalaulahi he tau temoni ha lautolu a tau fakaakoaga ke he tau puhala fakagalogalo kua nakai lata ai ke ofo a tautolu, ha ko e puhala nei ni he ha lautolu a takitaki, ko Satani ko e Tiapolo, ne fakaaoga ke fakahehe aki a Eva. Manatu ne vagahau a ia ki a Eva tuga e pehe ko e manako a ia ke fia lagomatai. “Ko e moli kia kua pehe mai e Atua, aua neke kai e mua ke he tau akau he kaina?” he huhu age e Satani. Ka mole ia ti lali a ia ke fakavaia mo e moumou e tau fakaakoaga he Atua he tala age ki a Eva to fai aoga a ia ka moua ka kai mai he akau fakatapu. “Ko e aho ka kai ai e mua,” he mavehe age he Tiapolo, “ti fakaala ai ha mua a tau mata; ti eke ai ni a mua ke tuga ne tau atua ke iloa ai e mitaki mo e kelea.” (Kenese 3:1-5) Ko e mena ia ne kototia ai a Eva, e fakahehe, ke nakai omaoma ke he Atua.—2 Korinito 11:3; 1 Timoteo 2:13, 14.
7. Ko e heigoa e pikitiaaga he tau fakaakoaga fakagalogalo he tau temoni, mo e ko e heigoa e hatakiaga ne moua mai he mena nei?
7 Ke he tau magaaho ku kua mole, foki, tokologa ne kua fakahehe. Ko e tau temoni kua lahi e iloilo kelea he fakalaulahi e mahani kelea he mahani fakatane mo e fifine ti kua eke ke talia he tokologa ne vihiatia e mahani ia he taha magaaho. Ke fakatai ki ai, ko e magaaho ne tali ai he taha tagata tohia tala tomatoma talahaua he Tau Fahi Kaufakalataha e tohi ke he lekua he tau tagata nakai mau ka e taute e mahani fakatane mo e fifine, ne tohi e ia: “Nakai manatu au to liu tua au ke he matakupu nei, ka kua talitonu au he magaaho nei ko e faoa tokoua ne ono fakakaka ke he fakamauaga kua lata ni ke o fenoga fakalataha he tau matahiku vaha tapu gahoa ke kamatamata aki ha laua a fahia ke nonofo tokoua.” Ne lafi atu e ia: “Nakai talitonu au na tohi e au e mena ia!” Pete ni he nakai talitonu foki a ia kua talahau fakamitaki e ia e mahani feuaki, ka kua taute pihia moli e ia! Ti kitia mitaki ai, kua lata a tautolu ke fakaeneene ke aua neke pikitia e tau fakaakoaga he tau temoni ke he ha tautolu a kitekiteaga ke he tau mena taute ne vihiatia he Atua.—Roma 1:26, 27; Efeso 5:5, 10-12.
8. (a) Fakaaoga fefe e kupu “lalolagi” i loto he Tohi Tapu? (e) Ko hai ne pule ke he lalolagi, mo e fefe e kitiaaga he tau tutaki a Iesu ke he lalolagi?
8 Kua lata ia tautolu ke aua neke nimo ko Satani ‘ko e pule he lalolagi nei.’ Ka e moli, ne pehe mai e aposetolo ko Ioane “ka ko e lalolagi oti ha he pule hana kua mahani kelea.” (Ioane 12:31; 1 Ioane 5:19) Moli, ne fakaaoga e Iesu he falu a magaaho e kupu “lalolagi” ke hagaao ke he tau tagata oti. (Mataio 26:13; Ioane 3:16; 12:46) Ne fakaaoga tumau foki e ia e kupu “lalolagi” ke hagaao ke he kaufakalatahaaga oti kana he tau tagata ne momoui i fafo he fakapotopotoaga Kerisiano moli. Tuga a nei, ne pehe a Iesu ko e hana tau tutaki kua lata ke “nakai ko e tau tagata he lalolagi” (ko e kaufakalatahaaga he tau tagata nakai tututonu) mo e ha kua nakai ko e tau tagata he lalolagi a lautolu, kua vihiatia he lalolagi a lautolu. (Ioane 15:19; 17:14-16) Ne poaki mai foki he Tohi Tapu kua lata ia tautolu ke tiaki ua kapitiga mo e lalolagi nei ne pule e Satani.—Iakopo 4:4.
9, 10. (a) Ko e heigoa e tau mena fakalalolagi ne fakalagalaga aki e manako mahani fakatane mo e fifine nakai tonu? (e) Kua maeke fefe ke mailoga ko hai i tua he tau fakafiafiaaga tino he lalolagi ne fakaako?
9 Ne poaki mai he aposetolo ko Ioane: “Aua neke fakaalofa a mutolu ke he lalolagi, po ke tau mena ha ha he lalolagi.” Ne pehe foki a ia: “Ha ko e tau mena oti ha ha he lalolagi, ko e manako lahi he tino, mo e manako lahi he tau mata, katoa mo e tau mena he mouiaga nei ke hula ki ai, nakai mai he Matua ia, ka e mai he lalolagi.” (1 Ioane 2:15, 16) Manamanatu la ke he mena nei. Ko e heigoa e tau mena ne ha ha he lalolagi he vaha nei ne fakalagalaga aki e tau manako hehe, ke fakatai ke he mahani fakatane mo e fifine holifono? (1 Tesalonia 4:3-5) Ka e kua e laulahi he tau leo kofe he lalolagi? Ne pehe e ofisa leoleo fifine fakaako fakamahani a California: “Na fa mahani, ke fakaako he tau leo kofe kua nakai lata a koe ke fanogonogo ke he hau a tau mamatua, mo e kua lata ia koe ke moui ke he puhala ne manako a koe ki ai.” Kua mailoga nakai e koe e punaaga he fakaakoaga ne moua mai e tau leo kofe pihia?
10 Liu la manamanatu ki a Satani ne tala age ki a Eva: ‘Kua to noa a koe. Kia moui ke he puhala moui ne manako a koe ki ai. Kia manamanatu ke he hau a loto ko e heigoa e mena kua mitaki mo e heigoa e mena kua kelea. Nakai lata ia koe ke fanogonogo ke he Atua.’ (Kenese 3:1-5) Nakai kia ko e vahega fekau taha ia ni ne kitia ai ke he laulahi he tau leo kofe he lalolagi? Ka e nakai fakaako mai e tau temoni he tau leo kofe ni hokoia. Ne fakaaoga foki e lautolu e tau fakaholoaga televisoni tutuli tupe, tau ata kifaga, mo e tau vitio ke fakaako. Fakaako fefe? Ko e tau puhala matutakiaga he lalolagi kua fakakite e tau fakafiafiaaga tino ke eke e tau fakaakoaga mitaki he Atua mo mena mamafa. Ne lagomatai e lautolu e feuaki he liu fatiaki mo e fakakite ai tuga ko e mena fulufuluola ke manako ki ai.
11. Ke vagahau fakamitaki, ko e heigoa he televisoni ne fakaako tumau?
11 Ne talahau he mekasini U.S.News & World Report: “He tau 1991, ko e tolu [F.K.] e matakau poki televisoni ne fakatata molea e 10,000 he tau mena tutupu he mahani fakatane mo e fifine he magaaho afiafi; ma e tau ata oti ne fakakite mai e fakafetui fakatane mo e fifine he tau hoa mau, ne fakakite he tau matakau poki televisoni 14 e tau ata ke he tau mahani fakatane mo e fifine i fafo he fakamauaga.” He fakakite kua molea e 9,000 he tau mena tutupu he tau mahani fakatane mo e fifine he magaaho afiafi ia ke he taha e tau, ti ko e heigoa hau a talahau ke he tau fakaakoaga televisoni? Ko e tagata tane ko Barry S. Sapolsky, ko ia ne kau fakalataha ke tohi e hokotaki ke he “Mahani Fakatane mo e Fifine he Televisoni he Magaaho Afiafi: Fakafetataiaki e 1979 Mo e 1989,” ne talahau: “Kaeke ke totou tau e kitekite he fuata tote e tivi ke he tau tagata ne taute e mahani kalahi po ke aga fakateteki, to fakaako he tau afe ata nei a lautolu he tau tau loga ke kitia na mitaki lahi e mahani fakatane mo e fifine—mo e nakai ha ha i ai ha lauiaaga.” Kua nakai fai huhu ke he mena nei: Kua fakaako he tau fakafiafiaaga tino he lalolagi e tau fanau ikiiki ke pehe ko e nakai fai fakatufono, mena ataina e feuaki, mo e nakai fai lauiaaga kelea ka momoui ke he puhala ne vihiatia he Atua.—1 Korinito 6:18; Efeso 5:3-5.
12. Ko e ha e tau fakafiafiaaga tino he lalolagi ne tuku e hagahaga kelea pauaki ke he tau fuata Kerisiano?
12 Ko e tau leo kofe he lalolagi, tau kifaga, tau vitio, mo e tau televisoni ne talaga ke uiina aki e tau fuata. Kua to e lautolu e tau fakaakoaga fakakelea he tau temoni! Ka kua ofo kia e mena nei? Manamanatu la ke he mena nei. Kaeke ko e tau lotu pikopiko mo e tau politika ko e taha vala he lalolagi a Satani—mo e kua kitia mitaki ko lautolu ni—ti fai kakano nakai ke talitonu ko e tau fakafiafia tino ne fakalaulahi he lalolagi kua ataina mai he hufiaaga temoni? Mua atu ko mutolu ko e tau fuata kua lata ke puipui ke aua neke “fakaata e lalolagi ne viko takai ia koe ke pepela a koe ke he hana a feakiaga.”—Roma 12:2, The New Testament in Modern English, ne tohia e J. B. Phillips.
Taute e Kamatamata Fakatagata
13. Ko e heigoa e kamatamata fakatagata kua lata ke taute?
13 Ko e vala ke he ha hai e tau fakaakoaga ka fanogonogo a koe ki ai kua kitia ai nakai ke he hau a tau vagahau ni hokoia ka e pihia foki mo e hau a tau gahua. (Roma 6:16) Ti huhu hifo ki a koe, ‘Kua pikitia fakahaupo kia haku a tau aga mo e haku a puhala he moui he tau mena haku ne fakaako mai he tau puhala fakaohooho he lalolagi? Kua maeke kia he tau fakaakoaga he tau temoni ke taute e tau kaavahala i loto he moui haku?’ Ke lagomatai aki a koe ke tali e tau huhu pihia, ko e ha ne nakai fakatatai ai e lahi he magaaho mo e malolo ne fakamole e koe ke fakaako e Tohi Tapu, fano he tau feleveiaaga Kerisiano, mo e tutala ke he falu hagaao ke he Kautu he Atua mo e magaaho ne fakamole ke kitekite tivi, fanogonogo ke he tau leo kofe, fano ke he hau a tau feua sipote mahuiga, po ke taute e tau vala gahua pihia? Ha kua lahi mahaki pihia—moli ni, ko e moui ni hau—kua hoko ke he tuaga vihi, ke taute e kamatamata fakatagata fakamoli.—2 Korinito 13:5.
14. Ko e heigoa ka lauia ai ha tautolu a malolo fakaagaga, mo e ko e heigoa e manatu moli kua lata ia tautolu ke tokaloto?
14 Kua maama mitaki ia koe ko e tau mena kai he tino ne kai e koe to lauia ai hau a malolo tino. Pihia ni, ko e hau a malolo fakaagaga kua lauia ai he tau mena ne fagai aki e koe hau a manamanatuaga mo e loto. (1 Peteru 2:1, 2) Kaeke kua fakahehe e koe a koe hagaao ke he tau mena hau ne fiafia moli ki ai, ka e nakai maeke ia koe ke fakahehe ha tautolu a Ikifakafili, ko Iesu Keriso. (Ioane 5:30) Ti huhu hifo ki a koe, ‘Kaeke ko Iesu ha he lalolagi, to ma nakai au ke uiina a ia ke hu mai ke logona haku a tau leo kofe po ke kitia haku a mena ne kitekite?’ Ko e tala moli hanai kua kitekite mo e iloa e Iesu ha tautolu a tau gahua.—Fakakiteaga 3:15.
Totoko e Tau Fakaakoaga he Tau Temoni
15. Ko e ha kua lata e tau Kerisiano ke tau fakamalolo ai ke totoko e tau fakaakoaga he tau temoni?
15 Ko e malolo ne tuku he tau temoni ke he tau fuata ke fanogonogo ke he ha lautolu a tau fakaakoaga kua lahi ue atu. Ko e tau agelu kelea nei tuga kua foaki e moui ne vave lahi e tauiaga—taha mena ne toka ai e fefeua mo e fiafia. Ke maeke ke fakafiafia e Atua, ne tiaki e Mose i tuai e “fiafia ke he hala kua mole vave” ko e tagata tokoluga he fale a Farao. (Heperu 11:24-27) Kua nakai mukamuka ke tiaki e tau mena ne foaki he tau temoni, ti kua lata ia koe ke tau fakamalolo ke taute e tau mena kua tonu. Kua moli pauaki e mena nei ha kua tupu hake ni mo tautolu e hala mo e ha tautolu a tau loto kua fa mahani tumau ni ke manako ke taute e tau mena hehe. (Kenese 8:21; Roma 5:12) Ha ko e tau fatuakiloto agahala, ne hoko foki ki a Paulo e fakamao ni e ia a ia mo e nakai fakaata hana tau manako he tino ke pule ki a ia.—1 Korinito 9:27; Roma 7:21-23.
16. Maeke fefe he tau fuata ke totoko e malolo ke fakalavelave ke he puhala he mahani kelea?
16 Pete ni kaeke kua kamatamata a koe ke “mui atu a koe ke he tokologa ke mahani kelea,” kua maeke ni he Atua ke lagomatai a koe ke totoko e malolo mai he tau kau atutaha hau he tutuli ha lautolu a tau fakaakoaga hehe. (Esoto 23:2; 1 Korinito 10:13) Ka e kua lata a koe ke fanogonogo ke he tau puhala he Atua, kia tokiofa hana tau talahauaga ke he hau a loto. (Salamo 119:9, 11) Kua lata ia koe ke mailoga ko e magaaho ka nonofo e tau fuata hoko lautolu ni, to maeke ni ke ati hake e manako mahani fakatane mo e fifine mo e takitaki atu ke moumou e matafakatufono he Atua. “Ko e magaaho ne nofo ai au mo e kapitiga tane haku, ne manako e tino haku ke taute taha e mena ka e tala mai he uhoniu haku ki a au ke taute e taha mena kehe foki,” he talahau he taha fuata fifine. Ti kua lata ke kitia mitaki hau a kaupaaga mo e mailoga ko e loto hau kua mua he fakavai. (Ieremia 17:9) Aua neke nofo tokotaha a koe. (Fakatai 18:1) Kia fakatoka e kaupaaga he tau fakatutalaaga fakaalofa hohofi. Mo e ko e mena aoga lahi pauaki, kia nofo fakatata ni ki a lautolu ne fakaalofa ki a Iehova mo e hokulo e fakalilifu ke he hana tau fakatufono.—Salamo 119:63; Fakatai 13:20; 1 Korinito 15:33.
17. Ko e heigoa ne maeke ke lagomatai aki e tau fuata Kerisiano ke moua e malolo ke totoko e tau fakaakoaga he tau temoni?
17 Ko e fakaako fakamitaki he tau tohi Kerisiano ne tauteute ma e fakamaloloaga fakaagaga hau ka lagomatai aki a koe. Ke fakamaama, kia onoono la ke he tohi Questions Young People Ask—Answers That Work mo e veveheaga “Ko e Tau ke Taute e Mena kua Hako” i loto he tohi You Can Live Forever in Paradise on Earth. Kia toka e tau kupu he tau Tohiaga he foaki ke tomo fakahokulo hifo ke he manamanatuaga mo e loto hau, mo e to fakamalolo aki a koe. Ka ko e taha mena moli, kua nakai lata ia koe ke nimo ko e ha ha he lalolagi nei ne pule e tau temoni ke taute e tau mena tonu kua nakai mukamuka. Ti tau fakamalolo. (Luka 13:24) Kia ati hake hau a malolo fakaagaga. Ua fifitaki ki a lautolu ne lolelole, ko lautolu ne matakutaku ne mumui atu ke he tokologa.
Aoga Mai he Fakaakoaga Faka-Atua
18. Ko e heigoa falu he tau mena aoga he fanogonogo ke he fakaakoaga faka-Atua?
18 Kia manatu, foki, to nakai to noa a koe he ha mena taha ne aoga moli ka fanogonogo a koe ke he fakaakoaga a Iehova. Kua fakaalofa moli a ia ki a koe, mo e ko e mena haia ne ‘fakaako atu e ia kia koe ke he tau mena ke aoga ai.’ (Isaia 48:17) Ti fanogonogo ke he fakaakoaga a Iehova, mo e tiaki e loto mamahi he manamanatuaga malona, ko e galo he fakalilifu he tagata, ko e fatu noa, tau gagao ne uta fano he mahani fakatane mo e fifine, po ke tau matematekelea pihia. Kua olioli e loto a Iehova he magaaho ka moua he hana tau fekafekau e tali ma hana ke he paleko a Satani ne pehe to nakai tumau e tua he tau tagata ke he Atua kaeke ke kamatamata. (Iopu 1:6-12) Kaeke ke fakafiafia e koe e loto a Iehova he tua fakamoli ki a ia, to hao a koe he magaaho ka tamai e ia e fakafiliaga totoko ke he lalolagi nei, ka ko lautolu ne vihiatia e tau matafakatufono hana to fakaotioti ni.—Fakatai 27:11; 1 Korinito 6:9, 10; 1 Ioane 2:17.
19. Ko e heigoa e mena uho he fakalataha mo lautolu ne fakaaue ke he tau mena aoga he fakaakoaga a Iehova?
19 Kaeke ke fakalataha fakatata atu a koe mo lautolu ne fakaaue ke he tau mena ne taute e Iehova ma lautolu, to fai mena iloa a koe mai he ha lautolu a tau mena iloa. Ne fakamaama he taha fifine ne fakaaoga vaikona tumau fakamua mo e taute e tau mahani kelea ne pehe: “Ane mai nakai fanogonogo au ki a Iehova, kua fita au he mate. Ko e tagata ka mau e au kua mate tuai ha ko e AIDS. Ko e haku a tau kapitiga he lalolagi he magaaho fakamua kua mamate oti ha ko e AIDS po ke haia a lautolu hane fenoga atu he puhala ke mamate. Na fa kitia tumau e au a lautolu he tau puhalatu, mo e fakaaue au ki a Iehova he tau aho oti ma e hana tau matafakatufono ne takitaki aki hana tau tagata mo e to leveki aki a tautolu ke tapu kaeke ni ke fakagahua e tautolu. Nakai la fiafia pihia ia au tali mai, makona e loto, mo e haohao mitaki he haku a moui.” Ko e moli ni, ko e fanogonogo tumau ke he tau fakaakoaga a Iehova kua fakatumau ke aoga lahi ma tautolu!
Taute e Fifiliaga Tonu
20, 21. (a) Ko e heigoa e tau fifiliaga ua ne moua he tau fuata? (e) Ko e heigoa e tau mena aoga mau tumau ka fua mai he fanogonogo ke he fakaakoaga faka-Atua?
20 Kua poaki atu a mautolu ki a mutolu ko e tau fanau fuata: Kia taute e fifiliaga tonu he fekafekau ki a Iehova. Ka oti ia ti fakamalolo ke tapiki ke he manatu ia. (Iosua 24:15) Na fa mahani, ko e maeke ni a koe ke taha po ke ua e fifiliaga ka taute. Ne pehe a Iesu ha ha i ai e puhala pulahi mo e ata—ko e puhala mukamuka ke taute e mena kua fiafia e tagata ki ai. Ko e puhala ke takitaki atu ke he fakaotiaga, ko e moumouaga. Ko e taha puhala kua apitia lahi. Ko e puhala uka lahi ke fano moui he ha ha he lalolagi nei, kelea ne pule e tau temoni ki ai. Ka ko e puhala ia to uta a lautolu ne o i ai ke hohoko ke he lalolagi fou fulufuluola he Atua. (Mataio 7:13, 14) Ko e puhala fe hau ka fano ai? Ko e fakaakoaga ha hai hau ka fanogonogo ki ai?
21 Kua toka ni e Iehova e fifiliaga ki a koe. Ne nakai lali a ia ke fakaohooho a koe ke fekafekau ki a ia. “Kua tuku atu e au ki mua ha mutolu e moui mo e mate,” ne talahau he perofeta he Atua ko Mose, mo e pehe: “Kia fifili la e moui.” Ko e fifiliaga nei na taute he “fakaalofa atu a koe kia Iehova hau a Atua mo e fanogonogo ke he hana leo, mo e pipiki atu a koe ki a ia.” (Teutaronome 29:2; 30:19, 20) Kia fifili fakailoilo la e koe ke fanogonogo ke he fakaakoaga faka-Atua mo e olioli e moui nakai fai fakaotiaga he lalolagi lilifu fou he Atua.
To Tali Fefe e Koe?
◻ Ko hai e tau temoni, mo e ko e heigoa ha lautolu ne fakaako?
◻ Fakalaulahi fefe he tau temoni ha lautolu a tau fakaakoaga he vaha nei?
◻ Maeke fefe ke totoko e tau fakaakoaga he tau temoni?
◻ Ko e heigoa e tau mena aoga he omaoma ke he fakaakoaga a Iehova?
[Fakatino he lau 14]
Fakamua ato hoko e Fakapuke, ne fakalaulahi he tau agelu liuliu mo e ha lautolu a tau fanau e mahani vale mo e muikau
[Fakatino he lau 16]
Ma nakai a koe kaeke ke logona e Iesu e tau leo kofe mahuiga hau?