Kia O Tuga ne Fakaako he Atua

“O mai a, kia o hake a tautolu ke he mouga a Iehova, . . . to fakaako mai e ia a tautolu ke he hana tau puhala, ti o ai a tautolu ke he hana tau puhala.”​—MIKA 4:2.

1. Hagaao ki a Mika, ko e heigoa he Atua ka taute ma e hana a tau tagata ke he tau aho fakamui?

NE TALAHAU tuai he perofeta he Atua ko Mika ko e “tau aho a mui,” he vaha ha tautolu, to tokologa ka kumi fakalahi ke he Atua, ke tapuaki ki a ia. Ko e maeke he mena nei ke fefakamaloloaki e taha mo e taha, he pehe mai: “O mai a, kia o hake a tautolu ke he mouga a Iehova, . . . to fakaako mai e ia a tautolu ke he hana tau puhala, ti o ai a tautolu ke he hana tau puhala.”​—Mika 4:1, 2.

2, 3. Fakamoli fefe he vaha nei e talahauaga tuai ha Paulo ke he tau tagata ne loto lahi ke he tupe?

² Ko e ha tautolu a kumikumiaga ke he 2 Timoteo 3:1-5 ke maeke ke lagomatai aki a tautolu ke kitia e tau fua he tau fakaakoaga he Atua he “tau aho fakamui.” Ke he vala tala fakamua, ne kamata a tautolu ke mailoga e tau mena aoga ne fa e moua e lautolu ne toka loto e hatakiaga ha Paulo ke aua neke “ofaofa he tau tagata a lautolu ni.” Ne lafi atu foki e Paulo ko e vaha ha tautolu to tokologa ke ‘manako lahi ke he tupe.’

³ Ne nakai fai tagata ke moua e tau tohi tokoluga mai he tau aoga pulotu ke he tau mena tutupu he vaha nei ke maama e tonuhia he tau kupu ia he vaha ha tautolu. Nakai kia totou e koe e tau takitaki he tau kautaha pisinisi ne nakai makona he moua e tau miliona tupe ke he tau tau takitaha? Ko e tau tagata manako lahi ke he tupe nei kua fakatumau ke loga atu e tau tupe, ti hoko atu foki ke he tau puhala agahala. Kua lata tonu foki e tau kupu ha Paulo mo e tau tagata tokologa he vaha nei, ne nakai muhu koloa, ka e manako lahi agaia, mo e nakai moua e makona. To liga tokologa e tau tagata pihia ne iloa e koe ke he matakavi ne nofo ai a koe.

4-6. Maeke fefe he Tohi Tapu ke lagomatai e tau Kerisiano ke kalo kehe mo e manako lahi ke he tupe?

⁴ Ko e tau mena nei ne tutala a Paulo ki ai nakai kia maeke he tau tagata ke kalo kehe mai ai? Nakai he talahau e Ia ne tohia e Tohi Tapu, ne talahau tuai e mena moli nei he vaha ia: “Ha ko e loto lahi ke he tau tupe, ko e vaka haia he tau mena kelea oti kana; ko e falu foki kua manako lahi ki ai, ti hehe ai a lautolu mai he tua, kua hoka e lautolu a lautolu ti ati ni ke he tau mena matematekelea loga.” Mailoga la, ne nakai pehe e Atua, ‘ko e tau tupe, ko e vaka haia he tau mena kelea oti kana.’ Ka e pehe a ia ko e “loto lahi ke he tau tupe.”​—1 Timoteo 6:10.

⁵ Ko e mena fulufuluola lahi, ko e tala katoa he tau kupu a Paulo ne talahau mai ko e ha ha i ai e tau Kerisiano mitaki he senetenari fakamua ne maukoloa ke he tau mena he fakatokaaga nei, ne moua mai he ha lautolu a tau mamatua po ke moua ne lautolu he gahua ki ai. (1 Timoteo 6:17) Kua ha ha i ai e tau fakamoliaga, pete ne kehekehe e tau tutuaga moua mena ha tautolu, ne poaki mai he Tohi Tapu ki a tautolu e hagahaga kelea he loto lahi ke he tau tupe. Foaki mai foki nakai he Tohi Tapu e falu a fakaakoaga ke kalo kehe mai he matematekelea lahi nei mo e nakai katoatoa ne fa mahani ki ai? Ko e moli ko e mena foaki mai tuga, a ia he Lauga ha Iesu he Mouga. Ne mahuiga ke he lalolagi katoa e pulotu ia. Mailoga la, tuga e fakatai he talahauaga ha Iesu he Mataio 6:26-33.

⁶ Tuga ne fakamau he Luka 12:15-21, ne vagahau a Iesu hagaao ke he maukoloa ne foli tumau ke fakaputu e tau koloa loga ka e galo fakalutukia e moui hana. Ko e heigoa e fakakakano ha Iesu? Ne pehe a ia: “Kia leveki e mutolu a mutolu neke velevele mena; ha ko e mena nakai moui taha he loga hana a tau mena ha i ai.” Fakalataha mo e fakatonuaga pihia, ne vihiatia he Tohi Tapu e mahani teva ka e fakamalolo e mahani ke gahua fakamoli. (1 Tesalonia 4:11, 12) To liga totoko e falu ke he tau fakaakoaga nei mo e pehe kua nakai lata mo e vaha ha tautolu​—ka e lata tonu a lautolu, mo e gahuahua mo e kautu e tau mena ia.

Fakaako mo e Aoga

7. Ko e heigoa e kakano ne mauokafua a tautolu ko e maeke ia tautolu ke kautu e fakagahuaaga he tau fakatonuaga he Tohi Tapu hagaao ke he tau koloa loga?

⁷ Ke he tau motu loga, to moua e koe e tau fakafifitakiaga moli he tau tagata tane mo e tau fifine mai he tau fakalatahaaga mo e fakatupe tutuaga kehekehe ne kua fakagahua e tau matapatu fakaakoaga faka-Atua ne hagaao ke he tau tupe. Ne kua lahi e aoga ma lautolu mo e ha lautolu a tau magafaoa, ti pihia foki ni he kitia mai e lautolu i tua. Tuga a nei, ke he tohi Reli­gious Movements in Contemporary America, mai he tagata tohi tala he Aoga Pulotu i Princeton, ne tohia ai he tagata kumikumi ke he tau mahani he tau tagata: “Ke he tau tohi fakailoa [he Tau Fakamoli] mo e tau lauga he fakapotopotoaga ne liu fakamanatu ki a lautolu ke nakai falanaki a lautolu ke he tau motoka fou, tau mena tui tau uka, po ke moui monuina ma e ha lautolu a tau tutuaga. Ka ko e magaaho taha ia foki ko e Fakamoli ke foaki ma e pule gahua hana e gahua mitaki ma e aho mo e mahani fakamoli . . . Ko e tau mahani pehe nei ke aoga e tagata nakai fai iloilo ke he hana a pule gahua, mo e falu a Tau Fakamoli i Philadelphia Tokelau [F.K.A.] ne kua moua e tau tutuaga tokoluga he tau gahuaaga.” Ne mahino mitaki, ko e tau tagata ne talia e tau fakaakoaga mai he Atua ne puhala mai he hana a Kupu ne mataala ke he tau agaga ne fakaauatu e uka ke gahua ke he tau tutuaga he vaha nei. Ne fakamoli he tau momoui ha lautolu ko e takitaki he tau fakaakoaga he Tohi Tapu a lautolu ke moua e moui fiafia mitaki lahi.

8. Ko e ha ne matutaki ai e “hula noa,” “fakatokoluga,” mo e “vagahau kelea,” mo e ko e heigoa e kakano he tau kupu tolu nei?

⁸ Maeke ia tautolu ke tututaki e tau mena tolu ne tohi e Paulo. Ke he tau aho fakamui, to ha ha i ai e tau tagata “hula noa, to fakatokoluga, to vagahau kelea.” Ne nakai fetataiaki e tau mahani nai ne tolu, ka e fetataiaki ke he fakaikaluga. Ko e mena fakamua ko e “hula noa.” Ne fakamaama mai he tohi fakamaama kupu e kakano he kupu Heleni nei: “‘Ko ia ne fakalahi ki luga e moli hana,’ po ke ‘mavehe e tau maveheaga ne nakai maeke ia ia ke taute.’” Maeke ia koe ke maama e falu a Tohi Tapu ne fakaaoga e “fakahakehake.” Ne mui mai e “fakatokoluga,” po ke “onoonoaga tokoluga.” Ko e mena ne ­fakamuiaki, ko e “vagahau kelea.” Ko e falu ne manamanatu ko e tau tagata vagahau kelea ko lautolu haia ne vagahau mo e nakai fai fakalilifuaga ke he Atua, ka ko e kakano foki ko e fakamamahi, ekefakakelea, po ke tau vagahau pilo ke he tau tagata. Ti ko e tala a Paulo ke he tau vagahau ekefakakelea ke he Atua mo e tagata.

9. Ko e kehekeheaga mo e tau mahani kelea ne tupu lahi ai, ko e heigoa e tau mahani ne fakamalolo he Tohi Tapu e tau tagata ke taute?

⁹ Fefe e logonaaga hau ka nofo fakalataha a koe mo e tau tagata pihia ne tuga he fakamaama mai e Paulo, ko lautolu ne gahua fakalataha mo koe, tau kapitiga aoga, po ke tau magafaoa? Fakamukamuka nakai hau a moui? Po ke fakaauatu he tau tagata pihia e uka he hau a moui, ke une atu ki mua e vihi kia koe he fehagai mo e vaha nei ha tautolu? Ko e Kupu he Atua ne fakaako mai ki a tautolu ke tiaki e tau agaga pehe nei, ne foaki mai e tau fakatonutonuaga tuga aia ne moua mai ia 1 Korinito 4:7; Kolose 3:12, 13; mo e Efeso 4:29.

10. Ko e heigoa e tau fakamoliaga ko e tau tagata a Iehova ne monuina ha ko e taliaaga he tau fakaakoaga mai he Tohi Tapu?

¹⁰ Pete ne nakai katoatoa e mitaki he tau Kerisiano, ka e fakagahua e lautolu e tau fakaakoaga mitaki nei ti maeke ke lahi e lagomatai ki a lautolu ke he vaha uka nei. Ko e senolo Italia La Civiltà Cattolica ne pehe ko e taha kakano ne tupu lahi e Tau Fakamoli a Iehova ko e “fakatokatokaaga ne malolo lahi e tau fakaakoaga ke he hana a tau tagata.” Ko e pehe ke kakano he “malolo lahi e tau fakaakoaga” he tagata tohi tala ko e “hula noa, fakatokoluga, vagahau kelea”? Nakai, ko e mekasini Iesuiti ne mailoga ko e fakatokatokaaga ne “malolo lahi e tau fakaakoaga ke he hana a tau tagata, ti ko e mena foki ma lautolu ne ha ha i ai e mafanatia mo e agaga fakamatakainaga mo e moua e fakaveaga.” Nakai kia ko e fakamoliaga ko e tau mena ne fakaako he Tau Fakamoli ne lagomatai aki a lautolu?

Fakaakoaga kua Aoga ke he Tau Tagata he Magafaoa

11, 12. Fakakite fakatonu mai fefe e Paulo e tuaga he tokologa he tau magafaoa?

¹¹ To fakapotopoto e tautolu e tau mena ne fa ne mui mai, ne kua fetataiaki e tau kakano. Ne talahau tuai e Paulo ke he tau aho fakamui, to tokologa ka “faliuliu ke he tau matua, to nakai fakaaue, to mahani kelea, to nakai fai fakaalofa.” Ne iloa e koe e ua e tau mena kelea nei​—nakai fai fakaaue mo e nakai mahani fakamoli​—kua holofa ia ki a tautolu. Ka e pete ni ia, mukamuka ia tautolu ke maama e kakano ne tuku e Paulo a laua ke he vahaloto he “faliuliu ke he tau matua” mo e “nakai fai fakaaue.” Ne fetataiaki e tau kakano ne fa.

¹² Ke he tagata onoono, ko ia ne fuata po ke fuakau, ne talahau moli kua tupu lahi e faliuliu ke he tau matua, ti ko e tolomaki ni ki mua e kelea muikau. Tokologa e tau mamatua ne pehe ko e nakai fai fakaaue e tau fuata ke he tau mena oti ne feaki aki a lautolu. Tokologa e tau fuata ne totoko ko e tau mamatua ha lautolu ne nakai fakamoli ki a lautolu (po ke ke he laulahi he magafaoa) ka ko e tanumia ni ke he ha lautolu a tau gahua, tau fakafiafiaaga, po ko lautolu ni. He lali ke kumi ko hai ne hepe, onoono la ke he tau fua ne moua mai. Ko e fekehekeheaki he tau tagata lalahi mo e tau fuata ne takitaki atu e tau fuata mui ke pule ni a lautolu ke he ha lautolu a tau tutuaga he mahani mitaki, po ke nakai mahani mitaki. Ko e tau fua ne moua mai? Ko e tokologa he tau fuata mui ne fatu noa, moumou e tau fanau ki loto he tau manava, mo e tau gagao feutaaki ha ko e mahani fakatane mo e fifine. Ko e fa mahani, nakai fai fakaalofa ke he loto kaina ati ha ha i ai e tau mahani vale. Liga maeke ia koe ke mailoga e tau fakataiaga ke he hau a matakavi, ke eke ia mo fakamoliaga kua nakai ha ha i ai e fakaalofa hohofi.

13, 14. (a) Ha ko e tokologa e tau magafaoa ne malolo ki lalo, ko e ha ne lata tonu ia tautolu ke hagaao atu ke kikite ke he Tohi Tapu? (e) Ko e heigoa e fakatonuaga pulotu ne foaki mai he Atua ma e moui magafaoa?

¹³ Maeke he mena nei ke fakamaama e kakano ne tokologa e tau tagata ne totoko ki a lautolu ne eke ai mo vala he magafaoa, taha e tupuna, po ke matakau. Ka e manatu, ko e taha e mena, nakai fatiaki e mautolu e tau mena nei ke fakamatoho aki e hagahaga kelea pauaki he moui he vaha nei. Ko e ha tautolu a tau mena uho ne ua: Maeke nakai he tau fakaakoaga he Tohi Tapu ke lagomatai a tautolu ke kalo kehe mo e tau mamahi ne tohi fakapapale mai e Paulo, mo e fai aoga nakai ki a tautolu ka fakagahua e tau fakaakoaga Tohi Tapu ke he ha tautolu a tau moui? Ko e tali e, tuga ne fakamoli he tau mena ia ne fa ne tohi e Paulo.

¹⁴ Ne fai tonu e talahauaga ne pehe: Nakai fai fakaakoaga ne mua hake mai he Tohi Tapu ke moua e moui fakamagafaoa ne mafanatia ke he loto mo e mitaki e tau kautuaga. Ko e moua ni ha ko e tau fakatonuaga hana ke lagomatai aki a lautolu i loto he magafaoa nakai ni ke kalo kehe mo e tau fakakaumahalaaga ka e ki a ha ha i ai e kautu. Kolose 3:18-21 ne fakamahino mai e mena nei, pete ni e ha ha i ai foki e tau veveheaga fulufuluola mo e gahuahua ne hagaao atu ke he tau tane, tau hoana, mo e tau fanau. Maeke e tau fakaakoaga nei ke kautu ke he vaha nei ha tautolu. Ko e moli, pihia ke he tau magafaoa he tau Kerisiano moli, ne ha ha i ai e tau mena vihi mo e tau totoko. Ka e taha e mena, ko e tau fua ne moua mai ke fakamoli ko e ha ha he Tohi Tapu e tau fakaakoaga ke lagomatai aki e tau magafaoa.

15, 16. Ko e heigoa e tuaga ne kitia he fifine kumikumi he kumikumi e ia e Tau Fakamoli a Iehova i Samipia?

¹⁵ Ke he taha mo e hafa e tau, ko e tagata kumikumi mai he Aoga Pulotu i Lethbridge, Kanata, ne kumikumi ke he tau momoui i Samipia. Ko e talahauaga he fifine nei: “Ne kautu e Tau Fakamoli a Iehova ka fakatatai ki a lautolu he falu a fakapotopotoaga ke taofi e fakaveaga mau nivaniva he tau fakamauaga. . . . Ko e ha lautolu a kautu kakano ha kua fehikiaki kua lata ke he fakafetuiaga he vahaloto he tane mo e hoana, ke he ha laua a tau foliaga, nakai fakamatakutaku, laliaga ke kaufakalataha, kua eke mo fakalagoaga ke he ha laua a fakafehagaiaga mo e taha ke he takitaki fou, ko e Atua. . . . Kua fakaako e tane Fakamoli a Iehova ke motua ke hahamo e matagahua ke lata mo e mitaki he hana hoana mo e fanau. . . . Kua fakamalolo ke he tau tane mo e tau hoana ke eke mo tau tagata ne ha ha i ai e fakamoli . . . Ko e fakamoli nei ke mau nivaniva tuga e timeni ke he fakamauaga.”

¹⁶ Ko e tau kumikumiaga ia ne fakave aki e tau mena tutupu moli. Tuga a nei, ne talahau pehe e tagata kumikumi nei, ne kehe mai he aga ne fa mahani mau ki ai, “ko e tau tagata tane Fakamoli a Iehova ne kitia he lagomatai ha lautolu a tau hoana ke he tau katene, nakai ni ke he magaaho ne fakamea e katene, ka e lagomatai foki ke to mo e keli.” Ti kua fakamoli ko e tau mena tutupu he lalolagi katoa kua fakakite mai kua aamohia he tau fakaakoaga he Tohi Tapu e tau momoui.

17, 18. Ko e heigoa e tau fua ofoofogia ne moua mai he kumikumiaga ke he nonofo ke he tau lotu mo e mahani fakatane mo e fifine ato hoko e fakamauaga?

¹⁷ Ko e vala tala fakamua ne talahau e tau kumikumiaga he Journal for the Scientific Study of Religion. He tau 1991 ne toka ai e vala tala ne mataulu “Ko e Tupumaiaga he Lotu mo e Mahani Fakatane mo e Fifine ato Hoko e Fakamauaga: Tau Fakamoliaga Mai he Fakatai Fakamotu he Tau Fuata Lalahi.” Ne fita he iloa e koe e tupu lahi he mahani fakatane mo e fifine ato hoko e fakamauaga. Ko e tau fanau fou ne tokologa ne velagia, mo e tokologa e tau fuata ne tokologa e tau hoa ke he mahani fakatane mo e fifine. Maeke nakai he tau fakaakoaga he Tohi Tapu ke hiki e aga mahuiga nei?

¹⁸ Tokotolu e tau porofesa ne kumikumi e matakupu nei mo e amanaki ke kitia ko e tau ‘fuata mui mo lautolu kua lalahi ne feaki ke he mahani Kerisiano to nakai fakalataha ke he tau faivao to hoko e fakamauaga.’ Ka e fefe he fakakite mai he tau kumikumiaga? Ke he mena katoa, ke he vahaloto he 70 pasene mo e 82 pasene ne kua fita he mahani fakatane mo e fifine ka e nakai fai fakamauaga. Ma e falu “ko e fakaakoaga fakatino kua fakatupu ka [fakatokomuli ki tua] e mahani fakatane mo e fifine ato hoko e fakamauaga, ka e nakai ki a lautolu e ‘tau fuata mui ne mahani fakatane mo e fifine ato hoko e fakamauaga.’” Ko e talahauaga he tau tagata kumikumi ke he falu fuata mai he tau magafaoa o lotu ne “fakakite e fakatata ne mua atu he mahani fakatane mo e fifine ato hoko e fakamauaga ka fakatatai atu ki a lautolu e tau Porotesano.”​—Tau fakalilifa tautolu.

19, 20. Maeke fefe he tau fakaakoaga he Atua ke lagomatai mo e puipui e tau fuata tokologa he Tau Fakamoli a Iehova?

¹⁹ Ne kitia he tau porofesa e kehe lahi ke he tau fuata he Tau Fakamoli a Iehova, ko lautolu he “matakau ne kehe lahi mai he falu.” Ko e ha? “Ko e tuaga he gahua mo e fakafetuiaga fakalataha, ha ko e tau mena tutupu, tau amaamanakiaga, mo e tau putoiaaga . . . to liga moua mai e piki lahi ke he tau matapatu fakaakoaga he tua.” Ne lafi atu e lautolu: “Ne amanaki foki e Tau Fakamoli ke gahua ke he tau matagahua misionare ke tuga e tau fuata mui mo e tau fuata lalahi.”

²⁰ Ti ko e tau fakaakoaga Tohi Tapu ne lauia ai e Tau Fakamoli a Iehova ma e mitaki he lagomatai a lautolu ke kalo kehe mai he tau mahani kelea. Ko e fua ko e puipuiaga mai he tau gagao pikitia ha ko e mahani fakatane mo e fifine, ko e falu ne nakai fai tului, mo e falu ne mamate. Ko e kakano nakai fai peehiaga ke moumou tama ke he tau manava, ne fakaako he Tohi Tapu ko e tatai ni mo e utakehe he moui. Ko e kakano foki ko e maeke he tau fuata ke moua e fakamauaga mo e tau loto manamanatu mea. Ko e kakano he mena nei ko e fakamauaga kua fakave he fakaveaga mao nivaniva. Ko e tau vahega fakaakoaga pehe nei ke lagomatai aki a tautolu ke kautu, ke moua e tino malolo, mo e fiafia lahi.

Fakaakoaga Mitaki

21. Ko e heigoa e tau mena ne tonuhia e talahauaga ha Paulo ma e vaha ha tautolu?

²¹ Liliu a tautolu he magaaho nei ke he 2 Timoteo 3:3, 4, mo e mailoga ko e heigoa foki falu mena ha Paulo ne talahau ati uka ai e vaha ha tautolu ma e tokologa​—ka e nakai ma e tau tagata oti: “[Tokologa e tau tagata ne] nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, To afo tagata, to mahani fakahanoa, to fakatokoluga, [mo e] to manako lahi ke he tau mena ke fiafia ki ai, ka e manako tote ke he Atua.” Ko e tonuhia ha a ia! Ka e pete ni ia, maeke agaia ne tau fakaakoaga he Tohi Tapu ke puipui a tautolu mo e fakakoloa a tautolu ke maeke ke kautu.

22, 23. Ne fakaoti aki e Paulo e tohi hana aki e tomatomaaga mitaki fe, mo e ko e heigoa e hana aoga?

²² Ne fakaoti e Paulo hana a tohi e tomatomaaga. Ne taute e ia e mena fakahiku ke eke mo poakiaga he mahani-Atua ke moua aki e tautolu e tau mena aoga kua nakai fai fuafuaaga. Ne talahau e Paulo a lautolu ne “gati he mahani Atua, ka kua tiaki e lautolu e malolo ne toka ai; kia kalo kehe a koe mo e tau tagata pihia.” Manatu ko e tau fuata he falu he tau lotu ne mua atu e tokoluga he mahani fakatane mo e fifine ato hoko e fakamauaga ka fakaevalesi. Ko e ha, kaeke ko e mahani kelea ha lautolu ia ne o tapu ne hoko ni ke he tuaga fakaevalesi, nakai kia ko e fakamoliaga ko e nakai toka ai e malolo ke he ha lautolu a tapuakiaga? Ko e taha mena foki, hiki nakai he tau fakaakoaga he tau lotu e tau mahani he tau tagata ne gahua pisinisi, ke he ha lautolu a fakafehagaiaga mo lautolu i lalo, po ke puhala ne taute aki e tau magafaoa?

²³ Ne fakakite mai he tau kupu ha Paulo kua lata a tautolu ke fakagahua e tau fakaakoaga ha tautolu mai he Kupu he Atua, ke ha ha i ai e puhala tapuaki ne fakakite e malolo moli he faka-Kerisiano. Ke lata mo lautolu ne nakai toka ha malolo ke he tapuakiaga, ne talahau e Paulo ki a tautolu: “Kia kalo kehe a koe mo e tau tagata pihia.” Ko e poakiaga mahino mitaki a ia, ka tamai kia e tautolu e tau mena aoga moli.

24. Tatai fefe e hatakiaga ia Fakakiteaga veveheaga 18 mo e fakatonuaga ha Paulo?

²⁴ Ke he puhala fe ka aoga e poakiaga nei? Ko e tohi fakahiku he Tohi Tapu ne fakatino mai ai e fifine fakatai, ko e fifine fakataka, ne fakahigoa ko Papelonia Lahi. Ne fakakite mai he tau fakamoliaga ko Papelonia Lahi ko e kautu he tau lotu fakavai he lalolagi katoa, ne kua fita he kumikumi mo e tiaki he Atua ko Iehova. Ka e taha e mena, nakai lata a tautolu ke putoia ki a lautolu ne tiaki e Iehova. Ne tomatoma mai he Fakakiteaga 18:4 ki a tautolu: “Haku motu na e, ati o kehe a mutolu ia ia, neke fakalataha a mutolu mo ia ke he hana a tau hala, neke moua foki a mutolu he hana tau malaia.” Nakai kia ko e fekau taha ia ni ne poaki mai e Paulo, ke “kalo kehe a koe mo e tau tagata pihia”? Ko e ha tautolu a omaoma e taha puhala ke maeke ke aoga ki a tautolu e tau fakaakoaga he Atua.

25, 26. Ko e heigoa ne toka mai mua ha lautolu ne talia he magaaho nei mo e fakagahua e tau fakaakoaga mai he Atua ko Iehova?

²⁵ To hoko mai vave e tu mai he Atua ke he vahaloto he tau mena he tagata. To fakaotioti e ia e tau lotu fakavai oti mo e fakatokaaga kelea katoa ne toe he vaha nei. To tupu mai e fiafia he mena nei, tuga ne fakakite mai he Fakakiteaga 19:1, 2. Ke he lalolagi ko lautolu ne talia mo e mumuitua ke he tau fakaakoaga he Atua to fakaata a lautolu ke mumuitua tumau ke he hana a tau fakaakoaga ka mole atu ia e tau mena vihi he vaha uka nei.​—Fakakiteaga 21:3, 4.

²⁶ Ko e moui ke he lalolagi Parataiso ia ka fakafou to mua ue atu e fulufuluola ne nakai maeke ke kitia ke he tau manamanatuaga ha tautolu. Ne mavehe mai he Atua to maeke ia ma tautolu, ti maeke ia tautolu ke falanaki katoatoa ki a ia. Ne tuku mai e ia ki a tautolu loga e tau kakano ke talia mo e mumuitua ke he hana a tau fakaakoaga ne maeke ke lagomatai. A fe? O mai a tautolu ke mumui tua ke he hana a tau fakaakoaga he mogonei he vaha uka ha tautolu ti matutaki atu ke he Parataiso ne mavehe mai e ia.​—Mika 4:3, 4.

Tau Mena ke Manamanatu ki Ai

◻ Aoga fefe ke he tau tagata a Iehova e hana a tau fakatonuaga hagaao ke he tau koloa loga?

◻ Fakamoli fefe he mekasini Iesuiti e tau fua mitaki ne moua he tau fekafekau he Atua ha kua fakagahua hana Kupu?

◻ Ko e heigoa ne moua mai he kumikumiaga i Samipia hagaao ke he tau mena aoga ne moua he tau magafaoa ne fakagahua e tau fakaakoaga he faka-Atua?

◻ Ko e heigoa e puipuiaga ne moua he tau fuata ha ko e tau fakaakoaga mai he faka-Atua?

[Puha he lau 11]

KO E TAU FUA MATEMATEKELEA!

“Ne feleveia e tau fuata mo e hagahagakelea lahi ko e AIDS kakano ha kua manako ke taute e mahani fakatane mo e fifine mo e tau vai kona, kua taute e tau mena hagahagakelea mo e moui ke he tau mena ke fiafia ki ai mo e nakai fai manamanatuaga ma e tau vaha i mua, mo e ha kua logona e lautolu ko e nakai maeke ke mamate mo e totoko ke he tau pule malolo,” ne talahau he hokotakiaga ne fakailoa he fonoaga he AIDS mo e tau fuata.​—New York Daily News, Aho Tapu, Mati 7, 1993.

“Ko e tau tama-a-fine ne lahi e mahani fakatane mo e fifine ne mui mai ko e ‘tau takitaki’ he malaia ko e AIDS, ko e kumikumiaga he Tau Motu Kaufakalataha i Europa, Aferika mo Asia Toga ki uta ne moua.”​—The New York Times, Aho Falaile, Iulai 30, 1993.

[Tau Fakatino he lau 12, 13]

Aoga e tau fakaakoaga he Tohi Tapu ma e Tau Fakamoli a Iehova ki loto he fakapotopotoaga mo e he kaina