Lologo Fakaheke ki a Iehova
“To lologo au kia Iehova, ha kua kautu ue atu a ia.”—ESOTO 15:1.
1. Ko e heigoa e tau mahani mo e tau fua a Iehova kua foaki mai ki a tautolu e kakano ke fakaheke a ia?
LAGA hogofulu ma tolu ne talahau mai he Salamo 150 e poakiaga ke fakaheke a Iehova po ko Ioha. Kua tukuogo he kupu fakahiku: “Kia fakaheke atu kia Ioha e tau mena oti kana kua fafagu. Haleluia.” Ha ko e Tau Fakamoli a Iehova, kua iloa e tautolu kua lata tonu a Iehova mo e tau fakahekeaga ha tautolu. Ko e Pule Katoatoa he Lagi mo e Lalolagi Katoatoa a ia, ko e Tokoluga Mua ue Atu, ko e Patuiki Tukumalagi, ko e Tufuga ha tautolu, ko e Foaki Mena Aoga ha tautolu. Ke he loga e tau mena kua nakai taufata mo taha, kua kehe lahi, nakai fakaai a taha ke tatai mo ia, mo e kua nakai fai foki. Ko ia ne nakai fai kaupaaga e iloilo, ne katoatoa e malolo lahi mahaki ue atu, mitaki katoatoa e fakafiliaga tonu, mo e ko e fakatino katoatoa he fakaalofa. Kua muatua e mitaki hana ia taha; kua mahani fakamoli a ia. (Luka 18:19; Fakakiteaga 15:3, 4) Ti kua lata tonu nakai a ia mo e ha tautolu a fakahekeaga? Kua lata moli lahi a ia!
2. Ko e heigoa e tau kakano kua ha ha ia tautolu ke fakailoa e oue tulou ki a Iehova?
2 Kua lata tonu a Iehova nakai ni hokoia ke he ha tautolu a tapuaki mo e fakahekeaga, ka ko e tau oue tulou mo e fakaaue ha tautolu, ha ko e tau mena oti kana ne taute e ia ma tautolu. Ko ia ne Foaki e “tau mena mitaki oti kua foaki noa mai, katoa mo e tau mena fakaalofa oti kua katoatoa ai e mitaki.” (Iakopo 1:17) Ko e Fakaveaga a ia, ko e Punaaga, he tau momoui oti kana. (Salamo 36:9) Ko e tau mena oti ne kua ha ha ia tautolu oti e olioli ha ko e taha he magafaoa he tagata, ko e mena moua mai ia ia, ha ko ia e Tufuga Homo ue Atu ha tautolu. (Isaia 42:5) Ko ia foki ne Foaki mai e tau monuina fakaagaga oti, ne kua puhala mai he agaga hana ki a tautolu, he hana fakatokatokaaga, mo e hana Kupu. Kua ha ha ia tautolu e fakamagaloaga ke he tau agahala ha kua foaki mai e ia hana Tama mo lukutoto ha tautolu. (Ioane 3:16) Kua ha ha ia tautolu e amaamanakiaga he Kautu ‘ke he lagi fou mo e lalolagi fou, ke nofo ai e tututonu.’ (2 Peteru 3:13) Kua ha ha ia tautolu e feoakiaga mitaki mo e tau faoa Kerisiano. (Roma 1:11, 12) Kua ha ha ia tautolu e lilifu mo e tau monuina ha kua eke mo Tau Fakamoli hana. (Isaia 43:10-12) Mo e ha ha ia tautolu e monuina uho ke he liogi. (Mataio 6:9-13) Kua moli, kua ha ha ia tautolu e tau kakano loga ke foaki atu e tau fakaaue ki a Iehova!
Tau Puhala kua Maeke ia Tautolu ke Fakaheke a Iehova
3. Ko e heigoa e tau puhala kehekehe kua maeke ia tautolu ke fakaheke a Iehova mo e fakailoa ha tautolu a oue tulou ki a ia?
3 Kua maeke fefe a tautolu, ha ko e tau fekafekau loto katoatoa a Iehova, ke fakaheke a ia mo e fakailoa ha tautolu a tau oue tulou? Kua maeke a tautolu ke taute pihia he gahua auloa ke he fekafekauaga Kerisiano—ke he gahua fakamatala ke he taha fale mo e taha fale, liliu ahi atu, taute e tau fakaakoaga Tohi Tapu, mo e taute e gahua fakamatala ke he puhalatu. Kua maeke foki a tautolu ke fakaheke ki a ia he gahua fakamatala nakai fakatoka pauaki he ha magaaho kua tutu mai. Ka e taha foki, kua maeke a tautolu ke fakaheke a Iehova mai he tau mahani hakohako ha tautolu, pihia foki mai he ha tautolu ni a tau puhala tauteute kua maopoopo mo e gali. Ne fa mahani mau ke moua he Tau Fakamoli a Iehova e fakaheke he fa mitaki ke he tau mena nei. Mo e taha mena foki, kua maeke a tautolu ke fakaheke a Iehova mo e fakaaue ki a ia he puhala atu he liogi.—Kikite 1 Nofoaga he Tau Patuiki 29:10-13.
4. Ko e heigoa e taha mai he tau puhala kua mua atu e fulufuluola ne kua maeke ia tautolu ke fakaheke ha tautolu a Matua fakaalofa i luga he lagi?
4 Ke lafi ki ai, ko e taha mai he tau puhala fulufuluola lahi kua maeke ia tautolu ke fakaheke ha tautolu a Matua fakaalofa i luga he lagi he fakahekeheke a ia mo e hana tau mahani tonu-mitaki ke he tau lologo he Kautu kua leo mitaki. Kua tokologa e tau tagata ta kofe mo e tau tagata fati leo fakatagi ne kua talia foki, ko e leo he tagata e kanavaakau fakatagi ne kua mua atu e fulufuluola. Ko e tau tagata iloilo lahi ke he leo fakatagi tuai ne kua omoi ke tohi e tau opera, kakano ha kua lahi mahaki e loto mamakona ka fanogonogo ke he leo he tagata ne kua malagaki hake he lologo.
5. Heigoa e tau kakano ne kua lata ai a tautolu ke uhu fakamoli e tautolu e tau lologo he Kautu?
5 Kua liga olioli lahi na Iehova ke fanogonogo ke he tau uhu lologo he tau tagata, mua atu ka uhu e lautolu e tau lologo fakaheke mo e oue tulou! Kua moli mogoia, kua lata a tautolu ke uhu fakamoli ha tautolu a tau lologo he Kautu he tau toloaga kehekehe ha tautolu—tau feleveiaaga he fakapotopotoaga, tau toloaga he takaiaga, tau aho tolo pauaki, tau fonoaga he fahi motu, mo e tau fonoaga he lalolagi katoa. Kua loga lahi e tau leo mitaki lahi moli ne toka i loto he tau tohi lologo ha tautolu, ko e mena fulufuluola ne kua fa fakaheke tumau he tau tagata i tua. Ka aga lahi a tautolu ke uhu e tau lologo he Kautu, to tuku atu fakalahi e tautolu e fiafia ke he falu mo e aoga foki ki a tautolu ni.
Tau Lologo Fakaheke ki a Iehova he Tau Vaha Tohi Tapu
6. Fakakite fefe he tau Isaraela e fakaaueaga ma e ha lautolu a laveakiaga mai he Tahi Kula?
6 Kua tala mai he Kupu he Atua ki a tautolu ne uhu fakahakehake e Mose mo e tau Isaraela oti e lologo ha kua laveaki mai he matakautau a Farao he Tahi Kula. Kua kamata ha lautolu a lologo mo e tau kupu: “To lologo au kia Iehova, ha kua kautu ue atu a ia; ko e solofanua mo ia ne heke ai kua palu hifo e ia ke he tahi. Ko Ioha, ko e haku a malolo ia, mo e haku a lologo, kua eke tuai a ia mo fakamouiaga haku; ko e haku Atua hanai, to nava au ki ai.” (Esoto 15:1, 2) Kua maeke a tautolu ke manamanatu lahi ke he fiafia mo e olioli he tau Isaraela he lologo e lautolu e tau kupu ia he mole ha lautolu a laveakiaga mana!
7. Ko e heigoa a falu mena talahaua ne kua fakamau he tau Tohiaga Tapu Heperu ke he tau Isaraela ne uhu lologo fakaheke ki a Iehova?
7 Kua totou e tautolu ia 1 Nofoaga he Tau Patuiki 16:1, 4-36, ne fakaheke he tau uhu lologo a Iehova mo e ta e tau kofe fakatagi he magaaho ne tamai e Tavita e Puha ki Ierusalema. Ko e magaaho olioli lahi moli ni a ia. Kua ha ha i ai foki e uhu lologo fakaheke ki a Iehova ne taute fakalataha mo e tau leo kofe fakatagi he magaaho ne fakaulu he Patuiki ko Solomona e faituga i Ierusalema. Kua totou e tautolu ia 2 Nofoaga he Tau Patuiki 5:13, 14: “Ko lautolu ne ulo e tau pu, mo lautolu ne lologo kua tuga ne tagata tokotaha, ko e taha ni e leo he fakaheke atu mo e fakaaue atu ai a lautolu kia Iehova; ne lologo a lautolu fakalataha mo e tau pu ne ulo, mo e tau kumepalo, mo e tau akau fakatagi, mo e fakaheke atu a lautolu kia Iehova, kua pehe atu, Ha kua mitaki ni a ia, ha ko e mena tukulagi ni hana fakaalofa, Ti puke ai e fale ke he aolagi, ko e fale ni a Iehova, Kua nakai maeke ke he tau ekepoa ke tutu ke fekafekau ai ha ko e aolagi; ha kua puke e fale he Atua ke he lilifu a Iehova.” Ko e heigoa ne fakakite mai he mena ia? Kua fanogonogo a Iehova ke he fakahekeaga leo mitaki nei mo e kua fiafia foki ki ai, tuga kua fakakite mai he aolu mana. He magaaho fakamui, kua ua e tau kau uhu lologo ne lologo he magaaho ne fakaulu e tau kaupa a Ierusalema he tau aho a Nehemia.—Nehemia 12:27-42.
8. Fakakite he heigoa ko e mena taute fakamoli lahi he tau Isaraela e uhu lologo?
8 Ko e moli hanai, ko e vala aoga lahi e uhu lologo he tapuaki he faituga, kua 4,000 he tau Levi ne tuku kehe ma e fekafekauaga leo fakatagi. (1 Nofoaga he Tau Patuiki 23:4, 5) Kua fakalataha e tau mena nei mo e tau tagata uhu lologo. Kua ha ha e leo fakatagi, mua atu ke he tau tagata uhu lologo, e tutuaga mua atu he tapuaki, nakai ke omoi e tau mena mamafa he Matafakatufono, ka ke foaki e agaga hako ma e tapuaki. Ne lagomatai ai e tau Isaraela ke alaala e tau agaga puhala ka tapuaki ki a Iehova. Kia mailoga la e amaamanakiaga mo e onoonoaga fakamatafeiga ne kua tuku atu fakalahi ke he vala mena nei: “Ko e katoatoa a lautolu he totou, katoa mo e tau matakainaga ha lautolu ne fakaako ai ke lologo kia Iehova, ko lautolu oti ne pulotu, ne ua e teau mo e fitugofulu ma valu e tagata.” (1 Nofoaga he Tau Patuiki 25:7) Kia mailoga la kua nakai taute fakateaga e lautolu e lologo fakaheke ki a Iehova. Ne ako fakamahani lologo a lautolu mo e kua makaka lahi!
9. Pehi fefe e uhu lologo i loto he tau Tohiaga Tapu Kerisiano Heleni?
9 Ka hoko mai ke he senetenari fakamua he vaha nei ha tautolu, ko e heigoa ne kitia e tautolu? Ko Iesu, he po he hana afoaga, pete ni he loga lahi e tau mena mamafa he loto hana, ka kua logona agaia ni kua lata ke fakaoti aki e fakafiafiaaga hana he Paseka mo e fakatu hakeaga he Fakamanatuaga ke he hana matulei he uhu lologo fakaheke ki a Iehova. (Mataio 26:30) Ko e taha mena foki, kua totou e tautolu kua eke a Paulo mo Sila he “tulotopo,” he mole he fahi mo e tuku he fale pouli, ‘ke liogi ai mo e lologo [“fakaheke,” NW] ke he Atua, kua logona foki a laua e lautolu ne lili.’—Gahua 16:25.
Uhu Lologo Fakaheke—Ko e Vala Aoga Lahi he ha Tautolu a Tapuaki
10. Ko e heigoa e tau poakiaga kua foaki mai he Kupu he Atua ke lologo fakaheke ki a ia?
10 Po kua liga logona hifo e koe, nakai ko e mena aoga lahi e tau uhu lologo he tau lologo he Kautu, ke tuku katoa hau a loto ki ai? Kaeke kua pihia, nakai kia kua lata a koe ke liu fuafua foki e mena ia, ha kua kitia ko e mena aoga lahi ke he Atua ko Iehova mo Iesu Keriso e tau uhu lologo fakaheke? Haenai, kua puke e Kupu he Atua ke he tau poakiaga ke fakaheke a Iehova mo e uhu e tau lologo fakaheke ki a ia! Ke fakatai ki ai, ia Isaia 42:10, kua totou e tautolu: “Kia lologo atu kia Iehova ke he lologo fou, ko e hana fakahekeaga mai he motuaga he lalolagi, ko mutolu ne o hifo ke he tahi, katoa mo e tau mena ne puke ai; ko mutolu ko e tau motu ne takai he tahi mo lautolu ne nonofo ai.”—Kikite foki Salamo 96:1; 98:1.
11. Ko e heigoa e hatakiaga he aposetolo ko Paulo ne kua hagaao ke he uhu lologo?
11 Iloa he aposetolo ko Paulo kua maeke he uhu lologo ke lagaki hake ha tautolu a tau agaga, ti kua hataki lagaua a ia ki a tautolu ke he mena ia. Kua totou e tautolu ia Efeso 5:18, 19: “Ka kia puke a mutolu ke he Agaga; Kia fevagahauaki a mutolu ke he tau salamo, mo e tau lologo, mo e tau ulutapu he Agaga, kia fakaheke mo e lologo atu ke he Iki ke he tau loto ha mutolu.” Mo e ia Kolose 3:16, kua totou e tautolu: “Kia nofo fakalahi e kupu a Keriso ki loto ia mutolu, mo e iloilo oti ni kia fakaako mo e tomatoma e mutolu ko e taha kia taha ke he tau salamo, mo e tau [“fakaheke ke he Atua,” NW], mo e tau ulutapu ke lata mo e agaga, ko e fakaalofa noa kua lologo atu ai ke he tau loto ha mutolu ke he Iki.”
12. Ko e heigoa e tau fakafifitakiaga kua ha ha he tau lologo ha tautolu kua lagomatai aki a tautolu ke fakaako mo e hataki atu e taha ke he taha?
12 Kia mailoga la ke he tau mena ua ia ne vagahau lagaloga a Paulo ke he uhu lologo, he magaaho ne talahau e ia e ‘tau salamo, tau lologo, tau ulutapu he Agaga, fakaheke mo e lologo, ke he Iki ke he tau loto ha mutolu.’ Ko e taha mena foki, ne hafagi e ia hana tau kupu ke he tau Kolose he talahau ko e kakano hanai kua maeke a tautolu ke “fakaako mo e tomatoma e mutolu ko e taha kia taha.” Mo e taute moli pihia ne tautolu, tuga kua maeke ke kitia ke he tau mataulu he tau lologo ha tautolu—“Tau Tufugatiaaga Oti, Fakaheke a Iehova!” (numela 5), “Kia Tumau, Nakai Maueue!” (numela 10), “Kia Olioli ke he Amaamanakiaga he Kautu!” (numela 16), “Aua Neke Matakutaku ki a Lautolu!” (numela 27), “Fakaheke a Iehova ha Tautolu a Atua!” (numela 100), ke talahau e tau fakafifitakiaga gahoa.
13. Fakakite fefe he “fekafekau fakamoli mo e loto matala” ko e vala aoga lahi e uhu lologo ke he tapuaki ha tautolu?
13 Ke felauaki mo e tau poakiaga nei, ne fakatokatoka ai he “fekafekau fakamoli mo e loto matala” kua lata ni e tau toloaga ha tautolu—ko e tau feleveiaaga he fakapotopotoaga, tau toloaga he takaiaga, tau aho tolo pauaki, tau fonoaga he fahi motu, mo e tau fonoaga he lalolagi katoa—ke hafagi aki mo e ke fakaoti aki he uhu e tau lologo he Kautu. (Mataio 24:45) Ke lafi ki ai, kua fakatoka tuai e tau lologo ke uhu he falu magaaho kehekehe he tau toloaga ia. Ha kua fa mahani mau e tau feleveiaaga ha tautolu ke kamata he uhu e tau lologo he Kautu, nakai kia kua lata a tautolu ke taute pauaki ke hohoko tuai, kua tomua lahi ke taute auloa e vala ia he ha tautolu a tapuaki? Mo e ha kua fakaoti e tau feleveiaaga mo e tau uhu lologo, nakai kia kua lata a tautolu ke nonofo hifo ato fakaoti aki e lologo mo e liogi ne mui ki ai?
14. Ko e heigoa e tau fakafifitakiaga ia tautolu ke he tau lologo kua lata ne kua fifili ma e tau fakaholoaga ha tautolu?
14 Kua fifili fakamitaki e tau lologo he tau feleveiaaga ha tautolu ke felauaki mo e fakaholoaga. Ke fakatai ki ai, he tau Fonoaga he Fahi Motu ko e “Fakaakoaga Faka-Atua” he tau 1993, ko e lologo numela 191, “Taute e Kupu Moli Mau Ni,” ne kua fakamalolo atu ke he tau Kerisiano ke totoko ki a Satani, ke he lalolagi, mo e tino hala, ne mui taha ke he tau lauga tolu ne tala ke he tau fi nei. Kua pihia foki, ko e lologo numela 164, “Fanau—Tau Mena Fakaalofa Uho Mai He Atua,” ne kua puke lahi mo e tau hatakiaga ke he tau mamatua, ne mui taha ke he lauga ne lagaki fakamahino hake e matagahua pauaki he tau mamatua ke fakamahani ha lautolu a tau fanau. Ko e lologo numela 70, “Kia Tuga a Ieremia,” ne lologo fakamua ato hoko e fufuta lauga ne fakave ke he tau perofetaaga a Ieremia. Mo e he mole atu e tau lauga fakavahega ke he tau vala kehekehe he ha tautolu a fekafekauaga he Kautu kua mui ai e lologo numela 156, “Na Loto Au ki Ai,” ko e lologo kua hagahaga lahi ke he fekafekauaga. Kua taute fakamitaki foki e fifiliaga he tau lologo ma e Fakaakoaga he Kolo Toko, he Feleveiaaga Lagomatai, mo e Aoga Fekafekauaga Pule Faka-Atua. Ti kua eke ai e tau motua ka lauga ke he tau tagata ke fakakite e lologo ka fakaaoga ke hafagi aki e fakaholoaga, ti kua lata a lautolu ke fifili e lologo kua lata mo e matapatu manatu he lauga ha lautolu.
15. Maeke fefe he tagata ne takitaki e feleveiaaga ke fakamitaki hake e fakaaueaga ma e lologo ka uhu?
15 He fakailoa e lologo ke uhu, kua maeke e tagata takitaki ke fakamitaki hake e tau loto fakaaue ma e lologo he talahau hana mataulu po ke matapatu manatu. Nakai ko e numela lologo ne uhu e tautolu ka ko e tau matapatu manatu faka-Tohiaga Tapu. Kua maeke foki ke lagomatai e fakapotopotoaga ke loto fakaaue lahi ke he lologo kaeke kua talahau e kupu tohiaga tapu ne tohi i lalo he higoa he lologo. He mogoia, kua lata foki ni ke talahau e falu mena gahoa, tuga a nai kua lata oti ke huhu atu ke he agaga he lologo.
Fakakite e Fakaaueaga ma e Mahani Mitaki a Iehova he Uhu Lologo
16. Maeke fefe ia tautolu ke hokotia ke he agaga he tau lologo ha tautolu?
16 Ha kua puke lahi e tau kupu he tau lologo he Kautu ha tautolu ke he tau kakano, kua lata a lautolu ke manamanatu fakalahi ke he tau kupu he lologo e tautolu a lautolu. Kua manako a tautolu ke hokotia ke he agaga he tau lologo takitaha. Ko e falu, tuga e tau mena ne hagaao ke he fakaalofa, ko e fua he agaga, ko e logonaaga he loto. (Kalatia 5:22) Ko e tau mena nei kua lologo fakalahi mo e fakamafanatia e tautolu. Kua olioli e falu, mo e kua lata a tautolu ke lali ke lologo a lautolu mo e fiafia. Ka e malolo foki falu he tau lologo foleni, ti kua lata ke lologo a lautolu ia, fakalataha mo e leo fiafia mo e malolo e loto mauokafua. Mai he ha tautolu a Aoga Fekafekauaga Pule Faka-Atua, kua tomatoma mai ki a tautolu ke fakakite e mafanatia mo e logonaaga mo e loto fiafia foki mai he tau fakatataaga ha tautolu. Kua mua atu foki e aoga lahi ke fakakite e mafanatia, logonaaga, mo e fiafia ka uhu e tau lologo ha tautolu.
17. (a) Ko e heigoa e fakafiliaga ke he tau Isaraela nakai mahani fakamoli kua nakai lata a tautolu ke manako ke fakagahua ke he uhu lologo ha tautolu? (e) Ko e heigoa e fua ka taute fakamoli lahi e tautolu e hatakiaga ne ha ha i loto he tau lologo ha tautolu?
17 Kaeke ke uhu e tautolu e ha tautolu a tau lologo he Kautu ka e ha ha e tau loto ha tautolu he falu mena, kua nakai fakaaue katoa ke he kakano he tau kupu, nakai kia kua eke na tautolu ke tuga e tau Isaraela nakai mahani fakamoli ne kua hataki atu ki a lautolu kakano, ha kua fakaheke e lautolu e Atua ke he tau laugutu ha lautolu, ka e mamao kehe e tau loto ha lautolu ia ia? (Mataio 15:8) Kua nakai manako a tautolu ke hagaao e fakafiliaga ia ke he puhala ne uhu e tautolu e tau lologo he Kautu, kua pihia kia a tautolu? Ka uhu e tautolu a tau lologo he Kautu tuga kua lata ai, to fakalagalaga e tautolu nakai ni ko tautolu ni hokoia ka ko lautolu foki ne agagai viko ia tautolu, fakalataha mo lautolu ne ikiiki foki. E, kaeke kua taute fakamoli oti e lautolu ne lologo he tau Fale he Kautu e hatakiaga ne ha ha i loto he tau lologo nai, to eke ai mo fakamaloloaga kua malolo lahi ke gahua fakamakutu ke he fekafekauaga mo e kalo kehe mai ai he matahele ke taute e tau mena hepe.
18. Lauia fefe e taha fifine ha ko e uhu lologo he tau lologo he Kautu?
18 Kua lagaloga e tau magaaho ne kua nava e tau tagata i tua ke he ha tautolu a uhu lologo he tau lologo he Kautu. Ne tohi fakailoa he Ko e Kolo Toko he taha magaaho e tala nei: “Ko e [ha tautolu a] uhu lologo kua maeke foki ke gahua ke tamai e tau tagata ke he iloilo he Atua ko Iehova ne kua fakakite mai he mena ne tupu ke he fifine ne papatiso he Toloaga ko e ‘Kautuaga Faka-Atua,’ he tau 1973, he Yankee Stadium, he taone ko New York. Ko e magaaho fakapa ne ahi atu a ia ke he Fale he Kautu he taha matakavi, ne fano ne ia a ia mo e nofo ti oti e tau feleveiaaga ne ua. He magaaho ne uhu he fakapotopoto e lologo . . . ‘Kia Toka Mau Hau tau Mata he Palepale!,’ kua nava lahi mahaki a ia ke he tau kupu mo e ke he puhala ne uhu e lautolu e lologo, ti kua fifili a ia ko e mena hanai ne loto a ia ke nofo i ai. He mole ai ne fano a ia ke he taha he Tau Fakamoli mo e ole ke fakaako Tohi Tapu, mo e holo ki mua a [ia] ke eke mo Kerisiano fakamoli a Iehova.”
19. Ko e heigoa e fakamaloloaga fakahiku ne foaki mai, ke uhu ha tautolu a tau lologo he Kautu mai he loto katoa?
19 Kua lahi e tau feleveiaaga ha tautolu, ke nakai loga e tau magaaho ma lautolu ne fanogonogo ke fakailoa ha lautolu e tau logonaaga mo e loto fakaaue. Ka e maeke a tautolu oti ke fakailoa e tau mena kua logona e tautolu hagaao ke he mahani mitaki a Iehova, he uhu auloa mai he loto e tau lologo he Kautu. Ko e taha mena foki, ka fakalataha auloa a tautolu, nakai kia fiafia mitaki e tau agaga ha tautolu? Ti kua lata a tautolu ke fia loto ke lologo! (Iakopo 5:13) Kua moli, ke he mena kua fakaaue a tautolu ke he mahani mitaki a Iehova mo e hana mahani totonu noa, to lologo fakalahi ne tautolu mai he loto katoa e tau fakaheke ki a ia.
Tali Fefe e Koe?
◻ Ko e heigoa e tau matapatu kakano ua ke fakaheke a Iehova?
◻ Ko e heigoa e tau puhala kehekehe kua maeke ia tautolu ke fakaheke a Iehova?
◻ Ko e heigoa e taha mai he tau puhala kua mua atu e fulufuluola ne kua maeke ia tautolu ke fakaheke a Iehova?
◻ Ko e heigoa e tau fakafifitakiaga mai he Tohiaga Tapu kua ha ha ia tautolu ke fakaheke a Iehova he uhu lologo?
◻ Maeke fefe ia tautolu ke uhu e tau lologo he Kautu tuga kua lata ai?
[Puha he lau 19]
Fakaolioli e Tau Lologo Ia!
Kua tuga kua uka lahi e falu ke ako e falu he tau lologo. Ka e pete ni, ko e falu he tau fakapotopotoaga ne nakai fai lekua lahi he uhu e laulahi he tau lologo nai. Liga nakai lahi e laliaga kua lata ke ako e mena kua tuga he magaaho fakamua ko e nakai mahani lahi ki ai. He magaaho kua mahani mo e tau lologo pihia, kua mahani mau e fakapotopotoaga ke loto lahi ki a lautolu mai ia lautolu ne nakai lali ke ako. Ti maeke ia lautolu oti he fakapotopotoaga ke lologo a lautolu mo e mauokafua. E, kua maeke ia lautolu ke fakaolioli ke he tau lologo ia!
[Puha he lau 20]
Uhu e Tau Lologo he Kautu he Tau Toloaga Femiliaki
Ko e ha tautolu a uhu lologo he Kautu kua nakai ni fakakaupa ke he Fale he Kautu. Ne uhu lologo fakaheke a Paulo mo Sila ki a Iehova he nonofo he fale pouli. (Gahua 16:25) Mo e pehe e tutaki ko Iakopo: “Kua fai tagata nakai kua mitaki e agaga? Kua lata a ia ke lologo fakaheke ke he Atua.” (Iakopo 5:13, NW matahuitala) Kua mitaki e agaga he tau tagata oti ne fakalataha ke he tau toloaga femiliaki. Ti ko e kelea he ha he uhu e tau lologo he Kautu? Kua maeke e mena nei ke mua atu e fiafia lahi kaeke kua uhu fakalataha e tau lologo aki e piano po ke kita. Ka nakai fai, kua ha ha i ai e tau tepi piano ke he ha tautolu a tau lologo he Kautu; kua tokologa e Tau Fakamoli ne fai puha ne tuku ai e tau tepi nai. Kua nakai ni aoga hokoia a lautolu ke uta fakalataha ko e uhu lologo ka e kua mitaki foki ke fakatagi fakafulufuluola noa.
[Fakatino he lau 16, 17]
He mole ha lautolu a laveakiaga he Tahi Kula, ne fakailoa he tau Isaraela ha lautolu a olioli mai he lologo
[Fakatino he lau 18]
Ko e vala he tapuaki Kerisiano he vaha nei e lologo olioli lahi