Matematekelea he Tagata—To Fai Fakaotiaga Nakai?
KO E tau kitiaaga matakutakuina he mole atu e pa he pomu ke he makete apiapi ha Sarajevo; ko e tau kelipopo mo e fakatuketuke i Ruanata; tau tama hoge hane hoha mena kai i Somalia; tau magafaoa ne fakaagitau he loga e tau mena ha lautolu ne galo he mole e mafuike i Los Angeles; tau tagata matematekelea ne lolelole ha ko e malona he vai pukenamo i Pagalatese. Ko e tau kitiaaga pihia he matematekelea he tagata kua kitia ai ke he tau aho takitaha ke he tivi po ke tau mekasini mo e tau nusipepa.
Ko e mena momoko he matematekelea he tagata kua fakatupu ai falu a tagata ke galo e tua ke he Atua. “Ko e kitiaaga he mahani kelea kua foaki tumau e fakalavelave kelea lahi mahaki ke he tua,” hagaao ke he talahauaga ne tohia fakailoa he vahega takitaki lotu Iutaia he Tau Fahi Kaufakalataha. Ko e tau tagata tohia tohi kua hagaao ke he tau mamate he kemuaga Nasi tuga i Auschwitz mo e mai he tau pomu tuga e taha ne pa ki Hiroshima. “Ko e huhu he puhala he Atua tututonu mo e malolo lahi ka fakaata e moumouaga he tokologa he tau momoui nakai fai kelea, kua fakatupetupe aki e tau loto manamanatu he tau tagata lotu mo e fakavihu e manamanatuaga,” he talahau he tau tagata tohi.
Momoko ai, ko e hauaga nakai fai fakaoti he tau hokotaki kelea ko e mena fakaligoia ke he tau logonaaga he tagata. Ha kua nakai putoia e tau kapitiga mo e tau magafaoa, tokologa kua moua a lautolu kua uka lahi ha ko e matematekelea he falu.
Pete ia, ko e mena moli kua maeke a tautolu ke fai logonaaga fakaalofa hofihofi, ke he ha tautolu ni a tau fakahelehele, kua lata ke talahau ki a tautolu taha mena hagaao ke he ha tautolu a Taute. Kua talahau mai he Tohi Tapu ko e tagata kua tufugatia “ke he hana [he Atua] fakatai” mo e “ke he [hana] a fakatai.” (Kenese 1:26, 27) Nakai kakano e mena nei ko e tau tagata kua tatai mo e Atua ke he tino. Nakai, ha kua fakamaama mai e Iesu Keriso ko e “Atua ko e agaga” mo e “agaga nakai fai kakano a ia mo e tau hui.” (Ioane 4:24; Luka 24:39) He taute ke he fakatai he Atua kua hagaao ke he ha tautolu a maeke he fakakite e tau aga tuga he Atua. Ko e mena ia, ha ko e tau tagata malolo oti kua logona e fakaalofa hohofi ma lautolu kua matematekelea, kua lata a tautolu ke fakaoti aki ko e Tufuga he tagata, ko e Atua ko Iehova, kua fakaalofa hofihofi mo e hokulo e logonaaga ma e hana a tufugatia he tagata matematekelea.—Fakatatai Luka 11:13.
Ke he taha puhala ne fakakite he Atua hana a fakaalofa hohofi ha kua foaki ke he tau tagata e fakamaamaaga tohia he tupumaiaga he matematekelea. Ko e mena nei ne taute e ia ke he hana a Kupu, ko e Tohi Tapu. Kua fakakite fakamaali mai he Tohi Tapu kua tufuga he Atua e tagata ke olioli e moui, nakai ke matematekelea. (Kenese 2:7-9) Kua fakakite mai foki ko e tau tagata fakamua kua tamai e matematekelea ki luga ha laua ha kua tiaki e pule tututonu he Atua.—Teutaronome 32:4, 5; Roma 5:12.
Pete ia, kua logona agaia he Atua e fakaalofa hohofi ma e matematekelea he tagata. Kua fakakite fakamaali mai he mena nei he hana a maveheaga ke tamai e fakaotiaga ke he matematekelea he tagata. “Kitiala, kua fakalataha mo e tau tagata e fale uta fano he Atua, to nofo a ia mo lautolu; to eke a lautolu mo motu hana, to ha ia lautolu e Atua ni, ko e ha lautolu a Atua haia. To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”—Fakakiteaga 21:3, 4; kikite foki e Isaia 25:8; 65:17-25; Roma 8:19-21.
Ko e tau maveheaga homo ue atu nei kua fakamoli kua mataala lahi e Atua ke he matematekelea he tagata mo e kua mauokafua a ia ke tamai e fakaotiaga ki ai. Ka ko e heigoa tonu ne fakatupu e matematekelea he tagata ke he magaaho fakamua, mo e ko e ha ne fakaata he Atua e mena ia ke fakatumau ato hoko mai ke he vaha nei ha tautolu?
[Fakatino Credit Line he lau 3]
Kevin Frayer/Sipa Press