Iehova—Ha Tautolu a Matua Fakaalofa Hofihofi
“Kua fakaalofa fakalahi mai e Iki mo e hofihofi noa.”—IAKOPO 5:11.
1. Ko e ha a lautolu ne nonofogati kua piki atu ke he Atua ko Iehova?
KO E lagi mo e lalolagi katoatoa kua lahi mahaki ti nakai maeke e tau tagata kumikumi ke he lagi ke totou e hana a tau fakatokaaga fetu. Ko e ha tautolu a fakatokaaga fetu, ko e Matakau Fetu, kua lahi mahaki kua nakai maeke he tagata ke kamata ke totou e tau fetu oti i ai. Ko e falu he tau fetu, tuga e Antares, kua afe he tau magaaho kua lalahi mo e kikila ke he ha tautolu a la. Ko e malolo lahi ha ia he Tufuga Mua Ue Atu he tau fetu ke he lagi mo e lalolagi katoatoa! Moli, ko ia “kua takitaki mai ha lautolu a tau kau kua totou, ti ui e ia a lautolu oti ke he tau higoa.” (Isaia 40:26) Ka e, ko e Atua ofoofogia taha nei kua ha ha i ai foki e ‘fakaalofa fakalahi mo e hofihofi noa.’ Ko e hahau ha ia ke he lotomatala pihia ke he tau fekafekau fakatokolalo ha Iehova, mua atu ki a lautolu ne matematekelea he favaleaga, gagao, fakaatukehe, po ke falu he tau mena uka!
2. Fefe e tau logonaaga he loto fakaalofa kua fa kitia he tau tagata he lalolagi nei?
2 Tokologa ne onoono ko e logonaaga molu, tuga ke he “hofihofi noa mo e loto fakaalofa” ha Keriso, ko e tau mahani lolelole. (Filipi 2:1) He fakaohooho he lotomatala tupumainoa, kua fakamalolo e lautolu e tau tagata ke tuku fakamua ni a lautolu pete ni kaeke kua fakamamahi e tau logonaaga he falu. Ko e loga he tau tagata fakatu mahani ke fakafifitaki ki ai he fahi fakafiafiaaga mo e tau sipote kua malolo lahi ne nakai moumou ha hihina mata po ke fakakite e fakaalofa hohofi noa. Ko e falu pule fakapolitika kua pihia e mahani. Ko e pulotu he Stoic ko Seneca, ne fakaako e pule favale ko Nero, kua pehi ko e “fakaalofa ko e lolelole.” Kua fakakite mai he M’Clintock mo e Strong Cyclopædia: “Ko e tau fakaohooho he faka-Stoic . . . kua fakatumau ke gahuahua ke he tau manamanatuaga he tau tagata ti hoko mai ke he vaha nei.”
3. Fakamaama fefe e Iehova a ia ki a Mose?
3 Ke he kehekeheaga, ko e aga he Tufuga he tagata kua loto fakamafanatia. Kua fakamaama e ia a ia ki a Mose ke he tau kupu nei: “Ko Iehova, ko Iehova, ko e Atua fakaalofa hofihofi, mo e fakaalofa noa; kua fakatuai hana ita, to lahi e fakaalofa, to fakamoli; . . . kua fakamagalo foki e ia e mahani hepehepe, mo e holifono, mo e hala, ke e nakai toka noa e ia a lautolu kua hala.” (Esoto 34:6, 7) Moli, kua fakahiku e Iehova e talahauaga nei ki a ia he fakamaama hana a fakafili tonu. To nakai toka e ia e tau tagata agahala pauaki mai he fakahala lahi. Ka e kua fakamaama fakamua agaia e ia a ia ko e Atua kua fakaalofa hofihofi noa, kakano “kua puke ke he hofihofi noa.”
4. Ko e heigoa e kakano mafanatia he kupu Heperu ne fa fakaliliu ai “fakaalofa hofihofi noa”?
4 Falu a magaaho ko e kupu “fakaalofa hofihofi noa” kua iloa ni mo mena momoko hokoia, ko e puhala fakafili ke taofi mai e fakahalaaga. Pete ia, ko e fakatataiaga he tau fakaliliuaga he Tohi Tapu kua tamai e kakano lahi he kupu fakamaamaaga higoa Heperu kua moua mai he kupu fakagahuahua ko e ra·chamʹ. Hagaao ke he falu a tagata fakaako tokoluga, ko e matapatu kakano “ke fakamolu.” Ko e “racham” he fakamaama mai he tohi Synonyms of the Old Testament, “kua fakakite ai e hokulo mo e logonaaga fakaalofa he fakaalofa hofihofi, tuga e fakaohooho mai he kitiaaga he lolelole po ke matematekelea ki a lautolu kua fakahele ki a tautolu po ke manako ke he ha tautolu a lagomatai.” Ko e falu a tau fakamaamaaga fakamafana loto he mahani fua mitaki nei kua maeke ia tautolu ke moua mai he Insight on the Scriptures, Volume 2, tau lau tohi 375-9.
5. Kua fakamoli mai fefe e fakaalofa hofihofi noa he Matafakatufono faka-Mose?
5 Ko e fakaalofa hofihofi he Atua kua fakamoli fakamaaliali ke he Matafakatufono ne age e ia ke he motu ko Isaraela. Ko lautolu ne nakai moua, tuga e tau takape, tau tama nakai fai matua, mo e nonofogati, kua lata ke leveki mo e fakaalofa hofihofi. (Esoto 22:22-27; Levitika 19:9, 10; Teutaronome 15:7-11) Tau tagata oti, fakalataha mo e tau tupa mo e tau manu, kua lagomatai ha ko e okioki ke he Sapati he tau fahi tapu. (Esoto 20:10) Ke lafi ki ai, kua matakaki e Atua ki a lautolu ne leveki fakamitaki a lautolu ne nonofogati. Pehe e Fakatai 19:17: “Ko ia kua fakaalofa ke he tagata nofogati kua ta age e ia hana tau mena kia Iehova; to taui mai foki e ia e tau mena ne ta age kia ia.”
Fakakaupaaga he Fakaalofa Hofihofi Faka-Atua
6. Ko e ha ne fakafano ai e Iehova e tau perofeta mo e tau uta fekau ke he hana a tau tagata?
6 Kua fua he tau Isaraela e higoa he Atua mo e tapuaki ki ai he faituga i Ierusalema, ko e “fale ma e higoa a Iehova.” (2 Nofoaga he Tau Patuiki 2:4; 6:33) Ke he taha magaaho, pete ia, kua o mai a lautolu ke fakaata e mahani feuaki, tapuaki ke he tupua, mo e kelipopo, ti tamai ai e ekefakakelea lahi mahaki ke he higoa a Iehova. Ke lautatai mo e hana a aga fakaalofa hofihofi, kua lali fakatekiteki e Atua ke fakahako e tuaga kelea nei mo e nakai tamai e matematekelea ki luga he motu katoa. “Ne fakafano mai he Atua . . . hana tau fekau, ne uhu matike a ia mo e fakafano mai e ia a lautolu; he fakaalofa a ia ke he hana motu mo e hana haeleaga; Ka e fakafiufiu e lautolu kia lautolu ne fakafano mai he Atua, mo e fakavihia e lautolu hana tau kupu, mo e va a lautolu ke he hana tau perofeta, ti tupu ai e ita a Iehova ke he hana motu, ato nakai maeke ke fakamalolo ai a lautolu.”—2 Nofoaga he Tau Patuiki 36:15, 16.
7. He hoko atu e fakaalofa hofihofi he Atua ke he hana a fakakaupaaga, ko e heigoa e mena ne tupu ke he kautu ha Iuta?
7 Pete ni e fakaalofa hofihofi a Iehova mo e fakatuai ke ita, ka he magaaho ka lata ne fakakite e ia e ita tututonu. I tuai, ko e fakaalofa hofihofi faka-Atua kua hoko ai ke he hana a fakakaupaaga. Kua totou e tautolu hagaao ke he tau fua: “Ti fakafano mai ai e [Iehova] kia lautolu e patuiki he tau tagata Kaletaia, ne kelipopo e ia ha lautolu a tau fuata ke he pelu ke he fale he faituga ha lautolu, mo e nakai fakaalofa atu a ia ke he tau fuata mo e tau tamāfine ikiiki, ko e tau patu mo e tau tagata momotua; ne tuku atu e ia a lautolu oti ke he hana lima.” (2 Nofoaga he Tau Patuiki 36:17) Ti moumou ai a Ierusalema mo e hana a faituga, mo e kua uta fakapaea ai e motu ki Papelonia.
Fakaalofa Hofihofi ma e Hana Higoa
8, 9. (a) Ko e ha ne fakapuloa ai e Iehova ko e to fakakite e ia e fakaalofa hofihofi ma e hana higoa? (e) Fakamamate fefe e tau fi ha Iehova?
8 Ko e tau motu ne agaagai kua olioli ha ko e matematekelea nei. Ke he puhala vaiga, kua talahau e lautolu: “Ko e tau tagata a Iehova hanā, ne o mai a lautolu he motu hana.” Kua mataala lahi ke he ekefakakelea nei, ne fakailoa e Iehova: “Ka e fakaalofa ni au ha ko e higoa tapu haku, . . . To fakatapu ni e au haku a higoa lilifu . . . ti iloa ai he tau motu kehe ko au ni ko Iehova.”—Esekielu 36:20-23.
9 He mole atu e fakapaea e motu hana ke he 70 e tau tau, ko e Atua fakaalofa hofihofi, ko Iehova, kua fakatokanoa a lautolu mo e fakaata a lautolu ke liliu mo e ati e faituga i Ierusalema. Kua fakanonoiki he mena nei e tau motu ne agaagai, ne onoono atu mo e ofomate. (Esekielu 36:35, 36) Momoko ai, kua liu e motu ha Isaraela mokulu ke he tau gahua kelea. Ko e tagata tua fakamoli Iutaia, ko Nehemia, kua lagomatai ke fakahako e tuaga. Ke he liogi he toloaga, kua liu a ia fakamanatu e fakaalofa hofihofi he Atua he fakafehagai mo e motu he talahau:
10. Fakamaama fefe e Nehemia e fakaalofa hofihofi ha Iehova?
10 “Ko e vaha ne matematekelea ai a lautolu, ne tagi atu ai a lautolu kia koe, ti fanogonogo mai ai a koe mai he lagi; mo e foaki mai ai e koe kia lautolu e tau laveaki ke lata mo e lahi he hau a fakaalofa hofihofi noa, ti laveaki mai e koe a lautolu he tau lima ha lautolu ne fai fi kia lautolu. Ne moua e lautolu e okiokiaga ti liliu eke ai e lautolu e mahani kelea ki mua hau; ti tiaki ai a lautolu ke he tau lima ha lautolu ne fai fi kia lautolu, ti fakatokolalo ai e lautolu a lautolu; ka e liliu foki a lautolu mo e ui atu kia koe, ti fanogonogo mai ai a koe mai he lagi, ti laveaki mai laga loga e koe a lautolu ke lata mo e hau a fakaalofa hofihofi noa mai; . . . Ka e fakauka ai a koe kia lautolu ke he tau tau loga.”—Nehemia 9:26-30; kikite foki Isaia 63:9, 10.
11. Ko e heigoa e kehekeheaga ne kitia ke he vahaloto ha Iehova mo e tau atua he tau tagata?
11 Fakaoti ai, he mole atu e tiaki fakakelea e Tama ofania he Atua, ti galo tukulagi ai he motu ko Iutaia hana tuaga monuina. Ko e matutakiaga fakamoli he Atua ki a lautolu kua katoatoa ai ke molea e 1,500 he tau tau. Ko e fakamoliaga tukumalagi ke he mena moli ko Iehova moli ni ko e Atua he fakaalofa hofihofi noa. Ko e kehekehe maaliali ha ia ke he tau atua vale mo e nakai fai logonaaga ne talaga he tau tagata agahala!
Ko e Fakakiteaga Lahi Mahaki he Fakaalofa Hofihofi
12. Ko e heigoa e fakakiteaga lahi mahaki he fakaalofa hofihofi he Atua?
12 Ko e fakakiteaga lahi mahaki he fakaalofa hofihofi he Atua kua fakafano mai hana a Tama fakahele ke he lalolagi. Moli, ko e moui ha Iesu he mahani fakamoli kua tamai e fiafia lahi mahaki ki a Iehova, foaki ai ki a ia e tali mitaki katoatoa ke he tau mena fakavai he Tiapolo. (Fakatai 27:11) Ke he magaaho taha ia foki, kua kitekite ke he hana a Tama ofania kua matematekelea ke he favale mo e mate fakatokolalo kua moli ni ne fakatupu e mamahi lahi ki a Iehova mua atu ke he ha matua he tagata kua maeke ke fakauka. Ko e poa fakaalofa lahi, kua hafagi ai e puhala ma e moui tukulagi ke he tau tagata. (Ioane 3:16) Ko Sakaria, ko e matua tane ha Ioane Papatiso, ne talahau tuai kua fakamatalahi “e fakaalofa hofihofi noa he Atua ha tautolu.”—Luka 1:77, 78.
13. Ke he puhala aoga lahi fe kua fakaata mai e Iesu e aga he hana a Matua?
13 Ko e fakafano maiaga he Tama he Atua ke he lalolagi kua foaki foki ke he tagata e onoonoaga maaliali he aga ha Iehova. Kitia fefe? Ke he mena ia kua fakaata mai fakamitaki katoatoa e Iesu e aga he hana a Matua, mua atu ke he puhala fakaalofa hofihofi ne taute e ia ki a lautolu ne nonofogati! (Ioane 1:14; 14:9) Ke he fakalilifuaga nei, ko e tau tagata tohi Evagelia ne tolu, ko Mataio, Mareko, mo Luka, kua fakaaoga e kupu fakagahuahua Heleni, splag·khniʹzo·mai, ne kua hau ai he kupu Heleni ma e “tau gakau.” “Mai he hana a kamataaga,” kua fakamaama ai he pulotu Tohi Tapu ko William Barclay, “kua maeke ke kitia kua fakamaama e nakai ko e fakaalofa noa ni po ke fakaalofa hofihofi, ka ko e logonaaga he loto ne kua omoi e tagata ke he tau mena hokulo he hana a uho moui. Ko e kupu malolo lahi faka-Heleni ma e logonaaga he fakaalofa hofihofi.” Kua fakaliliu ai fakakehekehe ko e “logonaaga fakaalofa” po ke “fakaalofa lahi.”—Mareko 6:34; 8:2.
Magaaho ne Fakaalofa a Iesu
14, 15. Ke he taone i Kalilaia, amotia fefe a Iesu ke fakaalofa, mo e ko e heigoa he mena nei kua fakakite?
14 Ko e tupuaga ko e taone i Kalilaia. Ko e tagata “kua oti hana tino he lepela” kua finaatu ki a Iesu mo e nakai fai hatakiaga fakamotu. (Luka 5:12) Kua fakatonu fakakelea kia e Iesu a ia he nakai hea, “Kua kelea, Kua kelea,” tuga he ha ha i ai he Matafakatufono he Atua? (Levitika 13:45) Nakai. Ka e, fanogonogo a Iesu ke he ole fakatokolalo he tagata: “Kaeke kua finagalo a koe ki ai, kua maeke ni ia koe ke fakamea au.” “Kua hohofi noa e fakaalofa,” ti oho atu a Iesu mo e aamo e lepela, pehe: “Mena loto au ki ai; kia mea a koe.” Ko e malolo tino he tagata kua liu mitaki mafiti. Kua fakakite e Iesu nakai ko e hana a mana ni, ko e tau malolo ne foaki he Atua ka e pihia foki ke he tau logonaaga fakaalofa kua fakalagalaga a ia ke fakaaoga e tau malolo pihia.—Mareko 1:40-42.
15 Kua lata ka ke o atu fakamua ki a Iesu to fakakite e ia e tau logonaaga he fakaalofa hofihofi? Nakai. Falu a magaaho fakamui, ne feleveia a ia mo e fakatokaaga mauku ne o mai he taone ha Naina. Moli ni, kua fakamoli e Iesu e loga he tau mauku fakamua, ka e ko e mena nei kua mua atu e kelea lahi. Ko e tagata ne mate ko e tama fuataha ni he takape. “Ti fakaalofa hohofi ai,” ne finaatu a Iesu ki a ia mo e pehe: “Ua tagi a koe.” Ti taute e ia e mana kehe lahi he fakaliu tu mai hana tama tane ke he moui.—Luka 7:11-15.
16. Ko e ha ne fakaalofa ai a Iesu ke he moto tagata tokologa ne mumui atu ki a ia?
16 Ko e fakaakoaga mua atu ne fakaako mai he tau mena tutupu i luga ko e he magaaho ne “fakaalofa hohofi ai” a Iesu, ne taute e ia e taha mena mitaki ke lagomatai. Ke he taha mena foki fakamui, ne kitekite a Iesu ke he moto tagata tokologa kua fakatumau ke mumui atu ki a ia. Kua hokotaki e Mataio “ati fakaalofa hofihofi ai a ia kia lautolu, ne fakafita a lautolu, mo e tiaki atu ai, tuga e tau mamoe nakai fai leveki a lautolu.” (Mataio 9:36) Kua nakai lahi e mena ne taute he tau Farasaio ke fakamakona e hoge fakaagaga he tau tagata noa. Ka e, fakakavega aki e lautolu a lautolu ne mahani fakatokolalo ke he loga he tau matafakatufono nakai fai aoga. (Mataio 12:1, 2; 15:1-9; 23:4, 23) Ko e ha lautolu a onoonoaga ke he tau tagata kua kitia he magaaho ne talahau e lautolu ki a lautolu ne fanogonogo ki a Iesu: “Ko e moto tagata na, nakai iloa e fakatufono, kua ulaafia ni a lautolu.”—Ioane 7:49.
17. Maeke fefe he fakaalofa ha Iesu ke he moto tagata ke omoi aki a ia, mo e hokotia atu ki fe e takitakiaga ne foaki e ia?
17 Ke he kehekeheaga, kua amotia lahi mahaki a Iesu ha ko e tuaga kelea fakaagaga he moto tagata. Ka e tokologa lahi a lautolu e tau tagata fiafia ki a ia ke fakakite ki a lautolu takitokotaha e levekiaga. Ti tala age a ia ke he hana a tau tutaki ke liogi ke loga e tau tagata gahua. (Mataio 9:35-38) Ke lautatai mo e tau liogi pihia, kua fakafano atu e Iesu hana a tau aposetolo mo e fekau: “Kua tata mai tuai e kautu he lagi.” Ko e tau hatakiaga kua foaki ke he magaaho ia kua eke ai mo takitakiaga uho ma e tau Kerisiano ke hoko mai ke he vaha nei. Nakai fakauaua, ko e tau logonaaga he fakaalofa hofihofi ha Iesu kua omoi a ia ke fakamakona e hoge fakaagaga he tau tagata.—Mataio 10:5-7.
18. Fefe e mahani a Iesu he magaaho ne fakalavelave he moto tagata hana nofo tokotaha, mo e ko e heigoa e fakaakoaga ne ako mai e tautolu he mena nei?
18 Ke he taha magaaho foki, kua logona foki e Iesu e manamanatuaga ma e tau manako fakaagaga he tau moto tagata. Ke he magaaho nei ko ia mo e hana a tau aposetolo kua lolelole he mole atu e fenoga fakamatala lavelave, mo e kumi matakavi a lautolu ke okioki. Ka e moua agaia ni he tau tagata a lautolu fakamui. Nakai ita a Iesu ha ko e fakalavelave ke he ha lautolu a fakalatahaaga auloa, kua fakamau e Mareko kua “hohofi hana fakaalofa.” Mo e ko e heigoa e kakano he tau manatu hokulo ha Iesu? Kua “tuga ne tau mamoe nakai fai leveki a lautolu.” Liu foki, kua gahuahua a Iesu ke he hana a tau logonaaga mo e kamata ai ke fakaako e tau moto tagata “ke he kautu he Atua.” E, kua amotia lahi a ia ke he ha lautolu a hoge fakaagaga kua poa e ia e hana okiokiaga kua lata, ke fakaako a lautolu.—Mareko 6:34; Luka 9:11.
19. Manamanatu fefe a Iesu ke he tau moto tagata ti molea atu ke he ha lautolu a tau manako fakaagaga?
19 He manamanatu lahi hagaao ke he tau manako fakaagaga he tau tagata, ne nakai ono kehe a Iesu ke he ha lautolu a tau manako fakatino. Ke he magaaho taha ia, ne liu foki a ia “fakamalolo . . . a lautolu ne fia malolo.” (Luka 9:11) Ke he magaaho fakamui, ko e moto tagata kua o atu mo ia ke he loa e magaaho, mo e kua mamao a lautolu mai he tau kaina. He kitia ai ha lautolu a manako fakatino, kua tala age a Iesu ke he hana a tau tutaki: “Kua hofihofi haku a fakaalofa ke he lanu tagata ha ko e mena kua tolu e aho he nonofo a lautolu mo tautolu, ti nakai fai mena kai a lautolu. Nakai fia fekau e au a lautolu ke o, mo e hoge, neke mamate a lautolu he magahehala.” (Mataio 15:32) Kua taute e Iesu e taha mena he mogonei ke kalo kehe he matematekelea. Ne foaki fakamana e ia ke he tau afe he tau tagata tane, tau fifine, mo e fanau e kai kua ha ha i ai fitu e fua falaoa mo e tau ika ikiiki gahoa.
20. Ko e heigoa ha tautolu ne ako mai he fakamauaga fakahiku he amotia a Iesu he fakaalofa?
20 Ko e fakamauaga fakahiku ha Iesu kua hohofi mo e fakaalofa ko e hana a fenoga fakahiku ki Ierusalema. Ko e tau moto tagata tokologa hane o mo ia ke fakamanatu e Paseka. Ke he puhalatu tata ki Ieriko, tokoua e tagata matapouli ne fakatumau ke tauhea: “Ko e Iki na e, . . . kia fakaalofa mai a koe kia maua.” Kua lali e moto tagata ke fakamate a laua, ka e hea e Iesu a laua mo e huhu ko e heigoa ha laua ne manako ki a ia ke taute. “Ko e Iki na e, kia ala ha maua a tau mata,” he ole e laua. “Hofihofi ai e fakaalofa,” ne aamo e ia e tau mata ha laua, mo e maeke ia laua ke kitia. (Mataio 20:29-34) Ko e aoga lahi ha e fakaakoaga kua fakaako mai e tautolu he mena nei! Kua amanaki a Iesu ke hoko atu ke he hana a fahi tapu fakahiku he hana a gahua fakamatala ke he lalolagi. Ha ha ia ia e loga he gahua ke fakakatoatoa to matematekelea a ia ke he mate favale ke he tau lima he tau matakau ha Satani. Ka e nakai fakaata e ia e mamafa he magaaho aoga lahi nei ke puipui hana a tau logonaaga fakaalofa he fakaalofa hofihofi ma e tau manako lahi he tagata nakai talahaua.
Tau Fakataitaiaga ne Fakamaama e Fakaalofa Hofihofi
21. Ko e heigoa kua fakatai e he iki ne nakai fakahoko e kaitalofa lahi he tupa hana?
21 Ko e kupu fakagahuahua Heleni koe splag·khniʹzo·mai, kua fakaaoga he tau talahauaga ke he moui ha Iesu, kua fakaaoga foki ke he tau fakataitaiaga ne tolu ha Iesu. Ke he taha tala ke he tupa ne ole ke he taha magaaho ke liu totogi e kaitalofa lahi mahaki. Ko e hana iki, kua “hofihofi ai e fakaalofa,” ti nakai fakahoko e kaitalofa. Kua fakakite he mena nei kua fakakite he Atua ko Iehova e fakaalofa hofihofi lahi mahaki he nakai fakahoko e kaitalofa lahi he agahala ma e tau Kerisiano takitaha ne fakagahuahua e tua ke he poa lukutoto ha Iesu.—Mataio 18:27; 20:28.
22. Ko e heigoa e fakatai he tama tane moumou koloa kua fakakite mai?
22 Ti ha ha i ai foki e tala ke he tama tane moumou koloa. Liu manatu e mena ne tupu he liu mai e tama mahani fakakeukeu ki kaina. “Kua kitia a ia he hana matua tane, ka kua mamao a ia, ati hofihofi ai hana fakaalofa, kua poi atu a ia mo e peka ke he hana ua, kua figita kia ia.” (Luka 15:20) Ko e mena nei kua fakakite he magaaho ka maeke he Kerisiano fakakeukeu ke fakakite e tokihala moli, to hofihofi e logonaaga ha Iehova mo e talia fakaalofa ki a ia ne liu mai. Ti ke he ua e tau fakataitaiaga nei, kua fakakite e Iesu ko e ha tautolu a Matua, ko Iehova, kua “fakaalofa fakalahi mai . . . mo e hofihofi noa.”—Iakopo 5:11.
23. Ko e heigoa e fakaakoaga ne ako mai e tautolu he fakataitaiaga ha Iesu ke he katofia Samaria?
23 Ko e fakaaoga fakataitai ke tolu aki he splag·khniʹzo·mai kua hagaao ke he Samaria fakaalofa hofihofi ne “hofihofi ai hana fakaalofa kia ia” ke he matematekelea he Iutaia ne kua kaiha mo e toka ke teitei mate. (Luka 10:33) Gahua ai ke he tau logonaaga nei, kua fakaaoga he Samaria e hana a malolo katoa ke lagomatai e tagata kehe. Kua fakakite he mena nei ko Iehova mo Iesu kua amaamanaki ke he tau Kerisiano moli ke muitua ke he ha laua a fakafifitakiaga he fakakite e fakaalofa mo e fakaalofa hofihofi. Ko e falu he tau puhala ke taute e tautolu e mena nei to fakatutala he vala tala ka hau.
Tau Huhu ke Liu Manatu
◻ Ko e heigoa e kakano ke fakaalofa hofihofi noa?
◻ Fakakite fefe e Iehova e fakaalofa hofihofi ma e hana a higoa?
◻ Ko e heigoa e fakakiteaga lahi mahaki he fakaalofa hofihofi?
◻ Ke he puhala kehe fe ne fakaata e Iesu e aga he hana a Matua?
◻ Ko e heigoa ne ako mai e tautolu he fakakiteaga fakaalofa hofihofi ha Iesu mo e hana a tau fakataitaiaga?
[Puha he lau 22, 23]
KO E KUPU FAKAMAAMA MA E “LEVEKIAGA FAKAALOFA HOFIHOFI”
“HAKU manava e, haku manava e!” he tagi he perofeta ko Ieremia. Kua gugu kia a ia he matulituli he gakau ha kua kai e ia e taha mena kua kelea? Nakai. Kua fakaaoga e Ieremia e metafoa [metaphor] Heperu ke fakamaama hana a manamanatuaga hokulo ke he matematekelea lahi ka hau ai ki luga he kautu ha Iutaia.—Ieremia 4:19.
Ha kua ha ha he Atua ko Iehova e logonaaga hokulo, ko e kupu Heperu ma e “manava,” po ke “gakau” (me·ʽimʹ), kua fakaaoga foki ke fakamamaama hana a tau logonaaga he loto fakaalofa. Ma e fakatai, ko e tau hogofulu tau ato hoko ke he vaha ha Ieremia, ko e magafaoa hogofulu he kautu a Isaraela kua uta fakapaea he patuiki ha Asuria. Kua fakaata e Iehova e mena nei ko e fakahala ma e ha lautolu a mahani nakai tua fakamoli. Ka kua nimo kia he Atua a lautolu ke he fakapaeaaga? Nakai. Kua hokulo agaia e matutakiaga hana ki a lautolu ko e vala he hana a tau tagata he maveheaga. Hagaao ki a lautolu ke he higoa he magafaoa talahaua a Efaraimo, kua huhu a Iehova: “Ko e haku a tama fakahele kia a Efaraimo? ko e tama kia a ia ke fiafia ki ai? ha ko e mena ka vagahau e au kia ia, kua manatu lahi agaia ni e au a ia; ko e mena ia kua tagi haku loto [“manava,” NW] kia ia; kua hofihofi noa haku a fakaalofa kia ia.”—Ieremia 31:20.
Ha ko e talahau ‘ko e mena ia kua tagi haku loto manava,’ ne fakaaoga e Iehova e talahauaga ke fakamaama hana a tau logonaaga hokulo he fakaalofa hohofi ma e hana a tau tagata ne fakapaea. Ke he hana a talahauaga ke he matakupu nei, ne tohi he pulotu Tohi Tapu Ier 31:20 ko E. Henderson he senetenari ke 19 aki: “Nakai fai mena kua mua ue atu he fakatata e fakaalofa fakamatua ke he hana a tama tane ne liu mai ke he kaina, tuga a nei ne fakakite e Iehova. . . . Pete ni kua talahau totoko atu a ia [ke he tau Efaraimo tapuaki tupua] mo e fakahala a lautolu . . . , ne nakai nimo e ia a lautolu, ka e, ke he taha fahi, kua fiafia ke he amaamanakiaga he liu moua lahi a lautolu.”
Ko e kupu Heleni ma e “gakau,” po ke “manava,” kua fakaaoga ke he puhala taha ke he Tohiaga Tapu Heleni Kerisiano. He nakai fakaaoga moli ai, tuga he Gahua 1:18, kua fakahagaao ai ke he logonaaga he loto fakaalofa he fakaalofa hohofi po ke fakaalofa hofihofi noa. (Filemoni 12) Ko e kupu he falu a magaaho kua matutaki ke he kupu Heleni kakano ko e “mitaki” po ke “malolo.” Ko e tau aposetolo ko Paulo mo Peteru kua fakaaoga ua e tau talahauaga ia he magaaho ka fakamalolo e tau Kerisiano ke ‘fakaalofa hofihofi,’ kakano ke “hokotia mitaki ke he fakaalofa.” (Efeso 4:32; 1 Peteru 3:8) Ko e kupu Heleni ma e “gakau” kua kakano foki ke fakalataha ke he kupu Heleni pol·yʹ. Ko e fakalatahaaga kua kakano “ko e lahi e gakau.” Ko e talahauaga Heleni nakai kitia mau nei kua fakaaoga ni lagataha he Tohi Tapu, mo e kua hagaao ke he Atua ko Iehova. Ko e New World Translation kua foaki e talahauaga nei: “Kua fakaalofa hofihofi noa a Iehova.”—Iakopo 5:11.
Ko e fiafia ha ia ha tautolu ha ko ia e malolo mua ue atu he lagi mo e lalolagi katoatoa, ko e Atua ko Iehova, kua nakai tatai ke he tau atua vale ne taute he tau tagata nakai fakaalofa hofihofi noa! He muitua ke he ha lautolu a Atua “fakaalofa hofihofi noa,” ko e tau Kerisiano moli kua omoi ke gahua pihia ke he ha lautolu a tau tauteaga mena ke he taha mo e taha.—Efeso 5:1.
[Fakatino he lau 20]
Ka hokotia e fakaalofa hofihofi faka-Atua ke he hana a fakakaupaaga, ne fakaata e Iehova e tau Papelonia ke kautu ke he hana a tau tagata fakakeukeu
[Fakatino he lau 21]
He onoono ke he hana a Tama fakahele he mate kua liga hoko ke he Atua ko Iehova e mamahi lahi mahaki ne nakai la fai tagata kua matematekelea ki ai
[Fakatino he lau 22]
Kua fakaata mitaki katoatoa e Iesu e aga fakaalofa hofihofi he hana a Matua