Kia Fakaalofa Hofihofi
“Kia fakatapulu a mutolu ke he fakaalofa hohofi noa, mo e mahani totonu.”—KOLOSE 3:12.
1. Ko e ha ne kua lata ai e manako lahi he fakaalofa hofihofi he vaha nei?
NAKAI la fai ia fakamua he fakamauaga tuai kua loga lahi he tau tagata kua manako ke he lagomataiaga fakaalofa hofihofi. He fehagai mo e gagao, hoge, nakai fai gahua, matahavala, tau felakutaki, nakai fai fakatufono, mo e tau matematekelea tutupu noa, kua miliona kua manako lagomatai. Ka e ha ha i ai e mena vihi kua mua atu e kelea, ko e manako lahi ai he tau tagata ke he tuaga fakaagaga. Ko Satani, kua iloa e ia e magaaho hana kua tote, “kua fakahehe e lalolagi oti.” (Fakakiteaga 12:9, 12) Ti, ko lautolu i fafo he fakapotopotoaga Kerisiano moli kua mua atu ki ai e hagahagakelea he galo e tau momoui ha lautolu, ti kua nakai tohi he Tohi Tapu e ha amaamanakiaga he liu tumai ma lautolu ne tamate he aho he fakafiliaga he Atua ne hau.—Mataio 25:31-33, 41, 46; 2 Tesalonia 1:6-9.
2. Ko e ha ne taofi mai a Iehova he moumou e tau tagata mahani kelea lahi?
2 Ka e, to hoko ke he tula fakahiku nei, ko e Atua ko Iehova kua fakatumau ke fakakite e fakauka mo e fakaalofa hofihofi ke he tau tagata nakai fakaaue mo e mahani kelea. (Mataio 5:45; Luka 6:35, 36) Kua taute e ia e mena nei ma e kakano taha ne fakamule e ia e fakahala ke he motu nakai tua fakamoli ko Isaraela. “Kua pehe mai e Iki ko Iehova, Kua moui au, nakai fiafia au ka mate e tagata mahani kelea, ka kia liu mai a ia ne mahani kelea he tau mahani hana mo e moui ai; liliu ā, kia liliu kehe ā a mutolu he tau mahani kelea ha mutolu; ka kua fia mamate he ha a mutolu ko e magafaoa a Isaraela na e?”—Esekielu 33:11.
3. Ko e heigoa e fakafifitakiaga kua ha ha ia tautolu ke he fakaalofa hofihofi ha Iehova ma lautolu ne nakai ko e hana a tau tagata, mo e ko e heigoa ne ako mai e tautolu mai he mena nei?
3 Ko e fakaalofa hofihofi ha Iehova kua fakalaulahi ai foki ke he tau tagata Nineva mahani kelea. Kua fakafano e Iehova hana perofeta ko Iona ke hataki mai a lautolu he moumouaga lahi. Kua fakagahuahua mitaki a lautolu ke he fakamatala ha Iona mo e fakatokihala. Ko e mena nei kua omoi a Iehova, ko e Atua fakaalofa hofihofi, ke nakai moumou e taone he magaaho ia. (Iona 3:10; 4:11) Kaeke ke momoko e logonaaga he Atua ma e tau tagata Nineva, ne kua lata ke ha ha i ai e amaamanaki ke he liu tu mai, ti lahi fefe foki hana logonaaga fakaalofa hofihofi ma e tau tagata he vaha nei ne onoono atu ke he moumouaga tukulagi!—Luka 11:32.
Ko e Gahua Nakai Fai Tataiaga he Fakaalofa Hofihofi
4. Fefe e fakakiteaga he fakaalofa hofihofi ha Iehova ke he hana a tau tagata he vaha nei?
4 Lagotatai ai ke he hana a aga fakaalofa hofihofi, kua poaki e Iehova ke he hana a Tau Fakamoli ke fakatumau ke ahi atu ke he tau katofia ha lautolu mo e “tala mitaki nai ke he kautu.” (Mataio 24:14) Mo e he magaaho ne fanogonogo e tau tagata mo e fiafia ke he gahua fakamoui nei, ne hafagi e Iehova e ha lautolu a tau loto ke gega ke he fekau he Kautu. (Mataio 11:25; Gahua 16:14) Ke he fifitakiaga ke he ha lautolu a Atua, ko e tau Kerisiano moli kua fakakite e fakaalofa hofihofi he liu ahi atu ki a lautolu ne loto fiafia, lagomatai a lautolu, ke he mena kua lata, kakano he fakaako ke he Tohi Tapu. Ti, ke he 1993, molea ai e fa mo e hafa e miliona he Tau Fakamoli a Iehova, ke he 231 he tau motu, kua molea e taha piliona he tau tula kua fakamole he fakamatala ke he taha fale ke he taha fale mo e fakaako e Tohi Tapu mo e ha lautolu a tau katofia. Ko lautolu fou nei ne loto fiafia, kua ha ha i ai e magaaho he tukulele ha lautolu a tau momoui ki a Iehova mo e fakalataha ke he matakau he hana Tau Fakamoli papatiso. Ti taute foki e lautolu e gahua nakai fai tataiaga nei he fakaalofa hofihofi ke lata mo lautolu ne liga to eke mo tau tutaki ne kototia agaia he lalolagi mate a Satani.—Mataio 28:19, 20; Ioane 14:12.
5. Ha kua hoko atu e fakaalofa hofihofi faka-Atua ke he hana a fakakaupaaga, ko e heigoa ka tupu ke he lotu ne talahau fakahehe e Atua?
5 Tata lahi to fakagahua a Iehova ko e “toa.” (Esoto 15:3) Mai ha ko e fakaalofa hofihofi ke he hana a higoa mo e hana a tau tagata, to uta kehe e ia e mahani kelea mo e fakatu e lalolagi tututonu fou. (2 Peteru 3:13) Ko lautolu ka hoko mua ki ai e aho he ita he Atua ko e tau lotu he Kerisitenitome. Ti pihia foki kua nakai fakahao he Atua hana a faituga i Ierusalema he lima he patuiki a Papelonia, ti to nakai fakahao e ia e tau fakatokatokaaga lotu ne hukui fakahehe a ia. To tuku he Atua ke he loto he tau tagata he Tau Motu Kaufakalataha ke tukituki a Kerisitenitome mo e falu faga lotu fakavai. (Fakakiteaga 17:16, 17) “Ko au foki,” he talahau e Iehova, “nakai fakahao e au a lautolu, to nakai fakaalofa atu au; to taui atu e au ha lautolu a tau mahani kelea ki luga he tau ulu ha lautolu.”—Esekielu 9:5, 10.
6. Ke he tau puhala fefe he Tau Fakamoli a Iehova kua omoi ke fakakite e fakaalofa hofihofi?
6 Ha kua fai magaaho agaia, ko e Tau Fakamoli a Iehova kua fakatumau ke fakakite e fakaalofa hofihofi ma e tau katofia ha lautolu he fakamatala fakamakamaka e fekau he Atua he fakamouiaga. Mo e fa amaamanaki ki ai, ke he tau mena kua lata, kua lagomatai foki e lautolu e tau tagata ke he tau manako fakatino. Ke he mena nei, pete ia, ko e matagahua fakamua ha lautolu, ke leveki e tau manako he tau tagata i loto he magafaoa tino mo lautolu ne tatai ki a lautolu he tua. (Kalatia 6:10; 1 Timoteo 5:4, 8) Ko e loga he tau gahua fakatotoka ne taute he Tau Fakamoli a Iehova ke lata mo e tau tagata kua tua kua matematekelea ai ke he tau mamahi kehekehe, kua eke ai mo tau fakafifitakiaga mua ue atu he fakaalofa hofihofi. Pete ia, kua nakai leo e tau Kerisiano ke he matematekelea to fakakite e fakaalofa hofihofi. Ne fakatata mafiti e lautolu e fua nei he fehagai mo e tau hake hifo he tau aho takitaha he moui.
Ko e Vala he Tagata Fou
7. (a) Ia Kolose 3:8-13, matutaki fefe e fakaalofa hofihofi mo e tagata fou? (e) Ko e heigoa he fakaalofa hohofi kua fakamukamuka ma e Kerisiano ke taute?
7 Kua moli ko e agahala pauaki ha tautolu mo e fakaohooho kelea he lalolagi ha Satani ko e tau fakalavelave ke he ha tautolu a fakaalofa hofihofi. Ko e mena ia ne fakamafana mai he Tohi Tapu ki a tautolu ke tuku kehe e ‘ita, vale, loto kelea, kupu kelea, mo e kupu fuafua kelea.’ Ka kua fakatonu a tautolu ke ‘fakatapulu a tautolu ke he tagata fou’—ko e tagata kua fakatatai ke he fakatai he Atua. Fakamua ki ai, kua poaki mai ki a tautolu ke fakatapulu a tautolu “ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka.” Kua fakakite mai foki mogoia he Tohi Tapu ki a tautolu e puhala aoga ke fakakite e tau fua nei. “Kia fefakaukaaki a mutolu, mo e fefakamagaloaki, kaeke kua mahani kelea taha kia taha; tuga ne fakamagalo mai a [“Iehova,” NW] kia mutolu, kia pihia foki a mutolu.” Kua mukamuka lahi ke fakamagalo kaeke ke ha ha ia tautolu e “fakaalofa hohofi noa” ma e ha tautolu a tau matakainaga.—Kolose 3:8-13.
8. Ko e ha ne aoga ai ke ha ha i ai e agaga fakamagalo?
8 Ke he taha fahi, ko e kaumahala ke fakakite e fakaalofa hofihofi to hagahaga kelea e fakamagalo he fakafetuiaga ha tautolu mo Iehova. Kua fakakite malolo e Iesu e mena nei he hana a fakataitaiaga he tupa nakai fakamagalo, kua tuku he hana iki ke he fale pouli “ato taui mai hana tau mena oti.” Kua lata tonu ni e tupa mo e mena ia kakano kua kaumahala lahi a ia ke fakakite e fakaalofa hofihofi ke he taha tupa foki kua ole ma e fakaalofa hohofi noa. Kua fakaoti e Iesu e fakataitaiaga he talahau: “To eke pihia foki haku a Matua ha he lagi kia mutolu, kaeke kua nakai takitaha a mutolu mo e fakamagalo mo e tau loto katoa ha mutolu e tau matakainaga ha mutolu ka mahani kelea mai a lautolu.”—Mataio 18:34, 35.
9. Fakafetui fefe e fakaalofa hofihofi ke he vala aoga lahi he tagata fou?
9 Ke fakaalofa hofihofi ko e kitiaaga aoga lahi he fakaalofa. Mo e ko e fakaalofa ko e fakakiteaga he faka-Kerisiano moli. (Ioane 13:35) Ti, ko e talahauaga he Tohi Tapu ke he tagata fou kua fakahiku aki: “Ka e ha i luga he tau mena oti ia e fakaalofa ko e pipi haia ke fakamaopoopo ai.”—Kolose 3:14.
Mahekeheke—Ko e Fakalavelave ke he Fakaalofa Hofihofi
10. (a) Ko e heigoa ne fakatupu aki e ita tafua ke vaka ke he ha tautolu a tau loto? (e) Ko e heigoa e tau fua kelea kua maeke ke hau he ita tafua?
10 Ha ko e ha tautolu a agahala pauaki he tagata, ko e logonaaga he mahekeheke kua mukamuka ke vaka ke he ha tautolu a tau loto. Ko e matakainaga tane po ke fifine kua liga ke fakamonuina aki e tau lotomatala pauaki po ke tau koloa loga ne nakai moua e tautolu. Po ke taha tagata kua moua e tau fakamonuinaaga fakaagaga mo e tau kotofaaga. Kaeke ke ha ha ia tautolu e mahekeheke ki a lautolu ia, to maeke nakai a tautolu ke taute ki a lautolu e fakaalofa hofihofi lahi? Liga nakai. Ka ko e, tau logonaaga ita tafua kua liga gahua fakahaga a lautolu ke he tau tutala tutuhia po ke tau gahua nakai totonu, ha kua talahau e Iesu hagaao ke he tau tagata: “Ha ko e puke he loto ke vagahau mai ai hana gutu.” (Luka 6:45) Ko e falu kua kau mo e tala tutuhia pihia. Ti ko e mafola he magafaoa po ke fakapotopotoaga he tau tagata he Atua to liga mavehevehe ai.
11. Nakai fakaata fefe he tau lafu tokohogofulu ha Iosefa e fakaalofa hofihofi ke he ha lautolu a tau loto, mo e ko e heigoa e fua?
11 Manamanatu ke he mena ne tupu ke he taha magafaoa lahi. Ko e tau tama tane uluaki hogofulu ha Iakopo kua ita tafua ke he ha lautolu a tugaane tote ko Iosefa kakano ko ia e fakahele he matua tane ha lautolu. Ti ko e fua kua, “nakai maeke ia lautolu ke vagahau fakamitaki kia ia.” Fakamui, kua fakamonuina a Iosefa aki e tau miti faka-Atua, fakamoli ai ko ia ko e fakahele ha Iehova. Kua foaki he mena nei ke he hana a tau lafu e “au atu ai he vihiatia e lautolu a ia.” Ha kua nakai huo kehe e lautolu e ita tafua mai he tau loto ha lautolu, kua nakai fai mena ai ma e fakaalofa hofihofi mo e takitaki atu ke he agahala kelea lahi.—Kenese 37:4, 5, 11.
12, 13. Ko e heigoa ha tautolu ka taute ka hu mai e ita tafua ke he loto ha tautolu?
12 Favale ai, kua fakafua e lautolu a Iosefa ke he fakatupa. Ke ufiufi ai e kelea, ne fakavaia e lautolu e matua tane ha lautolu ke manamanatu kua keli he manu vale a Iosefa. Mole atu e tau tau ko e ha lautolu a tau agahala kua fakakite ai he magaaho ne fakaohooho he hoge ke o atu ki Aikupito mo e fakatau mena kai. Ko ia ne leveki e tau mena kai, kua nakai kitia ai e lautolu ko Iosefa, kua tukumale a lautolu ko e tau toko mo e tala age ki a lautolu ke nakai liu kumi lagomatai ki a ia ato tamai ha lautolu a lafu tehina fakahiku, ko Peniamina. Ke he magaaho nei, ko Peniamina ko e fakahele he ha lautolu a matua tane, mo e iloa e lautolu to nakai manako a Iakopo ke toka a ia ke fano.
13 Ti he tutu ai ki mua a Iosefa, ko e ha lautolu a tau loto manamanatu kua omoi a lautolu ke talahau: “Kua hala moli a tautolu, ke he matakainaga ha tautolu [ko Iosefa], ne kitia e tautolu e mamahi he hana loto he olelalo mai a ia kia tautolu, ka e nakai mahalohalo ai a tautolu, ko e mena ia kua hoko mai ai kia tautolu e matematekelea nai.” (Kenese 42:21) Ke he hana a fakaalofa hofihofi ka e mauokafua ke he fakafehagai, kua lagomatai e Iosefa hana tau matakainaga ke fakamoli e ha lautolu a fakatokihala loto moli. Ti fakakite e ia a ia ki a lautolu mo e fakamagalo fakamokoi ki a lautolu. Kua liu e mafola he magafaoa fakatu foki. (Kenese 45:4-8) Ko e tau Kerisiano, kua lata ia tautolu ke ako mai e fakaakoaga mai he mena nei. Iloa ai e tau fua kelea he mahekeheke, kua lata ia tautolu ke liogi ki a Iehova ma e lagomatai ke hukui e tau logonaaga mahekeheke aki e “fakaalofa hohofi noa.”
Falu Fakalavelave ke he Fakaalofa Hofihofi
14. Ko e ha ke kalo kehe a tautolu he fakatokanoa atu ke he mahani vale?
14 Ko e taha fakalavelave ke he fakaalofa hofihofi a tautolu kua fua mai he fakatokanoa a tautolu ke he mahani vale. Ko e tau sipoti mo e fakafiafiaaga ne fakakite e mahani vale kua fakaholo ki mua e manako malolo he mahani vale. Ke he vaha he Tohi Tapu, ko e tau tagata pouli kua kitekite tumau ai ke he tau tau fetoko mo e falu he tau faga fakakikiveka tagata he male latau fakafiafia he Pule Atu motu Roma. Ko e fakafiafiaaga pihia, hagaao ke he taha tagata fakamauaga tala tuai, “kua moumou e vaka he loto momoko ke he matematekelea ne kua fakakehe e tagata mai he tau manu.” Ko e loga he fakafiafiaaga he lalolagi fou he vaha nei kua tatai foki. Ko e tau Kerisiano, ne kumi ke fakaalofa hofihofi, kua lata ke tokoluga e fifiliaga ke he ha lautolu a fifili ke he tau mena totou, tau kifaga, mo e tau fakaholoaga tivi. Pulotu ai kua tokamau e lautolu e tau kupu ha Salamo 11:5: ‘Kua vihiatia [e Iehova a] ia kua fiafia ke he favale.’
15. (a) Maeke fefe he tagata ke fakakite e nakai lahi he fakaalofa hofihofi? (e) Fanogonogo fefe e tau Kerisiano ke he tau manako he tau tagata kua tua mo e tau katofia?
15 Ko ia foki e tagata manamanatu ki a ia ni kua liga ke tote e fakaalofa hofihofi. Kua kelea lahi e mena nei, he fakamaama he aposetolo ko Ioane: “Ko e tagata kua toka ki ai e koloa he lalolagi, kua kitekite foki e ia ke he matakainaga hana kua nofogati ka e pa atu hana loto kia ia, kua nofo fefe e fakaalofa ke he Atua ke he loto hana?” (1 Ioane 3:17) Ko e tote pihia he fakaalofa hofihofi kua fakakite he ekepoa ne fia tututonu lahi mo e tagata Levi he fakataitaiaga ha Iesu ke he katofia Samaria. He kitia ai e tuaga he ha lautolu a matakainaga Iutaia kua teitei ke mate, kua afe a laua ke he taha fahi he puhalatu mo e o loa a laua. (Luka 10:31, 32) Ka koe kehekeheaga, ko e tau Kerisiano fakaalofa hofihofi kua mafiti ke gahua ke he tau manako fakatino mo e fakaagaga he tau matakainaga ha lautolu. Ke tuga e Samaria he fakataitaiaga ha Iesu, kua manamanatu foki a lautolu hagaao ke he tau manako he tau tagata kehe. Ko e mena ia kua foaki fiafia e lautolu e magaaho, malolo, mo e tau koloa ke fakatupu ki mua e gahua taute tutaki. Ke he mahani nei, kua foaki e lautolu ke he fakamouiaga he tau miliona.—1 Timoteo 4:16.
Fakaalofa Hofihofi ma Lautolu ne Gagao
16. Ko e heigoa e fakakaupaaga kua kitia e tautolu he fehagai mo e gagao?
16 Ko e gagao ko e taha vala he tau tagata nakai mitaki katoatoa hane mamate. Ko e tau Kerisiano kua nakai kehe, mo e laulahi ia lautolu kua nakai iloilo ke he fahi fakaekekafo, po ke fakatata ai e tau mana tuga ne taute he falu Kerisiano fakamua ne moua e tau malolo pihia mai ia Keriso mo e hana a tau aposetolo. Mo e he mamate ai tau aposetolo ha Keriso mo e ha lautolu a tau kapitiga fakalataha tata, ko e tau malolo mana pihia kua galo kehe. Ti, ko e ha tautolu a iloilo ke lagomatai a lautolu ne matematekelea mai he gagao fakatino, fakalataha mo e nakai gahuahua mitaki e uho ulu mo e manamanatu vikoia, kua tote ai.—Gahua 8:13, 18; 1 Korinito 13:8.
17. Ko e heigoa e fakaakoaga kua ako mai e tautolu mai he puhala ne taute atu ke he tagata gagao mo e maanu ko Iopu?
17 Ko e fakaatukehe kua fa fakalataha mo e tatalu. Ma e fakatai, ko e matakutaku Atua ko Iopu kua fakaatukehe lahi ha ko e gagao kelea mo e tau mena matematekelea ne fakahoko e Satani ki luga hana. (Iopu 1:18, 19; 2:7; 3:3, 11-13) Kua manako a ia ke he tau kapitiga ne kua taute atu e fakaalofa hofihofi ki a ia mo e ke “fakamafana.” (1 Tesalonia 5:14) Ka ko e tau tagata fakamafana tokotolu kua ahi atu ki a ia mo e hohopo atu ke he fakaotiaga hepe. Kua fakakavega e lautolu e tuaga fakaatukehe ha Iopu he talahau e manatu ke he hana tau matematekelea ha ko e hana ni a hehe. He fakaalofa hofihofi, ko e tau Kerisiano kua lata ke kalo kehe neke mokulu ke he hele pihia he magaaho ka gagao e tau tagata he tua po ke fakaatukehe. Ke he falu a magaaho, ko e mena aoga ki a lautolu pihia kua lata ki ai ko e tau aahi fakafeleveia gahoa mai he tau motua po ke falu he tau Kerisiano loto motua ke fanogonogo mo e fakaalofa hofihofi, fakakite e maamaaga, mo e foaki e fakatonuaga he Tohiaga Tapu.—Roma 12:15; Iakopo 1:19.
Fakaalofa ma Lautolu ne Lolelole
18, 19. (a) Fefe e fehagai he tau motua mo lautolu ne lolelole po ke taute mena hehe? (e) Pete ni kua lata ke fakatu e komiti fakafili, ko e ha kua aoga lahi ma e tau motua ke taute e tau tagata taute mena kelea aki e fakaalofa hofihofi?
18 Ko e tau motua kua lata pauaki ke fakaalofa hofihofi. (Gahua 20:29, 35) “Kia tautolu kua malolo ke lagomatai ke he lolelole ha lautolu kua nakai fahia,” he poaki mai he Tohi Tapu. (Roma 15:1) Ha kua nakai mitaki katoatoa, kua taute mena hehe oti a tautolu. (Iakopo 3:2) Ko e fakaalofa lahi kua manako he fehagai “kaeke ke moua he tagata he taha holifono.” (Kalatia 6:1) Nakai lata e tau motua ke tuga e tau Farasaio fia tututonu lahi ne nakai fai kakano ke he ha lautolu a fakagahuahuaaga ke he Matafakatufono he Atua.
19 He kehekehe, ko e tau motua kua muitua ke he fakafifitakiaga fakaalofa hofihofi he Atua ko Iehova mo Iesu Keriso. Ko e matapatu gahua ha lautolu ke fagai, fakamalolo, mo e ati hake e tau mamoe he Atua. (Isaia 32:1, 2) Ka ke nakai lali ke takitaki e tau mena ha ko e loga he tau poakiaga, ne kua hagaao a lautolu ke he matapatu fakaakoaga he Kupu he Atua. Ti, ko e gahuahuaaga he tau motua kua lata ke ati hake, ke tamai e olioli mo e fakaaue ma e mitaki ha Iehova ke he tau loto he tau matakainaga ha lautolu. Kaeke ke taute he taha matakainaga he tua e taha hehe tote, fa mahani e motua ke nakai fakahako a ia ki mua he falu. Kaeke kua lata ke tutala ki ai, ko e tau logonaaga fakaalofa he fakaalofa hofihofi ka omoi e motua ke uta a ia ke he mafoa mo e fakatutala e mena vihi ke nakai logona ai he falu. (Fakatatai Mataio 18:15.) Pete ni e uka he taha tagata ke femataaki ai, ko e fakafeleveia he motua kua lata ke fakatekiteki mo e lagomatai. Kia nakai kumi e ia ha piuaga ke tuku kehe a ia mai he fakapotopotoaga. Pete ni kua lata ke fakatu e komiti fakafili, ko e tau motua ka fakakite e fakaalofa hofihofi lahi he fehagai mo e tagata kua putoia ke he taute mena kelea lahi. Ko e ha lautolu a mahani molu ka liga lagomatai ke tamai a ia ke he fakatokihalaaga.—2 Timoteo 2:24-26.
20. Magaaho fe he tau fakakiteaga he fakaalofa hofihofi kua nakai lata, mo e ko e ha?
20 Ha ha i ai e tau magaaho, pete ia, ka nakai maeke ke fakakite he fekafekau a Iehova e fakaalofa hofihofi. (Fakatatai Teutaronome 13:6-9.) Ma e Kerisiano ke “aua neke feoaki” mo e kapitiga tata po ke magafaoa kua tuku ki tua kua eke ai mo kamatamata moli. Ke he mena pihia, kua aoga lahi a ia ke nakai kaumahala ke he logonaaga he momoko. (1 Korinito 5:11-13) Ko e mauokafua pihia ka liga fakamalolo a ia ne taute e mahani kelea ke tokihala. Lafi ai, ke he fehagaiaga mo e taha ne nakai tatai e tino, kua lata e tau Kerisiano ke kalo kehe mai he fakatata e mahani nakai lata he fakaalofa hofihofi ke takitaki atu ke he mahani nakai lata he mahani fakatane mo e fifine.
21. Ke he tau matakavi fe foki kua lata ia tautolu ke fakakite e fakaalofa hofihofi, mo e ko e heigoa e tau aoga?
21 Nakai fai vala lahi ke fakaata a tautolu ke fakatutala oti e tau matakavi loga ne kua lata ki ai e fakaalofa hofihofi—he fehagai mo e tau momotua, he mauku, lautolu ne ha ha i ai e favaleaga mai he tau hoa nakai tua. Ko e tau motua gahua malolo kua lata ke fakakite foki ki ai e fakaalofa hofihofi. (1 Timoteo 5:17) Fakalilifu ki a lautolu mo e foaki ki a lautolu e lagomatai. (Heperu 13:7, 17) “Kia loto fakalataha a mutolu oti . . . kia hofihofi noa e fakaalofa,” he tohi he aposetolo ko Peteru. (1 Peteru 3:8) He fakagahua ai e mena nei ke he tau mena oti ne kua lata ki ai, kua fakaholo ki mua e tautolu e kaufakalatahaaga mo e fiafia lahi he fakapotopotoaga mo e toho mai a lautolu i fafo ki loto he kupu moli. Mua atu ke he tau mena oti, kua fakalilifu e tautolu e Matua fakaalofa hofihofi ha tautolu, ko Iehova.
Tau Huhu ke Liu Manatu
◻ Fakakite fefe e Iehova e fakaalofa hofihofi ma e tau tagata agahala?
◻ Ko e ha ne aoga ai ke fakaalofa hofihofi lahi?
◻ Ko e heigoa falu fakalavelave ke he ha tautolu a fakaalofa hofihofi?
◻ Fefe ha tautolu a tauteaga ke he tau tagata gagao mo e tau fakaatukehe
◻ Ko hai pauaki kua lata ke fakaalofa hofihofi ki ai, mo e ko e ha?
[Puha he lau 29]
TAU FARASAIO NAKAI FAKAALOFA HOFIHOFI
KO E okioki he aho Sapati kua eke mo fakamonuinaaga fakaagaga mo e fakatino ma e tau tagata he Atua. Pete ia, ko e tau takitaki lotu Iutaia, kua taute ai e loga he tau poakiaga ne nakai fakalilifu e matafakatufono Sapati he Atua mo e fakakavega aki e tau tagata. Ma e fakatai, kaeke ke pakia e taha po ke matematekelea he gagao, to nakai moua lagomatai a ia ke he Sapati ato hoko e moui hana ke he hagahagakelea.
Ko e taha e aoga he tau Farasaio kua pehi malolo lahi ke he hana a fakahokohoko he matafakatufono he Sapati ne kua talahau ai: “Nakai maeke ke fakamafana e tau tagata maanu, po ke ahi atu taha ke he tau tagata gagao ke he Sapati.” Ko e falu he tau takitaki lotu kua fakaata e tau ahi atu pihia ke he Sapati ka e taute e fakamoliaga: “Fakatapu e tau hihina mata.”
Haia kua tonutia e fakahala a Iesu ke he tau takitaki lotu Iutaia he fakaheu e tau tutuaga mua atu e aoga he Matafakatufono, tuga e fakafili tonu, fakaalofa, mo e fakaalofa hofihofi noa. Ko e mena ia ni ne talahau e ia ke he tau Farasaio: “Kua vevete e mutolu e kupu he Atua ke he tau kupu toka tuai ha mutolu”!—Mareko 7:8, 13; Mataio 23:23; Luka 11:42.
[Tau Fakatino he lau 27]
Ke he 231 he tau motu ko e Tau Fakamoli a Iehova kua uta ai e gahua nakai fai tataiaga he fakaalofa hofihofi ke he tau tagata he tau kaina, ke he tau puhalatu, pihia foki ke he tau fale pouli
[Fakatino he lau 28]
Tokanoa ai ke he mahani vale, tuga a ia ke he tau tivi, kua fakatote e fakaalofa hofihofi