Kia “Hofihofi Noa e Fakaalofa”
1. Ko e heigoa kua manako lahi e tau tagata ki ai he magaaho nei?
1 Nakaila pihia tali mai he fakamauaga tuai e tokologa he tau tagata kua manako lahi ke moua e lagomatai fakaalofa. Ko e tau tutūaga he lalolagi kua kelea fakahaga ti kua tupu lahi e tau logonaaga nakai fiafia, fakaatukehe, mo e nakai fai amaamanakiaga. Totou miliona ne manako lagomatai, ti ko tautolu ko e tau Kerisiano kua ha ha i ai he tuaga ke fakakite e manamanatu mooli ke he tau katofia ha tautolu. (Mata. 22:39; Kala. 6:10) Maeke fēfē ke fakakite e manamanatu pihia?
2. Ko e heigoa e puhala kua mua atu ma tautolu ke fakakite e fakaalofa?
2 Ko e Gahua Fakaalofa: Ko e Atua ni hokoia e punamaiaga he mafanatia mooli tukulagi. (2 Kori. 1:3, 4) Kua fakamalolō e Iehova a tautolu ke fifitaki ki a ia he “hofihofi noa e fakaalofa,” ti kua tuku mai e ia ki a tautolu e poakiaga ke o atu ke he tau katofia ha tautolu mo e tala mitaki he Kautu. (1 Pete. 3:8) Ko e eketaha ke taute e gahua nei ko e puhala kua mua atu ma tautolu ke fakamafana e “tau loto ne malipilipi,” ha ko e Kautu he Atua ko e amaamanakiaga moolioli ni a ia ma e tau tagata ne matematekelea. (Isaia 61:1) Mai he fakaalofa ha Iehova ke he tau tagata haana, to nakai leva ti gahua a ia ke utakehe e mahani kelea ka e fakatū e lalolagi tututonu foou.—2 Pete. 3:13.
3. Onoono fēfē a tautolu ke he tau tagata tuga ne taute e Iesu?
3 Onoono ke he Tau Tagata Tuga ne Taute e Iesu: Pete he fakamatala a Iesu ke he moto tagata tokologa, ne nakai kitia hokoia ni e Iesu e matakau he tau tagata. Ne fioia e ia e tau tagata ne manako ke he tau mena fakaagaaga. Kua tuga e tau mamoe nakai fai leveki a lautolu ke takitaki ai. Kua aamotia lahi e loto a Iesu he mena ne kitia e ia, ti omoomoi a ia ke fakaako a lautolu mo e fakauka. (Mare. 6:34) Ka onoono a tautolu ke he tau tagata tuga he onoono e Iesu, to fakamalolō a tautolu ke fakakite e fakaalofa mooli ki a lautolu ko e tau tagata takitokotaha. To kitia maali e mena nei he hagahaga he leo mo e foliga ha tautolu. To tuku fakamua e tautolu e gahua fakamatala, mo e to tauteute e tautolu e tau kupu ha tautolu ke felauaki mo e tau mena ne tupetupe ki ai a lautolu takitokotaha.—1 Kori. 9:19-23.
4. Ko e ha kua lata ia tautolu ke fakatapulu a tautolu ke he fakaalofa?
4 Ko e moto tagata tokologa mai he tau motu oti kua talia fiafia ke he fekau he Kautu, mo e fiafia lahi ne fakakite ki a lautolu. He matutaki a tautolu ke fakatapulu a tautolu ke he fakaalofa, to fakalilifu mo e fakafiafia e tautolu a Iehova ko e Atua fakaalofa ha tautolu.—Kolo. 3:12.