Fekafekau ki a Iehova mo e Olioli he Loto
“To moua ai a koe he tau malaia oti na, . . . Nukua nakai fekafekau ai a koe kia Iehova hau a Atua mo e fiafia, mo e olioli he loto.”—TEUTARONOME 28:45-47.
1. Ko e heigoa e fakamoliaga i ai ko lautolu ne fekafekau ki a Iehova kua olioli lahi, ke he mena fe ni ne fekafekau a lautolu ki a ia?
KUA olioli lahi e tau fekafekau a Iehova, pete he taute e lautolu e finagalo hana ke he lagi po ke he lalolagi. Ko e “tau fetu he pogipogi” fakaagelu kua lologo mo e olioli lahi ke he fakaveaga he lalolagi, mo e nakai fai fakauaua mo e olioli ko e hogofulu afe he tau agelu he lagi ‘kua eke hana fekau.’ (Iopu 38:4-7; Salamo 103:20) Ko e Tama fuataha ni ha Iehova ko e “iki gahua iloilo” olioli lahi ke he lagi mo e moua ai e fiafia he taute e finagalo faka-Atua ha ko e tagata ko Iesu Keriso he lalolagi. Mua atu ki ai, “ko ia ne fakauka ke he satauro, mo e fakateaga a ia ke he ma, ha ko e [“olioli,” NW] kua toka ki mua hana, kua nofo foki a ia ke he fahi matau he nofoaiki he Atua.”—Fakatai 8:30, 31, NW; Heperu 10:5-10; 12:2.
2. Ko e heigoa e fifiliaga ko e tau Isaraela kua iloa e tau fakamonuinaaga po ke tau malaia?
2 Kua iloa he tau Isaraela e olioli he magaaho ne fakafiafia e lautolu e Atua. Ka e kua na liuliu a lautolu ki a ia? Kua hataki a lautolu: “[Ko e tau malaia] to ha ia koe mo e hau a fanau e tau mena ia, ke eke mo fakamailoga mo e tau mena ke ofomate ai tukulagi. Nukua nakai fekafekau ai a koe kia Iehova hau a Atua mo e fiafia, mo e olioli he loto, ha ko e loga he tau mena oti; Ko e mena ia ke fekafekau ai a koe mo e fia kai, mo e fia inu, mo e nakai fai felevehi, mo e nofogati ke he tau mena oti kia lautolu kua fai fi kia koe ke fakafano mai e Iehova kia koe; to tuku atu foki e lapatoa hahamo ke he hau a tukeua, ato fakaoti e ia a koe.” (Teutaronome 28:45-48) Ko e tau monuina mo e tau malaia kua fakakite fakamaaliali a lautolu, mo lautolu ne nakai ko e tau fekafekau ha Iehova. Ko e tau malaia pihia foki kua fakamau kua nakai fakateaga ke he tau matapatu fakaakoaga mo e finagalo he Atua, po ke ke vihiatia ai a lautolu. Ha kua nakai fia manako e tau Isaraela ke fanogonogo e tau hatakiaga ha Iehova he moumouaga mo e fakapaeaaga, kua eke a Ierusalema “mo kaialu ki ai he tau motu oti he lalolagi.” (Ieremia 26:6) Ti ko e mena ia kua lata a tautolu ke omaoma ke he Atua mo e olioli hana a taliaaga. Ko e olioli ko e taha he tau fakamonuinaaga loga faka-Atua kua iloa he tau tagata mahani Atua.
Fekafekau Fefe Mo e “Olioli he Loto”
3. Ko e heigoa e loto nakai kitia?
3 Ko e tau Isaraela kua fekafekau ki a Iehova “mo e fiafia, mo e olioli he loto.” Ti kua lata foki e tau fekafekau he Atua ke he vaha nei. Ke olioli “ko e fiafia; ke puke ke he olioli.” Pete ni ko e loto fakatino kua talahau he tau Tohiaga Tapu, nakai kakano ko e manamanatu po ke fakakakano moli. (Esoto 28:30) Ko e hana a fakagahuahuaaga lahi ke pamu e toto ke fakahuhua e tau tegatega he tino. Ke he laulahi he tau fakagahuahuaaga, pete ia, kua fakahagaao e Tohi Tapu ke he loto kua nakai kitia, ne molea atu ke he tokaaga he fakaalofa hohofi, fakaohoohoaga, mo e iloilo. Kua pehe ai ko e kakano ma e “vala he lotouho he mena katoa, ko loto, mo e kakano ke he tagata i loto tuga he fakakite e ia ni ke he hana a tau gahua kehekehe oti, hana tau manako, tau fakaalofa hohofi, tau logonaaga he loto, manako lahi, finagalo, hana tau manatu, tau fioiaaga, tau manatu noa, hana pulotu, iloilo, taleni, hana tua mo e hana a tau kakano, hana manatuaga mo e hana logonaaga hifo.” (Journal of the Society of Biblical Literature and Exegesis, 1882, lau tohi 67) Ko e loto nakai kitia ha tautolu kua putoia e tau logonaaga mo e tau logonaaga he loto, fakalataha mo e olioli.—Ioane 16:22.
4. Ko e heigoa ka lagomatai a tautolu ke fekafekau ke he Atua ko Iehova mo e olioli he loto?
4 Ko e heigoa ke lagomatai a tautolu ke fekafekau ki a Iehova mo e olioli he loto? Ko e onoonoaga mitaki mo e fakaaueaga ke he ha tautolu a tau fakamonuinaaga mo e kotofaaga mai he Atua kua lagomatai. Tuga a nei, fakakite mo e olioli lahi e tautolu ke he ha tautolu a kotofaaga he taute e “fekafekau tapu” ke he Atua moli. (Luka 1:74, NW) Ha ha i ai e kotofaaga kua tatai ki ai he fua e higoa a Iehova ko e hana a Tau Fakamoli. (Isaia 43:10-12) Ke he mena nei kua lafi e tautolu e olioli lahi mahaki he iloa ko e muitua ke he Kupu he Atua ne fakafiafia e tautolu a ia. Mo e ko e olioli ha ia he fakaata e maama fakaagaga mo e ti lagomatai e tokologa ke o mai he pouligia!—Mataio 5:14-16; fakatatai 1 Peteru 2:9.
5. Ko e heigoa e punaaga he olioli mahani Atua?
5 Ka e, fekafekau ki a Iehova mo e olioli he loto nakai ko e manamanatu mitaki noa. Kua aoga lahi ke hako ke he manatu. Ka ko e olioli mahani Atua nakai ko e mena moua e tautolu mai he tupuaga he aga. Ko e fua he agaga ha Iehova. (Kalatia 5:22, 23) Ka nakai ha ha ia tautolu e olioli pihia, kua liga lata ia tautolu ke taute e tau hikihikiaga ke maeke ke tiaki e manamanatuaga po ke taute e falu mahani nakai mai he tohiaga tapu ne maeke ke fakaita e agaga he Atua. (Efeso 4:30) Ko lautolu ne fakamoli ki a Iehova, pete ia, ki a nakai matakutaku a tautolu ko e tote he olioli he logonaaga he loto ke he falu a magaaho ko e fakamoliaga he nakai talia faka-Atua. Nakai mitaki katoatoa a tautolu mo e ha ha ai ke he mamahi, momoko, mo e pihia foki he fakaatukehe ke he tau magaaho, ka e maama e Iehova a tautolu. (Salamo 103:10-14) Ko e mena ia kua lata ia tautolu ke liogi ma e hana a agaga tapu, mo e manatu ko e fua hana he olioli ko e mena foaki he Atua. Ko e Matua fakaalofa ha tautolu he lagi ka tali e tau liogi pihia ha tautolu mo e to maeke a tautolu ke fekafekau ki a ia mo e olioli he loto.—Luka 11:13.
Ka Galo e Olioli
6. Kaeke ke galo e olioli he fekafekau ha tautolu ke he Atua, ko e heigoa ha tautolu ka taute?
6 Kaeke ke galo e olioli ha tautolu ke he fekafekauaga, to liga ke matutu hifo fakahaga a tautolu he fekafekau ki a Iehova po ke nakai mahani fakamoli foki ki a ia. Ka pihia, kua pulotu ke fakatokolalo mo e liogi ke manamanatu ke he ha tautolu a tau logonaaga he loto mo e taute e tau hikihikiaga kua lata. Ke moua e olioli mai he Atua, kua lata ia tautolu ke fekafekau ki a Iehova mai he fakaalofa mo e ha tautolu a tau loto, solu, mo e manatu katoa. (Mataio 22:37) Kia nakai fekafekau a tautolu mo e aga fetotokoaki, ha kua tohi e Paulo: “Kaeke ko e Agaga kua momoui ai a tautolu, kia mahani foki a tautolu ke lata mo e Agaga. Aua neke eke a tautolu mo tau tagata hula noa, aua neke fepalekoaki a tautolu, aua neke mahekeheke a tautolu ko e taha kia taha.” (Kalatia 5:25, 26) To nakai ha ha ia tautolu e olioli moli kaeke ke fekafekau a tautolu kakano kua manako a tautolu ke mua ue atu ke he falu po ke tutuli fakahekeaga.
7. Liuaki mai fefe e tautolu e olioli he loto?
7 Ha ha i ai e olioli he taute ha tautolu a tukuleleaga ki a Iehova. He magaaho ne tukulele fou a tautolu ke he Atua, kua gahua fakamakamaka a tautolu ke he puhala he moui Kerisiano. Kua fakaako e tautolu e tau Tohiaga Tapu mo e fakalataha tumau he tau feleveiaaga. (Heperu 10:24, 25) Kua foaki mai ki a tautolu e olioli ke gahua ke he fekafekauaga. Ka e, kua ka tote lahi e olioli ha tautolu? Ko e kumikumi ke he Tohi Tapu, o ke he feleveiaaga, fakalataha ke he fekafekauaga—moli lahi, ko e lauiaaga katoatoa ke he tau mena faka-Kerisiano—kua lata ke foaki ke he tau momoui ha tautolu e mauokafua fakaagaga mo e liuaki mai e fakaalofa ne ha ha ia tautolu fakamua mo e olioli fakamua ha tautolu he loto. (Fakakiteaga 2:4) Ti nakai tuga e falu a tautolu ne nakai fai olioli mo e fa lata ke moua tumau e lagomatai fakaagaga. Kua fiafia lahi e tau motua ke lagomatai, ka e kua lata ia tautolu takitokotaha ke fakamoli e tukuleleaga ha tautolu ke he Atua. Nakai fai tagata kehe foki ke taute e mena nei ma tautolu. Ti ko e mena kua lata ia tautolu ke foli ke mumuitua ke he puhala Kerisiano mitaki ke maeke ke fakamoli ha tautolu a tukuleleaga ki a Iehova mo e ke moua e olioli moli.
8. Ko e ha ne aoga ai e loto manamanatu maaliali kaeke ke manako a tautolu ke olioli lahi?
8 Kaeke ke ha ha ia tautolu e olioli ko e fua he agaga he Atua, kua lata ke ha ha ia tautolu e loto manamanatu hifo maaliali. Pete ne leva e lali e Patuiki ko Tavita i Isaraela ke fufu hana a hala, kua matematekelea a ia. Kua moli, ko e hahau he hana a moui kua tuga ke mamiti, mo e kua liga ke taute a ia ke gagao fakatino. Ko e fakatotoka ha ia hana he magaaho ne fakatokihala mo e talahau ai! (Salamo 32:1-5) Nakai maeke ia tautolu ke olioli kaeke ke fufu e tautolu falu hala kelea lahi. To liga fakatupu fakalahi he mena ia a tautolu ke moui e moui matematekelea. Moli, nakai ko e puhala a ia ke iloa e olioli. Ka ko e talahau mo e fakatokihala ka tamai e fakatotoka mo e liuaki mai he agaga olioli.—Fakatai 28:13.
Fakatali Mo e Olioli
9, 10. (a) Ko e heigoa e maveheaga ne moua e Aperahamo, ka e kua kamatamata fefe hana a tua mo e olioli? (e) Moua fefe e tautolu e aoga mai he tau fakafifitakiaga ha Aperahamo, Isaako, mo Iakopo?
9 Ko e taha mena ke ha ha i ai e olioli he magaaho ka fakaako fakamua a tautolu hagaao ke he finagalo faka-Atua ka ko e taha mena ke fakatumau e olioli he tau tau loga he mole. Kua maeke he mena nei ke fakatai ke he mena tupu ke he tagata tua fakamoli ko Aperahamo. He mole atu e lali hana ke poa hana tama tane ko Isaako ke he poakiaga he Atua, ne tala age he agelu e fekau nei: “Kua pehe mai, Kua pehe mai a Iehova, kua omonuo au kia au ni; ha kua eke ni e koe e mena nai, kua nakai lamakai a koe he tama hau, ko e hau a tama tokotaha ni; Ko e mena ia ke fakamonuina fakalahi ai e au a koe, mo e fakatokologa lahi ue atu e au hau a [tega] ke tuga e tau fetu he lagi, ke tuga foki e oneone he matafaga; to moua foki he [tega] hau e gutuhala ha lautolu kua fai fi kia lautolu; Ko e hau a [tega] foki ke monuina ai e tau motu oti kana he lalolagi; ha kua fanogonogo a koe ke he haku tau kupu.” (Kenese 22:15-18, fakatatai NW.) Nakai fakauaua ai, kua molea e olioli a Aperahamo ke he maveheaga nei.
10 Kua amanaki a Aperahamo to eke a Isaako mo “tega” ka puhala mai e tau fakamonuinaaga kua mavehe ke hoko mai. Ka e mole he tau tau mo e nakai fai mena homo ue atu kua fakamoli mai ia Isaako kua liga kamatamata aki e tua mo e olioli ha Aperahamo mo e hana a magafaoa. Ko e fakamauaga he Atua ke he maveheaga ki a Isaako mo e magaaho fakamui ke he hana a tama ko Iakopo kua fakamoli ki a lautolu ko e hauaga he Tega kua ha ha agaia ke he vaha mai i mua, ti kua lagomatai he mena nei a lautolu ke fakatumau ha lautolu a tua mo e olioli. Pete ia, ko Aperahamo, Isaako, mo Iakopo kua mamate mo e nakai kitia e fakamoliaga he tau maveheaga he Atua ki a lautolu, ka e nakai ko e tau fekafekau nakai olioli ha Iehova a lautolu. (Heperu 11:13) Maeke foki a tautolu ke fakatumau ke fekafekau ki a Iehova mo e tua mo e olioli ka e fakatali ke he fakamoliaga he hana a tau maveheaga.
Olioli Pete ne Favaleaga
11. Ko e ha ke fiafia a tautolu pete ni e favaleaga?
11 Ko e tau fekafekau a Iehova, kua maeke ia tautolu ke fekafekau ki a Iehova mo e olioli he loto, pete ni e matematekelea a tautolu he favaleaga. Kua talahau e Iesu e fiafia ha lautolu ne favale ha ko ia, mo e pehe e aposetolo ko Peteru: “Ka kia fiafia a mutolu ha kua fakafetui a mutolu mo Keriso ke he hana tau mamahi, kia fiafia mo e olioli lahi ai a mutolu ka fakakite mai hana lilifu. Ka ekefakakelea a mutolu ha ko e higoa a Keriso, uhoaki a mutolu, ha kua nofo mau ia mutolu e Agaga lilifu he Atua; kua vagahau kelea a lautolu kia ia, ka kua fakaheke e mutolu.” (1 Peteru 4:13, 14; Mataio 5:11, 12) Kaeke ke fakauka a koe ke he favaleaga mo e matematekelea ha ko e mahani tututonu, kua ha ha ia koe e agaga a Iehova mo e taliaaga, mo e fakaholo ki mua moli he mena ia e olioli.
12. (a) Ko e ha ne feleveia ai a tautolu mo e tau kamatamata he tua mo e olioli? (e) Ko e heigoa e fakaakoaga aoga kua ako mai he mena tupu ke he taha tagata Levi kua fakapaea?
12 Maeke ia tautolu ke feleveia mo e tau kamatamata he tua mo e olioli kakano ko e Atua ko e ha tautolu a Huaga. Kua fakamoli e mena nei ia tau Salamo 42 mo e 43. Ma e falu kakano, ko e tagata Levi pauaki kua fakapaea. Kua lahi mahaki e tapuakiaga ne to noa e ia ke he faituga he Atua ti logona e ia kua tuga e aila fia inu, po ke tia fifine, ne manako lahi ke he vai ke he matakavi magomago mo e takalekale noa. Ne “fia inu,” po ke manako lahi a ia, ki a Iehova mo e ke he kotofaaga he tapuaki ke he Atua ke he Hana a faituga. (Salamo 42:1, 2) Ko e mena ne tupu ke he tagata fakapaea nei kua lata ke omoi a tautolu ke fakakite e fakaaue ke he fakalatahaaga ne olioli e tautolu mo e tau tagata a Iehova. Kaeke ko e tuaga pihia kua tuku he fale pouli ha ko e favaleaga kua puipui fakaku a tautolu he fakalataha mo lautolu, kia fakatata e tautolu e tau olioli i tuai fakalataha ke he fekafekauaga tapu mo e liogi ma e fakaukaaga ka e ‘amaamanaki ke he Atua’ a tautolu ke liuaki a tautolu ke gahua tumau mo e hana a tau tagata tapuaki.—Salamo 42:4, 5, 11; 43:3-5.
‘Kia Fekafekau kia Iehova mo e Olioli’
13. Fakakite mai fefe he Salamo 100:1, 2 ko e olioli ko e mena talahaua ke he ha tautolu a fekafekauaga ke he Atua?
13 Ko e olioli ko e mena talahaua ke he ha tautolu a fekafekau ke he Atua. Kua fakakite e mena nei ke he lologo he fakauaeaga ne uhu he salamo: “Kia kalaga kia Iehova a mutolu, ko e lalolagi oti. Kia fekafekau a mutolu kia Iehova mo e [“olioli,” NW]; ati o mai a ki mua hana mo e kalaga [“olioli lahi,” NW].” (Salamo 100:1, 2) Ko Iehova ko e “Atua fiafia” mo e manako a ia ke he hana a tau fekafekau ke olioli foki he uta ha lautolu a tukuleleaga ki a ia. (1 Timoteo 1:11, NW) Ko e tau tagata he tau motu oti kua lata ke fakaolioli ki a Iehova, mo e ha tautolu a fakakiteaga he fakahekeaga kua lata ke malolo, tuga e ‘kalaga lahi’ he matakautau kua kautu. Ha ko e fekafekau ke he Atua kua ati hake, kua lata ke fakalataha aki e olioli lahi. Ha kua, fakamafana mai he salamo e tau tagata ke o mai ke he ha ha hinei he Atua ‘mo e kalaga olioli lahi.’
14, 15. Lauia fefe e Salamo 100:3-5 ke he tau tagata olioli ha Iehova he vaha nei?
14 Kua lafi he salamo: “Kia iloa [mailoga, fakailoa] ko Iehova ko e Atua a ia; ko ia ne eke a tautolu, ka e nakai ko tautolu; ko e hana motu a tautolu, ko e fuifui mamoe ne fagai e ia.” (Salamo 100:3) Ha ko Iehova ko e ha tautolu a Tufuga, kua pule a ia ki a tautolu tuga e leveki mamoe ne taute ke he hana a tau mamoe. Ne leveki fakamitaki he Atua a tautolu ti fakaaue a tautolu ke fakaheke a ia. (Salamo 23) Hagaao ki a Iehova, kua lologo foki e salamo: “Ati huhu atu a mutolu ke he hana tau gutuhala mo e fakahekeaga, kia huhu atu ke he hana tau lotopa mo e lologo; kia fakaheke atu a mutolu kia ia, kia fakamonu ke he hana higoa. Ha kua mitaki a Iehova; tukulagi hana fakaalofa; ke hoko atu foki hana fakamoli ke he taha hau mo e taha hau.”—Salamo 100:4, 5.
15 Ke he vaha nei, ko e tau tagata olioli lahi he tau motu oti kua huhu atu ke he tau lotopa he fale ha Iehova ke taute e fakaaueaga mo e fakaheke. Kua fakamonuina fakaolioli lahi e tautolu e higoa he Atua he vagahau fakamitaki tumau hagaao ki a Iehova, mo e tau fua homo ue atu hana kua omoi a tautolu ke fakaheke ki a ia. Kua mitaki katoatoa a ia, mo e hana a fakaalofa totonu po ke fakaalofa hofihofi hagaao ke he hana a tau fekafekau kua maeke tumau ke falanaki ki ai, ha kua fakatumau ai ke he tukulagi tukumuitea. Ke he “taha hau mo e taha hau,” kua fakamoli a Iehova he fakakite e fakaalofa ki a lautolu ne taute hana a finagalo. (Roma 8:38, 39) Ti moli lahi, kua ha ha ia tautolu e kakano mitaki ke ‘fekafekau kia Iehova mo e olioli.’
Olioli ke he Amaamanakiaga Hau
16. Ke he tau amaamanakiaga mo e tau fakamonuinaaga fe ke olioli e tau Kerisiano?
16 Ne tohi e Paulo: “Kia loto olioli ke he amaamanakiaga.” (Roma 12:12, NW) Kua olioli e tau tutaki fakauku ha Iesu Keriso ke he amaamanaki ue atu he moui nakai mate ke he lagi kua hafagi he Atua ki a lautolu puhala he hana Tama. (Roma 8:16, 17; Filipi 3:20, 21) Ko e tau Kerisiano ne amaamanaki ke he moui tukulagi ke he Parataiso he lalolagi kua ha ha i ai e kakano ke olioli. (Luka 23:43) Ko e tau fekafekau fakamoli mo e tua ha Iehova kua ha ha i ai e kakano ke olioli ke he amaamanakiaga he Kautu, ha ko e mena ke fai vala a lautolu ke he fakatufono he lagi po ke moui ai ke nonofo ke he lalolagi. Ko e monuina olioli ha a ia!—Mataio 6:9, 10; Roma 8:18-21.
17, 18. (a) Ko e heigoa kua talahau tuai mai he Isaia 25:6-8? (e) Fakamoli fefe e perofetaaga nei a Isaia he magaaho nei, mo e ka e kua e hana a fakamoliaga ke he vaha mai i mua?
17 Kua talahau tuai foki e Isaia e vaha olioli mai i mua ma e tau tagata omaoma. Ne tohi e ia: “To eke ai e Iehova Sapaota ke he mouga nai e galue ke he tau mena mitaki ma e tau motu oti, ko e galue e uaina ne toka ai e tau kele; ko e tau mena mitaki ue atu; ko e uaina ne toka ai mo e tau kele kua hakahaka. To fakaoti foki e ia ke he mouga nai e ie ufiufi, ne ufia ai e tau motu oti, mo e ufiufi ne ufia ai e tau motu kehe oti kana. To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti; to uta kehe foki e ia e mena ke mā ai hana motu ke he lalolagi oti ni; ha kua vagahau mai ai e Iehova.”—Isaia 25:6-8.
18 Ko e galue fakaagaga ne fakalataha a tautolu ki ai he vaha nei ko e tau tagata tapuaki a Iehova ko e galue olioli lahi moli. Ko e moli, kua pua ha tautolu a olioli he fekafekau fakamakamaka ke he Atua he fakalataha ke he galue he tau mena mitaki moli ne mavehe mai e ia ma e lalolagi fou. (2 Peteru 3:13) Ke he fakaveaga he poa a Iesu, to utakehe e Iehova e “ufiufi ne ufia” aki e tau tagata kakano ko e hala a Atamu. Ko e olioli ha ia ki ai ke kitia e hala mo e mate ka utakehe! Ko e fulufuluola ha ia ke fakafeleveia mai a lautolu ko e tau fakahelehele he fakaliu tu mai, ke kitia ko e tau hihina mata kua galo, mo e ke nonofo ke he lalolagi parataiso, ne ha ha i ai e tau tagata ha Iehova ka nakai tutuhia ka e to foaki age he Atua e tali ke he fakafiu mahaki, ko e Tiapolo ko Satani!—Fakatai 27:11.
19. Taute atu fefe a tautolu ke he tau monuina a Iehova ne fakatoka mai i mua ha tautolu ko e hana a Tau Fakamoli?
19 Nakai kia fakapuke he mena ia a koe ke olioli mo e fakaaue ke iloa e mena ka taute e Iehova ma e hana a tau fekafekau? Moli lahi, ko e tau amaamanakiaga mua ue atu pihia kua lafi ke he olioli ha tautolu! Mua atu ki ai, ko e amaamanakiaga monuina ha tautolu kua taute a tautolu ke onoono ke he ha tautolu a Atua fiafia, fakaalofa mo e fakamokoi mo e tau logonaaga tuga a nei: “Kitiala, ko e ha tautolu a Atua hanai; ne tatali a tautolu kia ia, ti fakamomoui e ia a tautolu; ko Iehova hanai ne tatali a tautolu kia ia; ti fakamomoui e ia a tautolu; ko Iehova hanai ne tatali a tautolu ki a ia; to fiafia a tautolu mo e olioli ke he hana fakamouiaga.” (Isaia 25:9) Mo e amaamanakiaga homo ue atu ha tautolu kua mauniva ke he loto manamanatu, kia lali fakamakamaka a tautolu ke fekafekau ki a Iehova mo e olioli he loto.
To Tali Fefe e Koe?
◻ Fekafekau fefe a tautolu ki a Iehova mo e “olioli he loto”?
◻ Ko e heigoa ha tautolu ka taute ka galo e olioli ha tautolu ke he Atua?
◻ Ko e ha ne olioli ai e tau tagata a Iehova pete e favaleaga?
◻ Ko e heigoa e tau kakano ne ha ha ia tautolu ke olioli ke he ha tautolu a amaamanakiaga?
[Tau Fakatino he lau 15]
Gahua ke he tau mena oti he moui Kerisiano ke fakatupu ha tautolu a olioli