Magaaho ne Totou e Lautolu mo e Aoga Lahi ki a Lautolu

Pogipogi Matafatafaata:

Taha e kau tokoua ne mau, kua fifili ha ko e mena nakai nonofo kaina he gahua, ke hogofulu e minuti he tau magaaho pogipogi oti ka mamatike tuai ke maeke ke fakaaoga ai e magaaho ia ke totou mua tokoua e Tohi Tapu to o kehe fakatepetepe mai he kaina. Kua tuku age he mena ne totou e laua e matapatu ma e tutalaaga mitaki he toka e laua e kaina.

Taha e motua i Nigeria ne fakaaoga e fakaholoaga ne fakamau fakaku ma e Aoga Fekafekauaga Teokaratiki mo matapatu he totouaga Tohi Tapu he hana magafaoa. Fa totou e lautolu e taha maaga he mena ia he tau aho oti ka oti ha lautolu a tutalaaga ke he kupu Tohi Tapu he aho he tau magaaho pogipogi. Kua tala age ke he fanau ke totou fetokaki e taha maaga Tohi Tapu ne kotofa. Ti uiina ai a lautolu ke talahau e tau huhu hagaao ke he tau kupu ne totou e lautolu.

Taha e hoana nofo kaina i Sapani ne totou oti e Tohi Tapu tali mai he tau 1985. Kua eke ne fakaholoaga hana ke 20 ke he 30 e tau minuti ka totou ai he kamata he hola 5.00 a.m. he tau aho oti. Kua pehe a ia hagaao ke he tau mena aoga: “Kua ati hake e tua haku. Kua lagomatai ai au ke nimo haku gagao mo e ke manamanatu lahi ke he amaamanakiaga he Parataiso.”

Taha e matakainaga fifine ne 30 e tau tau he gahua paionia ka e nakai ko e Fakamoli e tane hana, ne matike tuai he hola lima he tau magaaho pogipogi oti ke taute hana totouaga Tohi Tapu. Kua eke hana fakaholoaga ke lata ke fa e lau tohi ka totou he tau Tohiaga Tapu Heperu, taha e veveheaga he tau Tohiaga Tapu Heleni Kerisiano, mo e taha e kupu he Tau Fakatai. Kua totou e ia e Tohi Tapu katoa he tau aho oti tali mai he tau 1959. Kua pehe a ia: “Kakano ha ko e fua he haku totouaga, logona e au ko e fakaalofa a Iehova ki a au . . . Moua e au e fakamaloloaga, mafanatia, mo e fakahakoaga.” Kua lafi foki e ia: “Ka totou e Tohi Tapu, kua tuga ni ko e vivilo hake e Iehova haku malolo he tau aho oti.”

Taha e matakainaga fifine ne ako e kupu moli he motu kua pa e gahua he Tau Fakamoli a Iehova mo e totoko foki hana tane ke he hana taofiaga. Ka e maeke a ia ke taute hana totouaga Tohi Tapu mai he Aho Gofua ke he Aho Falaile, he vahaloto he hola 6:00 ke he hola 7:00 a.m. Kua foaki age he mena nai e loto malolo ki a ia. He manamanatu ke he lauiaaga he totouaga ia hana ki a ia, ne pehe a ia: “Pete ni foki kua loga e tau mena vihi mo e tau mena uka, ako a mautolu ke fakaalofa ki a Iehova mo Iesu mo e nonofo fiafia lahi ai, he iloa ko e nakai kaumahala e tau maveheaga a Iehova.”

Taha e matakainaga fifine ne fano ke he Aoga Fekafekauaga Paionia ne fifili e loto ke muitua ke he fakatonuaga ne talahau i ai ke aga tumau ke totou Tohi Tapu he tau aho oti. He magaaho fakamua, kua maeke ai a ia ke taute he vahaloto he hola 5.00 ke he hola 6.00 a.m. He magaaho ne hiki e gahua ti fakalavelave ai, ne hiki e ia ke he vahaloto he hola 9.00 ke he 10.00 p.m. He tutu mai e falu tutuaga uka, ne pehe a ia, “Ne hiki tumau e au haku fakaholoaga ke lata mo e tau tutuaga.”

He Fakahikuaga he Aho:

Ua e lafu matakainaga fifine ne nonofo he magafaoa Peteli i Parasili ne aga tumau ke totou tokoua e Tohi Tapu, kavi he 20 e minuti he tau aho oti he mole e kai he palela. Kua teitei ke 25 e magaaho ne totou oti e laua e Tohi Tapu; ka e tohi e laua: “Fa fai mena fou agaia ka moua e maua, ti nakai mateafu e totouaga Tohi Tapu.”

Taha e matakainaga fifine nofo noa i Sapani ne mailoga pete ni he tupu hake ko e Fakamoli, nakai iloa lahi e ia e tau Tohiaga Tapu; he magaaho ne eke a ia ko e paionia, ne fifili hana loto ke totou tumau e Tohi Tapu. He magaaho nei kua taute e ia hana totouaga ma e Aoga Fekafekauaga Teokaratiki ka fano ke he fale gagao ma e levekiaga tului he taha e aho he fahi tapu. He mole ai, ka liu ki kaina, ne taute foki e ia taha kumikumiaga ke he mena ia. He hoko atu ke he fakahikuaga he fahi tapu, totou foki e ia e Tohi Tapu, he fifili e tau tohi hagaao ke he fakapapahiaga he magaaho ne tohi ai a lautolu.

Taha e tama ne 13 e tau tau he moui ne kua fita he totou laga tolu e Tohi Tapu mo e he magaaho nei kua taha e veveheaga ka totou he tau aho oti ka liu ki kaina he oti e aoga. Ko e mena hanei, he talahau e ia, ne lagomatai a ia “ke fakaalofa lahi ki a Iehova.”

Taha e Fakamoli ne lavelave lahi e fakaholoaga ha ko e tagata gahua, ko e motua, ko e tane, mo e ko e matua tane ne fanogonogo ke he tau autiokasete Tohi Tapu he fano he tuleni ke gahua. He magaaho ka liu ki kaina ne liu a ia ke totou fakatagata foki e mena ia.

Ke lafi ke he hana a totou fakatagata, kua fanogonogo e paionia i Falani ke he tau autiokasete he Tohi Tapu ka taute he tau mena kai, ka fakaholo motoka, ka tutu mai e tau mena uka, po ke taute ni he fiafia ke logona.

Kua manatu he paionia ne 21 e tau tau he moui i Sapani ko e loto ne matua fifine hana ke fai mena kai fakaagaga a ia he tau aho oti, mo e totou ai e ia e Tohi Tapu he tau aho oti, tali mai he tolu e tau, ka e nakai taute mau he magaaho taha. He mole he totou e ia e maaga ne fifili e ia ma e aho, ne liu foki a ia ke totou e tau matapatu kupu, mo e fakaaoga e falu minuti gahoa ke liu manamanatu foki ke he tau mena ne totou e ia.

Kua taha foki e Fakamoli, ko e paionia, ne kua teitei laga hogofulu he totou oti e Tohi Tapu he 12 e tau tau kua mole. Nakai ko e tagata tua hana tane, ti fakatoka ai e ia hana fakaholoaga ke totou he magaaho palela.

Magaaho Afiafi:

Taha e motua kua paionia mau i Sapani ne totou mua hana Tohi Tapu he tau po oti to mohe ke he valu e tau tau kua mole. Kua pehe a ia: “Kua loto lahi au ke he tau tohiaga tapu ne fakakite mai e puhala manamanatu a Iehova, hana logonaaga ke he tau mena, mo e ­taute mena fefe a ia ka tutu mai e tau tutuaga. He manamanatu fakahokulo ke he tau tohiaga tapu nei, kua lagomatai ai au ke eke e puhala ne manamanatu a Iehova mo haku mo e ke lagomatai haku tau matakainaga tane mo e tau matakainaga fifine Kerisiano mo e faoa he magafaoa haku.”

Taha e motua i Falani ne fa taha e tula ka totou ai e Tohi Tapu he tau magaaho afiafi oti tali mai he tau 1979. Kua fa mahani a ia ke lima po ke ono e tau liliuaga Tohi Tapu ne fakatoka i mua hana ke fakatatai. Ne pehe a ia ko e hana totouaga fakamitaki ne lagomatai a ia ke kitia ke “fakagahua fefe e loto matala he Tohi Tapu ke he tau tutuaga he tau aho oti.” Kua lagomatai foki he mena nei a ia ke lauia mitaki e tau fakatonuaga ka foaki atu mai he tau Tohiaga Tapu.

Mai he 28 e tau tau kua mole, kua aga tumau ni e matakainaga tane i Nigeria ke totou he magaaho afiafi e kupu Tohiaga Tapu mai he Examining the Scriptures Daily ma e tutalaaga he pogipogi hake. Fakalataha mo e mena ia, ne totou e ia e veveheaga katoa he Tohi Tapu ne tamai e kupu ia he aho. He mole he mau a ia, ­taute tumau ni e ia e aga nei, he totou mo e tutala fakalataha ke he tala mo e hana hoana.

Taha e fuata tote ne nakai ko e Tau Fakamoli hana tau mamatua ne fa aga tumau ke lima ke he hogofulu e minuti ka totou he tau po oti to mohe. Ko e tau minuti uho a ia ki a ia, mo e liogi mua a ia to kamata mo e ka oti e totou. Kua foli a ia ke iloa e fekau ne tala age e Iehova ke he tau tagata tohia Tohi Tapu ke fakamau hifo.

Taha e matakainaga tane fai hoana, he fekafekauaga Peteli, ne pehe ko e totou oti e ia e Tohi Tapu he tau tau oti ke he valu e tau tau kua mole. Kua 20 ke he 30 e tau minuti ka totou e ia to okioki he po. Kua taute foki pete ni kua mategugu lahi a ia, ha kua kitia e ia kaeke ke fano a ia ke mohe ka e nakai totou, nakai maeke a ia ke mohe. Kua eke na ia ke matike ke taute e manako fakaagaga ia.