Ko e Kupu Moli Hagaao ke he Tau Agelu
KUA hane tupu mai e taha aga fakamatakau kehe fou. Kua nakai tokologa ni hokoia e tau tagata ne pehe ko e tali tonu a lautolu ke he tau agelu; ka kua tupu tolomaki e numela ha lautolu ne pehe kua fai mena ne amotia e lautolu ia. He magaaho ne huhu ke he 500 he tau Amerika, “Kua logona hifo nakai e koe he hau a moui ko e fina atu e agelu ki a koe?” teitei ke vevehe tolu ne tali, e. Kua fakaofo foki e numela katoa he tau fuata ne talahau ko e tali tonu ke he tau agelu—hagaao ke he taha kumikumiaga he Tau Fahi Kaufakalataha, kua 76 e pasene he katoa! Kua maali ai, kua talia fiafia e tau tagata ke he tau agelu. Ka e tatai fefe e tau manatu hagaao ke he tau agelu he magaaho nei mo e kupu moli he Tohi Tapu?
Ufiufi e Gahua a Satani
He magaaho ka tala hagaao ke he tau agelu, kua nakai lata a tautolu ke tiaki e tau agelu mahani kelea, ko e tau mena momoui i luga he lagi ne kua pehe mai e Tohi Tapu kua totoko ke he Atua. Kua mua ia lautolu nei a Satani. Kua talahau he tohi talahaua ne ui ko e Ask Your Angels ko e “taha vala he Atua” a Satani ne lagomatai aki e tau tagata ke fakamalolo ha lautolu a “tau lekeleke fakaagaga” he kamatamata tumau mai. Ka e taha e mena, kua fakakite maaliali mai he Tohi Tapu, nakai ko e “taha vala he Atua” a Satani, ka ko e fi he Atua. (Luka 10:18, 19; Roma 16:20) Kua totoko a ia ke he pule katoatoa a Iehova, mo e kua to hana ita lahi mahaki ke he tau fekafekau he Atua he lalolagi. Kua tukumale e ia a lautolu ki mua he Atua ke he aho mo e po! (Fakakiteaga 12:10, 12, 15-17) Kua loto a Satani ke fakakelea a lautolu mo e nakai toka ha mena ke taute ai. Kua fakakite mai he hana favaleaga nakai fia fakaalofa ke he tagata tututonu ko Iopu e loto mao kikiha hana ke he matematekelea he tagata.—Iopu 1:13-19; 2:7, 8.
“Matua he Pikopiko”
Kua loga e tau fehagaiaga mo e tau agelu ne kua putoia ai e matutakiaga mo lautolu ne mamate. “Kua ha ha ia au e logonaaga kua moua he lafu matakainaga he matua haku e puhala ke hoko mai ki a au mo e ke tala mai ki a au kua fiafia tuai a ia,” he talahau he fifine ne higoa ko Elise he mole he moua e mena ne logona hifo e ia ko e fakamailoga. Kua pihia foki a Terri he manatu e kapitiga fakahele ne mate. “Kua taha e fahi tapu he mole e mauku,” he talahau e ia, “ne hau a ia ki a au ke he mena ne manatu e au ko e miti. Ne tala mai e ia ki a au kua nakai lata au ke maanu he mole atu a ia, kakano ha kua fiafia mo e mafola a ia.”
Ka kua talahau mai he Tohi Tapu ko lautolu ne mamate “nakai iloa e lautolu ha mena.” (Fakamatalaaga 9:5) Kua talahau foki ko e magaaho ka mate e tagata, “ko e aho ia ni kua mate ai hana tau manatu.” (Salamo 146:4) Ka ko Satani ko e “matua he pikopiko.” (Ioane 8:44) Ko ia ne kamata e tala fakavai ko e hao mai he mate e solu he tagata. (Fakatatai Esekielu 18:4.) Tokologa e tau tagata he vaha nei ne tali tonu ke he mena nei, ko e mena kua lata tonu ni mo e finagalo a Satani, ha kua uta kehe ai e manako ke tua ke he liu tu mai—ko e matapatu fakaakoaga faka-Kerisiano. (Ioane 5:28, 29) Ti ko e kumikumiaga ki a lautolu ne mamate po ke tau fekau ne kua tuga ko e moua mai ia lautolu ko e vala naia he omoiaga he tau agelu ne nakai fiafia e Atua ki ai.
“Agelu he Maama”
Kua pehe e Tohi Tapu kua eke na Satani ke “faliu e ia a ia mo agelu he maama.” (2 Korinito 11:14) Ka ko e tau gahua oti kana a Satani—pete ni kua tuga ko e mahani tonu-mitaki po ke mahani fakamatakutaku kelea lahi—kua aoga ni ke he taha he tau finagalo ua: ke fakaliliu kehe e tau tagata ke totoko ki a Iehova po ke eke ni ke fakapouli ha lautolu a tau loto manamanatu ke ‘ai kikila atu kia lautolu e maama he vagahau mitaki he lilifu a Keriso.’—2 Korinito 4:3, 4.
Ko e “Agelu Kua Lele ke he Pulagi”
Tuga kua fita he kitia e tautolu, kua fakatapakupaku lahi he Tohi Tapu e omoiaga he tau agelu he magaaho nei ko e fakapiki lahi mo e Fi he Atua, ko e Tiapolo ko Satani. Kua kakano kia e mena nei ko e nakai putoia e tau agelu tapu he tau mena he tagata? Kua nakai pihia, ko lautolu he magaaho nei ne fa e taute e gahua malolo lahi ke he lalolagi.
Kua totou e tautolu ia Fakakiteaga 14:6, 7, e fakamauaga he aposetolo ko Ioane ke he fakakiteaga fakaperofeta ne moua e ia: “Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu, Kua pehe atu mo e leo lahi, Kia matakutaku a mutolu ke he Atua, mo e ta age kia ia e fakahekeaga, ha kua hoko mai e magaaho he hana fakafiliaga; kia hufeilo foki a mutolu kia ia ne eke e lagi, mo e lalolagi, mo e tahi mo e tau vai puna.”
Kua fakakite lahi mai he kupu tohiaga tapu nei e gahua mua he tau agelu he vaha nei. Kua putoia a lautolu he kotofaaga muatua—ko e tukuogoaga he tala mitaki he Kautu he Atua. Kua hagaao ke he gahua nei ne mavehe ai a Iesu ke he hana tau tutaki: “To fakalataha au mo mutolu ke he tau aho oti, ato hoko ni ke he fakaotiaga he lalolagi.” (Mataio 28:18-20) Kua fakalataha fefe a Iesu mo e hana tau tutaki? Ke he taha puhala he foaki age ki a lautolu e lagomatai he tau agelu ke maeke ai ke fakakatoatoa e gahua mua ue atu nei.
Kua molea e piliona tutala ne fakamole he Tau Fakamoli a Iehova he tau tau oti ke he gahua fakamatala he tala mitaki he Kautu he Atua. He magaaho ne taute e gahua nei, kua kitia e lautolu e tau mena moli he takitakiaga he tau agelu. Ke he ha lautolu a fekafekauaga ke he taha gutuhala mo e taha gutuhala, kua fa mahani ke moua e lautolu e tau tagata ne kua mole laia he liogi ke fano taha tagata ke lagomatai a lautolu ke maama e finagalo he Atua. Ti ko e takitakiaga he tau agelu, fakalataha mo e mahani fakamakaukau ni he Tau Fakamoli, ne kua eke ai e tau teau he tau afe tagata ke iloa e iloilo ki a Iehova he tau tau oti!
Kua fanogonogo nakai a koe ke he agelu ne lele he pulagi? Ka o atu e Tau Fakamoli a Iehova, kua mitaki ke tutala lahi mo lautolu hagaao ke he fekau nei mai he tau agelu?