Foaki e Iehova e Malolo ki a Lautolu ne Lolelole
“Ka ko lautolu kua tatali kia Iehova, to fakafou ai ha lautolu a malolo; to o hake a lautolu ke he tau tapakau po ke tau aeto.”—ISAIA 40:31.
1, 2. Ko e heigoa ne foaki e Iehova ki a lautolu ne falanaki ki a ia, mo e ko e heigoa ha tautolu mogonei ka manamanatu ki ai?
KO E tau aeto ko e tau manu lele malolo lahi ke he pulagi. Kua maeke ia lautolu ke fakapaagi mamao atu mo e nakai felele ha lautolu a tau pekau. Mo e tau pekau ne kua kakapu ke molea ua e mita, “ko e Patuiki he Tau Manu Lele,” ko e aeto auro, ko e “taha he tau aeto ne mua e homo ue atu; malagaki ki luga he tau mouga ikiiki mo e tau matiketike, kua lele fakamanava loa a [ia] ke he falu tapunu mouga, ti malikisi fakamavilovilo ato vinivini [ke] he pulagi.”—The Audubon Society Encyclopedia of North American Birds.
2 Mo e tau manamanatu lotomatala he leleaga he aeto, ne tohi e Isaia: “To foaki atu e [Iehova] e malolo kia lautolu kua lolelole; ka ko lautolu kua nakai fai malolo to fakatupu fakalahi e ia e malolo ki a lautolu. To lolelole mo e mategugu e tau fuata; ko e tau taulekaleka foki to veveli ni a lautolu; Ka ko lautolu kua tatali kia Iehova, to fakafou ni ha lautolu a malolo; to o hake a lautolu ke he tau tapakau po ke tau aeto; to tafepoi a lautolu ka e nakai mategugu; to o a lautolu, ka e nakai lolelole ai a lautolu.” (Isaia 40:29-31) Ko e mafanatia ha ia ke iloa kua foaki e Iehova ki a lautolu ne falanaki ki a ia e malolo ke fakatumau, tuga he foaki ki a lautolu e tau pekau nakai lolelole he aeto lele! Manamanatu la mogonei, ko e falu he tau foakiaga ne kua taute e ia ke foaki ki a lautolu ne lolelole e malolo.
Ko e Malolo he Liogi
3, 4. (a) Kua fakamafana e Iesu e hana tau aposetolo ke taute e heigoa? (e) Ko e heigoa kua amanaki a tautolu ki a Iehova ke taute he tali e tau liogi ha tautolu?
3 Kua fakamafana e Iesu e hana a tau tutaki “kia liogi mau ke lata ai, ka e aua neke fakalolelole.” (Luka 18:1) Ko e liligi kia he ha tautolu a tau loto ki a Iehova kua lagomatai moli a tautolu ke liu moua e malolo mo e tiaki e nakai fakalolelole he magaaho ka pehi mamafa mai e moui? E, ka e ha ha i ai falu he tau mena ke manatu e tautolu.
4 Kua lata ia tautolu ke manamanatu moli ke he mena ne amanaki a tautolu ki a Iehova ke taute he tali e tau liogi ha tautolu. Taha e Kerisiano ne hokotia ke he fakaatukehe ne kitia he magaaho fakamui: “Ke he falu he tau tatalu, ne nakai taute e Iehova e tau mana he magaaho nei. Ka e lagomatai e ia a tautolu ke fahia mo e ke fakamaulu ke he mena kua lata ke maeke ia tautolu he fakatokaaga nei.” Fakamaama ai ko e ha e hana a tau liogi kua kehe ai, ne lafi e ia: “Uafulumafa e tula haku he aho ne hu atu ke he agaga tapu a Iehova.” Ka e, nakai fakakautu e Iehova a tautolu mai he tau pehiaaga he moui ke fakamamafa aki a tautolu, ka e foaki mai e ia “e Agaga Tapu kia lautolu ka ole atu ai kia ia.” (Luka 11:13; Salamo 88:1-3) Kua maeke e agaga ia ke taute a tautolu ke tatai ke he ha kamatamata po ke pehiaaga ne fehagai mo tautolu. (1 Korinito 10:13) Ka lata, maeke ke omoi a tautolu aki e “lahi ue atu he malolo” ke fakauka ato uta kehe he Kautu he Atua e tau mena vihi fakatupetupe oti he lalolagi fou ne tata lahi mai.—2 Korinito 4:7.
5. (a) Ke lauia mitaki ha tautolu a tau liogi, ko e heigoa e tau mena ua ne kua aoga? (e) Liga liogi fefe a tautolu kaeke ko e taufetului a tautolu ke he lolelole he tino? (i) Ko e heigoa he ha tautolu a tau liogi fakatumau mo e fakatonu ka fakatata ki a Iehova?
5 Ke maeke he tau liogi ha tautolu ke aoga, kua lata ia tautolu ke fakamakamaka, mo e kua lata ia tautolu ke fakatonu. (Roma 12:12) Tuga anei, kaeke ke nakai fahia a koe ke he tau magaaho kakano he tau a koe ke he lolelole he tino, he kamataaga he tau aho takitaha, ole ki a Iehova ke lagomatai a koe ke kautu ke he lolelole pauaki he aho. Kia liogi pihia ke he aho katoa mo e to mohe ke he tau po takitaha. Kaeke kua kaumahala a koe, ole ki a Iehova ma e fakamagaloaga, ka e tutala foki ki a ia hagaao ke he mena ne takitaki ke tukumuli mo e ko e heigoa hau ka taute ke hola kehe mai he tau tuaga ia he vaha mai mua. Ko e tau liogi fakatumau pihia mo e fakatonu ka fakatata ke he “fanogonogo liogi” e moli he manako hau ke kautu mai he tauaga.—Salamo 65:2; Luka 11:5-13.
6. Ko e ha kua tonu ai ke amanaki a tautolu ki a Iehova ke logona e tau liogi ha tautolu pete ni e nakai aoga ke he logonaaga ha tautolu ke liogi?
6 Ke he falu magaaho, pete ia, ko lautolu ne nakai fahia kua logona e nakai aoga ke liogi. Ko e fifine Kerisiano ne logona pihia ne kitia ai fakamui: “Ko e manatu hagahaga kelea lahi a ia kakano kua taute e tautolu e fakafiliaga ki luga ia tautolu ni, ka e nakai ko e mena pule a tautolu ki ai.” Moli, “ko e Atua ko ia ni ko e fakafili.” (Salamo 50:6) Kua fakamoli mai he Tohi Tapu ki a tautolu pete ni “kua fakahala mai he tau loto ha tautolu kia tautolu, kua mua e Atua ke he tau loto ha tautolu, kua fioia foki e ia e tau mena oti kana.” (1 Ioane 3:20) Ko e mafanatia ha ia ke iloa ka fakafili e tautolu a tautolu kua nakai aoga ke liogi, ko e nakai logona pihia a Iehova ki a tautolu! Ne ‘fioia e ia e tau mena oti kana’ ki a tautolu, putoia foki e tau tutuaga he ha tautolu a tau momoui ne fakatupu a tautolu ke nakai aoga e logonaaga. (Salamo 103:10-14) Ko e hana fakaalofa hofihofi mo e hokulo he maamaaga kua omoi a ia ke logona e tau liogi mai he “loto malipilipi mo e pehia.” (Salamo 51:17) Maeke fefe a ia ke nakai fanogonogo ke he ha tautolu a tau tagi ma e lagomatai he magaaho ka fakahala e ia ni ki a “ia kua ponoti hana tau teliga ke he tagi he tagata nofogati”?—Tau Fakatai 21:13.
Ko e Mafanatia he Fakamatakainaga
7. (a) Ko e heigoa taha foakiaga ne taute e Iehova ke lagomatai aki a tautolu ke liuaki mai e malolo? (e) Ko e heigoa ka iloa hagaao ke he ha tautolu a fakamatakainaga ka fakamalolo aki a tautolu?
7 Ko e taha foakiaga ne taute e Iehova ke lagomatai aki a tautolu ke liuaki mai e malolo ko e fakamatakainaga Kerisiano. Ko e fakamonuinaaga uho ha a ia ke fai vala he magafaoa he tau matakainaga tane mo e tau matakainaga fifine he lalolagi katoa! (1 Peteru 2:17) Ka fakamamafa he tau kavega he moui a tautolu, ko e mafanatia he ha tautolu a fakamatakainaga ke lagomatai a tautolu ke moua e malolo. Fefe a ia? Iloa ai ko e nakai ni tokotaha a tautolu he fehagai mo e tau paleko fakatupetupe pihia ka fakamalolo aki mai. He vahaloto he ha tautolu a tau matakainaga tane mo e tau matakainaga fifine, kua nakai fakauaua ko e fehagai e falu mo e tau pehiaaga po ke tau kamatamata taha pihia mo e he fita e iloa e tau logonaaga ne tatai tonu mo e ha tautolu. (1 Peteru 5:9) Kua mafanatia ha a ia ke iloa ko e mena ne hohoko a tautolu ki ai kua nakai ko e mena fou mo e ko e ha tautolu a tau logonaaga kua nakai kehe.
8. (a) Ko e heigoa e tau fakafifitakiaga kua fakakite ko e moua fefe e tautolu e manako lahi ke he lagomatai mo e mafanatia he ha tautolu a fakamatakainaga? (e) Ko e heigoa e puhala hau fakatagata kua lagomatai po ke fakamafana mai he ‘tau kapitiga moli’?
8 Ke he mafanatiaaga he fakamatakainaga kua moua e tautolu e ‘tau kapitiga fakaalofa’ ne ha ha i ai, ka tupetupe a tautolu, maeke ke foaki e lagomataiaga mo e fakamafanaaga ne manako lahi ki ai. (Tau Fakatai 17:17) Fa mahani, ko e tau mena oti ne fa fakakite ko e tau kupu totonu po ke tau gahua fai manamanatuaga. Ko e Kerisiano ne tau fakamalolo mo e hana a tau logonaaga he nakai fai aoga kua liu manatu: “Ha ha i ai e tau kapitiga ne fagai au mo e tau mena mitaki hagaao ki a au ke lagomatai au ke kautu ke he tau manatu nakai mitaki ne ha ha ia au.” (Tau Fakatai 15:23) Mole atu e mate he tama fifine tote hana, kua uka lahi e matakainaga fifine ke he magaaho fakamua ke lologo e tau lologo he Kautu ke he tau feleveiaaga fakapotopotoaga, mua atu ke he tau lologo ne talahau e liu tu mai. “Taha magaaho,” he manatu e ia, “ko e taha matakainaga fifine ne nofo he taha fahi ne kitia mai au he tagi. Ti hau a ia mo e fakamalago hana lima kia au, mo e lologo e vala ne toe mo au. Ne puke au ke he fakaalofa he tau matakainaga tane mo e tau matakainaga fifine mo e fiafia lahi kua o atu a mautolu ke he tau feleveiaaga, mailoga ai ko e mena haia ke moua e lagomatai ha tautolu, haia he Fale he Kautu.”
9, 10. (a) Lafi atu fefe a tautolu ke he mafanatiaaga he ha tautolu a fakamatakainaga? (e) Ko hai ne mua atu e lata ke he feoakiaga kua ati hake? (i) Ko e heigoa ha tautolu ka taute ke lagomatai a lautolu ne manako fakamaloloaga?
9 Moli lahi, ki a tautolu takitaha kua ha ha ai e matagahua ke lafi ke he mafanaaga fakamatakainaga Kerisiano. Ti, ko e ha tautolu a tau loto kua lata ke “fakalahi mai” ke putoia oti e tau matakainaga tane mo e tau matakainaga fifine ha tautolu. (2 Korinito 6:13) Ko e momoko ha a ia ma lautolu ne nakai fahia ke logona kua nakai fai fakaalofa fakamatakainaga ki a lautolu! Ka e, ko e falu Kerisiano kua talahau e logonaaga fakaagitau mo e tiaki. Ti ole fakamakamaka e matakainaga fifine ne totoko e tane ke he kupu moli: “Ko hai ne nakai manako mo e loto ke he tau kapitiga atihake, fakamaloloaga, mo e feoakiaga fakaalofa? Fakamolemole fakamanatu ke he ha tautolu a tau matakainaga tane mo e tau matakainaga fifine kua manako a tautolu ki ai!” E, mua atu ki a lautolu ne ha ha i ai e tau tutuaga mamafa he moui—ko lautolu ne nakai tua e tau hoa, tau matua taha, ko lautolu ne ha ha i ai e tau mena vihi ke he tau malolo tino, lautolu ne fuakau, mo e falu foki—kua lata ma e feoakiaga kua fai kakano. Kua lata kia he falu ia tautolu ke fakamanatu ke he mena ia?
10 Ko e heigoa ha tautolu ke taute ke lagomatai? Kia fakalahi atu he fakakite e fakaalofa ha tautolu. Ka fakalaulahi atu e fakamokoi, kia nakai nimo e tautolu a lautolu ne lata ke fakamalolo. (Luka 14:12-14; Heperu 13:2) He nakai talinoa ai ko e ha lautolu a tau tutuaga kua taofi a lautolu he talia, ka e ha he uiina noa ni a lautolu? Ti toka ke fifili ni e lautolu. Pete ni he nakai talia e lautolu, kua nakai fakauaua a lautolu ke logona e fakamaloloaga ke iloa kua manamanatu e falu ki a lautolu. Liga ko e mena ia ni ne kua lata mo lautolu ke liuaki mai e malolo.
11. Ko e heigoa e tau puhala kua liga manako lagomatai a lautolu ne pehia?
11 Ko lautolu ne pehia kua liga manako lagomatai ke he falu a tau puhala. Ko e matua fifine tokotaha, ma e fakatai, kua liga manako ke he matakainaga tane motua ke fakakite e fiafia ke he hana tama tane nakai fai matua tane. (Iakopo 1:27) Ko e matakainaga tane po ke matakainaga fifine kua ha ha i ai e malolo tino hagahaga kelea lahi kua liga manako ke he falu lagomatai ke he tau mena fakatau po ke tau gahua fakakaina. Ko e fuakau kua liga manako faihoani po ke taha lagomataiaga ke maeke ke fina atu ke he fekafekauaga he fonua. Kaeke ke fakatumau ai e manako ma e lagomataiaga pihia, to fakatoka ai e ‘kamatamata po ke ne moli ha tautolu a fakaalofa.’ (2 Korinito 8:8) He nakai o kehe mai ia lautolu ne manako ha ko e tau magaaho mo e laliaga kua putoia ai, kia kautu a tautolu he kamatamata he fakaalofa Kerisiano he manamanatu mo e tali atu ke he tau manako he falu.
Ko e Malolo he Kupu he Atua
12. Maeke fefe he Kupu he Atua ke liuaki mai e malolo ha tautolu?
12 Ko e tagata ka fakaoti e kai to nakai leva to galo hana malolo. Hagaao ki ai, ko e taha puhala ne foaki e Iehova ki a tautolu e malolo ke fakatumau he kitia ki ai kua fagai fakamitaki a tautolu fakaagaga. (Isaia 65:13, 14) Ko e heigoa e tau mena kai fakaagaga ne foaki e ia? He tau mena oti ia, ko e hana a Kupu, ko e Tohi Tapu. (Mataio 4:4; fakatatai Heperu 4:12.) Maeke fefe ke lagomatai a tautolu ke liuaki mai e malolo? Ka kamata e tau pehiaaga mo e tau mena vihi ke uta kehe e malolo ha tautolu, maeke ke moua mai e tautolu e malolo he totou hagaao ke he tau logonaaga mo e tau taufetului moli he moui he tau tagata tane mo e fifine tua fakamoli he tau vaha Tohi Tapu. Pete ni e tau fakafifitakiaga he mahani fakamoli kua kehe lahi, ko e tau tagata a lautolu “tuga na tautolu.” (Iakopo 5:17; Gahua 14:15) Kua fehagai a lautolu mo e tau kamatamata mo e tau pehiaaga tuga ni ha tautolu. Manamanatu la ke he falu he tau fakafifitakiaga.
13. Ko e heigoa e tau fakafifitakiaga faka-Tohiaga Tapu kua fakakite ko e tau tagata tane mo e tau fifine tua fakamoli he tau vaha Tohi Tapu kua tatai lahi e tau logonaaga mo e tau iloaaga mo e ha tautolu?
13 Ko e tupuna ko Aperahamo kua maanu lahi ke he mate he hana a hoana pete ni kua tua a ia ke he liu tu mai. (Kenese 23:2; fakatatai Heperu 11:8-10, 17-19.) Ne logona e Tavita e tokihala hana ha ko e tau agahala ne taute e ia kua nakai fai aoga ke fekafekau ki a Iehova. (Salamo 51:11) Ne ha ha ia Mose e tau logonaaga nakai lata. (Esoto 4:10) Kua fakaatukehe a Epaferoti he iloa lahi kua fakakaupa he tatalu kelea hana a gahua ke he “gahua a Keriso.” (Filipi 2:25-30) Kua tau ai a Paulo ke he tino hala. (Roma 7:21-25) Ko Evotia mo Sunetuke, ko e tau matakainaga fakauku tokoua ke he fakapotopotoaga i Filipi, ne ha ha i ai e falu matulituli he femataaki. (Filipi 1:1; 4:2, 3) Ko e fakamalolo ha ia ke iloa ko e tau tagata tua fakamoli nei kua ha ha ai e tau logonaaga mo e tau iloaaga kua tuga ni ha tautolu, ka e nakai fakalolelole a lautolu! Ti nakai tiaki foki e Iehova a lautolu.
14. (a) Ko e heigoa e kanavaakau ne fakaaoga e Iehova ke lagomatai aki a tautolu ke tamai e fakamalolo mai he hana a Kupu? (e) Ko e ha e tau senolo Kolo Toko mo e Awake! kua tuku ai e tau vala tala he fakalatahaaga, magafaoa, mo e tau logonaaga he loto?
14 Ke lagomatai a tautolu ke moua mai e malolo he hana a Kupu, ne fakaaoga e Iehova e vahega fekafekau fakamoli mo e loto matala ke foaki mai ki a tautolu e tafeaga mauokafua he “tau mena kai ke he tau magaaho.” (Mataio 24:45) Kua leva tigahau e fakaaoga he fekafekau fakamoli e tau senolo Kolo Toko mo e Awake! ke lalago aki e kupu moli he Tohi Tapu mo e fakapuloa e Kautu he Atua ko e amaamanakiaga ni a ia ma e tagata. Mua atu ke he tau hogofulu tau gahoa fakamui, kua tamai ai he tau senolo nei e tau vala tala faka-Tohiaga Tapu he magaaho tonu ke he fakalatahaaga magafaoa, mo e tau paleko he logonaaga ne fa moua foki he falu he tau tagata he Atua. Ti ko e heigoa e aoga he lomi fakailoa ai e vala tala pihia? Ke lagomatai moli aki a lautolu ne iloa e tau palekoaga nei ke moua mai e malolo mo e fakamaloloaga mai he Kupu he Atua. Ka e maeke foki he tau vala tala pihia ke lagomatai a tautolu oti ke maama mitaki e tau mena ne hokotia falu he tau matakainaga tane mo e tau matakainaga fifine ha tautolu ki ai. Ti kua mitaki ke taute e tautolu e tau kupu a Paulo: “Kia fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.”—1 Tesalonia 5:14.
Ko e Tau Motua ne Eke mo “Fakamumuliaga Mai he Matagi”
15. Ko e heigoa ne perofeta e Isaia hagaao ki a lautolu ne fekafekau ko e tau motua, mo e ko e heigoa e matagahua ne lago ki luga ia lautolu?
15 Kua foaki e Iehova e taha mena foki ke lagomatai a tautolu he magaaho ka nakai fahia a tautolu—ko e tau motua he fakapotopotoaga. Ko lautolu nei ne tohi he perofeta ko Isaia: “To eke foki e tagata ke tuga ne fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.” (Isaia 32:1, 2) Kua fai matagahua mogoia, e tau motua, ke hokotia ke he mena ne talahau tuai e Iehova hagaao ki a lautolu. “To eke foki” a lautolu mo tau punaaga he fakamafanaaga mo e hahauaga ke he falu mo e manako moli ke ‘fua e tau kavega [po ke, “tau mena fakapehia”; fakatai ai, “tau mena mamafa”] he falu.’ (Kalatia 6:2, NW, matahuitala) Maeke fefe a lautolu ke taute e mena nei?
16. Ko e heigoa he tau motua ke taute ke lagomatai a lautolu ne nakai aoga e tau logonaaga ke liogi?
16 Tuga he fita e talahau, ko e falu magaaho ko e tagata ne nakai fahia kua logona e nakai aoga ke liogi. Ko e heigoa he tau motua ke taute? Maeke ke liogi a lautolu mo ia, mo e ma hana. (Iakopo 5:14) He ole ki a Iehova, he fakalataha ai mo ia ne nakai fahia, ke lagomatai a ia ke maama ko e lahi he fakaalofa ha Iehova ki a ia mo e ko e mena fakamafanatia moli foki e falu. He fanogonogo ai ke he liogi fakamakamaka mai he loto he motua kua liga ke lagomatai ke fakamalolo e mauokafua he tagata maanu. Liga ke lagomatai a ia ke manamanatu kaeke ke mauokafua e tau motua to tali mai e Iehova e tau liogi ke lata mo ia, ti maeke ia ia ke fakalataha ke he mauokafua ia.
17. Ko e ha e tau motua ne kua lata ai ke eke mo tau tagata fanogonogo loto maama?
17 “Kia takitokotaha e tau tagata mo e alumaki ke fanogonogo, kia fakatuai ke vagahau atu,” he talahau e Iakopo 1:19. Ke lagomatai a lautolu ne nakai fahia ke moua e malolo, kua lata foki e tau motua ke eke mo tau tagata fanogonogo loto maama. Ke he falu mena ko e tau tagata he fakapotopotoaga kua taufetului mo e tau mena vihi po ke tau pehiaaga ne nakai maeke ke fakamitaki he fakatokaaga he tau mena nei. Ko e mena kua lata a lautolu ki ai, nakai ko e fakamauluaga ke “fakahako” ha lautolu a mena vihi ka e ke tutala ke he tagata fanogonogo mitaki. Ko e tagata fanogonogo mitaki ko ia ne nakai ke tala age ki a lautolu e logonaaga kua lata mo lautolu ka e ko ia ne fanogonogo mo e nakai fakafili atu.—Luka 6:37; Roma 14:13.
18, 19. (a) Maeke fefe he mafiti ke fanogonogo ke lagomatai e motua ke fakamamao he fakalahi ki luga e mamafa ha lautolu ne nakai fahia? (e) Ko e heigoa e tau fua ka fakakite he tau motua e “feofanaki”?
18 Ko e tau motua, ha kua mafiti ke fanogonogo ka lagomatai a koe ke fakamamao mai he taute pauaki e kavega hana ne nakai fahia ke fakalahi atu e mamafa. Tuga a nei, ka nakai fakalataha e matakainaga tane po ke matakainaga fifine ke he falu feleveiaaga po ke to tua ke he gahua he fonua, kua lata moli nakai a ia ke fakatonu hagaao ke fakalahi atu e gahua ke he fekafekauaga po ke hagaao ke fakalataha tumau ke he tau feleveiaaga? Liga kua lata. Ka e kitia nakai e koe e tuaga katoa? Kua tupu ki mua kia e vihi ke he malolo tino? Kua fai hikihikiaga fou kia e tau matagahua fakamagafaoa? Fai tutuaga foki kia po ke tau pehiaaga ne fakamamafa hifo a ia? Manatu, ko e tagata kua fita e hala lahi e logonaaga ha kua nakai maeke ke lahi e mena ne taute.
19 Maeke fefe, mogoia, ia koe ke lagomatai e matakainaga tane po ke matakainaga fifine? Ato moua e koe e fakahikuaga mo e foaki e lagomataiaga, fanogonogo! (Tau Fakatai 18:13) Mo e tau huhu fakalotomatala ‘utu hake’ e tau logonaaga he loto he tagata. (Tau Fakatai 20:5) Kia nakai tiaki e tau logonaaga nei—mailoga ki ai. Kua lata ke iloa moli e ia ne nakai fahia kua leveki e Iehova a tautolu mo e maama ai ke he tau magaaho ko e ha tautolu a tau tutuaga kua fakakaupa a tautolu. (1 Peteru 5:7) Ka fakakite he tau motua e “feofanaki” pihia, to moua e lautolu ne nakai fahia e “okiokiaga ma e tau solu ha lautolu.” (1 Peteru 3:8; Mataio 11:28-30, fakatatai NW.) Ka moua e lautolu e okiokiaga pihia, to nakai lata ke tala age ki a lautolu ke fakalahi e mena ke taute; to omoomoi he ha lautolu a tau loto ni ke taute e tau mena ne maeke ia lautolu ke taute he fekafekau ki a Iehova.—Fakatatai 2 Korinito 8:12; 9:7.
20. Ha kua tata lahi mahaki mai e fakaotiaga he hau kelea nei, ko e heigoa ha tautolu ka fifili ke taute?
20 Moli kua nonofo a tautolu he magahala lahi e uka ne nakai la pihia he talahauaga tala he tagata. Ko e tau pehiaaga he moui ke he lalolagi a Satani kua holo ki mua e hokulo ke he vaha he fakaotiaga. Manatu, tuga e leona kumi fano, kua leo e Tiapolo ki a tautolu ke nakai fahia mo e fakalolelole ke maeke ia ia ke pule fakahanoa ki a tautolu ko e hele mukamuka. Ko e fakaaue ha ia ha tautolu ha kua mai e Iehova ki a lautolu ne lolelole e malolo! Kia fakaaoga fakamitaki oti e tautolu e tau foakiaga ne taute e ia ke foaki mai ki a tautolu e malolo ke fakatumau, ke tuga kua mai e ia ki a tautolu e tau tapakau malolo he aeto lele. Ke he hau kelea nei kua tata lahi mahaki mai, nakai ko e magaaho a nei ke oti e tafepoi he ha tautolu a tufi ma e palepale—ko e moui tukulagi.—Heperu 12:1.
Ko e Heigoa e Tali Hau?
◻ Ko e heigoa ha tautolu ne amanaki ki a Iehova ke taute he tali e tau liogi ha tautolu?
◻ Ke he tau puhala fe ke liga moua e tautolu e fakamalolo mai he ha tautolu a fakamatakainaga Kerisiano?
◻ Maeke fefe he Kupu he Atua ke lagomatai a tautolu ke liuaki mai e malolo?
◻ Ko e heigoa he tau motua ke taute ke lagomatai a lautolu ne nakai fahia ke liuaki mai e malolo?
[Fakatino he lau 17]
He magaaho ka fakakite ai e mahani fakamokoi, kia nakai nimo e tautolu a lautolu ne manako fakamaloloaga
[Fakatino he lau 28]
Maeke he tau motua ke ole ki a Iehova ke lagomatai a lautolu ne nakai fahia ke maama e lahi he fakaalofa ki a lautolu