Aua Neke Fakalolelole!

“Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”​—KALATIA 6:9.

1, 2. (a) Ko e heigoa e tau puhala ne kumi fano e leona? (e) Kia hai ne fiafia pauaki e Tiapolo ke hele?

KUA kumi fano e leona ke he tau puhala kehekehe. Ko e falu magaaho to tatao ai hana a hele ke he tau loloto vai po ke he tau puhala tu o hui fakaaoga mau. Ka e he falu magaaho, kua talahau mai he tohi Portraits in the Wild, “kua pule fakahanoa e [leona] ke he tuaga​—ma e fakatai, fakaofo atu ke he punua asini vao hane mohe.”

² Ko e ha tautolu a ‘Fi ko e Tiapolo ia,’ kua fakamaama he aposetolo ko Peteru, “kua faifano a ia tuga ne leona tagi, kua kumi kia falu ke faiola ai e ia.” (1 Peteru 5:8) Iloa ai kua ku hana magaaho ne toe, kua tuku e Satani e pehiaga lahi ke he tau tagata ke taofi mai a lautolu he fekafekau ki a Iehova. Pete ia, ko e “leona tagi” nei kua mua atu e fiafia he hele e tau fekafekau ha Iehova. (Fakakiteaga 12:12, 17) Ko e hana a tau puhala kumi fano kua tatai ke he leona he fakatokaaga he manu. Pihia fefe?

3, 4. (a) Ko e heigoa e tau puhala ne fakaaoga e Satani ke hele e tau fekafekau a Iehova? (e) Ha ko e “tau aho uka” a nei, ko e heigoa e tau huhu kua laga mai?

³ Ke he falu a magaaho kua lali e Satani e tataoaga​—favaleaga po ke totokoaga he lali ke moumou e mahani fakamoli ha tautolu ti ke oti aki ha tautolu a fekafekau ki a Iehova. (2 Timoteo 3:12) Ka e, tuga e leona, ke he falu a magaaho kua pule fakahanoa e Tiapolo e tuaga. Ne leo a ia ki a tautolu ke lolelole po ke nakai fahia, ti lali mogoia a ia ke fakaaoga e tuaga tupetupe ha tautolu ke taute a tautolu ke fakalolelole. Kia nakai lata a tautolu ke fakamukamuka ke hele!

⁴ Ka e, kua nonofo a tautolu ke he magahala uka lahi ne nakaila iloa he tagata. Ko e “tau aho uka” nei, tokologa ia tautolu ke manamanatu fakalolelole po ke pehia ke he falu magaaho. (2 Timoteo 3:1) Ti, maeke fefe, mogoia, ke kalo kehe mai a tautolu he nakai fahia mo e fakamukamuka a tautolu ke hele he Tiapolo? E, maeke fefe a tautolu ke logona e fakatonuaga omoomoi he aposetolo ko Paulo: “Aua neke fakalolelole a tautolu ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu”?​—Kalatia 6:9.

Ka Fakaita he Falu a Tautolu

5. Ko e heigoa ne fakatupu a Tavita ke lolelole, ka e ko e heigoa ne nakai taute e ia?

⁵ Ke he tau vaha Tohi Tapu, pihia ke he tau fekafekau ne mua atu e tua fakamoli ha Iehova kua liga logona e pehia ki lalo. “Kua oti e manava he tauoi au,” he tohi he salamo ko Tavita. “Kua fakapuke e au haku a mohega ke he tau po oti, kua puke vai e mena kua takoto ai au he haku e tau hihina mata. Kua tutue haku mata he mamahi.” Ko e ha ne logona pihia ai a Tavita? “Ha ko lautolu oti kua fai fi kia au,” he fakamaama e ia. Ko e tau gahua fakamamahi he falu kua fakatupu a Tavita ke mamahi pihia e loto ti maeke he hana a tau hihina mata ke mokulu pulenoa. Ka e nakai ni hola kehe mai a Tavita ia Iehova ha ko e tau mena ne taute he tau tagata fakahele hana ki a ia.​—Salamo 6:6-9.

6. (a) Liga lauia fefe a tautolu he tau kupu po ke tau gahua he falu? (e) Taute fefe he falu a lautolu ke mukamuka ke hele he Tiapolo?

⁶ Tatai ai, ko e tau kupu po ke tau gahua he falu kua fakatupu a tautolu ke nakai fahia mo e hukia lahi e loto. “Ha ha i ai e tagata kua vagahau [“mo e nakai manamanatu,” NW], ti tuga ne tuina ai e tau tagata he pelu,” he talahau he Tau Fakatai 12:18. Kaeke ko e matakainaga tane po ke matakainaga fifine Kerisiano e tagata nakai fai manamanatu, to hokulo lahi e “tuina.” Ko e aga he tagata liga ke tupetupe po ke liga manamanatu fakavihiatia. Ti moli lahi e mena nei kaeke ke logona e tautolu kua mahani nakai totonu mo e nakai tonu mai ki a tautolu. Kua maeke ke uka lahi a tautolu ke tutala ke he tagata kolokolovao; liga ke kalo pauaki foki a tautolu mai ia ia. He pehia he vihiatia, ko e falu ne fakalolelole mo e fakaoti e o atu ke he tau feleveiaaga Kerisiano. Momoko ai, kua ‘fakaata e lautolu ha mena ma e Tiapolo’ ke pule fakahanoa ki a lautolu ko e matahele mukamuka.​—Efeso 4:27.

7. (a) Maeke fefe a tautolu ke kalo kehe he fakaata e puhala ha Satani ka fakaita po ke fakamamahi he falu a tautolu? (e) Ko e ha kua lata ke fakatoka e tautolu e vihiatia?

⁷ Maeke fefe a tautolu ke kalo kehe he fakaata e puhala ha Satani ka fakaita po ke fakamamahi he falu a tautolu? Kia lali a tautolu ke aua neke manatu vihiatia. Ka e, kua lata ke fakailoilo mo e taute e mafola po ke fakamafiti ke fakamitaki e matakupu. (Efeso 4:26) Fakamafana mai e Kolose 3:13 ki a tautolu: “Kia fefakaukaaki a mutolu, mo e fefakamagaloaki, kaeke kua mahani kelea taha kia taha.” Ko e fakamagaloaga kua lata tonu ka eke ke talahau he tagata ne taute e hepe e hehe mo e fakamolemole moli. (Fakatatai Salamo 32:3-5 mo e Tau Fakatai 28:13.) Kua lagomatai ai a tautolu, kaeke ke tokamau e tautolu ko e fakamagalo nakai ko e mena fakateaga po ke fakatote he tau hepehepe ne taute he falu. Ko e fakamagalo atu kua putoia ai e tiaki he vihiatia. Ko e vihiatia ko e kavega mamafa ke fua. Maeke ke moumou ha tautolu a tau manatu, kaiha mai a tautolu he fiafia lahi. Maeke foki ke lauia ha tautolu a malolo tino. Kehekehe ai, ko e fakamagaloaga, kua lata, kua gahua ai ke he ha tautolu ni a mitaki. Kia tuga a Tavita a tautolu, ke nakai fakalolelole mo e haga kehe mai ia Iehova ha ko e falu mena he tau tagata kua talahau po ke taute ki a tautolu!

Ka Hala a Tautolu

8. (a) Ko e ha ne hala ai e logonaaga he falu ke he tau magaaho? (e) Ko e heigoa e hagahaga kelea ne ha ha i ai he puke he hala ne fakalolelole e tautolu a tautolu ki ai?

⁸ “Ha ko e tau mena loga kua hehe ai a tautolu oti,” he talahau e Iakopo 3:2. Ka pihia a tautolu, kua aga pauaki ia ke logona e hala. (Salamo 38:3-8) Ko e logonaaga he hala kua mua e malolo kaeke kua tau fetului a tautolu e lolelole he tino mo e moua e tau kaumahala tumau.a Taha e Kerisiano ne taufetului pihia ne fakamaama: “Nakai fia manako au ke moui loa, he nakai iloa ko e taute e au e agahala ne nakai maeke ke fakamagalo po ke nakai. Kua manatu au kua nakai ke tuku e au au ke he fekafekauaga a Iehova kakano kua liga ke nakai fai amaamanakiaga ma haku.” Ka puke a tautolu ha ko e agahala ne fakalolelole a tautolu ni ki ai, kua age ai e tautolu e magaaho ma e Tiapolo​—mo e maeke a ia ke pule fakahanoa ai! (2 Korinito 2:5-7, 11) Ko e mena kua lata liga ko e onoonoaga lagotatai lahi he hala.

9. Ko e ha ne mauokafua ai a tautolu ke he fakaalofa hofihofi he Atua?

⁹ Ka agahala a tautolu ne lata tuai ke logona e fuafuaaga he hala. Falu magaaho, ko e tau logonaaga he hala kua fakatumau ha kua logona he Kerisiano kua nakai aoga a ia ma e fakaalofa hofihofi he Atua. Ka e, kua fakamafana moli mai e Tohi Tapu ki a tautolu: “Kaeke ke fakakite e tau hala ha tautolu kua fakamoli a ia mo e mahani tututonu ke fakamagalo ai e tau hala he tautolu, mo e fakamea a tautolu he tau mahani hepehepe oti kana.” (1 Ioane 1:9) Kua fai kakano tonu nakai ke talitonu to nakai taute pihia he Atua ke he ha tautolu a mena tupu? Manatu, ke he hana Kupu, ne pehe a Iehova kua ‘mau a ia ke fakamagalo.’ (Salamo 86:5; 130:3, 4) Ha kua nakai maeke a ia ke pikopiko, to taute e ia tuga he mavehe mai he Kupu hana, ti moua ni ka o mai a tautolu ki a ia mo e loto fakatokihala.​—Tito 1:2.

10. Ko e heigoa e fakamafanaaga moli kua lomi fakailoa mai he Watchtower hagaao ke he tau atu ke he lolelole he tino?

¹⁰ Ko e heigoa hau ka taute ka tau a koe ke he lolelole mo e tukafo? Ua fakalolelole! Ko e tukafo nakai pehe ko e fakaoti e tupu ne kua fita he taute e koe. Ko e fufuta, he senolo nei, a Fepuali 15, 1954, kua foaki e fakamafanaaga moli: “[Liga] moua e tautolu a tautolu kua fakatupetupe mo e agahala ke he loga he tau magaaho ke he falu aga kelea ne kua tokona ke he puhala fakamua ha tautolu he moui ka e nakai mailoga e tautolu. . . . Ua fakaatukehe. Ua fakahiku ke manatu kua taute tuai e koe e agahala ne nakai maeke ke fakamagalo. Ko e mena ia tuai ne manako a Satani ki a koe ke manatu. Ko e moli kua logona e koe e maanu mo e fakaita ki a koe kua fakamoli ai kua nakai fano mamao a koe. Kia nakai fakalolelole he fuluhi fakatokolalo mo e ole ke he Atua, kumi hana fakamagaloaga mo e fakameaaga mo e lagomatai. Fina atu ki a ia tuga e tama ne fina atu ke he matua tane ka fai lekua, pete ni ko e laga fiha he lolelole agaia, mo e to atu mo e fiafia e Iehova ki a koe e lagomatai kakano ha ko e hana a fakaalofa-totonu mo e, ka fakamoli a koe, to foaki atu e ia ki a koe e mailogaaga he manamanatuaga mea.”

Ka Logona e Tautolu kua Nakai Lahi e Mena ha Tautolu ne Taute

11. (a) Fefe ha tautolu a logonaaga hagaao ke he tauteaga he gahua fakamatala he Kautu? (e) Ko e heigoa e falu he tau logonaaga hagaao ke he tauteaga he fekafekauaga ne taufetului e falu he tau Kerisiano ki ai?

¹¹ Ko e gahua fakamatala he Kautu ko e vala aoga ke he moui he Kerisiano, mo e fakalataha ki ai to tamai ai e olioli. (Salamo 40:8) Ko e falu Kerisiano, kua logona e hala lahi hagaao ke he nakai maeke ke lahi e mena ne taute he fekafekauaga. To uta kehe he hala pihia ha tautolu a olioli mo e fakatupu a tautolu ke fakalolelole, he manamanatu ko e logona hifo e Iehova ko e nakai lahi e mena ne taute e tautolu. Manamanatu la ke he tau logonaaga ne taufetului e falu ki ai.

“Iloa nakai e koe e kumi magaaho he mativa?” he tohia he taha matakainaga fifine Kerisiano ne fakalataha mo e hana a tane ne toko tolu e fanau ne fa e feaki. “Ne maeke ia au ke utikaki he magaaho ka maeke au. Ko e kakano a nei ke fakamole e magaaho he kumikumi ke he tau fale koloa tau mukamuka ke he tau koloa tuai, tau mena to hifo, po ke tuitui foki e tau mena tui. Fakamole foki e au taha po ke ua e matahola he tau fahi tapu takitaha he kumi ke he tau laupepa fakatau mukamuka (“coupon”)​—hele, fakaputu, mo e fakafetui a lautolu. Ke he tau magaaho ne logona e au e hala lahi he taute e tau mena nei, manamanatu ai kua lata ia au ke fakaaoga e magaaho ia ke he fekafekauaga he fonua.”

“Manatu au kua nakai maeke ia au ke lahi e fakaalofa moli ki a Iehova,” he fakamaama he taha matakainaga fifine ne tokofa e fanau mo e tane nakai tua. “Ti lali fakamakamaka au ke he haku a fekafekau ki a Iehova. Ne lali fakalahi au, ka e nakai logona e au kua lahi e mena ia. Kitia e mutolu, nakai logona e au ha mitaki haku, ti nakai ofo au ka nakai talia e Iehova e fekafekauaga haku ki a ia.”

Ko e Kerisiano ne kitia kua lata ke toka e fekafekauaga mau ne pehe: “Nakai fia loto au ke he manatu kua kaumahala au he gahua fekafekau tumau haku ki a Iehova. Nakai iloa e mutolu e hogohogomanava haku! Fa tagi au magaaho he manatu e mena ne tupu.”

12. Ko e ha ne logona ai he falu Kerisiano kua lahi e hala ha kua nakai maeke a lautolu ke lahi e mena ne taute he fonua?

¹² Ko e mena pauaki ni pihia ke manako ke fekafekau katoatoa ki a Iehova kaeke kua maeke. (Salamo 86:12) Ko e ha, mogoia, e falu ne logona e hala lahi hagaao ke he nakai maeke ke taute fakalahi? Ma e falu, kua kitia ai ke he mena ne tatai ke he manamanatuaga auloa he nakai fai aoga, liga fua ha ko e tau mena kelea ne tutupu he moui. He falu mena, ko e hala nakai lata kua liga fua ha ko e onoonoaga nakai moli ke he mena ne amanaki a Iehova ki a tautolu. “Kua logona e au e mena ia ato lolelole au, kaeke ke nakai lahi e mena ne taute e koe,” he talahau he taha Kerisiano. Ko e fua, ne fakatoka e ia e tau tutuaga tokoluga ue atu ma hana​—mo e ti logona e mua atu e hala he magaaho ne nakai maeke ia ia ke hokotia ki ai.

13. Ko e heigoa ne amanaki a Iehova mai ia tautolu?

¹³ Ko e heigoa ne amanaki a Iehova mai ia tautolu? Tuku fakamaaliali ai, kua amanaki a Iehova ki a tautolu ke fekafekau ki a ia mo e solu katoa, taute ai e tau mena ne maeke ia tautolu. (Kolose 3:23, fakatatai NW.) Ko e mena ia, kua kehekehe lahi e mena ne manako a tautolu ke taute mo e mena moli kua maeke ia tautolu ke taute. Kua liga fakakaupa he tau mena tuga e fuakau, malolo tino, hakahakau he tino, po ke tau matagahua he magafaoa. Pete ia, kaeke ke taute e tautolu e tau mena ne maeke ia tautolu, to logona moli e tautolu ko e fekafekauaga ha tautolu ki a Iehova kua solu katoa​—nakai molea atu ti nakai tote lahi e solu katoa ki a ia ne ha ha i ai e malolo tino mo e tau tutuaga kua fakaata a ia ke hu katoa ke he fekafekauaga tumau.​—Mataio 13:18-23.

14. Ko e heigoa hau ka taute ka manako lagomatai a koe ke fifili ko e heigoa e mena moli ke amanaki mai ia koe?

¹⁴ Maeke fefe, mogoia, ke fifili e koe e mena moli ka amanaki mai ia koe? Maeke ia koe ke tutala e matakupu mo e kapitiga Kerisiano, kua falanaki mo e kua motua, liga ko e motua po ke matakainaga, fifine ne kua iloa hau a lotomatala, mo e tau mena ne kuku ai a koe, mo e tau matagahua fakamagafaoa hau. (Tau Fakatai 15:22) Manatu, ke he fofoga he Atua ko e mitaki hau ko e tagata kua nakai fuafua ke he lahi he mena ne taute e koe ke he fekafekauaga he fonua. Ko e tau fekafekau oti a Iehova kua uho ki a ia. (Hakai 2:7; Malaki 3:16, 17) Liga ko e mena ne taute e koe he gahua fakamatala kua lahi po ke tote ke he falu, ka e pete ia ka fakakite e koe e hau a mitaki lahi mahaki, kua fiafia a Iehova, ti nakai lata ia koe ke hala e logonaaga.​—Kalatia 6:4.

Ka Lahi e Mena ne Manako ia Tautolu

15. Ko e heigoa e tau puhala ne kua lata ke moua lahi mai he tau motua he fakapotopotoaga?

¹⁵ “Ha ko ia kua foaki atu ki ai e tau mena loga,” he talahau e Iesu, “to kumi atu foki kia ia e tau mena loga.” (Luka 12:48) Moli lahi kua ‘fakalahi e tau mena’ ki a lautolu ne fekafekau ko e tau motua he fakapotopotoaga. Tuga a Paulo ne fakaaoga e lautolu a lautolu ke lata mo e fakapotopotoaga. (2 Korinito 12:15) Ha ha ia lautolu e tau lauga ke tauteute, tau leveki ahiahi ke taute, tau fifiliaga ke taute​—ko e tau mena oti mo e nakai tiaki e tau magafaoa ha lautolu ni. (1 Timoteo 3:4, 5) Ko e falu he tau motua kua lavelave foki he lagomatai ke he talaga he tau Fale he Kautu, fekafekau ai ke he tau Komiti Matutaki Fale Gagao, mo e gahua noa ke he tau toloaga, mo e tau fonoaga. Maeke fefe he tau tagata tane gahua malolo, mo e fakamoli nei ke hola kehe mai he lolelole ha ko e mamafa ke he tau matagahua pihia?

16. (a) Ko e heigoa e tali kua lata ne foaki e Ieteru ki a Mose? (e) Ko e heigoa e fua ka maeke he motua ke felagomataiaki e tau matagahua kua lata mo e falu?

¹⁶ Ha ko e tagata fakatokolalo a Mose, kua mategugu hana tino he leveki ke he tau mena vihi he falu, ne foaki age he hana a matua fugavai, ko Ieteru, e tali kua lata: fakatoka age taha matagahua ma e falu he tau patu kua lata. (Esoto 18:17-26; Numera 12:3) “Ha ha i ai e iloilo kia lautolu kua fakatokolalo,” he talahau he Tau Fakatai 11:2. Ko e kakano he fakatokolalo ke mailoga mo e talia hau a tau kaupaaga. Kua nakai fakauaua e tagata fakatokolalo ke kotofa e falu, po ke matakutaku ko e to galo e takitakiaga hana he felagomataiaki e tau matagahua kua lata mo e falu a patu kua lata.b (Numera 11:16, 17, 26-29) Ka e, kua makai a ia ke lagomatai a lautolu ke tupu ki mua.​—1 Timoteo 4:15.

17. (a) Fakamama fefe he tau tagata he fakapotopotoaga e kavega he tau motua? (e) Ko e heigoa e tau poa ne taute he tau hoana he tau motua, ti fakakite fefe e tautolu ko e nakai uta fakamama e tautolu e tau mena nei?

¹⁷ Maeke he tau tagata he fakapotopotoaga ke lahi e mena ke taute ke fakamama aki e kavega he tau motua. Maama ai kua ha ha he tau motua ha lautolu ni a tau magafaoa ke leveki, nakai lata e falu ke fakaaoga fakahehe e magaaho mo e levekiaga he tau motua. Po ke nakai fakaaue a lautolu ke he tau poa moli ne taute he tau hoana he tau motua he nakai lamakai ke fakaaoga ha lautolu a tau tane mo e fakapotopotoaga. Taha matua fifine ne tokotolu e fanau ne fekafekau e tane ko e motua ne fakamaama: “Ko e mena ne nakai fakahoha au hagaao ki ai ko e kavega fakalahi ki luga ne hahamo fakamakai e au he magafaoa ke maeke he tane haku ke fekafekau ko e motua. Iloa e au kua lahi e fakamonuinaaga a Iehova ke he magafaoa ha mautolu ha ko e hana a fekafekauaga, mo e nakai kono au ke he mena ne foaki e ia. Ka e moli, fa mahani au ke taute lahi atu e tau gahua i fafo mo e taute lahi e akonakiaga ke he fanau ha maua, pihia ai au ha kua lavelave e tane haku.” Momoko ai, ko e matakainaga fifine nei kua moua ai ko e falu ne kua lata ke fakaaue ke he hana a kavega lafi ki luga, kua taute ai e tau talahauaga nakai fai manamanatuaga tuga e, “Ko e ha a koe ne nakai gahua paionia ai?” (Tau Fakatai 12:18) Ko e puhala mitaki ha ke nava ke he falu ha ko e mena ne taute e lautolu ka e nakai tuhituhi a lautolu ke he mena ne nakai maeke a lautolu ke taute!​—Tau Fakatai 16:24; 25:11.

Ha Kua Nakai La Hoko Mai e Fakaotiaga

18, 19. (a) Ko e ha ne nakai ko e magaaho a nei ke oti e tafepoi ke he poitufi ma e moui tukulagi? (e) Ko e heigoa e hatakiaga magaaho tonu ne foaki he aposetolo ko Paulo ke he tau Kerisiano i Ierusalema?

¹⁸ Ka iloa he tagata poi kua teitei hoko a ia ke he fakaotiaga he poitufi loa, to nakai fakalolelole a ia. Liga kua hokotia e tino hana ke he fakaotiaga he fakauka​—mategugu, vela, mo e fia inu​—ka kua tata lahi ke he laini kua nakai fai magaaho ke oti e poi. Tatai ai, ko e tau Kerisiano ko tautolu ha he poitufi ma e palepale he moui, mo e kua tata lahi a tautolu ke he laini fakahiku. Nakai ko e magaaho a nei ke fakaoti e tafepoi ha tautolu!​—Fakatatai 1 Korinito 9:24; Filipi 2:16; 3:13, 14.

¹⁹ Ko e tau Kerisiano he senetenari fakamua kua fehagai mo e tuaga pihia. Teitei ke he 61 V.N., ne tohi he aposetolo ko Paulo ke he tau Kerisiano i Ierusalema. Kua tata lahi e magaaho​—ko e “hau” kelea, ko e fakatokaaga he tau mena tiaki taofiaga Iutaia, kua teitei ke “mole atu.” Mua atu ke he tau Kerisiano i Ierusalema ke mataala mo e tua fakamoli; kua lata ia lautolu ke fehola mai he maga ka kitia e lautolu kua pa takai ai he tau kau. (Luka 21:20-24, 32) Lata tonu ai, ko e hatakiaga omoomoi a Paulo: ‘Ua fakalolelole ha mutolu a tau loto mo e nakai fahia.’ (Heperu 12:3) Ne fakaaoga he aposetolo ko Paulo hinei ua e kupu fakagahua malolo: “lolelole tuai” (kaʹmno) mo e “nakai fahia” ­(e·klyʹo·mai). Hagaao ke he taha pulotu Tohi Tapu, ko e tau kupu Heleni nei kua “fakaaoga ai e Aristotle ke he tau tagata tafepoi ne okioki mo e veveli he mole atu e laini fakahiku. Ko e tau tagata totou [he tohi a Paulo] kua ha ha agaia ke he poitufi. Kua nakai lata a lautolu ke lolelole tuai. Kua nakai lata a lautolu ke fakaata e lautolu a lautolu ke mamatefua mo e veveli ha ko e lolelole. Ka e liu foki kua lata ke fakauka ka fehagai mo e tau mena uka.”

20. Ko e ha ne magaaho tonu ai e hatakiaga a Paulo ma tautolu he vaha nai?

²⁰ Kua lata tonu ha e tomatoma a Paulo ma tautolu he vaha nei! Ha ko e fehagai mo e tau pehiaaga holo ki mua, liga to ha ha i ai e tau magaaho ka logona e tautolu e tuga e tagata poi kua teitei ke veli. Ka kua tata lahi ke he laini fakahiku, kua lata a tautolu ke nakai fakalolelole! (2 Nofoaga he Tau Patuiki 29:11) Ko e mena tonu ia ni ne manako e Fi ha tautolu, ko e “leona tagi,” ki a tautolu ke taute. Fakaaue ai, kua taute e Iehova e tau foakiaga ke foaki “e malolo kia lautolu kua lolelole.” (Isaia 40:29) Ko e heigoa e tau foakiaga nei mo e ke fakaaoga fefe e tautolu e tau mena ia ka tutala ke he tala ne mui mai.

[Tau Matahui Tala]

Ko e Heigoa e Tali Hau?

◻ Maeke fefe ia tautolu ke hola kehe mai he fakalolelole ka fakaita po ke fakamamahi mai he falu?

◻ Ko e heigoa e onoonoaga lagotatai he hala ka taofi a tautolu mai he fakalolelole?

◻ Ko e heigoa ne amanaki mai a Iehova ia tautolu?

◻ Maeke fefe he fakatokolalo ke lagomatai e tau motua he fakapotopotoaga ke kalo mai he fakalolelole?

◻ Ko e ha ne magaaho tonu ai e tomatomaaga ia Heperu 12:3 ma tautolu he vaha nei?