Olioli he Mogonei mo e Tukulagi

“Olioli ā mutolu mo e fiafia tukulagi ā mutolu ke he mena kua eke e au; ha kua eke e au a Ierusalema mo e mena ke fiafia ai, ti eke e au hana tau tagata mo mena ke olioli ai.”​—ISAIA 65:18.

1. Kua lauia fefe e tau tagata takitokotaha, he tapuakiaga moli he tau senetenari e kua mole?

HE MAGAHALA he tau senetenari, kua tokologa ne moua e fiafia lahi he fekafekau ke he Atua moli, ko Iehova. Ko Tavita taha ne olioli ke he tapuakiaga moli. Ne talahau mai he Tohi Tapu ko e he magaaho ne tamai e puha he maveheaga ki Ierusalema, “kua ta hake ai e Tavita mo e magafaoa oti a Isaraela e puha a Iehova mo e kalaga fiafia.” (2 Samuela 6:15) Ko e fiafia pihia, he fekafekau ki a Iehova nakai ko e mena tote he vaha kua mole. Maeke ia koe ke fai vala ki ai. Mo e tau vala fou foki he fiafia ka nakai leva to eke ma hau!

2. Mua atu ke he fakamoliaga fakamua he Isaia veveheaga 35 ke he tau Iutaia ne liliu, ko hai ne putoia he vaha nei ke he taha fakamoliaga foki?

² He tala fakamua, ne kumikumi atu a tautolu ke he fakamoliaga fakamua he perofetaaga fakalagalaga ne fakamau ia Isaia veveheaga 35. Kua maeke ia tautolu ke fakahigoa e mena nei ko e perofetaaga liuakimai ha ko e mena ia ni ne hoko ke he tau Iutaia i tuai. Kua pihia foki e fakamoliaga he vaha ha tautolu. He fefe a ia? E, kamata ai mo e tau aposetolo ha Iesu mo e falu foki he Penetekoso 33 V.N., hane fa e fakafehagai a Iehova mo e tau Isaraela fakaagaga. Ko e tau tagata fakauku aki e agaga tapu he Atua anei ne eke mo vala he mena ne ui he aposetolo ko Paulo ko e “Isaraela he Atua.” (Kalatia 6:16; Roma 8:15-17) Liu manatu foki, na fakahigoa e tau Kerisiano nei ia 1 Peteru 2:9 “ko e hau fifili . . . , ko e tau patuiki mo e tau ekepoa, ko e motu tapu, mo e motu kua moua māna.” Kua fakaholo atu a Peteru ke fakakite e kotofaaga ne foaki ke he tau Isaraela fakaagaga, he talahau atu: “Kia fakakite atu e mutolu e mitaki hana ne ui a mutolu ke o mai he pouli ke he hana maama ke ofo lahi ai.”

Ko e Fakamoliaga he Vaha ha Tautolu

3, 4. Ko e heigoa e tuaga he magaaho ne moua he Isaia veveheaga 34 e fakamoliaga he vaha fou nei?

³ Kua fai magaaho he senetenari nei ne nakai fakatumau e tau tagata fakauku ne toe he Isaraela fakaagaga he lalolagi ke fakailoa e fekau pihia. Kua nakai olioli katoatoa a lautolu ke he maama ke ofo ai he Atua. Kua moli ai, kua lahi e poulikikio ha lautolu. He magaaho fe a ia? Ti ko e heigoa ne taute he Atua ko Iehova hagaao ki ai?

⁴ Kua tupu ai he vaha he Felakutaki I he Lalolagi, nakaila leva e fakatu he Kautu faka-Mesia he Atua he lagi he 1914. Ko e tau motu, mo e lagomatai he tau akoako he tau lotu he tau motu kehekehe, kua feitaaki. (Fakakiteaga 11:17, 18) Ka ko e moli, ko e Atua, kua totoko ni ki a Kerisitenitome ne tiaki e taofiaga mo e vahega akoako tokoluga hana ke tuga he taute e ia ke he motu fakatokoluga ko Etoma. Ha kua pihia, ko Kerisitenitome, ko e fakataiaga ki a Etoma, kua haia he tuaga ke logona hifo e fakamoliaga he vaha fou nei ha Isaia veveheaga 34. Ko e fakamoliaga nei kakano mai he moumouaga tukumalagi kua moli ai ke tuga e fakamoliaga fakamua ki Etoma i tuai.​—Fakakiteaga 18:4-8, 19-21.

5. Ko e heigoa e faga fakamoliaga he Isaia veveheaga 35 he vaha ha tautolu?

⁵ Ka e kua e Isa veveheaga 35 he perofetaaga ha Isaia, fakalataha mo e hana a pehiaga ke fiafia? Kua fita e mena ia he moua foki e fakamoliaga he vaha ha tautolu. Fefe e mena ia? Kua fakamoli ai he liuakimaiaga ha Isaraela fakaagaga he taha faga fakapaeaaga. O mai a tautolu ke kumikumi atu ke he moliaga ko e heigoa moli e fakamauaga fakateokarasi fou, ne tupu he magahala he vaha moui he tokologa ne momoui agaia.

6. Ko e ha ne pehe ai kua hohoko mai e tau tagata fakauku ne toe he Isaraela fakaagaga ke he tuaga fakapaea?

⁶ Ke he taha vaha ku he magahala he Felakutaki I he Lalolagi, ne nakai tumau e tau tagata fakauku ne toe he Isaraela fakaagaga ke mea katoatoa mo e fakatatai mo e finagalo he Atua. Ko e falu ia lautolu kua ilaila he tau taofiaga hehe mo e kua fakahui e tua he nakai taute e tuaga tu uho ma Iehova he magaaho ne fakaohooho ai ke lagomatai e tau motu felakutaki. He magahala he tau tau felakutaki nei, ne matematekelea a lautolu ke he tau puhala oti he favaleaga, kua pa ai foki e tau tohi faka-Tohi Tapu ha lautolu ke he tau matakavi loga. Ke he fakahikuaga, ko e falu he tau matakainaga tane talahaua kua fakahala ai mo e tuku he fale puipui ha ko e tau hokotaki fakavai. He kumikumi atu ki tua kua nakai uka ke kitia ko e tuga kua haia e tau tagata he Atua he tuaga fakapaea, nakai tokanoa. (Fakatatai Ioane 8:31, 32.) Kua lahi e kaumahala ha lautolu ke he fakakiteaga fakaagaga. (Efeso 1:16-18) Kua fakakite e lautolu e fakanonoaga ke he fakahekeaga ke he Atua, mo e fua ne moua kua nakai fua loga fakaagaga a lautolu. (Isaia 32:3, 4; Roma 14:11; Filipi 2:11) Kua kitia nakai e koe e tataiaga he mena nei ke he tuaga he tau Iutaia i tuai ne fakapaea i Papelonia?

7, 8. Ko e faga liuakimaiga fefe ne moua he tau tagata fakauku ne toe he vaha fou nei?

⁷ Ka e to toka nakai he Atua hana tau fekafekau he vaha fou nei he tuaga ia? Nakai, ne fakamakamaka a ia ke liuaki a lautolu, ke fakalautatai mo e mena ne talahau tuai mai ia Isaia. Ti ko e perofetaaga taha nei he Isa veveheaga 35 kua moua ai e fakamoliaga maaliali he vaha ha tautolu, mo e liuakiaga he tau tagata fakauku ne toe he Isaraela fakaagaga ke he monuinaaga mo e tino malolo ke he parataiso fakaagaga. Ia Heperu 12:12, ne hagaao a Paulo ke he kakano fakataitai ia Isaia 35:3, he lago ai e tonu he ha tautolu a fakagahuahuaaga fakaagaga he vala nei he perofeta a Isaia.

⁸ He vaha ne mole e felakutaki, ne o mai a lautolu ne fakauku ne toe he Isaraela fakaagaga mai he fakapaeaaga, ke talahau ai pihia. Ne fakaaoga he Atua ko Iehova a Iesu Keriso, ko Kuresa Mua Ue Atu, ke fakatokanoa a lautolu. Ti, kua maeke ia lautolu nei ne toe ke liu taute e gahua ta fale, kua tatai mo e gahua ha lautolu ne toe he tau Iutaia i tuai, ne liliu ke he ha lautolu a motu ke liu ta e faituga moli i Ierusalema. Ke fakaholo atu, kua maeke he tau Isaraela fakaagaga nei he vaha fou ke kamata ke feaki mo e fakatupu e parataiso uhiuhi mitaki fakaagaga, ko e kaina fakatai ki Etena.

9. Maeke fefe he tau mena pihia ne fakamaama he Isaia 35:1, 2, 5-7 ke tupu he vaha ha tautolu?

⁹ He mauloto e mena i luga, kia o mai a tautolu ke liu manamanatu atu foki ke he Isaia veveheaga 35, mo e onoono fakamua atu ke he Isa 35 tau kupu 1 mo e 2. Ko e mena ne tuga e matakavi magomago kua liu moli ai ke tuputupu mo e fua loga ke tuga e vao a Sarona tuai. Ti, kikite atu ke he Isa 35 tau kupu 5 ke he 7. Ko e tau tagata fakauku ne toe, ko e numela ne kua moui agaia mo e gahuahua ke he fekafekauaga ha Iehova, kua taute ai ha lautolu a tau mata he maamaaga ke hafagi. Kua maeke ia lautolu ke kitia mitaki e kakano he mena ne tupu he 1914 mo e he magaaho ne mole atu. Kua ha ha he mena ia foki e lauiaaga ke he tokologa ia tautolu ko e “moto tagata tokologa,” ne fa e fekafekau fakalataha he mogonei mo e tau tagata fakauku ne toe.​—Fakakiteaga 7:9.

Ko e Vala Nakai a Koe he Fakamoliaga?

10, 11. (a) Ko e puhala fe ne putoia ai a koe he fakakatoatoaaga ia Isaia 35:5-7? (e) Fefe e logonaaga fakatagata hau ke he tau hikihikiaga pehenei?

¹⁰ Kia onoono hifo ki a koe ni, ke fakatai ki ai. Ato hoko mai a koe ke iloa e Tau Fakamoli a Iehova, na totou tumau nakai e koe e Tohi Tapu? Ka taute pihia e koe, lahi fefe e maamaaga hau? Kua iloa e koe he mogonei, ke fakatai, e kupu moli hagaao ke he tuaga he mate. Liga kua maeke ia koe ke fakakite ke he taha ne fiafia ke he mena ia e tau matapatu kupu kua lata ia Kenese veveheaga 2, Fakamatalaaga veveheaga 9, mo e Esekielu veveheaga 18, mo e ke he falu a kupu Tohi Tapu foki. E, kua liga maama e koe e mena ne fakaako he Tohi Tapu ke he tau tala po ke tau matakupu. Ke talahau fakalapalapa, na lahi e kakano he Tohi Tapu ki a koe, mo e maeke ia koe ke fakamaama e tau mena loga i ai ke he falu, tuga kua taute pihia e koe.

¹¹ Kua lata foki ia tautolu takitokotaha ke huhu hifo, ‘Maeke fefe ia au ke ako e tau mena loga ne iloa e au hagaao ke he kupu moli he Tohi Tapu? Ato fakaako au mo e tau tagata ha Iehova, na moua oti nakai e au e tau kupu Tohi Tapu ne totoku mai? Kua maama nakai e au e kakano he tau mena ia mo e hokotia atu ke he maama hako hagaao ke he aoga ha lautolu?’ Ko e tali moli ke he tau huhu nei kua liga ni ko e nakai. Kia nakai lata ia taha ke ita ha ko e talahauaga pihia, ka e kua maeke ke talahau ko e matapouli a koe ke he tau matakupu tohi nei mo e kakano ha lautolu. Nakai kia pihia? Kua ha ha e tau mena ia he Tohi Tapu, ka e nakai kitia e koe a lautolu po ke maama e aoga ha lautolu. Kua hafagi fakaagaga fefe, mogoia, e tau mata hau? Kua pihia ai ha ko e mena ne taute e Iehova ke fakamoli e Isaia 35:5 ki a lautolu ne fakauku ne toe. Ha ko e mena ia, kua hafagi ai e tau mata hau. Kua nakai ha ha agaia a koe he poulikikio fakaagaga. Kua maeke ia koe ke kitia.​—Fakatatai Fakakiteaga 3:17, 18.

12. (a) Ko e ha kua maeke ia tautolu ke talahau nakai ko e magaaho anei ma e tau mana fakatino? (e) Fakakite mai fefe he mena ne tupu ke he Matakainaga F. W. Franz e puhala ne fakamoli ai e Isaia 35:5 he vaha ha tautolu?

¹² Kua iloa he tau tagata fakamakutu ne fakaako ke he Tohi Tapu mo e ke he fakafehagaiaga he Atua he tau senetenari ko e nakai ko e vaha anei ke fakamaulu mana e tino. (1 Korinito 13:8-10) Ti kua nakai amanaki a tautolu ke hafagi e Iesu Keriso e tau matapouli ke fakamoli aki ko e Mesia a ia, ko e Perofeta he Atua. (Ioane 9:1-7, 30-33) Mo e nakai taute foki e ia e tau tagata teliga tuli ke liu logona foki. He tata atu ke he 100 he tau tau hana he moui, ko Frederick W. Franz, taha mai ia lautolu ne fakauku mo e ko e pelesiteni he magaaho ia he Sosaiete he Kolo Toko, kua teitei ke pouli lahi e tau mata mo e kua fakaaoga e lagomataiaga ke logona. Ke he falu a tau tau ne nakai maeke a ia ke kitia lahi ke totou; ka e, ko hai ka manatu ko e matapouli po ke teliga tuli a ia he hagaao atu ke he Isaia 35:5? Kua eke e kitiaaga fakaagaga hana mo monuina ke he tau tagata he Atua he lalolagi katoa.

13. Ko e fuluhiaga po ke liuakimaiaga fefe ne moua he tau tagata he Atua he vaha fou nei?

¹³ Po ke ka e kua e alelo hau? Liga kua nononono a lautolu ne fakauku he Atua he magahala he ha lautolu a fakapaea fakaagaga. Ka e he magaaho ne fakaliutua he Atua e tuaga ia, ne kamata e tau alelo ha lautolu ke kalaga he fiafia ke he mena ne iloa e lautolu hagaao ke he Kautu kua fakatu he Atua mo e hana tau maveheaga ma anoiha. Liga kua lagomatai he tau mena ia a koe ke fakamavete foki e alelo hau. Lahi fefe e mena ne ­vagahau e koe hagaao ke he kupu moli he Tohi Tapu ke he falu he vaha ne mole? Liga ke he falu a magaaho kua manatu a koe, ‘Fiafia au ke he fakaakoaga, ka e nakai to fano au ke tutala ke he tau tagata kehe.’ Ka e, nakai kia moli ko e “alelo he tagata kuhukuhu” kua “kalaga fiafia” he mogonei?—​Isaia 35:6.

14, 15. O fefe e tokologa he “Puhala he Fakatapuaga” he vaha ha tautolu?

¹⁴ Ko e tau Iutaia ne fakatokanoa mai i Papelonia kua loa e puhala ke o atu ke he ha lautolu a motu kaina. Ko e heigoa e fakatataiaga he mena ia ke he vaha ha tautolu? E, o mai ke onoono atu ke he Isaia 35:8: “To ha i ai foki e puhala kua tanu, mo e puhala, to ui foki ia ko e puhala tapu; nakai fina atu ai taha kua kelea, ka e eke ma lautolu ni.”

¹⁵ Tali mai he ha lautolu a fakatokanoa mai he fakapaea fakaagaga, ko e tau tagata fakauku ne toe, ne fakalataha ki ai e tau miliona he tau mamoe kehe he mogonei, kua o kehe mai ia Papelonia Lahi he puhala tu fakatai, ko e puhala mea he fakatapuaga ne takitaki atu e taha ke he parataiso fakaagaga. Kua lali a tautolu ke moua mo e ke tumau ke he Puhala he Fakatapuaga nei. Manamanatu hifo ki a koe ni. Nakai kia kua mua atu he mitaki he tau tutuaga he mahani mitaki mo e tau matapatu fakaakoaga ne tapiki a koe ki ai he mogonei ke he magaaho ne nofo a koe he lalolagi? Nakai kia lahi e lali ne tuku atu e koe ke fakatatai e hau a tau manamanatu mo e mahani ke he Atua?​—Roma 8:12, 13; Efeso 4:22-24.

16. Ko e tau tutuaga fefe kua maeke ia tautolu ke fiafia he o he Puhala he Fakatapuaga?

¹⁶ He fakatumau a koe he Puhala he Fakatapuaga nei, kua tokanoa a koe mai he tau fakatupetupeaga hagaao ke he tau tagata tuga e tau manu favale. Moli, i loto he lalolagi kua lata ia koe ke mataala ke he tau tagata lotokai mo e fakavihia mai neke kai moui a koe fakaagaga. Kua tokologa ha e tau tagata ne mahani kelea ke he puhala fehagaiaki. Ko e kehe lahi ha a ia ke he tau tagata he Atua! I ai kua ha ha a koe he tuaga puipui. Moli, na nakai mitaki katoatoa e tau katofia Kerisiano hau; he falu mogo kua taute he taha e mena hehe po ke fakaita mai. Ka e iloa e koe nakai ko e lali pauaki e matakainaga hau ke fakamamahi ia koe po ke folofua a koe. (Salamo 57:4; Esekielu 22:25; Luka 20:45-47; Gahua 20:29; 2 Korinito 11:19, 20; Kalatia 5:15) Ka e, kua fiafia a lautolu ki a koe; ne lagomatai e lautolu a koe; manako a lautolu ke fekafekau mo koe.

17, 18. Ko e heigoa e kakano ne ha ha e parataiso he mogonei, mo e heigoa e lauiaaga he mena nei ki a tautolu?

¹⁷ Ti kua maeke ia tautolu ke onoono atu ke he Isaia veveheaga 35, mo e mauloto e fakamoliaga he magaaho nei he Isa 35 tau kupu 1 ke he 8. Nakai kia kua maama mitaki kua moua ai e tautolu e mena kua fakahigoa tonu ko e parataiso fakaagaga? Nakai, nakai la mitaki katoatoa ia. Ka e ko e parataiso moli a ia, ha ko e hinei kua maeke ia tautolu, he tohia he Isa 35 kupu 2, ke “kitekite atu . . . ke he lilifu a Iehova, ko e fulufuluola he Atua ha tautolu.” Ti ko e heigoa e hufiaaga? Kua talahau he Isa 35 kupu 10: “To liliu mai a lautolu ne laveaki e Iehova, to o mai foki a lautolu ki Siona mo e kalaga mo e fiafia tukulagi ki luga he tau ulu ha lautolu; to moua e lautolu e olioli mo e fiafia, ti fehola kehe ai e mānu mo e oi.” Kua moli ai, ko e ha tautolu a o mai kehe he lotu fakavai mo e ha tautolu a tutuli ke he tapuakiaga moli i lalo he fiafia he Atua ko e mena ke fiafia ki ai.

¹⁸ Ko e fiafia ne matutaki mo e tapuakiaga moli kua tumau ke tupu tolomaki, nakai kia pihia? Kua kitia e koe a lautolu ne fiafia fou mai kua taute e tau hikihikiaga mo e eke ke fakave ke he kupu moli he Tohi Tapu. Kua kitia e koe e fanau ne lalahi hake mo e taute ke fakaholo ki mua fakaagaga i loto he fakapotopotoaga. Ha ha i ai e tau papatisoaga, ne kitekite ai e koe a lautolu ne iloa e koe ne papatiso. Nakai kia ko e tau kakano ma e fiafia, ma e fiafia lahi a e, he vaha nei? E, ko e fiafia ha ia ke fakalataha mai e falu ki a tautolu ke he ha tautolu a tokanoaaga fakaagaga mo e tutuaga fakaparataiso!

Ko e Fakamoliaga ne Haia Agaia i Mua!

19. Ko e heigoa e amaamanakiaga ne foaki mai he Isaia veveheaga 35 ki a tautolu?

¹⁹ Kua onoono atu tuai a tautolu ke he Isaia veveheaga 35 ke he hana a fakamoliaga fakamua mo e liliuaga he tau Iutaia mo e ke he fakamoliaga fakaagaga ne hane fa e taute he vaha nei. Ka e nakai ko e fakaotiaga a ia. Kua loga atu foki. Kua matutaki ai mo e fakamoliaga he Tohi Tapu ke he liuakimaiaga he tau tutuaga parataiso moli ke he lalolagi.​—Salamo 37:10, 11; Fakakiteaga 21:4, 5.

20, 21. Ko e ha ne kakano mitaki mo e mai he Tohi Tapu ke talitonu ko e to fai fakamoliaga agaia e Isaia veveheaga 35?

²⁰ Nakai ko e mena felauaki a ia ma Iehova ke foaki e tau fakamaamaaga malolo ke he parataiso mo e ti fakakatoatoa ni e tau fakamoliaga ke he tau mena fakaagaga. Moli, nakai ke pehe e mena nei ko e tote e aoga he tau fakamoliaga fakaagaga. Pete ni kaeke ke fakatu e parataiso moli, to nakai fakamakona a tautolu kaeke ke ha ha mo e tau tufugatia fulufuluola mo e tau manu mafola ka e agaagai ai a tautolu he tau tagata mahani kelea fakaagaga, tau tagata ne taute ke tuga e tau manu favale. (Fakatatai Tito 1:12.) E, kua lata e fahi fakaagaga ke tuku fakamua, ha ko e mena kua mua atu e aoga.

²¹ Ka e pete ni ia, nakai oti he puhala fakaagaga e Parataiso ne olioli a tautolu ki ai he mogonei mo e to olioli atu ki mua foki i anoiha. Kua ha ha ia tautolu e kakano mitaki ke amanaki ke he fakamoliaga moli he tau perofetaaga ke tuga ia Isaia veveheaga 35. Ko e ha? E, he Isa veveheaga 65, ne talahau tuai e Isaia e “lagi fou mo e lalolagi fou.” Ne fakaaoga he aposetolo ko Peteru e kupu Tohi Tapu ia he magaaho ne fakamaama e ia e mena ka mui mai he aho ha Iehova. (Isaia 65:17, 18; 2 Peteru 3:10-13) Ne fakakite e Peteru to kitia moli e tau mena ne fakamaama mai e Isaia he magaaho ka eke e “lalolagi fou” ke fakamoli. To putoia ai e tau fakamaamaaga ne fa mahani mo koe​—ko e ta he tau fale mo e nonofo i ai; to e tau uluvine mo e kai e tau fua; lahi e olioli ke he gahua he hana a tau lima; nonofo fakalataha e luko mo e punua mamoe; mo e nakai tupu ha mena kelea ke he lalolagi katoa. Ke he falu a kupu foki, ko e moui loa, tau kaina kua nakai haofia, loga e kai, mitaki e gahua, mo e mafola he vahaloto he tau manu mo e he vahaloto he tau manu mo e tau tagata.

22, 23. Ko e heigoa e fakaveaga ma e fiafia ka ha ha he fakamoliaga i anoiha he Isaia veveheaga 35?

²² Nakai kia fakapuke he amaamanakiaga ia a koe mo e fiafia? Kua lata ke pihia, ha ko e puhala moui haia ne tufugatia ai he Atua a tautolu. (Kenese 2:7-9) Ti, ko e heigoa e kakano he perofetaaga ia Isaia veveheaga 35 ne fa e fakatutala a tautolu ki ai? Ko e pehe a ia ko e fai kakano foki a tautolu ke kalaga he fiafia. Ko e tau tutakale mo e tau matakavi magomago moli to tuputupu, ti taute ai a tautolu ke fiafia lahi. Ti ko e tau tagata mata lanu moana, po ke mata lanu kaki, po ke falu faga lanu fulufuluola foki, ka e kua matapouli he mogonei, ka maeke ke kitia. Ko e ha tautolu a katofia Kerisiano ne teliga tuli, po ke falu ia tautolu ne uka ke logona, ka maeke ke logona maaliali. Ko e fiafia ha ka fakaaoga e iloilo ia ke fanogonogo ke he Kupu he Atua ne totou mo e fakamaama, mo e maeke foki ke fanogonogo ke he go he matagi havilivili i luga he tau akau, ke he kata he tama tote, mo e lologo he manu lele!

²³ Ti kakano foki ko lautolu ne kulikuli, putoia mo lautolu ne matematekelea mo e mamahi e tau polohui-aitu, to o fano mo e nakai mamahi. Ko e fakatotoka ha ia! Ati tafe lahi e vai moli ke he tutakale. To kitia ua e tautolu e vai tafe mo e logona e go he puna. To maeke ia tautolu ke o atu ki ai mo e amo e motie lanu mitaki mo e tau akau kome. To eke moli mo Parataiso kua liuakimai. Ka e kua e fiafia ke fakalataha mo e leona po ke manu favale pihia mo e nakai matakutaku? Kua nakai lata ia tautolu ke kamata ke fakamaama e mena ia, ha kua fita e manamanatu oti a tautolu ke he fakatino ia.

24. Ko e ha kua maeke ia koe ke tali tonu mo e talahauaga he Isaia 35:10?

²⁴ Ne fakamafana mai a Isaia ki a tautolu: “To liliu mai a lautolu ne laveaki e Iehova, to o mai foki a lautolu ki Siona mo e kalaga mo e fiafia tukulagi ki luga he tau ulu ha lautolu.” Ti maeke ia tautolu ke tali tonu ko e fai kakano a tautolu ke kalaga he fiafia. Ko e fiafia ke he mena ne fita he taute e Iehova ma e tau tagata hana he parataiso fakaagaga ha tautolu, mo e fiafia ke he mena ne amanaki a tautolu ki ai he Parataiso moli ne tata mai. Hagaao ki a lautolu ne fiafia lahi​—hagaao ki a tautolu​—ne tohi e Isaia: “To moua e lautolu e olioli mo e fiafia, ti fehola kehe ai e mānu mo e oi.”​—Isaia 35:10.

Mailoga Nakai e Koe?

◻ Ko e heigoa e fakamoliaga ne ua aki he Isaia veveheaga 35?

◻ Ko e heigoa ne fakatatai fakaagaga ke he tau hikihikiaga mana ne talahau tuai e Isaia?

◻ Ke he puhala fe ne kau auloa a koe ke he fakamoliaga he perofetaaga nei?

◻ Ko e ha ne maeke a tautolu ke pehe ko e foaki mai he Isaia veveheaga 35 ki a tautolu e amaamanakiaga ma e vaha anoiha?

[Fakatino he lau 15]

Ko e fale puipui he Raymond Street i Brooklyn, i New York, ko e mena ne toka ai e tau matakainaga talahaua ne fitu ia Iuni 1918

[Fakatino he lau 16]

Pete ni kua teitei ke matapouli lahi he tau tau fakahiku hana, ne fakatumau e kitiaaga fakaagaga he Matakainaga Franz ke maaliali

[Tau Fakatino he lau 17]

Ko e tupu fakaagaga mo e holo ki mua e tau kakano ke fiafia