Kia Fakamakutu a Koe ke Totou
“Kia hagaaki totou tohi a koe, ti tomatoma atu, ti fakaako atu, ato fina atu au.”—1 TIMOTEO 4:13.
1. Moua fefe e tautolu e aoga mai he totou he Tohi Tapu?
KUA foaki he Atua ko Iehova ke he tau tagata e iloilo homo ue atu he fakaako ke totou mo e tohitohi. Kua foaki mai foki e ia hana a Kupu, ko e Tohi Tapu, ke maeke ia tautolu ke moua e fakaakoaga mitaki. (Isaia 30:20, 21) Ko e hufiaaga, kua taute he tau lau tohi ia a tautolu ke “fakatau o” mo e tau tupuna tane ne matakutaku Atua tuga a Aperahamo, Isaia, mo Iakopo. Kua “kitia” ai e tautolu e tau fifine mahani Atua pihia tuga a Sara, Repeka, mo e fifine Moapi mahani fakamoli ko Ruta. E, kua maeke ia tautolu ke “logona” a Iesu Keriso ne foaki hana Lauga he Mouga. Ko e tau fakaakoaga mitaki mo e lilifu ue atu oti nei ne mai he tau Tohiaga Tapu ka eke ma ha tautolu kaeke ko e tau tagata totou mitaki a tautolu.
2. Fakakite he heigoa e maeke ha Iesu mo e hana tau aposetolo ke totou mitaki?
2 Kia nakai fakauaua, na mua atu e iloilo he tagata mitaki katoatoa ko Iesu Keriso ke totou, mo e lahi e iloa mitaki e ia e tau Tohiaga Tapu Heperu. Ti he magaaho ne kamatamata he Tiapolo, ne fatiaki tumau a Iesu ki ai mo e talahau, “Kua tohi.” (Mataio 4:4, 7, 10) He taha magaaho ke he sunako i Nasareta, ne totou a ia ke he tau tagata mo e fakahagaao ki a ia ni e vala he perofetaaga ha Isaia. (Luka 4:16-21) Ka e kua e tau aposetolo ha Iesu? Ke he tau tohitohiaga ha lautolu, ne fa mahani a lautolu ke fatiaki mai e tau Tohiaga Tapu Heperu. Pete ni he kitekite e tau pule Iutaia ki a Peteru mo Ioane ko e nakai ako mo e goagoa ha kua nakai fakaako a laua he tau aoga Heperu tokoluga, ka e kua kitia mitaki mai he ha laua a tau tohi ne omoomoi he agaga kua maeke a laua ke totou mo e tohitohi fakamitaki. (Gahua 4:13) Ka e aoga moli nakai e iloilo ke totou?
“Uhoaki A Ia Kua Totou”
3. Ko e ha kua aoga lahi ai ke totou e tau Tohiaga Tapu mo e tau tohi Kerisiano?
3 Ko e iloa mo e fakagahuahua e iloilo tonuhia he tau Tohiaga Tapu ka fua mai e moui tukulagi. (Ioane 17:3) Ha ko e mena ia ne mailoga ai he Tau Fakamoli a Iehova e mua atu he aoga ke totou mo e fakaako e tau Tohiaga Tapu mo e tau tohi Kerisiano ne foaki he Atua he puhala mai he vahega fekafekau fakamoli mo e loto matala he tau Kerisiano fakauku. (Mataio 24:45-47) Kua moli, he fakaaoga e tau tohi talaga pauaki he Kolo Toko, kua fakaako ai e tau afe ke totou mo e kua moua e iloilo foaki-moui he Kupu he Atua.
4. (a) Ko e ha ne fua mai e fiafia he totou, fakaako, mo e fakagahuahua e Kupu he Atua? (e) Hagaao atu ke he totou, ko e heigoa ne tala age e Paulo ki a Timoteo?
4 Kua fua mai e fiafia he totou, fakaako, mo e fakagahuahua e Kupu he Atua. Kua pihia ai e mena nei ha kua fakafiafia mo e fakalilifu e tautolu e Atua, moua ai hana a fakamonuinaaga, mo e moua e olioli. Manako a Iehova ma e hana tau fekafekau ke fiafia. Ati poaki e ia e tau ekepoa ke totou hana Matafakatufono ke he tau tagata Isaraela i tuai. (Teutaronome 31:9-12) He magaaho ne totou e Esera ko e lagaki tohi mo e falu e Matafakatufono ke he tau tagata oti ne fakapotopoto i Ierusalema, kua fakamaama fakamitaki ai e kakano, ti fua mai e “olioli lahi.” (Nehemia 8:6-8, 12) Ne tala age e aposetolo Kerisiano ko Paulo ke he hana a hoa gahua ko Timoteo: “Kia hagaaki totou tohi a koe, ti tomatoma atu, ti fakaako atu, ato fina atu au.” (1 Timoteo 4:13) Kua totou pehe taha liliuaga: “Kia fakamakutu a koe ke totou e Tohiaga Tapu.”—New International Version.
5. Matutaki fefe he Fakakiteaga 1:3 e fiafia mo e totou?
5 Kua falanaki e fiafia ha tautolu he totou mo e fakagahuahua e Kupu he Atua, kua kitia mitaki ai ia Fakakiteaga 1:3. Kua tala mai ai i ai ki a tautolu: “Uhoaki a ia kua totou, katoa mo lautolu kua fanogonogo ke he tau kupu he perofetaaga nai, mo e omaoma ke he tau mena kua tohi ai; ka kua tata mai e vaha.” E, kua lata ia tautolu ke totou fakalahi mo e logona e tau kupu fakaperofeta he Atua ia Fakakiteaga mo e i loto katoa he tau Tohiaga Tapu. Ko e tagata ne mua atu e fiafia ko ia haia ne ‘fiafia ke he fakatufono a Iehova, ti manamanatu a ia ke he tau fakatufono hana ke he aho katoa mo e po.’ Ko e fua? “To monuina foki a ia ke he tau mena oti kana ke eke e ia.” (Salamo 1:1-3) Ti, ma e tau kakano mitaki, kua fakatonu mai e fakatokatokaaga ha Iehova ki a tautolu ke igatia ke totou mo e fakaako takitokotaha, fakamagafaoa, mo e tau kapitiga hana a Kupu.
Manamanatu Fakalahi mo e Fakahokulo
6. Ko e heigoa ne fakaako ki a Iosua ke totou, mo e kua aoga fefe e mena nei?
6 Maeke fefe ia koe ke moua e aoga he hau a totou he Kupu he Atua mo e tau tohi Kerisiano? Liga to moua ai e koe e aoga he taute e mena ne taute e Iosua, ko e takitaki matakutaku Atua i Isaraela i tuai. Kua poaki ki a ia: “Nakai uta kehe mo e gutu hau e tohi he fakatufono nai, ka kia manamanatu ai a koe ke he aho katoa mo e po, kia taofi e koe ke eke ai ke lata mo e tau mena oti kua tohi ai; ti monuina a koe ke he tau puhala oti ke fano ai a koe, ti monuina ai ni.” (Iosua 1:8) Ke ‘totou mo e manamanatu’ ko e pehe a ia ke vagahau fakaeneene e tau kupu ki a koe ni. Ko e lagomatai anei ma e manatuaga, ha kua mauloto ai e mena totou. Kua taute a Iosua ke totou e Matafakatufono he Atua ke he “aho katoa mo e po,” po ke fakatumau. Ko e puhala a ia ke kautu mai mo e ke taute fakapulotu ke foaki e tau matagahua foaki mai he Atua. Ko e totou fakatumau pihia ke he Kupu he Atua ka lagomatai a koe ke he puhala pihia.
7. Ko e ha ne nakai lata ia tautolu ke fakaata e manatu ke fakamafiti ka totou e Kupu he Atua?
7 Kia nakai fakaata e manatu ke fakamafiti ka totou e Kupu he Atua. Kaeke kua fakatokatoka a koe ke fakamole e taha magaaho ke totou e Tohi Tapu po ke falu tohi Kerisiano, liga to manako a koe ke totou fakaeneene. Kua lahi moli e aoga he mena nei ka fakaako a koe mo e amanakiaga ke manatu e tau matakupu mitaki lahi. Ti ka totou a koe, kia manamanatu fakalahi ki ai. Kumikumi ke he tau talahauaga hana ne tohi Tohi Tapu. Huhu hifo ki a koe ni, ‘Ko e heigoa hana kakano? Ko e heigoa haku ka taute aki e fakailoaaga nei?’
8. Ko e ha kua aoga ai ke manamanatu fakahokulo he magaaho ka totou e tau Tohiaga Tapu?
8 Kia fai magaaho ke manamanatu fakahokulo he magaaho ka totou e tau Tohiaga Tapu. To lagomatai he mena nei a koe ke manatu e tau fakamauaga he Tohi Tapu mo e ke fakagahuahua e tau matapatu fakaakoaga he tau kupu Tohi Tapu. Ke manamanatu fakahokulo ke he Kupu he Atua mo e manatu ke he loto hau e tau matakupu aoga ka taute foki a koe ke vagahau mai he loto, foaki e tau tali tonu moli ki a lautolu ne huhu mai, nakai ke talahau e falu mena ke liga tokihala he magaaho fakamui. He talahau he tala fakatai ne omoi faka-Atua: “Kua manamanatu e loto he tagata tututonu, kia tali atu a ia.”—Tau Fakatai 15:28.
Matutaki e Tau Matakupu Fou mo e Tau Mena Tuai
9, 10. Maeke fefe e totou Tohi Tapu hau ke fakatolomaki ka matutaki e tau matakupu faka-Tohiaga Tapu fou mo e tau mena kua fita he iloa e koe?
9 Tokologa e tau Kerisiano ne talahau e tote he iloaaga ha lautolu ke he Atua, hana Kupu, mo e hana finagalo he taha vaha. Ka e, he vaha nei, ko e tau fekafekau Kerisiano nei, kamata mai he tufugatiaaga mo e he hala he tagata, kua maeke ke fakamaama ai e kakano he poa ha Keriso, ke tala hagaao ke he fakaotiaga he fakatokaaga kelea nei he tau mena, mo e ke fakakite ko e to fakamonuina e tau tagata omaoma aki e moui tukulagi he lalolagi parataiso. Kua maeke moli e mena nei ha kua moua he tau fekafekau nei ha Iehova e “iloilo ke he Atua” he fakaako ke he Tohi Tapu mo e tau tohi Kerisiano. (Tau Fakatai 2:1-5) Kua matutaki fakahaga e lautolu e tau matakupu fou mo e tau mena tuai ne kua fita he maama.
10 Ko e mena aoga lahi mo e fua mitaki ke matutaki e tau matakupu faka-Tohiaga Tapu mo e falu ne kua fita he iloa e koe. (Isaia 48:17) Kaeke ke ha ha ai he tau matafakatufono, tau matapatu fakaakoaga he Tohi Tapu, po ke pihia foki ka nakai maama e falu manatu, kia matutaki e tau mena nei mo e tau mena kua fita he iloa e koe. Fakatatai e tau fakailoaaga ke he mena kua ako e koe hagaao ke he ‘fakatokatokaaga he tau kupu tonu.’ (2 Timoteo 1:13) Kumi e tau fakailoaaga ke liga lagomatai aki a koe ke fakamalolo e fakafetuiaga hau mo e Atua, fakatolomaki e aga faka-Kerisiano hau, po ke lagomatai a koe ke fakamatala e tau kupu moli he Tohi Tapu mo e falu.
11. Ko e heigoa hau ka liga taute ka totou e falu mena ne talahau he Tohi Tapu hagaao ke he mahani? Fakamaama.
11 Ka totou e falu mena ne totoku he Tohi Tapu hagaao ke he mahani, lali ke manamanatu ke he matapatu fakaakoaga ne putoia ai. Manamanatu fakahokulo ki ai, mo e kitia ko e heigoa hau ka taute he tau tuaga pihia. Mahani mau e tama ha Iakopo ko Iosefa ke nakai talia ke taute e mahani fakatane mo e fifine mo e hoana ha Potifara, he tala age: “Maeke fefe ia au ke eke e mena kelea lahi ia mo e hala au ke he Atua?” (Kenese 39:7-9) He fakamauaga amohia nei, kua moua e koe e taha matapatu fakaakoaga—ko e mahani feuaki ko e hala a ia ke he Atua. Maeke ai ia koe ke matutaki ke he iloilo hau e matapatu fakaakoaga nei mo e falu talahauaga he Kupu he Atua, mo e to aoga ai ki a koe kaeke ke kamatamata a koe ke taute e gahua kelea pihia.—1 Korinito 6:9-11.
Manamanatu ke he Tau Mena Tutupu he Tohi Tapu
12. Ko e ha ke manamanatu ke he tau fakamauaga Tohi Tapu he totou ai e koe?
12 Ke taofimau e tau matakupu he hau a loto he totou ai a koe, kia manamanatu atu ke he mena ne tupu. Kia kitia ke he manamanatuaga e matakavi, ko e tau kaina, mo e tau tagata. Logona e tau leo ha lautolu. Hohogo e falaoa ne tao he umu. Liu ke fakamomoui mai e tau mena tutupu. Ati taute ai e totou hau mo mena fakalagalaga, to liga kitia e koe e maaga he vaha i tuai, toli hake ke he mouga tokoluga, nava ke he tau ofoofogia he tufugatiaaga, po ke fakalataha atu ke he tau tagata tane mo e tau fifine ne lahi e tua fakamoli.
13. Maeke fefe ia koe ke fakamaama e mena ne fakamau he Tau Fakafili 7:19-22?
13 Fakalata kua totou a koe he Tau Fakafili 7:19-22. Kia manamanatu ke he mena ne tupu. Kua hohoko atu e Fakafili ko Kiteona mo e tau tagata tane malolo ha Isaraela ne tolu e teau ke he fahi mai nai he heaga api he tau Mitiana. Kua haga ke he matahola 10 he tuloto afiafi, ko e “kamataaga he leoleoaga tuloto he tau veveheaga he po.” Kua taute laia e leoleoaga he tau Mitiana, ti kua ufitia he pouligia e heaga api he tau fi momohe ha Isaraela. Kitiala! Kua mautali a Kiteona mo e hana tau tagata mo e tau pu. Kua ha ha ia lautolu e tau gati vai lalahi ne uufi aki e tau hulu ne toto e lautolu he tau lima hema. Ti fakalutukia ai, ne takitaha e matakau takiteau ne tolu ke uulo e tau pu, lipilipi e tau gati vai, toto ki luga e tau hulu, mo e kalaga: “Ko e pelu a Iehova mo Kiteona.” Onoono atu a koe ke he heaga api. Kua fehola ai e tau Mitiana mo e kamata ai ke tau kalaga! He fakaholo atu e tolu e teau ke uulo e tau pu ha lautolu, ne fakatoka atu he Atua e pelu he tau Mitiana ki a lautolu ni. Kua fehola ai e tau Mitiana, ti fakakautu ai e Iehova e tau Isaraela.
Fakaako e Tau Lesoni Uho
14. Maeke fefe ke fakaaoga e Tau Fakafili veveheaga 9 ke fakaako aki e tama ke lata ke mahani fakatokolalo?
14 He totou e Kupu he Atua, kua maeke ia tautolu ke ako e tau lesoni loga. Ke fakatai ki ai, liga manako a koe ke taofimau he fanau hau e lata ke mahani fakatokolalo. Kua lata ke mukamuka ke manamanatu mo e maama e matakupu he mena ne talahau he perofetaaga he tama tane ha Kiteona ko Iotamo. Kia kamata e totou ia Fakafili 9:8. “Ne,” he talahau e Iotamo, “o atu e tau akau ke fakauku ai e patuiki ma lautolu.” Ne nakai talia e akau olive, ko e akau mati, mo e vine ke pule. Ka e kua fiafia e tama vine tote ke eke mo pule. He totou fakalahi ai e fakamauaga ke he hau a fanau, liga to fakamaama age e koe nukua hukui he tau akau uho e tau tagata fakalilifu ne nakai kumi e tuaga pule patuiki ki luga he ha lautolu a tau katofia Isaraela. Ko e tama vine tote kua aoga ni ke tafu afi, kua hukui e pule patuiki he fakaikaluga ko Apimeleko, ko e tagata kelipopo ne manako ke pule kelea ke he falu ka e kua feleveia mo e fakaotiaga ke fakamoli e perofetaaga ha Iotamo. (Tau Fakafili, veveheaga 9) Ko e tama fe ka manako ke lahi hake ke eke ke tuga e tama vine tote?
15. Fakamaama fefe e aoga he mahani fakamoli he tohi ha Ruta?
15 Ko e aoga he mahani fakamoli kua fakamaama mai he tohi he Tohi Tapu ia Ruta. Ke fakalata, kua fefakafetokakiaki a lautolu he magafaoa ke totou fakalahi e fakamauaga mo e lali ke maama e mena ne talahau. Kitia ai e koe e fifine Moapi ko Ruta ne fenoga ki Petelehema mo e hana a matua fifine fugavai takape, ko Naumi, mo e logona e koe a Ruta ne talahau: “To eke e motu hau mo motu haku, to eke e Atua hau mo Atua haku.” (Ruta 1:16) Ko e fifine gahua fakamakutu ko Ruta kua kitia ai ne fa e okooko mai i tua ha lautolu ne helehele he fonua ha Poasa. Logona e koe a ia ne nava ki a ia, he talahau: “Kua iloa he maga oti he haku motu, ko e fifine mahani mitaki ni a koe.” (Ruta 3:11) Nakai leva, ti hoana e Poasa a Ruta. Ke felautataiaki mo e fakatokatokaaga he femaaki, mai ia Poasa ne fanau ai e Ruta e tama tane “ma Naumi.” Kua eke tuai a Ruta mo matua tupuna fifine ha Tavita mo e fakahiku ha Iesu Keriso. Ti kua moua ai e Ruta e “palepale lahi.” Ke lafi ki ai, ko lautolu ne totou e fakamauaga faka-Tohiaga Tapu, kua ako e lesoni uho: Kia fakamoli ki a Iehova, to lahi e monuina hau.—Ruta 2:12; 4:17-22; Tau Fakatai 10:22; Mataio 1:1, 5, 6.
16. Ko e heigoa e kamatamata ne hohoko ke he tau Heperu toko tolu, mo e maeke fefe he fakamauaga nei ke lagomatai a tautolu?
16 Kua maeke he talahauaga ke he tau Heperu ne fakahigoa ko Sataraka, Mesako, mo Apetiniko ke lagomatai aki a tautolu ke tua fakamoli ke he Atua ke he tau tutuaga uka. Kia manamanatu atu ke he mena ne tupu he totou fakalahi e Tanielu veveheaga 3. Ko e kolo fakatai auro mahaki he kelekele tatai ha Turu, ne fakalataha ki ai e tau tagata ofisa ha Papelonia. Ke he leo he tau kofe, ne fakafohifo a lautolu mo e hufeilo ke he mena fakatai ne fakatu hake he Patuiki ko Nepukanesa. Kua taute oti pihia ka e nakai taute pihia a Sataraka, Mesako, mo Apetiniko. Fakalilifu mo e mauokafua ai, ne tala age a lautolu ke he patuiki to nakai fekafekau a lautolu ke he hana a tau atua mo e hufeilo ke he mena fakatai auro. Kua tolo e tau Heperu fuata nei ke he gutuumu vela pakutoa. Ka ko e heigoa e mena ne tupu? Fakakia ai ki loto, ne kitia he patuiki toko fa e tagata malolo, taha mai ia lautolu ne “tuga ne tama he tau atua.” (Tanielu 3:25) Kua tamai ai e tau Heperu tolu ki fafo he gutuumu, ati fakaaue ai e Nepukanesa e Atua ha lautolu. Ko e mena mitaki lahi ke manamanatu ke he fakamauaga. Mo e ko e lesoni ha ia ne foaki hagaao ke he tua fakamoli ki a Iehova i lalo he kamatamataaga!
Aoga Mai he Totou Fakamagafaoa e Tohi Tapu
17. Tohi hifo fakaku la e falu mena aoga kua maeke he magafaoa hau ke ako he totou auloa e Tohi Tapu.
17 Maeke he magafaoa hau ke moua e tau aoga loga kaeke ke fakatumau a koe ke fakaaoga e taha magaaho ke totou auloa e Tohi Tapu. Kamata mai ia Kenese, maeke ia koe ke fakamoli e tufugatiaaga mo e kitekite ke he kaina Parataiso fakamua he tagata. Maeke ia koe ke talahau e tau mena tutupu he tau tupuna tane tua fakamoli mo e ha lautolu a tau magafaoa mo e mumui ke he tau Isaraela he o atu a lautolu he Tahi Kula mo e hui momo. Kitia ai e koe e fuata tote ne leveki mamoe ko Tavita ne kautu ke he tupua Filisitia ko Koliato. Maeke he hau a magafaoa ke mailoga e taaga he faituga ha Iehova i Ierusalema, kitia ai hana moumouaga he tau matakau Papelonia, mo e ke kitia e liu talaga i lalo hifo he pule he Kavana ko Serupapelu. Fakalataha mo e tau leveki mamoe loto fakatokolalo ne tata ki Petelehema, maeke ia koe ke logona e fakapuloaaga fakaagelu he fanauaga ha Iesu. Maeke ia koe ke moua e tau tala matafeiga hagaao ke he hana a papatisoaga mo e hana a fekafekauaga, kitia a ia ne foaki hana a moui fakatagata mo lukutoto, mo e fakalataha foki ke he olioli he hana a liu tu mai. Ke he taha mena foki, maeke ia koe ke o fenoga mo e aposetolo ko Paulo mo e kitia e fakatu hakeaga he tau fakapotopotoaga he tupu ki mua ai e lotu Kerisiano. Ti, he tohi ha Fakakiteaga, kua maeke he magafaoa hau ke fiafia ke he fakakiteaga mua atu he aposetolo ko Ioane ke he vaha anoiha, fakalataha mo e Pule Afe Tau ha Keriso.
18, 19. Ko e heigoa e tau manatu ne foaki hagaao ke he totou Tohi Tapu fakamagafaoa?
18 Kaeke kua totou fakalahi e koe e Tohi Tapu fakamagafaoa, kia totou ai mo e maama mo e makaukau. Ka totou ai e falu vala he tau Tohiaga Tapu, taha mai he magafaoa—liga ko e matua tane—ke totou e laulahi he tau kupu he fakamauaga. Ko e falu ia mutolu kua lata ke totou e tau kotofaaga pauaki ke he tau tagata i loto he Tohi Tapu, mo e totou e tau vala hau mo e logonaaga kua lata.
19 He fakalataha atu a koe ke totou fakamagafaoa e Tohi Tapu, liga to holo ki mua e iloilo hau ke totou. Ti liga moli, to fakatolomaki e iloilo hau ke he Atua, mo e lata he mena nei ke fakatata fakalahi atu a koe ki a ia. Ne lologo a Asafo: “Ko au, ko e mitaki kia au ke fakatata ke he Atua; kua eke e au e Iki ko Iehova mo kolo haku, kia talahau atu e au hāu a tau gahua oti.” (Salamo 73:28) To lagomatai he mena nei e magafaoa hau ke tuga a Mose, ne kua “fakauka a ia tuga ne mena kua kitia e ia a ia nakai kitia,” ko ia ko e Atua ko Iehova.—Heperu 11:27.
Totou mo e Fekafekauaga Kerisiano
20, 21. Matutaki fefe e poakiaga ha tautolu ke fakamatala mo e ke he iloilo ke totou?
20 Ko e ha tautolu a manako ke tapuaki “a ia nakai kitia” kua lata ke futiaki a tautolu ke gahua fakamakamaka ke eke mo tau tagata totou mitaki. Kua lagomatai he iloilo ke totou mitaki a tautolu ke fakamatala mai he Kupu he Atua. Kua lagomatai moli a tautolu ke fakatumau ke he gahua fakamatala he Kautu ne poaki e Iesu ke he tau tutaki hana he magaaho ne talahau e ia: “Kia o atu a a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; Ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 28:19, 20; Gahua 1:8) Ko e fakamatalaaga ko e matapatu gahua a ia he tau tagata ha Iehova, mo e kua lagomatai he iloilo ke totou a tautolu ke fakakatoatoa e mena ia.
21 Kua lata ke gahua fakalahi ke eke mo tagata totou mitaki mo e faiaoga makaka he Kupu he Atua. (Efeso 6:17) Ti, ‘kia lalilali atu a koe kia eke a koe mo tagata kua fiafia ki ai e Atua, kua fakatokatoka fakahako e kupu moli.’ (2 Timoteo 2:15) Kia fakatolomaki e iloilo hau ke he kupu moli he Tohiaga Tapu mo e iloilo hau ko e Fakamoli a Iehova, he fakamakutu a koe ke totou.
Ko e Heigoa Hau a Tau Tali?
◻ Falanaki fefe e fiafia ke he totou he Kupu he Atua?
◻ Ko e ha ke manamanatu fakahokulo ai ke he mena ne totou e koe he Tohi Tapu?
◻ Ko e ha ne fakaaoga ai e matutakiaga mo e manamanatuaga he magaaho ka totou e tau Tohiaga Tapu?
◻ Ko e heigoa e falu lesoni ka ako mai he totou e Tohi Tapu?
◻ Ko e ha ne totou fakalahi ai e Tohi Tapu fakamagafaoa, mo e ko e heigoa e matutakiaga ne ha ha he totou ma e fekafekauaga Kerisiano?
[Tau Fakatino he lau 11]
He magaaho ka totou fakamagafaoa e Tohi Tapu, kia manamanatu ke he tau fakamauaga mo e manamanatu fakahokulo ke he kakano aoga i ai