Kua Matekelea Kia a Koe he Mahani Fili Tagata?

KO E heigoa e mena ne fetataiaki ai e vale fakamatakau, fili lanu tagata, ekefakakelea pauaki, tapu ke lafi e tau vahega lanu tagata, mo e keliaga fakamatakau pauaki? Ko e tau fua oti he aga ne kaputia ai e tau tagata oti​—mahani fili tagata!

Ko e heigoa e mahani fili tagata? Kua fakamaama ai he taha vahega tohi fakamaama mena “ko e manamanatuaga ne tupu mai he nakai age taha magaaho po ke fakaalofa ke fakafili mo e tonu.” Kakano ha ko e tau tagata nakai mitaki katoatoa, kua hagahaga lahi na tautolu ke fai tama vala fili tagata. Liga maeke ia koe ke manatu e tau magaaho ne taute e koe e fakafiliaga ka e nakai iloa oti e tau mena moli. Kua fakakehekeheaki he Tohi Tapu e tau hagahaga fili tagata ia mo e puhala fakafili he Atua ko Iehova. Kua pehe mai: “Ha ko e mena nakai kitekite a Iehova tuga ne kitekite e tagata, ha kua kitekite e tagata ke he tino, ka e kitekite a Iehova ke he loto.”​—1 Samuela 16:7.

Maeke e Mahani Fili Tagata ke Fakamamahi

Nakai taumaleku ko e mena hoko ke he tau tagata oti he taha magaaho e fakafiliaga hepe he taha tagata. (Fakatatai Fakamatalaaga 7:21, 22.) Hagaao ke he tau mena oti, ne matekelea oti na tautolu he mahani fili tagata. Pete ni, ka tiaki vave ai, liga to tote po ke nakai fakamamahi ai he tau manamanatu fili tagata. Ko e fakafualoto ke he tau manamanatu ia ne kua maeke ke fua mai e fakamatematekelea. Kua maeke ke fakavaia a tautolu ke tua ke he mena fakavai. Ke fakatai ki ai, ka ha ha lahi he mahani fili tagata, tua lahi moli e falu tagata ko e maeke he tagata ke lotokai, teva, goagoa, po ke fakatokoluga noa ni kakano he nofo ai he taha lotu, taha matakau tote, po ke taha matakau fakamotu.

Kua loga e tau mena tutupu ne kua tupu mai ai he tau fakafiliaga hehe ia e tau mahani nakai tonu, ekefakakelea, po ke mahani vale foki ke he falu. Ko e tau miliona tagata ne galo ha lautolu a tau momoui ha ko e keliaga lalahi fakalutukia, keliaga fakamatakau pauaki, kelipopoaga fakamatakau tote, mo e falu faga mahani to muatua he mahani fili tagata.

Ne tau e tau fakatufono he lalolagi katoa ke uta kehe e mahani fili tagata he poaki fakamatafakatufono e fakamoliaga ke he tonuhia ke nakai holia he mahani vale e tokanoaaga, haohao mitaki, mo e tataiaga oti. Kaeke ke totou e koe e fakatufono fakave po ke matapatu matafakatufono he motu hau, kua nakai fakauaua to moua ai ni e koe e tau kupu tohia po ke hikiaga ne talaga ke puipui aki e tau tonuhia he tau tagata nonofo mau oti he motu, pete ni ko e heigoa ha lautolu a faoa, ko e fifine po ke tane, po ke lotu. Ka e, kaputia ai ni e lalolagi katoa he mahani fili tagata mo e ekefakakelea pauaki.

Kua matekelea kia a koe he mahani fili tagata? Kua ui noa ni kia he faoa a koe ko e lotokai, teva, goagoa, po ke fakatokoluga kakano ha ko e hau a faoa, tau he moui, ko e fifine po ke tane, motu ne tupu mai, po ke tau taofiaga he lotu? Kua nakai maeke kia a koe ke moua e fakaakoaga kua lata, gahua, kaina, mo e tau lagomatai he kaufakalatahaaga kakano ha ko e mahani fili tagata? Kaeke kua pihia, to maeke fefe a koe ke fahia mai?

[Fakatino he lau 3]

Ko e fakafualoto ke he manamanatuaga fili tagata ka omoomoi e fakavihia ke he lanu tagata

[Credit Line]

Nina Berman/Sipa Press