Ko e Magaaho Ka Nakai Ha i Ai e Mahani Fili Tagata!

HAGAAO ke he hokotakiaga, ko e pehe e saienetisi ko Albert Einstein he taha magaaho, ko e mua atu e uka i loto he lalolagi momoko nei, ke kautu mai he mahani fili tagata mai ka ihiua e etome. Kua pihia foki a Edward R. Murrow, ko e tagata tohi tala talahaua he vaha he Felakutaki II he Lalolagi mo e he magaaho fakamui ko e ulu takitaki he U.S. Information Agency (Hukui Gahua Fakailoaaga he T.F.K.), ne talahau ko e “nakai fai tagata kua maeke ke uta kehe e tau mahani fili tagata​—koenaia ke kitia e tau mena ia.”

Kua moli nakai e tau talahauaga nei? Kua nakai fakaai kia ke uta kehe e aga ekefakakelea pauaki mo e ekefakakelea motu? Fefe e logonaaga hifo he Atua ke he mahani fili tagata?

Nakai Fakamailoga Tagata e Atua

Kua vagahau totoko e Tohi Tapu ke he mahani fakamailoga tagata. (Tau Fakatai 24:23; 28:21) Kua talahau “ko e iloilo mai luga, kua fakamua hana a mea, ti mafola, ti totonu, ti fulumokoi, kua puke ke he fakaalofa mo e tau fua mitaki, nakai fakaalofa fakaigati, nakai fakatupua.” (Iakopo 3:17) Kua pehi fakalahi e pulotu ia ke he tau ikifakafili i Isaraela tuai. “Ko e tau tagata na e aua neke eke e mutolu e fakafiliaga mo e nakai tonu,” he tala age ki a lautolu. “Aua neke fakamailoga tagata a mutolu ke he tagata nofogati, ti ua fia loto ni hokoia ke he tagata maukoloa.”​—Levitika 19:15, NW.

Ne pehi lahi e Iesu Keriso mo e hana tau aposetolo ko Peteru mo Paulo e tuaga mauokafua he Tohi Tapu ne totoko ke he mahani fakamailoga tagata mo e mahani fili tagata. Kua nakai fakamailoga tagata a Iesu ki a lautolu ‘ne fakafita mo e tiaki atu ai, tuga e tau mamoe nakai fai leveki a lautolu.’ (Mataio 9:36) Ne fakaako e ia: “Ua fakafili fakahanoa, ka kia fakafili e fakafiliaga tonu.”​—Ioane 7:24.

Kua liliu a Peteru mo Paulo ke talahau fakatonu mai ki a tautolu ko e nakai fakamailoga tagata e Atua ko Iehova. Ne talahau mai e Peteru: “Ko e moli, kua iloa e au nakai fakamailoga tagata e Atua. Ka ko e tau tagata he tau motu oti kana ne matakutaku kia ia mo e mahani tututonu, kua talia ai e ia.” (Gahua 10:34, 35) Kua tala mai he aposetolo ko Paulo ki a tautolu: “Ha kua nakai fakamailoga tagata e Atua.”​—Roma 2:11.

Ko e Malolo he Tohi Tapu

Ha ha he Tohi Tapu e malolo ke hiki e tau aga fakatagata ha lautolu ne takitaki e ia. Kua pehe ia Heperu 4:12: “Ko e kupu he Atua kua moui ia, mo e gahua malolo.” Fakalataha mo e lagomatai a Iehova kua maeke he tagata mahani fili tagata ke hiki foki hana a puhala manamanatu mo e eke ai ke nakai fakamailoga tagata hana tau mena ka taute ke he falu.

Ma e fakatai, kia onoono atu la ke he mena ne tupu ki a Saulo mai Taso. Hagaao ke he fakamauaga he Tohi Tapu, kua ha ha ai e magaaho ne vale lahi a ia he totoko ke he fakapotopotoaga Kerisiano kakano he muitua lahi a ia ke he tau kupu toka tuai fakalotu ne mao kikiha. (Gahua 8:1-3) Kua tua lahi mahaki a ia ke he kupu toka tuai Iutaia, ko e tau tagata tiaki taofiaga e tau Kerisiano oti mo e ko e tau fi he tapuakiaga moli. Kua tataki he mahani fili tagata a ia ke lago ke he kelipopoaga he tau Kerisiano. Ne talahau mai he Tohi Tapu “kua faguhe [a ia he] fakamatakutaku mo e kelipopo e tau tutaki he Iki.” (Gahua 9:1) Kua taute e mena ia, he manamanatu a ia ko e taute e ia e fekafekauaga tapu ke he Atua.​—Fakatatai Ioane 16:2.

Ka e, kua maeke a Saulo mai Taso ke tiaki hana mahani fili tagata lahi mahaki. Kua eke foki a ia mo Kerisiano! Ko e magaaho fakamui, ha ko Paulo, ko e aposetolo a Iesu Keriso, ne tohi e ia: “Ko au ne vagahau kelea fakamua, to favale, to fakakelea atu; ka kua ofania au, ha kua eke pihia e au ke he haku a nakai iloa, mo e nakai talia fakatonu.”​—1 Timoteo 1:13.

Nakai ni ko Paulo e tagata ne taute e tau hikiaga lahi mahaki ke he puhala manamanatu hana. I loto he hana tohi ki a Tito, ko e tagata evagelia auloa, ne akonaki atu a Paulo ke he tau Kerisiano “aua neke eke fakakelea ke he taha, aua neke fa taufetoko, kia totonu, mo e fakakite e mahani molu ni ke he tau tagata oti kana. Ha ko tautolu foki, ne goagoa a tautolu i tuai, mo e faliuliu, mo e fakaheheina, ne fekafekau ke he tau manako lahi, mo e tau mena kehekehe ne fiafia ai, ne nonofo ke he loto kelea mo e mahekeheke, kua vihiatia, mo e feitaaki.”​—Tito 3:2, 3.

Ulu ki Lalo e Tau Fakalavelave he Mahani Fili Tagata

Ko e vaha nei, kua fakamakamaka e tau Kerisiano ke mumuitua ke he fakatonuaga ia. Kua manako a lautolu ke kalo ke ua fakafili tagata ha ko e kitiaaga noa ni. Kua puipui he mena nei a lautolu ke ua ‘eke fakakelea’ e falu. Kua ha ha ai ia lautolu e olioli fakamatakainaga he lalolagi oti ne kua lakafia e tau katofia he aga papale motu, aga fakamatakau, mo e ekefakakelea motu he lalolagi nei.

Manamanatu la ke he mena ne tupu ki a Henrique, ko e tagata Parasili uli. Ne matekelea a ia ha ko e ekefakakelea motu pauaki he mahani fili lanu tagata, ti kua tupu hake ai ia ia e vihiatia lahi mahaki ke he tau tagata tea. Kua fakamaama mai e ia: “Kua tokoua e Tau Fakamoli kili tea ne o mai ke he fale haku ke tala hagaao ke he higoa he Atua. He kamataaga nakai manako au ke fanogonogo kakano he tuaha lahi au ke he tau tagata tea. Ka e nakai leva kua kitia e au ko e fai mena moli he fekau ha laua. Ti talia a au ke fakaako Tohi Tapu. Ko e huhu fakamua haku anei, ‘Tokologa nakai e tau tagata uli he lotu ha mua?’ Ne tali a laua, ‘E.’ Ti fakakite mai mogoia e laua ki a au e fakatino fakahiku he tohi My Book of Bible Stories,a ne ha ha ai e tau tagata fuata he tau lanu kehekehe. Ne ha ha i ai foki e tama tane uli, mo e fakamalolo he mena nei au. Ko e magaaho fakamui ne fano ai au ke he Fale he Kautu he Tau Fakamoli a Iehova, ti kitia e au i ai e tau tagata mai he tau lanu kehekehe ne fefakalilifuaki e taha ke he taha. Ko e mena aoga lahi e mena nei ki a au.”

Ko e magaaho nei, ha ko e taha he Tau Fakamoli a Iehova, kua fiafia lahi a Henrique ke ha ha he tau matakainaga Kerisiano moli. Maama e ia ko e nava ke he mitaki nei ko e mena nakai lata ke age ke he ha tagata. Kua pehe a ia: “Kua fakaaue lahi au he aho nei ki a Iehova mo Iesu ma e tau mena oti ne taute e laua ke lata mo au. Kua gahua a au mo e tau miliona he tau fekafekau fakamoli a Iehova mai he tau motu oti, tau lanu tagata kehekehe, mai he tau tupumaiaga kehekehe, ne kua fefakalatahaaki ke he taha ni e manatu.”

Ko e magaaho ne lahi hake ai, ko Dario foki ne fakamatekelea he mahani fili tagata. Ko e 16 e tau tau he moui he magaaho ne kamata a ia ke fakaako Tohi Tapu mo e Tau Fakamoli a Iehova. Kua kitia e ia: “Ke he vahaloto he Tau Fakamoli, kua kitia ai e au ko e nakai fai manamanatuaga ko e mua haku motu.” Ne nava lahi a ia ke he vahaloto feofanaki moli. Ko e mena mua atu ne kitia e ia ko e fekafekau e tau tagata motu kehekehe he tau kotofaaga i loto he fakapotopotoaga. Ti ko e tau magaaho ne hohoko ki a ia e taha faga mahani fili tagata po ke ekefakakelea pauaki he tau tagata tua nakai he fakapotopotoaga, ne manatu e Dario ko e fakaalofa a Iehova ke he tau tagata he tau motu, tau magafaoa, mo e tau tagata vagahau kehekehe oti.

Maeke Fefe ke Fahia

Kua loto oti a tautolu ke mahani fakalilifu mai mo e lilifu e tau mena ka taute mai ki a tautolu. Ko e mena haia ne kua eke ai ke he tagata ne fakamatematekelea he mahani fili tagata, mo kamatamata kua uka ke fakauka ki ai. Kua nakai puipui he fakapotopotoaga Kerisiano a tautolu mai he tau mahani fili tagata oti kana he lalolagi kelea nei. Ka eke ni e Tiapolo ko Satani ke pule ke he tau mena he lalolagi, to ha ha ai ni e tau mena nakai tonu. (1 Ioane 5:19) Kua hataki mai he Fakakiteaga 12:12 ki a tautolu: “Oi fakaalofa kia mutolu kua nonofo ke he fonua mo e tahi, ha kua hifo kia mutolu e tiapolo kua ita lahi, ha kua iloa e ia kua tote hana vaha.” Kua nakai manako ni a ia ke taute ke nakai tokotoko mitaki ni hokoia. Ko e mena fakatatai a ia ke he manu takafaga ola. Kua tala mai he aposetolo ko Peteru ki a tautolu: “Ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia.”​—1 Peteru 5:8.

Kua talahau mai foki he Tohi Tapu ki a tautolu: “Ko e mena ia kia omaoma ai a mutolu ke he Atua; kia totoko atu a mutolu ke he tiapolo, ti hola kehe ai a ia ia mutolu.” (Iakopo 4:7) Ko e lagomatai kua mua atu e mitaki ke fahia mai he mahani fili tagata ko e ke onoono atu ke he Atua ma e puipuiaga, tuga ne taute he Patuiki ko Tavita: “Haku Atua na e, kia laveaki e koe au mai he lima he tagata mahani kelea, ko e lima hana kua mahani hepehepe mo e favale.” (Salamo 71:4) Liga to liogi foki ni a tautolu tuga e salamo: “Ko e Atua na e, fakaalofa mai kia au; ha kua faguhē mai e tau gutu he tau tagata kia au; ko ia ne tau kia au kua favale mai a ia kia au ke he aho oti.”​—Salamo 56:1.

To tali fefe he Atua e tau liogi pihia? Kua pehe mai e Tohi Tapu: “Ha ko e mena laveaki e ia a ia ne nofogati he hana kalaga mai; katoa mo ia kua matematekelea, mo ia kua nakai fai lagomatai. To fakaalofa a ia kia ia kua lolelole, mo ia kua nofogati; to fakamoui e ia a lautolu kua nonofogati.” (Salamo 72:12, 13) Kua mitaki ha he iloa ko e to hoko mai e magaaho ka ta mai e Iehova e okiokiaga ma lautolu oti ne fakamatematekelea he tau mena nakai tonu!

‘To Nakai Moumou Mena Ai a Lautolu’

Ko e mena to tau tumau e tau fakatufono he lalolagi nei ke uta kehe e mahani fili tagata aki ha lautolu a tau matafakatufono mo e tau fakaholoaga. Ko e mena to mavehe tumau a lautolu ke moua mai e tataiaga mo e tonu. Ka e to nakai maeke a lautolu ke kautu. (Salamo 146:3) Ko e Atua ni hokoia kua maeke mo e to uta kehe e ia e tau mahani fili tagata. To taute e ia e tau tagata ke taha ai e magafaoa fefakalatahaaki. “Ko e moto tagata tokologa, kua nakai maeke ia taha ke totou, mai he tau motu oti, mo e tau faoa, mo e tau tagata kehekehe, mo e tau vagahau kehekehe,” ka hao mai he fakaotiaga he fakatokaaga kelea nei mo e olioli ai he nonofo mo e mafola.​—Fakakiteaga 7:9, 10.

To liu a Iehova ke fakamitaki oti e tau mena kelea ne fakatupu mai he ekefakakelea motu mo e mahani fili tagata he tau kaufakalatahaaga. Manamanatu la, to nakai fai tagata ka nakai tonu e tau mena ka taute ki ai! “To takitokotaha a lautolu mo e nofo i lalo hana vine, mo lalo foki he hana mati; to nakai ha i ai foki taha ke fakamatakutaku ki ai.” (Mika 4:4) Mo e pehe mai ia Isaia 11:9: ‘To nakai moumou mena ai a lautolu.’

Kaeke ko e matekelea a koe he mahani fili tagata he magaaho nei, to fakamalolo ai he amaamanakiaga homo ue atu nei ma e vaha i mua e fakafetuiaga hau mo Iehova. To lagomatai a koe ke fakauka ke he tau mena nakai tonu he fakatokaaga kelea nei. He fahia mai a koe he mahani fili tagata mo e onoono atu ki mua, muitua ke he tomatomaaga pulotu he Tohi Tapu: “Kia fakamalolo a mutolu ko mutolu oti kana kua amaamanaki kia Iehova; to fakamalolo e ia ha mutolu a tau loto.”​—Salamo 31:24.

[Matahui Tala]

[Fakatino Credit Line he lau 4]

Ata he U.S. National Archives