Hokotaki he Tau Tagata Fakapuloa he Kautu

“Ko e Hāu a Tau Poaki Oti Foki Kua Moli Ia”

KO E magaaho ku to hoko hana mate, ne tomatoma a Mose ke he tau tagata Isaraela ke omaoma a lautolu takitokotaha ke he tau poakiaga oti a Iehova. Ne pehe a ia: “Kia tokaloto ai e mutolu e tau kupu oti kua fakamatala atu ai e au kia mutolu ke he aho nai; ti poaki atu ai ke he ha mutolu a fanau, kia taofi ai e lautolu ke eke ai e tau kupu oti he fakatufono na. Ha ko e mena nakai ko e kupu fakateaga ia kia mutolu, nukua ha i ai ha mutolu a moui.”​—Teutaronome 32:46, 47.

Fakamui he mole atu e tau teau tau, ne pehi hake fakalahi he salamo e aoga he tau fakaakoaga oti he Atua, he magaaho ne pehe a ia: “Kua tata mai a koe, Iehova na e; ko e hāu a tau poaki oti foki kua moli ia.” (Salamo 119:151) Ke he vaha he senetenari fakamua, ne vagahau ai a Iesu hagaao ke he koloa uho he “tau kupu oti ne to mai he fofoga he Atua.” (Mataio 4:4) Mo e i lalo he takitakiaga he Atua ne tohi he aposetolo ko Paulo “ko e tau Tohi Tapu oti kana mai he Agaga he Atua ia, kua aoga ni.”​—2 Timoteo 3:16.

Kua maali ai, na amaamanaki e Atua ko Iehova ke manamanatu fakalahi moli e tau tagata tapuaki hana ke he fekau katoa ne kua talahau mai he tau lau tohi he Kupu hana ki a tautolu. Kua nakai taha e vala tohi i loto he Tohi Tapu ne kua nakai ko e koloa uho. Kua pihia e logonaaga he Tau Fakamoli a Iehova ke he Kupu he Atua, tuga ne fakakite mai he mena ne tupu i Mauritusi.

Ne nofo a Mr. D—— he maaga tu mamao, mo e gahua leoleo po foki a ia i ai. Kua leva e magaaho, ne kua kumikumi fakamoli a ia ke moua e puhala hako ke tapuaki ke he Atua. He tau po he magahala gahua leoleo hana, ne kamata a ia ke totou e Tohi Tapu. Ati hoko ai ke he magaaho kua totou oti e ia mai he taha kili ke he taha kili. Ne ako e ia ko Iehova e higoa he Atua​—ko e higoa ne fa kitia lagaloga i loto he Tohi Tapu Hiniti hana. Kua moua e ia kua mua atu e fulufuluola he tohi a Fakakiteaga.

Ti manamanatu hifo ai a ia ki a ia mogoia, ko e fai lotu nakai ne muitua ke he tau mena oti he Tohi Tapu. Ne kitia e ia ko e lotu ne mahani lahi a ia ke fano ki ai kua, lahi ni ke muitua noa ke he falu vala he Tohi Tapu. Ne talia he falu lotu e tau Tohiaga Tapu Heperu mo e tiaki e tau Tohiaga Tapu Heleni Kerisiano. Ko e falu lotu nakai mailoga e lautolu e tau Tohiaga Tapu Heperu, he pehe ai ko e tau Tohiaga Tapu Heleni Kerisiano ni e mena uho ne aoga.

Taha ai e aho ne kitia e Mr. D—— e tokoua ne kua fa e pala he uha mo e uiina a laua ke fakamalu he fale hana. Ko e Tau Fakamoli a Iehova a laua. Kua toto he hoana e tohi Revelation​—Its Grand Climax At Hand!a Ne ole agataha ai a Mr. D—— ki a laua ke age e tohi. Ke he logonaaga he Tau Fakamoli ko e mena hokulo lahi e tala he perofetaaga he Fakakiteaga to uka ai ki a ia, ti foaki atu e laua ki a ia e tohi kehe. Ka e ui na Mr. D—— ke age e tohi Revelation.

Ko e magaaho ne moua e ia hana lagakiaga, ne totou vave e ia e tohi. Ti talia ai mogoia a ia ke fakaako Tohi Tapu mo e Tau Fakamoli a Iehova. Kua nakai leva kua nava lahi a ia ke he tau mena moli ko e taofimau he Tau Fakamoli e Tohi Tapu katoa ko e mena mua atu. Ne kamata a ia ke fano tumau ke he tau feleveiaaga he Fale he Kautu he Tau Fakamoli a Iehova, ne kua ha ha i ai e kumikumiaga fakamitaki lahi ke he tau Tohiaga Tapu Heperu mo e tau Tohiaga Tapu Heleni Kerisiano. Ti ko ia he magaaho nei ko e tagata tukuogo he Kautu mo e ko e tagata papatiso he fakapotopotoaga Kerisiano.

[Matahui Tala]