Totou e Kupu he Atua mo e Fekafekau ki a Ia ke he Kupu Moli
“Iehova na e, kia fakakite mai e koe hau a puhala, to fano au ke he kupu moli mai ia koe.”—SALAMO 86:11, NW.
1. Ko e mena mua atu, ko e heigoa ne talahau he fufuta fakamua he mekasini nei hagaao ke he kupu moli?
NUKUA foaki mai e Iehova e maama mo e kupu moli. (Salamo 43:3) Kua foaki mai foki e ia e lotomatala ke totou hana Kupu, ko e Tohi Tapu, mo e ako e kupu moli. Ko e fufuta fakamua he senolo nei—Iulai 1879—kua talahau: “Ko e kupu moli, kua tuga e fiti tote fuluola he malamalaega he moui, kua agaagai ai mo e kua teitei ke apitia ai ha ko e tupu mitaki he tau pupu kelea. Kaeke ke moua ai e koe, kia lata ia koe ke mataala tumau. Kaeke ke kitia e koe hana a fuluola kua lata ia koe ke tatafi kehe e tau pupu kelea mo e tau akau totolo mahukihuki he fakatokoluga. Kaeke ke moua ai e koe kua lata ia koe ke tukutuku hifo ke moua ai. Kia nakai makona mo e taha ni e fiti he kupu moli. Kaeke ke lata ni he taha to nakai tufugatia foki falu. Kia fakatumau ke okooko mai, ke kumikumi atu foki.” Ke totou mo e fakaako e Kupu he Atua ka taute a tautolu ke moua e iloilo tonuhia mo e o he kupu moli hana.—Salamo 86:11, NW.
2. Ko e heigoa ne tupu he magaaho ne totou e Esera mo e falu e Matafakatufono he Atua ke he tau Iutaia i Ierusalema tuai?
2 He mole e liu fakatu hake he tau kaupa i Ierusalema he 455 F.V.N., ne totou he ekepoa ko Esera mo e falu e Matafakatufono he Atua ke he tau Iutaia. Ne mui mai he mena nei ko e Galue he Tau Fale Api, talahau fakatonu e tau agahala, mo e fakaoti aki “e maveheaga moli.” (Nehemia 8:1–9:38) Kua totou e tautolu: “Ti totou fakatekiteki ai e lautolu ke he tohi ke he fakatufono he Atua, mo e fakakite atu ai e lautolu e alito, ti maama ai e tau tagata ke he tau mena ne totou.” (Nehemia 8:8) Kua talahau he falu na nakai maama mitaki he tau Iutaia e vagahau Heperu ati liu fakamukamuka ai ke he vagahau Arama. Ka e kua nakai fakakite he tau kupu ko e fakamaamaaga noa ke he kakano he tau vagahau. Kua fakamaama e Esera mo e falu e Matafakatufono ke maeke he tau tagata ke iloa e tau matapatu fakaakoaga i ai mo e fakagahuahua ai. Kua taute foki e tau tohi Kerisiano mo e tau feleveiaaga ke ‘fakakite e alito’ he Kupu he Atua. Taute pihia foki e tau motua kotofa, ko lautolu “kua aga ke fakaako atu.”—1 Timoteo 3:1, 2; 2 Timoteo 2:24.
Tau Mena Aoga Tukulagi
3. Ko e heigoa e falu mena aoga ne moua mai he totou Tohi Tapu?
3 He magaaho ka totou auloa he tau magafaoa Kerisiano e Tohi Tapu, to liga ke moua e lautolu e tau mena aoga tukulagi. Kua eke ai a lautolu ke fakamahani mo e tau matafakatufono he Atua mo e ako e kupu moli hagaao ke he tau fakaakoaga, tau mena fakaperofeta, mo e falu matapatu tala. He oti e totou he taha vala he Tohi Tapu, liga to huhu e ulu he magafaoa: Kua lauia fefe a tautolu he mena nei? Ke he puhala fe kua matutaki e mena nei ke he falu fakaakoaga he Tohi Tapu? Maeke fefe ia tautolu ke fakaaoga e tau matakupu nei he fakamatala e tala mitaki? Kua maeke he magafaoa ke moua e iloilo lahi he magaaho totou Tohi Tapu kaeke ke taute e lautolu e kumikumiaga he fakaaoga e Watch Tower Publications Index po ke falu he tau matakupu fakakite. Ko e tau volume ua he Insight on the Scriptures kua maeke ke kumikumi ki ai mo e fai aoga.
4. Ko e puhala fe kua lata ia Iosua ke fakagahuahua e fakaakoaga ne tohi he Iosua 1:8?
4 Nukua maeke he tau matapatu fakaakoaga ne futiaki mai he tau Tohiaga Tapu ke hataki a tautolu he moui nei. Ke mua atu, ko e totou mo e fakaako e ‘Tohi Tapu kua maeke ke fakailoilo a tautolu ke moua e moui.’ (2 Timoteo 3:15) Kaeke ke toka e tautolu e Kupu he Atua ke hataki a tautolu, to fakatumau a tautolu ke o ke he kupu moli hana mo e to fakakatoatoa ai e tau manako tututonu ha tautolu. (Salamo 26:3; 119:130) Ka e, kua lata ia tautolu ke kumi e maamaaga, tuga e hukui ha Mose, ko Iosua. Kua nakai ke uta kehe e “tohi he fakatufono” mai he gutu hana, mo e ke totou ai e ia ke he aho mo e po. (Iosua 1:8) Ke nakai taute e “tohi he fakatufono” ke uta kehe mai he gutu hana, ko e pehe a ia, kua nakai lata ia Iosua ke tiaki e fakamatala ke he falu hagaao ke he tau fakaakoaga ne talahau i ai. Ke totou e Matafakatufono ke he aho mo e po, ko e kakano, kua lata ia Iosua ke manamanatu fakahokulo ki ai, ke fakaako ai. Kua talahau pihia foki he aposetolo ko Paulo ki a Timoteo ke “manamanatu”—manamanatu fakahokulo ke he—hana a mahani, fekafekauaga, mo e fakaakoaga. Ha ko e motua Kerisiano, kua lata ia Timoteo ke mua atu e fakaeneene ke eke e moui hana mo fakafifitakiaga mo e kua fakaako ai e ia e kupu moli faka-Tohiaga Tapu.—1 Timoteo 4:15.
5. Ko e heigoa e mena kua lata kaeke ke moua e tautolu e kupu moli he Atua?
5 Ko e koloa uho e kupu moli he Atua. Ke moua ai kua lata he kelikeli, ke fakauka ke kumikumi ke he tau Tohiaga Tapu. Ka taute ni ke tuga e tau tama he Fakaako Homo Ue Atu ka moua ai e tautolu e pulotu mo e hohoko mai ke maama e matakutaku fakalilifu ki a Iehova. (Tau Fakatai 1:7; Isaia 30:20, 21, fakatatai NW.) Moli, kua lata ia tautolu ke fakatonu e tau mena ko e mai he tau faka-Tohiaga Tapu. (1 Peteru 2:1, 2) Ko e tau Iutaia i Perea kua “mua e mahani mitaki ha lautolu nai ke he tau tagata Tesalonia; ha kua talia e lautolu e kupu mo e loto makutu, kua kumikumi ke he tau Tohi ke he taha aho mo e taha aho, po ke moli e tau mena ia” ne talahau e Paulo. Nukua nava ka e nakai akonaki e tau Perea he taute e mena nei.—Gahua 17:10, 11.
6. Ko e ha ne fakakite ai e Iesu e nakai fai aoga ke he falu Iutaia ne kumikumi ke he Tohi Tapu?
6 Ne tala age e Iesu ke he falu Iutaia: “Kia kumikumi a mutolu ke he tau Tohi, ha ko e mena kua manatu a mutolu, ke moua ai e mutolu e moui tukulagi; ko e tau Tohi foki ia kua talahau a au. Ka e nakai mafai a mutolu ke o mai kia au ke moua ai e mutolu e moui.” (Ioane 5:39, 40) Kua kumi e lautolu e tau Tohiaga Tapu mo e manatu hako—he piko to takitaki he tau mena nei a lautolu ke he moui. Kua moli lahi, ko e haia he tau Tohiaga Tapu e tau perofetaaga faka-Mesia ne tuhi atu ki a Iesu, ko e puhala he moui. Ka e nakai talia he tau Iutaia a ia. Ti kua nakai aoga e kumikumiaga ha lautolu ke he tau Tohiaga Tapu.
7. Ko e heigoa e mena kua lata ke moua ke tupu e maamaaga he Tohi Tapu, mo e ko e ha?
7 Ke tupu ki mua ha tautolu a maamaaga ke he Tohi Tapu, kua lata a tautolu ke moua e takitakiaga he agaga, po ke malolo gahuahua he Atua. “Ko e mena kumi hifo he Agaga e tau mena oti, ko e tau mena hokulo ia he Atua” ke moua mai e kakano he tau mena ia. (1 Korinito 2:10) Ko e tau Kerisiano i Tesalonia kua “kamatamata e tau mena oti” ke he ha perofetaaga ne logona e lautolu. (1 Tesalonia 5:20, 21) He magaaho ne tohi a Paulo ke he tau Tesalonia (kavi he 50 V.N.), ko e vala hokoia ni he tau Tohiaga Tapu Heleni kua fita he tohi ko e Evagelia ha Mataio. Ti ke maeke ai he tau Tesalonia mo e tau Perea ke iloa moli e tau mena oti, liga he kumikumi ke he liliuaga Septuagint Heleni he tau Tohiaga Tapu Heperu. Kua lata ia lautolu ke totou mo e fakaako e tau Tohiaga Tapu, ti pihia foki a tautolu.
Aoga Lahi ma e Tau Tagata Oti
8. Ko e ha kua lata e tau motua kotofa ke mua atu e iloilo ke he Tohi Tapu?
8 Kua lata e tau motua kotofa ke mua atu e iloilo ke he Tohi Tapu. Kua lata ia lautolu ke “aga ke fakaako atu” mo e kua lata ke “taofi mau ke he kupu moli.” Nukua taute e leveki ko Timoteo ke “fakatokatoka fakahako e kupu moli.” (1 Timoteo 3:2; Tito 1:9; 2 Timoteo 2:15) Ko e hana matua fifine, ko Eunike, mo e hana a matua fifine tupuna ko Loi ne fakaako a ia ke he tau fakaakoaga tapu mai he vaha mukemuke, ti tuku ki loto hana e “tua fakamoli,” pete ni ko e tagata nakai tua e matua tane hana. (2 Timoteo 1:5; 3:15) Kua lata e tau mamatua tane ke feaki e fanau ha lautolu “ke he tau kupu akonaki mo e tau kupu fakamafana he Iki,” ti mua atu ke lata e tau motua ko e tau mamatua tane ‘he fanau kua tua ne nakai holifono po ke nakai hokotaki a lautolu kua matahavala.’ (Efeso 6:4; Tito 1:6) Ti, pete ni ko e heigoa ha tautolu a tau tuaga, kua lata ia tautolu ke mailoga e hokulo ke totou, fakaako, mo e fakagahuahua e Kupu he Atua.
9. Ko e ha ne fakaako ai e Tohi Tapu he fakalataha atu mo e tau katofia Kerisiano?
9 Kua lata foki ia tautolu ke fakaako e Tohi Tapu he fakalataha atu mo e ha tautolu a katofia talitonu. Kua manako a Paulo ke he tau Kerisiano i Tesalonia ke fefakatutalaaki hana a fakatonuaga. (1 Tesalonia 4:18) Ke fakamata e maamaaga ha tautolu ke he kupu moli, kua nakai fai mena mitaki foki mai he fakalataha atu ke he falu tagata makutu ne kumikumi ke he tau Tohiaga Tapu. Kua moli ai e tala fakatai: “Kua fakamata ai e lapatoa ke he lapatoa, kua fakamalolo foki pihia e tagata ke he hana kapitiga.” (Tau Fakatai 27:17) Na maeke e kanavaakau lapatoa ke hi kaeke ke nakai fakaaoga po ke ke fakamata tumau. Ke tuga ia, kua lata ke feleveiaaki tumau mo e fefakamataaki he tufatufa e iloilo ne moua e tautolu mai he totou, fakaakoaga, mo e he manamanatu fakahokulo ke he kupu moli he Kupu he Atua. (Heperu 10:24, 25) Mua atu, ko e taha puhala anei ke iloa moli ko e moua e tautolu e aoga mai he tau lupalupa he maama fakaagaga.—Salamo 97:11; Tau Fakatai 4:18.
10. Ko e heigoa e kakano ke fakatau o mo e kupu moli?
10 Ke he ha tautolu a fakaakoaga ke he tau Tohiaga Tapu, kua maeke ia tautolu ke liogi fakatonu ke he Atua ke tuga e salamo: “Kia fakafano mai hau a maama mo e hau a tonu, to takitaki e laua au.” (Salamo 43:3) Kaeke ke manako a tautolu ke moua e taliaaga he Atua, kua lata ia tautolu ke o ke he hana a kupu moli. (3 Ioane 3, 4) Kua putoia e mena nei ke taofi mau hana tau poakiaga mo e fekafekau ki a ia mo e tua mo e fakamoli. (Salamo 25:4, 5; Ioane 4:23, 24) Kua lata a tautolu ke fekafekau ki a Iehova ke he kupu moli, tuga ne fakakite mai he Kupu hana mo e kua fakamaaliali mai he tau tohi he “fekafekau fakamoli mo e loto matala.” (Mataio 24:45-47) Kua lata e mena nei ma e iloilo tonuhia he tau Tohiaga Tapu. Ti, maeke fefe mogoia ia tautolu ke totou mo e fakaako e Kupu he Atua? Kua lata nakai ia tautolu ke kamata e totou ki ai mai he Kenese veveheaga 1, kupu 1, ati katoatoa e tau tohi 66? E, kua lata e tau Kerisiano oti ne moua e Tohi Tapu katoa he hana a vagahau ke totou ki ai mai he Kenese ke he Fakakiteaga. Ti ko e ha tautolu a foliaga he totou e Tohi Tapu mo e tau tohi Kerisiano, kua lata ke fakatolomaki e maamaaga ha tautolu ke he lahi he kupu moli he Tohiaga Tapu, ne tuku mai he Atua he puhala he “fekafekau fakamoli.”
Totou Fakalahi e Kupu he Atua
11, 12. Ko e ha kua aoga ai ke totou fakalahi e Tohi Tapu he tau feleveiaaga?
11 Liga ke totou mo e nakai fai leo a tautolu he magaaho ka tokotaha ai. Ka e, he tau vaha i tuai, kua totou fakalahi e totouaga fakatagata. Tuga e eunuka Aitiope ne heke he hana a kariota, ati fanogonogo ai he evagelia ko Filipo a ia ne totou mai he perofetaaga ha Isaia. (Gahua 8:27-30) Ko e kakano ne mua atu he kupu Heperu ne fakaliliu “totou” ko e “tuogo.” Ti ko lautolu ne nakai maeke fakamua ke totou mo e nakai fai leo mo e ke moua e kakano he totouaga, kua nakai lata ke fakalolelole mai he fakaleo fakalahi e tau kupu takitaha. Ko e mena ne mua ke ako e kupu moli he totou e Kupu tohia he Atua.
12 Ko e mena aoga lahi ke totou fakalahi e Tohi Tapu he tau feleveiaaga Kerisiano. Ne fakamafana he aposetolo ko Paulo hana a hoa gahua ko Timoteo: “Kia hagaaki totou tohi a koe ti tomatoma atu, ti fakaako atu.” (1 Timoteo 4:13) Ne talahau e Paulo ke he tau Kolose: “Ka oti he totou e mutolu e tohi nai, kia uta ai ke totou ke he ekalesia i Laotikaia, kia totou foki e mutolu e tohi mai he ekalesia i Laotikaia.” (Kolose 4:16) Mo e he Fakakiteaga 1:3 kua pehe: “Uhoaki a ia kua totou, katoa mo lautolu kua fanogonogo ke he tau kupu he perofetaaga nai, mo e omaoma ke he tau mena kua tohi ai; ka kua tata mai e vaha.” Ha kua pihia, kua lata ia ia ne lauga ke he tau tagata ke totou e tau kupu mai he Tohi Tapu ke lagomatai aki e mena ne talahau e ia ke he fakapotopotoaga.
Puhala Fakaako Fakamatakupu
13. Ko e heigoa e puhala holo ki mua lahi he fakaako e tau kupu moli he Tohi Tapu, mo e ko e heigoa ka lagomatai a tautolu ke moua e tau kupu Tohi Tapu?
13 Ko e fakaako fakamatakupu ko e puhala ne mua atu e holo ki mua he fakaako e tau kupu moli he Tohi Tapu. Ko e tau tohi fakaatuatu kupu, ne tohia fakapapahi hifo e tau kupu Tohi Tapu he tau fakatokatokaaga i ai hagaao ke he tohi, veveheaga, mo e kupu, kua taute fakamukamuka ai ke moua e tau kupu Tohi Tapu ne matutaki atu ke he taha matapatu tala. Mo e ko e tau kupu Tohi Tapu pihia kua maeke ke felauaki ha kua nakai fekehekeheaki e Punaaga he Tohi Tapu. Mai he agaga tapu, nukua omoomoi e ia 40 e tagata tane ke tohia e Tohi Tapu ke he vaha he tau senetenari 16, mo e fakaako fakamatakupu ki ai ko e puhala kamatamata-magaaho ke ako e kupu moli.
14. Ko e ha ke fakaako fakalataha e tau Tohiaga Tapu Heperu mo e Heleni Kerisiano?
14 Ko e ha tautolu a fakaaue ma e kupu moli he Tohi Tapu kua lata ke omoi aki a tautolu ke totou mo e fakaako e tau Tohiaga Tapu Heleni Kerisiano fakalataha mo e tau Tohiaga Tapu Heperu. To fakakite he mena nei e puhala ne tutaki ai e tau Tohiaga Tapu Heleni mo e finagalo he Atua mo e to fakamaama e tau perofetaaga he Tohiaga Tapu Heperu. (Roma 16:25-27; Efeso 3:4-6; Kolose 1:26) Lahi e lagomatai ke he mena nei ko e New World Translation of the Holy Scriptures. Kua tauteute ai he tau fekafekau tukulele he Atua ko lautolu ia ne fakaaoga e iloilo tupu tolomaki ne ha ha i ai ne hagaao ke he kupu Tohi Tapu he kamataaga mo e ke he hana tau kupu halatua mo e tau talahauaga kehekehe. Kua aoga lahi, foki, e tau fakaakoaga lagomatai ke he Tohi Tapu ne foaki e Iehova, kakano mai “he fekafekau fakamoli mo e loto matala.”
15. Maeke fefe ia koe ke fakakite ko e mena lata ke fatiaki mai he tau vala kehekehe he Tohi Tapu?
15 Liga to pehe falu, ‘Taute he tau tohi ha mutolu e tau afe he tau fatiakiaga mai he Tohi Tapu, ka ko e ha ne tamai e mutolu e tau mena nei he tau vala kehekehe?’ He fatiaki mai he tau vala kehekehe i loto he tau tohi 66 he Tohi Tapu, kua hagaao atu e tau tohi ke he tau tagata fakamoli toko gahoa ne omoomoi he agaga ke kitia maali e moli lahi he fakaakoaga. Na taute ni e Iesu e puhala nei he fakaakoaga. He magaaho ne foaki e ia hana Lauga he Mouga, ne 21 e tau fatiakiaga ne taute e ia mai he tau Tohiaga Tapu Heperu. Kua ha ha he lauga ia tolu e tau fatiakiaga mai ia Esoto, ua mai he Levitika, taha mai he Numera, ono mai he Teutaronome, taha mai he Tau Patuiki ke Ua Aki, fa mai he Tau Salamo, tolu mai he Isaia, mo e taha mai he Ieremia. He taute ai e mena nei, kua ‘lali kia a Iesu ke fakamoli ni ha mena’? Nakai, ha kua “fakaako a ia kia lautolu tuga ne taha ha i ai e pule, ka e nakai tuga e tau tohikupu.” Kua pihia ai ha kua omoi e Iesu hana fakaakoaga aki e pule he Kupu tohia he Atua. (Mataio 7:29) Ti taute pihia foki he aposetolo ko Paulo.
16. Ko e heigoa e tau fatiakiaga faka-Tohiaga Tapu ne taute e Paulo he Roma 15:7-13?
16 I loto he fahi kupu Tohi Tapu ne moua ia Roma 15:7-13, kua fatiaki mai a Paulo he tau fufutaaga tolu he tau Tohiaga Tapu Heperu—he Matafakatufono, he tau Perofeta, mo e he tau Salamo. Fakakite ai e ia to fakaheke he tau Iutaia mo e tau Tagata Motu Kehe e Atua, mo e kua lata ai he tau Kerisiano ke fetaliaki e tau tagata he tau motu oti. Kua pehe a Paulo: “Kia fetaliaki a mutolu ko e taha kia taha, tuga foki a Keriso ne talia e ia a tautolu, kia hoko ai e fakahekeaga ke he Atua. Kua pehe atu au, kua eke a Iesu Keriso mo fekafekau he peritome ha ko e fakamoli he Atua, kia fakamoli ai e tau mena ne talahaua tuai ke he tau tupuna; kia fakaheke e tau motu kehe ke he Atua ha ko e fakaalofa, tuga he tohi mai [ia Salamo 18:49], ko e mena ia ke talahaua ai e au a koe ki mua he tau motu kehe, to lologo atu foki au ke he hau a higoa. Ti pehe mai foki a ia [ia Teutaronome 32:43], kia fiafia a mutolu ko e tau motu kehe fakalataha mo e hana motu; mo e pehe foki [ia Salamo 117:1], kia fakaheke atu ke he Iki a mutolu ko e tau motu kehe oti, kia nava atu kia ia a mutolu ko e tau tagata oti kana. Ti pehe mai foki a Isaia [11:1, 10], to ha i ai e Vaka akau ko Iese, ko ia foki ke tu mai ke pule ke he tau motu kehe; to amaamanaki kia ia e tau motu kehe. Ko e Atua foki hana e amaamanaki, kia fakapuke e ia a mutolu ke he olioli oti, katoa mo e mafola, ha ko e tua; kia ha ha ia mutolu e amaamanaki kua lahi ue atu ke he mana he Agaga Tapu.” Ha ko e puhala fakamatakupu nei, kua fakakite ai e Paulo e puhala ke fatiaki e tau kupu Tohi Tapu ke moua tonu e tau kupu moli he Tohi Tapu.
17. Ke felauaki mo e fakatokatokaaga fe ne fatiaki mai he tau Kerisiano e tau vala kehekehe i loto he Tohi Tapu katoa?
17 Kua ha ha he tohi fakamuaaki ha Peteru ne omoomoi he agaga, 34 e tau fatiakiaga mai he tau tohi hogofulu he Matafakatufono, he tau Perofeta, mo e he tau Salamo. I loto he tohi ke ua aki hana, ne laga ono e fatiaki mai a Peteru he tau tohi tolu. He Evagelia ha Mataio kua ha ha i ai 122 e tau fatiakiaga mai he Kenese ki a Malaki. I loto he tau tohi ne 27 he tau Tohiaga Tapu Heleni, ko e 320 e tau fatiakiaga tonu mai he Kenese ki a Malaki mo e tau teau foki he falu fakamoliaga ke he tau Tohiaga Tapu Heperu. Ke felauaki mo e fakatokatokaaga ne taute e Iesu mo e muitua ki ai hana tau aposetolo, he magaaho ne taute ai he tau Kerisiano he vaha fou nei e fakaako fakamatakupu he tala faka-Tohiaga Tapu, ne futiaki mai a lautolu he tau vala kehekehe i loto he Tohi Tapu katoa. Kua lata lahi e mena nei he “tau aho fakamui” nei, ko e magaaho ne fakamoli ai e laulahi he tau Tohiaga Tapu Heperu mo e Heleni. (2 Timoteo 3:1) Kua lahi e fakaaogaaga pihia he “fekafekau fakamoli” e Tohi Tapu ke he tau tohi i ai, ka e nakai lagataha ke lafilafi ke he Kupu he Atua po ke uta kehe mai ai.—Tau Fakatai 30:5, 6; Fakakiteaga 22:18, 19.
Tumau ke Fakatau O ke he Kupu Moli
18. Ko e ha ke ‘o ai ke he kupu moli’?
18 Kua nakai lata ia tautolu ke uta kehe mai ha mena he Tohi Tapu, ha ko e tau fakaakoaga Kerisiano katoa i loto he Kupu he Atua ko e “kupu moli” po ke “kupu moli he vagahau mitaki” a ia. Ko e fakapiki ke he kupu moli nei—“fakatau o” ki ai—kua aoga lahi ma e fakamouiaga. (Kalatia 2:5; 2 Ioane 4, NW; 1 Timoteo 2:3, 4) Ha ko e “puhala he kupu moli” e faka-Kerisiano, ke lagomatai atu ke he falu ke fakalaulahi hana fioiaaga, kua taute a tautolu mo “tau lagomatai ke he kupu moli.”—2 Peteru 2:2; 3 Ioane 8.
19. Maeke fefe ia tautolu ke “fakatau o mo e kupu moli”?
19 Kaeke a tautolu ke “fakatau o mo e kupu moli,” kua lata ia tautolu ke totou e Tohi Tapu mo e fakaaoga e tautolu e lagomatai fakaagaga ne foaki mai he Atua he puhala mai he “fekafekau fakamoli.” (3 Ioane 4, NW) Kia taute ai e tautolu e mena nei ke mitaki ni a tautolu mo e ke hoko atu ke he tuaga ke fakaako e falu hagaao ke he Atua ko Iehova, Iesu Keriso, mo e finagalo faka-Atua. Ati lata ia tautolu ke fakaaue ko e agaga ha Iehova ne lagomatai a tautolu ke maama hana Kupu mo e kautu mai he fekafekau ki a ia ke he kupu moli.
Ko e Heigoa Hau a Tau Tali?
◻ Ko e heigoa e falu mena aoga tukulagi he totou e Tohi Tapu?
◻ Ko e ha ne fakaako e Tohi Tapu he fakalataha mo e tau katofia tua?
◻ Ko e ha ne mitaki ke fatiaki mai he tau vala kehekehe he Tohi Tapu katoa?
◻ Ko e heigoa e kakano ke ‘o ke he kupu moli,’ mo e maeke fefe ia tautolu ke taute pihia?
[Fakatino he lau 15]
Ma tau mamatua, fakaako e tau Tohiaga Tapu ke he fanau ha mutolu
[Fakatino he lau 16]
I loto he hana Lauga he Mouga, ne fatiaki mai e Iesu e tau vala kehekehe he tau Tohiaga Tapu Heperu