Talia e Tohi Tapu ha ko e Mena Moli ni Ai

“Ko e mena ia kua fakaaue atu foki a mautolu ke he Atua nakai noa, ha kua talia e mutolu e kupu he Atua ne fanogonogo mai ai a mutolu kia mautolu, ti talia ai e mutolu nakai ko e kupu he tau tagata, ka ko e kupu he Atua, (ko e moli ni haia,) kua gahua ai ni i loto ia mutolu kua tua.”​—1 TESALONIA 2:13.

1. Ko e tau faga fakailoaaga fefe he Tohi Tapu ne eke ai e tohi ia ke mua atu moli?

KO E Tohi Tapu e tohi ne mua atu e fakaliliu mo e tufatufa lahi he lalolagi. Mailoga lahi he tau tagata ko e taha mai he tau tohi lalahi kua taute. Ka e mua atu ni, ko e Tohi Tapu ne foaki mai e takitakiaga kua lata lahi mahaki mo e tau tagata lanu kehekehe oti mo e tau motu oti, pete ni ko e heigoa ha lautolu a tau gahua po ke tuaga he moui. (Fakakiteaga 14:6, 7) Ke he puhala kua fakamakona e loto manamanatu mo e loto, kua tali he Tohi Tapu e tau huhu tuga e huhu nai: Ko e heigoa e kakano he moui he tagata? (Kenese 1:28; Fakakiteaga 4:11) Nakai maeke he ha e tau fakatufono he tagata ke tamai e mafola mo e nakai haofia kua mau tumau? (Ieremia 10:23; Fakakiteaga 13:1, 2) Mamate he ha e tau tagata? (Kenese 2:15-17; 3:1-6; Roma 5:12) He vahaloto he lalolagi matematekelea nei, maeke fefe ia tautolu ke fahia ke kautu lahi mai he tau mena vihi he moui? (Salamo 119:105; Tau Fakatai 3:5, 6) Ko e heigoa ne toka he vaha i mua ma tautolu?​—Tanielu 2:44; Fakakiteaga 21:3-5.

2. Ko e ha ne foaki mai ai he Tohi Tapu e tau tali moli katoatoa ke he tau huhu ha tautolu?

² Ko e ha kua tali ai he Tohi Tapu e tau huhu pihia mo e fai malolo? Kakano ha ko e Kupu he Atua. Fakaaoga e ia e tau tagata ke tohi hifo, ka e tuga kua talahau fakamahino mai ia 2 Timoteo 3:16, “ko e tau Tohi Tapu oti kana mai he Agaga he Atua ia.” Nakai tupu mai he maamaaga ni he taha tagata ke he tau mena tutupu he tagata. “Ha ko e mena nakai ko e loto he tau tagata ne tuku mai ai e tau perofetaaga [tau fakapuloaaga he tau mena ka hoko mai, tau poakiaga faka-Atua, tuaga he mahani mitaki he Tohi Tapu] i tuai, ka ko e tau tagata tapu he Atua ne vagavagahau mai he omoi a lautolu he Agaga Tapu.”​—2 Peteru 1:21.

3. (a) Talahau e tau fakafifitakiaga ne fakakite mai ko e uho lahi e Tohi Tapu ke he tau tagata he tau motu kehekehe. (e) Ko e ha ne manako ai e tau tagata ke tuku ha lautolu a tau momoui ke he hagahaga kelea ke maeke ke totou e tau Tohiaga Tapu?

³ He loto fakaaue lahi ke he mena uho he Tohi Tapu, kua tokologa e tau tagata ne toka noa e tau momoui ke he hagahaga kelea he fale pouli, mo e ke he mate foki, ke moua mo e totou ai. Kua pihia moli e mena ne tupu he tau tau kua mole he motu Katolika ko Sepania, mena matakutaku e vahega fekafekau lotu to lolelole ha lautolu a malolo ke he tau tagata kaeke kua totou he tau tagata e Tohi Tapu ke he ha lautolu ni a vagahau; kua moli pihia foki ki Alapania, ne taute he fakatufono pule okooko nakai tali tonu Atua e tau mena kelea lahi, he lali ke fakaoti e tau malolo fakalotu oti kana. Ka e, ofania he tau tagata ne matakutaku Atua e tau lagaki he tau Tohiaga Tapu, kua totou ai, mo e fetutalaaki ai e taha ke he taha. He magahala he Felakutaki II he Lalolagi, i Sach­sen­hau­sen ko e kemu pagota lahi, kua uta fufu lahi e Tohi Tapu mai he taha poko puipui ke he taha poko puipui (pete ni kua fakatapu e mena nei), mo e ko lautolu ne maeke ke moua ai kua ako manatu e tau maaga tohi ke tala age ke he falu. He magahala he atu tau he 1950, ke he fahi ne iloa he magaaho ia ko Sihamani Uta Komunisi, ko e Tau Fakamoli a Iehova ne kua tuku he tau fale pouli kakano ha ko e tua ha lautolu kua toka noa ai a lautolu ke he hagahaga kelea ke nonofo leva he poko puipui lahi ka tuku age ki a lautolu e tau maaga tohi ikiiki he Tohi Tapu mai he taha pagota ke he taha ke totou he po. Ko e ha ne ­taute ai e lautolu? Kakano he mailoga e lautolu ko e Kupu he Atua e Tohi Tapu, mo e iloa e lautolu “nakai ko e mena kai hokoia” ka ko e “tau mena oti ne fakato mai he fofoga he Atua ke moui ai e tagata.” (Teutaronome 8:3) Ko e tau kupu nei, ne fakamau i loto he Tohi Tapu, ne lagomatai e Tau Fakamoli ia ke tumau e moui fakaagaga pete ni kua hohoko e tau mahani vale lahi mahaki ki a lautolu.

4. Kua lata ke ha ha i fe e Tohi Tapu he tau momoui ha tautolu?

⁴ Ko e Tohi Tapu nakai ko e tohi ke tuku noa he fatapepa ke fakatonu ni ki ai he falu magaaho, po ke fakaaoga ni hokoia ka tolo auloa e tau faoa he tua ke tapuaki. Kua lata ai ke fakaaoga he tau aho oti ke kitia e maamaaga kua lata mo e tau tutuaga kua fehagai mo tautolu mo e fakakite mai ai ki a tautolu e puhala hako ke o ai.​—Salamo 25:4, 5.

Lata ke Totou mo e Maama

5. (a) Kaeke kua maeke, kua lata a tautolu oti ke moua e heigoa? (e) I Isaraela tuai, iloa fefe he tau tagata e tau mena ne toka i loto he tau Tohiaga Tapu? (i) Lauia fefe e Salamo 19:7-11 hau a aga ke he totouaga Tohi Tapu?

⁵ He vaha ha tautolu, kua mukamuka lahi e tau lagaki he Tohi Tapu ke moua he tau motu loga, mo e ole fakamakamaka a mautolu ke he tau tagata oti ne totou e Ko e Kolo Toko ke fakatau taha lagaki. He vaha ne tohi e Tohi Tapu, nakai fai lakau lomi tohi he magaaho ia. Kua tokologa e tau tagata ne nakai fai lagaki a lautolu. Ka kua fakatokatoka e Iehova ma e hana tau fekafekau ke logona e tau mena kua fita he tohia. Kua hokotaki mai ia Esoto 24:7, he mole he tohi hifo e Mose e tau mena ne talahau e Iehova, “ne uta foki e [ia] e tohi he maveheaga mo e totou ki mua he motu.” Ha kua fita he kitia mata e tau fakatataaga mana he Mouga ko Sinai, ne mailoga e lautolu e tau mena ne totou e Mose ki a lautolu ko e mai he Atua mo e kua lata a lautolu ke iloa e fakailoaaga nei. (Esoto 19:9, 16-19; 20:22) Kua lata foki a tautolu ke iloa e tau mena ne tohi he Kupu he Atua.​—Salamo 19:7-11.

6. (a) Fakamua to huhu atu e motu a Isaraela ke he Motu he Maveheaga, ko e heigoa ne taute e Mose? (e) To maeke fefe ia tautolu ke fifitaki ke he fakafifitakiaga a Mose?

⁶ He tauteute e motu Isaraela ke o ke he taha fahi he Vailele Ioritana ke huhu atu ke he Motu he Maveheaga, he toka ai ha lautolu a moui pefano he tutakale, kua lata lahi a lautolu ke liu kikite foki ke he Matafakatufono a Iehova mo e hana tau gahua ki a lautolu. He omoi he agaga he Atua, ne liu a Mose kikite fakalataha mo lautolu ke he Matafakatufono. Kua fakamanatu atu e ia ki a lautolu e tau mena fakamatafeiga he Matafakatufono, mo e omoi hake foki e ia e tau matapatu fakaakoaga mo e tau aga ka lauia ha lautolu a fakafetuiaga mo Iehova. (Teutaronome 4:9, 35; 7:7, 8; 8:10-14; 10:12, 13) He talia e tautolu he vaha nei e tau kotofaaga fou po ke fehagai mo e tau tutuaga fou he moui, kua aoga lahi ki a tautolu foki ke manamanatu ko e maeke fefe he tau Tohiaga Tapu ke lauia e tau mena ne taute e tautolu.

7. He nakai leva he o e tau Isaraela ke he taha fahi he Vailele a Ioritana, ko e heigoa ne taute ke hu mau e Matafakatufono a Iehova ke he tau loto manamanatu mo e tau loto ha lautolu?

⁷ Nakai leva e mole he hohoko atu a Isaraela ke he taha fahi he Vailele ko Ioritana, ne liliu foki e tau tagata ke fakapotopoto ke kikite foki ke he tau mena ne tala age e Iehova ki a lautolu mai ia Mose. Ne fakapotopoto e motu he matakavi kua teitei ke 50 e kilomita ke he fahi tokelau a Ierusalema. Kua hafa e tau faoa ne ha ha i mua he Mouga Evalu, mo e hafa i mua he Mouga Keresema. Ko e matakavi ia ne “totou ai e [Iosua] e tau kupu oti he fakatufono, ko e monuina mo e malaia.” Kua liliu ai e tau tagata tane, tau fifine, mo lautolu kua ikiiki, fakalataha mo e tau tagata motu kehe, ke logona he magaaho tonu ia e fatiakiaga he tau matafakatufono ke he tau mahani ka fua mai e nakai fakafiafia a Iehova mo e tau monuina ka moua e lautolu kaeke kua omaoma a lautolu ki a Iehova. (Iosua 8:34, 35) Kua lata ia lautolu ke ha ha mahinohino ke he tau loto manamanatu ko e heigoa e mena mitaki mo e ko e heigoa e mena kelea ke he onoonoaga a Iehova. Ke lafi ki ai, kua lata ia lautolu ke hu mau he tau loto ha lautolu e manako lahi ke he mena mitaki mo e vihiatia ke he mena kelea, ko e mena ia foki kua lata ia tautolu takitokotaha he vaha nei.​—Salamo 97:10; 119:103, 104; Amosa 5:15.

8. Ko e heigoa e aoga he totou fakamagaaho e Kupu he Atua he tau toloaga pauaki fakamotu i Isaraela?

⁸ Ke lafi ke he tau totouaga he Matafakatufono he tau magaaho mahuiga ia he fakamauaga tala tuai, kua tohia foki e tau mena ma e tau totouaga tumau he Kupu he Atua ia Teutaronome 31:10-12. He tau tau ke fitu aki oti, kua lata e motu katoa ke fakapotopoto ke logona e totouaga he Kupu he Atua. Kua foaki atu he mena nei e tau mena kai fakaagaga ki a lautolu. Kua maeke ke gahuahua tumau he tau loto manamanatu mo e tau loto ha lautolu e tau maveheaga hagaao ke he Tega mo e kua aoga lahi ai ke takitaki a lautolu ne mahani fakamoli ke he Mesia. Ko e tau fakatokatokaaga ma e fagaiaga fakaagaga, ne fakatu he magaaho ne ha ha ai e tau Isaraela he tutakale kua nakai oti he magaaho ne huhu atu a lautolu ke he Motu he Maveheaga. (1 Korinito 10:3, 4) Ka e, kua mua atu e uho he Kupu he Atua ha kua lafi atu ai e tau fakakiteaga he tau perofeta.

9. (a) Ko e magaaho ni kia ne tolo fakalataha e tau Isaraela ke he tau matakau lalahi ne totou e lautolu e tau Tohiaga Tapu? Fakamaama. (e) Maeke fefe ke foaki atu e tau fakaakoaga mai he Tohiaga Tapu ke he magafaoa oti, mo e heigoa ne foli ki ai?

⁹ Ko e fakamanatuaga ke he tau fakatonuaga he Kupu he Atua nakai ko e mena taute fakamahao ni ke he tau magaaho ka tolo fakalataha ne tau tagata ke he tau matakau lalahi. Kua lata ke tutala ke he tau maaga tohi he Kupu he Atua mo e tau matapatu fakaakoaga ne toka i ai he tau aho oti. (Teutaronome 6:4-9) Kua loga lahi e tau matakavi he vaha nei kua maeke e tau tagata fuata ke fai lagaki he Tohi Tapu, mo e aoga lahi foki ki a lautolu ke fai mena pihia. Ka e i Isaraela i tuai, kua nakai pihia. He vaha i tuai, ka tala age he tau mamatua e tau fakaakoaga mai he Kupu he Atua, kua falanaki ni a lautolu ke he tau mena ne ako manatu e lautolu mo e tau kupu moli ne kua ofania e lautolu he tau loto ha lautolu, fakalataha mo e tau mena ikiiki oti kua liga maeke ia lautolu ni ke tohi hifo. He liu ke talahau tumau, kua maeke ai a lautolu ke ati hake ke he loto he tau fanau ha lautolu e fakaalofa ki a Iehova mo e hana tau puhala. Kua nakai foli ke iloa lahi ke he ulu ka ke lagomatai a lautolu takitokotaha he magafaoa ke eke e tau puhala momoui ke fakakite e fakaalofa ki a Iehova mo e hana Kupu.​—Teutaronome 11:18, 19, 22, 23.

Totou Tohiaga Tapu he Tau Sunako

10, 11. Ko e heigoa e fakaholoaga totou Tohiaga Tapu ne muitua ki ai he tau sunako, mo e fefe e onoonoaga a Iesu ke he tau magaaho nei?

¹⁰ He taha magaaho ne mole he fakapaea e tau Iutaia ki Papelonia, kua fakatu ai e tau sunako mo tau fale tapuaki. Ke maeke ai ke totou mo e tutala ke he Kupu he Atua he tau fale feleveia nei, kua loga e tau lagaki he tau Tohiaga Tapu ne taute. Ko e mena moli a nei ne hao mai ai e tau lagaki tohi tohia lima ne teitei ke 6,000 e tau maaga tohi he tau Tohiaga Tapu Heperu ne toka ai.

¹¹ Ko e vala aoga lahi he fekafekauaga he sunako ko e totou he Toraha, ko e mena kua tatai mo e tau tohi lima fakamua he tau Tohi Tapu he vaha nai. He hokotaki mai ia Gahua 15:21 kua taute e tau totouaga pihia he tau aho Sapati oti he senetenari fakamua he V.N., mo e kua fakakite mai he Mishnah he magaaho ne hoko atu ke he senetenari ke ua aki, kua ha ha i ai foki e tau totouaga he Toraha he aho ua mo e ke lima aki he fahi tapu. Kua tokologa e tau tagata ne taute auloa e tau totouaga he totou fakafetokaki e tau maaga tohi ne kotofa. Ko e aga fakamotu he tau Iutaia ne nonofo i Papelonia, ke totou oti e Toraha he tau tau oti; ka ko e aga fakamotu i Palesitaina ke fakaveha ke molea e tolu tau ka taute ai e tau totouaga. Kua totou mo e fakamaama atu foki e taha maaga tohi mai he tau Perofeta. Ko e aga tuai ha Iesu ke fakalataha atu ke he tau fakaholoaga totou Tohi Tapu he tau aho Sapati he matakavi ne nofo a ia.​—Luka 4:16-21.

Gahua mo e Fakaaogaaga Fakatagata

12. (a) He magaaho ne totou e Mose e Matafakatufono ke he tau tagata, fefe e aoga ke he tau tagata? (e) Ti tali atu fefe e tau tagata?

¹² Ko e totou he tau Tohiaga Tapu mai he agaga, kua nakai eke ke taute noa. Nakai taute noa ke fakamakona aki e fia kitia mena he tau tagata. He magaaho ne totou e Mose e “tohi he maveheaga” ki a Isaraela he kelekele tatai ne haga atu ke he Mouga Sinai, ne taute pihia e ia ke maeke a lautolu ke iloa ha lautolu a tau matagahua ke he Atua mo e ke fakakatoatoa e tau mena ia. Maeke nakai ia lautolu? Ko e totouaga kua lata ke fai gahua. Kua mailoga he tau tagata e mena ia, mo e vagahau ai a lautolu, kua pehe: “Ko e tau mena oti kua talahau mai e Iehova, to eke e mautolu, mo e fanogonogo a mautolu ki ai.”​—Esoto 24:7; fakatatai Esoto 19:8; 24:3.

13. He magaaho ne totou e Iosua e tau malaia ka nakai omaoma, kua lata e tau tagata ke taute e heigoa, fakalataha mo e folia fe?

¹³ Fakamui, he magaaho ne totou e Iosua ke he motu e tau maveheaga ke he tau monuina mo e tau kaialu, po ke tau malaia, kua lata ai ke fai gahua. He mole he talahau takitaha e tau malaia, kua tala age e fakaakoaga: “Ti [“kua lata ke,” NW] tali mai ai he motu oti, Amene.” (Teutaronome 27:4-26) He mole he talahau takitaha e tau matakupu kua fakamau hifo ai ko e talia e lautolu fakalataha mo e tau fakahala ka taute e Iehova ke he tau mahani hepehepe ne tala age. Kua mahomo lahi ha fakalata e magaaho ne tomumu he talahau he motu katoa hana taliaaga!

14. Ke he vaha a Nehemia, kua eke moli he ha e totouaga he Matafakatufono ke he tau tagata ke mua atu e aoga?

¹⁴ Ke he tau aho a Nehemia, he magaaho ne fakapotopoto e tau tagata oti i Ierusalema ke logona e Matafakatufono, kua kitia e lautolu ko e nakai taute oti e lautolu e tau fakaakoaga ne tohi i ai. He magaaho ia ne eke agataha ai a lautolu ke fakagahua e tau mena ne ako e lautolu. Ko e heigoa e fua? “Ti lahi mahaki ai e fiafia.” (Nehemia 8:13-17) He taha e fahi tapu ne mole he totou Tohi Tapu he tau aho oti he vaha kaiaga galue, mailoga e lautolu kua lahi foki e mena kua lata ke taute. Kua liogi fakalahi ai a lautolu he liliu kikite ke he fakamauaga tala tuai ke he tau mena ne taute e Iehova ke he hana tau tagata, mai he vaha a Aperahamo mo e ki mua. Kua omoi he tau mena oti nei a lautolu ke omonuo ke hiki ke he tau mena kua lata mo e Matafakatufono, ke nakai mau mo e tau tagata motu kehe, mo e talia ai e tau matagahua ke leveki tumau e faituga mo e hana gahua fekafekau.​—Nehemia, tau veveheaga 8-10.

15. Fakakite mai fefe he tau fakaakoaga ia Teutaronome 6:6-9 kua nakai lata ke he tau magafaoa, e tau fakaakoaga he Kupu he Atua ke taute noa?

¹⁵ Kua pihia foki, ke he vahaloto he magafaoa, ko e fakaakoaga he tau Tohiaga Tapu ko e mena nakai lata ke taute noa ni. Tuga kua fita he kitia, ke he tau talahauaga fakatai ia Teutaronome 6:6-9, ne tala age ke he tau tagata ke ‘pipi e koe e kupu he Atua ke he hau a lima mo fakamailoga’​—kua fakakite mai ai ko e manako lahi a lautolu ke he tau puhala a Iehova mai he tau mahani mo e tau gahua ha lautolu. Mo e lata a lautolu ke tuku e kupu he Atua ko e ‘fou pāpā ke he vaha he ha lautolu a tau mata’​—he toka loto e tau matapatu fakaakoaga ne ha ha he tau Tohiaga Tapu mo e fakaaoga e tau mena nai mo fakaveaga he tau fifiliaga ha lautolu. (Fakatatai e tau kupu ne fakaaoga ia Esoto 13:9, 14-16.) Kua lata a lautolu ‘ke tohi ai foki ke he tau pou he ha lautolu a tau fale, katoa foki mo e ha lautolu a tau gutuhala’​—ke fakakite ai ko e tau kaina ha lautolu mo e tau kaufakalatahaaga ha lautolu ko e tau mena kua fakalilifu mo e fakaaoga e kupu he Atua. Ke he falu a kupu, kua lata ha lautolu a tau momoui ke fakakite lahi e tau fakamoliaga ko e ofania mo e fakaaoga e lautolu e tau puhala tututonu a Iehova. Kua aoga lahi ha ka pihia! Kua tu tokoluga pihia nakai e Kupu he Atua he tau momoui he tau magafaoa ha tautolu he tau aho oti? Kua momoko lahi, he hiki he tau Iutaia e tau mena oti nei mo mena taute noa ni, he tau e lautolu e tau puha tuku tohiaga tapu ia lautolu tuga ko e tau mena fakatomafola. Nakai hake mai he tau loto ha lautolu e tapuakiaga mo e kua nakai talia ai e Iehova.​—Isaia 29:13, 14; Mataio 15:7-9.

Matagahua ha Lautolu he Tau Kotofaaga Leveki

16. Kua aoga lahi he ha e totou Tohiaga Tapu tumau ki a Iosua?

¹⁶ Hagaao ke he totou Tohiaga Tapu, kua onoono lahi ki a lautolu ko e tau leveki he motu. Ki a Iosua, ne pehe a Iehova: “Kia taofi e koe ke eke ai ke lata mo e fakatufono oti.” Fakalataha mo e onoonoaga ke fakamoli e ia e matagahua ia, kua tala age ki a ia: “Ka kia [“totou,” NW] ai a koe ke he aho katoa mo e po, . . . ti monuina a koe ke he tau puhala oti ke fano ai a koe, ti monuina ai ni.” (Iosua 1:7, 8) Tuga kua lata moli e tau leveki Kerisiano he vaha nei, ko e totou Tohiaga Tapu tumau ha Iosua ne lagomatai a ia ke toka mahinohino he hana manamanatuaga e tau poakiaga pauaki ne age e Iehova ke he Hana tau tagata. Kua lata foki a Iosua ke maama ko e taute mena fefe a Iehova ke he Hana tau fekafekau he tau tutuaga kehekehe. He totou e ia e tau fakamauaga he finagalo he Atua, kua aoga lahi ki a ia ke manamanatu ke he hana matagahua ni ne matutaki mo e finagalo ia.

17. (a) Ma e tau patuiki ke moua e tau mena aoga he totou e tau kupu Tohiaga Tapu ke he puhala ne tala age e Iehova, kua lata ke fakatauo fakalataha e heigoa mo e ha lautolu a totouaga? (e) Kua aoga lahi he ha ke he tau motua Kerisiano ke totou mo e manamanatu fakahokulo tumau ke he Tohi Tapu?

¹⁷ Kua poaki a Iehova ko e tau tagata oti kua eke mo patuiki ke he Hana tau tagata, kua lata he kamataaga he pule fakapatuiki hana, ­ke ­taute taha lagaki he Matafakatufono he Atua, he fakave ke he lagaki ne toka he tau ekepoa. He mole mogoia kua lata a ia ke “totou ai e ia ke he tau aho oti he hana moui.” Kua nakai foli ni hokoia ke ako manatu noa e tau mena i ai. Ka e kehe, kua taute ai ke “fakaako a ia ke matakutaku ai kia Iehova hana Atua” mo e “neke fakatokoluga ai hana loto ke he hana tau matakainaga.” (Teutaronome 17:18-20) Kua lata ai e mena nei ke manamanatu fakahokulo a ia ke he tau mena ne totou e ia. Kua piko e falu he tau patuiki ko e lavelave lahi a lautolu mo e tau matagahua pule ke taute e mena ia, ti ko e fua he fakateaga ha lautolu kua matematekelea e motu katoa. Nakai ko e kotofaaga patuiki e tau kotofaaga he tau motua he fakapotopotoaga Kerisiano. Pete ni ia, kua tuga moli ni e tau patuiki ke he mena nei, kua aoga lahi ma e tau motua ke totou mo e manamanatu fakahokulo ke he Kupu he Atua. He taute pihia e lautolu to lagomatai ai a lautolu ke tumau e onoonoaga kua lata hagaao ki a lautolu ne tuku age ke leveki e lautolu. Kua taute foki a lautolu ke maeke ke fakamoli ha lautolu a matagahua faiaoga ke he puhala kua fakalilifu moli lahi e Atua mo e ati hake fakaagaga e tau faoa Kerisiano.​—Tito 1:9; fakatatai Ioane 7:16-18; kehekehe 1 Timoteo 1:6, 7.

18. Ko e fakafifitakiaga fe ne fakatoka he aposetolo ko Paulo ka lagomatai ai he totou mo e fakaako Tohi Tapu tumau a tautolu ke fifitaki ki ai?

¹⁸ Ko e aposetolo ko Paulo, e taha Kerisiano gahua leveki he senetenari fakamua, ne iloa lahi e ia e tau kupu Tohiaga Tapu mai he agaga tapu. He magaaho ne gahua fakamoliaga a ia ke he tau tagata Tesalonia i tuai, ne maeke a ia ke lauia mitaki e fakamaamaaga ki a lautolu mai he tau Tohiaga Tapu mo e lagomatai ai a lautolu ke maama e kakano i ai. (Gahua 17:1-4) Kua maeke a ia ke hokotia ke he tau loto ha lautolu ne fanogonogo ne loto fakamoli. Ti tokologa a lautolu ne logona a ia kua tua. (1 Tesalonia 2:13) Ha ko e fua he fakaholoaga totou mo e fakaakoaga Tohi Tapu hau, maeke nakai a koe ke lauia mitaki e tau fakamaamaaga mai he tau Tohiaga Tapu? Kua eke nakai e magaaho totouaga Tohi Tapu mo e puhala ne taute ai e koe ke he hau a moui ke tuku moli mai e fakamoliaga ko e fakaaue lahi a koe ke he kakano kua lata lahi ai ke fai Kupu he Atua a koe? Ko e tala ne mui mai, to onoono a tautolu ko e maeke fefe ke tuku atu e tali mauokafua ke he tau huhu nei ko e mena ti pihia foki a lautolu ne lavelave lahi e tau fakaholoaga.

To Tali Fefe e Koe?

◻ Ko e ha ne manako ai e tau tagata ke tuku e tau momoui mo e tokanoaaga ke he hagahaga kelea ke maeke ke totou e Tohi Tapu?

◻ Aoga fefe ki a tautolu ke liliu ke kikite ke he tau mena ne foaki ke he tau Isaraela i tuai ke logona e Kupu he Atua?

◻ Kua lata a tautolu ke fakaaaoga fefe e tau mena ne totou e tautolu he Tohi Tapu?

◻ Kua mua atu e aoga he ha ke totou mo e manamanatu fakahokulo e tau motua Kerisiano ke he Tohi Tapu?

[Fakatino he lau 21]

Tala age a Iehova ki a Iosua: ‘Ka kia totou ai a koe ke he aho katoa mo e po’