Ko e Tega he Gata—Fakatapakupaku Fefe?

“Mo e to tuku e au e faitaua ke he vahaloto hau mo e fifine, mo e vahaloto he hau a tega mo e hana tega.”​—KENESE 3:15, NW.

1. (a) Ko e ha ai ko Iehova ko e Atua fiafia? (e) Ko e heigoa hana ne taute ke maeke ia tautolu ke fakalataha mo e hana olioli?

KO IEHOVA ko e Atua fiafia mo e fai kakano mitaki. Ko ia ko e Foaki mua ue atu mo e lahi mahaki he tau mena kua mitaki, ti nakai fai mena ke totoko aki e fakamoliaga he tau finagalo hana. (Isaia 55:10, 11; 1 Timoteo 1:11; Iakopo 1:17) Ne manako a ia ke he hana a tau fekafekau ke fakalataha mo e hana olioli, mo e kua foaki e ia e tau kakano kua tonu ma lautolu ke taute pihia. Ti, ke he taha he tau magaaho matematekelea he fakamauaga tuai he tagata​—ko e totokoaga i Etena​—ne foaki e ia e fakaveaga ma tautolu ke onoono atu ki mua mo e amaamanakiaga.​—Roma 8:19-21.

2. He mogo ne fakapuloa ai e fakafiliaga ke he tau kau totoko i Etena, foaki fefe e Iehova e fakaveaga ma e amaamanakiaga ma e fanau a Atamu mo Eva?

² Ko e taha he tau tama tane agaga a Iehova, he totoko mo e fatipiko ke he Atua, kua taute ni e ia a ia ke Satani ko e Tiapolo. Ko e tau tagata fakamua, ko Eva ti ko Atamu, ne mokulu ki lalo he hana a fakaohoohoaga mo e kua moumou ai e matafakatufono ha Iehova kua fakatoka fakamahinohino. Kua tutonu ai a laua ke fakahala ke he mate. (Kenese 3:1-24) Ka e, he magaaho ne fakapuloa ai e fakafiliaga ke he kau totoko nei, kua foaki e Iehova e fakaveaga ma e amaamanakiaga ma e fanau ha Atamu mo Eva. Ke he puhala fe? He fakamau ia Kenese 3:15, ne pehe a Iehova: “Mo e to tuku e au e faitaua ke he vahaloto hau mo e fifine, mo e vahaloto he hau a tega mo e hana tega. To fakaunoko e ia a koe i loto he ulu mo e to fakaunoko e koe a ia i loto he muihui.” (NW) Ko e perofetaaga ia ko e kei ke maama e Tohi Tapu katoa ti pihia foki ke he tau mena tutupu he vaha kua mole mo e vaha nei ne putoia ai e lalolagi mo e tau fekafekau a Iehova.

Ko e Kakano he Perofetaaga

3. He fakahagaao ke he Kenese 3:15, fakakite (a) e Gata, (e) e “fifine,” (i) ko e “tega” he Gata, (o) ko e “tega” he fifine.

³ Ke fakaaue ke he hana a aoga, manamanatu ke he tau vala kehekehe he perofetaaga hokoia. Ko ia ne talahau he Kenese 3:15 ko e Gata​—nakai ko e gata totolo ka e ko ia ne fakaaoga ai. (Fakakiteaga 12:9) Nakai ko Eva “e fifine” ka ko e fakatokatokaaga ha Iehova he lagi, ko e matua fifine he hana a tau fekafekau fakauku he agaga he lalolagi. (Kalatia 4:26) Ko e “tega” he Gata, ko e tega a Satani, ko e hana fanau​—ko e tau temoni mo e tau tagata ti pihia mo e tau fakatokatokaaga he tagata kua fakakite e tau aga ha Satani mo e kua fakakite e faitaua ke he “tega” he fifine. (Ioane 15:19; 17:15) Ko e “tega” he fifine kua matapatu ki a Iesu Keriso, ne kua fakauku ai he agaga tapu he 29 V.N. Ko e 144,000, ne “liu foki fanau . . . ke he vai mo e Agaga” mo e ko e tau hakeaga he Kautu he lagi mo Keriso, ko e vala ke ua aki he tega ia he maveheaga. Kua kamata a lautolu nei ke lafi atu ke he tega he fifine mai he Penetekoso 33 V.N. ki mua.​—Ioane 3:3, 5; Kalatia 3:16, 29.

4. Matutaki fefe e Kenese 3:15 he eke e lalolagi mo parataiso, puke ai ke he tau tagata toka noa mai he hala mo e mate?

⁴ Ko e gata moli i Etena ne fakaaoga mo gutu vagahau hana ne ha ha ai e fakavaia ne takitaki e tagata ke he galoaga he Parataiso. Ne tuhi atu e Kenese 3:15 ke he magaaho ka moumou a ia ne fakaholoholo e gata. Ti liu ai mogoia e puhala ke hafagi ma e tau tagata fekafekau he Atua ke nonofo he Parataiso, tokanoa mai he agahala mo e mate. Ko e magaaho olioli ha a ia mogoia!​—Fakakiteaga 20:1-3; 21:1-5.

5. Ko e heigoa e tau aga ne fakakite aki e fanau fakaagaga he Tiapolo?

⁵ He mui mai he totokoaga i Etena, kua kamata e tau tagata mo e tau fakatokatokaaga ke kitia kua fakakite e tau aga ia tuga ha Satani ko e Tiapolo​—totokoaga, pikopiko, fatipiko, mo e kelipopo, fakalataha mo e totokoaga ke he finagalo a Iehova mo e ki a lautolu ne tapuaki ki a Iehova. Ko e tau aga ia kua fakakite e fanau, ko e fanau fakaagaga, he Tiapolo. Ia lautolu nei ko Kaino, ne kelipopo a Apelu he magaaho ne fiafia a Iehova ke he tapuakiaga a Apelu ka e nakai ko e ha Kaino. (1 Ioane 3:10-12) Ko Nimorota taha ne ha ha ai e higoa ne fakakite a ia ko e tagata totoko mo e eke mo tagata takafaga malolo mo e pule kua totoko ki a Iehova. (Kenese 10:9) He lafi ai kua fetaliaki mai e tau kautu i tuai, fakalataha mo Papelonia, mo e ha lautolu a tau lotu kua lagomatai he fakatufono ne fakatu ke he fakavaiaga, mo e tau fakatufono nei kua favale he fakamatematekelea e tau tagata tapuaki a Iehova.​—Ieremia 50:29.

“Faitaua ke he Vahaloto Hau mo e Fifine”

6. Ke he tau puhala fe ne fakakite e Satani e faitaua ke he fifine a Iehova?

⁶ He magahala oti nei, ha ha i ai e faitaua he vahaloto he Gata mo e fifine a Iehova, he vahaloto a Satani ko e Tiapolo mo e fakatokatokaaga ha Iehova he lagi he tau mena momoui agaga fakamoli. Ko e faitaua a Satani kua fakakite he fakafiufiu e ia a Iehova mo e kumi ke fakamavehevehe e fakatokatokaaga a Iehova he lagi, fakaohooho e tau agelu ke toka e mena kua tonu ne nonofo ai a lautolu. (Tau Fakatai 27:11; Iuta 6) Kua fakakite ai he magaaho ne fakaaoga e Satani hana tau temoni ke lali ke fakalavelave ke he tau uta fekau fakaagelu ne fakafano mai e Iehova. (Tanielu 10:13, 14, 20, 21) Kua kitia maali e fakamoliaga he senetenari 20 aki nei he magaaho ne kumi a Satani ke moumou e Kautu faka-Mesia ke he hana a fanauaga.​—Fakakiteaga 12:1-4.

7. Ko e ha ne faitaua ai e logonaaga he tau agelu fakamoli a Iehova ke he Gata fakatai, ka e ko e heigoa e fakamamaoaga ne kua fakakite e lautolu?

⁷ Ha ha i ai foki e faitaua he vala he fifine ha Iehova, ko e matakau he tau agelu fakamoli, ke he Gata fakatai. Kua fatipiko a Satani ke he higoa mitaki he Atua; ti huhu fakauaua foki e ia ke he fakamoli he tau mena momoui lotomatala oti he Atua, fakalataha e tau agelu oti, mo e lali fakamakamaka a ia ke fakahehe ha lautolu a fakamoli ke he Atua. (Fakakiteaga 12:4a) Nakai kehe foki e tau agelu fakamoli, tau kerupi, mo e tau serafi he logona hifo e fakateteki ki a ia ne taute a ia ni mo Tiapolo mo Satani. Ka e, kua fakatali a lautolu ki a Iehova ke taute e tau mena ke he magaaho mo e puhala ni hana.​—Fakatatai Iuta 9.

Totoko Atu ke he Tega he Fifine he Atua

8. Ko hai ne takahao a Satani ki ai?

⁸ He magaaho ia, kua fakatumau a Satani ke takahao e Tega he fifine ne kua talahau tuai, ko ia ne talahau e Iehova ka fakaunoko e Gata ke he ulu. He magaaho ne fakailoa he agelu mai he lagi ko Iesu, ne kua fanau i Petelehema, ko e “Fakamoui, ko e Iki a ia ko e Keriso,” ko e fakamauaga malolo anei ko e to eke a ia mo Tega he fifine ne talahau tuai.​—Luka 2:10, 11.

9. He mole atu e fanauaga a Iesu, fakakite fefe e Satani e faitaua vale?

⁹ Ko e faitaua vale ha Satani kua fakakite mafiti he magaaho ne fakavaivai e ia e tau ­makoi pouliuli ke he gahua pauaki ne uta fakamua e lautolu ke he Patuiki ko Herota i Ierusalema ato o mogoia ke he fale i Petelehema ne moua ai e lautolu e tama tane tote ko Iesu mo e hana a matua fifine, ko Maria. Nakai leva he mole atu ne poaki e Patuiki ko Herota ke tamate oti e tau tama tane mai he ua e tau tau he moui mo e ki lalo hifo, i Petelehema mo e tau kalakala hana. He mena nei, kua fakakite e Herota e vihiatia fakasatani ma e Tega. Na iloa lahi moli e Herota ko e lali a ia ke uta kehe e moui hana ka eke mo Mesia. (Mataio 2:1-6, 16) Kua talahau e fakamoliaga he fakamauaga tala tuai kua fakamamahi, fakavaivai, mo e kelipopo tagata e Patuiki ko Herota​—ko e tega moli he Gata.

10. (a) He mui mai e papatisoaga a Iesu, lali fakatagata fefe a Satani ke totoko e finagalo a Iehova hagaao ke he Tega he maveheaga? (e) Fakaaoga fefe e Satani e tau takitaki lotu Iutaia ke moua hana a tau foliaga?

¹⁰ He mole atu e fakauku a Iesu aki e agaga tapu he 29 V.N. mo e vagahau mai a Iehova he lagi he fakapuloa a Iesu ko e hana Tama, kua lali fakatumau a Satani ke taute a Iesu ke to ke he kamatamata, ti kumi ai ke totoko e finagalo a Iehova hagaao ke he hana a Tama. (Mataio 4:1-10) He kaumahala he mena ia, ne kumi atu a ia he fakalaulahi e fakaaoga he tau hukui he tagata ke moua hana a tau foliaga. Ha ha ia lautolu ia ne fakaaoga he lali ke fakahigoa kelea a Iesu ko e tau takitaki lotu fakatupua. Ne fakaaoga e lautolu e tau pikopiko mo e fatipiko, ko e tau faga lagatau ne fakaaoga e ia ko Satani. He magaaho ne tala age a Iesu ke he tagata pareluti, “Kia fakamanavalahi . . . kua fakamagalo tuai hau a tau hala,” ne nakai leo e tau tohikupu ke kitia ko e maulu moli e tagata, kua fakafili ai a Iesu ko e tagata kupu kelea. (Mataio 9:2-7) He magaaho ne fakamaulu e Iesu e tau tagata he Sapati, kua talahau he tau Farasaio a ia ko e tagata moumou matafakatufono he Sapati mo e pulega ai ke moumou a ia. (Mataio 12:9-14; Ioane 5:1-18) He magaaho ne vega kehe e Iesu e tau temoni, kua manatu malolo e tau Farasaio kua fai matutakiaga a ia mo “Pelesepulo e iki he tau temoni.” (Mataio 12:22-24) He mole atu e fakaliu tu mai a Lasalo he mate, ne tokologa he tau tagata kua tua ki a Iesu, ka e ko e tau ekepoa ne mua mo e tau Farasaio kua liu pulega ke keli a ia.​—Ioane 11:47-53.

11. He tolu e aho ato mate a Iesu, ko hai ne fakakite e ia ko e vala he Gata, mo e ko e ha?

¹¹ He Nisana 11, 33 V.N., pete ni he iloa tuai e tau lagatau ha lautolu, ne fina atu taha a Iesu mo e nakai matakutaku ki loto he faituga i Ierusalema mo e i ai kua talahau fakatokanoa ai e fakafiliaga ki luga ha lautolu. Fakamatakau ai, ko e tau tohikupu mo e tau Farasaio kua fakatumau ke fakatata ko e tau faga tagata fefe a lautolu; ti pehe ai a Iesu: “Oi fakaalofa kia mutolu e tau tohikupu, mo e tau farasaio, ko e tau tagata fakavai! ha ko e mena pa e mutolu e kautu he lagi ke he tau tagata; ha kua nakai huhu a mutolu ki ai, ti nakai toka foki e mutolu ke huhu ki ai a lautolu ha ne huhu ki ai.” Kua fakapuloa fakatonu e Iesu ko lautolu ko e vala he tega he Gata, he pehe: “Ko e tau gata, ko e tau fanau he tau gata gagau! to fehola fefe a mutolu he fakahala i Kehena?” (Mataio 23:13, 33) Ko e hana vagahau kua liu muatua ai ke he perofetaaga ia Kenese 3:15.

12, 13. (a) Foaki fefe he tau ekepoa ne mua mo e tau tohikupu e falu fakamoliaga foki ko hai e ha lautolu a matua tane fakaagaga? (e) Ko hai ne fakalataha mo lautolu? (i) Ko e fakamoliaga he Kenese 3:15, fakaunoko fefe e Tega he fifine ke he muihui?

¹² He logona ai e tau kupu a Iesu, kua lauia kia e tau loto ha lautolu, ti ko e mena ia kua ole e lautolu e fakaalofa hofihofi mai he Atua? Kua tokihala nakai a lautolu ha ko e ha lautolu a mahani kelea? Nakai! Ne fakailoa mai e Mareko 14:1 ko e aho hake, ke he ha lautolu a feleveiaaga ke he fale he ekepoa ne mua, “ti kumi ai e tau ekepoa ne mua mo e tau tohikupu, po ke eke fefe ha lautolu a fakavai ke tapaki ai a [Iesu], mo e tamate a ia.” Ne fakatumau a lautolu ke fakakite e agaga kelipopo ha Satani, ne kua fakamaama mai e Iesu fakamua ko e keli tagata. (Ioane 8:44) Nakai leva ti fakalataha a Iuta Isakariota mo lautolu, ne kua fakaohooho e Satani ke eke mo tagata tiaki e taofiaga. Ne tiaki e Iuta e Tega nakai fai ilaila he fifine he Atua mo e fakalataha mo e tega he Gata.

¹³ He pogipogi lahi he Nisana 14, ne uta he tau tagata he hopoaga he lotu Iutaia a Iesu ko e tagata fakahala ke he kavana Roma. He magaaho nei ko e tau ekepoa ne mua ne takitaki he kalaga ke fakatautau a ia. He mogo ne huhu a Pilato, “Ke fakasatauro kia e au e patuiki ha mutolu?” ko e tau ekepoa ne mua ne tali, “Nakai fai patuiki a mautolu, ka ko Kaisara hokoia.” (Ioane 19:6, 15) Moli lahi, kua fakamoli e lautolu ke he ha puhala ko lautolu ko e vala he tega he Gata. Ka e nakai ni ko lautolu moli hokoia. Ko e fakamauaga fakaohooho ia Mataio 27:24, 25 kua mai e talahauaga nei: “Ti toto e [Pilato] e magavai, kua holoholo ai hana tau lima ki mua he lanu tagata.” Ti pehe ai e motu oti: “Kia toka i luga ia mautolu, mo e tau fanau ha mautolu hana a toto.” Ti tokologa he tau Iutaia he atuhau ia ne fakakite e lautolu a lautolu ko e vala he tega he Gata. Ato oti e aho ia, ne mate a Iesu. Ha kua fakaaoga ai hana a tega kua kitia, ne fakaunoko ai e Satani e Tega he fifine he Atua ke he muihui.

14. Ko e ha e fakaunoko he muihui he Tega he fifine nakai kakano ko e kautuaga ma Satani?

¹⁴ Ti kautu nakai a Satani? Nakai fakaai! Kua kautu ai a Iesu Keriso ke he lalolagi mo e kautu mai he hana a tau pule. (Ioane 14:30, 31; 16:33) Kua fakatumau ai e ia hana a mahani fakamoli ki a Iehova ato hoko ke he mate. Ko e mate hana ko e tagata mitaki katoatoa kua foaki e palepale he lukutoto ne kua lata ke totogi aki e tonu he moui ne fakagalo e Atamu. Ti hafagi ai e ia e puhala ke he moui tukulagi tukumuitea ma lautolu ne fakagahuahua e tua he foakiaga ia mo e omaoma ke he tau poakiaga he Atua. (Mataio 20:28; Ioane 3:16) Kua fakatu mai e Iehova a Iesu he mate ke he moui nakai mate ki luga he lagi. He magaaho ni a Iehova, to tuki lipilipi e Iesu a Satani. Ia Kenese 22:16-18, ne perofeta mai ai to foaki ni e Iehova e taliaaga ke he tau magafaoa oti he lalolagi ne kua taute ai e gahua kua lata ke monuina ai ni a lautolu ha ko e Tega fakamoli ia.

15. (a) He mole atu e mate ha Iesu, fakatumau fefe hana a tau aposetolo ke fakatapakupaku e tega he Gata? (e) Ko e heigoa foki falu totokoaga kua fakakite e tega he Gata ke hoko ke he vaha ha tautolu?

¹⁵ He mole atu e mate a Iesu, ne fakatumau e tau Kerisiano fakauku he agaga ke fakatapakupaku e tega he Gata, tuga ni kua taute he ha lautolu a Iki. He omoomoi ai he agaga tapu, kua hataki he aposetolo ko Paulo mai he “tagata he hala” ka kitia ai a ia ke he “gahua a Satani.” (2 Tesalonia 2:3-10) Ko e tau “tagata” tokologa nei kua fakamoli ai ko e tau akoako ha Kerisitenitome. Ti kua liliu vale lahi ai e tega he Gata, ke he tau tutaki ha Iesu Keriso. Ke he perofetaaga ne fakamau ia Fakakiteaga ­12:17, ne talahau tuai mai he aposetolo ko Ioane to fakatumau ni a Satani ke fakatupu e felakutaki ki a lautolu ne toe he tega he fifine he Atua ke hoko ke he vaha ha tautolu. Ko e mena tonu ia ni kua tupu. He tau motu loga, kua pa e Tau Fakamoli a Iehova, kau auloa ki ai, tuku he fale pouli, po ke tolo ke he tau kemuaga pagota kakano ha ko e ha lautolu a tumau ma e Kautu he Atua mo e hana a tau puhala tututonu.

Fakatapakupaku he Vaha Fou Nei he Tega he Gata

16. He vaha fou nei, ko hai ne fakatapakupaku ko e vala he tega he Gata, mo e fefe?

¹⁶ He fakafifitaki a Iesu Keriso, kua nakai fakalolelole e tau Kerisiano moli he ha lautolu a fakatapakupaku mo e nakai matakutaku ke he Gata mo e hana a tega. He 1917 ko e Tau Tagata Fakaako Tohi Tapu, ne kua iloa ai he magahala ia ko e Tau Fakamoli a Iehova, ne lomi fakailoa e tohi The Finished Mystery, ne kua fakakite ai e lautolu e fakatupua he tau akoako Kerisitenitome. Kua mui mai he mena nei, he 1924, ko e lolomiaga he fifiliaga ne fakahigoa ai ko e Ecclesiastics Indicted. Ko e limagofulu e miliona he tau lagaki ne tufatufa ke he lalolagi katoa. He 1937, ko J. F. Rutherford, ko e pelesiteni he Sosaiete he Kolo Toko, ne vagahau e fakatapakupaku malolo he tega a Satani he lauga ne mataulu ai “Fakatapakupaku” mo e “Lotu mo e Faka-Kerisiano.” Ke he tau hake, hane fa e fanogonogo e tau tagata ke he 50 e fonoaga he tau motu kehekehe, ne taute e ia e lauga “Fehagai mo e Tau Mena Moli” mai he telefoni-letio i London, i Igilani. He taha e mahina he mole, ko e matutakiaga he letio katoa he Tau Fahi Kaufakalataha ne fakataogo e fakamatalaaga “Faka-Fasi po ke Tokanoaaga.” Ko e tau mena nei kua lafi ki ai e fakatapakupaku malolo he tau tohi tuga e Enemies mo e Religion mo e pihia foki ke he pepa tote ko e Uncovered. He lagotatai mo e mena ne fakailoa tali mai he atu tau 1920, ko e tohi Revelation​—Its Grand Climax At Hand!,a kua tohi ai mogonei ke he 65 e tau vagahau, kua fakakite e mahani kolokolovao mo e lotokai he tau pule fakapolitika, tau tagata feutaaki fakafuakoloa kua mahani kelea ne kua ha ha ai ke he tau tagata tu lalahi he tega he Gata kua kitia. He mogo ne taute ai he tau takitaki fakapolitika ke fakatumau ke kumi ke he fakavaiaga ke fakahehe ha lautolu a tau tagata, ke fakakite nakai fai hagaaoaga ma e fakatapuaga he toto, mo e ke fakamatematekelea e tau fekafekau a Iehova (he fakakite e vihiatia ma e tega he fifine he Atua), kua fakakite moli tuai e lautolu a lautolu ko e vala he tega he Gata. Ko e mena taha moli ia ni ke he tau tagata feutaaki fakafuakoloa ne, nakai ha ha ai ha tau logonaaga he manamanatuaga, pikopiko ma e mouaaga fakatupe mo e he taute po ke fakafua e tau koloa ne kua talahaua ke fakatupu e gagao.

17. Ko e heigoa e magaaho ne hafagi agaia ke he tau tagata tu tokoluga ne liga o mai ai he fakatokatokaaga he lalolagi?

¹⁷ Nakai ilaila e tau tagata oti he lotu, tau politika, po ke fakatukoloa he lalolagi ka mailoga ai fakahiku ke eke mo vala he tega he Gata. Ko e falu he tau tagata tane nei mo e tau fifine ne kua nava ai fakamui ke he Tau Fakamoli a Iehova. Kua fakaaoga e lautolu e fakaohoohoaga ha lautolu ke lagomatai a lautolu, mo e ko e hoko ai he taha magaaho kua talia e tapuakiaga moli. (Fakatatai Gahua 13:7, 12; 17:32-34.) Kia lautolu oti pihia, ne kua fita he tuku atu e ole fakamakutu nei: “Hanai, ko mutolu ko e tau patuiki na e, kia loto matala a mutolu; kia ako a mutolu ko e tau fakafili he lalolagi. Kia fekafekau kia Iehova mo e matakutaku, kia fiafia foki mo e vivivivi. Kia figita ā e Tama neke ita mai a ia, mo e mahaikava ai a mutolu ke he puhala; ha ko e mena tupu vave hana ita. Uhoaki a lautolu oti kana kua tua kia ia.” (Salamo 2:10-12) Moli lahi, kua aoga ma e tau tagata oti ne manako e taliaaga a Iehova ke gahua he magaaho nai, ato pa ai he Fakafili he lagi e gutuhala kua hafagi agaia!

18. Pete e nakai fai vala he tega he fifine, ko hai e tau tagata tapuaki ha Iehova?

¹⁸ Ko lautolu ni ne ha ha ai he Kautu he lagi ka vala he tega he fifine. Kua tokogahoa a lautolu nei. (Fakakiteaga 7:4, 9) Ka e, ha ha ai e falu he moto tagata tokologa, e, totou miliona a lautolu, ne ko e tau tagata tapuaki a Iehova ne onoono atu ke he moui tukulagi tukumuitea he lalolagi parataiso. Ke he tau kupu mo e ke he gahua, ne pehe a lautolu ke he kau fakauku a Iehova: “To o a tautolu mo mutolu; ha kua logona e mautolu ha ha ia mutolu e Atua.”​—Sakaria 8:23.

19. (a) Ko e heigoa e fifiliaga kua lata e tau tagata oti ke taute? (e) Mua atu kia hai e olelalo fakamakutu ke taute e gahua fakapulotu he fai magaaho agaia?

¹⁹ Ko e magaaho anei ma e tau tagata oti ke taute e fifiliaga. Kua manako kia a lautolu ke tapuaki ki a Iehova mo e toto mau ki luga e hana a pule mua ue atu, po ke to fakaata e lautolu a Satani ke eke mo pule ha lautolu he taute e tau mena ne fakafiafia a ia? He kavi ko e toko lima e miliona tagata mai he tau motu oti kua taute ha lautolu a fifiliaga ke he fahi a Iehova he fakalataha ai mo lautolu ne toe he tega he fifine, ko e tau hakeaga he Kautu. Ko e valu e miliona he falu kua fakakite e fiafia he fakaako e Tohi Tapu mo lautolu po ke fakalataha atu ke he tau feleveiaaga ha lautolu. Kua pehe e Tau Fakamoli a Iehova ki a lautolu oti nei: Hafagi agaia ni e magaaho ma e gutuhala. Taute hau a fifiliaga mahino he fahi a Iehova. Talahau a Iesu Keriso ko e Tega he maveheaga. Fakalataha mo e olioli mo e fakatokatokaaga ha Iehova kua kitia. Kia fakalataha atu a koe ke moua e tau fakamonuinaaga oti ka foaki mai e Ia puhala he pule he Patuiki, ko Iesu Keriso.

[Matahui Tala]

Manatu Nakai e Koe?

◻ Ko hai e Gata ne fakahagaao ki ai he Kenese 3:15? Mo e ko hai e fifine?

◻ Ko e heigoa e tau aga ne fakakite aki e tega he Gata?

◻ Fakatapakupaku fefe e Iesu e tega he Gata?

◻ Ko hai ne kua fakatapakupaku ko e vala he tega he Gata he tau vaha fou nei?

◻ Ko e heigoa e gahua mafiti kua lata ke hola mai he kitiaaga mo e tega he Gata?

[Fakatino he lau 21]

Ne fakatapakupaku e Iesu e tau takitaki lotu fakatupua ko e vala he tega he Gata