Veveheaga Fa
Ko Ia ne Talahau Mai he Tau Perofeta Oti
1. Ko e heigoa e tau talahauaga moli ke he moui ato tagata ha Iesu ne fakakite hagaao ke he fakafetuiaga hana mo Iehova?
“KO E mena fakaalofa mai e Matua ke he Tama, kua fakakite mai foki kia ia e tau mena oti kana ne eke e ia.” (Ioane 5:20) Ko e fakafetuiaga mafanatia ha ia ne olioli he Tama mo e hana Matua, ko Iehova! Ne kamata e fakafetuiaga tata lahi ia he magaaho ne tufuga a ia ke he loga e tau meleniamu ato fanau tino tagata a ia. Ko ia ko e tama fuataha he Atua, ko ia tokotaha maka ne tufuga e Iehova. Ko e tau mena oti ne toe he lagi mo e he lalolagi ne tufuga ai puhala he Tama uluaki fakahelehele ia. (Kolose 1:15, 16) Ne eke foki a ia mo Kupu he Atua, po ke Gutuvagahau, ko Ia ne puhala mai e finagalo faka-Atua ke he falu. Ko ia nei, ko e Tama ne ofania lahi he Atua, ne eke mo tagata ko Iesu Keriso.—Tau Fakatai 8:22-30; Ioane 1:14, 18; 12:49, 50.
2. Ko e heigoa e laulahiaga he tau perofetaaga he Tohi Tapu ne hagaao ki a Iesu?
2 Ato fakafua fakamana ko e tagata e Tama uluaki he Atua, ne loga e tau perofetaaga ne omoomoi he agaga ne kua fakamau hagaao ki a ia. Ko e aposetolo ko Peteru ne tala age ki a Konelio: “Ne talahau mai foki a ia he tau perofeta oti.” (Gahua 10:43) Ne lahi e gahua ha Iesu ne fakakite mai he Tohi Tapu ati hokotia e agelu ke tala age ke he aposetolo ko Ioane: “Ko e talahau kia Iesu ko e agaga ia he perofetaaga.” (Fakakiteaga 19:10) Ne fakakite fakamahino he tau perofetaaga ia ko ia ko e Mesia. Ne fakakite e lautolu e tau gahua kehekehe ka taute e ia ke fakamoli e tau finagalo he Atua. Ko e tau mena oti nei kua lata ke fiafia lahi ki ai a tautolu he vaha nei.
Tau Mena ne Fakakite he Tau Perofetaaga
3. (a) He perofetaaga he Kenese 3:15, ko hai ne hukui he gata, “fifine,” mo e ‘tega he gata’? (e) Ko e ha e ‘fakaunoko e ulu he gata’ ko e mena fiafia lahi ke he tau fekafekau ha Iehova?
3 Ko e fakamuaaki he tau perofetaaga ia ne talahau he mole e totokoaga i Etena. Ne pehe a Iehova ke he gata: “To tuku e au e faitaua ke he vahaloto hau mo e fifine, mo e vahaloto he hau a tega mo e hana tega. To fakaunoko e ia a koe i loto he ulu mo e to fakaunoko e koe a ia i loto he muihui.” (Kenese 3:15, NW) Ko e perofetaaga ia kua talahau moli ki a Satani, ko ia ne hukui he gata. Ko e “fifine” ko e fakatokatokaaga mahani fakamoli ha Iehova he lagi, kua tuga e hoana tua fakamoli ki a ia. Ko e ‘tega he gata’ kua putoia e tau agelu mo e tau tagata oti ne fakakite e agaga ha Satani, ko lautolu ne totoko ki a Iehova mo e Hana tau tagata. Ke ‘fakaunoko e ulu he gata’ kua kakano ko e moumou tukulagi he totoko ko Satani, ne ekefakakelea a Iehova mo e lahi e fakamamahi ke he tau tagata. Ka ko e heigoa e fakamailoga he matapatu vala he “tega” ka taute e fakaunoko? Ke he tau senetenari, kua tumau e mena ia ko e “mena galo.”—Roma 16:20, 25, 26.
4. Lagomatai fefe he mataohi ha Iesu ke fakakite ko ia ko e Tega ne mavehe?
4 He mole e kavi 2,000 tau he fakamauaga tuai he tagata, ne foaki e Iehova falu tala fakamatafeiga. Ne fakakite e ia ko e Tega to tupu mai he laini he magafaoa ha Aperahamo. (Kenese 22:15-18) Ka e, ko e laini ke tupu mai e Tega to uta ni, nakai ke he ohi fakatino, ka e ke he fifiliaga he Atua. Pete e fakaalofa ha Aperahamo ke he tama hana ko Isamaeli, ne fanau ki a Hakara, ne pehe a Iehova: “Ka e fakamau ni e au haku a maveheaga mo Isaako; ko ia ke fanau mai e Sara kia koe.” (Kenese 17:18-21) Magaaho fakamui ne fakamoli e maveheaga ia, nakai ke he tama uluaki ha Isaako, ko Esau, ka ki a Iakopo, ne tupu mai e tau magafaoa toko 12 ha Isaraela. (Kenese 28:10-14) Fai magaaho, ti fakakite ai to fanau mai e Tega he magafaoa ha Iuta, he laini ha Tavita.—Kenese 49:10; 1 Nofoaga he Tau Patuiki 17:3, 4, 11-14.
5. Magaaho ne kamata e fekafekauaga ha Iesu he lalolagi, ko e heigoa ne fakamoli aki ko ia ko e Mesia?
5 Ko e heigoa falu fakamailoga ne talahau ke he Tega? Molea e 700 tau ki mua, ne fakahigoa he Tohi Tapu a Petelehema ko e matakavi ka fanau mai e Tega ne mavehe. Ne fakakite foki kua fita e moui e Tega “mai he vaha fakamua,” tali mai he tufuga a ia ke he lagi. (Mika 5:2) Ne talahau tuai foki e magaaho tonu ka hau a ia ke he lalolagi ko e Mesia, puhala mai he perofeta ko Tanielu. (Tanielu 9:24-26) Ti he magaaho ne fakauku he agaga tapu a Iesu, ne eke moli mo Mesia ha Iehova, ko e leo ni he Atua mai he lagi ne fakakite fakamahino a ia ko e Hana Tama. (Mataio 3:16, 17) Kua fakakite tuai e Tega! Ti, maeke ia Filipo ke talahau mo e mauokafua: “Kua moua e mautolu a ia ne tohia e Mose ke he fakatufono, katoa mo e tau perofeta; ko Iesu haia.”—Ioane 1:45.
6. (a) Hagaao ki a Luka 24:27, ko e heigoa ne mailoga he tau tutaki ha Iesu? (e) Ko hai e matapatu vala he ‘tega he fifine,’ mo e ko e heigoa e kakano he fakaunoko e ia e ulu he gata?
6 Fakamui, ne mailoga he tau tutaki ha Iesu kua loga moli e tau perofetaaga hagaao ki a ia ne eke mo vala he tau Tohiaga Tapu omoomoi he agaga. (Luka 24:27) Ne maama fakahaga ko Iesu ko e matapatu vala he ‘tega he fifine,’ ko ia ka fakaunoko e ulu he gata, he fakaotioti a Satani. He puhala mai ia Iesu, ko e tau maveheaga oti he Atua ke he tau tagata, ko e tau mena oti ne manako lahi a tautolu ki ai, to fakamoli ai.—2 Korinito 1:20.
7. Ke lafi ke he matahigoa Hana ne hagaao ki ai he tau perofetaaga, ko e heigoa foki kua aoga ke mailoga?
7 Lata a tautolu ke lauia fefe he iloa e mena nei? Ne talahau he Tohi Tapu e tagata eunuka Aitiope ne totou falu he tau perofetaaga nei hagaao ke he hauaga he Laveaki mo e Mesia. Fakagogoa ai, ne ole a ia ke he evagelia ko Filipo: “Kua tala mai e mena nai he perofeta kia hai?” Ka e nakai fakaoti he eunuka he mena ia e fakatutalaaga ha kua moua e tali. Mole e fanogonogo fakamatafeiga ke he fakamaamaaga ne talahau e Filipo, ne mailoga he tagata ko e loto fakaaue ma e perofetaaga nei ne fakamoli kua lata ia ia ke taute hana vala. Ne maama ia ia kua lata a ia ke papatiso. (Gahua 8:32-38; Isaia 53:3-9) Tali pihia nakai a tautolu?
8. (a) Ko e heigoa ne fakaata tuai he laliaga ha Aperahamo ke poa a Isaako? (e) Ko e ha ne tala age a Iehova ki a Aperahamo to monuina e tau motu oti kana ha ko e Tega, mo e fakagahua fefe e mena nei ki a tautolu he vaha nei?
8 Manamanatu foki ke he tala aamotia ke he laliaga ha Aperahamo ke poa a Isaako, hana tama fuataha mo Sara. (Kenese 22:1-18) Ne fakaata tuai he mena nei e gahua ka taute e Iehova—ke poa hana Tama fuataha: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Kua foaki he mena nei ki a tautolu e mauokafua he tuga ni ne poa e Iehova hana Tama fuataha ke fakamoli Hana finagalo, to ‘foaki noa mai e Ia kia tautolu e tau mena oti kana.’ (Roma 8:32) Ko e heigoa kua lata mai ia tautolu? He fakamau he Kenese 22:18, ne tala age a Iehova ki a Aperahamo to monuina e tau motu oti kana ha ko e Tega, “ha kua fanogonogo a [Aperahamo] ke he . . . tau kupu [he Atua].” Lata foki ia tautolu ke fanogonogo ki a Iehova mo e hana Tama: “Ko e tagata ne tua ke he Tama, ha ha ia ia e moui tukulagi; ka ko e tagata nakai tua ke he Tama, nakai kitia e ia e moui, ka ko e ita he Atua ha ne toka mau ni ki luga hana.”—Ioane 3:36.
9. Kaeke loto fakaaue a tautolu ke he amaamanakiaga he moui tukulagi ne maeke ha ko e poa ha Iesu, ko e heigoa ha tautolu ka taute?
9 Kaeke loto fakaaue a tautolu ke he amaamanakiaga he moui tukulagi ne maeke ha ko e poa ha Iesu, to manako a tautolu ke taute e tau mena ne talahau mai e Iehova ki a tautolu ne puhala mai ia Iesu. Kua lafi e tau mena nei mo e fakaalofa ha tautolu ke he Atua mo e tau katofia. (Mataio 22:37-39) Ne fakakite e Iesu ko e fakaalofa ha tautolu ma Iehova ka fakaohooho a tautolu ke fakaako falu ke “omaoma ke he tau mena oti ne tala [mai e Iesu ki a tautolu].” (Mataio 28:19, 20) Ti manako a tautolu ke fetufatufaaki e fakaalofa ia mo e tau matakainaga fekafekau ha Iehova he ‘fakapotopoto auloa’ tumau mo lautolu. (Heperu 10:25; Kalatia 6:10) Pihia foki, he fanogonogo ke he Atua mo e hana Tama, nakai lata ia tautolu ke manamanatu kua poaki a laua ke he mitaki katoatoa mai ia tautolu. Pehe e Heperu 4:15 ko Iesu, ko e Ekepoa ne Mua ha tautolu, kua maeke ke “mamahi fakaalofa fakalataha mo tautolu ke he tau mena kua lolelole ai a tautolu.” Ko e mafanatia ha ia, mua atu ka o atu a tautolu ke he Atua he liogi puhala ia Keriso ma e lagomatai ke kautu mai he tau lolelole ha tautolu!—Mataio 6:12.
Fakakite e Tua ke he Keriso
10. Ko e ha ne nakai fai fakamouiaga ai ka ko Iesu Keriso ni?
10 He mole e fakamaama ke he hopoaga tokoluga faka-Iutaia i Ierusalema kua fakamoli e perofetaaga he Tohi Tapu ki a Iesu, ne fakahiku fakamao he aposetolo ko Peteru: “Nakai tokai foki e fakamouiaga ke he taha; nakai fakai taha higoa i lalo he lagi kua foaki mai ke he tau tagata, ke maeke ai ke fakamomoui a tautolu.” (Gahua 4:12) Ha ko e tau tagata agahala oti e tau hologa ha Atamu, ti ko e mamate ha lautolu kua nakai aoga ke lukutoto aki ha tagata. Ka e ne mitaki katoatoa a Iesu, ti uho e moui hana mo poa. (Salamo 49:6-9; Heperu 2:9) Ne foaki e ia e lukutoto ke he Atua ne tatai tonu e uho mo e moui mitaki katoatoa ne galo ia Atamu. (1 Timoteo 2:5, 6) Ne hafagi he mena nei e puhala ma tautolu ke moua e moui tukulagi he lalolagi fou he Atua.
11. Fakamaama e puhala kua maeke e poa ha Iesu ke aoga lahi mahaki ki a tautolu.
11 Ne hafagi foki he lukutoto e puhala ma tautolu ke moua foki falu mena aoga, pihia foki he mogonei. Ma e fakatai, pete ko e tau tagata agahala a tautolu, ko e poa ha Iesu ne maeke ia tautolu ke loto manamanatu hifo mitaki kakano he fakamagaloaga he tau agahala. Kua mahomo hake e aoga he mena nei ke he tau poa manu he tau Isaraela ne poaki he Fakatufono faka-Mose. (Gahua 13:38, 39; Heperu 9:13, 14; 10:22) Pete ia, he moua e fakamagaloaga pihia kua lata ia tautolu ke talahau fakamoli kua aoga lahi mahaki e poa he Keriso ma tautolu: “Kaeke ke pehe a tautolu, Nakai fai hala a tautolu, kua hehe tuai a tautolu kia tautolu, nakai nofo foki e kupu moli ki loto ia tautolu. Kaeke ke fakakite e tau hala ha tautolu, kua fakamoli a ia mo e mahani tututonu ke fakamagalo ai e tau hala he tautolu, mo e fakamea a tautolu he tau mahani hepehepe oti kana.”—1 Ioane 1:8, 9.
12. Ko e ha e tanumia ke he vai ko e vala aoga lahi ke moua e loto manamanatu hifo mitaki ki mua he Atua?
12 Maeke fefe he tau tagata agahala ke fakakite e tua ke he Keriso mo e hana poa? Magaaho ne eke mo tau tagata talitonu e tau tagata he senetenari fakamua, ne fakakite e lautolu ke he toloaga tagata e mena ia. Fefe? Ne papatiso a lautolu. Ko e ha? Kakano ne poaki e Iesu ke papatiso e tau tutaki oti hana. (Mataio 28:19, 20; Gahua 8:12; 18:8) To nakai mataofi e tagata ka aamotia moli e loto hana ha ko e fakaalofa ne foaki e Iehova he puhala ia Iesu. To taute e ia e ha hikihikiaga kua lata ke he moui hana, tukulele a ia ke he Atua he liogi, mo e fakakite hana tukuleleaga he tanumia ke he vai. Ko e fakatataaga hana he tua ke he puhala nei ati maeke a ia ke ‘ole ke he Atua ma e loto manamanatu hifo mitaki.’—1 Peteru 3:21.
13. Kaeke mailoga e tautolu kua taute e tautolu e agahala, ko e heigoa ha tautolu ka taute ki ai, mo e ko e ha?
13 Moli ai, pete kua oti he taute e mena nei to kitia agaia e tau hihiga agahala. Ko e heigoa mogoia? Ne pehe e aposetolo ko Ioane: “Kua tohi atu e au e tau mena ia kia mutolu, kia nakai hala a mutolu; kaeke foki kua hala taha, ha ia tautolu e [l]agomatai ki mua he Matua, ko Iesu Keriso ko e tututonu a ia. Ko e lukutoto foki a ia mo e tau hala ha tautolu.” (1 Ioane 2:1, 2) Kakano kia e mena nei ko e ha mena ni ha tautolu ka taute, kaeke liogi a tautolu ke he Atua ma e fakamagaloaga, to magalo e tau mena oti? Nakai pihia. Ko e kei ke he fakamagaloaga ko e tokihalaaga moolioli. Liga latatonu foki e lagomataiaga mai ia lautolu ne momotua, lautolu kua lahi atu e iloaaga i loto he fakapotopotoaga Kerisiano. Latatonu ia tautolu ke mailoga e hehe he mena kua taute mo e logona moli e tokihala ti lali fakamakutu a tautolu ke kalo mai neke liu ke taute e mena ia. (Gahua 3:19; Iakopo 5:13-16) Kaeke taute e tautolu e mena nei, maeke ia tautolu ke mafanatia ke he lagomatai ha Iesu mo e liuaki a tautolu ke he taliaaga ha Iehova.
14. (a) Fakamaama e puhala aoga kua lagomatai he poa ha Iesu ki a tautolu. (e) Kaeke ha ha moli ia tautolu e tua, ko e heigoa ha tautolu ka taute?
14 Ne hafagi he poa ha Iesu e puhala ke he moui tukulagi ke he lagi ma e “fuifui mamoe gahoa,” ko e taha vala he tega he Kenese 3:15. (Luka 12:32; Kalatia 3:26-29) Ne hafagi foki e puhala ma e moui tukulagi ke he lalolagi parataiso ke he piliona foki he tau tagata. (Salamo 37:29; Fakakiteaga 20:11, 12; 21:3, 4) Ko e moui tukulagi ko e “mena foaki noa mai he Atua haia, ke he Iki ha tautolu ko Keriso Iesu.” (Roma 6:23; Efeso 2:8-10) Kaeke tua a tautolu ke he mena fakaalofa ia mo e loto fakaaue ke he puhala ati maeke ai, to fakakite e tautolu e mena nei. He maama e puhala homo ue atu ne fakaaoga e Iehova a Iesu ke fakakatoatoa Hana finagalo mo e aoga lahi ha ia ma tautolu oti ke mumuitua fakatata ke he tau tuagahui ha Iesu, to taute e tautolu e fekafekauaga faka-Kerisiano mo taha he tau feua kua mua atu e aoga ke he tau momoui ha tautolu. To kitia moli e tua ha tautolu he talahau mauokafua e tautolu ke he falu e tau mena foaki noa ofoofogia nei mai he Atua.—Gahua 20:24.
15. Moua fefe he tua ki a Iesu Keriso e lauiaaga kaufakalataha?
15 Ko e lauiaaga mitaki mo e kaufakalataha ha ia e tua pihia! Mai he mena ia, kua fakatata lahi a tautolu ki a Iehova, ke he hana Tama, mo e ke he taha mo e taha i loto he fakapotopotoaga Kerisiano. (1 Ioane 3:23, 24) Kua olioli ai a tautolu ha kua foaki fakaalofa pihia e Iehova ke he hana Tama “e higoa kua mua ke he tau higoa oti kana [nakai ke he higoa he Atua]; kia fakatokotui e tau tulihui oti kana ke he higoa a Iesu, ko lautolu ha ha he lagi, mo lautolu ha ha he lalolagi, mo lautolu ki lalo he lalolagi; kia tokutoku atu foki he tau alelo oti, ko Iesu Keriso ko e Iki a ia, ke tupu ai e fakaheke ke he Atua e Matua.”—Filipi 2:9-11.
Fakatutala Fakamanatu
• Magaaho ne hau e Mesia, ko e ha kua kitia maaliali hana fakamailoga ki a lautolu ne talitonu moli ke he Kupu he Atua?
• Ko e heigoa falu mena kua lata ia tautolu ke taute ke fakakite e loto fakaaue ha tautolu ke he poa ha Iesu?
• Ko e heigoa e tau puhala kua fita e lagomatai e poa ha Iesu ki a tautolu? Lagomatai fefe he mena nei a tautolu he magaaho ka liogi ki a Iehova ma e fakamagaloaga he tau agahala?
[Fakatino he lau 36]
Ne tala age a Iesu ke he tau tutaki hana kua lata ia lautolu ke fakaako falu ke omaoma e tau poakiaga he Atua