Ko e Kautuaga he Tapuakiaga Moli kua Tata Mai
“To eke foki a Iehova mo Patuiki ke he lalolagi oti.”—SAKARIA 14:9.
1. Ko e heigoa e mena ne tupu he tau Kerisiano fakauku he Felakutaki I he Lalolagi, mo e kua talahau tuai mai fefe e mena nei?
KE HE felakutaki fakamua he lalolagi, ko e tau Kerisiano kua matematekelea ke he loga e tau mena uka mo e tau tuku ke he fale puipui ke he tau lima he tau motu felakutaki. Ko e ha lautolu a tau poa he fakahekeaga ki a Iehova kua kaka lahi e fakakaupa, mo e kua mokulu a lautolu ke he tuaga paea fakaagaga. Ko e tau mena oti nei kua talahau tuai mai ia Sakaria 14:2, ne kua fakamaama e keliaga fakalalolagi katoa ki a Ierusalema. Ko e maaga he perofetaaga nei ko “Ierusalema ha he lagi,” ko e Kautu he Atua he lagi mo e matakavi he “nofoaiki he Atua, mo e Punua mamoe.” (Heperu 12:22, 28; 13:14; Fakakiteaga 22:3) Ko lautolu ne fakauku he Atua he lalolagi kua hukui ai e maaga ia. Ko lautolu ne tua fakamoli kua hao mai he keliaga, kua tiaki ke fakaata a lautolu ni ke uta fakapaea “mai he maaga.”a
2, 3. (a) Kua kautu fefe e tapuakiaga ha Iehova tali mai he 1919? (e) Tali mai he 1935, ko e heigoa e tupuaga ne hoko?
2 He 1919 ko e tau fekafekau fakauku tua fakamoli kua fakatoka noa mai he tuaga fakapaea, mo e fakamafiti a lautolu ke fakaaoga e magahala he mafola kua mui mai he felakutaki. Ha ko e tau hukui ha Ierusalema he lagi, kua taute e lautolu e kotofaaga mua atu ke fakamatala e tala mitaki he Kautu he Atua mo e ke lagomatai ke he gahua fakapotopoto he tau tagata fakahiku he 144,000. (Mataio 24:14; 2 Korinito 5:20) He 1931 kua hiki e lautolu e higoa kua lata faka-Tohiaga Tapu ko e Tau Fakamoli a Iehova.—Isaia 43:10, 12.
3 Tali mai ai, ko e Tau Fakamoli fakauku he Atua kua nakai fakalolelole. Ti pihia foki nakai maeke ia Hitler mo e hana a tau matakau Nasi ke fakanono a lautolu. Pete ni e favaleaga he lalolagi katoa, kua tupu ha lautolu a gahua he lalolagi oti. Mua atu ke he tau 1935, kua fakalataha e “moto tagata” he lalolagi katoa mo lautolu, ne kua talahau tuai mai he tohi a Fakakiteaga. Ko lautolu nei foki ko e tau Kerisiano kua tukulele mo e papatiso mo e kua “unu foki ha lautolu a tau tapulu, mo e fakahina ha lautolu a tau tapulu ke he toto he Punua mamoe,” ko Iesu Keriso. (Fakakiteaga 7:9, 14) Pete ia, ko lautolu nakai fakauku a lautolu, mo e amaamanakiaga he moui he lagi. Ko e ha lautolu a amaamanakiaga ke liliu mai ke he mena ne fakagalo e Atamu mo Eva, ko e moui mitaki katoatoa he lalolagi parataiso. (Salamo 37:29; Mataio 25:34) He vaha nei, ko e numela he moto tagata tokologa kua molea e lima e miliona he tau solu. Hane fa e kautu e tapuakiaga moli ha Iehova, ka e nakai la hoko mai e kautuaga fakahiku hana.
Tau Tagata Kehe he Faituga Fakaagaga he Atua
4, 5. (a) Tapuaki i fe e moto tagata tokologa ki a Iehova? (e) Ko e heigoa e fakamonuinaaga ne olioli a lautolu ki ai, mo e ko e heigoa e perofetaaga ne fakamoli?
4 Tuga he talahau tuai, ko e moto tagata kua “fekafekau [ke he Atua] ke he aho mo e po ke he faituga hana.” (Fakakiteaga 7:15) Ha kua nakai ko e tau Isaraela fakaagaga mo e fakaekepoa a lautolu, ne kua liga ai ke kitia e Ioane a lautolu ne tutu he faituga i fafo he lotopa he tau Motu Kehe. (1 Peteru 2:5) Ko e mua ue atu ha ia e faituga fakaagaga a Iehova, ko e hana tau matakavi kua puke ai ke he tau monuina lalahi ne, fakalataha ki ai mo Isaraela fakaagaga kua fakauku, he fakaheke ki a ia!
5 Ko e moto tagata tokologa kua nakai fekafekau ke he Atua ke he tuaga kua fakatino mai i loto he lotopa he ekepoa. Kua nakai talahaua tututonu a lautolu ma e kakano he eke mo tau tama hiki fakaagaga he Atua. (Roma 8:1, 15) Pete ia, he fakagahuahua ai e tua ke he lukutoto ha Iesu, kua mea e tuaga ha lautolu ki mua ha Iehova. Kua talahaua tututonu a lautolu ke he kakano ko e hana a tau kapitiga. (Fakatatai Iakopo 2:21, 23.) Kua fakamonuina foki a lautolu ke foaki e tau poa ke he fatapoa fakaagaga he Atua. Ti, ko e manamanatu ke he moto tagata tokologa nei, ko e perofetaaga ia Isaia 56:6, 7 kua hane fa e hokotia ai e fakamoliaga mua ue atu: “Ko e tau tagata kehe foki kua fakalataha mai kia Iehova, ke fekafekau kia ia, mo e fakaalofa ke he higoa a Iehova. . . . To tamai e au a lautolu ke he haku a mouga tapu, mo e fakafiafia ai e au a lautolu ke he haku a fale liogi; ko e ha lautolu a tau poa huhunu mo e ha lautolu a tau poa to talia ia ki luga haku a fatapoa; ha kua talahaua haku a fale ko e fale liogi ma e tau motu oti.”
6. (a) Ko e tau poa fefe ne foaki he tau tagata kehe? (e) Ko e heigoa e fakamanatuaga he mena tuku vala vai ke he gutuhala he ekepoa kua fakamanatu ki a lautolu?
6 Ke he tau poa ne foaki he tau tagata kehe nei “ko e fua haia he tau laugutu ha lautolu [tuga e tau poa kai ne taute fakamitaki], kua fakaaue atu ke he higoa [he Atua]” mo e “mahani mitaki atu mo e fakaalofa atu.” (Heperu 13:15, 16) Ko e mena utu valavai lahi ne fa fakaaoga he tau ekepoa mo fakamea aki a lautolu kua mua atu foki e fakamanatu aoga ke he tau tagata kehe nei. Kua lata foki ia lautolu ke omaoma ke he fakameaaga fakaagaga mo e mahani tuga ne fakamaama mai fakahaga he Kupu he Atua ki a lautolu.
Ko e Tapu mo e Tau Mena ne Ha Ha i Ai
7. (a) Fefe e onoonoaga he moto tagata tokologa ke he tau fakamonuinaaga he ekepoa tapu? (e) Ko e heigoa falu fakamonuinaaga lafi ki luga kua moua he tau tagata kehe?
7 Kua fai kakano kia e Tapu mo e tau mena ne ha ha i ai ma e moto tagata tokologa kehe nei? To nakai ha ha a lautolu ke he tuaga ne fakaata mai he Tapu. Kua nakai liu fanau a lautolu ko e tau fanau fakaagaga he Atua mo e amaamanaki ke he lagi. Kua taute kia he mena nei a lautolu ke mahekeheke? Nakai. Ka e, kua olioli a lautolu ke he ha lautolu a kotofaaga he lagomatai e matakau fakauku he 144,000, mo e fakakite e lautolu e fakaaueaga hokulo ma e finagalo he Atua he hiki mai e tau tama fakaagaga nei, ka fakalataha mo Keriso he lagaki hake e tau tagata ke he mitaki katoatoa. Kua ofania foki, he moto tagata tokologa he tau tagata kehe e fakaalofa totonu noa he Atua he foaki ki a lautolu e amaamanakiaga fakalalolagi he moui tukulagi he Parataiso. Ko e falu he tau tagata kehe nei, tuga e tau Netini i tuai, kua foaki ki ai e tau kotofaaga he leveki mo e takitaki e ekepoa tapu.b (Isaia 61:5) Mai ia lautolu nei ne kotofa e Iesu e “tau iki he lalolagi.”—Salamo 45:16.
8, 9. Ko e heigoa e aoga ne moua mai he moto tagata tokologa mai he manamanatu ke he tau mena ne ha ha i ai he Tapu?
8 Pete ni e nakai hu atu a lautolu ke he Tapu fakatai moli, ko e moto tagata tokologa he tau tagata kehe kua ako e tau fakaakoaga kua kakano mai he tau mena ne ha ha i ai. Tuga ni e fakatuaga lamepa kua fakatumau ke utu e lolo, ti pihia foki e tau tagata kehe kua lata ma e agaga tapu ke lagomatai a lautolu ke tolomaki ki mua e maama he kupu moli mai he Kupu he Atua, ne puhala mai he “fekafekau fakamoli mo e loto matala.” (Mataio 24:45-47) Fakaholo atu ai, ko e agaga tapu he Atua kua lagomatai a lautolu ke omaoma e uiina nei: “Kua pehe mai foki e Agaga mo e kitofaitane [ko lautolu ne fakauku ne toe], ati hau ā; kia pehe atu foki a ia kua fanogonogo, Ati hau ā; ko ia foki kua fia inu kia hau a ia, katoa foki mo ia kua manako ki ai, kia uta noa e ia e vai he moui.” (Fakakiteaga 22:17) Ti, ko e fakatuaga lamepa ko e fakamanatu ke he moto tagata tokologa he ha lautolu a matagahua ke fakakikila atu ko e tau Kerisiano mo e ke fehola kehe mai he ha mena he aga, manatu, kupu, po ke gahua ne fakahukia aki e agaga tapu he Atua.—Efeso 4:30.
9 Ko e laulau he areto kua fakamanatu e moto tagata tokologa ke fakatumau ke he malolo tino fakaagaga, kua lata ia lautolu ke uta tumau e tau mena kai fakaagaga mai he Tohi Tapu mo e tau tohi he “fekafekau fakamoli mo e loto matala.” (Mataio 4:4) Ko e fatapoa he tau mena manogi kua fakamanatu ki a lautolu e aoga he liogi fakamakamaka ki a Iehova ma e lagomatai ke maeke ke tumau ha lautolu a fakamoli. (Luka 21:36) Ko e tau liogi ha lautolu kua lata ke fakalataha e tau talahauaga mai he loto he fakaheke mo e fakaaue. (Salamo 106:1) Ko e fatapoa he tau mena manogi kua fakamanatu foki ki a lautolu e manako ke fakaheke e Atua ke he falu he tau puhala, tuga ke he ha lautolu a lologo mo e loto katoa e tau lologo he Kautu he tau feleveiaaga Kerisiano mo e he tauteute fakamitaki ha lautolu ke “talahau ai, ke hoko mai e fakamouiaga.”—Roma 10:10.
Ko e Kautuaga Katoatoa he Tapuakiaga Moli
10. (a) Ko e heigoa e amaamanakiaga mua ue atu kua maeke ke onoono atu a tautolu ki ai? (e) Ko e heigoa e tupuaga ka hoko fakamua?
10 He vaha nei “ko e tau motu oti kana” mai he tau motu kua tafe mai ke he fale ha Iehova he tapuakiaga. (Isaia 2:2, 3) He fakamoli ai e mena nei, kua fakakite mai he Fakakiteaga 15:4: “Ko hai kia taha, ma Iki na e, kua nakai matakutaku kia koe, mo e nakai fakaheke atu ke he hau a higoa? ha ko koe hoko koe ni kua mitaki; ha ko e mena to o mai e tau motu oti, mo e hufeilo ki ho mua; ha kua fakakite mai tuai hau a tau fakafiliaga tonu.” Ia Sakaria veveheaga 14 kua fakamaama mai e mena ka mui mai. He vaha tata mai i mua, ko e tau aga kelea he tokologa he tau tagata he lalolagi ka hoko ke he tapunu he fakapotopoto a lautolu ke he magaaho fakahiku ke fakahoko e felakutaki ki a Ierusalema—ko lautolu he lalolagi he Ierusalema he lagi. Ati gahua ai a Iehova. Ha ko e Atua-Toa, “to haele atu ai a Iehova ke tau mo e tau motu ia” ne taute ai e keliaga nei.—Sakaria 14:2, 3.
11, 12. (a) To tali fefe e Iehova ke he keliaga he lalolagi he tau tagata tapuaki he hana a faituga? (e) Ko e heigoa mogoia e fua he felakutaki he Atua?
11 “Ko e malaia hanai, ke ta aki e Iehova e tau motu oti ne tau mo Ierusalema; to tutue ni ha lautolu a tau tino ka kua tutu agaia a lautolu ke he tau hui ha lautolu, to tomo ai ha lautolu a tau mata ke he tau poko mata ha lautolu, mo e tau alelo ha lautolu to oti ai ni ke he tau gutu ha lautolu. Ko e aho ia foki to ha i ai kia lautolu e fakaatukehe lahi mai ia Iehova, ti takitaha ha lautolu mo e toto ai e taha e lima he taha; to takitaha foki a lautolu mo e nikiti ki luga ha lautolu a tau lima, ko e taha ke he taha.”—Sakaria 14:12, 13.
12 Liga ke fakatai po ke moli e malaia nei, liga kua lata ia tautolu ke fakatali mo e kitia. Pete ia, taha e mena kua moli. Ha ko e tau fi he Atua kua hane fa e holo ki mua ke taute ha lautolu a keliaga katoatoa he tau fekafekau ha Iehova, to fakaotioti a lautolu ha ko e tau fakatataaga ofoofogia he malolo mua atu he Atua. To fakamamate ai ha lautolu a tau gutu. Kua eke ai ko e ha lautolu a tau alelo he totokoaga ke tutue. To eke ai ha lautolu a foliaga auloa ke pulefu ke he ha lautolu a kitiaaga, tuga ko e ha lautolu a tau mata kua tutue. Ko e ha lautolu a tau malolo fakatino, ne kua fakamalolo a lautolu ke totoko, to malona tiaki. He fakagoagoa ai, to fuluhi a lautolu ke he taha mo e taha mo e kelipopo ai. Ti ko e tau fi oti he tapuakiaga he Atua he lalolagi to holoholo kehe. Fakamui, ko e tau motu oti to fakaohooho ai ke mailoga e pule katoatoa ke he lalolagi mo e lagi katoatoa ha Iehova. To fakamoli ai e perofetaaga: “To eke foki a Iehova mo Patuiki ke he lalolagi.” (Sakaria 14:9) He magaaho fakamui, to lili a Satani mo e hana a tau temoni ka kamata ai e Pule Afe Tau a Keriso aki e tau fakamonuinaaga lalahi kua fakatoka mai ma e tau tagata.—Fakakiteaga 20:1, 2; 21:3, 4.
Ko e Liu Tu Mai he Lalolagi
13. Ko hai a “lautolu oti ne toe he tau motu”?
13 Kua fakaholo atu e perofetaaga a Sakaria he Sak veveheaga 14, kupu 16: “Ko lautolu oti ne toe he tau motu ne o mai ke tau mo Ierusalema, to o hake ni a lautolu ke he taha tau mo e taha tau ke hufeilo ke he Patuiki, ko Iehova Sapaota, ke eke ai foki e galue he tau fale api.” Hagaao ke he Tohi Tapu, ko e tau tagata momoui oti he vaha nei ne fakatumau ke nonofo ke hoko ke he fakaotiaga he fakatokatokaaga kelea nei mo e kua fakafili ai ke eke mo tau fi he tapuakiaga moli ka hokotia ke he “mahaikava tukulagi.” (2 Tesalonia 1:7-9; kikite foki Mataio 25:31-33, 46.) To nakai moua e lautolu e liu tutu mai. Ti kau ke pihia, ko lautolu “ne toe” fakalataha mo e tau tagata he tau motu ne mamate ato hoko e felakutaki fakahiku he Atua mo e ma lautolu ne ha ha i ai e amaamanaki ne fakave he Tohi Tapu ke liu tutu mai. “Ko e mena hoko ke he aho,” he mavehe e Iesu, “ke logona ai ke he hana leo a lautolu katoa ha he tau tukuaga, mo e o mai ai. Ko lautolu ne mahani mitaki, to tutu mai ke he moui; ka ko lautolu ne mahani kelea, to tutu mai ke he fakahala.”—Ioane 5:28, 29.
14. (a) Ko e heigoa ha lautolu ka liliu tutu mai kua taute ke moua e moui tukulagi? (e) Ko e heigoa e mena ka tupu ki a lautolu ne nakai fia manako ke tukulele a lautolu ni ki a Iehova mo e taute e tapuakiaga moli?
14 Ko lautolu oti nei ne liliu tutu mai kua lata ke taute e taha mena ke maeke he ha lautolu a liu tutu mai ke eke mo moui mo e nakai ko e mena ke hoko ke he fakafiliaga. Kua lata a lautolu ke o mai ke he tau lotopa he lalolagi he faituga a Iehova mo e hufeilo he tukulele ke he Atua puhala ia Iesu Keriso. Ko e ha tagata ne liu tu mai ne nakai taute e mena nei ka mamahi ke he malaia taha ne hoko ke he tau motu he vaha fou nei. (Sakaria 14:18) Ko hai ne iloa ko e tokofiha ka fakaliu tu mai ke fakalataha mo e fiafia mo e moto tagata tokologa he fakamanatu e Galue he Tau Fale Api kua fakatai moli? Nakai fakauaua ai, to ha ha ai e tokologa mo e ko e faituga fakaagaga ha Iehova to fua atu ai ke mua ue atu!
Ko e Galue Fakatai Moli he Tau Fale Api
15. (a) Ko e heigoa falu he tau mena kehe lahi ke he Galue he Tau Fale Api ha Isaraela i tuai? (e) Ko e ha ne foaki ai 70 e povi tane he magahala fai galue?
15 He tau tau takitaha, kua manako ai ke he tau Isaraela i tuai ke fakamanatu e Galue he Tau Fale Api. Kua katoa ai ke taha e fahi tapu mo e hokotia ai ke he fakaotiaga he okookoaga he ha lautolu a heleheleaga. Ko e magaaho olioli he fakaaueaga. He fakatumau he fahi tapu, kua maeke ia lautolu ke nonofo ke he tau fale fakaku he ufiufi aki e tau lau akau, mua atu ke he tau lau pama. Ko e galue nei ne fakamanatu ki a Isaraela he magaaho ne fakahao he Atua e ha lautolu a tau tupuna mai i Aikupito mo e magaaho ne leveki e ia a lautolu he tau fale api ka e o fano ke 40 e tau tau ke he tutakale ato hoko ke he Motu he Maveheaga. (Levitika 23:39-43) He magahala he galue, 70 e povi tane kua poa ai i luga he fatapoa he faituga. Fakamoli ai, kua fakakite he mena nei he galue ko e perofetaaga he mitaki katoatoa mo e katoatoa he gahua fakahao ne taute e Iesu Keriso. Ko e aoga he hana a poa lukutoto to tupuolamoui ai ke tokologa lahi e tau magafaoa he tau magafaoa 70 he tau tagata ne tutupu mai ia Noa.—Kenese 10:1-29; Numera 29:12-34; Mataio 20:28.
16, 17. (a) Kamata ne fe e Galue he Tau Fale Api kua fakatai moli, mo e fefe e tauteaga ki ai? (e) Fefe e fakamanatuaga ne taute he moto tagata tokologa?
16 Ti ko e Galue he Tau Fale Api i tuai kua tuhi ke he fakapotopotoaga olioli he fakahao e tau tagata agahala ke he faituga fakaagaga mua ue atu a Iehova. Ko e galue fakatai nei kua kamata he Penetekoso 33 V.N. mo e talahauaga he fakapotopoto olioli he tau Isaraela fakaagaga ke he fakapotopotoaga Kerisiano. (Gahua 2:41, 46, 47) Ko lautolu nei ne fakauku kua fakaaue ha ko lautolu ko e “tau tagata kehe” he lalolagi a Satani kakano ko e ha lautolu a “māga moli ha ha he lagi ia.” (1 Peteru 2:11; Filipi 3:20) Ko e galue olioli kua atagia fakaku he tiaki taofiaga kua fua mai he tupuaga he Kerisitenitome. (2 Tesalonia 2:1-3) Pete ia, ko e galue kua liu aki mai he 1919 mo e fakapotopoto fiafia he tau tagata he 144,000 fakahiku he tau Isaraela fakaagaga, mui mai ai e moto tagata tokologa he Fakakiteaga 7:9.
17 Ko e moto tagata tokologa nei ne fakatino mai kua ha ha ai e tau lau pama ke he ha lautolu a tau lima, ne kua fakakite ko lautolu foki ko e tau tagata fakamanatu fiafia he Galue he Tau Fale Api kua fakatai moli. Ha ko e tau Kerisiano tukulele, kua fakalataha foki a lautolu mo e fiafia ke he gahua he fakapotopoto loga he tau tagata tapuaki ke he faituga a Iehova. Fakalahi atu ki mua, ko e tau tagata agahala, kua fakaaue a lautolu kua nakai fai tonu ke nonofo mau he lalolagi. Ko lautolu, fakalataha mo lautolu ne liu tutu mai, kua lata ke fakagahuahua e tua ke he poa lukutoto a Keriso to hokotia a lautolu ke he mitaki katoatoa he tagata he fakaotiaga he Pule Afe Tau a Keriso.—Fakakiteaga 20:5.
18. (a) Ko e heigoa e mena ka tupu he fakaotiaga he Pule he Afe Tau a Keriso? (e) To fakaoti fefe e kautuaga he tapuakiaga moli a Iehova?
18 Ti, ko e tau tagata tapuaki he Atua he lalolagi ka tutu ki mua hana ko e tagata mitaki katoatoa kua nakai lata ma e ekepoa he lagi. To hoko mai e magaaho ke “tuku atu e [Iesu Keriso] e kautu ke he Atua, ko e Matua haia.” (1 Korinito 15:24) To fakatoka mai a Satani ke he “tau aho gahoa” ke kamatamata e mitaki katoatoa he tau tagata. Ko e ha tagata ne nakai fakamoli to fakaotioti tukulagi, fakalataha mo Satani mo e hana a tau temoni. Ko lautolu ne tumau ke he fakamoli to moua e moui tukulagi. To nonofo tumau a lautolu ke he Parataiso he lalolagi. Ti ko e Galue he Tau Fale Api kua fakatai moli ka eke ke hoko ke he fakaotiaga mua ue atu mo e kautu. Ko e tapuakiaga moli to kautu ke he lilifu tukulagi a Iehova mo e fiafia tukulagi he tagata.—Fakakiteaga 20:3, 7-10, 14, 15.
[Tau Matahui Tala]
a Ma e kupu ke he kupu he talahauaga ia Sakaria veveheaga 14, kikite e tohi Paradise Restored to Mankind—By Theocracy!, ne lomi fakailoa he 1972 he Watchtower Bible and Tract Society of New York, Inc., tau veveheaga 21 mo e 22.
b Ma e lahi atu he vala tala ke he Netini he vaha fou nei, kikite Ko e Kolo Toko, Me 1, 1992, lau tohi 14.
Tau Huhu Fakamanatu
◻ Fefe e keliaga a “Ierusalema” he felakutaki fakamua he lalolagi?—Sakaria 14:2.
◻ Ko e heigoa e mena ne tupu ke he tau tagata he Atua tali mai he 1919?
◻ Ko hai he vaha nei ne fakalataha ke he fakamanatuaga he Galue he Tau Fale Api?
◻ To kautu katoatoa fefe e tapuakiaga moli?
[Fakatino he lau 30]
Ne fakaaoga ai e tau lau pama he fakamanatu e Galue he Tau Fale Api