“Taha Mai Ni he Tau Momoui Tokologa ne Aamotia e Koe”

IA IANUARI 1996 ne mole, kua gagao ai a Carol he tuma ke he uho ulu. Kua hoko atu a ia ke he atu tau 60 hana mo e ato hoko ki ai ko e fifine fiafia mo e hakahakau tumau a ia mo e ko e fakamaloloaga ma e tau tagata oti. Ka e ko e tau ekekafo he magaaho nei kua lali ai ke uta kehe e gagao mate ia. Ke he lotouho he hana taufetului, ne moua e Carol e tohi ne mui mai:

“Kia Carol:

“Momoko lahi au ha ko e hau a kaumahala he malolo tino. Uhoaki ai, kua ha ha ia tautolu e amaamanakiaga moli ne kua lagomatai he Tohi Tapu a tautolu ke iloa mo e fakaalofa. Ko e amaamanakiaga nai ma e Kautu ha Iehova ke pule ke he lalolagi ke maeke ia tautolu ke nonofo he tuaga parataiso, ko e magaaho ke amaamanaki lahi ki ai a tautolu oti.

“Manako au ke iloa e koe ko e gahua fakamatala fakatagata hau kua fakahao e tau tagata tokologa mai he mate tukulagi. Ko au taha he tau tagata nei. Nakai iloa e au ko e manatu nakai e koe e magaaho fakamua ne feleveia a taua. He magaaho ia ko e 20 e tau haku he moui. Loloa e ulu haku, fakafua e tau tulaki, mo e fio ai fakalataha mo e matakau he tau kege. Fai fana oti a mautolu mo e nakai fai fakaalofa moli ma e ha tagata.

“Ne tukituki e koe e gutuhala haku mo e taha Fakamoli mo e mai ki a au mai he Kolo Toko mo e Awake! Ne lali au ke atu e tala ki a koe mo e tala atu kua nakai loto au ke he tau mekasini. Ne fakailoa mai e koe ki a au nakai ko e hau noa a koe ke moua e tau mena foaki. Ne tala mai e koe ki a au ko e taute a koe he gahua ke lagomatai e tau tagata ke totou e Tohi Tapu. Nakai manatu e au ko e uta e au e tau mekasini po ke totou ai. Pete ia, kua to e koe e tega he kupu moli he moui haku.

“He falu tau fakamui ko e taha Fakamoli, ko Gary, ne hau ai ke he kaina he matua fifine haku he mogoia ne ha ha ai au. Ne tala age e au ki a ia e ahi mai hau he tau tau fakamua atu. Ne leva e fakaako e Gary e Tohi Tapu mo au ato hokotia atu au ke papatiso he 1984. Magaaho nei hane fa e fakaako e au e kupu moli he Kautu he Atua ke he fanau haku.

“Manatu au ko au ni taha mai he tau momoui tokologa kua aamotia he tau tau hau he fekafekauaga tua fakamoli. Pete ia, mai he fakaalofa totonu nei, kua fakamalolo e koe au mo e haku a magafaoa ke iloa e Atua Mua Ue Atu, ko Iehova, mo e hana a Tama, ko Iesu Keriso. Amaamanaki lahi au ke he aho ke maeke ia au ke kitia a koe ke he fakatokaaga fou he tau mena ko e magaaho ka holoholo kehe e Iehova e tau hihina mata mai he tau mata ha tautolu, mo e to nakai liu fai mate.​—Fakakiteaga 21:4.

“Ki a au mo e haku a magafaoa, kua fiafia a mautolu ha kua ha ha ia mautolu e magaaho ke iloa a koe mo e fai vala ke he gahua fakamatala hau. Fakaaue lahi.

“Mo e fakaalofa fakamatakainaga,

Peter”

He mole e ono e mahina he gagao, ne mate a Carol ia Mati 1996, kua gana ai loga he tau tega he kupu moli ke he gahua he 35 e tau hana ko e tagata evagelia makaukau. Ne ako e ia nakai iloa he taha e magaaho ka tupu e tega, ti pihia ke he tau tau fakamui.​—Mataio 13:23.