“Nakai Toka e Iehova Hana Motu”
“Loga e tau mena kelea ke hohoko ke he tagata tututonu; ka e laveaki e Iehova a ia mai he tau mena oti ia.”—SALAMO 34:19.
1, 2. (a) Fakamonuina fefe e Iehova hana tau tagata he vaha nei? (e) Ko e heigoa e tau mena kua fehagai ki ai e tokologa he tau Kerisiano, mo e ko e heigoa e tau huhu kua tutupu mai?
HE FAKAMOLI e perofetaaga he Tohi Tapu, kua nonofo e tau tagata tapuaki a Iehova he parataiso fakaagaga. (2 Korinito 12:1-4) Kua ha ha ai e Tau Fakamoli a Iehova ke he fakalatahaaga auloa he lalolagi katoa ne kua fakakite ai e feofanaki mo e kaufakalataha. (Ioane 13:35) Kua olioli e lautolu e iloilo hokulo mo e maama lahi he tau kupu moli he Tohi Tapu. (Isaia 54:13) Ko e loto fakaaue ha ia ha lautolu ki a Iehova ha kua foaki age e ia ki a lautolu e fakamonuinaaga he eke mo tau tagata uiina ke he hana fale uta fano fakaagaga!—Salamo 15:1.
2 Ha kua olioli ai e lautolu oti i loto he fakatokatokaaga a Iehova e monuina fakaagaga, kua tuga ke nonofo mafola mo e hagahaga mitaki e falu ka e kua moua ai he falu e tau matematekelea kehekehe. Tokologa e tau Kerisiano kua leva e moua ha lautolu ke he tau tuaga maanu mo e kua nakai fai tuluiaga e amaamanakiaga. Kua pauaki e fakaloleloleaga ki lalo he tau tutuaga pihia. (Tau Fakatai 13:12) Ko e tau mena kelea kia ko e fakamoliaga he nakai fiafia he Atua? Hane fa e foaki kia e Iehova e puipuiaga pauaki ke he falu he tau Kerisiano ka e toka e falu?
3. (a) Kua lago ka ki a Iehova e tau mena kelea kua moua he hana tau tagata? (e) Ko e ha kua moua foki he tau tagata tapuaki tua fakamoli a Iehova e mamahi he tagata?
3 Kua tali he Tohi Tapu: “Aua neke pehe mai taha ka kamatamata a ia, Kua kamatamata au mai he Atua; ha ko e mena nakai kamatamata ai e Atua ke he mena kelea, nakai kamatamata foki e ia ke he taha.” (Iakopo 1:13) Ko Iehova ko e Puipuiaga mo e Fakatumauaga he hana tau tagata. (Salamo 91:2-6) “Nakai toka e Iehova hana motu.” (Salamo 94:14) Nakai kakano e mena nei to nakai moua he tau tagata tapuaki fakamoli e mamahi. Kua maluia e fakatokatokaaga he tau mena he lalolagi mogonei ki a lautolu takitokotaha ne kua nakai mitaki katoatoa tali mai he kamataaga. Tokologa kua matahavala, mo e tokogahoa kua mahani kelea lahi. Nakai fai ia lautolu kua haga atu ki a Iehova ma e pulotu. Kua fua e mena nei ke he matematekelea lahi he tagata. Kua fakamaaliali mai he Tohi Tapu kua nakai maeke tumau e tau tagata a Iehova ke fehola kehe mai he tau fua momoko he nakai mitaki katoatoa mo e mahani kelea he tagata.—Gahua 14:22.
Amanaki e Tau Kerisiano Fakamoli ke Mamahi
4. Ko e heigoa kua amanaki e tau Kerisiano oti he nonofo ai he fakatokatokaaga kelea nei he tau mena, mo e ko e ha?
4 Pete ni e nakai fai vala he lalolagi, kua nonofo e tau tutaki a Iesu ke he lotouho he fakatokatokaaga nei he tau mena. (Ioane 17:15, 16) Kua fakatapakupaku a Satani i loto he Tohi Tapu ko e pule malolo lahi i tua he lalolagi nei. (1 Ioane 5:19) Ati, kua amanaki mafiti po ke mule e tau Kerisiano oti ke fehagai mo e tau mena vihi kelea lahi. Mo e manatu ia, kua talahau e aposetolo ko Peteru: “Kia nonofo fakalatalata a mutolu, kia mataala a mutolu ha ko ia kua eke a mutolu mo tau fi hana, ko e tiapolo ia, kua faifano a ia tuga ne leona tagi, kua kumi kia falu ke faiola ai e ia; kia totoko atu a mutolu kia ia, mo e mauokafua a mutolu ke he tua, he iloa e mutolu ha ne fakakatoatoa e tau mena mamahi ia ni ke he tau matakainaga ha mutolu ha he lalolagi.” (1 Peteru 5:8, 9) E, ko e fakalatahaaga katoa he tau Kerisiano kua amanaki ai ke he tau mamahi.
5. Fakamaaliali fefe e Iesu to moua he tau Kerisiano tua fakamoli e tau fua momoko he moui?
5 Pete ni e hokulo e fakaalofa ha tautolu ki a Iehova mo e fakamoli ai ke he hana tau matapatu fakaakoaga, to moua e tautolu e tau fua momoko he moui. Kua fakamaama fakamitaki e Iesu e mena nei he hana a fakataiaga ne fakamau ia Mataio 7:24-27, ne kua fakakite e ia e kehekeheaga ha lautolu kua omaoma ke he hana a tau kupu mo lautolu ne nakai. Ne fakatatai e ia e tau tutaki omaoma ke he tagata loto matala ne fakatu e ia hana fale i luga he mena patu. Ko lautolu ne nakai omaoma ke he hana tau kupu kua fakatatai e ia ke he tagata goagoa ne fakatu e ia hana fale i luga he oneone. He mole e afa lahi, ko e fale ni ne ta i luga he mena patu ne hao. Mailoga ko e fale he tagata loto matala, “kua to mai e uha, kua lele mai foki e tau vai, kua agi mai foki e matagi, kua pehi mai ke he fale ia, ka e nakai ni veli a ia.” Nakai mavehe a Iesu ko e to olioli tumau he tagata loto matala e mafola mo e totokaaga. Ka e, ko e loto matala he tagata ia ka tauteute a ia ke hao mai he afa. Ko e manatu pihia kua talahau ke he fakataiaga he tagata gana saito. Kua fakamaama mai e Iesu ko e tau tagata tapuaki omaoma mo e “loto fakamoli mo e mitaki” foki ka “fua mai e tau fua ke he fakauka.”—Luka 8:4-15.
6. He fakataiaga a Paulo ke he tau koloa nakai vela, ko hai ka hokotia ke he kamatamata ke he afi?
6 He tohi ai ke he tau Korinito, kua fakaaoga he aposetolo ko Paulo e vagahau metafoa ke fakatai e mena kua lata ma e tau fua kua nakai malona ne kua maeke ke lagomatai a tautolu he fehagai mo e tau kamatamata. Ko e tau koloa pihia kua nakai maeke ke vela tuga e auro, ario, mo e tau maka uho kua tatai ai ke he tau fua mahani Atua. (Fakatatai Tau Fakatai 3:13-15; 1 Peteru 1:6, 7.) Ke he taha fahi, ko e tau aga he tino kua fakatatai ke he tau koloa mukamuka ke vela. Ti pehe a Paulo: “To fakakite mai e tau gahua he tau tagata takitokotaha; to fakailoa mai he aho, ha ko e mena to fakakite mai ke he afi; to kamatamata foki e tau gahua he tau tagata takitokotaha ke he afi po ke fefe. Kaeke ke tumau e gahua he taha tagata kua ati hake ai e ia, to moua e ia e taui.” (1 Korinito 3:10-14) Kua liu foki e mena nei fakamaama mai he Tohi Tapu to fehagai oti a tautolu mo e falu puhala he kamatamata ke he afi.
7. Hagaao ki a Roma 15:4, maeke fefe e tau Tohiaga Tapu ke lagomatai a tautolu ke fakauka ke he tau kamatamata?
7 Kua ha ha ai e tau talahauaga loga he Tohi Tapu ke he tau fekafekau fakamoli he Atua ne kua fakauka ai ke he tau mena kelea, ke leva lahi ai he falu a magaaho. Ka e, nakai toka e Iehova a lautolu. Liga tokaloto foki he aposetolo ko Paulo e tau fakafifitakiaga pihia he magaaho ne pehe a ia: “Ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.” (Roma 15:4) Manamanatu la ke he tau fakafifitakiaga he tau tagata tane tokotolu, ne olioli e fakafetuiaga tata mo e Atua, ka e mamahi ke he tau mena kelea loga.
Tau Mena ne Iloa e Tautolu Mai he Tau Talahauaga he Tohi Tapu
8. Ko e heigoa kua fakaata e Iehova ke he mena ne tupu ki a Iosefa, ti fiha e leva?
8 Ko e tama tane a Iakopo ko Iosefa kua ofania e Iehova tali mai he tote. He nakai fai kelea ni a ia, ne mamahi agaia a ia ke he tau mena kelea. Kua tapaki a ia mo e taute fakakelea he hana ni a tau lafu. Kua fakafua a ia ko e tupa ke he motu kehe ne kua hokotaki fakavai ki a ia mo e kua tuku ai he “luo.” (Kenese 40:15) I ai, “ne fakamamahi e lautolu hana tau hui he lili; ne hoko ni a ia ke he lapatoa.” (Salamo 105:17, 18) He hana a fakatupa mo e tuku he fale puipui, kua nakai fakauaua a Iosefa he ole fakatumau ki a Iehova ma e fakahaoaga. Ka e, ke he falu 13 e tau tau, pete ni e fakamalolo e Iehova ke he tau puhala kehekehe, ne ala hake a ia he tau pogipogi oti ko e tupa po ke pagota agaia ni.—Kenese 37:2; 41:46.
9. Ko e heigoa kua fakauka a Tavita ki ai ke loga e tau tau?
9 Ko e mena tupu taha ia foki ki a Tavita. He magaaho ne fifili e Iehova e tagata tane kua lata ke pule ki Isaraela, ne pehe a ia: “Kua moua e au a Tavita e tama a Iese, ko e tagata ke lata mo e haku a loto.” (Gahua 13:22) Pete ni e tuaga mitaki hana ki mua he fofoga a Iehova, kua lahi e mamahi ha Tavita. He hagahaga kelea lahi mahaki, ne gahoa e tau tau ne fakamumuli a ia ke he tutakale, he tau ana, ke he tau avaava maihi, mo e he motu kehe. He kumi tuga e manu favale, kua mamahi a ia he tau fakaloleloleaga mo e matakutaku. Ke he tau mena oti ia, ne fakauka a ia he malolo a Iehova. Kua liga tonu a Tavita ke talahau mai he hana ni a iloaaga: “Loga e tau mena kelea ke hohoko ke he tagata tututonu; ka e laveaki e Iehova a ia mai he tau mena oti ia.”—Salamo 34:19.
10. Ko e heigoa e mena kelea lahi mahaki ne hoko ki a Napota mo e hana a magafaoa?
10 Ke he vaha he perofeta ko Elia, ko e 7,000 ni i Isaraela ne nakai fakatokotui ke he atua fakavai ko Paala. (1 Tau Patuiki 19:18; Roma 11:4) Liga ko Napota taha ia lautolu, ne eke mo tagata fakamatematekelea ke he mahani nakai tonu. Ne mamahi a ia ha ko e ekefakakelea he tukumale he vagahau kelea. Ha kua agahala ai, ne fakahala a ia mo e fakafili he fakatufono fakapatuiki ke mate he tauliti maka, mo e epoepo ai he tau kuli hana toto. Ti tamate foki hana tau tama tane! Ka e, kua mea a ia he tukumale. Ko e tau tagata ne fakamoli ne totoko ki a ia ko e tau tagata pikopiko. Ko e matagahua katoa ko e lagatau kamata he Patuiki Fifine ko Iesepela ke maeke ai he patuiki ke hokotia atu ke he ulu vine a Napota.—1 Tau Patuiki 21:1-19; 2 Tau Patuiki 9:26.
11. Ko e heigoa he aposetolo ko Paulo ne talahau mai ki a tautolu hagaao ke he tau tagata tane mo e tau fifine tua fakamoli he fakamauaga tuai he Tohi Tapu?
11 Ko Iosefa, Tavita, mo Napota ko e tokotolu ni a ia mai he tau tagata tane mo e fifine tua fakamoli tokologa ne kua talahau he Tohi Tapu ne mamahi he tau mena kelea. Ne tohi he aposetolo ko Paulo e fatiakiaga he fakamauaga tuai he tau fekafekau a Iehova i tuai. Ne vagahau a ia i ai ki a lautolu ne “kamatamata foki e falu he va ki ai, mo e fahi, katoa ni mo e lili, mo e tuku ke he tau fale puipui; ne taulitimaka a lautolu, ne helehele ke he tau kili, ne kamatamata, ne tamate ke he pelu; ne o fano a lautolu mo e tapulu ke he tau kili mamoe mo e tau kili koti; ne nonofogati a lautolu, mo e ekefakakelea mo e matematekelea, (Nakai lata e lalolagi ke nonofo ai a lautolu,) ne o fano a lautolu ke he tau tutakale, mo e tau mouga, mo e tau ana, mo e tau maihi he kelekele.” (Heperu 11:36-38) Ka e nakai toka e Iehova a lautolu.
Leveki e Iehova a Lautolu kua Mamahi
12. Ko e heigoa e falu he tau matematekelea ne moua he Tau Fakamoli a Iehova he vaha nei?
12 Ka e kua e tau tagata a Iehova he vaha nei? Ha ko e fakatokatokaaga, kua maeke ia tautolu ke falanaki ke he puipuiaga faka-Atua mo e puhala haohao mitaki he tau aho fakamui mo e matematekelea lahi. (Isaia 54:17; Fakakiteaga 7:9-17) Pete ia, he takitokotaha, kua mailoga e tautolu ko e “vaha mo e tau mena ke tutupu ai” kua hoko ia ke he tau tagata oti kana. (Fakamatalaaga 9:11) Kua tokologa e tau Kerisiano tua fakamoli he vaha nei kua mamahi ha ko e tau mena kelea. Kua fakauka falu ke he mativa kelea lahi. Kua vagahau e Tohi Tapu ke he “tau tagata kua mamate e tau matua, mo e tau fifine takape” Kerisiano ne matematekelea. (Iakopo 1:27) Kua mamahi e falu ha ko e fua he tau moumouaga tutupu noa, tau felakutaki, tau holifono, fakaaoga hehe he malolo, gagao, mo e mate.
13. Ko e heigoa e tau mena tutupu uka ne nakai la leva ia e hokotaki?
13 Ma e fakatai, he ha lautolu a hokotaki he tau 1996 ke he Kau Fakatufono he Tau Fakamoli a Iehova, ko e tau la ofisa he Kolo Toko ne talahau ko e falu he tau matakainaga ha tautolu kua mamahi ai ke he tau tuaga kelea he tuku fale puipui kakano ha ko e ha lautolu a pipiki ke he tau matapatu fakaakoaga he Tohi Tapu. Tolu e fakapotopotoaga ke he motu i Amerika Toga kua moumou he magaaho ne fakaohooho he tau matakau felakutaki e tau teau he Tau Fakamoli ke o kehe mai he matakavi. Ke he motu he Fahi Lalo i Aferika, kua mamate e falu he Tau Fakamoli ne tauhele he felakutaki tagata noa. Ke he motu he Lotouho i Amerika, kua fita e kelea lahi mahaki he tuaga fakatupe he falu he tau matakainaga ka kua fakaau atu ha ko e moumou he afa. Ke he falu motu, kua ha ha ai e mativa mo e kuku he tau mena kai kua liga nakai ko e tau mena vihi lahi, ka ko e tau fakaohoohoaga kelea ne fakalolelole aki e olioli he falu. Kua pehia e falu ha ko e tau peehiaga he moui he vaha fou nei. Ha ko e fekehekeheaki he tau tagata, kua liga ke lolelole agaia e logonaaga he falu he magaaho ka fakamatala e lautolu e tala mitaki he Kautu.
14. (a) Ko e heigoa kua iloa mai e tautolu he fakafifitakiaga a Iopu? (e) He nakai manamanatu kelea, ko e heigoa ha tautolu ka lata ke taute kaeke ke tupetupe a tautolu?
14 Ko e tau mena nei kua nakai ke fakamatutaki aki ko e fakamoliaga he nakai fiafia e Atua. Manatu e mena ne tupu ki a Iopu mo e tau matematekelea loga ne mamahi ai a ia. Ko ia ko e “tagata mahani hakohako mo e mahani tonu.” (Iopu 1:8) Ko e fakalolelole ha a ia kua liga logona e Iopu he magaaho ne talahau e Elifasa a ia kua hehe e tau mena taute! (Iopu, tau veveheaga 4, 5, 22) Kua nakai manako a tautolu ke mafiti ke fakaoti aki kua moua e tautolu e tau mena kelea kakano kua fakaita e tautolu a Iehova ke he falu puhala po ke kakano kua uta kehe e Iehova hana a fakamonuinaaga. Ko e manamanatu kelea he hokotia ke he matematekelea lahi ka fakalolelole e tua ha tautolu. (1 Tesalonia 3:1-3, 5) Ka tupetupe, ko e mena kua mua atu e mitaki ke manamanatu fakahokulo ke he mena moli ko Iehova mo Iesu kua tata ke he tagata tututonu pete ni ko e heigoa ka tutupu.
15. Iloa fefe e tautolu kua manamanatu lahi a Iehova hagaao ke he tau mena kelea ne mamahi ai hana tau tagata?
15 Ne fakamafanatia he aposetolo ko Paulo a tautolu he pehe a ia: “Ko hai kia taha ke fakamavehe a tautolu mo e fakaalofa a Keriso? ko e matematekelea kia, po ke fakaatukehe, po ke favale, po ke hoge, po ke nakai fai felevehi, po ke tau mena uka, po ke pelu? . . . Kua iloa tonuhia e au nakai maeke ke he mate, po ke moui, po ke tau agelu, po ke tau iki, po ke tau toa, po ke tau mena ha i ai nai, po ke tau mena ne tatali, po ke tokoluga, po ke hokulo, po ke taha mena kua eke, nakai maeke ke he tau mena ia ke fakamavehe a tautolu mo e fakaalofa he Atua, ha ia Keriso Iesu ha tautolu a Iki.” (Roma 8:35, 38, 39) Kua hokulo lahi e manamanatuaga ha Iehova hagaao ki a tautolu mo e kua mataala ke he mamahi ha tautolu. Ha ko e hola fano agaia, ne tohi e Tavita: “Ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu. Kua tata mai a Iehova kia lautolu kua loto malipilipi.” (Salamo 34:15, 18; Mataio 18:6, 14) Kua leveki he Matua ha tautolu he lagi a tautolu mo e fakaalofa hofihofi e logonaaga ma lautolu kua mamahi. (1 Peteru 5:6, 7) Kua foaki e ia e mena kua lata ia tautolu ke fakauka, ke he ha mamahi ni kua hoko ki a tautolu.
Fakatumau he Tau Mena Fakaalofa a Iehova a Tautolu
16. Ko e heigoa e foakiaga mai ia Iehova ne lagomatai a tautolu ke fakauka, mo e fefe?
16 Pete ni e nakai amanaki a tautolu ke hao mai he tau matematekelea he moui he fakatokatokaaga tuai nei he tau mena, kua “nakai tiaki” a tautolu. (2 Korinito 4:8, 9) Ne mavehe mai a Iesu to foaki ke he hana tau tutaki e lagomatai. Ne pehe a ia: “To tala age foki au ke he Matua, ati foaki mai ai e ia kia mutolu e taha Lagomatai, kia nofo mau a ia ia mutolu tukulagi; ko ia ko e Agaga ke tupu ai e kupu moli.” (Ioane 14:16, 17) He Penetekoso 33 V.N., ne tala age e aposetolo ko Peteru ke he hana tau tagata fanogonogo to maeke ke moua e lautolu “e mena foaki noa mai, ko e Agaga Tapu haia.” (Gahua 2:38) Lagomatai kia he agaga tapu a tautolu he vaha nei? E! Ko e malolo gahuahua a Iehova kua foaki ki a tautolu e tau fua homo ue atu: “Ko e fakaalofa, ko e fiafia, ko e mafola, ko e fakauka, ko e totonu, ko e mahani mitaki, ko e tua, ko e mahani molu, mo e manako fakalatalata.” (Kalatia 5:22, 23) Ko e tau fua mua e uho oti nei kua lagomatai a tautolu ke fakauka.
17. Ko e heigoa e falu he tau kupu moli he Tohi Tapu kua fakamalolo ha tautolu a tua mo e fifiliaga ke fakatali fakatekiteki ki a Iehova?
17 Kua maeke foki he agaga tapu ke lagomatai a tautolu ke maama ko e tau matematekelea he mogonei kua “mama mo e mole vave” he magaaho ka fakatatai mo e palepale he moui tukulagi. (2 Korinito 4:16-18) Kua talitonu a tautolu to nakai nimo he Atua e tau gahua ha tautolu mo e fakaalofa kua fakakite e tautolu ki a ia. (Heperu 6:9-12) He totou ai e tau kupu omoomoi he Tohi Tapu, kua fakamafanatia a tautolu ha ko e tau fakafifitakiaga he tau fekafekau tua fakamoli i tuai ne fakauka ke he tau mena kelea loga ka e kua talahau ai ke monuina. Kua tohi e Iakopo: “Haku a tau matakainaga na e, kia fifitaki a mutolu e fakamalolo ke he tau mena matematekelea, katoa mo e fakauka he tau perofeta ne vagahau mai ke he higoa he Iki. Kitiala, kua talahau e tautolu kua monuina a lautolu kua fakauka.” (Iakopo 5:10, 11) Kua mavehe mai he Tohi Tapu e “lahi ue atu he malolo” ke lagomatai a tautolu ke fakauka ke he tau kamatamata. Kua fakamonuina foki e Iehova a tautolu aki e amaamanakiaga he liu tu mai. (2 Korinito 1:8-10; 4:7) He totou e Tohi Tapu he tau aho oti mo e manamanatu fakahokulo ke he tau maveheaga nei, to fakamalolo e tautolu e tua ha tautolu mo e ha tautolu a fifiliaga ke fakatali fakatekiteki ke he Atua.—Salamo 42:5.
18. (a) He 2 Korinito 1:3, 4, ko e heigoa kua fakamalolo mai ke taute e tautolu? (e) Maeke fefe e tau leveki Kerisiano ke eke moli mo tau punaaga he fakamafanaaga mo e fakamaloloaga?
18 Lafi ki ai, kua foaki mai e Iehova e parataiso fakaagaga ke maeke ia tautolu ke olioli e fakaalofa moli he ha tautolu a tau matakainaga Kerisiano. Ha ha ia tautolu oti e matagahua ke taute he fefakamafanaaki. (2 Korinito 1:3, 4) Kua mua atu ke he tau leveki Kerisiano ke eke mo punaaga lahi he fakamafanaaga mo e fakamaloloaga. (Isaia 32:2) Ha “ko e tau mena fakaalofa ke he tau tagata,” kua poaki ki a lautolu ke ati hake a lautolu kua mamahi, ke “fakamafana a lautolu kua manava tote,” mo e ke “lagomatai a lautolu kua lolelole.” (Efeso 4:8, 11, 12; 1 Tesalonia 5:14) Kua fakamalolo e tau motua ke fakaaoga fakamitaki e tau mekasini Kolo Toko mo e Awake!, ti pihia foki mo e falu he tau tohi ne foaki he “fekafekau fakamoli mo e loto matala.” (Mataio 24:45-47) Kua ha ha i loto he tau mena nei e loga he fakatonutonuaga ne fakave ke he Tohi Tapu ne kua maeke ke lagomatai a tautolu ke uta kehe—mo e puipui foki—mai he falu he tau mena vihi kua fakatupu a tautolu ke fakaatukehe. Kia fifitaki e tautolu a Iehova he fakamafana mo e fakamalolo e taha mo e taha he tau magaaho uka!
19. (a) Ko e heigoa kua lagomatai a tautolu ke fehola kehe mai he falu he tau matematekelea? (e) He fakaoti aki, ko hai kua lata ia tautolu ke falanaki ki ai, mo e ko e heigoa ka fakamalolo aki a tautolu ke fehagai mo e tau kamatamata?
19 He hokotia atu a tautolu ke he lotouho he tau aho fakamui mo e kua kelea lahi mahaki e tau tutuaga he fakatokaaga he tau mena he mogonei, kua taute he tau Kerisiano e tau mena ne maeke ia lautolu ke kalo kehe mai he tau mena kelea. (Tau Fakatai 22:3) Ko e fifiliaga mitaki, manamanatu katoatoa mitaki, mo e iloilo he tau matapatu fakaakoaga he Tohi Tapu kua maeke ke lagomatai a tautolu ke taute e tau fifiliaga pulotu. (Tau Fakatai 3:21, 22) Fanogonogo a tautolu ke he Kupu a Iehova mo e omaoma ki ai ke fehola kehe mai he taute e tau hepe kua nakai lata. (Salamo 38:4) Pete ia, kua mailoga e tautolu kua nakai fai laliaga he vala ha tautolu ke uta kehe katoatoa e mamahi he tau momoui ha tautolu. He fakatokaaga he tau mena nei, kua tokologa ia lautolu kua tututonu kua fehagai mo e tau matematekelea. Pete ia, kua maeke ke fehagai a tautolu mo e tau kamatamata ha tautolu fakalataha mo e mauokafua katoatoa kua “nakai toka e Iehova hana motu.” (Salamo 94:14) Mo e iloa e tautolu ko e fakatokaaga he tau mena nei mo e hana tau matematekelea to nakai leva to galo. Ko e mena ia, kia fifili mau a tautolu ke nakai “fakalolelole . . . ke he mahani mitaki; ha ko e mena to helehele mai e tautolu ke he vaha ke lata ai, kaeke kua nakai fakalolelole a tautolu.”—Kalatia 6:9.
Ko e Heigoa ne Ako e Tautolu?
◻ Ko e heigoa e tau kamatamata ne moua he fakalatahaaga katoa he tau Kerisiano?
◻ Ko e heigoa e tau fakafifitakiaga he Tohi Tapu kua lagomatai a tautolu ke maama ko e tau mena kelea nakai ko e fakamoliaga he nakai fiafia a Iehova?
◻ Fefe e logonaaga a Iehova hagaao ke he tau matematekelea ne mamahi ai hana tau tagata?
◻ Ko e heigoa e falu he tau mena foaki fakaalofa mai ia Iehova kua lagomatai a tautolu ke fakauka ke he tau kamatamata?
[Tau Fakatino he lau 22]
Ko Tavita, Napota, mo Iosefa e tokotolu ne mamahi ke he tau mena kelea