Fakatumau e Olioli he Tau Magaaho Uka
“Kia fiafia a lautolu oti kua tua kia [Iehova]; kia kalaga fiafia tukulagi a lautolu.”—SALA. 5:11.
1, 2. (a) Ko e heigoa falu mena ne fakatupu e fakaatukehe lahi he vahā nei? (e) Kehe mai he tau matematekelea ne hoko ke he tau tagata oti, ko e heigoa kua lata he tau Kerisiano mooli ke fakauka ki ai?
KUA lauia foki e Tau Fakamoli a Iehova he tau matematekelea ne hoko ke he tau tagata oti. Tokologa e tau tagata he Atua ne lauia noa he kolokolovao, felakutaki, mo e falu nakai fakafili tonu. Ko e tau matematekelea pauaki, mativa, gagao, mo e mate ne fakatupu e fakaatukehe lahi. Ne tohi fakatonu he aposetolo ko Paulo: “Kua iloa e tautolu kua oi fakalataha mo e mamahi fanau fakalataha e tau mena oti ne eke kua hoko ni ke he vaha nai.” (Roma 8:22) Kua lauia noa foki a tautolu he nakai mitaki katoatoa ha tautolu. Tuga e Patuiki ko Tavita i tuai, liga pehē a tautolu: “Kua hoko ni haku a tau hala ki luga hoku ulu; ne tuga e kavega mamafa, kua pehia ai au.”—Sala. 38:4.
2 Kehe mai he tau matematekelea ne hoko ke he tau tagata oti, ne fua he tau Kerisiano mooli e akau fakakikiveka fakatai. (Luka 14:27, NW) E, tuga a Iesu, ne vihiatia mo e favale ke he tau tutaki haana. (Mata. 10:22, 23; Ioane 15:20; 16:2) Ti ko e muitua ke he Keriso kua lata ke eketaha fakamakamaka mo e fakauka ka e fakatali ai ke he tau monuina he lalolagi foou.—Mata. 7:13, 14; Luka 13:24.
3. Iloa fēfē e tautolu kua nakai lata e tau Kerisiano ke moua e moui matematekelea ke fakafiafia e Atua?
3 Kakano kia e mena nei kua tutuli he tau Kerisiano mooli e moui ne nakai olioli mo e fiafia? Kua lata kia e tau momoui ha tautolu ke lauia tumau he momoko mo e maanu ato hoko e moumouaga? Maaliali ai, kua manako a Iehova ki a tautolu ke fiafia he fakatali a tautolu ke fakamooli e tau maveheaga haana. Ne talahau tumau he Tohi Tapu e tau tagata tapuaki mooli ko e tau tagata fiafia. (Totou Isaia 65:13, 14.) “Kia fiafia a lautolu oti kua tua kia [Iehova]; kia kalaga fiafia tukulagi a lautolu,” he talahau he Salamo 5:11. E, maeke foki ke moua e olioli, mafola e manamanatuaga, mo e mahani fakalatalata lahi ke he vahāloto he tau matematekelea. Kia fakatutala a tautolu ke he puhala ka lagomatai he Tohi Tapu a tautolu ke fehagai mo e tau kamatamata ka e fiafia agaia.
Iehova—Ko e ‘Atua Fiafia’
4. Fēfē e logonaaga he Atua he magaaho ne fakaheu e finagalo haana?
4 Ma e fakatai, manamanatu la ki a Iehova. Ha ko e Atua Malolō Ue Atu, ha ha i lalo he pule oti haana e lagi mo e lalolagi katoatoa. Moua e ia e tau mena oti kana ti nakai lata a ia mo e ha tagata taha. Ka e pete ne malolō ue atu haana, ne liga logona hifo e Iehova e fakahukia he magaaho ne totoko e taha he tau tama fakaagaaga haana ti eke mo Satani. Liga lauia foki e Atua he mogo fakamui he fakalataha e falu agelu ke he totokoaga. Manamanatu foki la ke he mamahi he logonaaga he Atua he magaaho ne haga kehe mai ia Ia a Atamu mo Eva, ko e tau tufugatiaaga homo ue atu haana he lalolagi. Tali mai ai, totou piliona e tau hologa ha laua ne tiaki e pule a Iehova.—Roma 3:23.
5. Ko e heigoa ne fakahukia pauaki a Iehova?
5 Holo ki mua agaia e totokoaga a Satani. Kavi ke he 6,000 tau, ne mailoga e Iehova e tau gahua he tapuaki tupua, favale, kelipopo, mo e velagia he mahani feuaki. (Kene. 6:5, 6, 11, 12) Lafi ki ai, ne logona e ia e tau pikopiko mo e tau kupu kelea fakalialia. Fakahukia foki he tau tagata tapuaki mooli he Atua e finagalo haana he falu magaaho. Kua fakamaama he Tohi Tapu e taha he tau tuaga ia ke he tau kupu: “Lagaloga ne fakafualoto a lautolu kia ia ke he tutakale; ti fakahukia a ia ke he vao. Ne liu foki kamatamata e lautolu e Atua; mo e fakahogohogo e lautolu a ia, ne Tapu i Isaraela.” (Sala. 78:40, 41) Ne hukia lahi mahaki mooli e logonaaga a Iehova he magaaho ne tiaki he tau tagata haana a ia. (Iere. 3:1-10) Maaliali ai, ne tutupu e tau mena kelea, ti logona hifo e Iehova e fakahukia lahi mahaki he magaaho ne tutupu ai e tau mena ia.—Totou Isaia 63:9, 10.
6. Fehagai fēfē e Atua mo e tau tuaga fakaatukehe?
6 Ka e nakai fakalolelole a Iehova ha ko e fakahukia mo e fakamamahi. Ka hohoko e tau mena uka, ne fakamafiti a Iehova ke taute e tau lakaaga ke fakatote hifo e tau fua kelea ne tutupu mai ai. Leva tuai e taute foki e ia e tau fakatokaaga ke maeke ai he mogo fakamui ke fakamooli e finagalo haana. He kitia e tau gahua mitaki nei, ne amaamanaki fiafia atu a Iehova ke he fakatapuaga he pule katoatoa haana mo e ke he tau fua he tau monuina ma e tau tagata tapuaki fakamooli haana. (Sala. 104:31) E, pete ne tau ekefakakelea ne tapoohi aki a ia, ne tumau ni a Iehova mo ‘Atua fiafia.’—1 Timo. 1:11; Sala. 16:11.
7, 8. Ka fai mena kelea, liga fifitaki fēfē e tautolu a Iehova?
7 Mooli, nakai fakatatai e tautolu a tautolu ki a Iehova ka hagaao ke he lotomatala ha tautolu ke fakamafola e tau lekua. Ka e, maeke agaia ia tautolu ke fifitaki a Iehova ka fehagai mo e tau matematekelea ha tautolu. Ko e aga pauaki ke logona e tupetupe ka fai mena kelea, ka kua nakai lata ia tautolu ke tumau he tuaga ia. Ha kua tufuga a tautolu ke he fakatai a Iehova, ha ha ia tautolu e lotomatala ke manamanatu tonu mo e pulotu aoga, he fakaatā a tautolu ke liu kitekite ke he tau lekua ha tautolu mo e taute e tau hikihikiaga mitaki kua lata.
8 Taha e vala aoga ka lagomatai a tautolu ke fahia mo e tau lekua he moui ko e mailoga to ha ha ai falu mena ne nakai fai takitakiaga a tautolu i ai. He mamahi lahi ha ko e tau mena ia ne liga fakahiku a tautolu ke fakahogohogo manava foki mo e utakehe e tau olioli loga ha tautolu ne matutaki mo e tapuakiaga mooli. He fai iloaaga ke fakamafola aki e lekua, kua mitaki lahi ke nakai liu manamanatu ki ai mo e hagaaki fakalahi atu ke he tau matagahua kua fua mitaki. Ko e tau tala he Tohi Tapu ka mui mai kua fakakite fakamitaki e manatu nei.
Aoga Lahi e Fifiliaga Iloilo
9. Fakakite fēfē e Hana e fifiliaga iloilo?
9 Manamanatu ke he fakataiaga ki a Hana, ne eke he magaaho fakamui mo matua fifine a Samuela ko e perofeta. Ne momoko e loto haana ha kua nakai maeke a ia ke fai tama. Ne vaiga mo e fakafiufiu ki ai ha kua tufua a ia. Falu magaaho, ne loto lolelole lahi a Hana ati tagi mo e nakai kai a ia. (1 Samu. 1:2-7) He taha magaaho ne fina atu a Hana ke he faituga a Iehova, “ne mamahi hana loto, ti liogi a ia kia Iehova mo e tagi lahi a ia.” (1 Samu. 1:10) He liligi e Hana e tau logonaaga haana ki a Iehova, ne fina atu a Eli ko e ekepoa ne mua ki a ia mo e pehē: “Kia fano ā koe mo e [mafola]; kia foaki mai foki he Atua a Isaraela e tau mena kua ole e koe kia ia.” (1 Samu. 1:17) Ke he mena nei, ne mailoga mooli e Hana kua taute e ia e tau mena oti kana kua maeke ia ia. Nakai ha ha ia ia e pule ke he tufua haana. Ne fakakite e Hana e fifiliaga iloilo. Ati “fano ai [a] ia, ti kai a ia ti nakai tuai mata momoko a ia.”—1 Samu. 1:18.
10. Ko e heigoa e onoonoaga mooli ne fakakite e Paulo he fehagai mo e lekua ne nakai maeke a ia ke fakatotoka?
10 Ne fakakite he aposetolo ko Paulo e onoonoaga pihia he fehagai mo e matematekelea. Ha ha ia ia e matematekelea ne fakatupu e fakaatukehe lahi ki a ia. Ne fakahigoa ai e ia ko e “mena mahukihuki ke he tino.” (2 Kori. 12:7) Ko e heigoa ni e fatia, ne taute e Paulo e tau mena kua maeke ia ia ke utakehe e matematekelea nei, he liogi ki a Iehova ma e fakatotokaaga. Lagafiha e olelalo a Paulo ki a Iehova hagaao ke he mena ne tupu? Lagatolu. Mole e lagatolu aki, ne fakakite he Atua ki a Paulo to nakai utakehe fakamana e “mena mahukihuki ke he tino.” Ne talia e Paulo e mena nei ti hagaaki ai ke fekafekau katoatoa ki a Iehova.—Totou 2 Korinito 12:8-10.
11. Ko e heigoa e matagahua ne taute he liogi mo e olelalo ke fahia a tautolu ke he tau matematekelea?
11 Ko e tau fakataiaga nei kua nakai kakano kua lata ia tautolu ke fakaoti e liogi ki a Iehova hagaao ke he tau mena fakatupetupe. (Sala. 86:7) Nakai pihia, ne fakamafana e Kupu he Atua ki a tautolu: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.” To tali fēfē e Iehova e tau liogi mo e tau olelalo pihia? Lafi he Tohi Tapu: “Ko e [mafola] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) E, nakai liga utakehe e Iehova e lekua ha tautolu, ka e maeke a ia ke tali e tau liogi ha tautolu he puipui e tau manatu ha tautolu. He mole e liogi hagaao ke he matakupu, liga mailoga e tautolu e hagahaga kelea he lauia he tau fakaatukehe.
Moua e Fiafia he Taute e Finagalo he Atua
12. Ko e ha e loto lolelole hololoa kua eke mo fakahagahaga kelea?
12 Pehē mai e Tau Fakatai 24:10: “Kaeke ke fakalolelole a koe ke he aho matematekelea, kua tote ni hāu a malolo.” Pehē foki taha fakatai: “Ko e loto mamahi kua malipilipi ai e agaga.” (Fakatai 15:13) Ne loto mamahi falu Kerisiano ti hokotia ke fakaoti ha lautolu a totou he Tohi Tapu mo e ha lautolu a manamanatu fakahokulo ke he Kupu he Atua. Kua talahau noa ni e tau liogi ha lautolu, mo e liga vevehe kehe e lautolu a lautolu mai he tau matakainaga tapuaki. Maaliali ai, ko e tumau he tuaga tupetupe ka fakahagahaga kelea.—Fakatai 18:1, 14.
13. Ko e heigoa falu matagahua ka lagomatai a tautolu ke utakehe e loto lolelole mo e fai olioli ka foaki mai ai ki a tautolu?
13 He taha faahi, ko e foliaga mitaki ka lagomatai a tautolu ke hagaaki ke he tau vala he tau momoui ha tautolu ka moua mai e fiafia mo e olioli. Ne tohi e Tavita: “Haku Atua na e, kua fiafia au ke eke hāu a finagalo.” (Sala. 40:8) Ka tutupu e tau mena kelea he tau momoui ha tautolu, ko e mena fakahiku kua lata ia tautolu ke taute ko e nakai fakaoti e fakaholoaga atihake he tapuakiaga ha tautolu. Ti ko e tuluiaga he momoko ko e fakalataha ke he tau matagahua ne tamai e fiafia. Pehē a Iehova ki a tautolu kua maeke ia tautolu ke moua e fiafia he totou e Kupu haana mo e kikite tumau ki ai. (Sala. 1:1, 2; Iako. 1:25) Mai he tau Tohiaga Tapu mo e tau feleveiaaga Kerisiano kua moua e tautolu e “tau kupu fulufuluola” ka atihake a tautolu mo e fakafiafia e tau loto ha tautolu.—Fakatai 12:25; 16:24.
14. Ko e heigoa e fakamafanaaga mai ia Iehova kua tamai e olioli ki a tautolu mogonei?
14 Loga e tau kakano kua foaki he Atua ki a tautolu ke fiafia. Ko e maveheaga haana he fakamouiaga ko e punaaga lahi mahaki mooli he fiafia. (Sala. 13:5) Iloa e tautolu pete ne tau mena kua tutupu ki a tautolu mogonei, he fakahikuaga to palepale he Atua a lautolu ne kumi fakamakamaka ki a ia. (Totou Fakamatalaaga 8:12.) Ne fakakite fakamitaki he perofeta ko Hapakuka e mauokafua pihia he tohi e ia: “Pete he nakai fiti mai e mati, ti nakai fai fua foki e tau vine, ti fakahiku ai foki e tau fua olive, ti nakai tutupu mai foki e tau mena kai he fonua; ti fakaoti foki e fuifui mamoe ke he lotopa mamoe, ti nakai ha i ai e tau povi ke he tau fale povi; ka ko au to olioli ni au kia Iehova, to fiafia ni au ke he Atua he haku a Fakamouiaga.”—Hapa. 3:17, 18.
‘Fiafia e Motu kua Eke a Iehova mo Atua ha Lautolu’
15, 16. Talahau falu he tau mena fakaalofa he Atua ka maeke ia tautolu ke fiafia ka e fakatali ke he tau monuina anoiha.
15 He fakatali a tautolu ke he vahā homo ue atu anoiha hane fakatoka mai ma tautolu, ko e finagalo a Iehova ke fiafia e tautolu e tau mena mitaki ne foaki mai e ia ki a tautolu. Pehē e Tohi Tapu: “Kua iloa e au nakai fai mena kua mitaki kia lautolu, ka kia olioli e tau tagata, mo e eke e tau mena mitaki he momoui ai a lautolu. Hanai foki, kia takitaha e tagata mo e kai, mo e inu, mo e fiafia ai ke he tau mena mitaki he hana tau gahua oti; ko e mena kua foaki mai he Atua haia.” (Fakama. 3:12, 13) Ke “eke e tau mena mitaki” kua putoia e taute he tau gahua mitaki ke lata mo e falu. Ne pehē a Iesu kua mua atu e fiafia he foaki ke he moua mai. Ko e tau mahani totonu ke he ha tautolu a tau hoa, tau fanau, tau mamatua, mo e falu magafaoa foki kua tamai e makona lahi mahaki. (Fakatai 3:27) He fakaalofa hofihofi, fakamokoi, mo e fakamagalo e tau matakainaga fakaagaaga ha tautolu kua fua mai foki e olioli lahi mahaki, ti fakafiafia a Iehova. (Kala. 6:10; Kolo. 3:12-14; 1 Pete. 4:8, 9) Ti ko e fakakatoatoa e feua ha tautolu fakalataha mo e aga foaki noa kua palepale mooli.
16 Ko e tau kupu i luga ne fatiaki ia Fakamatalaaga ne talahau e tau fiafia nakai uka he moui, tuga e kai mo e inu. E, pete kua kamatamata, maeke ia tautolu ke olioli e tau mena fakaalofa fakatino oti kua moua e tautolu mai ia Iehova. Lafi ki ai, ko e tōaga laā fulufuluola, tau matakavi ofoofogia, tau punua manu fefeua, mo e falu mena mua ue atu he tufugatiaaga ne nakai totogi, ka kua fakapuke a tautolu aki e nava ue atu mo e tamai ki a tautolu e olioli. He manamanatu a tautolu ke he tau mena ia, kua tupu e fakaalofa ha tautolu ma Iehova, ha ko ia ko e Foaki he tau mena mitaki oti kana.
17. Ko e heigoa ka tamai ki a tautolu e fakatotokaaga katoatoa mai he tau matematekelea, ato hoko ai e magaaho ia, ko e heigoa ne foaki ki a tautolu e mafanatia?
17 Mua atu, ko e ha tautolu a fakaalofa ma e Atua, ko e omaoma ke he tau poakiaga haana, mo e tua ke he poa lukutoto ka fua mai e totokaaga katoatoa ha tautolu mai he tau matematekelea he moui nakai mitaki katoatoa mo e takitaki a tautolu ke he olioli tukulagi. (1 Ioa. 5:3) Ato hoko e magaaho ia, kua moua e tautolu e mafanatia he iloa kua mailoga mitaki e Iehova e tau mena oti ne mamahi ai a tautolu. Ne tohi e Tavita: “To fiafia au mo e olioli ke he hāu a fakaalofa [totonu] mai; ha ko koe kua kitekite mai ke he haku a mamahi; kua fioia e koe au ka kua matematekelea au.” (Sala. 31:7) He fakalagalaga he fakaalofa haana ma tautolu, to fakahao e Iehova a tautolu mai he matematekelea.—Sala. 34:19.
18. Ko e ha kua lata ke malolō lahi e olioli ke he tau tagata he Atua?
18 He fa e fakatali a tautolu ke he fakamooliaga he tau maveheaga a Iehova, kia fifitaki e tautolu a ia, ko e Atua fiafia. Kia kalo kehe a tautolu neke lolelole fakaagaaga he tau logonaaga nakai atihake. Ka tutupu e tau lekua, kia takitaki he lotomatala he manamanatuaga mo e pulotu aoga a tautolu. To lagomatai e Iehova a tautolu ke tautaofi e tau logonaaga ha tautolu mo e ke taute e tau lakaaga ke maeke ke fakatote hifo e tau lauiaga kelea he tau mena matematekelea. Kia moua e tautolu e fiafia he tau mena mitaki ne moua mai ia Ia, ko e tau mena fakatino mo e fakaagaaga. He nonofo fakatata ke he Atua, to maeke ia tautolu ke olioli ha kua “uhoaki [po ke, fiafia] e motu kua eke a Iehova mo Atua ha lautolu.”—Sala. 144:15.
Ko e Heigoa ne Ako e Koe?
• Ke fahia ke he tau matematekelea, maeke fēfē a tautolu ke fifitaki a Iehova?
• Maeke fēfē e fifiliaga iloilo ke lagomatai a tautolu ke fahia ke he tau matematekelea?
• He tau magaaho tupetupe, maeke fēfē a tautolu ke fiafia he taute e finagalo he Atua?
[Tau Fakatino he lau 16]
Hukia a Iehova ha ko e tau mena kelea hane tutupu
[Credit Line]
© G.M.B. Akash/Panos Pictures
[Tau Fakatino he lau 18]
Foaki e Iehova ki a tautolu e tau puhala ke tumau e olioli