Falanaki ki a Iehova, ‘Ko e Atua Hana e Tau Fakamafanaaga Oti’
“Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti.”—2 KORI. 1:3.
1. Pete ne tau tau he moui, manako e tau tagata ke moua e heigoa?
MAI he mogo ne fanau a tautolu, logona hifo e tautolu e manako ma e mafanatia. Kua konohi e tama mukemuke ke iloa e tautolu kua manako a ia ke he mafanatia. Liga fia loto a ia ke lukuluku po ke kua hoge. He lalahi hake foki a tautolu, fa logona e tautolu e manako ma e mafanatia. Mua atu e mena nei ka lauia a tautolu he tau tuaga uka.
2. Ko e heigoa e fakamooliaga ne foaki e Iehova to fakamafana e ia a lautolu kua falanaki ki a ia?
2 Ko e tau tagata he magafaoa mo e tau kapitiga kua fa fai fakamafanaaga ne foaki mai ki a tautolu. Ka ko e falu mogo, ko e tau tuaga ne fakatupu a tautolu ke tupetupe lahi kua molea atu ke he tau tuluiaga he tagata. Ko e Atua hokoia ka foaki e fakamafanaaga ki a tautolu pete ni ka tupetupe lahi e tuaga ha tautolu. Fakamooli he Kupu Haana ki a tautolu: “Kua tata mai a Iehova kia lautolu oti kana ne ui atu kia ia, . . . to fanogonogo a ia ke he ha lautolu a kalaga atu.” (Sala. 145:18, 19) E, “ko e tau fofoga a Iehova kua hagao ia kia lautolu ne tututonu, mo e hana tau teliga foki ke he kalaga ha lautolu.” (Sala. 34:15) Kaeke ke moua e tautolu e lalagoaga mo e fakamafanaaga he Atua, kua latatonu a tautolu ke falanaki ki a ia. Talahau fakamaali ai he salamo a Tavita e mena na he lologo a ia: “To eke a Iehova mo kolo tokoluga ma lautolu ne malipilipi, ko e kolo tokoluga ke he tau vaha matematekelea. To tua kia koe a lautolu kua iloa hāu a higoa, ha ko e mena nakai tiaki e koe, Iehova na e, a lautolu kua kumi kia koe.”—Sala. 9:9, 10.
3. Fakakite fēfē e Iesu e fakaalofa a Iehova ma e tau tagata Haana?
3 Ko e tau tagata tapuaki a Iehova kua uho ki a ia. Talahau fakamaali e Iesu e mena nei he pehē a ia: “Nakai kia fakafua lima e manu ikiiki ke he ua e asari? ka e nakai nimo foki taha a lautolu ki mua he Atua. Ka kua oti kana he totou ha mutolu a tau lauulu. Ko e mena ia ua matakutaku ai a mutolu; kua mua a mutolu ke he tau manu ikiiki loga.” (Luka 12:6, 7) Puhala he perofeta ko Ieremia, ne tala age a Iehova ke he tau tagata Haana i tuai: “Ko e fakaalofa tukulagi kua fakaalofa atu ai au kia koe; ko e mena ia kua fakatumau e au haku a fakaalofa kia koe.”—Iere. 31:3.
4. Maeke he ha a tautolu ke falanaki ke he tau maveheaga a Iehova?
4 Ko e falanaki ki a Iehova mo e ke he fakamooliaga he tau maveheaga haana ka tamai ki a tautolu e mafanatia he tau mogo tupetupe lahi. Ti kua lata mogoia ia tautolu ke falanaki pihia foki ke he Atua tuga ne fakakite e Iosua, he fakailoa: “Nakai to ha kupu taha he tau kupu mitaki oti ne vagahau mai ai e Iehova ha mutolu a Atua kia mutolu; kua hoko oti kia mutolu, nakai ni to ha kupu taha.” (Iosua 23:14) Mua atu ai, maeke ia tautolu ke mauokafua pete ne pehia fakakū a tautolu he tau tuaga kamatamata, “kua fakamoli e Atua” to nakai tiaki haana tau fekafekau fakamooli.—Totou 1 Korinito 10:13.
5. Maeke fēfē ia tautolu ke fakamafana e falu?
5 Kua hagaao e aposetolo ko Paulo ki a Iehova ko e ‘Atua hana e tau fakamafanaaga oti.’ “Ke fakamafana” kua kakano ke fakatotoka e tagata kua tupetupe lahi po ke momoko. Taute e mena nei he fakatote hifo e matematekelea po ke maanu haana ti foaki ki a ia e fakamafanaaga. Taute mooli e Iehova e mena nei. (Totou 2 Korinito 1:3, 4.) Nakai kū ha tautolu a Matua he lagi ke he ha mena taha po ke taha tagata ti ko e puhala ia kua maeke a Ia ke foaki e fakamafanaaga kua lata ma lautolu kua fakaalofa ki a Ia. Kakano foki, kua maeke ia tautolu ke fakamafana e tau matakainaga fakaagaaga ke he ‘ha matematekelea oti.’ Maeke ke taute pihia e tautolu puhala he “fakamafanaaga kua fakamafanatia ai [a tautolu] he Atua.” Kua fakakite mooli he mena nei e lotomatala mua ue atu a Iehova ke fakamafana a lautolu ne fakaatukehe!
Fahia ke he Tau Mena ne Fakatupu e Tupetupe Lahi
6. Talahau e tau fakataiaga he tau mena ka fakatupu e tupetupe lahi.
6 Manako a tautolu ke he fakamafanaaga ke he loga e faahi he moui. Taha he tau tupuaga ue atu he maanu ko e galo he fakahele ke he mate, mua atu ke he hoa mau po ke tama ne ofania. Liga manako foki ke he fakamafanaaga ha kua lauia teao e tagata he onoono hifo po ke fili tagata. Kelea e malolō tino, fuakau, mativa, tau lekua he fakamauaga, po ke tau tuaga tupetupe lahi he lalolagi ka fakamalagaki e manako fakatagata ma e fakamafanaaga.
7. (a) He tau tuaga maanu, ko e vahega fakamafana fe kua manako ki ai? (e) Ko e heigoa ka taute e Iehova ke fakamaulu e loto “malipilipi mo e pehia”?
7 He tau mogo tupetupe lahi, kua lata a tautolu ma e fakamafanaaga kua fakatotoka ha tautolu a tau loto, tau manamanatuaga, tau logonaaga, mo e malolō tino mo e fakaagaaga. Ma e fakatai, manamanatu ke he loto. Talahau he Kupu he Atua na maeke e tau loto ha tautolu ke “malipilipi mo e pehia.” (Sala. 51:17) Maeke mooli ia Iehova ke fehagai mo e tuaga nei, ha kua “fakamalolo e ia a lautolu ne malipilipi e tau loto; kua pipi e ia ha lautolu a tau motu.” (Sala. 147:3) Pete foki he tau tuaga uka lahi mahaki, maeke he Atua ke tamai e fakatotokaaga ke he loto malipilipi ka liogi a tautolu ki a ia he tua katoatoa mo e muitua e tau poakiaga haana.—Totou 1 Ioane 3:19-22; 5:14, 15.
8. Ka tupetupe lahi e manatu ha tautolu, maeke fēfē a Iehova ke lagomatai a tautolu?
8 Ko e manamanatuaga ha tautolu kua fa manako ke he mafanatia ha kua kehekehe e tau kamatamata ka fakatupu e tupetupe lahi he manatu. He malolō ni ha tautolu, liga nakai fahia a tautolu ke he tau kamatamata nei he tua. Pete ia, ne lologo he salamo: “Ko e tau manamanatu loga he haku a loto kua fiafia ai au ha ko e fakamafanaaga mai ia koe.” (Sala. 94:19) Lafi ki ai, ne tohi e Paulo: “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue. Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:6, 7) Ko e totou mo e manamanatu fakahokulo ke he tau Tohiaga Tapu ka lagomatai lahi he fahia ke he tupetupe e manatu.—2 Timo. 3:15-17.
9. Maeke fēfē a tautolu ke fahia ke he tupetupe lahi he logonaaga?
9 He falu mogo, liga fakalolelole lahi a tautolu ti maeke ke fakahagahaga kelea a tautolu he mahala ke he tau lauiaaga he tau logonaaga kelea. Liga logona hifo e tautolu kua nakai maeke ke taute e matagahua faka-Tohi Tapu po ke kotofaaga pauaki. Maeke foki ia Iehova ke fakamafana mo e lagomatai a tautolu ke he mena nei. Ke fakatai: He poaki ki a Iosua ke takitaki e tau Isaraela he totoko ke he tau motu malolō ne matafī mai, ne tala age a Mose ke he tau tagata: “Kia fakamalolo a mutolu mo e fakamanavalahi; aua neke fakaatukehe a mutolu, ti ua matakutaku a mutolu ki mua ha lautolu; ha ko Iehova hau a Atua kua o fakalataha mo koe; nakai toka e ia a koe, to nakai tiaki foki e ia a koe.” (Teu. 31:6) He lalagoaga a Iehova, ne maeke ia Iosua ke takitaki e tau tagata he Atua ke he Motu he Maveheaga mo e kautū ke he tau fī oti kana ha lautolu. Fakamua atu he Tahi Kula, ne logona e Mose e lalagoaga faka-Atua pihia.—Esoto 14:13, 14, 29-31.
10. Ka lauia e malolō tino ha tautolu ha ko e tupetupe lahi, ko e heigoa e lagomatai ka moua e tautolu?
10 Ko e tau mena tutupu fakatupetupe ka lauia kelea e malolō tino ha tautolu. Mooli, ko e hako e tau mena kai, lahi e okioki mo e faofao, mo e tū meā ka lauia mitaki a tautolu. Ko e onoonoaga fakaagaaga ne lahi e fakavē ke he Tohi Tapu ka lauia mitaki e tau tino ha tautolu. Ti kua lagomatai lahi ka fai mena ne hukia ai ke tokaloto e tautolu e mena ne tupu ki a Paulo mo e tau kupu fakamalolō: “Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa; kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava.”—2 Kori. 4:8, 9.
11. Maeke fēfē ke puipui mai he tatalu fakaagaaga?
11 Ko e falu kamatamata ka fakalauia kelea lahi e malolō fakaagaaga ha tautolu. He mena nei foki, maeke a Iehova ke laveaki a tautolu. Kua fakamalolō he Kupu Haana a tautolu: “Kua toto hake e Iehova a lautolu oti kua veveli; ko ia foki kua fakatu hako a lautolu oti kua fakatolotolo.” (Sala. 145:14) Ke maeke he lagomatai ke puipui e tatalu fakaagaaga, lata ia tautolu ke kumi e lalagoaga he tau motua Kerisiano. (Iako. 5:14, 15) Mo e tokaloto tumau e amaamanakiaga faka-Tohi Tapu he moui tukulagi ka lagomatai ke fakamalolō a tautolu he tau magaaho kamatamata ke he tua ha tautolu.—Ioane 17:3.
Tau Fakataiaga he Fakamafanaaga ne Foaki he Atua
12. Fakamaama e aga mafanatia a Iehova ki a Aperahamo.
12 Ne fakapuloa he salamo omoomoi: “Kia manatu e koe hāu a kupu ke he hāu a fekafekau, ha kua fakatupu e koe [Iehova] haku a amaamanaki. Ko ia ne mafanatia ai au ke he haku a matematekelea; ha ko e hāu a kupu ni kua fakamoui au.” (Sala. 119:49, 50) He vahā nei, ha ha ia tautolu e Kupu tohia a Iehova, ne loga e fifitakiaga he fakamafanaaga ne foaki he Atua. Tuga anei, ne liga lahi e tupetupe ha Aperahamo he mogo ne iloa e ia ko e moumou fai e Iehova a Sotoma mo Komora. Ne hūhū e tupuna tua fakamooli ia ke he Atua: “To fakamahakava kia e koe e tau tagata tututonu fakalataha mo e tau tagata mahani kelea?” Ne fakamafana e Iehova a Aperahamo he fakamalolō age ki ai kaeke ke moua toko 50 ni e tagata tututonu, to nakai moumou e Ia a Sotoma. Ka e laga lima foki, ne hūhū a Aperahamo ki a Iehova: Ka e kua ka moua toko 45 ni e tagata tututonu? toko 40? toko 30? toko 20? toko 10? He tau magaaho takitaha, ne fakauka mo e totonu lahi a Iehova he fakamalolō ki a Aperahamo to fakahao a Sotoma. Pete ne nakai hogofulu e tagata tututonu he matakavi, ne fakahao e Iehova a Lota mo e tau tama fifine haana.—Kene. 18:22-32; 19:15, 16, 26.
13. Fakakite fēfē e Hana kua falanaki a ia ki a Iehova?
13 Ko Hana ko e hoana a Elekana ne manako lahi ke fai tama. Ka kua tufua a ia, ti fakatupetupe lahi he mena nei a ia. Ne liogi a ia ki a Iehova hagaao ke he mena ne tupu, ti tala age e Ekepoa ne Mua ko Eli ki a ia: “Kia foaki mai foki he Atua a Isaraela e tau mena kua ole e koe kia ia.” Ne fakamafana he mena nei a Hana, “ti nakai tuai mata momoko a ia.” (1 Samu. 1:8, 17, 18) Ne falanaki a Hana ki a Iehova he toka mauokafua e tau mena oti ki a Iehova. Pete he nakai iloa e Hana e fakahikuaga, ne moua e ia e mafola he loto. Nakai leva, ne tali e Iehova e liogi haana. Ne fatu a ia ti fanau e tama taane, mo e fakahigoa a ia ko Samuela.—1 Samu. 1:20.
14. Ko e ha kua lata a Tavita mo e fakamafanaaga, ti haga atu a ia ki a hai?
14 Ko e Patuiki ko Tavita i Isaraela i tuai e taha fifitakiaga foki ne fakamafana he Atua. Maaliali ai ko Iehova ne ‘kitekite ke he loto,’ ti ko e mogo ne fifili e ia a Tavita ke eke mo patuiki amui ha Isaraela, ne iloa e ia na fakamooli mo e foaki katoatoa a Tavita ke he tapuakiaga mooli. (1 Samu. 16:7; 2 Samu. 5:10) Ka ko e magaaho fakamui, ne mahani faivao a Tavita mo Patesepa ti lali ke fufū e agahala he kelipopo e taane haana. He mailoga e Tavita e lahi he agahala haana, ne liogi a ia ki a Iehova: “Ke lata mo e lahi he hau a fakaalofa hofihofi, kia holoholo kehe haku a tau holifono. Kia mulu fakalahi e koe au ke he haku a tau mahani hepehepe, mo e fakamea e koe au he haku a tau hala. Ha kua iloa ni e au haku a tau holifono; ha i mua foki ia au haku tau hala nakai noa.” (Sala. 51:1-3) Ne tokihala mooli a Tavita, ti fakamagalo e Iehova a ia. Pete ia, ne fehagai a Tavita mo e tau fua he haana a mahani hepehepe. (2 Samu. 12:9-12) Pete ia, ko e fakaalofa noa a Iehova e punaaga he fakamafanaaga he fekafekau fakatokolalo haana.
15. Ko e heigoa e lagomatai ne foaki e Iehova ki a Iesu ato hoko e mate haana?
15 He nofo he lalolagi, ne fehagai a Iesu mo e tau tuaga kamatamata loga. Ne fakaatā he Atua e tau kamatamata nei he tua, ti fakatumau a Iesu ke he haana a mahani fakamooli ko e tagata mitaki katoatoa ne falanaki tumau ki a Iehova mo e fakatokoluga e pule katoatoa Haana. Teitei ke afo mo e tamate a Iesu, ne liogi a ia ki a Iehova: “Ka e aua neke eke hoku loto, ka ko e hau a finagalo.” Ti tū atu e agelu ki a Iesu mo e fakamalolō a ia. (Luka 22:42, 43) Ne foaki he Atua ki a Iesu e mafanatia, malolō, mo e lalago kua lata mo ia he mogoia.
16. Ko e heigoa ka taute he Atua hagaao ke he tupetupe lahi ka fehagai a tautolu mo e mate ko e tau tagata taofi mahani fakamooli?
16 Pete ka fehagai foki a tautolu mo e mate ha ko e ha tautolu a tuaga mauokafua ko e tau Kerisiano, maeke mo e to lagomatai e Iehova a tautolu ke fakatumau e mahani fakamooli ha tautolu ki a ia. Lafi ki ai, kua mafanatia a tautolu ha ko e amaamanakiaga he liu tu mai. Mo e amaamanaki atu foki a tautolu ke he aho he fi fakamui, “ke fakaotioti ai ko e mate haia”! (1 Kori. 15:26) Ko e tau fekafekau fakamooli he Atua ne mamate, pihia mo e falu, kua haia tukulagi he manamanatuaga a Iehova ti to fakaliu tutū mai. (Ioane 5:28, 29; Gahua 24:15) He mauokafua ke he maveheaga ha Iehova he liu tu mai kua tamai ki a tautolu e mafanatia mo e amaamanakiaga mooli ke he tau magahala favale.
17. Maeke fēfē a Iehova ke fakamafana a tautolu ka mate e fakahele?
17 Ko e mafanatia ha ia ke iloa ko e ha tautolu a tau fakahele ne momohe mogonei ke he tukuaga kua amaamanaki ke liliu momoui mai ke he lalolagi foou homo ue atu ne atāina mai he tau tupetupe oti ne tutupu mogonei! Ti ko e lilifu mooli ma e “moto tagata tokologa” he tau fekafekau a Iehova kua hao mai he fakaotiaga he fakatokaaga kelea nei ke fakafeleveia mo e fakaako a lautolu ka fakaliu tutū mai ke he moui he lalolagi!—Fakakite. 7:9, 10.
I Lalo he Tau Lima Tukulagi he Atua
18, 19. Fakamafana fēfē e tau fekafekau he Atua he mogo ne favale ki ai?
18 He tau kupu malolō lahi mo e loto mafanatia he lologo, ne fakamalolō e Mose e tau tagata ha Isaraela: “Kua eke e Atua mo mena ke nofo ai a koe tali mai i tuai tigahau; ha i lalo hau foki e tau lima tukulagi.” (Teu. 33:27) Ne tala age fakamui e perofeta ko Samuela ke he tau Isaraela: “Aua neke afe a mutolu he mumui atu kia Iehova; ka kia fekafekau a mutolu kia Iehova mo e ha mutolu a tau loto katoa. . . . Mena nakai tiaki e Iehova hana motu ha ko e hana higoa lilifu.” (1 Samu. 12:20-22) He pipiki tumau a tautolu ki a Iehova he tapuakiaga mooli, to nakai tiaki e ia a tautolu. To foaki mai tumau e ia e lalagoaga kua lata mo tautolu.
19 Nakai kaumahala e Atua he foaki ke he tau tagata haana e lagomatai mo e fakamafanaaga kua lata ke he tau aho uka fakamui nei. He molea e senetenari, totou afe e tau matakainaga fakaagaaga ha tautolu he lalolagi katoa ne kua favale mo e tuku ai he fale puipui ha kua fekafekau a lautolu ki a Iehova. Fakamooli he tau mena ne tutupu ki a lautolu he tau magahala kamatamata, na fakamafana mooli e Iehova haana tau fekafekau. Ma e fakatai, taha he tau matakainaga taane ha tautolu he Kautaha Soviete fakamua ne 23 e tau ne tuku he fale puipui ha ko e tua haana. Pete ia, ne moua e puhala ke taatu aki e tau mena kai fakaagaaga ki a ia ke maeke a ia ke fakamalolō mo e mafanatia. Ne pehē a ia: “He tau tau oti ia, ne iloa e au ke falanaki ki a Iehova mo e moua e malolō mai ia ia.”—Totou 1 Peteru 5:6, 7.
20. Ko e ha kua lata ia tautolu ke mauokafua to nakai tiaki e Iehova a tautolu?
20 Pete ne mena ka liga fehagai mo tautolu, lata ia tautolu ke tokaloto e tau kupu mafanatia he salamo: “Nakai toka e Iehova hana motu.” (Sala. 94:14) Pete he lata ia tautolu takitokotaha ke fakamafana, ha ha ia tautolu foki e lilifu lahi ke taatu e fakamafanaaga ke he falu. Ka to kitia e tautolu he vala tala ka mui mai, maeke ia tautolu ke foaki e fakamafanaaga ki a lautolu kua tagi he lalolagi lekua nei.
To Tali Fēfē e Koe?
• Ko e heigoa falu mena ka fakatupu a tautolu ke tupetupe lahi?
• Fakamafana fēfē e Iehova e tau fekafekau haana?
• Ka fehagai a tautolu mo e mate, ko e heigoa ka fakamafana a tautolu?
[Puha/Tau Fakatino he lau 25]
PUHALA KE FAHIA KE HE TAU MENA KA LAUIA HA TAUTOLU A . . .
▪ loto Sala. 147:3; 1 Ioa. 3:19-22; 5:14, 15
▪ manamanatuaga Sala. 94:19; Filipi 4:6, 7
▪ tau logonaaga Esoto 14:13, 14; Teu. 31:6
▪ malolō tino 2 Kori. 4:8, 9
▪ malolō fakaagaaga Sala. 145:14; Iako. 5:14, 15