“Fakamafana Ai a Lautolu Oti kua Tagi”
“Kua fakauku e Iehova au . . . ke fakamafana ai a lautolu oti kua tagi.”—ISAIA 61:1, 2.
1. Ko e heigoa ne taute e Iesu ma lautolu ne tagi, ti ko e ha?
KUA pehē a Iesu Keriso: “Ko e haku a mena kai hanei, kia eke e au e finagalo hana ne fakafano mai au, mo e fakaoti hana gahua.” (Ioane 4:34) He taute e matagahua haana ne foaki he Atua, ne fakaata e Iesu e tau mahani uho lahi he Matua haana. Ko e falu he tau mena nei ko e fakaalofa lahi ha Iehova ma e tau tagata. (1 Ioa. 4:7-10) Ne mailoga he aposetolo ko Paulo e taha he tau fakakiteaga he fakaalofa ia he fakamaama ai ko Iehova ‘ko e Atua hana e tau fakamafanaaga oti.’ (2 Kori. 1:3) Ne fakatātā e Iesu e fakaalofa pihia he taute e ia e mena ne talahau tuai he perofetaaga a Isaia. (Totou Isaia 61:1, 2.) Ne totou a Iesu mai he perofetaaga ia he sunako i Nasareta ti fakagahua ai e tau kupu ia ki a ia. (Luka 4:16-21) He fekafekauaga katoa ha Iesu, ne fakamafana fakaalofa e ia a lautolu ne tagi, he tamai ki a lautolu e fakamalolō mo e mafola he manamanatuaga.
2, 3. Ko e ha e tau tutaki he Keriso ne lata ke fifitaki ki a ia he foaki e fakamafanaaga?
2 Ko e tau tutaki oti ha Iesu ne lata ke fifitaki ki a ia he fakamafana ki a lautolu ne tagi. (1 Kori. 11:1) Pehē a Paulo: “Kia fetomaaki a mutolu, mo e fefakamafanaki a mutolu.” (1 Tesa. 5:11) Kua lata pauaki ia tautolu ke fakamafana e falu, ha kua fehagai e tau tagata oti mogonei mo e “tau aho uka.” (2 Timo. 3:1) Mua atu foki, ko e tau tagata ne loto fakamooli he lalolagi katoa kua fakafehagai ke he tau kupu mo e tau mahani ha lautolu ne fakatupu e maanu, loto mamahi, mo e momoko.
3 Tuga he talahau tuai he perofetaaga he Tohi Tapu, ko e tau aho uka ia he fakatokaaga kelea nei ne tokologa a lautolu ne ‘ofaofa he tau tagata a lautolu ni, velevele koloa, hula noa, fakatokoluga, vagahau kelea, faliuliu ke he tau matua, nakai fakaaue, mahani kelea, nakai fai fakaalofa, nakai fia loto mafola, tauamuamu, nakai taofi e tau manako he tino, mahani favale, nakai loto ke he mitaki, afo tagata, mahani fakahanoa, fakatokoluga, manako lahi ke he tau mena ke fiafia ki ai, ka e manako tote ke he Atua.’ Ko e tau aga pihia mogonei kua tupu lahi ki mua ha ko e “tau tagata mahani kelea mo e tau tagata kua fakavai, to tolomaki atu a lautolu ke au atu he kelea.”—2 Timo. 3:2-4, 13.
4. Ko e heigoa ne tupu ke he tau tuaga he lalolagi he vahā ha tautolu?
4 Ko e tau mena oti nei kua nakai lata ke ofo a tautolu, ha kua fakamahino mai he Kupu he Atua “ko e lalolagi oti ha he pule hana kua mahani kelea.” (1 Ioa. 5:19) “Ko e lalolagi oti” kua putoia e tau mena fakapolitika, fakalotu, mo e fakatupe, ti pihia mo e tau matutakiaga uta vala tala. Kua latatonu mooli a Satani ko e Tiapolo ke fakahigoa ko e “iki he lalolagi” mo e “atua he lalolagi nai.” (Ioane 14:30; 2 Kori. 4:4) Ko e tau tuaga he lalolagi katoa kua holo ni ki mua e kelea ha kua ita lahi mahaki a Satani mogonei, he iloa e ia kua kū e magaaho haana ne toe ti utakehe e Iehova a ia. (Fakakite. 12:12) Ko e mafanatia ha ia ke iloa ko e fakamanavalahi he Atua ki a Satani mo e fakatokaaga kelea haana to nakai leva ti moumou, ti ko e matakupu ne fakatū e Satani hagaao ke he pule katoatoa a Iehova to fakamafola ai!—Kene., ve. 3; Iopu, ve. 2.
Ko e Tala Mitaki kua Fakamatala ke he Lalolagi Katoa
5. Fakamooli fēfē e perofetaaga ke he gahua fakamatala he tau aho fakamui nei?
5 He magahala uka nei he fakamauaga tuai he tagata, ko e mena ne talahau tuai e Iesu nukua fakamooli. Ne pehē a ia: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mata. 24:14) Ko e gahua fakamatala nei he lalolagi katoa ke he Kautu he Atua kua taute fakalaulahi ai. He vahā nei, molea e 7,500,000 he Tau Fakamoli ha Iehova ne fakalataha ke he molea e 107,000 e fakapotopotoaga he lalolagi katoa kua fakamatala e Kautu he Atua, tuga he eke ai e Iesu mo matakupu he fakamatala mo e fakaako atu haana. (Mata. 4:17) Ti ko e fua he gahua fakamatala ha tautolu he magaaho nei, kua lahi e mafanatia he foaki ki a lautolu ne tagi. Ti ko e tau tau ua foou nei ne mole laia, ko e 570,601 e katoatoa he tau tagata ne papatiso ko e Tau Fakamoli a Iehova!
6. Ko e heigoa e manatu haau hagaao ke he fakatokaaga he gahua fakamatala ha tautolu?
6 Ko e lahi he fakatokaaga he gahua fakamatala nei ka loto fakaaue lahi mahaki he mailoga ko e Tau Fakamoli a Iehova mogonei ne fakaliliu mo e tufatufa e tau tohi faka-Tohi Tapu ke molea e 500 e vagahau. Nakaila kitia ia ha mena pehēnei ke he fakamauaga tuai he tagata! Ko e fakatūaga, gahua, mo e tupuaga he vala he fakatokatokaaga a Iehova he lalolagi kua ofoofogia lahi mooli. Ka nakai fai takitakiaga mo e lagomatai he agaaga tapu malolō he Atua, to nakai maeke e mena ia ke hoko ke he lalolagi nei i lalo he pule a Satani. Ha ko e tala mitaki kua fakamatala ke he lalolagi katoa, ko e fakamafanaaga mai he tau Tohiaga Tapu kua olioli mogonei he tau matakainaga fakaagaaga ha tautolu pihia foki mo lautolu ne tagi kua talia e fekau he Kautu.
Fakamafana e Tau Matakainaga Tapuaki
7. (a) Ko e ha kua nakai amanaki a tautolu ki a Iehova ke utakehe oti e tau tuaga tupetupe lahi mogonei? (e) Iloa fēfē e tautolu kua maeke ia tautolu ke fakamanavalahi ke he favale mo e matematekelea?
7 He lalolagi nei ne pukeina he mahani kelea mo e matematekelea, to fehagai mooli a tautolu mo e falu tuaga ne fakatupu e tupetupe lahi. Nakai amanaki a tautolu ke he Atua ke utakehe e tau punaaga oti kana he nakai fiafia po ke maanu ato moumou e ia e fakatokaaga nei. Ato hoko e mena ia, he fehagai a tautolu mo e favaleaga ne talahau tuai, ko e mahani fakamooli ha tautolu ki a Iehova kua lauia ai ha ko e tau tagata lalago he pule katoatoa haana he lagi mo e lalolagi. (2 Timo. 3:12) Ka ko e lagomatai mo e fakamafana he ha tautolu a Matua he lagi, kua maeke ia tautolu ke tuga e tau Kerisiano fakauku i Tesalonia i tuai, ne fakamanavalahi ke he tau favale mo e tau matematekelea ke he fakauka mo e tua.—Totou 2 Tesalonia 1:3-5.
8. Ko e heigoa e fakamooliaga faka-Tohi Tapu kua fakamafana e Iehova e tau fekafekau haana?
8 Nakai fakauaua ai ko Iehova ne foaki e mafanatia kua lata ma e tau fekafekau haana. Tuga anei, he mogo ne fakamatakutaku he patuiki fifine kelea ko Iesepela e moui he perofeta ko Elia, ne galo e loto malolō he perofeta ti hola, mo e pehē foki kua manako a ia ke mate. Ka e nakai akonaki atu ki a Elia, ne fakamafana e Iehova a ia mo e age ki a ia e loto malolō ke taute e gahua haana ko e perofeta. (1 Patu. 19:1-21) Ti ko e fakamafana e Iehova e tau tagata haana ka kitia foki ke he mena ne tupu he fakapotopotoaga Kerisiano he senetenari fakamua. Tuga anei, totou e tautolu ke he vahā ne “mafola ai e tau ekalesia oti kana i Iutaia, mo Kalilaia, mo Samaria, kua fakamafanatia a lautolu.” Lafi ki ai, “kua feoaki foki a lautolu mo e matakutaku ke he Iki [Iehova], ti kua fakatokologa he lagomatai mai he Agaga Tapu.” (Gahua 9:31) Ko e fakaaue ha ia ha tautolu ha kua moua foki e tautolu e ‘lagomatai mai he agaga tapu’!
9. Maeke fēfē e fakaako hagaao ki a Iesu ke fakamafana a tautolu?
9 Ko e tau Kerisiano, kua mafanatia a tautolu he fakaako hagaao ki a Iesu Keriso mo e o ai he tau tuagahui haana. Ne pehē a Iesu: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.” (Mata. 11:28-30) Ko e fakaako hagaao ke he puhala atihake ha Iesu he fehagai ke he tau tagata ti muitua ke he fifitakiaga mitaki haana kua lagomatai lahi ai he fakatotoka e tupetupe ne liga lauia ai a tautolu.
10, 11. He fakapotopotoaga, ko hai ka foaki e fakamafanaaga?
10 Maeke foki ia tautolu ke fakamafana he tau matakainaga Kerisiano. Ma e fakatai, manamanatu ke he puhala ne lagomatai he tau motua he fakapotopotoaga a lautolu kua fehagai mo e tau tuaga tupetupe lahi. Ko e tutaki ko Iakopo ne tohi: “Kua gagao [fakaagaaga] kia taha ia mutolu? Kia ui atu a ia ke he tau patu he ekalesia, kia liogi a lautolu mo ia.” Ti ko e heigoa e fua? “To fakamoui e tagata gagao ke he liogi kua eke mo e tua, to fakatu foki he Iki [Iehova] a ia; kaeke foki kua hala a ia, to fakamagalo ai.” (Iako. 5:14, 15) Ko e falu tagata foki he fakapotopotoaga ka foaki e fakamafanaaga.
11 Fa mukamuka lahi e tau fifine ke tutala ke he falu fifine hagaao ke he tau lekua kehekehe. Mua atu ki a lautolu e tau matakainaga fifine momotua ne iloa mitaki ke foaki e tau fakatonuaga atihake ke he tau matakainaga fifine fuata. Ko e tau fifine Kerisiano motua nei ne liga fitā e lauia he tau tuaga pihia he tau momoui ha lautolu. Ko e fakaalofa hofihofi mo e tau aga fakamatua fifine ha lautolu ka lagomatai lahi. (Totou Tito 2:3-5.) Mooli, maeke mo e kua lata he tau motua mo e falu ke “fakamafana a lautolu kua manava tote” ne ha ha mo tautolu. (1 Tesa. 5:14, 15) Ti kua mitaki ke tokaloto ai ko e Atua kua ‘fakamafana mai a tautolu ke he ha tautolu a tau matematekelea oti, kia maeke ia tautolu ke fakamafana kia lautolu ha i ai ha matematekelea.’—2 Kori. 1:4.
12. Ko e ha kua aoga ai ke fakalataha a tautolu ke he tau feleveiaaga Kerisiano?
12 Ko e tau puhala aoga ke fakamafana ko e fakalataha ke he tau feleveiaaga Kerisiano, ne kua ha ha i ai e tau fakatutalaaga Tohi Tapu kua fakamalolō a tautolu. Kua totou e tautolu ko Iuta mo Sila ne “fakamafana atu e laua, mo e fakamalolo e laua e tau matakainaga ke he tau kupu loga.” (Gahua 15:32) Ato kamata mo e ka oti e tau feleveiaaga ha tautolu, ha ha i ai e fakatutalaaga atihake he tau tagata he fakapotopotoaga. Ti pete ka matematekelea a tautolu ha ko e falu tuaga tupetupe lahi, kia nakai vevehe kehe a tautolu, ha ko e taute pihia ka nakai fakaholo ki mua e tau tuaga. (Fakatai 18:1) Ka e lata ia tautolu ke mumui ke he fakatonuaga omoomoi he aposetolo ko Paulo: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.”—Hepe. 10:24, 25.
Moua e Mafanatia Mai he Kupu he Atua
13, 14. Fakakite e puhala ka fakamafana he tau Tohiaga Tapu a tautolu.
13 He eke a tautolu mo tau Kerisiano papatiso po ke tau tagata kua kamata laia ke fakaako hagaao ke he Atua mo e haana tau finagalo, maeke ia tautolu ke moua e mafanatia lahi he Kupu tohia he Atua. Ne tohi e Paulo: “Ko e tau mena oti ne tohi mai i tuai, ne tohi ia, ke fakaako ai a tautolu; kia moua ai e tautolu e amaamanaki ha ko e fakauka mo e fakamafanatia mai he tau Tohi.” (Roma 15:4) Maeke he tau Tohiaga Tapu ke fakamafana a tautolu ti taute a tautolu ke ‘katoatoa ai e mitaki, kia taute ke he tau gahua mitaki oti kana.’ (2 Timo. 3:16, 17) He iloa e kupu mooli hagaao ke he tau finagalo he Atua mo e ha ha ai e amaamanakiaga mooli ma e vahā anoiha ka moua ai e mafanatia lahi. Ko e mena ia kia fakaaoga katoatoa e tautolu e Kupu he Atua mo e tau tohi ne fakavē ke he Tohi Tapu ka fakamafana a tautolu mo e aoga ki a tautolu ke he tau puhala loga.
14 Ne fakatoka e Iesu e fifitakiaga mitaki he fakaaoga e tau Tohiaga Tapu ke fakaako mo e fakamafana e falu. He taha magaaho he mole e liu tu mai hana, tuga anei, ne “fakamatala mai foki e ia e tau Tohi” ke he tokoua e tutaki haana. He tutala a ia ki a laua, kua lauia lahi mahaki e tau loto ha laua. (Luka 24:32) Fakalautatai ai mo e fifitakiaga mitaki lahi mahaki a Iesu, ko e aposetolo ko Paulo ne ‘fakamaama mai he tau Tohiaga Tapu.’ I Perea, ko e haana a tau tagata fanogonogo “kua talia e lautolu e kupu mo e loto makutu, kua kumikumi [fakamitaki] ke he tau Tohi ke he taha aho mo e taha aho.” (Gahua 17:2, 10, 11) Latatonu mooli mogoia ke totou e tautolu e Tohi Tapu he tau aho takitaha, aoga mai i ai mo e mai he tau tohi faka-Kerisiano ne talaga ke foaki ki a tautolu e mafanatia mo e amaamanaki he tau magaaho lekua nei!
Tau Puhala Foki ke Fakamafana e Falu
15, 16. Ko e heigoa falu he tau mena ka taute e tautolu ke lagomatai mo e fakamafana e tau matakainaga Kerisiano?
15 Maeke ia tautolu ke lagomatai ti fakamafana e tau matakainaga Kerisiano he tau puhala aoga kehekehe. Tuga anei, liga taute e tautolu e falu fakatau ma e fuakau po ke tau matakainaga fakahele ne gagao. Liga lagomatai e tautolu e falu ke he tau fekau ha lautolu, ti fakakite ki a lautolu e fiafia fakatagata. (Filipi 2:4) Liga maeke ia tautolu ke nava ke he tau tagata tapuaki ke he tau mahani mitaki ha lautolu, tuga e fakaalofa, aga gahua, loto malolō, mo e tua ha lautolu.
16 He eketaha ke fakamafana a lautolu ne momotua, maeke ia tautolu ke ahiahi atu mo e fanogonogo fakamitaki ke he mena ne talahau e lautolu ki a tautolu hagaao ke he tau mena tutupu kua mole mo e tau monuina pauaki he gahua a Iehova. To foaki he mena nei ki a tautolu e loto malolō mo e mafanatia! Maeke ia tautolu ke totou e Tohi Tapu po ke tau tohi faka-Tohiaga Tapu mo lautolu ne ahiahi ki ai a tautolu. Liga lata ia tautolu ke fakatutala ke he vala tala foou ma e Fakaakoaga Kolo Toko he faahi tapu po ke vala tala ka fakaako ki ai he Fakaakoaga Tohi Tapu he Fakapotopotoaga ma e faahi tapu. Liga kitekite auloa e tautolu mo lautolu e DVD ke he tau tala faka-Tohi Tapu. Ti liga totou po ke tala age foki e tautolu e falu mena tutupu fakamalolō ne haia he tau tohi ha tautolu.
17, 18. Ko e tau fekafekau fakamooli a Iehova, ko e ha kua mauokafua a tautolu to lalago mo e fakamafana e ia a tautolu?
17 Ka mailoga e tautolu e matakainaga tapuaki ha Iehova kua manako fakamafanaaga, maeke ia tautolu ke totoku a ia he tau liogi fakatagata ha tautolu. (Roma 15:30; Kolo. 4:12) He fahia a tautolu takitokotaha ke he tau lekua he moui mo e eketaha fakamakutu ke fakamafana e falu, maeke ia tautolu ke moua e tua mo e mauokafua tuga he salamo ne lologo: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.” (Sala. 55:22) Mooli, to ha ha i ai tumau a Iehova ke fakamafana mo e lalago a tautolu ko e tau fekafekau fakamooli haana.
18 Ne tala age e Atua ke he tau tagata tapuaki haana he vahā i tuai: “Ko au, ko au ni kua fakamafana a mutolu.” (Isaia 51:12) To taute pihia foki e Iehova ma tautolu mo e to fakamonuina e tau gahua mo e tau kupu mitaki ha tautolu he fakamafana e tautolu a lautolu ne tagi. Ke he lagi po ke lalolagi e amaamanakiaga ha tautolu, igatia a tautolu mo e mafanatia ke he tau kupu ha Paulo ke he haana tau matakainaga Kerisiano fakauku he agaaga: “Ka ko e Iki ni ha tautolu ko Iesu Keriso, katoa mo e Atua ko e Matua ha tautolu, ko ia kua fakaalofa mai kia tautolu, mo e foaki mai e fakamafanaaga tukulagi, mo e amaamanaki mitaki ke he Fakaalofa noa, Kia fakamafana e ia ha mutolu a tau loto, mo e fakatumau a mutolu ke he tau kupu mitaki oti mo e tau gahua mitaki oti.”—2 Tesa. 2:16, 17.
Manatu Nakai e Koe?
• Laulahi fēfē e gahua ha tautolu he fakamafana a lautolu ne tagi?
• Ko e heigoa falu mena ka taute e tautolu ke fakamafana e falu?
• Ko e heigoa e fakamooliaga faka-Tohi Tapu kua fakamafana e Iehova haana tau tagata?
[Fakatino he lau 28]
Fakalataha nakai a koe he fakamafana a lautolu ne tagi?
[Fakatino he lau 30]
Lautolu ne ikiiki mo e fuakau ka foaki e fakamalolōaga