Fakamafana Mai ‘e Atua he Tau Fakamafanaaga Oti’
“Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti, Ko ia kua fakamafana mai a mautolu ke he ha mautolu a tau matematekelea oti.”—2 KORINITO 1:3, 4.
1, 2. Ko e faga fakamafanaaga fefe kua lata mo e tau tagata maanu?
KUA lata mo e tau tagata maanu e fakamafanaaga moli—nakai ko e tau talahauaga pau mo e mena tuai. Kua logona oti e tautolu e talahauaga ‘to galo ai ni e mamahi he tau aho i mua,’ ka e he fou agaia he mauku, ko hai foki e tagata ka fakamafanatia he tau manatu ia? Iloa he tau Kerisiano kua mavehe e Atua ke he liu tu mai, ka e nakai puipui he mena ia e hukia lahi mahaki he tau loto he amanaki ti galogia. Mo e moli ka galo hau a tama, nakai hukui he fanau ne momoui agaia e tama fakahele ne mate.
2 He tau magaaho ka mate taha, kua lagomatai lahi he tau fakamafanaaga moli a tautolu, ko e fakamafanaaga ne fakave lahi ke he tau maveheaga he Atua. Kua lata foki a tautolu mo e fakaalofa hofihofi. Kua moli lahi e mena nei ke he tau tagata i Ruanata, mua atu ke he teau he tau magafaoa he Tau Fakamoli a Iehova i ai ne mamate ha lautolu a tau fakahele he kelipopoaga faka-Tiapolo ke tatafi kehe e tau matakau ikiiki. Ti ko hai kua maeke e tau tagata oti ne maanu ke moua mai e fakamafanaaga?
Iehova—Ko e Atua he Fakamafanaaga
3. Fakatoka fefe e Iehova e fakafifitakiaga ke he foaki fakamafanaaga?
3 Ko Iehova ne fakatoka e fakafifitakiaga he foaki mai ki a tautolu oti kana e fakamafanaaga. Kua fakafano mai ni e ia hana Tama fuataha, ko Iesu Keriso, ke he lalolagi ke foaki mai ki a tautolu e fakamafanaaga mo e amaamanakiaga tukulagi. Kua fakaako e Iesu: “Nukua pihia e fakaalofa mai he Atua ke he lalolagi, kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” (Ioane 3:16) Ne tala age foki a ia ke he hana tau tutaki: “Nakai mua ni e fakaalofa he taha ke he fakaalofa nai, kia tuku atu e taha hana moui ke hukui aki hana tau kapitiga.” (Ioane 15:13) He taha magaaho foki ne pehe a ia ko e: “Tama he tagata nakai hau a ia kia fekafekau mai e tau tagata kia ia, ka kia fekafekau atu a ia, kia foaki atu foki hana moui mo lukutoto ke hukui aki e tau tagata tokologa.” (Mataio 20:28) Mo e talahau e Paulo: “Ka kua fakakite mai he Atua hana fakaalofa kia tautolu he matulei e Keriso ke hukui aki a tautolu, ka ko e tau tagata hala agaia a tautolu.” (Roma 5:8) Kua maeke ia tautolu ke kitia mai he tau mena nai mo e tau kupu tohi tapu loga foki e fakaalofa he Atua mo Iesu Keriso.
4. Kua mua atu he ha e kaitalofa he aposetolo ko Paulo ki a Iehova?
4 Kua mua atu he iloa he aposetolo ko Paulo e mahani totonu noa a Iehova. Ha ko e mena hamutia mai a ia he tuaga mate fakaagaga, mai he tagata mahani favale lahi ke he tau tutaki a Keriso ti kua eke mogonai ko e Kerisiano matematekelea a ia ni. (Efeso 2:1-5) Kua fakamaama mai e mena ne tupu ki a ia: “Ha ko au, ko e muikau au he tau aposetolo; kua nakai aoga au ke talahaua ko e aposetolo, ha ko e mena ne favale au ke he ekalesia he Atua. Ko e fakaalofa noa he Atua kua pehenei ai au; ti nakai moua teao e au hana fakaalofa noa ia, ka kua mua haku a tau gahua kia lautolu oti; ka e nakai ko au, ka ko e fakaalofa noa he Atua ha ha ia au.”—1 Korinito 15:9, 10.
5. Ko e heigoa ne tohi e Paulo hagaao ke he fakamafanaaga mai he Atua?
5 Kua lata tonu ai mogoia, he tohia e Paulo: “Kia fakaaue ke he Atua, ko e Matua he Iki ha tautolu ko Iesu Keriso, ko e Matua hana e fakaalofa hofihofi, ko e Atua foki hana e tau fakamafanaaga oti, Ko ia kua fakamafana mai a mautolu ke he ha mautolu a tau matematekelea oti, kia maeke ia mautolu ke fakamafana age kia lautolu ha i ai ha matematekelea ke he fakamafanaaga kua fakamafanatia ai he Atua a mautolu. Ha ko e mena, tuga he fakalahi mai kia mautolu e tau mamahi ha ko Keriso, ti pihia foki he fakalahi mai ha mautolu a fakamafanatia mai ia Keriso. Kaeke kua matematekelea a mautolu, kua pihia ha ko e fakamafanaaga mo e fakamouiaga ha mutolu, ha ne gahua ni mo e fakauka ke he tau mena mamahi ia kua mamahi ai a mautolu; kaeke ke fakamafanatia a mautolu, ti pihia ha ko e fakamafanaaga mo e fakamouiaga ha mutolu.”—2 Korinito 1:3-7.
6. Fakahaha ke he heigoa e kupu Heleni ne liliu “fakamafanaaga”?
6 Kua omoomoi ha e tau kupu ia! Ko e kupu Heleni nai ne liliu “fakamafanaaga” mena matutaki ke he “uiina ke fano ke he tapa he taha.” Ti ko e mena ia ko e “tu he tapa he tagata ke fakamafana a ia ka hoko e tau kamatamata lahi ki a ia.” (A Linguistic Key to the Greek New Testament) Taha e tagata fakaako tokoluga ke he Tohi Tapu ne tohia: “Ko e kupu . . . kua lahi tumau moli e kakano mai he fakaalofa mafanafana hokoia. . . . Ko e fakamafanaaga Kerisiano ko e fakamafanaaga kua foaki mai e fakamaloloaga, ko e fakamafanaaga ne kua maeke ai e tagata ke fahia ke kautu mai he tau mena uka oti he moui ne hoko ki a ia.” Kua fakalataha foki ki ai e tau kupu fakamafanatia ne kua fakave ke he maveheaga mo e amaamanakiaga mauokafua—ke he liu tu mai ha lautolu ne mamate.
Iesu mo Paulo—Tau Tagata Fakamafana Fakaalofa Hohofi
7. Fakamafanatia atu fefe a Paulo ke he hana tau matakainaga Kerisiano?
7 Ko e fakafifitakiaga homo lahi ha a Paulo ke he foakiaga fakamafanaaga! Kua maeke a ia ke tohia ke he tau matakainaga i Tesalonia: “Ka kua mahani molu a mautolu he nofo ai a mautolu ia mutolu, tuga ne fifine fakahuhu tama kua leveki fakamitaki hana ni a fanau. Ne hofihofi pihia ha mautolu a fakaalofa kia mutolu, ne fiafia a mautolu ke ta atu kia mutolu, nakai kuenaia e vagahau mitaki he Atua, ka e katoa foki mo e moui ha mautolu, ha kua ofania e mautolu a mutolu. Tuga ne iloa foki e mutolu, ne mahani a mautolu kia mutolu takitokotaha tuga ne matua tane ke he hana fanau, he tomatoma atu a mautolu kia mutolu, mo e fakamafana atu, mo e talahau atu kia mutolu.” Ke tuga e tau mamatua fakaalofa ne manamanatu lahi, kua maeke ia tautolu oti ke fakakite e aga mafanatia mo e loto maama ke he falu he ha lautolu a tau magaaho matematekelea. —1 Tesalonia 2:7, 8, 11.
8. Fakamafana he ha he fakaakoaga a Iesu a lautolu ne maanu?
8 He fakakite e fakaalofa mo e mahani totonu pihia, ko e mena fifitaki ni a Paulo ke he hana Fakafifitakiaga lahi mahaki, ko Iesu. Kia manatu e uiina fakaalofa hohofi ne tuku mai e Iesu ke he tau tagata oti kana ne fakamau ia Mataio 11:28-30: “Kia o mai a mutolu kia au, ko mutolu oti ne matematekelea mo e pehia he tau kavega; ko au foki ke okioki ai a mutolu. Kia hahamo e mutolu e lakau hahamo haku, mo e fifitaki mai a mutolu kia au; ha ko au ni ko e totonu mo e loto holoilalo; ti moua ai e mutolu e okiokiaga mo e tau agaga ha mutolu. Ha ko e mena maeke vave haku a lakau hahamo he uta, ko e haku a kavega foki, ko e mena mama a ia.” E, kua ati hake e fakaakoaga a Iesu kakano he tuku mai e amaamanakiaga mo e maveheaga—ko e maveheaga ke he liu tu mai. Ko e amaamanakiaga mo e maveheaga a nai ne foaki atu e mautolu ke he tau tagata, ke tuga a nai, he magaaho ka toka e mautolu mo lautolu e porosua Ka Mate a Ia ne Ofania e Koe. Maeke he amaamanakiaga nei ke lagomatai a tautolu oti, pihia foki kaeke kua leva he maanu a tautolu.
Puhala ke Fakamafana a Lautolu ne Maanu
9. Ko e ha kua nakai lata a tautolu ke fakatepetepe ke he tau tagata ne maanu?
9 Nakai fakakaupa e maanu ke he falu magaaho ku ni he mole e mate he taha fakahele. Kua fua he falu tagata e kavega mamafa he ha lautolu a maanu ke he moui katoa ha lautolu, mua atu ki a lautolu ne mamate e tau tama. Kua taha e kau tokoua Kerisiano mahani fakamoli i Sepania ne mate ha laua a tama tane ne 11 e tau he moui, he tau 1963, ha ko e gagao meningitis. Ke hoko mai ke he magaaho nei, fa mokulu agaia ha laua a tau hihina mata ka tala ke he ha laua a Paquito. Kua eke e tau fakamanatuaga, tau ata, tau mena tokiofa, ke liuaki mai e tau manatu momoko tuai. Ha kua pihia, kua lata a tautolu ke nakai fakatepetepe mo e manamanatu kua lata tuai a lautolu ke oti e maanu he magaaho nei. Kua talahau tonu he pule faka-ekekafo: “Ko e hikihikifano he mahani fakaagitau mo e logonaaga, ko e mena liga to ha ha tumau ke he loga e tau tau.” Kia manatu, mogoia, ke tuga he mau tumau e tau pite matamotu matolu he tau tino ha tautolu he moui katoa, to pihia foki e tau pite loga he logonaaga.
10. Ko e heigoa kua maeke ia tautolu ke lagomatai a lautolu ne maanu?
10 Ko e heigoa e falu mena aoga kua maeke a tautolu ke taute ke fakamafana a lautolu ne maanu he fakapotopotoaga Kerisiano? Mai he loto fakamoli katoa liga to pehe a tautolu ke he taha matakainaga tane po ke matakainaga fifine ne lata ke fai fakamafanaaga, “Ka fai mena kua maeke ia au ke taute ke lagomatai, fakailoa mai ki a au.” Ka e fa laga fiha moli e magaaho ka ui mai e tagata mauku ki a tautolu ke talahau, “Kua manatu tuai e au e taha mena kua maeke ia koe ke taute ke lagomatai au”? Kua kitia maali tuai, lata a tautolu ke fakamakaukau ke taute ha mena kua lata ke fakamafana a ia ne mauku. Ti ko e heigoa mogoia e tau mena aoga kua maeke ia tautolu ke taute? Hanai e tau kupu lagomatai gahoa.
11. Maeke fefe he fanogonogo a tautolu ke fakamafana e falu?
11 Fanogonogo: Taha e mena kua maeke lahi ia koe ke lagomatai ko e fakalataha ke he hana mamahi ne mauku he fanogonogo. Maeke ia koe ke huhu, “Loto nakai a koe ke tala ki ai?” Ti toka e tagata ke fifili. Manatu he taha Kerisiano e magaaho ne mate hana matua tane: “Kua lagomatai lahi moli ki a au he magaaho ne huhu e falu ko e heigoa ne tupu mo e fanogonogo moli ki ai.” Tuga he fakatonu mai e Iakopo, ke mafiti ke fanogonogo. (Iakopo 1:19) Fanogonogo fakaeneene mo e fakaalofa ki ai. “Kia tagi foki a mutolu fakalataha mo lautolu kua tagi,” he tala mai he Tohi Tapu ia Roma 12:15. Kia manatu ne tagi auloa a Iesu mo Mareta mo Maria.—Ioane 11:35.
12. Ko e heigoa e tau faga fakamaloloaga kua maeke ia tautolu ke foaki atu ki a lautolu ne maanu?
12 Kia fakamalolo atu: Kia manatu liga tokihala e tagata mauku he magaaho fakamua, he manamanatu kua liga lata foki a ia ke lahi e mena ne taute. Fakamalolo ke he tagata liga koenaia e tau mena kua fita he taute e ia (po ke talahau ha mena ne iloa e koe kua moli mo e mitaki). Fakamalolo atu ki a ia ko e mena ne logona e ia kua nakai kehe mai he tau tagata oti. Tala age ki a ia e falu ne iloa e koe ne fahia ke kautu mai he mena galogia pihia. Ke he falu kupu, kia mukamuka ke mailoga hana aga mo e fakaalofa ki a ia. Kua maeke ha tautolu a tau lagomatai fakaalofa ke logona lahi e ia! Kua tohia e Solomona: “Ko e tau kupu kua vagahau mo e lata ai kua tuga ne tau fua moli auro.”—Tau Fakatai 16:24; 25:11; 1 Tesalonia 5:11, 14.
13. Ka fakaata e tautolu a tautolu, maeke fefe he mena ia ke lagomatai?
13 Kia ata: Kia fakaata e koe a koe nakai ni he tau aho gahoa fakamua ka ha ha agaia e tau kapitiga mo e tau matakainaga ka e ke he tau mahina loga ka mole ai kaeke kua lata, he magaaho ka liliu e falu ke he tau momoui ha lautolu. Kua maeke e tau vaha maanu ke kehekehe lahi, ko e mena uta ni ke he tagata. Kakano lahi ha tautolu a manamanatu mo e momoko Kerisiano he tau magaaho kua lata ai. Kua pehe e Tohi Tapu “ha ha i ai taha kua ofania mai kua mua he pipiki mai a ia ke he matakainaga.” Ti ko e talahauaga, “Ko e kapitiga moli ni e kapitiga ka hoko e matematekelea,” ko e mena moli kua lata a tautolu ke taute mau.—Tau Fakatai 18:24; fakatatai Gahua 28:15.
14. Ko e heigoa kua maeke ia tautolu ke tutala ki ai ke fakamafana a ia ne mauku?
14 Tala ke he tau mahani mitaki he tagata ne mate: Ko e taha lagomatai lahi a nei ka hako e magaaho ka tutala ki ai. Tutala ke he tau tala fuluola ne manatu e koe ke he tagata ia. Kia nakai matakutaku ke fakaaoga e higoa he tagata mate. Ua mahani tuga ko e mena nakai moui he taha magaaho po ke nakai fai higoa e tagata fakahele ne mate. Kua fakamafanatia lahi ke iloa e mena ne talahau he tohi fakailoa he Harvard Medical School: “Kua eke e tuluiaga ke moua ka maeke e tagata mauku ke manamanatu ke he tagata mate mo e nakai lofia he momoko lahi . . . He mailoga mo e talia e mena fou ia, to galo fakahaga ai e maanu ke he tau manatu tokiofa.” Ko e “tau manatu tokiofa”—kua fakamafanatia lahi ha ka liu ke manatu e tau magaaho uho nei ne fa fakalataha mo e fakahele ia! Kua pehe e taha Fakamoli ne mate hana matua tane he tau tau kua mole: “Ko e manatu uho ki a au ko e magaaho ne totou fakalataha e Tohi Tapu mo Tete he nakai leva he kamata a ia ke fakaako e kupu moli. Mo e he fakaloloa he kau vailele ke tutala ke he falu mena vihi haku. Ne laga tolu po ke laga fa ni e magaaho he tau ka kitia e au a ia, ti ko e tau magaaho uho lahi a ia ki a au.”
15. Maeke fefe ia taha ke fakamakaukau ke lagomatai?
15 Fakamakaukau he magaaho kua lata: Maeke lahi e falu tagata maanu ke fahia mai he falu. Ti uta ni ke he tau tutuaga, taute e tau mena aoga ke lagomatai. Ne manatu he taha fifine Kerisiano: “Tokologa he fakapotopotoaga ne pehe, ‘Kaeke kua fai mena ke taute e au, fakailoa mai ki a au.’ Ka e taha e matakainaga fifine Kerisiano ne nakai huhu. Ne fano taha na ia ke he poko mohe, hihi e mohega, mo e unu e tau kafu kiva. Kua uta he taha e pakete, vala vai, mo e tau mena fakamea mo e kana e potu faliki kelekele ne koko he tane haku. Ko e tau kapitiga moli a nei, mo e to nakai nimo e au a laua.” Ko e mena kua kitia moli kua lata ke lagomatai, fakamakaukau—liga he tauteute e tau mena kai, lagomatai ke fakamea e fale, po ke poi fano ke uta e tau fekau. Kua moli, kua lata foki a tautolu ke fakaeneene ke nakai fakalavelave e tau magaaho ka fia nofo tokotaha e tagata maanu. Ti kua lata a tautolu ke fakagahua moli e tau kupu a Paulo: “Haia ni, kia fakatapulu a mutolu ke he fakaalofa hohofi noa, mo e mahani totonu, mo e loto holoilalo, mo e mahani molu, mo e fakauka, ke lata mo lautolu kua fifili he Atua, ko e tau tagata tapu mo e ofania.” Kua nakai kaumahala e mahani totonu, fakauka mo e fakaalofa.—Kolose 3:12; 1 Korinito 13:4-8.
16. Maeke he ha e tohi po ke lau pepa ke foaki e fakamafanaaga?
16 Tohi po ke fakafano e lau pepa fakamafana: Ko e mena ne fa mahani ke nimo ko e aoga he tohi fakamafana po ke lau pepa fakaalofa. Aoga he ha? Kua maeke ke liu lagaloga ke totou. Nakai eke ke loa foki e tohi pihia, ka kua lata ke fakakite hau fakaalofa hohofi. Kua lata foki ke hagahaga fakaagaga ka e nakai ke fakamatala atu. Ko e fekau ku ni “Ko mautolu hinai ka manako a koe” ne kua maeke ke fakamafana atu.
17. Maeke fefe he liogi ke foaki mai e fakamafanaaga?
17 Liogi mo lautolu: Kia nakai fakatote e aoga he tau liogi fakalataha hau mo ia mo e ma e tau Kerisiano ne mauku. Kua pehe e Tohi Tapu ia Iakopo 5:16: “Kua aoga lahi e liogi fakamakamaka he tagata tututonu.” Ke fakatai ki ai, he magaaho ka logona he tagata maanu a tautolu he liogi ma lautolu, kua lagomatai a lautolu ke mitaki e tau logonaaga kelea tuga e tokihala. He ha tautolu a tau magaaho lolelole, temotemoai, kua lali a Satani ke fakalolelole a tautolu ke he hana “tau lagatau,” po ke “tau gahua tifi kelea.” Ko e magaaho a nei kua lata a tautolu mo e fakamafana mo e lagomatai he liogi, tuga ne talahau e Paulo: ‘Ke he tau vahega liogi mo e olelalo oti kia nakai noa ke liogi he tau magaaho oti fakalataha mo e agaga. Mo e ke he mena ia kia mataala tumau ai fakalataha mo e olelalo ma lautolu oti ne fakauku.’—Efeso 6:11, 18, Kingdom Interlinear; fakatatai Iakopo 5:13-15.
Kalo Kehe Mai he Heigoa
18, 19. Maeke fefe ia tautolu ke fakakite e iloilo ke he tau tutalaaga ha tautolu?
18 He magaaho ka maanu e tagata, kua ha ha i ai foki e tau mena kua nakai lata ke taute po ke talahau. Kua hataki mai ia Tau Fakatai 12:18: “Ha ha i ai e tagata kua vagahau, ti tuga ne tuina ai e tau tagata he pelu; ka ko e alelo he tagata iloilo ke malolo ai.” He falu magaaho, ka e nakai iloa ai, kua kaumahala a tautolu ke fakakite e iloilo. Ke fakatai ki ai, liga to pehe a tautolu, “Iloa e au e mena ne logona e koe.” Ka e moli kia e mena ia? Kua tatai pihia kia e matematekelea ne tupu ki a koe? Ti ko e taha mena foki, kehekehe e tau mena ka taute he tau tagata. Liga nakai tatai hau a tau mahani mo e mena ka taute he tagata maanu. Kua liga fakaalofa ke pehe, “Kua fakaalofa lahi au ki a koe kakano ha kua pihia e mena ne hoko ke he haku . . . ne mate he falu magaaho kua mole.”
19 Kua fakaalofa foki ke kalo kehe mai he talahau ko e to liu tu mai po ke nakai a ia ne mate. Kua hukia lahi e falu matakainaga tane mo e tau matakainaga fifine he tau kupu fakafili ia hagaao ke he amanakiaga ke he vaha i mua he tokoua nakai tali tonu ne mate. Nakai ko e tau fakafili a tautolu ko hai ka liu tu mai po ke ka nakai liu tu mai. Kua maeke a tautolu ke okioki e tau loto ha ko Iehova, ne kitia e tau loto, ti kua mua atu e fakaalofa hofihofi noa mai he laulahi ia tautolu.—Salamo 86:15; Luka 6:35-37.
Tau Kupu Tohi Tapu kua Fakamafana
20, 21. Ko e heigoa e falu kupu tohi tapu kua maeke ke fakamafana a lautolu ne mauku?
20 Taha he tau punaaga lahi mahaki kua lagomatai ki a ia ne mauku, ka foaki he magaaho kua lata, ko e kitekiteaga ke he tau maveheaga a Iehova ma lautolu ne mamate. Kua aoga lahi e tau manamanatu Tohi Tapu nei pete ni ko e Fakamoli po ke tagata ne feleveia mo tautolu he fekafekauaga he fonua ne mauku. Ko e heigoa e falu he tau kupu Tohi Tapu nei? Iloa e tautolu ko Iehova e Atua he tau fakamafanaaga oti kana, ha kua pehe a ia: “Ko au, ko au ni kua fakamafana a mutolu.” Ne pehe foki a ia: “Tuga ne tagata ne fakamafana ai he hana matua fifine, to fakamafana pihia e au a mutolu.”—Isaia 51:12; 66:13.
21 Kua tohia he salamo: “Ko ia ne mafanatia ai au ke he haku a matematekelea; ha ko e hāu a kupu ni kua fakamoui au. Iehova na e, kua manatu au ke he hau a tau fakafiliaga tali mai i tuai, ti mafanatia ai au. Kia eke hāu a fakaalofa mo mena ke mafanatia ai au, ke lata mo e hāu a vagahau ke he hāu a fekafekau.” Kia mailoga la e kupu “mafanatia” ne fakaaoga lagaloga he tau kupu ia. E, maeke ia tautolu ke moua e mafanatia moli ma tautolu ni mo e ma e falu he onoono ke he Kupu a Iehova he vaha matematekelea ha tautolu. Ko e mena nei, fakalataha mo e fakaalofa mo e loto hohofi he tau matakainaga, kua maeke ke lagomatai a tautolu ke fakauka ke he galogia ha tautolu mo e liu foki ke pukeina e tau momoui ha tautolu mo e tau gahua olioli he fekafekauaga Kerisiano.—Salamo 119:50, 52, 76.
22. Ko e heigoa e tau amaamanakiaga ne fakatoka mai i mua ha tautolu?
22 Kua maeke foki a tautolu ke fahia ke kautu mai he maanu ha tautolu he lavelave lahi he lagomatai e falu ka momoko lahi a lautolu. He onoono a tautolu ke he falu ne kua lata ke fai fakamafanaaga, kua moua foki e tautolu e fiafia lahi moli he foaki atu ke he puhala fakaagaga. (Gahua 20:35) Kia foaki atu e tautolu ki a lautolu e manamanatuaga ke he aho liu tu mai he magaaho ka eke e tau tagata mai he tau motu oti kana fakamua, tau atu hau oti, ke fakafeleveia ha lautolu a tau fakahele ne kua mamate he liliu mai he mate ke he lalolagi fou. Ko e amaamanakiaga homo lahi! To tafe e tau hihina mata olioli he magaaho ia he manatu e tautolu ko Iehova ko e Atua moli ne “fakamafana e tau loto holoilalo”!—2 Korinito 7:6.
Manatu Nakai e Koe?
◻ Eke fefe a Iehova ‘ko e Atua he tau fakamafanaaga oti’?
◻ Fakamafana fefe e Iesu mo Paulo a lautolu ne maanu?
◻ Ko e heigoa e falu mena kua maeke ia tautolu ke fakamafana a lautolu ne maanu?
◻ Kua lata ia tautolu ke kalo kehe mai he heigoa ka fakafehagai mo lautolu ne mauku?
◻ Ko e heigoa e tau kupu tohi tapu ne loto lahi a koe ki ai ne fakamafanatia he tau magaaho momoko?
[Fakatino he lau 27]
Kia iloilo ke fakamakaukau ke lagomatai a lautolu ne maanu