Manamanatuaga—Ko e Kavega po ke ko e Lagomataiaga?

‘HANE fakalavelave he haku manamanatuaga au!’ Ke he taha magaaho ke he taha magaaho, kua teitei ke hokotia ki a tautolu oti e tau fakalutukia he manamanatuaga. Ko e tau logonaaga pihia kua liga mai he tama tupetupe noa ke he mamahi lahi. Kua maeke he manamanatuaga lekua foki ke fakatupu e fakaagitau po ke logonaaga hokulo he kaumahala.

He kitekite atu ke he fahi ia, mogoia, nakai kia ko e manamanatuaga ko e kavega? Liga kua logona hifo he falu ke pihia. Kua fa mahani e tau atuhau manamanatu he fakamua atu ke hagaao ke he manamanatuaga ko e mena hala loto, toka tuai. Tokologa ne logona hifo ko e mena ia ko e hatakiaga he tau mahani ne foaki fakahako mai ni he Atua. Ti, kua ui ai e manamanatuaga ko e “ha ha i ai he Atua i loto he tagata,” “ha tautolu ni a aga pauaki mai he kamataaga,” po ke “ko e leo he Atua” foki.

Ka e, he tau tau nakaila leva ia kua eke ai ke talahaua ke fakailoa ko e manamanatuaga ke he laulahi ko e mena moua​—ko e mai he fakaohoohoaga he tau mamatua mo e he kaufakalatahaaga. Ke fakatai, ne taufetoko e falu tagata kumikumi ke he tau mahani kua iloa he tama ke kalo kehe mai he tau mahani nakai lata ha kua lahi e matakutaku neke fahi, mo e talitonu ko e mena ia ne ui e tautolu ko e manamanatuaga ko e hufiaaga ni he tau mena uho mo e tau taofiaga fakatagata he ha tautolu a tau mamatua. Kua tuhi atu e falu ke he matagahua ne taute he tokologa he tau tagata he fakamatutaki mai e tau mena uho mo e tau tutuaga. Ko e falu kua onoono atu ke he fakalutukia he manamanatuaga mo mena noa ka ko e taufetokoaga he vahaloto he mena ne loto a tautolu ke taute mo e ke he mena ne manako mai e kaufakalatahaaga kelea muitui nei ke taute e tautolu!

Pete ni ko e tau tala, ko e he taha magaaho ke he taha magaaho ne tutu kehe mai e tau tagata he tau mamatua, tau magafaoa, mo e tau kaufakalataha katoatoa kakano kua tala age he ha lautolu a manamanatuaga ki a lautolu ke taute pihia. Ko e falu kua fakamakai ke ekepoa ha lautolu a moui ha ko e manamanatuaga! Mo e pete ni ko e tau kehekeheaga mamahaki ne ha i ai he tau aga fakamotu he lalolagi, ko e tau gahua tuga e kelipopo, kaiha, faivao, pikopiko, mo e mahani taki kua teitei ke onoono ki ai e lalolagi katoa mo tau mena nakai hako. Ti nakai kia fakamoli he mena nei ko e manamanatuaga ko e mena hala loto, toka tuai?

Manamanatuaga—Ko e Kitekiteaga he Tohi Tapu

Ko e pule malolo moli he matakupu nei ko Iehova ko e Atua. Ha ko e mena, “ko ia [Atua] ne eke a tautolu, ka e nakai ko tautolu.” (Salamo 100:3) Kua maama lahi e ia ha tautolu a talagaaga. Ko e Kupu he Atua, ko e Tohi Tapu, ne fakamaama ko e tagata kua taute he “fakatai” he Atua. (Kenese 1:26) Kua tufugatia e tagata aki e logonaaga he mena hako mo e hepe; mai he kamataaga, ko e manamanatuaga ko e vala moli he aga pauaki he tagata.​—Fakatatai Kenese 2:16, 17.

Ne fakamoli he aposetolo ko Paulo e mena nei i loto he hana a tohi ke he tau Roma, he tohi: “Ko e mena ka eke noa he tau motu kehe nakai ha ha i ai e fakatufono [he Atua], e tau mena kua lata mo e fakatufono, pete ni he nakai ha i ai e fakatufono, kua eke a lautolu mo fakatufono kia lautolu; ko lautolu haia kua fakakite mai ai e gahua he fakatufono kua tohi ke he tau loto ha lautolu, kua fakamoli foki ha lautolu e tau loto manamanatu, kua fefakakeleāki foki, po ke fefakatonuaki ha lautolu a tau manatu.” (Roma 2:14, 15) Kia mailoga kua tokologa ne nakai feaki i lalo he Matafakatufono faka-Atua ne tuku age ke he tau Iutaia kua maeke agaia ke mumui ke he falu matapatu fakaakoaga he matafakatufono he Atua, nakai he peehiaga he kaufakalatahaaga, ka e ‘kua eke noa’!

Ti, mamao mai he eke mo kavega, ko e manamanatuaga ko e mena fakaalofa faka-Atua, ko e lagomataiaga. Ka e moli, kua maeke ai ke fakamamahi a tautolu. Ka e he magaaho ka fanogonogo fakamitaki ki ai, kua maeke ai foki ke palepale a tautolu aki e tau logonaaga mauokafua ue atu mo e mafola he loto. Kua maeke ai ke hataki, puipui, mo e fakalagalaga a tautolu. Ne talahau he The Interpreter’s Bible: “Kua maeke ni ke puipui e malolo he ulu manamanatu mo e loto logonaaga ane mai ke fakamakamaka e tagata ke pa e hafagiaga he vahaloto he mena ne taute e ia mo e mena ne logona e ia kua lata ke taute e ia.” Ti maeke fefe he tagata ke pa e hafagiaga ia? Kua maeke nakai ke fakahakohako mo e fakamahani ha tautolu a manamanatuaga? Ko e tau huhu nei to kikite ki ai he vala tala ne mui mai.