Kia Taofi Mau Fakamoli e Kupu Mai he Agaga he Atua

“Kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua.”​—2 KORINITO 4:2.

1. (a) Ko e heigoa kua lata ke maeke ke fakakatoatoa e gahua kua fakatoka mai he Mataio 24:14 mo e 28:19, 20? (e) Hokotia ki fe e fakaaoga he Tohi Tapu ke he tau vagahau he tau tagata he kamata e tau aho fakamui?

HE HANA perofetaaga lahi hagaao ke he magahala he hana ha ha hinei fakapatuiki mo e fakaotiaga he fakatokatokaaga tuai he tau mena, ne talahau tuai e Iesu Keriso: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” Ne fakaako foki e ia hana tau tutaki: “Ke eke e tau motu oti kana mo tutaki, . . . ti fakaako atu a mutolu kia lautolu kia omaoma ke he tau mena oti ne tala atu e au kia mutolu.” (Mataio 24:14; 28:19, 20) Ko e fakamoliaga he tau perofetaaga ia kua putoia ai e gahua lahi he fakaliliu mo e lomi e Tohi Tapu, mo e he fakaako ai ke he tau tagata e kakano, mo e lagomatai a lautolu ke fakagahuahua ke he tau momoui ha lautolu. Ko e fakamonuinaaga ha ia ke fakalataha ke he gahua pihia! Kua fita he 1914 e Tohi Tapu po ke falu vala i ai he tohi fakailoa ke he 570 e tau vagahau. Ka e tali mai he magaaho ia molea e teau he tau vagahau fahimotu mo e loga he tau vagahau ne kua lafi ki ai, mo e loga atu e liliuaga kua taute.a

2. Ko e heigoa e tau manatu kehekehe kua fakaohooho e gahua he tau tagata liliu mo e tau tagata tohi fakailoa he Tohi Tapu?

² Ko e mena uka ke he ha tagata liliu ke liliu e taha vagahau mo e taute ai ke maama e lautolu kua totou mo e logona e taha vagahau. Ko e falu he tau tagata liliu Tohi Tapu kua taute e gahua ha lautolu mo e fakamakaukau ke he mena kua liliu e lautolu ko e Kupu he Atua. Kua fiafia lahi e falu ke he mamafa he aoga he gahua. Kua liga kua onoono a lautolu ke he tau mataulu tala he Tohi Tapu ko e tupuaga fakamotu kua uho. Ma e falu, ko e lotu ko e matagahua ha lautolu, mo e he lomi fakailoa ai e tohi kua fua e higoa ha lautolu ko e tagata liliu po ke tagata tohi fakailoa ko e vala he ha lautolu a moui. Ko e tau loto ha lautolu kua fakaohooho moli he puhala ke taute aki e lautolu ha lautolu a gahua.

3. Fefe e onoonoaga he Komiti Liliuaga he Tohi Tapu Lalolagi Fou ke he ha lautolu a gahua?

³ Kua aoga lahi e fakamoliaga nei ne taute he Komiti Liliuaga he Tohi Tapu Lalolagi Fou: “Ko e fakaliliu he Tohi Tapu kua kakano ko e liliu ke he taha vagahau e tau manatu mo e tau talahauaga ha Iehova ko e Atua . . . Ko e manatu mafanatia lahi a ia. Ko e tau tagata liliu he gahua nei, kua matakutaku mo e fakaalofa ke he Punaaga Faka-Atua he Tohi Tapu, kua manamanatu atu ki a Ia ko e matagahua uho ke talahau e tau manatu hana mo e tau fakapuloaaga kua mua atu e tonu. Kua logona foki e lautolu e kotofaaga ke he kumiaga he tau tagata totou ne kua falanaki ke he fakaliliuaga he Kupu mai he agaga he Atua Mua Ue Atu ma e moui tukulagi ha lautolu. Ke he lotomatala pihia he matagahua lahi he tau tau loga ko e komiti nei he tau tagata tukulele ne taute e New World Translation of the Holy Scriptures.” Ko e foliaga he komiti ke ha ha ai e liliuaga he Tohi Tapu ne kua iloa mitaki mo e maama mo e tapiki mau ke he tohi Heperu mo e Heleni fakamua ka foaki e matapatuaga ke fakatumau e tupuaga he iloilo.

Ko e Heigoa kua Tupu ke he Higoa he Atua?

4. Aoga fefe e higoa he Atua i loto he Tohi Tapu?

⁴ Ko e taha he tau manatu lahi he Tohi Tapu ko e lagomatai e tau tagata ke o mai ke iloa e Atua moli. (Esoto 20:2-7; 34:1-7; Isaia 52:6) Ne fakaako e Iesu Keriso hana tau tutaki ke liogi ke “tapu,” po ke fakatapu, e higoa he hana Matua. (Mataio 6:9) Kua tohi foki he Atua e higoa fakaperesona hana i loto he Tohi Tapu laga 7,000. Kua manako a ia ke he tau tagata ke iloa e higoa ia mo e tau aga Hana kua fua ai.​—Malaki 1:11.

5. Ne hukui fefe he tau tagata liliu kehekehe e higoa faka-Atua?

⁵ Tokologa he tau tagata liliu Tohi Tapu ne kua fakakite moli e fakalilifu ma e higoa faka-Atua mo e kua fakaaoga tumau ke he gahua ha lautolu. Kua fiafia e falu tagata liliu ke he Yahweh. Ka e fifili he falu e puhala he higoa faka-Atua kua hiki ke he vagahau ni ha lautolu ka e kitia mitaki agaia e mena ne tohia faka-Heperu, liga ke he puhala kua talahaua lahi he fakaaoga ai. Kua fakaaoga he New World Translation of the Holy Scriptures e higoa Iehova laga 7,210 he tau matapatu kupu i ai.

6. (a) He tau tau kua mole, ko e heigoa kua taute he tau tagata liliu aki e tau fakamoliaga ke he higoa faka-Atua? (e) Kua holofa lahi fefe e matagahua nei?

⁶ Ke he tau tau kua mole, pete ni kua fakamau he tau tagata liliu Tohi Tapu e tau higoa he tau atua pouliuli tuga a Paala mo Moloka, kua tupu mafiti ai a lautolu he uta kehe e higoa fakaperesona he Atua mai he tau fakaliliuaga he hana Kupu mai he agaga. (Esoto 3:15; Ieremia 32:35) He tau kupu ia he Mataio 6:9 mo e Ioane 17:6, 26, ne tufatufa lahi e tohi Alapania ne kua fakaliliu ai e talahauaga Heleni ma e “higoa ki a koe” (ko e, higoa he Atua a ia) ti ko “koe,” ke tuga ko e tau kupu ia ne nakai talahau e higoa. Ia Salamo 83:18, The New English Bible mo e Today’s English Version kua uta kehe e higoa fakaperesona he Atua mo e ha fakamoliaga ke he mena moli ko e mena fai higoa e Atua. Pete kua ha ha ai e higoa faka-Atua kua kitia ke he tau fakaliliuaga tuai he tau Tohiaga Tapu Heperu ke he tau vagahau, kua fa mahani e tau fakaliliuaga fou lahi ke uta kehe po ke tohi ai ke he paka. Kua tupu e mena nei ke he vagahau Peritania, ti pihia foki ke he tau vagahau loga i Europa, Aferika, Amerika Toga, Initia, mo e tau aelani he Pasifika.

7. (a) Fakafehagai fefe e tau tagata liliu he falu Tohi Tapu Aferika mo e higoa faka-Atua? (e) Fefe hau a logonaaga ke he mena ia?

⁷ Kua fai lakaaga atu ki mua e tau tagata liliu he Tohi Tapu ke he falu he tau vagahau Aferika. He nakai ni hukui aki e higoa faka-Atua e matahigoa faka-Tohiaga Tapu, tuga e Atua po ke Iki, kua tuku e lautolu e tau higoa ne moua mai he tau taofiaga fakalotu he matakavi ia. He The New Testament and Psalms in Zulu (tohi he ­1986), ko e matahigoa Atua (uNkulunkulu) ne kua fakaaoga ke hiki aki e higoa fakaperesona (uMvelinqangi) kua maama he tau Sulu ke fakahagaao ke he ‘tupuna lahi ne kua tapuaki he puhala he tau tupuna he tagata.’ Ko e vala tala he mekasini The Bible Translator, ia Oketopa 1992, ne hokotaki mai he tauteute e Tohi Tapu Chichewa ka fakahigoa ai ko e Buku Loyera, ne fakaaoga he tau tagata liliu e Chauta ke eke mo higoa fakaperesona ke hukui aki e Iehova. Ko Chauta, ne fakamaama he vala tala, ko e “Atua kua iloa tuai mo e tapuaki tumau a lautolu ki ai.” Ka e, tokologa he tau tagata nei kua tapuaki foki ke he mena kua talitonu a lautolu ki ai ko e tau agaga ha lautolu ne mamate. Moli kia kaeke ke liogi e tau tagata ke he “Moui Mua Ue Atu,” mo e fakaaoga noa ni e lautolu ha higoa ma e “Moui Mua Ue Atu” kua tatai ne aoga mo e higoa fakaperesona ha Iehova, pete ni kua fai mena kua putoia ai ke he tapuakiaga ha lautolu? Moli kua nakai pihia! (Isaia 42:8; 1 Korinito 10:20) He hukui e higoa fakaperesona he Atua aki taha mena ke taute e tau tagata ke logona ko e tau taofiaga fakamotu ha lautolu kua hako moli kua nakai lagomatai a lautolu ke o mai fakatata ke he Atua moli.

8. Ko e ha e finagalo he Atua ke fakailoa hana higoa kua nakai fakaita ai?

⁸ Ko e tau mena oti nei kua liga ke hiki po ke fakaita e finagalo ha Iehova ke fakailoa hana higoa. Ke he tau vagahau Europa, Aferika, tau fahi i Amerika, Fahi Uta, mo e tau aelani he tahi, kua ha ha ai agaia e tau utaaga he loga he tau Tohi Tapu kua putoia ai e higoa faka-Atua. Kua tupu ki mua foki ke he 5,400,000 he Tau Fakamoli a Iehova ke he 233 e motu mo e tau fahi motu ne kua kaufakalataha ke molea e piliona tula he tau ke tala age ke he falu hagaao ke he higoa mo e finagalo he Atua moli. Kua tohi mo e foaki e lautolu e tau Tohi Tapu​—kua fakaaoga ai e higoa faka-Atua​—ke he tau vagahau kua fakaaoga he 3,600,000,000 he puke tagata he lalolagi, fakalataha mo e faka-Peritania, Saina, Rusia, Sepania, Potukala, Falani, mo e Holani. Kua tohi foki e lautolu e tau lagomataiaga ke he fakaakoaga Tohi Tapu ke he tau vagahau kua talahaua ke he tokologa he puke tagata he lalolagi. Nakai leva to taute foki he Atua e puhala ke fakamoli katoa hana fakapuloaaga ke ‘iloa ai [he tau motu] ko ia ko Iehova.’​—Esekielu 38:23.

Ka Fakatokatoka he Tau Taofiaga Fakatagata e Fakaliliuaga

9. Fakakite fefe he Tohi Tapu e matagahua mamafa kua lago ki a lautolu ne toto e Kupu he Atua?

⁹ Ko e matagahua mamafa kua lago ki a lautolu kua liliu e Kupu he Atua ti pihia foki ki a lautolu kua fakaako ai. Kua talahau he aposetolo ko Paulo hagaao ke he fekafekauaga hana mo e tau tagata gahua hana: “Kua tiaki e mautolu e tau mena galo ke ma ai, nakai o fano a mautolu mo e mahani pikopiko, nakai fiofio e mautolu e kupu he Atua; ka kua fakailoa a mautolu ke he tau loto manamanatu he tau tagata oti ki mua he Atua he fakakite atu e mautolu e kupu moli.” (2 Korinito 4:2) Ke fiofio kua kakano ke matahavala he fio mo e tau mahani kua kehe po ke kelea. Kua nakai tatai e aposetolo ko Paulo ke he tau leveki mamoe nakai tua fakamoli i Isaraela he vaha a Ieremia ne kua akonaki ai e Iehova kakano he fakamatala e lautolu ha lautolu ni a tau manatu ka e nakai talahau mai he Atua. (Ieremia 23:16, 22) Ka e ko e heigoa kua tupu ai ke he vaha fou nei?

10. (a) Kua fefe e tau loto he nakai fakamoli ai ke he Atua ne fakaohooho e falu tagata liliu he vaha fou nei? (e) Ko e heigoa e matagahua ne manamanatu noa e lautolu?

¹⁰ He Felakutaki II he Lalolagi, ne fakalataha e komiti he tau tagata fakaako fakalotu mo e tau akoako mo e fakatufono Nasi i Sihamani ke taute e liu kikite he “New Testament” he uta kehe ai e tau fakamoliaga mitaki ke he tau Iutaia mo e tau fakakiteaga oti he mataohi Iutaia ha Iesu Keriso. Nakai la leva lahi, ne taute he tau tagata liliu he The New Testament and Psalms: An Inclusive Version ne hagahaga atu ke he puhala kehe, amanaki ai ke uta kehe e tau fakakiteaga oti ko e matagahua kua taute he tau Iutaia kua matutaki ai mo e mate he Keriso. Kua logona foki he tau tagata liliu ia to fiafia lahi e tau fifine totou kaeke ke talahau ko e Atua, nakai ko e Matua Tane, ka e ko e Matua Tane-Fifine mo e ka talahau ki a Iesu ko e hana Tama, nakai ko e Tama Tane he Atua. (Mataio 11:27, fakatatai NW.) He fakalatahaaga ha lautolu, ne uta kehe e lautolu e matapatu fakaakoaga he omaoma e tau hoana ke he tau tane mo e omaoma e tau fanau ke he tau matua. (Kolose 3:18, 20) Ko e tau tagata ne taute e tau fakaliliuaga ia kua maaliali ai ke nakai fakalataha mo e fifiliaga he aposetolo ko Paulo ke nakai ‘fiofio e kupu he Atua.’ Kua nimo ia lautolu e matagahua he tagata liliu, he uta e tuaga he punaaga, mo e taute e tau tohi kua fakakelea aki e tuaga he Tohi Tapu ko e puhala ke fakatupu ha lautolu ni a tau manatu.

11. Totoko fefe e tau fakaakoaga he Kerisitenitome mo e mena kua talahau he Tohi Tapu hagaao ke he solu mo e mate?

¹¹ Kua fakaako he tau lotu he Kerisitenitome ko e agaga e solu he tagata, mo e ko e tino ni ka mate, ka e nakai mate ai. Kehe ai, ko e tau fakaliliuaga tuai he Tohi Tapu ke he loga he tau vagahau kua maaliali ai he fakakite ko e tau tagata e tau solu, ko e tau manu e tau solu, mo e na mate ai e solu. (Kenese 12:5; 36:6; Numera 31:28; Iakopo 5:20) Kua fakama he mena ia e tau akoako.

12. Kua uta kehe fefe he falu tohiaga e kupu moli he Tohi Tapu?

¹² Ko e falu he tau tohi fou mogonei kua fakapouli e tau kupu moli nei. Fefe? Kua tiaki e lautolu e liliuaga tonu he kupu gahuahua Heperu neʹphesh (solu) ke he falu tohi. Ia Kenese 2:7, kua liga talahau a lautolu kua “kamata ke moui” e tagata fakamua (ka e nakai he “eke tuai a ia mo [“solu,” NW] moui”). Po ke kua fakahagaao a lautolu ke he “tau mena momoui” ka e nakai ko e [“solu,” NW] ke lata mo e moui he manu. (Kenese 1:21) He tau tohi pihia tuga Esekielu 18:4, 20, kua hagaao a lautolu ke he “tagata” (ka e nakai “ko e solu”) kua mate. Kua liga ko e tau talahauaga pihia, kua talia ke he tagata liliu. Ka e lahi fefe e lagomatai kua foaki e lautolu ki a lautolu kua kumi fakamoli e kupu moli ne kua fita e manamanatuaga he takai he Kerisitenitome aki e tau fakaakoaga nakai faka-Tohiaga Tapu?b

13. Ke he puhala fe he tau tohi he falu Tohi Tapu kua ufiufi e finagalo he Atua hagaao ke he lalolagi?

¹³ Ko e laliaga ke lagomatai e taofiaga ha lautolu ko e o ke he lagi e tau tagata mitaki, ko e tau tagata liliu​—po ke tau tagata fakaako fakalotu kua kitia katoatoa ha lautolu a tau gahua​—kua liga amanaki foki ke ufiufi e mena kua talahau he Tohi Tapu hagaao ke he finagalo he Atua ma e lalolagi. Loga he tau tohi he Salamo 37:11, kua totou ai to eke ma lautolu kua mahani fakatokolalo e “motu.” Ko e “motu” kua lata mo e liliuaga he kupu (ʼeʹrets) ne fakaaoga he tohi Heperu. Pete ia, ko e Today’s English Version (ne kua taute ai e fakaveaga ma e tau fakaliliuaga ke he falu he tau vagahau) mo e fakalaulahi atu foki. Pete ni kua liliu e talahauaga nei ke he kupu Heleni ge ko e “lalolagi” laga 17 he Evagelia ha Mataio, ia Mataio 5:5 kua hukui e “lalolagi” aki e talahauaga “ke he mena kua mavehe he Atua.” Kua fa pauaki e tau tagata he lotu ke manatu ke he lagi. Kua nakai fakaako fakamitaki a lautolu he talahau, ko e hana a Lauga he Mouga, kua talahau a Iesu Keriso ko lautolu ne mahani molu, totonu, po ke mahani tokolalo ka “eke ma lautolu e motu.”

14. Ko e heigoa e fakaohoohoaga lotokai kua kitia moli he falu he Tohi Tapu?

¹⁴ Ko e falu he tau fakaliliuaga he tau Tohiaga Tapu kua fakakupu ai fakapapahi mo e onoonoaga ke lagomatai e tau tagata fakamatala ke moua e totogi lahi. Kua moli ai kua talahau he Tohi Tapu: “Kua lata e ekegahua mo e hana taui.” (1 Timoteo 5:18) Ka e he 1 Timoteo 5:17, ne kua talahau ai ko e tau tagata motua kua leveki ke he puhala mitaki “kua lata mo e lilifu kua lafi ua,” ko e lilifu ni ka moua he falu ia lautolu he onoono ke lilifu he talahau e foaki he tupe. (Fakatatai 1 Peteru 5:2.) Ti, kua talahau mai he The New English Bible ko e tau motua nei “kua lata mo e lilifu kua lafi ua e totogi he tau,” ti talahau foki he Contemporary English Version kua lata a lautolu ke “moua e totogi kua fakalahi ua.”

Taofi Fakamoli ke he Kupu he Atua

15. Fifili fefe a tautolu ko e fakaliliuaga he Tohi Tapu fe ka fakaaoga?

¹⁵ Ko e heigoa e kakano he tau mena oti nei ma e tagata totou he Tohi Tapu mo e ma lautolu kua fakaaoga e Tohi Tapu ke fakaako e falu? Ke he tau vagahau kua lahi e fakaaoga, kua loga e fakaliliuaga he Tohi Tapu ke fifili mai i ai. Fakakite e loto manamanatu he fifili e kupu tohi ka fakaaoga e koe. (Tau Fakatai 19:8) Kaeke ke nakai fakamoli e fakaliliuaga hagaao ke he fakakiteaga he Atua​—he uta kehe e higoa hana mai he Kupu mai he agaga ke he ha tohi ni​—liga ke moumou foki kia he tau tagata liliu e falu vala he Tohi Tapu? Ka fakauaua hagaao ke he tonu he talahauaga, kia fakamakutu ke fakatatai ai mo e tau fakaliliuaga tuai. Kaeke ko koe ko e faiaoga he Kupu he Atua, fiafia ai ke he tau kupu kua tapiki mau ke he tohi Heperu mo e Heleni fakamua.

16. Fakatata fefe e tautolu e mahani fakamoli he fakaaoga e tautolu e Kupu mai he agaga he Atua?

¹⁶ Kua lata tonu ia tautolu oti ke fakamoli ke he Kupu he Atua. Kua taute e tautolu e mena ia he leveki e tau mena ne tohi ai, ti ka maeke, kia fakaaoga e tautolu e falu magaaho he tau aho takitaha ke totou e Tohi Tapu. (Salamo 1:1-3) Kua taute e tautolu he fakagahua katoatoa ke he tau momoui ha tautolu ko e heigoa ni ka talahau, fakaako ke fakaaoga hana tau matapatu fakaakoaga mo e tau fakafifitakiaga ko e fakaveaga he taute e tau fifiliaga kua tonu. (Roma 12:2; Heperu 5:14) Kua fakakite e tautolu ko e tau tagata fakamoli a tautolu ke he Kupu he Atua he fakamatala mo e fakamakamaka ke he falu. Kua taute foki e tautolu ko e tau faiaoga he fakaaoga fakamitaki e Tohi Tapu, he nakai fakakeukeu ai po ke fakalaulahi e mena ne talahau ke hu tonu ke he tau manatu ni ha tautolu. (2 Timoteo 2:15) Ko e mena kua talahau tuai mai he Atua to nakai kaumahala ke fakahoko. Kua mahani fakamoli a ia he fakamoli hana Kupu. Kia mahani fakamoli a tautolu he taofi mau ki ai.

[Tau Matahui Tala]

Manatu Nakai e Koe?

◻ Ko e heigoa e tau manatu kua fakaohooho e gahua he tau tagata liliu he Tohi Tapu he vaha fou nei?

◻ Ko e ha e tau laliaga he fakaliliuaga he vaha fou nei kua nakai fakaita e finagalo he Atua hagaao ke he hana ni a higoa?

◻ Kua ufiufi fefe he falu fakaliliuaga e kupu moli he Tohi Tapu hagaao ke he solu, mate, mo e lalolagi?

◻ Ke he tau puhala fe ka fakakite e tautolu kua taofi fakamoli e tautolu e Kupu he Atua?

[Fakatino he lau 28]

Ko e fakaliliuaga he Tohi Tapu fe ka fakaaoga e koe?