“Kua Tonu Nakai Hau a Loto, Tuga ne Loto Haku?”
“Kia o a taua mo au, ke kitia e koe haku a fakamalolo ha ko Iehova.”—2 TAU PATUIKI 10:16.
1, 2. (a) Hokotia fefe e tuaga he lotu Isaraela he kelea ke he kelea lahi mahaki? (e) He 905 F.V.N., ko e heigoa e tau hikiaga kelea lahi ne amanaki ke tupu i Isaraela?
KO E tau 905 F.V.N. e magaaho ne hikihiki lahi a Isaraela. Teitei 100 tau fakamua atu, ne fakatupu e Iehova e kautu kaufakalataha a Isaraela ke vehevehe ha ko e tiaki taofiaga a Solomona. (1 Tau Patuiki 11:9-13) Ko e kautu he fahi toga, ko Iuta, ne pule he mogoia e tama tane a Solomona ko Rehopoamo ka ko e kautu he fahi tokelau, ko Isaraela, ne ha ha ai i lalo he Patuiki ko Ierepoamo, ko e Efaraimo. Nakai fiafia ai, ne kamata matematekelea e kautu he fahi tokelau. Ne nakai manako a Ierepoamo ke o e tau tagata hana ke he kautu he fahi toga ke tapuaki he faituga, he matakutaku ko e to moua e lautolu e manatu he liliu ke he fale a Tavita. Ti fakatu e ia e tapuakiaga punua povi i Isaraela mo e fakatoka e puhala he tapuaki tupua ne tumau ke fai magaaho he fakamauaga tala ke he kautu he fahi tokelau.—1 Tau Patuiki 12:26-33.
2 Ne kelea lahi e tau mena he magaaho ne eke ai e tama tane a Omeri, ko Ahapo, mo patuiki. Ko e hoana kehe hana ko Iesepela, ne fakatolomaki e tapuakiaga Paala mo e keli e tau perofeta a Iehova. Pete ni e tau hatakiaga fakahako a Elia, ne nakai fai mena a Ahapo ne taute. He 905 F.V.N., ne mate a Ahapo, ti tu hake ai e tama tane hana ko Iehoramo. Ko e magaaho anei ma e fakameaaga he motu. Ne fakailoa he tagata ne mui mai ia Elia, ko Elisaio ke he takitaki kau, ko Iehu, ne kua fakauku tuai e Iehova a ia ke eke mo patuiki ne hau, a Isaraela. Ko e hana a poakiaga? Ke moumou e magafaoa agahala a Ahapo mo e taui atu ke he toto he tau perofeta ne kua fakamaligi e Iesepela!—2 Tau Patuiki 9:1-10.
3, 4. Fakakite fefe e Ionatapu e loto hana kua ‘tuga e loto a Iehu’?
3 Ko e omaoma ke he poakiaga he Atua, ne tamate e Iehu a Iesepela mahani kelea, mo e he magaaho fakamui ne fina atu a ia mo e fakamea a Isaraela he moumou e kaina a Ahapo. (2 Tau Patuiki 9:15–10:14, 17) Ti feleveia a ia mo e lagomatai. “Ti moua ai e ia a Ionatapu ko e tama a Rakapa, kua fonofono mai kia ia. Ti fakaalofa atu a ia kia ia, kua pehe atu kia ia, Kua tonu nakai hau a loto, tuga ne loto haku mo e loto hau? Ti pehe mai ai a Ionatapu, Haia ni. Kaeke kua pihia, ti ta mai ā hau a lima. Ti ta age āi e ia hana lima; ti ta hake e ia a ia ke fakalataha a laua ke he kariota. Ti pehe atu a ia kia ia, Kia o a taua mo au, ke kitia e koe haku a fakamalolo ha ko Iehova. Ti fakaheke e lautolu a ia ke he hana kariota.”—2 Tau Patuiki 10:15, 16.
4 Nakai ko e tagata Isaraela a Ionatapu. Pete ia, he tatai mo e higoa hana (kua kakano “Mautali a Iehova,” kua “Lilifu a Iehova,” po kua “Fakamokoi a Iehova”) ko ia kua tapuaki ki a Iehova. (Ieremia 35:6) Moli ai, ne kehe e fiafia hana he kitia e “fakamalolo ha ko Iehova” a Iehu. Iloa fefe e tautolu? Ko e feleveia hana mo e patuiki fifili a Isaraela kua nakai tupu noa. “Kua fonofono mai kia ia” a Ionatapu, mo e mena nei he magaaho ia ne kua fita a Iehu he tamate a Iesepela mo e falu he fale a Ahapo. Ne iloa e Ionatapu e mena ne tupu he mogo ne talia e ia e uiina ha Iehu ke heke he hana kariota. Kua kau atu a ia ke he fahi a Iehu—mo Iehova—ke he taufetoko nei he tapuakiaga fakavai mo e moli.
Iehu he Vaha Fou Nei mo Ionatapu he Vaha Fou Nei
5. (a) Ko e heigoa e tau hikihikiaga ka hoko mafiti ke he tau tagata oti? (e) Ko hai a Iehu ne Mua, mo e ko hai ne hukui a ia he lalolagi?
5 He vaha nei, to nakai leva ti hiki lahi mahaki ai ma e tau tagata oti tuga ni he taute e lautolu ma Isaraela i tuai he 905 F.V.N. Kua tata lahi mai e magaaho ka fakamea e Iehova e lalolagi he tau fua kelea he fakaohoohoaga a Satani, putoia ai e lotu fakavai. Ko hai a Iehu he vaha fou nei? Ko ia nei ko Iesu Keriso, ne kua fakahagaao ki ai e tau kupu fakaperofeta: “Kia pipi e koe hāu a pelu ke he hāu a hui, ko koe na ko e toa ko e hāu a fakahekeaga mo e hāu a lilifu. Ko e hāu a lilifu foki kia heke ai e koe e manu, mo e monuina ai a koe, ha ko e tonu, mo e mahani molu, mo e tututonu.” (Salamo 45:3, 4) Ne hukui he “Isaraela he Atua” he lalolagi a Iesu, ko e tau Kerisiano fakauku “kua omaoma ke he tau poaki he Atua, mo e taofi e talahauaga kia Iesu.” (Kalatia 6:16; Fakakiteaga 12:17) Tali mai he 1922 ko e tau matakainaga fakauku nei a Iesu ne ogo mo e nakai matakutaku e tau gahua fakafili a Iehova hane hau.—Isaia 61:1, 2; Fakakiteaga 8:7–9:21; 16:2-21.
6. Ko hai ne o mai he tau motu ke lagomatai e tau Kerisiano fakauku, mo e huhu atu fefe a lautolu ke he kariota ha Iehu ne Mua?
6 Nakai tiaki e tau Kerisiano fakauku. Tuga ni a Ionatapu ne fonofono a Iehu, tokologa he tau motu ne lagomatai a Iesu, ko Iehu ne Mua, mo e hana a tau hukui he lalolagi kua uta e tapuakiaga moli. (Sakaria 8:23) He ui a Iesu ko e tau “mamoe kehe” hana, ne kua mailoga a lautolu he 1932 kua tatai ai ke he Ionatapu he vaha i tuai ti kua uiina ai ke ‘heke he kariota’ ha Iehu vaha fou nei. (Ioane 10:16) Fefe? He “omaoma ke he tau poaki he Atua, mo e taofi e talahauaga kia Iesu” fakalataha mo lautolu ne fakauku. He vaha fou nei, kua putoia ke he mena nei e fakamatala he tala mitaki he Kautu he Atua ne kua fakatu i lalo he Patuiki ko Iesu. (Mareko 13:10) He 1935 ko lautolu nei ko e “tau Ionatapu” ne fakakite ai ko e “moto tagata tokologa” he Fakakiteaga 7:9-17.
7. Fakakite fefe he tau Kerisiano he vaha nei ko e ha lautolu a ‘loto kua tonu agaia’ tuga e loto a Iesu?
7 He atu tau 1930, kua fakamalolo e moto tagata tokologa mo e tau matakainaga fakauku ha lautolu he fakamoli ha lautolu a tapuakiaga moli. Ke he falu motu he Fahi Lalo mo e Fahi Uta a Europa, ko e Matakavi Mamao ki Lalo, mo Aferika, tokologa ia lautolu ne mamate ha ko e ha lautolu a tua. (Luka 9:23, 24) He falu motu, ne kua tuku a lautolu he fale puipui, kelipopo, po ke favale pihia. (2 Timoteo 3: 12) Ko e fakamauaga haia he tua ne taute e lautolu! Ti kua fakakite he Hokotaki he Tau he Fekafekauaga he 1997 kua fifili agaia a lautolu ke fekafekau ke he Atua, pete ni e tau mena tutupu. Kua ‘tonu e tau loto’ ha lautolu tuga e loto a Iesu. Ne fakatata e mena nei he 1997, ne 5,599,931 e tau tagata fakailoa he Kautu, teitei oti ni a lautolu ko e “tau Ionatapu,” he gahua ai ke katoatoa e 1,179,735,841 he tau tula he fakamatala ki a Iesu.
Fakamatala Agaia mo e Fakamakamaka
8. Fakakite fefe he Tau Fakamoli a Iehova e fakamakamaka ha lautolu ma e tapuaki moli?
8 Ha ha ia Iehu e aga he fakaholo fakamafiti e kariota hana—ko e fakamoliaga he hana fakamakamaka ke fakakatoatoa hana gahua. (2 Tau Patuiki 9:20) Ko Iehu ne Mua ko Iesu, kua fakamaama “kua kai ni” he fakamakamaka. (Salamo 69:9) Nakai ofo ai, mogoia, ko e tau Kerisiano moli he vaha nei, ne mailoga ai ke he ha lautolu a fakamakamaka. Ki loto he fakapotopotoaga mo e ke he toloaga tagata, ko lautolu kua ‘fakamatala atu e kupu, ke he tau aho kua mitaki ai, mo e tau aho kua kelea ai.’ (2 Timoteo 4:2) Ne mailoga lahi ai e fakamakamaka ha lautolu ke he vala fakamua he 1997 he mole atu e fakamalolo he vala tala he Our Kingdom Ministry e tokologa ke maeke ke fakalataha ke he fekafekauaga paionia fakaku. Kua igatia e motu mo e tapunu he numera kua fakatoka ma e tau paionia fakaku. Ko e heigoa e tali? Mitaki lahi! Loga e tau la ne molea e numera ne foli ki ai. Ne fakatoka e Ekuatoa e foliaga he 4,000 ka e ia Mati ne hokotaki ko e 6,936 he tau paionia fakaku. Ne hokotaki e Sapani e katoatoa ko e 104,215 he tau mahina tolu ia. I Samipia, ko e foliaga ko e 6,000, ne hokotaki ko e 6,414 e tau paionia fakaku ia Mati; 6,532 ia Aperila; mo e 7,695 ia Me. He lalolagi katoa, ko e tapunu he katoatoa he tau paionia fakaku mo e tumau ko e 1,110,251, ko e 34.2 e pasene ne tupu ki mua he 1996!—Roma 10:10.
9. He lafi atu ke he gahua he taha fale ke he taha fale, ke he falu puhala fe foki ne moua he Tau Fakamoli a Iehova e tau tagata ke tala age kia lautolu e tala mitaki?
9 Ne tala age e aposetolo ko Paulo ke he tau motua i Efeso: “Nakai toka e au taha kupu aoga, neke nakai fakailoa atu kia mutolu, ti fakaako atu kia mutolu ki mua he tau tagata, katoa foki mo e taha fale mo e taha fale.” (Gahua 20:20) Kua fifitaki he Tau Fakamoli a Iehova he vaha nei e fakafifitakiaga mo e fakamakamaka ha Paulo he fakamatala e tala mitaki he taha fale ke he taha fale. Pete ia, liga nakai mukamuka ai ke moua e tau tagata ke he tau kaina ha lautolu. Ti, fakamalolo he “fekafekau fakamoli mo e loto matala” e tau tagata fakailoa he Kautu ke o atu ke he tau tagata he tau matakavi pisinisi, tau puhala tu, ke he tau mataafaga, ke he tau paakaaga he toloaga—matakavi ne ha ha ai e tau tagata. (Mataio 24:45-47) Kua mitaki lahi e tau fua.
10, 11. Fakakite fefe he tau tagata fakailoa he ua e motu e fakalotomatala mitaki he moua e tau tagata fiafia ne nakai fa moua he tau kaina?
10 I Copenhagen, Tenemaka, ko e matakau tote he tau tagata fakamatala ne kua fakamatala ai ke he tau puhala tu i fafo he tau tutuaga lelue. Mai ia Ianuari ki a Iuni, ne foaki e lautolu 4,733 e mekasini, taute e tau fakatutalaaga mitaki ue atu, mo e loga e tau liu ahi atu. Fai tagata fakailoa foki he motu ia ne fakatu e tau foaki mekasini tumau he tau fale koloa. Taha taone ne ha ai e makete he tau Aho Faraile oti, ne totou afe e tau tagata ahiahi ne fakalataha ai. Ati fakatoka ai he fakapotopotoaga e gahua fakamatala ke he makete he tau aho oti. He taha matakavi e aoga ne ahi atu ki ai mo e afi he tau vala tala ne ha ha ai e tau tohi ne kua lata tonu pauaki ma e tau faiaoga.
11 Pihia foki e laliaga i Hauaii ke hokotia ki a lautolu ne nakai moua i kaina. Ko e tau matakavi pauaki kua putoia e tau matakavi tolo (tau puhala tu, tau paaka, tau paakaaga motoka, mo e tau tuaga pasi), he tau matakavi taone, tau tokaaga fale koloa, mo e tau male vakalele, fakamatala he telefoni, puhala o fenoga he tau tagata (fakamatala he tau pasi), mo e tau nonofoaga he aoga. Ko e levekiaga ke kitia moli kua latatonu e numera he Tau Fakamoli ne fekau atu ke he taha e matakavi mo e ko lautolu ne kotofa kua fakamahani fakamitaki. Ko e tau foliaga fakatokatoka mitaki anei ne hokotaki mai he tau motu loga. Ti ko e fua, ne moua ai e tau tagata fiafia ne nakai fa moua ke he fekafekauaga he taha fale ke he taha fale.
Tumau Ai
12, 13. (a) Ko e heigoa e lagatau ne fakaaoga e Satani ke he Tau Fakamoli a Iehova he 1997? (e) Ke he puhala fe ne fakaaoga ai e fakaakoaga fakavai ke he taha motu?
12 Ke he falu motu he 1997, ko e Tau Fakamoli a Iehova ko e tau tagata ekefakakelea he vale, fakatolomaki e fakaakoaga fakavai mo e manako he totoko ai ke uta a lautolu ke he fakafiliaga. Ka e nakai maueue a lautolu! (Salamo 112:7, 8) Ne manatu e lautolu e liogi he salamo: “Kua fafati he tau tagata fakatokoluga e tala pikopiko kia au; ka ko au, kua omaoma au ke he hāu a tau fekau mo e haku a loto katoa.” (Salamo 119:69) Ko e tohi pikopiko pihia ko e fakamoliaga noa he tau Kerisiano moli ne kua vihiatia tuga ne kua perofeta e Iesu. (Mataio 24:9) Ke he falu magaaho ne liu mai ni ki a lautolu. Ne totou he tagata tane i Peletiumu e vala tala ekefakakelea hagaao ke he Tau Fakamoli a Iehova he nusipepa talahaua lahi he aho. Ofo ai he tau talahauaga pikopiko, ne fina atu a ia ke he feleveiaaga he Fale he Kautu he Aho Tapu hake. Ne fakatoka a ia ke fakaako e Tohi Tapu mo e Tau Fakamoli mo e mafiti lahi e tolomakiaga. Ko e taha he kege e tagata tane nei he magaaho fakamua. Ne lagomatai he fakaakoaga Tohi Tapu hana a ia ke fakamea hana moui, ti ko e taha mena a ia ne mailoga he tau tagata ne viko takai ia ia. Moli ai, ko e tagata ne tohi e vala tala pikopiko ne nakai ha ha ia ia e manatu pihia!
13 Ko e falu tagata mahani fakamoli i Peletiumu ne vagahau totoko ke he fakaakoaga fakavaia. Mai ia lautolu ko e palemia fakamua ne talahau kua puke ai he nava ke he tau mena ne taute he Tau Fakamoli a Iehova. Ne tohi he hagai: “Kehe mai he tau talahauaga he falu magaaho, ki a au, kua nakai kitia e [Tau Fakamoli a Iehova] ke fakakite e hagahaga kelea ke he tau fakatokatokaaga he Motu. Ko e tau tagata kua fiafia ke he mafola, maimaina, mo e fakalilifu ke he tau tui ne mua.” Pulotu moli, e tau kupu he aposetolo ko Peteru: “Kia mitaki ha mutolu a mahani ki mua he tau motu kehe, ko e mena kua kupu kelea ai kia mutolu tuga ne tau tagata mahani kelea a mutolu, ka kitekite a lautolu ke he tau gahua mitaki ha mutolu, ti fakaheke atu ai a lautolu ke he Atua ke he aho ke ahi mai ai.”—1 Peteru 2:12.
Fakamanatuaga ne Mua Atu e Kehe
14. Ko e heigoa falu he tau hokotakiaga fiafia he tau tagata ne o atu ke he Fakamanatuaga he 1997?
14 Kua lata ai ko lautolu ne fakamatala ki a Iesu kua lata ke onoono ke he Fakamanatuaga he mate hana ko e fakakatoatoaaga he ha lautolu a tau. He 1997, 14,322,226 ne fakalataha mai ke he fakamanatuaga nei ia Mati 23. Ne molea ki mua 1,400,000 mai he 1996. (Luka 22:14-20) Ke he tau motu loga ko e fakalataha atu ke he Fakamanatuaga kua molea lahi e numera mai he tau tagata fakailoa he Kautu, kua fakakite ai e fakamonuinaaga mitaki ma e tupu ki mua anoiha. Ke fakatai, i Haiti, he 1997 ne kitia e tapunuaga he 10,621 e tau tagata fakailoa, ka e 67,259 ne fakalataha atu ke he Fakamanatuaga.
15. He falu motu, kautu mai fefe e tau matakainaga ha tautolu ke he tau mena vihi lalahi ke maeke ke taute e Fakamanatuaga?
15 Ma e falu, ko e o atu ke he Fakamanatuaga kua nakai mukamuka. I Alapania ko e 7:00 p.m. e magaaho ke pa ai ha ko e tau latau fakalavelave. He 115 e matakau ikiiki he motu, kua kamata e Fakamanatuaga he 5:45 p.m. Kua to e la he 6:08 p.m., ko e fakamailoga he kamataaga he Nisana 14. Kua taute ai e fakamailogaaga he kavi 6:15 p.m. Laulahi ai kua taute e liogi fakahiku he 6:30 p.m., mo lautolu ne fakalataha atu kua fakamafiti ki kaina to papa ai. Kua 3,154 agaia ni ne o atu ke he Fakamanatuaga he fakatatai ai ke he tau tapunuaga he tau tagata fakailoa he 1,090. He taha motu Aferika, ko e favale fakalavelave kua nakai fakaata ai ke he Fale he Kautu, ati fifili ai e tau motua tokoua ke feleveia he kaina he motua ke toluaki ke fakatoka ke taute e fakamanatuaga ke he tau matakau ikiiki. Ke maeke ke hokotia ke he fale, ne o e tau motua tokoua he luo ke he taha fahi. Pete ia, ne ha i ai e latau he matakavi, mo e fana he tau fi ha tagata ne lali ke fano he luo. Ne fakamatomo taha motua ke he taha fahi mo e nakai fai lekua. Ne logona he motua ke uaaki e pa he fana he fano ai a ia. Ne fakaveli hifo a ia ke he kelekele mo e totolo ke hao mai he tau pulu fana ne o i luga he ulu hana. Ne kautu e feleveiaaga he tau motua, mo e kua leveki ai e tau manako he fakapotopotoaga.
“Mai he Tau Motu Oti, mo e Tau Faoa . . . mo e Tau Vagahau Kehekehe”
16. Fakatoka fefe he vahega fekafekau fakamoli mo e loto matala ma e tala mitaki ke fakamatala ke he tau matakau vagahau ikiiki?
16 Ne pehe e aposetolo ko Ioane to o mai e moto tagata tokologa “he tau motu oti, mo e tau faoa, mo e tau tagata kehekehe, mo e tau vagahau kehekehe.” (Fakakiteaga 7:9) Ti, kua fakatoka he Kau Fakatufono e tau tohi ke liliu ke he tau vagahau loga—putoia e tau vagahau ne fakaaoga e lautolu he tau magafaoa tu mamao mo e tau tagata he tau matakau ikiiki. I Mosamipike, ma e fakatai, ne fakatoka mai e tuleke Life in a Peaceful New World ke he lima foki e vagahau. I Nikarakua, ko e porosua Ke Fiafia e Moui Tukulagi ke he Lalolagi! ne moua ke he vagahau Misikito—ko e tohi fakamua ke he vagahau ia he Sosaiete he Kolo Toko. Kua tokologa he tau Initia Misikito ne talia e porosua mo e fiafia he kitia ai taha mena ke he vagahau ni ha lautolu. He 1997, ne talia he Sosaiete e tau tohi ke he 25 foki e falu vagahau mo e lomi ai molea e taha e piliona he tau mekasini.
17. Ko e heigoa e matakau vagahau ne lagomatai i Korea, mo e lagomatai fefe he tau vitio tepi e fahi nei he puke tagata?
17 I Korea ne lagomatai ai foki e taha matakau he vagahau. Ko e fonoaga he tau 1997 ne kitia fakamua ai e vagahau matalima i Korea. Ko e 15 la e tau fakapotopotoaga vagahau matalima i Korea mo e 543 e tau tagata fakailoa, ka e 1,174 ne o atu ke he fonoaga mo e 21 ne papatiso. Ke lagomatai e tau tagata kuhukuhu ne nakai maama ke vagahau po ke tohi, hane fa e kua taute ai e tau tohi ke he vitiotepi ke he 13 e vagahau matalima kehekehe. Ti, kua lagomatai e tau kuhukuhu ke “totou” mo e fakaako foki e tala mitaki, mo e fua mitaki ne moua mai ai. He Tau Fahi Kaufakalataha, he vaha fakamua na fa lima e tau ke maeke he tagata kuhukuhu ke tolomaki ke hokotia ke he papatisoaga. Mogonei, ha kua loga e tau vitio he American Sign Language ma e falu kuhukuhu, kua to hifo ai ke kavi taha ni e tau.
‘Nofomau he Kariota’
18. He mole atu e feleveia mo Ionatapu, ko e heigoa ne amanaki a Iehu ke taute?
18 He 905 F.V.N., he mole e fakalataha mo Ionatapu, ne fakatoka a Iehu ke moumou e tapuakiaga fakavai. Ne talahau e ia e uiina ke he tau tagata tapuaki Paala: “Kia fakamatala a e fakapotopotoaga tapu kia Paala.” Ti fakafano e ia ke he motu katoa ke kitia kua nakai fai tagata tapuaki Paala kua toe. He tafe atu e moto tagata ke he faituga lahi he atua fakavai, kua taute moli ke kitia kua nakai fai tagata tapuaki ha Iehova i ai. Fakaoti ai, ne tamate e Iehu mo e hana kau e tau tagata tapuaki Paala. “Ne fakaoti ai pihia e Iehu a Paala i Isaraela.”—2 Tau Patuiki 10:20-28.
19. Ke he kitiaaga he mena ne fakatoka mai mua ma e tau tagata, ko e heigoa e aga kua lata ia tautolu ke fakakite, mo e ko e heigoa e gahua kua lata ke fakamakai a tautolu ki ai?
19 He vaha nei, ko e fakafiliaga fakahiku he tau lotu fakavai kua fakatoka mai i mua. He takitakiaga fakaagelu kua fakapuloa he tau Kerisiano e tala mitaki ke he tau tagata oti, fakamalolo a lautolu ke matakutaku ke he Atua mo e ke vevehe kehe mai he lotu fakavai. (Fakakiteaga 14:6-8; 18:2, 4) Ne fakamalolo a lautolu ne fakatokolalo ke omaoma ke he Kautu he Atua i lalo hifo he Patuiki ha Iehova, ko Iesu Keriso. (Fakakiteaga 12:10) He magaaho fiafia nei, kia nakai fakaata e tautolu e fakamakamaka ha tautolu ke fakalolelole he tutu mau a tautolu ma e tapuaki moli.
20. Ko e heigoa hau ka fifili ke taute he fekafekauaga he tau 1998?
20 Taha magaaho, ne pehia lahi e Patuiki ko Tavita ke he kamatamata, ne liogi a ia: “Ko e Atua na e, kua mau hoku loto, kua mau hoku loto; to lologo atu au, mo e uhu lologo au. Ko e Iki na e, to fakaheke atu au kia koe ki mua he tau motu.” (Salamo 57:7, 9) Kia mau foki pihia a tautolu. Ke he fekafekauaga he tau 1997, ke he tau mena uka loga, ko e kalaga leo lahi he fakahekeaga ne lagaki hake e lilifu a Iehova ko e Atua. Kia tatai ai, e kalaga leo lahi, po ke lahi atu, ke logona he fekafekauaga he tau fou i mua. Kia moli ai e mena nei pete ni ko e heigoa e laliaga a Satani ke taute ke fakalolelole aki a tautolu po ke totoko ki a tautolu. Ti, to fakakite e tautolu kua tumau e tau loto ha tautolu ke tonu tuga e loto ha Iehu ne Mua, ko Iesu Keriso, mo e to tali atu a tautolu mo e solu katoa ha tautolu ke he fakamafanaaga he agaga: “Kia fiafia kia Iehova, mo e olioli a mutolu kua tututonu; kia kalaga mo e fiafia a mutolu oti kua loto fakamoli.”—Salamo 32:11.
Maeke Nakai a Koe ke Fakamaama
◻ Ko e heigoa e tau hikihikiaga ne hoko i Isaraela he 905 F.V.N.?
◻ Ko hai a Iehu he vaha fou nei, mo e fakakite fefe he “moto tagata tokologa” kua ‘tonu e loto’ ha lautolu tuga e loto hana?
◻ Ko e heigoa e tau numera ne kua fakatata e fakamakamaka he Tau Fakamoli a Iehova he tau he fekafekauaga he 1997?
◻ Ko e heigoa ni e mena ne taute e Satani ki a tautolu, ko e heigoa e aga ka fakakite e tautolu he hokotaki he tau he fekafekauaga he 1998?
[Fakatino he lau 29]
Ko e fakalataha atu kua kehe lahi ke he Fakamanatuaga kua fakakite e tau fakamonuinaga mitaki ma e tupuaga anoiha
[Fakatino he lau 30]
Ha kua lagomatai e Ionatapu a Iehu, ko e “moto tagata tokologa” he vaha nei kua lata ke lagomatai a Iehu ne Mua, ko Iesu Keriso, mo e hana a tau matakainaga fakauku