Moui ke he Tukuleleaga Kerisiano he Tokanoaaga

“Ko e mena ha i ai e Agaga he Iki ha ha i ai e tokanoaaga.”​—2 KORINITO 3:17.

1. Ko hai ne tukulele e Tau Fakamoli a Iehova ki ai, mo e ko e ha ne fakaaoga e lautolu e tau hukui fakamatafakatufono?

KUA talitonu e Tau Fakamoli a Iehova to tumau tukulagi e lotu ha lautolu. Ko e mena ia kua talifaki a lautolu ke fekafekau tukulagi tukumuitea ke he Atua “mo e agaga mo e fakamoli.” (Ioane 4:23, 24) Ko e tau tagata tokanoa, kua taute ai he tau Kerisiano nei e tukuleleaga katoatoa ki a Iehova ko e Atua mo e fakamalolo ke moui ki ai. Ke he mena ia, kua falanaki a lautolu ke he Kupu he Atua mo e hana agaga tapu. He tumau katoatoa a lautolu ke he ha lautolu a tukuleleaga Kerisiano he tokanoaaga ne age he Atua, kua fakakite he Tau Fakamoli e fakalilifu kua lata ke he matagahua he “tau tui ne mua” he fakatufono mo e fakaaoga fakamitaki e tau puhala mo e tau foakiaga fakamatafakatufono. (Roma 13:1; Iakopo 1:25) Ke tuga anei, kua fakaaoga he Tau Fakamoli e Sosaiete he Kolo Toko mo kanavaakau fakamatafakatufono​—ko e taha ma e he tau motu kehekehe loga​—ke fakamalolo a lautolu ke fakakatoatoa ha lautolu a gahua ke lagomatai e tau katofia tagata ha lautolu, mua atu ke he tau puhala fakaagaga. Ka kua tukulele e Tau Fakamoli ke he Atua, nakai ke he ha hukui fakamatafakatufono, mo e to tukulagi e tukuleleaga ha lautolu ki a Iehova.

2. Ko e ha ne fakaaue lahi e Tau Fakamoli a Iehova ke he Sosaiete he Kolo Toko mo e tau hukui fakamatafakatufono pihia?

² Ko e tau fekafekau tukulele ke he Atua, kua lata e Tau Fakamoli a Iehova ke mumuitua e tau fakaakoaga a Iesu ke “o atu a mutolu ke eke e tau motu oti kana mo tutaki, ti papatiso atu a lautolu ke he higoa he Matua, mo e Tama, mo e Agaga Tapu; ti fakaako atu a mutolu kia lautolu.” (Mataio 28:19, 20) To tumau e gahua nei ato hoko e fakaotiaga he fakatokaaga he tau mena nei, ha kua talahau foki a Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti; ti hoko mai ai e fakaotiaga.” (Mataio 24:3, 14) He tau tau takitaha, kua foaki he tau fale lomi he Sosaiete he Kolo Toko mo e tau kau he fakatufono pihia ke he Tau Fakamoli a Iehova aki e totou miliona he tau Tohi Tapu, tau tohi, tau porosua, mo e tau mekasini ma e fakaaogaaga he gahua fakamatala ha lautolu he lalolagi katoa. Ko e tau puhala fakamatafakatufono nei kua eke ke mua atu e lagomatai ke he tau fekafekau tukulele he Atua ke momoui ke he ha lautolu a tukuleleaga ki a ia.

3. Ko e kakano fe ne fakaaoga fakamua he Tau Fakamoli a Iehova e tau kupu “ko e Sosaiete”?

³ Liga talahau taha tagata ko e puhala ne tala e Tau Fakamoli hagaao ke he Sosaiete he Kolo Toko​—po ke fa talahau “ko e Sosaiete”​—kua fakakite ai e onoonoaga ha lautolu ki ai ke mua atu he kanavaakau fakamatafakatufono. Nakai kia fioia e lautolu e naia ko e pule katoatoa he tau mena hagaao ke he tapuakiaga? Kua fakamahino mai he tohi Jehovah’s Witnesses​—Proclaimers of God’s Kingdom e manatu nei he fakamaama: “He magaaho ne hagaao e The Watchtower [Iuni 1, 1938] ke he ‘Ko e Sosaiete,’ kua kakano, nakai ko e kanavaakau fakamatafakatufono, ka ko e kau he tau Kerisiano fakauku ne fakatu e tuaga fakamatafakatufono ia mo e fakaaoga ai.”a Ti kua hagaao ai e talahauaga nei ke he “fekafekau fakamoli mo e loto matala.” (Mataio 24:45) Ko e kakano anei ne fakaaoga tumau he Tau Fakamoli e tau kupu “ko e Sosaiete.” Moli, ko e kautaha fakamatafakatufono mo e “fekafekau fakamoli mo e loto matala” ko e tau talahauaga nakai fehikitaki. Ko e tau ulu fakatonu he Sosaiete he Kolo Toko kua fifili, ka ko e Tau Fakamoli ne taute e “fekafekau fakamoli” kua fakauku he agaga tapu a Iehova.

4. (a) Fakamaama fefe he tokologa he Tau Fakamoli a Iehova a lautolu neke nakai maama mitaki? (e) Kia lagotatai he ha a tautolu he hagaao ke he puhala fakakupu?

⁴ Neke nakai maama mitaki, kua fakaeneene lahi e Tau Fakamoli a Iehova hagaao ke he puhala tutala ha lautolu. He nakai pehe, “na fakaako he Sosaiete,” kua tokologa e Tau Fakamoli ne manako ke fakaaoga e tau tala tuga anei, “ne talahau he Tohi Tapu” po ke, “kua maama e au e Tohi Tapu ke fakaako.” He puhala nei kua peehi e lautolu ko e igatia ni e Tau Fakamoli ke taute e fifiliaga fakatagata ke talia e tau fakaakoaga he Tohi Tapu neke fakakite e manatu fakavai kua mumui e Tau Fakamoli ke he pule he falu he tau vahega lotu. Moli ni, ko e tau talahauaga hagaao ke he puhala fakakupu kua nakai lata ke eke mo matakupu ke taufetoko ki ai. Ha ko e mena aoga ni e puhala fakakupu neke nakai moua e maama. Kua lata ai mo e lagotatai faka-Kerisiano. Ne tomatoma e Tohi Tapu ki a tautolu ke ‘aua neke taufetoko ke he tau kupu.’ (2 Timoteo 2:14, 15) Kua tohi foki he tau kupu Tohi Tapu e matapatu fakaakoaga nei: “Kaeke ke nakai vagahau atu ke he tau alelo ha mutolu e tau kupu maama, to iloa fefe e kupu kua fakamata[la] ai?”​—1 Korinito 14:9.

Fakamama he Agaga he Atua e Lata ma e Tau Matafakatufono

5. Ko e puhala fe ka maama ai e 1 Korinito 10:23?

⁵ “Kua pule e au ke he tau mena oti ke eke e au, ka e nakai aoga e tau mena oti,” he mailoga he aposetolo ko Paulo. Ti lafi e ia: “Kua pule e au ke he tau mena oti ke eke e au, ka e nakai fakamafana he tau mena oti.” (1 Korinito 10:23) Maali ai kua nakai pehe a Paulo kua pule a ia ke taute e tau mena ne fakatapu he Kupu he Atua. He fakatatai atu ke he falu he tau fakatufono 600 ne age ke he Isaraela i tuai, kua fiha maka e tau poakiaga ma­ama­teka ne takitaki e moui Kerisiano. Ka kua toka e tau lekua loga ke he manamanatuaga he tagata tokotaha. Ko e tagata ne kua taute e tukuleleaga ki a Iehova kua olioli e tokanoaaga ne fua mai he takitakiaga he agaga he Atua. He kua taute e kupu moli maana ni, ne mui e Kerisiano ke he hana manamanatuaga ne fakamahani ke he Tohi Tapu mo e falanaki ke he puhala he Atua mai he agaga tapu. Kua lagomatai he mena nei e Kerisiano tukulele ke fifili ko e heigoa ka “fakamafana” mo e “aoga” maana ni mo e falu foki. Kua mailoga tuai e ia, ko e fifiliaga ne taute e ia to lauia ai hana fakafetuiaga mo e Atua, ne tukulele a ia ki ai.

6. He tau feleveiaaga Kerisiano, fakatata fefe e tautolu kua taute tuai e tautolu e kupu moli ma tautolu ni?

⁶ Ne fakatata he Fakamoli kua taute e ia e kupu moli maana ni he tali hake he tau feleveiaaga Kerisiano. Fakamua, liga to fatiaki e ia e mena ne tohia he tohi ne fakaako ki ai. Ka fai magaaho ai, to holo atu a ia ke talahau e tau fakaakoaga Tohi Tapu ke he tau kupu ni hana. Ti kua foaki e ia e fakamoliaga kua fakagahuahua tuai e ia hana iloilo ke manamanatu, he nakai fatiaki noa e tau mena ne talahau he falu. Ke fakatokatoka e tau manatu ke he hana ni a tau kupu mo e talahau e tau kupu hako he kupu moli ne mai he loto ka fakafiafia a ia mo e fakakite kua mahino tuai he loto hana.​—Fakamatalaaga 12:10; fakatatai Roma 14:5e.

7. Ko e heigoa e tau fifiliaga ne kua tokanoa e tau fekafekau ha Iehova ke taute?

⁷ Kua omoomoi he fakaalofa ke he Atua mo e ha lautolu a tau katofia tagata e Tau Fakamoli a Iehova. (Mataio 22:36-40) Moli, kua putuputui ai a lautolu he pipiaga he fakaalofa tuga he Keriso ke eke mo tau matakainaga ne feoaki he lalolagi katoa. (Kolose 3:14; 1 Peteru 5:9) Ha ko e tagata tokanoa, kua takitokotaha ke fifili ni e ia ke fakapuloa e tala mitaki he Kautu he Atua, ke tu uho mai he tau mena fakapolitika, ke fakamamao mai he toto, ke kalo mai he falu puhala fakafiafia tino, mo e ke moui ke he tau tutuaga he Tohi Tapu. Nakai kua fakaohooho e tau fifiliaga nei ki a lautolu. Ko e tau fifiliaga anei ne ha ha he fakaholoaga he puhala moui ne fifili ni e lautolu nakai la ko e Tau Fakamoli ato uta e lautolu e lakaaga he tukuleleaga faka-Kerisiano.

Fakalago Kia ke he Kau Fakatufono?

8. Ko e heigoa e huhu ne lata ke fakamaama?

⁸ Ne fakakite fakamaali he Tohi Tapu kua nakai fekafekau e tau Kerisiano ke he Atua ha ko e peehiaga. Kua talahau ai: “Ko e Iki foki, ko e Agaga haia; ko e mena ha i ai e Agaga he Iki ha ha i ai e tokanoaaga.” (2 Korinito 3:17) Ka e felautatai fefe e mena nei ke he manatu he “fekafekau fakamoli mo e loto matala” mo e hana Kau Fakatufono?​—Mataio 24:45-47.

9, 10. (a) Fakagahuahua fefe e matapatu fakaakoaga ke he ulu pule he fakapotopotoaga Kerisiano? (e) Ko e heigoa ne moua he muitua ke he ulu pule he fakapotopotoaga Kerisiano he senetenari fakamua, mo e aoga fefe e mena nei?

⁹ Ke tali e huhu nei, kua lata ia tautolu ke tokaloto e matapatu fakaakoaga faka-Tohi Tapu ke he ulu pule. (1 Korinito 11:3) Ia Efeso 5:21-24, kua fakakite e Keriso mo “ulu he ekalesia,” ko ia kua “omaoma” ki ai. Kua maama he Tau Fakamoli a Iehova ko e fekafekau fakamoli mo e loto matala kua oko mai he tau matakainaga fakaagaga ha Iesu. (Heperu 2:10-13) Ko e vahega fekafekau fakamoli nei kua kotofa ke age ke he tau tagata he Atua e ‘tau mena kai fakaagaga ke he tau magaaho.’ He vaha fakahiku nei, ne kotofa he Keriso e fekafekau nei “ke pule ke he hana tau mena.” Ti ko e tuaga ia ati lata ai ha tagata ne talahau ko e Kerisiano ke fakalilifu ki ai.

¹⁰ Ko e kakano he ulu pule ke puipui e fakalatahaaga mo e fakamoli kua “eke e tau mena oti mo e fulufuluola mo e taute fakamitaki.” (1 Korinito 14:40) Ke moua e mena nei he senetenari fakamua, ko e numera he tau Kerisiano fakauku mai he vahega fekafekau fakamoli mo e loto matala kua fifili ke hukui e matakau katoa. He kua fakamoli he tau mena ne tutupu, ko e levekiaga ne taute he kau fakatufono nei he senetenari fakamua kua ha ha ai e fiafia mo e fakamonuina a Iehova. Ne talia fiafia he tau Kerisiano fakamua e fakaholoaga ia. E, kua talia fiafia mo e kua fakatulou ai a lautolu ke he tau fua mitaki ne taute.​—Gahua 15:1-32.

11. Kia onoono fefe ke he Kau Fakatufono he vaha fou nei?

¹¹ Kua pihia agaia e uho he fakaholoaga ia. He mogo fou nei, ko e tokohogofulu e tau Kerisiano fakauku he Tau Fakamoli a Iehova, ne kua fakafita tuai a lautolu oti ke he tau mena faka-Kerisiano. Kua foaki e lautolu e takitakiaga fakaagaga ke he Tau Fakamoli a Iehova, tuga ne taute he kau fakatufono he senetenari fakamua. (Gahua 16:4) Tuga e tau Kerisiano fakamua atu, kua hahaga fiafia atu e Tau Fakamoli ke he tau matakainaga tane motua he Kau Fakatufono ma e takitaki ne fakave ke he Tohi Tapu mo e takitakiaga ke he tau puhala he tapuakiaga. Ha ko e tau fekafekau ha Iehova mo e he Keriso e Kau Fakatufono, tuga e tau matakainaga Kerisiano ha lautolu, ne hataki mai e Tohi Tapu: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.”​—Heperu 13:17.

12. Kia igatia e tau Kerisiano takitaha ke foaki e fakalagoaga ki a hai?

¹² Kua kakano kia e tuaga he levekiaga ne kotofa he Tohi Tapu ke he Kau Fakatufono ko e lata e Tau Fakamoli a Iehova ke igatia ke foaki ki ai e fakalagoaga he hana tau gahua? Nakai pihia he hagaao ke he tau kupu a Paulo ke he tau Kerisiano i Roma: “Ko e ha kia he fakafili ai e koe hāu a matakainaga? ko koe na, po ke ha kia he fakalialia ai e koe hāu a matakainaga? ha ko e mena tutu a tautolu oti kana ki mua he nofoa fakafili [“he Atua,” NW] . . . to takitokotaha a tautolu mo e talatala atu hana mahani ke he Atua.”​—Roma 14:10-12.

13. Ko e ha ne hokotaki he Tau Fakamoli a Iehova e gahua fakamatala ha lautolu?

¹³ Nakai kia moli, kua amanaki ke he Tau Fakamoli takitaha ke hokotaki e gahua fakamatala ha lautolu? E, ka ko e kakano he mena nei kua fakamaama fakamitaki i loto he tama tohi Fakamoli, ne talahau: “Kua fiafia lahi e tau tutaki fakamua atu ha Iesu ke he tau hokotaki he holo ki mua he gahua fakamatala. (Mareko 6:30) Kua monuina ai e gahua, ne fakaputuputu e tau hokotaki mo e tau talahauaga he tau fakafitaaga fulufuluola ha lautolu ne fakalataha ke he fakamatalaaga he tala mitaki. . . . (Gahua 2:5-11, 41, 47; 6:7; 1:15; 4:4) . . . Kua mafanatia ha ma e tau Kerisiano gahua fakamoli ia ke logona e tau hokotaki he tau gahua hane fakakatoatoa! . . . Ke he puhala ia ni, ko e fakatokatokaaga ha Iehova he vaha fou nei kua mautali ke fakamau fakamitaki e tau hokotaki he gahua hane taute he fakamoliaga he Mataio 24:14.”

14, 15. (a) Hagaao fefe e 2 Korinito 1:24 ke he Kau Fakatufono? (e) Ko e heigoa kua fakave ki ai e tau fifiliaga fakatagata ne kua lata ke taute takitokotaha he tau Kerisiano, he mailoga e mena moli fe?

¹⁴ Ko e Kau Fakatufono ko e foakiaga fakaalofa mo e fakafifitakiaga he tua ne lata ke fifitaki. (Filipi 3:17; Heperu 13:7) He fakapiki ki ai mo e mumuitua ki a Keriso mo fifitakiaga, kua fakalea e lautolu e tau kupu a Paulo: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia; ha ko e tua kua tumau ai a mutolu.” (2 Korinito 1:24) He mailoga e tau puhala, kua hagaao ai e Kau Fakatufono ke he aoga he oma e fakatonutonu he Tohi Tapu, foaki e tau talahauaga hagaao ke he fakagahuaaga he tau matafakatufono mo e tau matapatu fakaakoaga he Tohi Tapu, hataki ke he tau matematekelea galo, mo e foaki e fakamaloloaga ne lata mo “lautolu” ne gahua auloa. Kua fakahoko ai hana a fekau, mo e lagomatai a lautolu ke fiafia mau, mo e ati hake a lautolu ke tumau a lautolu ke he tua.​—1 Korinito 4:1, 2; Tito 1:7-9.

¹⁵ Kaeke ke taute he Fakamoli e tau fifiliaga ne fakave ke he fakatonuaga he Tohi Tapu ne foaki he Kau Fakatufono, kua taute pihia ai ha ko e hana ni a fifiliaga kakano ko e fakaako ni hana ke he Tohi Tapu ati talia tonu ai a ia ko e puhala mitaki anei. Kua igatia e Fakamoli ke fakaohooho he Kupu he Atua ke fakagahua e fakatonuaga he Tohi Tapu kua lata ne foaki he Kau Fakatufono, he mailoga katoa ko e tau fifiliaga ne taute e ia to lauia ai hana ni a fakafetuiaga mo e Atua, ne tukulele a ia ki ai.​—1 Tesalonia 2:13.

Tau Tagata Fakaako mo e Tau Kautau

16. Pete ni ko e tau fifiliaga ni he tagata a ia ke he mahani, ko e ha kua tuku ai e falu ki tua?

¹⁶ Ka e kaeke ko e tau fifiliaga ni he tagata a ia ke he mahani, ko e ha ne tuku ki tua e falu he Tau Fakamoli a Iehova? Nakai fai tagata ke fifili noa kua lata tuai ke tuku ki tua ka taute taha agahala pauaki. Ka kua mai he Tohi Tapu ke tuku ki tua he magaaho ni ka nakai tokihala e tagata he fakapotopotoaga ne taute e tau hala kelea muitui, tuga ia ne tohi he veveheaga ke 5 aki he tohi Fakamua a Korinito. Ti, ka tuku ki tua e Kerisiano ha ko e feuaki, to hokotia laia e mena nei kaeke ke nakai mahalo e tagata ke talia e lagomatai fakaagaga he tau leveki fakaalofa. Nakai ni ko e Tau Fakamoli a Iehova ne hokotia ke he puhala faka-Kerisiano nei. Ne tohi he The Encyclopedia of Religion: “Ko e tonu he maaga ke puipui mai he tau tagata liuliu i ai ka fakahagahaga kelea e levekiaga he maaga. I loto he fakatokaaga fakalotu kua fa taute ai e tonu nei he talitonu to lauia e tuaga he tagata ki mua he Atua he hagahaga kelea nei [he tuku kehe].”

17, 18. Liga maeke fefe he lata tonu he tuku ki tua ke fakakite?

¹⁷ Ko e tau tagata fakaako he Tohi Tapu e Tau Fakamoli a Iehova. (Iosua 1:8; Salamo 1:2; Gahua 17:11) Liga fakatatai e fakaakoaga Tohi Tapu ne foaki he Kau Fakatufono ke he puhala fakaako he aoga ne fakatoka he matakau he fahi gahua fakaakoaga tama. Pete ni e nakai ko e kau tufono e punaaga he tau mena ne fakaako, ka kua fakatoka ai e puhala fakaako, fifili e puhala ke fakaako ai, mo e foaki e tau takitakiaga kua lata. Kaeke ke nakai mahalo pauaki taha ke fakalautatai atu ke he tau poakiaga he aoga, ka fakalavelave ma e falu he fanau fakaako, po ke fakama e aoga, lata a ia ke fakaoti. Kua ha ha he tau pule he aoga e tonu ke fifili e mena aoga ma e fanau fakaako oti.

¹⁸ Kehe mai he ko e tau tagata fakaako, ko e tau kautau ha Iesu Keriso e Tau Fakamoli a Iehova, ne kua fakaako ke “tau ke he tau mitaki kua lata mo e tua.” (1 Timoteo 6:12; 2 Timoteo 2:3) Ke lata, ka fakatumau e mahani nakai gali he kautau Kerisiano liga to hoko ke he nakai talia faka-Atua. Ha ko e tagata tokanoa ke fifili, ne fifili he kautau Kerisiano e manako hana, ka e moua ni e ia e tau fua he hana fifiliaga. Ne fakamaama e Paulo: “Nakai fakai ha tagata tau kua tau mo e fakalavelave e ia a ia ke he tau mena he mouiaga nai, kia fakafiafia e ia a ia ne fifili a ia ke eke mo tagata tau. Kaeke foki ke fetoko e taha ke he fetoko, nakai fakafoufou a ia ka nakai fetoko kua lata mo e fakatufono.” (2 Timoteo 2:4, 5) Ko e tau Kerisiano motua fakaagaga, fakalataha mo lautolu he Kau Fakatufono, kua tumau ke he pule he ha lautolu a Takitaki, ko Iesu Keriso, he kuku mau e ‘tau fakatufono’ ke moua e lautolu e palepale he moui tukulagi.​—Ioane 17:3; Fakakiteaga 2:10.

19. He kua kumikumi ke he tau mena moli hagaao ke he tukuleleaga he Kerisiano, ko e heigoa ke iloa tonu e tautolu?

¹⁹ Nakai kia fakamaali mai he tau mena kitia ko e tau fekafekau he Atua e Tau Fakamoli a Iehova, nakai he tau tagata? Ko e tau Kerisiano tukulele ne olioli e tokanoaaga ne fakatoka he Keriso ma lautolu, ne toka e lautolu e agaga he Atua mo e hana Kupu ke pule ke he tau momoui ha lautolu he fekafekau fakalataha a lautolu mo e ha lautolu tau matakainaga he fakapotopotoaga he Atua. (Salamo 133:1) Ko e kitia moli he mena nei kua lata ke uta kehe ha fakauaua hagaao ke he punaaga he ha lautolu a malolo. Mo e salamo, kua lologo ai a lautolu: “Ko Iehova, ko e haku a malolo ia, mo e haku a akau punuti; ne tua haku a loto kia ia, ti moua ai e au e lagomatai, ko ia ne fiafia ai hoku loto, ko ia foki ne fakaheke au ki ai ke he haku a lologo.”​—Salamo 28:7.

[Matahui Tala]

To Tali Fefe e Koe?

◻ Lagomatai fefe he Sosaiete he Kolo Toko mo e tau hukui fakamatafakatufono pihia e Tau Fakamoli a Iehova?

◻ Aoga fefe e tau Kerisiano mai he matagahua he Kau Fakatufono he Tau Fakamoli a Iehova?

◻ Ko e ha ne hokotaki he tau tagata ha Iehova ha lautolu a gahua fakamatala?

◻ I lalo he tau tutuaga fe ne kua lata mo e tuku ki tua he Kerisiano tukulele?

[Fakatino he lau 17]

Kua puipui he kau fakatufono he senetenari fakamua e fakalatahaaga he taofiaga

[Fakatino he lau 19]

He lalolagi katoa, hane olioli he Tau Fakamoli a Iehova e tokanoaaga ne kua fakatoka ai e Iesu a lautolu